Tag: नेकपा एमाले

काठमाडौं । नेकपा एमालेको ११ औं महाधिवेशन अन्तर्गत नयाँ नेतृत्व चयनका लागि भृकुटीमण्डपमा विद्युतीय मेशिनमार्फत मतदान सुरु भएको छ । बिहान ८ बजेदेखि सुरु हुने भनिएको मतदान केही ढिला गरी बिहान साढे ९ बजेदेखि सुरु भएको हो । मतदानस्थलमा ८० वटा भोटिङ मेशिन राखिएका छन् र मतदान सम्पन्न हुन ६ देखि ८ घण्टा लाग्ने अनुमान गरिएको छ । मतदान सकिएलगत्तै मतगणना सुरु भई करिब २ घण्टाभित्र नतिजा आउने बताइएको छ।

अध्यक्षका दाबेदार केपी शर्मा ओली र ईश्वर पोखरेलले लगभग बराबर समय लगाएर मतदान पूरा गरेका छन् । प्राविधिक लक्ष्मण रिमालका अनुसार ओलीले सबै पदमा भोट हाल्न करिब ४० मिनेट समय लिएका थिए भने पोखरेलले पनि झण्डै उस्तै समय खर्च गरेका थिए । उनीहरू दुवैले सँगसँगै मतदान सुरु गरेको र करिब एकै समयमा मतदान सकिएको जनाइएको छ । ओलीले ७७ नम्बर र पोखरेलले ७६ नम्बर भोटिङ मेशिनमा मतदान गरेका थिए । ओली समूहबाट उपाध्यक्षका उम्मेदवार विष्णु पौडेलले करिब २५ मिनेटमा मतदान सकेका थिए भने पोखरेल समूहबाट महासचिवका उम्मेदवार सुरेन्द्र पाण्डेले करिब ३० मिनेट समय लिएका थिए । महासचिवका अर्का प्रत्यासी शंकर पोखरेलले ७५ नम्बर मेशिनमा मतदान गरेका छन् ।

यस महाधिवेशनमा १९ पदाधिकारीका लागि ४१ जना उम्मेदवार प्रतिष्पर्धामा छन् भने ३०१ केन्द्रीय सदस्य पदका लागि ६ सयभन्दा बढी उम्मेदवार मैदानमा छन् । सबै पदमा भोट हाल्न मतदाताले करिब साढे तीन सय पटकसम्म बटन थिच्नुपर्ने भएकाले मतदान प्रक्रिया समयलाग्दो बनेको छ ।

ओली प्यानलबाट उपाध्यक्षमा गुरु प्रसाद बराल, पृथ्वी सुब्बा गुरुङ, रघुजी पन्त, रामबहादुर थापा ‘बादल’ र विष्णुप्रसाद पौडेल उम्मेदवार छन् । महासचिवमा शंकर पोखरेल, उपमहासचिवमा रघुवीर महासेठ, लेखराज भट्ट र विष्णुप्रसाद रिमाल तथा सचिवमा खगराज अधिकारी, छविलाल विश्वकर्मा, पद्मा कुमारी अर्याल, भानुभक्त ढकाल, महेश बस्नेत, यामलाल कँडेल, राजन भट्टराई, शेरधन राई र हिक्मत कुमार कार्की उम्मेदवार रहेका छन् ।

पोखरेल प्यानलतर्फ उपाध्यक्षमा अरुण नेपाल, गोकर्ण विष्ट, टंकप्रसाद कार्की, डा. विन्दा पाण्डे र पर्शुराम मेघी गुरुङ उम्मेदवार छन् । महासचिवमा सुरेन्द्र पाण्डे, उपमहासचिवमा योगेश भट्टराई, वैजनाथ चौधरी र आनन्द पोखरेल तथा सचिवमा अग्नि खरेल, इन्द्रलाल सापकोटा, कर्णबहादुर थापा, कृष्णगोपाल श्रेष्ठ, गोकुलप्रसाद बास्कोटा, ठाकुरप्रसाद गैरे, पुरुषोत्तम पौडेल, रचना खड्का र विनोद ढकाल उम्मेदवार बनेका छन् । मतदान प्रक्रियामा अध्यक्षदेखि केन्द्रीय सदस्यसम्म सबै पदमा प्रतिष्पर्धा कडा देखिएको छ भने नेतृत्व चयनको अन्तिम नतिजाप्रति कार्यकर्ता र नेताहरूको चासो बढ्दो छ ।

 

 

काठमाडौं । नेकपा एमालेको जारी एघारौं महाधिवेशनबाट नयाँ नेतृत्व चयनका लागि आज बिहान ८ बजेदेखि मतदान हुने भएको छ । मंगलबार साँझ नै मतदान गर्ने तयारी भए पनि प्राविधिक कारण र मतदानस्थलको व्यवस्थापनका कारण प्रक्रिया स्थगित गरी बुधबार बिहानका लागि सारिएको हो ।

निर्वाचन कार्यतालिका अनुसार मंगलबार साँझ ७ बजेदेखि नै महाधिवेशन प्रतिनिधिहरू मतदानका लागि लाइनमा बसेका थिए । अध्यक्षका उम्मेदवार केपी शर्मा ओली र ईश्वर पोखरेल समेत मतदानस्थलमा उपस्थित थिए । तर करिब सवा ८ बजे महासचिव शंकर पोखरेलले प्राविधिक समस्या र मौसमको चिसोपनका कारण मतदान भोलि बिहानसम्मका लागि स्थगित गरिएको जानकारी गराएका थिए ।

एमालेले यस पटक पनि रामलक्ष्मण इनोभेसन प्रालिले निर्माण गरेको विद्युतीय भोटिङ मेशिन प्रयोग गर्दैछ । ८० वटा इलेक्ट्रोनिक भोटिङ मेशिनमार्फत २ हजार २६२ जना महाधिवेशन प्रतिनिधिले मतदान गर्नेछन् । प्राविधिक लक्ष्मण रिमालका अनुसार उम्मेदवारहरूको विवरण, मतदाता नामावली, क्लस्टर व्यवस्थापन जस्ता डाटा इन्ट्री समयमै पूरा गर्न नसकिएकाले मतदान सुरु गर्न ढिलाइ भएको हो । अहिले भने सबै डाटा इन्ट्री सकिएर उपकरण तयारी अवस्थामा पुगेको उनले बताएका छन् ।

मतदानस्थल पनि परिवर्तन गरिएको छ । मंगलबार मेशिन राखिएको हल बुधबार बिहान खाली गर्नुपर्ने भएकाले भृकुटीमण्डप परिसरभित्रै अर्को हलमा मेशिन सारेर मतदान गरिनेछ । एक जना मतदातालाई मतदान गर्न करिब ३५ देखि ४० मिनेट लाग्ने अनुमान गरिएको छ । मतदान सकिए लगत्तै मतगणना सुरु हुने र विद्युतीय प्रणाली भएकाले करिब दुई घण्टाभित्र नतिजा सार्वजनिक हुने एमालेले जनाएको छ ।

महाधिवेशनबाट एक अध्यक्ष, पाँच उपाध्यक्ष, एक महासचिव, तीन उपमहासचिव, नौ सचिव र ३०१ केन्द्रीय सदस्य चयन हुनेछन् । अध्यक्ष पदका लागि निवर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिष्पर्धा हुँदैछ । दुवै नेताले आ–आफ्नो प्यानल बनाएर उम्मेदवारी दिएका छन् ।

