Tag: नेकपा एमाले

काठमाडौं । सत्तारुढ नेकपा एमाले विधान महाधिवेशनको दोस्रो दिनको सत्र सुरु भएको छ । केही बेरअघि सत्र सुरु भएको केन्द्रीय सदस्य विष्णु रिजालले जानकारी दिए ।

हिजै प्रस्तुत भएका प्रतिवेदनमाथि समूह बनाएर छलफल हुने उनले जानकारी दिएका छन् । ललितपुर, गोदावरीस्थित सनराइज हलमा आज दोस्रो दिन पनि हिजो बाँकी रहेका प्रतिवेदनको प्रस्तुतीकरण हुने छ ।

आज केन्द्रीय अनुशासन आयोगका तर्फबाट अध्यक्ष केशव बडाल, केन्द्रीय लेखा आयोगका तर्फबाट अध्यक्ष डा. पुष्प कँडेल र केन्द्रीय निर्वाचन आयोगका तर्फबाट अध्यक्ष डा. विजय सुब्बा आ–आफ्ना निकायको प्रतिवेदन प्रस्तुत गर्नेछन् ।

महाधिवेशनको पहिलो दिन शुक्रबार प्रधानमन्त्री एवं पार्टी अध्यक्ष केपी शर्मा ओलीले राजनीतिक प्रतिवेदन, पार्टीका उपाध्यक्ष एवं उपप्रधानमन्त्री तथा अर्थमन्त्री विष्णुप्रसाद पौडेलले विधान संशोधनसम्बन्धी प्रस्ताव र महासचिव पोखरेलले सङ्गठनात्मक प्रतिवेदन र केन्द्रीय सल्लाहकार परिषद्का अध्यक्ष अमृतकुमार बोहोराले प्रतिवेदन प्रस्तुत गरेका थिए ।

आजै प्रतिनिधिलाई विभिन्न १० समूहमा विभाजन गरी प्रतिवेदनमाथि समूहगत छलफल शुरु भएको छ । ‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ मूल नारासहित हिजोदेखि एमालेको दोस्रो विधान महाधिवेशन शुरु भएको हो ।

महाधिवेशनमा देशभरिका दुई हजार २६ जना प्रतिनिधि र आयोजकका हैसियतमा ३१५ जना थप गरी कूल दुई हजार ३४१ जनाको सहभागिता रहेको छ । महाधिवेशन भोलि (आइतबार) सम्म सञ्चालन हुनेछ ।

काठमाडौं । सत्तारुढ नेकपा एमालेको विधान महाधिवेशनको दोस्रो दिन आज (शनिबार) तीन प्रतिवेदन प्रस्तुत हुँदैछन् । ललितपुरको गोदावरीस्थित सनराइज सभा हलमा शुक्रबारदेखि सुरु भएको एमालेको दोस्रो विधान महाधिवेशनको पहिलो दिन शुक्रबार पार्टी अध्यक्ष केपी शर्मा ओलीसहितका नेताले विभिन्न प्रतिवेदन प्रस्तुत गरेका छन् ।

‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ मूल नारासहित सुरु एमालेको विधान महाधिवेशनमा दुई हजार २६ प्रतिनिधि र आयोजकका ३१५ गरी कुल २,३४१ जना सहभागी छन् ।

आज बिहान ८ बजेदेखि सुरु हुने दोस्रो दिनको कार्यक्रममा निर्वाचन आयोग, लेखा आयोग र अनुशासन आयोगको प्रतिवेदन प्रस्तुत हुँदैछ । एमाले प्रचार विभाग प्रमुख राजेन्द्र गौतमका अनुसार हिजै यी प्रतिवेदन प्रस्तुत गर्ने कार्यसूची रहे पनि समय अभावको कारण प्रस्तुत हुन पाएको थिएन ।

