नेकपा एमालेबाट नेता अइन्द्रसुन्दर नेम्बाङ पाँचथरमा प्रतिनिधिसभा सदस्य उम्मेदवार छन् ।
दोस्रो संविधानसभा सदस्य नेम्बाङ एमालेबाट प्रतिनिधिसभा निर्वाचन लड्न लागेको पहिलोपटक हो ।
उनको काँधमा पूर्वमन्त्री वसन्तकुमार नेम्बाङले २०७४ र २०७९ मा निकालेको जितको विरासत धान्दै एमालेको ‘ह्याट्रिक’ जितको जिम्मा अध्यक्ष केपी शर्मा ओलीले सुम्पिएका छन् ।
राष्ट्रियता, संविधान, लोकतन्त्र र जनअधिकारको रक्षा गर्दै पाँचथरको समग्र विकासका लागि आफ्नो उम्मेदवारी भएको बताउने नेम्बाङले एमालेको संगठनात्मक शक्ति, कार्यकर्ताको एकता र जनताको समर्थनका कारण आफू निर्वाचित हुने दाबी गरे ।
यसबाहेक संसदीय तथा संगठनात्मक अनुभव, जनस्तरसँगको घनिष्ठ सम्बन्धलाई पनि उलने आफ्नो मुख्य आधार मानेका रहेछन् ।
यदि चुनाव जिते पाँचथरमा शिक्षा, स्वास्थ्य, खानेपानी, रोजगारी र बसाइँसराइका समस्या समाधानमा आफ्नो भूमिका सशक्त हुने बताए ।
उनले प्रतिबद्धता व्यक्त गर्दै थप भने, ‘मेरो उम्मेदवारी समृद्ध, आधुनिक र विकसित पाँचथर बनाउन हो ।’ उनै नेम्बाङसँग गरिएको चुनावकेन्द्रित टेलिफोन संवादको सम्पादित अंश प्रस्तुत छ ।
आगामी २१ फागुनमा हुने प्रतिनिधिसभा निर्वाचनमा तपाईंको उम्मेदवारी किन ?
मेरो उम्मेदवारी चाहिँ राष्ट्रियता जोगाउन, संविधानको रक्षा गर्न, लोकतन्त्र जोगाउन र संविधानले नेपाली जनतालाई प्रदान गरेको अधिकारको रक्षा गर्न, यो मुलुकलाई सार्वभौमसत्ता सम्पन्न बनाएको छ, यो रक्षा गर्नलाई मेरो उम्मेदवारी हो ।
अर्को तर्फ पाँचथरको राजनीतिलाई नेतृत्व गर्नु छ, पाँचथरे जनताको नेतृत्व गर्नु छ, सिंगो पाँचथरलाई आधुनिक पाँचथर बनाउनु छ । समृद्ध नेपाल र सुखी नेपालीको नारालाई पूरा गर्नु छ । त्यसलाई सार्थक दिनको निम्ति पाँचथरमा धेरै काम गर्नुपर्छ । त्यो काम गर्नको निम्ति साँचो अर्थमा आधारभूत तहबाट म उठेँ । नेकपा एमालेजस्तो ठूलो पार्टीले प्रतिनिधिसभा सदस्यको रूपमा अहिले उम्मेदवारको रूपमा मलाई उठाएको छ ।
अर्कोेतिर यो चुनाव म जित्छु । त्यसको पहिलो कारण भनेको नेकपा एमाले पाँचथर एकताबद्ध छ । संगठनात्मक हिसाबले सबैभन्दा ठूलो संगठन भएको पार्टी नेकपा एमाले हो । कार्यकर्ताहरू एकताबद्ध छन् र मेरो उम्मेदवारी आइसकेपछि पाँचथरका जनता उत्साहित छन्, अत्यन्तै उत्साहित भएर नेकपा एमालेको मात्रै होइन, अन्य दलका साथीहरूसमेत हाम्रो साझा उम्मेदवार हो भन्ने हिसाबमा एकताबद्ध भएर लाग्नुभएको छ ।
अर्कोेतिर, नेपाली कांग्रेस, नेकपा माओवादीकै नेता कार्यकर्ता र मतदाताहरू के भन्छन् भने यो चुनाव लोकतन्त्र जोगाउने, संविधान जोगाउने र देश बनाउने र नबनाउनेहरूको बीचको हुन गइरहेको छ । त्यसकारणले यो मुलुकमा राष्ट्रियता जोगाउने, संविधान र लोकतन्त्र जोगाउने एक मात्र केपी ओली र केपी ओलीको दलका उम्मेदवारहरूलाई यसपटक हाम्रो सहानुभूति छ भन्नुभएको छ ।
मैले जित्नुपर्छ, देश जोगाउनुपर्छ, लोकतन्त्र जोगाउनुपर्छ भन्ने पाँचथरे जनताको चाहना छ । उहाँहरूको चाहनालाई पूरा गर्नको निम्ति म अगाडि बढिसकेको छु र विजयको झण्डा म गाड्छु ।
उसो भए २२ फागुनमा नतिजा आइसक्दा तपाईं प्रतिनिधिसभा सदस्य निर्वाचित भइसक्नुहुन्छ ?