पाँच उपाध्यक्ष पदका लागि अरूण नेपाल, गुरुप्रसाद बराल, गोकर्ण विष्ट, टंकप्रसाद कार्की, परशुराम मेघी गुरुङ, पृथ्वीसुब्बा गुरुङ, भीमप्रसाद आचार्य, रघुजी पन्त, रामबहादुर थापा ‘बादल’, डा. विन्दा पाण्डे र विष्णु पौडेल उम्मेदवार छन् । महासचिव पदमा शंकर पोखरेल र सुरेन्द्रप्रसाद पाण्डे प्रतिष्पर्धामा छन् । त्यसैगरी उपमहासचिव पदका लागि आनन्दप्रसाद पोखरेल, योगेश भट्टराई, रघुवीर महासेठ, राजेन्द्रप्रसाद गौतम, लेखराज भट्ट, विष्णु रिमाल र वैजनाथ चौधरी उम्मेदवार छन्।

सचिव पदका लागि अग्निप्रसाद खरेल, इन्द्रलाल सापकोटा, कर्णबहादुर थापा, कृष्णगोपाल श्रेष्ठ, खगराज अधिकारी, गोकुलप्रसाद बास्कोटा, छविलाल विश्वकर्मा, ठाकुर गैरे, पद्माकुमारी अर्याल, पुरुषोत्तम पौडेल, पेम्बा लामा, भानुभक्त ढकाल, महेश बस्नेत, यामलाल कँडेल, रचना खड्का, राजन भट्टराई, लालबाबु पण्डित, विनोद ढकाल, शेरधन राई र हिक्मतकुमार कार्की प्रतिष्पर्धामा छन् । प्राविधिक तयारी पूरा भएसँगै आजको मतदानले एमालेको नयाँ नेतृत्व चयनको बाटो खोल्ने अपेक्षा गरिएको छ ।

काठमाडौं । नेकपा एमालेको केन्द्रीय सदस्यका लागि उम्मेदवारी दिएका धर्मलाल गिरीको पनि उम्मेदवारी खारेज भएको छ । यसअघि केन्द्रीय सदस्यमा उम्मेदवारी दिएका पासाङ शेर्पाको पनि उम्मेदवारी खारेज भएको थियो । त्यसो त केही केन्द्रीय सदस्यहरु सर्वसम्मत हुने भएका छन् । एमालेको केन्द्रीय निर्वाचन आयोगका उपाध्यक्ष सानुराज पोखरेलका अनुसार हालसम्म ११ जना सर्वसम्मत भएका छन् । त्यस्तै उपमहासचिवमा उम्मेदवारी दिएका एकसहित १४ जनाले उम्मेदवारी फिर्ता लिएका छन् । उपमहासचिव पदमा उम्मेदवारी दिएका राजेन्द्र गौतमले समेत उम्मेदवारी फिर्ता लिएका छन् ।

शनिबार भक्तपुरको सल्लाघारीमा उद्घाटन भएको महाधिवेशन आइतबारदेखि भृकुटीमण्डपमा जारी रहेको छ । एमालेको केन्द्रीय निर्वाच आयोगले निर्वाचन तालिकामा संशोधन गर्दै आज साँझ ७ बजेदेखि राति १ बजेसम्म मतदानको समय तोकिएको छ । नयाँ नेतृत्वका लागि एमाले अध्यक्षमा केपी शर्मा ओली र ईश्वर पोखरेलबिच प्रतिष्पर्धा हुँदैछ । विधान संशोधनपछि १९ सदस्यीय पदाधिकारीसहित ३०१ सदस्यीय केन्द्रीय कमिटी निर्वाचित हुँदैछ ।

 

 

 

 

काठमाडौं । नेकपा एमालेको महासचिवका आकांक्षी रहेका प्रदीप ज्ञवाली महासचिवको उम्मेदवार बनेका शंकर पोखरेलसँग सँगै देखिएका छन् । भृकुटीमण्डपस्थित महाधिवेशनस्थलमा ज्ञवाली शंकर सँगै देखिएका हुन् । केपी शर्मा ओली समूहबाट उपाध्यक्षका उम्मेदवार बनाउन प्रस्ताव गरिए पनि ज्ञवालीले अस्वीकार गरेका थिए । अन्तिमसम्म महासचिवमा दावी गरेका ज्ञवालीले त्यो नपाएपछि केन्द्रीय सदस्यमा नोमिनेशन गरेका थिए । पोखरेललाई महासचिवको उम्मेदवार बनाएपछि ज्ञवाली असन्तुष्ट बनेका थिए ।

तर, मंगलवार बिहानै सामाजिक सञ्जालमा सन्देश लेखेर ज्ञवालीले ओली प्यानलका उम्मेदवारलाई जिताउन अपिल गरेका थिए । दिउँसो महासचिवका उम्मेदवार शंकरसँगै ज्ञवाली महाधिवेशनस्थलमा देखिएका हुन् । महासचिवमा ईश्वर पोखरेल समूहबाट सुरेन्द्र पाण्डेले प्रतिस्पर्धा गरेका छन् । महासचिवमा कडा प्रतिष्पर्धा हुने आकलन महाधिवेशन प्रतिनिधिले गरेका छन् । नेतृत्व चयनका लागि मंगलबार साँझ मतदान हुँदैछ ।

काठमाडौं । नेकपा एमालेको ११ औं महाधिवेशनमा केन्द्रीय सदस्य पदमा उम्मेदवारी दिएका पासाङ शेर्पाको उम्मेदवारी खारेज भएको छ । उनी बहुविवाहमा पक्राउ परी कैदवापतको रकम बुझाएर छुटेका थिए । उनलाई एक वर्ष जेल र ५ हजार जरिवानाको फैसला अदालतले गरेको थियो ।

उनलाई प्रहरीले कात्तिक १८ गते पक्राउ गरेको थियो । कैद वापत दिनको ३०० को दरले कूल एक लाख ९ हजार ५ सय बुझाएर उनी छुटेका थिए । उनले एमाले महाधिवेशनमा केन्द्रीय सदस्य पदमा उम्मेदवारी दिएका थिए। तर उनको उम्मेदवारी पार्टी निर्वाचन आयोगले मापदण्डविपरीत भन्दै खारेज गरिदिएको छ । उनी १० औं महाधिवेशनमा केन्द्रीय सदस्य थिए ।

काठमाडौं । नेकपा एमालेको एघारौँ महाधिवेशनअन्तर्गत नयाँ नेतृत्व चयनका लागि हुने भनिएको मतदान पटक–पटक सर्दै जाँदा अझै सुरु हुन सकेको छैन । सुरुमा मंगलबार दिउँसो १२ बजे, त्यसपछि ३ बजे र पुनः ४–५ बजेदेखि मतदान हुने भनिए पनि साँझसम्म पनि प्रक्रिया अघि बढ्न सकेको छैन । केन्द्रीय निर्वाचन आयोगका अनुसार उम्मेदवारको नाम, फोटो र विद्युतीय भोटिङ मेशिन (ईभीएम) को कोडिङमा समस्या देखिएपछि मतदान ढिलाइ भएको हो । आयोगका सचिव कुन्साङ लामाले प्राविधिक कठिनाइका कारण निर्धारित समयमा मतदान सुरु गर्न नसकिएको स्वीकार गर्दै ‘४ वा ५ बजेपछि जसरी पनि प्रक्रिया थाल्ने प्रयास भइरहेको’ जानकारी दिएका छन् ।