आज तीन प्रतिवेदनको प्रस्तुतीकरण सकिएपछि सबै प्रतिवेदनमाथि समूहगत छलफल गर्ने तयारी छ । हिजो अधिवेशन उद्घाटनसँगै प्रधानमन्त्री एवं पार्टी अध्यक्ष केपी शर्मा ओलीले राजनीतिक प्रतिवेदन प्रस्तुत गरेका छन् ।

त्यस्तै एमाले उपाध्यक्ष एवं उपप्रधानमन्त्री तथा अर्थमन्त्री विष्णुप्रसाद पौडेलले विधान संशोधनसम्बन्धी प्रस्ताव र महासचिव शंकर पोखरेलले सङ्गठनात्मक प्रतिवेदन प्रस्तुत गरेका छन् । आज केन्द्रीय अनुशासन आयोगका तर्फबाट अध्यक्ष केशव वडाल, केन्द्रीय लेखा आयोगका तर्फबाट अध्यक्ष डा.पुष्प कँडेल र केन्द्रीय निर्वाचन आयोगका तर्फबाट अध्यक्ष डा.विजय सुब्बाले प्रतिवेदन प्रस्तुत गर्ने तयारी छ ।

एमालेले विधान महाधिवेशन भोलिसम्ममा सक्ने तयारी गरेको छ । हिजो उद्घाटन मन्तव्यको क्रममा पार्टी अध्यक्ष ओलीले आइतबारसम्म जसरी पनि अधिवेशन सक्नु पर्नेमा जोड दिएका छन् । पूर्व राष्ट्रपति विद्यादेवी भण्डारीले यो विधान महाधिवेशनमा आफू पनि सहभागी हुन जोडबल गरेकी थिइन् । तर, एमालेले भण्डारीको पार्टी सदस्यता नै रद्द गरेपछि भण्डारीसँगै उनी पक्षीय नेता–कार्यकर्ता रुष्ट छन् ।

नेकपा एमालेको सचिवालय बैठकले पार्टी सदस्य नरहेको व्यक्ति विधान अधिवेशनमा सहभागी हुन नसक्ने निर्णय गरेपछि भण्डारी महाधिवेशनमा सहभागी हुनबाट बञ्चित भएकी हुन् । पार्टीको दोस्रो विधान अधिवेशनमा सहभागी हुनबाट आफूलाई वञ्चित गरिएको भन्दै भण्डारीले महाधिवेशनस्थलमै शुभकामना सन्देश बाँडेकी छन् । उनले आफ्नो चिठी अध्ययन गर्न पनि महाधिवेशनका प्रतिनिधिलाई आग्रह गरेकी छन् ।

काठमाडौं । नेकपा एमालेका अध्यक्ष समेत रहेका प्रधानमन्त्री केपी शर्मा ओलीले राष्ट्रिय स्वतन्त्र पार्टी रास्वपा) लाई लक्षित गर्दै इतिहास नभएको पार्टी भनेका छन् । पार्टीको विधान महाधिवेशनको उद्घाटन समारोहलाई सम्बोधन गर्दै ओलीले इतिहास न हिजो न आज छ भन्दै टिप्पणी गरेका हुन् ।

‘जसको न इतिहास थियो, न इतिहास छ । कसैले आरीबाट घोप्टाइ दिएका त्यस्ता तत्वको बहाब आएको छ,’ उनले भने,‘’के को बहाब आएको हो–ती तत्वको छानविन गर्दै जाने हो ।’ अध्यक्ष ओलीले रास्वपालाई लक्षित गर्दै ‘हाँडीबाट घोप्ट्याएपछिको भेल बाढी जस्तो’ भन्दै टिप्पणी गरेका छन् । ‘त्यस्ता तत्वको बहाव आएको छ रे !’ भनेर भ्रममा नपर्न उनले आग्रह गरे ।