त्यो पक्कै पनि ।
तर, यसपटक कांग्रेसबाट नरेन्द्र कुमार केरुङ, नेकपाबाट हर्क नेम्बाङ ‘मिक्सो’ र रास्वपाबाट महेन्द्रविक्रम थाम्सुहाङ, श्रम संस्कृतिबाट ब्रमिम सेर्मालगायत थुप्रै नयाँ नेताहरू पहिलोपटक चुनावी मैदानमा हुनुहुन्छ । तपाईंलाई जितमा कठिनाइ हुँदैन र ?
उहाँहरूभन्दा संसदीय अनुभव र अभ्यास म अगाडि हो । हिजो २०७० मै संविधानसभाको सदस्य भइसकेको र राष्ट्रिय राजनीतिमा नेकपा एमालेको तीन कार्यकाल केन्द्रीय सदस्य भएर, पाँचथरको इन्चार्ज भएर, लामो समयसम्म संगठित राजनीतिक अनुभव पनि भएको र सिंगो पाँचथरको घरघरमा, जनताको घर दैलोमा पुगेर प्रत्येक पाँचथरेली जनतासँग नमस्कार गरेर भेट गर्न सक्ने कार्यकर्ता पनि भएको नाताले उहाँहरूभन्दा मलाई धेरै सजिलो छ ।
पाँचथरेली जनताको सुख दुःखमा मर्दा पर्दादेखि लिएर सामाजिक क्षेत्रका कामहरूमा सबै ठाउँमा सहभागी भएर आएको छु । यो हिसाबले चिरपरिचित र सबै जनताको बीचमा घुलमिल गर्दै अहिलेसम्म आएको मेरो अनुभव र पाँचथरेली जनताले प्रत्येक सेकेन्ड तपाईंको विजय सुनिश्चित छ, हामी सहयोग गर्छौँ भन्नुको अर्थ मेरो प्रतिस्पर्धीहरूको बीचमा कुनै गाह्रो छ जस्तो मलाई लागेको छैन ।
जेन–जी विद्रोहले एमालेका अध्यक्ष केपी शर्मा ओली नेतृत्वको दुई तिहाइ बहुमतको सरकार ढाल्यो । विद्रोही जेन–जीको मूल एजेन्डा भ्रष्टाचार नियन्त्रण र सुशासन थियो । त्यसो हुँदा जेन–जी विद्रोहीहरूको तारो बनेको दल एमाले र उक्त दलको उम्मेदवार तपाईंको लागि नवपुस्ताका मतदाताको विश्वास लिन चुनौती छैन र ?
जेन–जी युवापुस्ताहरू पाँचथरमा सबै नेकपा एमालेमा आबद्ध भएका छन् । अहिले पनि म युवाहरूसँग अगाडि बढिरहेको छु । अहिले पनि यहाँ दुई गाडी युवाहरूसँगै हिँडेर चुनाव प्रचारप्रसारमा लागिरहेको छु । त्यसकारण जेन–जी युवाहरूको समर्थन मलाई छ र सबैभन्दा धेरै युवाहरू म सँग छन् । पाँचथरमा कुनै समस्या छैन ।
पाँचथरबाट बसाइँसराई डरलाग्दो गरी भइरहेको छ । खासगरी सुखाग्रस्त स्थानीय तहको कुम्मायक, तुम्बेवा, हिलियाङलगायत क्षेत्रबाट बसाइँसराई अधिक देखिन्छ । अन्य स्थानीय तहबाट बढीजसो शिक्षा, स्वास्थ्य जस्ता सेवा सुविधाका लागि तराईमा बसाइँसराई हुने गरेको देखिन्छ । तपाईँ पाँचथरको शिक्षा, स्वास्थ्य, खानेपानी जस्ता समस्या समाधानका लागि के गर्नुहुन्छ, निर्वाचित भएको अवस्थामा ?