तर प्राविधिक पक्षमा संलग्न लक्ष्मण रिमालले भने नाम तलमाथि परेको, फोटो कोडिङ पुनः गर्नुपरेको जस्ता समस्याले काम लम्बिएको जानकारी दिए । उनका अनुसार सबै प्रक्रिया मिलाउन समय लागेकाले ‘राति ८ बजेदेखि मात्र मतदान सुरु हुन सक्ने’ सम्भावना छ । मतदानका लागि ८० वटा विद्युतीय भोटिङ मेशिन प्रयोग गरिँदैछ र मतदान सकिन ६–७ घण्टा लाग्ने अनुमान गरिएको छ । निर्वाचन कार्यक्रम भृकुटीमण्डपमा हुँदैछ । मतदान ढिलाइसँगै आन्तरिक राजनीति पनि चर्किएको छ । अध्यक्ष पदका उम्मेदवार ईश्वर पोखरेल पक्षले तत्काल मतदान सुरु गर्न माग गर्दै निर्वाचन आयोगको ध्यानाकर्षण गराएको छ । सो समूहकी नेतृ अष्टलक्ष्मी शाक्यका अनुसार ढिलाइको नाममा ओली पक्षबाट चलखेल भइरहेको आशंका व्यक्त गर्दै प्रक्रिया अविलम्ब अघि बढाउन दबाब दिइएको हो ।

महाधिवेशनमा अध्यक्ष पदका लागि केपी शर्मा ओली र वरिष्ठ उपाध्यक्ष ईश्वर पोखरेलबीच कडा प्रतिष्पर्धा हुँदैछ । यसैगरी पाँच उपाध्यक्ष, एक महासचिव, तीन उपमहासचिव, ९ सचिव, ३३ स्थायी कमिटी सदस्य, ९९ पोलिटब्युरो सदस्य र ३०१ केन्द्रीय सदस्य चयनका लागि मतदान हुनेछ । केन्द्रीय सदस्यमा ११ जना तथा अनुशासन र लेखा आयोगका ६ जना पदाधिकारी भने यसअघि नै निर्विरोध निर्वाचित भइसकेका छन् । मतदानको समय झन् लम्बिँदै जाँदा महाधिवेशनस्थलमा उपस्थित प्रतिनिधिहरूमा अन्योल र चासो बढ्दै गएको छ । अब निर्वाचन आयोगले कहिले औपचारिक रूपमा मतदान सुरु गर्छ भन्ने प्रश्न सबैको ध्यानको केन्द्रमा छ ।

काठमाडौं । नेकपा एमालेको ११ औं महाधिवेशनमा उपाध्यक्ष पदमा उम्मेदवारी दिएका रघुजी पन्तलाई अध्यक्ष केपी शर्मा ओली समूहमै समेटिएको छ। पन्त उपाध्यक्षका आकांक्षी थिए तर अध्यक्ष ओली समूहले बनाएको उम्मेदवार सूचीमा परेका थिएनन्। स्वतन्त्र रूपमा उम्मेदवारी दर्ता गरेका पन्तलाई अध्यक्ष ओली र ईश्वर पोखरेल समूहले आफ्नो टिममा पार्न कुरा गरेका थिए ।

अध्यक्ष ओलीले पन्तसँग सोमबार कुराकानी पनि गरेका थिए। नेता प्रदीप ज्ञवाली उपाध्यक्षमा उठ्न नमानेपछि ओली प्यानलमा एक पद खाली थियो । सो ठाउँमा रघुजी पन्तलाई समेटिएको ओली पक्षका नेताहरूले बताएका छन्। एमालेमा पाँच जना उपाध्यक्ष रहने व्यवस्था छ। ज्ञवालीले भने केन्द्रीय सदस्यमा मात्रै उम्मेदवारी दिएका छन्। ज्ञवालीले भने उपाध्यक्षमा उठ्न अस्वीकार गर्दै केन्द्रीय सदस्यमा मात्रै उम्मेदवारी दिएपछि पन्तको ढोका खुलेको हो।

 

काठमाडौं । नेकपा एमालेको ११ औं महाधिवेशनअन्तर्गत ४० वर्षमुनिका तीन युवा निर्विरोध भएका छन् । यसरी निर्विरोध निर्वाचित हुनेमा ४० वर्षमुनिका दुई मधेसी युवा समेत छन् । एमालेको ११ औं महाधिवेशनअन्तर्गत केन्द्रीय निर्वाचन आयोगले सार्वजनिक गरेको उम्मेदवारको अन्तिम नामावली अनुसार ४० वर्षमुनिका २ जना मधेसी युवाको पदमा दुई जनाको मात्र उम्मेदवारी परेको हो । जसअनुसार ४० वर्षमुनिका मधेसी युवामा अमर कुमार यादव र रौनित साह रहेका छन् ।

दुई जनाको पदमा दुई जनाको मात्रै उम्मेदवारी परेपछि उनीहरू निर्विरोध भएका हुन् । यस्तै ४० वर्षमुनिको युवाबााट एमाले केन्द्रीय सदस्यमा लीलामणि गौतम निर्विरोध निर्वाचित भएका छन् ।उनले लुम्बिनी प्रदेशबाट ४० वर्षमुनिको युवामा उम्मेदवारी हालेका थिए । धर्म गिरीले आफ्नो उम्मेदवारी फिर्ता लिएसँगै गौतम निर्विरोध निर्वाचित भएका हुन् ।

 

काठमाडौं । नेकपा एमालेका नेता तथा पूर्व उपमहासचिव प्रदीप ज्ञवालीले पार्टी केन्द्रीय कमिटी सदस्य पदका लागि प्रतिनिधिहरूसँग मत मागेका छन् । आज (मंगलबार) बिहान सामाजिक सञ्जाल फेसबुकमार्फत धारणा सार्वजनिक गर्दै उनले आफू मात्र होइन, अध्यक्ष केपी शर्मा ओलीको नेतृत्वमा रहेको समग्र टिमलाई पनि विजयी गराउन अपिल गरेका हुन् ।

११औं महाधिवेशनको सन्दर्भमा ज्ञवाली ओली टिमबाट महासचिवका आकांक्षी थिए । तर अध्यक्ष ओलीले महासचिवमा शंकर पोखरेललाई उम्मेदवार बनाएपछि ज्ञवालीलाई उपाध्यक्षको उम्मेदवारी प्रस्ताव गरिएको थियो । उक्त प्रस्ताव अस्वीकार गर्दै ज्ञवालीले सोमबार केन्द्रीय सदस्य पदमा मात्र उम्मेदवारी दर्ता गराएर भृकुटीमण्डपबाट बाहिरिएका थिए ।

फेसबुक स्ट्याटसमा ज्ञवालीले महाधिवेशनले पार्टीको आन्तरिक जीवन मात्र होइन, चुनौतीपूर्ण राष्ट्रिय राजनीतिमा समेत दूरगामी प्रभाव पार्ने उल्लेख गरेका छन् । उनले अध्यक्ष केपी शर्मा ओलीको नेतृत्वमा रहेको सम्पूर्ण टिमलाई शानदार मतका साथ विजयी गराउन प्रतिनिधिहरूलाई हार्दिक अपिल गरेका छन् । ‘म सधैं तपाईंहरूकै बीचमा छु, त्यहीं रहन्छु । यस पटक पार्टी केन्द्रीय कमिटीको सदस्य पदमा उम्मेदवारी दिएको छु । कमरेडहरूबाट मन र मत दुवै पाउने विश्वास लिएको छु,’ ज्ञवालीले लेखेका छन् ।

 

 

 