‘के को बहाब ? यी तत्वहरूको छानबिन गर्दै जाने हो भने बिस्तारै प्रकट हुँदै जान्छन्, कस्ता तत्व हुन भनेर,’ उनले भने । त्यस्ता तत्व कस्ता हुन भनेर आफूले भनिरहनु नपर्ने पनि ओलीले बताए । उनले भने, ‘मैले भन्नु पर्दैन, अदालतले भनिराख्या छ । अरु कुराले भनिराखेको छ ।’ एमाले जस्तो पंक्ति नेपालको इतिहासमा सबैभन्दा पुरानो धार रहेको उनले दाबी गरे ।

काठमाडौं । नेकपा एमालेका अध्यक्ष तथा प्रधानमन्त्री केपी शर्मा ओलीले लिपुलेकको भूमि प्रयोग गरेर भारत र चीनले गर्न खोजेको व्यापारिक सम्झौताबारे आफूले स्पष्ट रुपमा चीनसँग स्पष्ट कुरा राखेको बताएका छन् । आज (शुक्रबार) बाट सुरु भएको पार्टीको विधान महाधिवेशनको उद्घाटन सत्रलाई सम्बोधन गर्ने क्रममा प्रधानमन्त्री ओलीले यस्तो बताएका हुन् ।

उनले आफू जुनसुकै देशको भ्रमणमा जाँदा पनि राष्ट्रको हितलाई फाइदा हुनेगरी मात्रै दृष्टिकोण बनाउने र आफ्ना कुरा प्रष्ट राख्ने गरेको दावी गरे । ‘यसपल्ट म चीन जाँदा पनि चीनका राष्ट्रपति सी चिनफिङसँगको औपचारिक वार्तामा मैले अरु कुरासँगै लिपुलेक सन्दर्भमा भारत र चीनबीच भएको सम्झौता, हाम्रो भूमिबाट दुईटा देशले व्यापारिक आदानप्रदान गर्ने भन्ने कुरा गर्न मिल्दैन भन्ने कुरा मैले स्पष्ट ढंगले राखेको छु,’ प्रधानमन्त्री ओलीले भने, ‘यो कुरा रेकर्डेड छ । अडियोमा छ, भिडियोमा छ, नोट, टिपोटहरूमा छ ।’

राष्ट्रपति सीले पनि भारत र नेपालबीचको विषय भएकाले कुटनीतिक रुपमा सल्ट्याउन भनेको उनले बताएका छन् । ‘चिनियाँ राष्ट्रपतिले त्यसको जवाफ दिँदा हामी नेपालको सार्वभौमसत्ताको सम्मान गर्छौं, यसबाट तपाईंहरूलाई जुन आशंका हुन गएको छ त्यसमा हाम्रो ध्यान छ,’ प्रधानमन्त्री ओलीले भने, ‘कुनै राष्ट्रिय सार्वभौमसत्तामा तलमाथि हुन दिइने छैन । त्यसमा हामी सम्पूर्ण रुपमा समर्थन गर्छौं । यो भारत र नेपालको विषय हो तपाईंहरू वार्ताबाट समाधान गर्नु हुन्छ भन्ने आशामा छौं ।’ उनले सीमाबारे भारतसँग कुरा गरेर समस्याको समाधान गर्ने बताए ।

काठमाडौं । प्रधानमन्त्री समेत रहेका नेकपा एमालेका अध्यक्ष केपी शर्मा ओलीले संकटको बेला पार्टी जोगाउने कुरामा सबैभन्दा बढी हाल महिलाको भएको बताएका छन् । आजदेखि ललितपुरको सनराइज हलमा सुरु भएको एमालेको दोस्रो विधान महाधिवेशनमा प्रतिवेदन प्रस्तुत गर्दै ओलीले यस्तो बताएका हुन् ।

‘मैले १०औँ महाधिवेशनमा धेरै स्पष्टताका साथ भनेको थिएँ, महिला दिदीबहिनीहरूको हात पार्टी जोगाउने कुरामा सबैभन्दा बढी छ । पुरुषहरूभन्दा महिला दिदीबहिनीहरूले अत्यन्तै स्पष्ट अडान राखेर पार्टीप्रतिको निष्ठा देखाउनु भयो’, अध्यक्ष ओलीले भने, ‘मैले पुरुष साथीहरूको योगदान छैन भनेको होइन, अवश्य छ, महिलाहरूले मात्रै होइन, पुरुषले पनि जोगाउनु भएको छ ।’