हाम्रो सरकारको पालामा श्रद्धेय अध्यक्ष केपी ओली प्रधानमन्त्री हुँदा कुम्मायकको ठूलो खानेपानी समस्या एक हदले समाधान गरेका छौं । त्यसलाई अझै व्यवस्थित गर्न बाँकी छ । ती कामहरू हुनेछन् ।
तुम्बेवाको पनि लगभग अब समाधानको दिशातिर गएको छ । त्यो हामी समाधान गर्छौँ । अर्कोतिर, शिक्षा क्षेत्रमा पाँचथरमा पनि राम्रै शैक्षिक संस्थाहरू खोलिएका छन् ।
यसलाई अझै स्तरोन्नति गर्ने र स्तरवृद्धि गर्ने काममा मेरो योगदान हुनेछ र स्वास्थ्य क्षेत्रको कुरा गर्नुहुन्छ भने नेकपा एमाले सरकारमा भएको बेला पाँचथर हस्पिटललाई यस क्षेत्रकै राम्रो हस्पिटलको रूपमा हामीले स्थापित गरेका छौं ।
ताप्लेजुङ र तेह्रथुमका जनताले समेत पाँचथर हस्पिटलको सेवा लिइरहनु भएको छ र पाँचथर हस्पिटल अहिले राम्रो हस्पिटलको रूपमा व्यवस्थित छ र समर्पित हस्पिटल छ, गणेशमान हस्पिटल छ । यी हस्पिटलहरूसमेत अहिले चाहिँ राम्रै सेवा प्रदायक हस्पिटल भएको हुनाले हामीले स्वास्थ्य क्षेत्रमा पनि उल्लेख्य प्रगति गरेका छौं ।
अर्को ठूलो समस्या भनेको बेरोजगारी हो । श्रम शक्ति युवा पुस्ताको विदेश पलायनले गाउँ रित्तो हुँदैछ । रोजगारी सिर्जनाको पाटोमा तपाईंको एजेन्डा के हो ?
नेकपा एमाले जहिले पनि युवाहरूलाई अगाडि बढाउने र बेरोजगारी समस्यालाई हल गर्ने सन्दर्भमा चिन्तित छ र सरकारमा हुँदा होस् या नहुँदा होस्, युवाहरूको बारेमा सधैं हामी आवाज उठाउँछौं र बेरोजगारी समस्यालाई हल गर्ने सन्दर्भमा र बसाइँसराई समेतलाई नियन्त्रण गर्ने सन्दर्भमा कृषि, पर्यटन, उद्योगलाई प्राथमिकतामा राखेर पाँचथरको बेरोजगारी समस्या हल गर्ने कुरामा हाम्रो भूमिका रहन्छ ।
अब तपाईंको चुनावी घोषणापत्र चाहिँ कहिले सार्वजनिक हुन्छ ?
हाम्रो प्रतिबद्धता पत्र सार्वजनिक केही समयपछि हुन्छ ।
घोषणापत्रमा जनतालाई भुलभुलैयामा पार्ने गरी फुलबुट्टाले भरिएको कार्यक्रम त हुनेवाला छैन होला नि ?
नेकपा एमालेले जहिल्यै जनतासँग गासेर, जनतासँग बसेर, जनताकै निम्ति काम गरेको हुनाले कुनै समस्या र सम्भव नहुने कामहरू हुँदैनन् र हामीले घोषणापत्रमा राखेका कुराहरू आजसम्म पूरा गर्दै आएका छौं ।
समृद्ध पाँचथर र विकसित पाँचथर बनाउने कार्यक्रम हुन्छ त्यहाँ ?
बनाउँछौं, बनाउँछौं । त्यति मात्रै हैन, आधुनिक पाँचथर पनि बनाउँछौं ।