काठमाडौं । नेकपा एमालेको ११ औं महाधिवेशनअन्तर्गत नेतृत्व चयनका लागि हुने निर्वाचनको माहोल भृकुटीमण्डपमा तातेको छ । मतदान सुरु हुनुअघि नै उम्मेदवार, प्रतिनिधि र नेता–कार्यकर्ताको बाक्लो उपस्थिति देखिएको छ । अध्यक्षका उम्मेदवार ईश्वर पोखरेल मतदानस्थल पुगेपछि उनका समर्थकहरूले नाराबाजी गर्दै माहोल तताएका छन् ।

निर्वाचन कार्यतालिकाअनुसार मध्यान्ह १२ बजेदेखि मतदान सुरु हुने भनिए पनि प्राविधिक कारणले ढिलाइ भएको छ । एमाले प्रचार विभाग प्रमुख राजेन्द्र गौतमका अनुसार मतदान चार बजेतिर मात्र सुरु हुन सक्ने सम्भावना छ । मतदान ढिलो भए पनि महाधिवेशन प्रतिनिधिहरू बिहानैदेखि भृकुटीमण्डपमा जम्मा भएका छन् र उम्मेदवारहरूले मतदानस्थलमै बसेर भोट माग्ने क्रम तीव्र पारेका छन् । पोखरेलसँगै उनको प्यानलबाट महासचिवका उम्मेदवार सुरेन्द्र पाण्डे पनि मतदानस्थलमै सक्रिय देखिएका छन् । उनीहरू प्रतिनिधिहरूसँग प्रत्यक्ष भेटघाट गर्दै समर्थन जुटाउने प्रयासमा छन् । पोखरेल–पाण्डे समूह मैदानमै उत्रिएको बेला अध्यक्ष केपी शर्मा ओली पक्षका मुख्य उम्मेदवारहरू भने मतदानस्थलमा देखिएका छैनन् ।

ओली पक्ष भने आन्तरिक रूपमा रणनीति बनाउन व्यस्त रहेको बताइएको छ । टिम निर्माणका क्रममा आफ्नै पक्षका केही नेताहरू असन्तुष्ट भएपछि उनीहरूलाई मिलाउने प्रयासमा ओली समूह केन्द्रित भएको स्रोतहरूको भनाइ छ । यही कारण मतदानस्थलमा ओली पक्षको उपस्थिति कमजोर देखिएको छ । यद्यपि ओली पक्षका नेता प्रदीप ज्ञवाली भने भृकुटीमण्डप पुगिसकेका छन् । उनलाई देखेपछि महासचिवका उम्मेदवार सुरेन्द्र पाण्डेले सँगै फोटो खिच्न आग्रह गरेका थिए ।

यस दृश्यलाई धेरैले राजनीतिक सन्देशका रूपमा पनि हेरेका छन् । महासचिवमा दाबी गरेका ज्ञवालीलाई ओली पक्षले उपाध्यक्षमा उम्मेदवारका रूपमा अघि सारेपछि उनी असन्तुष्ट बनेका थिए । त्यसपछि उनले खुला तर्फ केन्द्रीय सदस्यमा उम्मेदवारी दिएका छन् । ज्ञवालीको असन्तुष्टिले महासचिव पदको प्रतिस्पर्धामा आफूलाई सहज भएको अनुभूति पाण्डे समूहले गरिरहेको छ । समग्रमा, मतदान सुरु हुनुअघि नै एमाले महाधिवेशन राजनीतिक शक्ति प्रदर्शन, आन्तरिक असन्तुष्टि र रणनीतिक चालहरूको केन्द्र बनेको छ । अब मतदान सुरु भएपछि प्रतिनिधिहरूको निर्णयले पार्टीको भावी नेतृत्व कुन दिशामा जान्छ भन्ने स्पष्ट हुनेछ ।

 

 

काठमाडौं । नेकपा एमालेका नेता शंकर पोखरेलले पार्टी आन्दोलन र राष्ट्रको रक्षाका लागि सबै जुट्ने बताएका छन् । एमाले महाधिवेशनमा दोस्रो पटक महासचिवमा उम्मेदवारी दिएका नेता पोखरेलले सामाजिक सञ्जालमार्फत् राष्ट्रको रक्षा नै सबैको कार्यभार रहेको बताएका हुन् ।

पोखरेलले फेसबुकमा लेखेका छन्, ‘पार्टी, आन्दोलन र राष्ट्रको रक्षा हामी सबैको कार्यभार हामी सबै जुट्नेछौँ, हामी सबै जित्नेछौँ ।’ आज काठमाडौँको भृकुटीमण्डपमा एमाले ११ औँ महाधिवेशनमा मतदान हुँदैछ । अध्यक्ष पदमा केपी शर्मा ओली र ईश्वर पोखरेलबिच प्रतिस्पर्धा हुँदैछ भने उनीहरूकै प्यानलबाट उपाध्यक्ष, महासचिवसहित अन्य पदहरूमा समेत उम्मेदवारी दर्ता भएको छ । निर्वाचनमा २ हजार २ सय ६३ जना महाधिवेशन प्रतिनिधि सहभागी हुनेछन् ।

काठमाडौं । नेकपा एमालेको ११औं महाधिवेशन अन्तर्गत उपमहासचिव पदको चुनावी प्रतिष्पर्धामा अन्तिम समयमा रोचक मोड आएको छ । स्वतन्त्र रूपमा उम्मेदवारी दिएका पूर्वमन्त्री आनन्द पोखरेल अब ईश्वर पोखरेल नेतृत्वको प्यानलमा समेटिएका छन् । यसअघि ईश्वर पोखरेल प्यानलबाट उपमहासचिव पदमा योगेश भट्टराई र बैजनाथ चौधरी मात्र उम्मेदवार थिए । तर महाधिवेशनको निर्णायक घडीमा आइपुग्दा आनन्द पोखरेललाई सोही प्यानलमा समावेश गरिएपछि प्रतिष्पर्धा थप चासोको विषय बनेको छ ।

आनन्द पोखरेल र बैजनाथ चौधरी दुवै यसअघि अध्यक्ष केपी शर्मा ओली निकट टिममा रहे पनि पछिल्लो समय पूर्व राष्ट्रपति विद्यादेवी भण्डारीको पार्टी सदस्यता निरन्तरताको पक्षमा खुलेर उभिएका कारण उनीहरूलाई पदाधिकारीमा अघि बढ्न अवरोध गरिएको बुझाइ नेताहरूको छ । यही कारण असन्तुष्टि जनाउँदै उनीहरूले यस्तो कदम चालेको बताइन्छ । बागमती प्रदेशमा राम्रो सांगठनिक पकड बनाएका पोखरेल देशभरका कार्यकर्ता माझ परिचित र स्वीकार्य नेता मानिन्छन् ।

यही प्रभावलाई मध्यनजर गर्दै ईश्वर पोखरेल प्यानलले उनलाई उपमहासचिव पदको उम्मेदवारका रूपमा समेटेको नेताहरूको भनाइ छ । पछिल्लो समय काठमाडौं जिल्ला इन्चार्जको जिम्मेवारी सम्हालेका पोखरेल र जिल्ला अध्यक्ष दीपक निरौला दुवै विद्या भण्डारी निकट मानिन्छन् । यस कारण काठमाडौंबाट आएका प्रतिनिधिमध्ये ठूलो हिस्सा उनीहरूकै धारमा रहेको आकलन गरिएको छ । दोलखा जिल्लाबाट दुई पटक सांसद निर्वाचित भइसकेका पोखरेल पर्यटन मन्त्रीको जिम्मेवारी सम्हालिसकेका अनुभवी नेता हुन् । हालसम्म पोलिटब्युरो सदस्य रहेका उनको ईश्वर प्यानलमा प्रवेशले उपमहासचिव पदको चुनावी समीकरणलाई थप रोचक बनाएको छ ।