अध्यक्ष ओलीले नेकपा एकीकृत समाजवादी पार्टीका अध्यक्ष माधवकुमार नेपालसहितलाई पार्टीमा चोट पटक लगाएर गएको बताएका छन् । चोट लगाएर गए पनि कार्यकर्ता पंक्तिले त्यसलाई जोगाएको, बचाएको ओलीको भनाइ छ । ‘उनीहरूले केही चोट पटक लगाए, तर, कार्यकर्ता पंक्तिले बढो सजगताको साथ पार्टी जोगायो, बचायो । म कार्यकर्ता र नेतालाई धन्यवाद भन्न चाहन्छु, नेतृत्वप्रति सुदृढ विश्वास देखाउनु भयो,’ पार्टीको विधान महाधिवेशनलाई सम्बोधन गर्दै ओलीले भने, ‘त्यसबेला पार्टीप्रतिको निष्ठा, महिला दिदीबहिनीहरूले पार्टी जोगाउनु भयो । पुरुषको पनि योगदान छ । तर, महिलाहरूको अत्यधिक छ ।’

उनले पार्टीमा रहेका केही नेतालाई कुहिराको काग भएको टिप्पणी पनि गरेका छन् । ‘मुर्धन्य भनिएका नेता कुहिराको काग भए । नेताहरू कतिपय कहाँ–कहाँ पुगे । तर कार्यकर्ता त्यसरी बहकिएन्,’ उनले भने, ‘कार्यकर्ताले यो पार्टी बचाएर ल्याउनु भयो । तपाईहरूको आमत्मविश्वास देखेर मलाई आँट आएको छ । तपाईहरू भए पार्टी हाँक्न सक्छु । मलाई गर्व लाग्छ । मलाई केही भए पनि तपाईहरूले पार्टी हाक्नु हुन्छ भन्ने आत्मविश्वास ममा पलाएको छ ।’
पार्टीभित्र अहिले अनुशासन कम हुँदै गएको उनको भनाइ छ । ‘अहिले पार्टीभित्र अलिअलि अनुशासन कम हुँदै गएको छ । सक्रियतामा, आत्मविश्वासमा अलि कमी हुँदै गएको छ,’ उनले भने ।

काठमाडौं । सत्तारुढ नेकपा एमालेका अध्यक्ष केपी शर्मा ओलीले ०८४ को चुनावमा एकल बहुमत ल्याउने दावी गरेका छन् । पार्टीको दोस्रो विधान महाधिवेशनलाई सम्बोधन गर्दै कम्तीमा एकल बहुमत ल्याउने गरी लाग्न पार्टीपंक्तिलाई निर्देशन दिए । उनले भने, ‘हामी जनताको बीचमा सक्रियतापूर्वक गयौँ भने, हाम्रा सम्पूर्ण पार्टी र जनवर्गीय संगठनका कमिटी र कार्यकर्ताहरू परिचालन गरेर गर्‍यौं भने बहुमत ल्याउनबाट कसैले पनि हामीलाई रोक्न सक्दैन । हामी बहुमत ल्याउन सक्छौं।’

उनले अहिले पार्टीको नीति अनुसार राष्ट्र अघि बढेकाले विरोधीहरूले प्रहार गरेको बताएका छन् । उनले थपे, ‘हामी सरकारमा छौँ, चुनावमा कसैले धाँधली गर्न सक्दैन । हामी सरकारमा भएर धाँधली रोक्नेछौँ दृढताको साथ, निष्पक्ष, स्वतन्त्र र शान्तिपूर्ण निर्वाचन हुनेछ ।’ उनले एमालेको विषयमा हल्ला फिँजाएपछि मध्यपहाडी लोकमार्ग यात्रा गरेर तथ्य जाँच गरेको पनि बताएका छन् ।

‘एउटा अभियान चाल्यौ । विरोधीहरूले हल्ला फिँजाए जस्तै हाम्रो अवस्था त्यस्तै भएको हो कि भनेर हामीले जाँच्न खोजेका थियौँ,’ उनले भने, ‘हामी जनताका बीचमा आशाका केन्द्र राष्ट्रियताका लागि, सुशासन र विकासका लागि हरेक पक्षमा हामी जनताको आशाका केन्द्र हौं । समानता र न्यायका लागि हामी अग्रगामी हौं ।’

उनले देशको अर्थतन्त्र समाजवाद उन्मुख भए पनि विकासशील भइनसकेको बताएका छन् । ‘हाम्रो अर्थतन्त्र समाजवाद उन्मुख छ । समाजवदामा पुग्या छैन, हामी विकासशील भएका छैनौँ,’ उनले भने, ‘०८३ मंसिरमा हामी बल्ल विकासशीलमा पुग्छौँ ।’ उनले ०८४ सालको निर्वाचनबाट एमालेलाई निर्णायक राष्ट्रिय शक्तिको रुपमा उभ्याउने पनि दावी गरे । ‘मिसन ०८४ लाई हामीले निर्णायक राष्ट्रिय शक्तिमा उभ्याउने छौँ । हाम्रा नीति नै राष्ट्रिय नीति हो’ उनले भने ।

काठमाडौं । सत्तारुढ नेकपा एमालेका अध्यक्ष केपी ओलीले प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई आफूसँग म्याजिक नम्बर रहेको भ्रम पर्न थालेपछि एमाले मुक्त गरिएको बताएका छन् । पार्टीको दोस्रो विधान महाधिवेशनलाई सम्बोधन गर्दै कांग्रेससँग आफूहरूले सहकार्य थालेपछि अस्थिरता र अराजकता नियन्त्रणमा आएको टिप्पणी गरेका छन् ।

उनले भने, ‘हामी ब्याक बेञ्चर जस्तो पछाडि बस्नु पर्ने अवस्था, नेपाली राजनीतिमा सहयोगीभन्दा माथि होइन भन्ने अवस्था, भन्दै खेरी भनिएको थियो, कांग्रेस एमालेको अगाडि हामीलाई समर्थन गर्नुको विकल्प छैन । कि एउटा समर्थन गर्छ कि अर्काले । भ्रम परेको थियो, आफूमा जादुमयी शक्ति छ भन्नेमा । भ्रम पर्न थालेको थियो आफ्नो संख्या म्याजिक नम्बर हो भन्ने १४ महिना अघिसम्म, त्यो अवस्था एमालेले चिरेको छ ।’ उनले पार्टीले समृद्ध नेपाल सुखी नेपालीको गन्तव्य बनाएर अघि बढेको बताए । उनले देशलाई समृद्धि बनाउने भन्दा ठुलो गन्तव्य अरू केही नभएको बताए ।

‘मलाई केही भए पनि तपाईंहरू हुनुहुन्छ, म ढुक्क छु’
प्रधानमन्त्री समेत रहेका एमाले अध्यक्ष ओलीले आफूलाई केही भए पनि पार्टी कार्यकर्ताहरूले संगठनलाई मजबुत रूपमा अगाडि बढाउने विश्वास व्यक्त गरेका छन् । उनले कार्यकर्ताको निष्ठा र समर्पणले आफूलाई गर्व महसुस भएको बताएका छन् ।

एमालेको दोस्रो विधान महाधिवेशन उद्घाटन गर्दै ओलीले पार्टी कार्यकर्ताप्रतिको आफ्नो भरोसा प्रष्ट पारे । उनले भने, ‘मलाई केही भइहाल्यो भने पनि तपाईंहरू हुनुहुन्छ, म ढुक्क छु । तपाईंहरूको निष्ठा देखेर गर्व लाग्छ ।’
तर ओलीले पछिल्लो समय पार्टीभित्र देखिएको कमजोरीप्रति असन्तुष्टि पनि व्यक्त गरे । उनले अनुशासनमा कमी आएको, कतिपय कार्यकर्तामा बेलगाम हुने प्रवृत्ति बढेको र आत्मविश्वासमा कमी देखिएको टिप्पणी गरे । उनले पार्टीको आगामी यात्रामा अनुशासन, निष्ठा र आत्मबल आवश्यक रहेको बताए ।