 

काठमाडौं । नेकपा एमालेको ११ औं महाधिवेशनमा नयाँ नेतृत्वका लागि उपसमहासचिवम उम्मेदवारी दिएका राजेन्द्र गौतमले उम्मेदवारी फिर्ता लिएका छन् । उनले फेसबुकमार्फत उम्मेदवारी फिर्ता लिएको जानकारी दिएका हुन् । यद्यपि उम्मेदवारको अन्तिम नामावली प्रकाशन भइसकेका कारण मतपत्रमा उनको नाम भने रहनेछ । गौतम यसअघि एमालेको प्रचार विभाग प्रमुख हुन् । उनी केपी ओली टिमबाटै उपमहासचिवको आकांक्षी थिए ।

ओलीको टिमबाट रघुवीर महासेठ, लेखराज भट्ट, विष्णु रिमाल उपमहासचिवको उम्मेदवार बनेपछि गौतमले उपमहासचिव पदमै स्वतन्त्र उम्मेदवारी दिएका थिए । उनले भनेका छन्, ‘पार्टीको एघारौं महाधिवेशनको आज चौंथो दिन हो । राष्ट्रिय संकट, चौतर्फी घेराबन्दीको बीचमा भएको यो महाधिवेशनमा जनताले देखाएको अपार सहभागिता, जनसर्मथनप्रति रेड स्यालुट गर्दै केपी शर्मा ओलीको सिंगो टिमलाई विजय गराउन हार्दिक अपिल गर्दै, पार्टीको नेतृत्वको सुझाव र सल्लाहमा उपमहासचिवको पदको उम्मेदवारी फिर्ता गरेको छु, यसपटक पार्टीले तय गरेको खुला केन्द्रीय सदस्यमा अमूल्य मत पाउने विश्वास लिएको छु । धन्यवाद ।

काठमाडौं । नेकपा एमालेको ११ औं महाधिवेशनमा अध्यक्ष केपी शर्मा ओलीको प्यानलबाट खुला क्लस्टरको केन्द्रीय सदस्य उम्मेदवारमा परेका नेता अग्नि खरेलले सचिव पदमा उम्मेदवारी दिएका छन्। स्थायी कमिटी सदस्य तथा पूर्वमन्त्री खरेलले आफ्नो योगदानको मुल्यांकन हुनुपर्ने भन्दै अध्यक्ष ओलीसँग सचिवमा आकांक्षा राखेका थिए।

तर आफूभन्दा जुनियर व्यक्तिहरुलाई सचिव उम्मेदवार बनाइएपछि खरेलले देशभरका महाधिवेशन प्रतिनिधिबाट न्यायको याचना गरेका छन् । उनले आफू पछि नहट्नेगरी सचिवको उम्मेदवार बनेको समेत बताए। २०३६ सालमा पार्टी सदस्य लिएर निरन्तर काममा रहेको र सधैं अध्यक्ष ओलीलाई पार्टी तथा राजकीय काममा सघाएको भन्दै खरेलले सचिवको दावी गरेका थिए।

काठमाडौं । नेकपा एमालेका नेता गोकुल बास्कोटाले आफूलाई कित्ताकाट नगर्न आग्रह गर्दै स्पष्ट शब्दमा भनेका छन्, ‘मेरो कित्ता एमाले नै हो ।’ एमालेको ११औँ महाधिवेशन स्थलमा पत्रकारहरूसँग कुरा गर्दै उनले पार्टीभित्रको प्रतिष्पर्धालाई स्वाभाविक अभ्यासको रूपमा व्याख्या गरे । बास्कोटाले एमालेले निर्माण गरेको राजनीतिक जग र संस्कारभित्र रहेर प्रतिष्पर्धा हुनु अस्वाभाविक नभएको बताए । पद र जिम्मेवारीका विषयमा आकांक्षा हुनु सामान्य भए पनि त्यसलाई गलत अर्थ लगाएर विभाजनको रूपमा हेर्न नहुने उनको भनाइ थियो ।

उनले आफू ईश्वर पोखरेल र केपी ओलीको ‘जन्ती’ न मलामी’ भएको स्पष्ट पार्दै पार्टीभित्रको बहसलाई व्यक्तिगत कित्तामा बाँध्न खोज्नु अनुचित भएको बताए । पत्रकारले ‘तपाईं केपी शर्मा ओली पक्षको हो ?’ भनेर सोध्दा बास्कोटाले व्यंग्यात्मक शैलीमा जवाफ दिए, ‘सबै केपी शर्मा ओलीका हुन्, सबै ईश्वर पोखरेलका हुन् ।’ उनले थपे, ‘म जन्मिनुअघि नै उहाँहरू यो आन्दोलनमा लाग्नुभएको हो । त्यसैले मलाई किन कित्ताकाट गर्नुपर्छ ?’ एमालेको हरेक महाधिवेशनमा प्रतिष्पर्धाको अभ्यास हुँदै आएको उल्लेख गर्दै बास्कोटाले यो चुनाव एमालेभित्रकै लोकतान्त्रिक प्रक्रिया भएको बताए । ‘तपाईंहरू सबै पत्रकार हुनुहुन्छ, तर मिडियाको ब्रान्ड र अनुहार फरक–फरक छ । पार्टीभित्रको प्रतिष्पर्धा पनि त्यस्तै हो,’ उनले भने ।

उनले एमाले फेरिएको होइन, केवल समीकरण फेरिएको दाबी गरे । ‘एमालेको संस्कार फेरिएको छैन, एमालेप्रतिको जनविश्वास कमजोर भएको छैन,’ भन्दै उनले पार्टीलाई नजिकको विगत र टाढाको भविष्य दुवै कोणबाट हेर्न आग्रह गरे । एमालेको इतिहासलाई स्मरण गराउँदै बास्कोटाले भने, ‘एमालेको जीवनभित्र देशको लोकतन्त्र अटेको छ ।’ अन्त्यमा उनले उदाहरण दिँदै पत्रकारलाई प्रश्न गरे, ‘बाउ–छोरा एउटै घरमा बस्दा कहिलेकाहीँ दायाँबायाँ हुँदैमा के सबै सम्बन्ध तोडिन्छन् ?’

काठमाडौं । नेकपा एमालेका नेता रघुजी पन्तले ११ औं महाधिवेशनमा उपाध्यक्ष पदमा उम्मेदवारी दिने भएका छन् । केपी शर्मा ओली समूह छाडेर उनले वरिष्ठ उपाध्यक्ष ईश्वर पोखरेल पक्षबाट उपाध्यक्ष पदमा उम्मेदवारी दिने तयारी गरेका हुन् । उनले उपाध्यक्ष पदमा उम्मेदवारी दिन लागेको बताएका छन् । ‘उपाध्यक्ष पदमा उठ्न मैले मनोनयन फारम लिइसकें,’ उनले सुनाए ।

ओली समूहबाट उपाध्यक्षमा रामबहादुर थापा ‘बादल’, प्रदीप ज्ञवाली, विष्णु पौडेल, गुरू बराल र पृथ्वीसुब्बा गुरूङको नाम टुंगो लागेको भनिए पनि ज्ञवाली महासचिव पदमै उठ्ने अडानमा छन् । उपाध्यक्षमा आफ्नो नाम समावेश नभएपछि ओली निकट पन्त ईश्वर समूहबाट उपाध्यक्ष उठ्न लागेका हुन् । स्थायी कमिटी सदस्य तथा पूर्व शिक्षामन्त्री समेत रहेका पन्तले आफू उपाध्यक्ष पदमा विवेकको उम्मेदवार बनेको भन्दै सबै पक्षसँग सहयोगको अपेक्षा राखेको बताएका छन् । यसअघि नवौं महाधिवेशनमा उपमहासचिव हारेका पन्त पछिल्लो समय ओली निकट मानिन्थे ।

 

काठमाडौं । लामो समयसम्म नेकपा एमाले अध्यक्ष केपी शर्मा ओलीका कट्टर समर्थक मानिएका कृष्णगोपाल श्रेष्ठले ११औं महाधिवेशनमा ओली समूह छोडेर ईश्वर पोखरेल समूहबाट सचिव पदमा उम्मेदवारी दिएका छन् । श्रेष्ठको राजनीतिक यात्रा लामो र विविधतापूर्ण छ । उनी पूर्व राष्ट्रपति विद्यादेवी भण्डारीसँग नजिक रहँदै आएका छन् र यही सम्बन्धले उनलाई ओलीबाट टाढा पुर्‍याएको बताइन्छ । राजनीतिक विश्लेषकहरूका अनुसार, भण्डारीलाई एमाले सदस्यता नदिएको भन्दै श्रेष्ठ ओलीको विरोधी खेमासँग आबद्ध भएका हुन् ।

श्रेष्ठलाई लामो समयसम्म ‘केपी ओलीको डाई हार्ड फ्यान’ मानिन्थ्यो । पार्टीभित्र र बाहिर ओलीविरुद्ध उठ्ने आवाजमा उनी सार्वजनिक रूपले ओलीको बचाउमा उत्रिन्थे । २०७८ सालमा शिक्षामन्त्री हुँदा त्रिभुवन विश्वविद्यालयको दीक्षान्त समारोहमा दिएको भाषण अझ चर्चित रह्यो । उनले त्यतिबेला ओलीको पक्षमा भन्दै भनेका थिए, ‘केपी ओली इज केपी ओली, केपी ओली राजनीतिको पेले हो ।’ तर अहिले, राजनीतिक परिस्थितिका कारण श्रेष्ठले आफ्नो रुख परिवर्तन गरेका छन् । उनी ओलीको समूह छोडेर प्रतिद्वन्द्वी ईश्वर पोखरेलको पक्षमा आइसकेका छन् र सचिवको उम्मेदवारी घोषणा गरिसकेका छन् ।

श्रेष्ठले काठमाडौं उपत्यकामा केन्द्रित रहेर लामो समयसम्म एमालेको राजनीति गर्दै आएका छन् । २०४७ सालदेखि चार पटक संसदमा निर्वाचित भइसकेका उनी छैठौं महाधिवेशनदेखि पार्टीका केन्द्रीय सदस्य पनि हुन् । उनले विभिन्न मन्त्रालयहरूमा काम गरेका छन्–स्थानीय विकास राज्यमन्त्री, सहरी विकास मन्त्री, स्वास्थ्य तथा जनसंख्या मन्त्री, युवा तथा खेलकुद मन्त्री, श्रम रोजगार तथा सामाजिक सुरक्षा मन्त्री, वन वातावरण मन्त्री र शिक्षा, विज्ञान तथा प्रविधि मन्त्री । शिक्षामन्त्री हुँदा त्रिभुवन विश्वविद्यालयमा दिएको भाषणले राजनीतिक विवाद पनि उत्पन्न गरेको थियो । राजनीतिक विश्लेषकहरूले कृष्णगोपाल श्रेष्ठको निर्णयलाई एमालेभित्रको शक्ति सन्तुलन, भण्डारीसँगको सम्बन्ध र पार्टीभित्रको रणनीतिक चालसँग जोडेर विश्लेषण गरिरहेका छन् ।

काठमाडौं । नेकपा एमालेको भावी अध्यक्षका लागि केपी शर्मा ओलीले मनोनयन दर्ता गराएका छन् । महाधिवेशनमा नेतृत्व चयनको प्रक्रिया अघि बढेका बेला अध्यक्ष केपी शर्मा ओली तेस्रो पटक प्रतिष्पर्धामा उत्रिएका छन् । ११ औं महाधिवेशनमा भेला भएका २२६३ प्रतिनिधिले ३०१ सदस्यीय कमिटी चुन्दै छन् ।

यस्तै एमालेको अध्यक्ष पदका लागि ईश्वर पोखरेलले पनि आफ्नो उम्मेदवारी दर्ता गराएका छन् । काठमाडौंको भृकुटीमण्डपमा जारी बन्द सत्रमा अहिले उम्मेदवारी दर्ता गराउने क्रम जारी छ । सो क्रममा पोखरेलले केहीबेरअघि मात्रै आफ्नो उम्मेदवारी दर्ता गराएका हुन् । निर्वाचन कार्यतालिका अनुसार, मतदान भोलि हुँदैछ । पोखरेलसँग अध्यक्षमा केपी शर्मा ओलीले प्रतिष्पर्धा गर्दैछन् । उनीहरू दुवै जना प्यानलै बनाएर चुनावी मैदानमा उत्रिएका हुन् ।

काठमाडौं । नेकपा एमालेको अध्यक्ष पदका लागि ईश्वर पोखरेलले आफ्नो उम्मेदवारी दर्ता गराएका छन् । काठमाडौंको भृकुटीमण्डपमा जारी बन्द सत्रमा अहिले उम्मेदवारी दर्ता गराउने क्रम जारी छ । सो क्रममा पोखरेलले केहीबेरअघि मात्रै आफ्नो उम्मेदवारी दर्ता गराएका हुन् । निर्वाचन कार्यतालिका अनुसार, मतदान भोलि हुँदैछ । पोखरेलसँग अध्यक्षमा केपी शर्मा ओलीले प्रतिष्पर्धा गर्दैछन् । उनीहरू दुवै जना प्यानलै बनाएर चुनावी मैदानमा उत्रिएका हुन् ।

‘पार्टीलाई ठिक ढङ्गले चलाउन अध्यक्ष पदमा उम्मेदवारी दिएँ’
एमाले नेता ईश्वर पोखरेलले पार्टीलाई विधि र पद्धतिअन्तर्गत ठिक ढंगले चलाउन आफू अध्यक्ष पदको उम्मेदवार बनेको दाबी गरेका छन् । सोमवार पार्टीको महाधिवेशनस्थल भृकुटीमण्डपमा सञ्चारकर्मीहरुसँग कुरा गर्दै उनले सो दाबी गरेका हुन् । उनले पार्टीलाई सांगठनिक, वैचारिक र कार्यशैलीका आधारमा पुनःव्यवस्थित गर्नुपर्ने आवश्यकता रहेको उनको भनाइ छ । पोखरेलले पार्टीको सांगठनिक जीवनमा आन्तरिक प्रतिष्पर्धालाई अस्वभाविक रुपमा लिन नहुने बताए । उनले जनताको बहुदलीय जनवादद्वारा निर्देशित पार्टीलाई थप सुधार गरेर अगाडि बढाउन आन्तरिक प्रतिष्पर्धा भएको उल्लेख गर्दै यसलाई अस्वभाविक रुपमा लिन नहुने उनको भनाइ छ ।