अध्यक्ष ओलीले महाधिवेशनले एमालेलाई अझ अनुशासित, अनुशासित मात्र नभई संगठनात्मक रूपमा सशक्त बनाउन निर्णायक योगदान दिने विश्वास व्यक्त गरे । उनले कार्यकर्ताहरूलाई पार्टीको भविष्य र मुलुकको स्थिरतामा आफ्नो भूमिका अझ मजबुत बनाउन आह्वान गरे । विधान महाधिवेशन आइतबारसम्म चल्नेछ । सो महाधिवेशनमा अध्यक्ष ओलीले राजनीतिक प्रस्ताव, महासचिव शंकर पोखरेलले संगठनात्मक प्रतिवेदन र उपाध्यक्ष विष्णु पौडेलले विधान संशोधन प्रस्ताव प्रस्तुत गर्ने कार्यक्रम छ । प्रतिनिधिहरूले यी सबै प्रस्तावमाथि समूहगत छलफल गर्नेछन् ।

काठमाडौं । सत्तारुढ नेकपा एमालेका अध्यक्ष केपी शर्मा ओलीले विधान महाधिवेशनमा विधि र विधानसँग सम्बन्धित विषय मात्रै उठ्ने स्पष्ट पारेका छन् । आजबाट सुरु भएको विधान महाधिवेशनको उद्घाटन सत्रलाई सम्बोधन गर्ने क्रममा प्रधानमन्त्री समेत रहेका अध्यक्ष ओलीले यस्तो बताएका हुन् ।

उनले पूर्व राष्ट्रपति विद्यादेवी भण्डारीको सदस्यता नवीकरणको विषयतर्फ इंकित गर्दै विधान महाधिवेशनमा यस्तो विषय नउठ्ने बताएका छन् । ‘केही विषयहरू उठेका छन् । ती विषयहरू विधान महाधिवेशन विधि र विधानसँग सम्बन्धित छैनन्,’ ओलीले भने । त्यस्ता विषयहरूमा अन्य कमिटीमा छलफल गर्ने ओलीले बताएका छन् ।

‘ती विषयहरू अन्यत्रै कमिटीगत छलफलका विषयहरू हुन् । अरु कमिटीहरूमा छलफल गर्दै जानेछन्,’ ओलीले भने । विधान महाधिवेशनलाई विषय केन्द्रित भएर अगाडि बढ्ने ओलीले जानकारी गराएका छन् । पूर्व राष्ट्रपति भण्डारीको सदस्यता नवीकरणको विषयमा पार्टीका दुई उपाध्यक्षहरू युवराज ज्ञवाली र सुरेन्द्र पाण्डेले फरक मत राखेका छन् । त्यस्तै, स्थायी कमिटी सदस्य कर्ण थापाले पनि फरक मत दर्ता गराएका छन् । ज्ञवाली र पाण्डेको फरक मतले विधान महाधिवेशनमा प्रवेश नपाउने बताइएको छ भने थापाको मतबारे पनि छलफल हुने एमालेले बताएको छ ।

काठमाडौं । सत्तारुढ नेकपा (एमाले) को दोस्रो विधान महाधिवेशनको उद्घाटन भएको छ । ललितपुरको सनराइज हलमा आयोजित विधान महाधिवेशनको प्रधानमन्त्री समेत रहेका पार्टी अध्यक्ष केपी शर्मा ओलीले उद्घाटन गरेका हुन् ।
तीन दिनसम्म चल्ने महाधिवेशनमा २०२६ जना प्रतिनिधि र आयोजकका हैसियतमा ३१५ जना गरी कुल २३४१ जना सहभागी छन् ।

शुक्रबार ललितपुरको गोदावरीमा सुरु भएको विधान महाधिवेशनमा अध्यक्ष केपी शर्मा ओलीले बोलिरहेका छन् । ओलीले राजनीतिक प्रस्ताव पेस गरेपछि अन्य प्रतिवेदन प्रस्तुतकर्ताहरूले प्रतिवेदन पेस गर्नेछन् । त्यसपछि सबै प्रतिवेदनहरूमाथि छलफल हुने बताइएको छ ।

काठमाडौं । सत्तारुढ नेकपा एमालेले यहि भदौं २० गतेदेखि सुरु हुने विधान महाधिवेशनको सबै तयारी पूरा भएको जनाएको छ। आज (बुधबार) पार्टी मुख्यालय च्यासलमा पत्रकार सम्मेलन गर्दै एमालेले ललितपुरको गोदावरीस्थित सनराइज हलमा भाद्र २० देखि २२ गतेसम्म हुने विधान महाधिवेशनको लागि सम्पूर्ण तयारी पूरा भएको जनाएको हो।

विधान महाधिवेशनमा दुई हजार २६ प्रतिनिधि र आयोजकका हैसियतमा ३१५ जना गरी कूल २,३४१ जनाको सहभागीता रहने एमाले प्रचार विभाग प्रमुख राजेन्द्र गौतमले जानकारी दिए। निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य भन्ने मूल नाराका साथ आयोजना गरिएको विधान महाधिवेशनको भाद्र २० गते ११ बजे एमाले अध्यक्ष एवं प्रधानमन्त्री केपी ओलीले उद्घाटन गर्ने कार्यक्रम रहेको गौतले बताए ।

अधिवेशनमा अध्यक्ष ओलीले राजनीतिक प्रतिवेदन, उपाध्यक्ष विष्णु पौडेलले विधान संशोधन प्रस्ताव र महासचिव शंकर पोखरेलले संगठनात्मक प्रतिवेदन पेश गर्ने तय भएको छ । त्यस्तै बिभिन्न आयोगका संयोजकहरुले आफ्नो प्रतिवेदन पेश गर्ने र प्रतिवेदनमाथि समूहगत छलफल गरिने प्रचार बिभाग प्रमुख गौतमले बताए । पत्रकार सम्मेलनमा एमाले महासचिव शंकर पोखरेलले पूर्व राष्ट्रपति विद्या भण्डारीबारे केन्द्रीय कमिटी बैठकमा आएका फरक मत विधान महाधिवेशनमा छलफल गर्ने कि राष्ट्रिय महाधिवेशनमा गर्ने भन्नेबारे सचिवालय बैठकले टुङ्ग्याउने बताएका छन् ।

पोखरेलले पूर्व राष्ट्रपति भण्डारीको पार्टी सदस्यता खोसिएको नभई परित्याग गरेको विषय भएको उल्लेख गर्दै परित्याग गरेको विषयमा पूर्व राष्ट्रपति र उपराष्ट्रपतिको हकमा गरेको फैसलामा पार्टी कायमै रहेको स्पष्ट पारे । विधान महाधिवेशनमा अध्यक्ष ओलीले प्रस्तुत गर्ने राजनीतिक प्रतिवेदनले विकसित राष्ट्रिय तथा अन्तर्राष्ट्रिय परिस्थितिको विश्लेषण गर्दै आजका मुख्य चुनौती, पार्टीको कार्यदिशा र कार्यभार स्पष्ट गर्ने एमालेले जनाएको छ ।

त्यस्तै, उपाध्यक्ष पौडेलले प्रस्तुत गर्ने विधान संशोधन सम्बन्धी प्रस्तावमा ७० वर्षे उमेरहद नरहने, २५१ सदस्यीय केन्द्रीय कमिटी, त्यसको एक तिहाइ पोलिटब्यूरो र १५ जना केन्द्रीय पदाधिकारीको स्थायी कमिटी रहने लगायतको नयाँ व्यवस्था प्रस्ताव गरिएको पत्रकार सम्मेलनमा जानकारी दिइएको छ ।