उनले भने, ‘पार्टीको सांगठनिक जीवनमा आन्तरिक प्रतिष्पर्धाको कुरा स्वभाविक हो । हिजो भूमिगत अवस्थामा हुँदा पनि प्रतिष्पर्धा हुन्थ्यो । अहिले जनताको बहुदलीय जनवादद्वारा निर्देशित हाम्रो पार्टीमा आन्तरिक प्रतिष्पर्धालाई अस्वभाविक रुपमा लिनु हुँदैन । दोस्रो कुरा, उम्मेदवारी किन त भन्दा थप राम्रो गर्नको लागि हो । यसमा अरु केही कुरा नै भएन । म चाहीँ पार्टीलाई सामूहिक नेतृत्वअन्तर्गत, विधि र पद्धतिअन्तर्गत ठिक ढंगले चलाउने उद्देश्यसहित आफूले उम्मेदवारी घोषणा गरेको हुँ । म महाधिवेशनका प्रतिनिधि भएर आउनु भएका कार्यकर्ता साथीहरुलाई पार्टीलाई पुर्नव्यवस्थित, सांगठनिक, वैचारिक रुपमा पुर्नव्यवस्थित र नेतृत्वलाई अपडेटेड गर्नुपर्ने आवश्यकता रहेको कुरा आग्रह गर्न चाहन्छु ।’ उनले पार्टीलाई थप व्यवस्थित र पार्टी नेतृत्व अपडेट गर्नुपर्ने आवश्यकता रहेको व्यहोरा पार्टी कार्यकर्तालाई आग्रह गरे ।

 

काठमाडौं । नेकपा (एमाले) का उपमहासचिव पृथ्वीसुब्बा गुरुङले महाधिवेशनमा हुने प्रतिष्पर्धालाई लिएर पार्टी नफुट्ने दाबी गरेका छन् । सोमवार भृकुटीमण्डपमा जारी पार्टी महाधिवेशनको बन्द सत्रस्थलमा पार्टीको संस्थापन पक्षबाट उपाध्यक्षको उम्मेदवारी दिने तयारी गरिरहेका उनले सो टिप्पणी गरेका हुन् । उपमहासचिव गुरुङले एमाले प्रतिष्पर्धामा विश्वास गर्ने पार्टी भएकाले पराजित भएकाहरुले पार्टी छोडने काम नगर्न जिकिर गरे । उनले पार्टीलाई अझ सशक्त, अझ सुदृढ बनाउनका लागि नेतृत्व चयन प्रतिष्पर्धाको आधारमा गर्ने निर्णय गरिएको पनि स्पष्ट पारे ।

निवर्तमान उपमहासचिव गुरुङले भने, ‘प्रतिष्पर्धामा विश्वास गर्ने पार्टी हो । प्रतिष्पर्धामा विश्वास गर्ने हाम्रा नेताहरु हुुनुहुन्छ । यो फुट्नका लागि गरिएको होमवर्क होइन । यो त पार्टीलाई अझ सशक्त, अझ सुदृढ बनाउनका लागि यो गरिएको होमवर्क हो । को सक्षम नेता हो, कार्यकर्ताले मन पराएको नेता हो ? उनीहरुले विश्वास गरेको नेता को हो ? भन्ने कुराको कसी लगाउने थलो महाधिवेशन हो । हामी त्यही कसीमा उभिन्छौ । यो कसीबाट बाहिर निस्कदाखेरी जो विजयी भएर आउँछ, उसले पार्टीलाई सुदृढ ढंगले चलाउने गरेर उनीहरुले जितेका हुन्छन् । बाँकी जो पराजित हुन्छन, पराजित भएकाले पार्टी छोड्नु पर्छ भन्ने हामी मानसिकता राख्दैनौ । त्यसकारण उनीहरुको पनि भावना र विचारको सम्मान गर्दै हामी आफैभित्रको सत्तापक्ष र प्रतिपक्षको भावना नराखि सबै मिलेर अघि बढ्छौँ ।’ उपमहासचिव गुरुङले निर्वाचनमा पराजित हुनेहरुलाई समेटेर उनीहरुको भावनाको कदर गर्दै पार्टी अघि बढ्ने समेत बताए ।

 

काठमाडौं । नेकपा एमालेको आगामी महाधिवेशनका लागि अध्यक्ष केपी शर्मा ओली नेतृत्वको समूहले पदाधिकारी उम्मेदवारहरूको सूची अन्तिम रूप दिएको छ । ओली पक्षले सार्वजनिक गरेको प्यानलअनुसार अधिकांश पदमा पुरानै अनुहार दोहोरिएका छन् भने केही नयाँ समायोजन पनि देखिएको छ । उपाध्यक्ष पदका लागि रामबहादुर थापा ‘बादल’, विष्णु पौडेल, गुरु बराल र पृथ्वीसुब्बा गुरुङ उम्मेदवार रहने तय भएको छ । महासचिवका दाबेदार मानिएका प्रदीप ज्ञवालीले पनि उपाध्यक्षमै उम्मेदवारी दिने भएका छन्।

यससँगै उपाध्यक्ष पदमा ओली पक्षबाट पाँच जनाको नाम अघि सारिएको छ । महासचिव पदमा हालका महासचिव शंकर पोखरेललाई नै निरन्तरता दिइने भएको छ । ओली पक्षले पोखरेललाई दोहोर्‍याउँदै संगठनात्मक स्थिरता कायम राख्ने सन्देश दिएको छ । उपमहासचिव पदका लागि विष्णु रिमाल, लेखराज भट्ट र रघुवीर महासेठ उम्मेदवार बन्ने भएका छन् ।

सचिव पदमा भने भानुभक्त ढकाल, पद्मा अर्याल र छबिलाल विश्वकर्मालाई पुनः उम्मेदवार बनाउने तयारी गरिएको छ । यस बाहेक सचिवका अन्य उम्मेदवारका रूपमा यमलाल कँडेल, शेरधन राई, खगराज अधिकारी, हिक्मत कार्की, राजन भट्टराई र महेश बस्नेतको नाम प्यानलमा समेटिएको छ ।
ओली पक्षले पदाधिकारीको सूची सार्वजनिक गरेसँगै एमालेभित्र आन्तरिक प्रतिष्पर्धा थप तीव्र हुने देखिएको छ । महाधिवेशन नजिकिँदै जाँदा अन्य समूहहरूको रणनीति र सम्भावित गठजोडले पार्टीको नेतृत्व चयन प्रक्रियालाई थप रोचक बनाउने अनुमान गरिएको छ ।

 

 

काठमाडौं । नेकपा एमालेका प्रचार विभाग प्रमुख राजेन्द्र गौतमले उपमहासचिव पदमा उम्मेदवारी दिने बताएका छन् । केपी शर्मा ओली निकट गौतम पदाधिकारीको कुनै पनि पदमा समेटिएका छैनन् । त्यसपछि उनले उपमहासचिव पदमा उम्मेदवारी दर्ता गर्ने बताएका हुन् ।  ‘म उपमहासचिव पदमा उम्मेदवारी दिँदैछु, नेतृत्वसँग बृहत्तर छलफल भयो, चुनाव भयो भने म उपमहासचिव पदमा लड्ने हो,’ उनले सुनाए । ओली समूहबाट उपमहासचिव पदमा रघुवीर महासेठ, विष्णु रिमाल र लेखराज भट्ट उम्मेदवार छन् ।

 