महाधिवेशनका लागि मञ्च सजावट, सचिवालयको व्यवस्थापन, स्वयंसेवकहरुको व्यवस्थापन, मेडिकल टिम, मिडिया सेन्टरको व्यवस्थापन, झाँकी प्रदर्शनको व्यवस्थापन, सातदोबाटो चोकबाट महाधिवेशन स्थलसम्म यातायातको व्यवस्था र सातदोबाटोदेखि महाधिवेशन स्थलसम्म विभिन्न पार्टी कमिटी र जनसंगठनहरुका तर्फबाट स्वागतद्वारका अतिरिक्त उपत्यकाका विभिन्न स्थानहरुमा स्वागत गेटहरु निर्माण लगायत आवश्यक सबै काम पूरा भएको बताइएको छ।

अधिवेशनमा पार्टीका तर्फबाट अध्यक्ष ओलीले राजनीतिक प्रतिवेदन, पार्टीका उपाध्यक्ष एवं उपप्रधानमन्त्री तथा अर्थमन्त्री विष्णुप्रसाद पौडेलले विधान संशोधन सम्बन्धी प्रस्ताव र महासचिव शंकर पोखरेलले संगठनात्मक प्रतिवेदन प्रस्तुत गर्ने छन् ।

त्यसै केन्द्रीय अनुशासन आयोगका तर्फबाट अध्यक्ष केशव वडाल, केन्द्रीय लेखा आयोगका तर्फबाट अध्यक्ष डा. पुष्प कँडेल, केन्द्रीय निर्वाचन आयोगका तर्फबाट अध्यक्ष डा. विजय सुब्बा र केन्द्रीय सल्लाहकार परिषदका अध्यक्ष अमृतकुमार बोहोराले आ–आफ्ना निकायको प्रतिवेदन प्रस्तुत गर्ने छन् ।

महाधिवेशनमा सहभागी प्रतिनिधिहरुबीच समूहगत छलफल गर्ने व्यवस्था मिलाइएको छ । विधान महाधिवेशनले केन्द्रीय निर्वाचन आयोगको भावी नेतृत्व समेत निर्वाचित गर्नेछ । विधान महाधिवेशनलाई भव्यरुपमा सम्पन्न गर्नका लागि ८ वटा उपसमितिहरु निर्माण गरिएको बताइएको छ । केन्द्रीय संगठन विभागका प्रमुख काशीनाथ अधिकारीको नेतृत्वमा प्रतिनिधि व्यवस्थापन तथा अद्यावधिक सूचि तयार गर्ने काम सम्पन्न भएको छ ।

केन्द्रीय सम्पर्क समन्वय कमिटी इन्चार्ज लालबाबु पण्डितको नेतृत्वमा आवास व्यवस्थापन, जनसंगठन समन्वय संयन्त्रका प्रमुख भानुभक्त ढकालको नेतृत्वमा स्वयंसेवक परिचालन, स्वास्थ्य विभाग प्रमुख कृष्णगोपाल श्रेष्ठको नेतृत्वमा स्वास्थ्य व्यवस्थापन, प्रचार तथा प्रकाशन विभाग प्रमुख राजेन्द्र गौतमको नेतृत्वमा प्रचार व्यवस्थापन, मजदुर फॉट प्रमुख विनोद श्रेष्ठको नेतृत्वमा मञ्च तथा साजसज्जाको व्यवस्थापन, जनसाँस्कृतिक फाँट प्रमुख हेमराज राईको नेतृत्वमा साँस्कृतिक कार्यक्रम र झाँकी व्यवस्थापन र केन्द्रीय कार्यालय सचिव डा. भीष्म अधिकारीको नेतृत्वमा खाद्य र सचिवालय व्यवस्थापन हुनेछ।