काठमाडौं । नेकपा एमालेको आगामी महाधिवेशनलाई केन्द्रमा राख्दै पार्टीभित्रको आन्तरिक शक्ति सन्तुलन थप स्पष्ट हुँदै गएको छ । वरिष्ठ उपाध्यक्ष ईश्वर पोखरेल नेतृत्वको समूहले पदाधिकारी उम्मेदवारको सूची लगभग टुंग्याएको छ भने अध्यक्ष केपी शर्मा ओलीसँग प्रत्यक्ष प्रतिष्पर्धामा उत्रिने तयारी पनि औपचारिक रूपमा सार्वजनिक भइसकेको छ ।

ईश्वर पोखरेल समूहका अनुसार अध्यक्ष पदमा पोखरेल आफैं उम्मेदवार बन्ने निश्चित भएको छ । महासचिवमा सुरेन्द्र पाण्डेलाई अघि सारिएको छ भने उपाध्यक्ष पदका लागि गोकर्ण विष्ट, परशुराम मेघी गुरुङ, विन्दा पाण्डे र अरुण नेपालको नाम तय भएको नेताहरूले बताएका छन् । उपमहासचिवमा योगेश भट्टराई उम्मेदवार बन्ने पक्का भएको छ भने बैजनाथ चौधरी पनि उपमहासचिवको प्रतिष्पर्धामा रहने सूचीमा छन् । सचिव पदका लागि रचना खड्का, विनोद ढकाल, कर्ण थापा, ठाकुर गैरे, इन्द्रलाल सापकोटा, पुरुषोत्तम पौडेललगायत नेताहरूको नाम लगभग अन्तिम चरणमा पुगेको स्रोतले जनाएको छ । यसै सूचीमा कृष्णगोपाल श्रेष्ठ र गोकुल बास्कोटाको नाम पनि समावेश गरिएको छ । यद्यपि छलफल अझै जारी रहेकाले केही नाममा हेरफेर हुन सक्ने नेताहरूको भनाइ छ ।

महाधिवेशनस्थलमा सञ्चारकर्मीहरूसँग कुरा गर्दै ईश्वर पोखरेलले पार्टीभित्र आन्तरिक प्रतिष्पर्धा हुनु स्वाभाविक प्रक्रिया भएको बताएका छन् । आफ्नो उम्मेदवारी व्यक्तिगत महत्वाकांक्षाका लागि नभई पार्टीलाई थप व्यवस्थित, विधिसम्मत र सामूहिक नेतृत्वको दिशामा अघि बढाउनका लागि भएको उनको दाबी छ । उनले महाधिवेशन प्रतिनिधिहरूलाई पार्टीको पुनर्गठन र पुनव्र्यवस्थापनको पक्षमा उभिन आग्रह गर्दै नेतृत्वको नयाँ अभ्यास आवश्यक भइसकेको संकेत गरे । यससँगै पोखरेल र ओली दुवै पक्षले आ–आफ्ना उम्मेदवार मैदानमा उतारेर प्रत्यक्ष प्रतिस्पर्धा गर्ने अवस्था बनेको छ ।

यता, उपमहासचिवका प्रत्याशी योगेश भट्टराईले भने आफूहरू प्यानल बनाएर निर्वाचनमा नजाने स्पष्ट पारेका छन् । निर्वाचन आयोगको निर्देशनअनुसार सबै उम्मेदवारले व्यक्तिगत रूपमा उम्मेदवारी दिने उनले बताए । पार्टी सचिवालयको निर्णयविपरीत विधान संशोधन हुनु दुर्भाग्यपूर्ण भए पनि बन्द सत्रले त्यसलाई स्वीकार गरेपछि निर्वाचन प्रक्रियामा सहभागी हुन आफूहरू तयार भएको उनको भनाइ छ । भट्टराईले वर्तमान नेतृत्वले अहिलेको जटिल राजनीतिक परिस्थितिलाई सम्हाल्न नसकेको टिप्पणी गर्दै पार्टीभित्र नेतृत्व हस्तान्तरण, पुनर्गठन र नयाँ टिमसहित अघि बढ्नुपर्ने आवश्यकता औंल्याएका छन् । एमाले महाधिवेशन नजिकिँदै जाँदा नेतृत्व, विधान र कार्यदिशालाई लिएर उठेका यी बहसहरूले पार्टीभित्रको आन्तरिक प्रतिष्पर्धालाई अझ तीव्र बनाएको छ । अब महाधिवेशन प्रतिनिधिहरूको निर्णयले एमालेको आगामी नेतृत्व र राजनीतिक दिशा कुन मोडमा जाने भन्ने स्पष्ट गर्नेछ ।

 

काठमाडौं । नेकपा एमालेको ११ औं महाधिवेशन नजिकिँदै गर्दा अध्यक्ष केपी शर्मा ओलीले पदाधिकारी उम्मेदवारहरूको सूची लगभग टुंग्याएका छन् । यसक्रममा ओलीका विश्वास पात्र मानिने दुई नेताको नाम चर्चामा आएको छ-पोलिटब्युरो सदस्य महेश बस्नेत सचिव पदका उम्मेदवार र स्थायी कमिटी सदस्य भानुभक्त ढकाल उपमहासचिव पदका उम्मेदवार बन्दै छन् ।

१०औँ महाधिवेशनमा पोलिटब्युरो सदस्य निर्वाचित भएका महेश बस्नेतलाई यस पटक सचिव पदमा अघि सारिएको हो । पार्टीभित्र ओलीप्रति निष्ठावान नेताका रूपमा चिनिने बस्नेतले जेनजी आन्दोलनपछि सत्ताच्युत भएका बेला ओलीको सुरक्षा र व्यवस्थापनमा महत्वपूर्ण भूमिका खेलेको चर्चा छ ।भदौ २४ गते प्रधानमन्त्री पदबाट राजीनामा दिएपछि करिब एक साता सेनाको सुरक्षा घेरामा रहेका ओलीलाई सुरक्षित रूपमा भक्तपुरको गुण्डु पुर्‍याउनेदेखि त्यहीँ कुटी निर्माणको व्यवस्था मिलाउनेसम्मको जिम्मेवारी बस्नेतले सम्हालेको बताइन्छ । यही कारण ओलीले ‘गुन तिरेको’ चर्चा एमाले वृत्तमा चल्न थालेको छ ।

यता, अहिलेसम्म एमालेको कुनै पनि पदाधिकारी नभएका भानुभक्त ढकाल एकै पटक उपमहासचिव पदका उम्मेदवार बन्ने भएका छन् । स्थायी कमिटी सदस्य रहेका ढकाल अध्यक्ष ओलीका निकटतम सहयोगीमध्ये एक मानिन्छन् । ओली नेतृत्वको सरकारमा उनी स्वास्थ्यमन्त्री समेत भइसकेका थिए । हाल उनी ११औं महाधिवेशनको स्वयंसेवक परिचालन समितिको संयोजकको जिम्मेवारीमा छन् ।

पार्टीभित्र लामो समयदेखि पदाधिकारी बन्ने प्रतीक्षामा रहेका नेताहरूबीच असन्तुष्टि देखिन सक्ने अनुमान गरिए पनि ओलीले आफ्नो भरोसाको घेरालाई प्राथमिकतामा राखेको संकेत यी निर्णयले दिएको विश्लेषण भइरहेको छ । पुस १ गते हुने महाधिवेशनको निर्वाचनले यी उम्मेदवारहरूको राजनीतिक भविष्य मात्र होइन, एमालेको भावी शक्ति सन्तुलन समेत तय गर्ने देखिन्छ ।

काठमाडौं । नेकपा एमालेको ११औं महाधिवेशनका क्रममा अध्यक्षका दाबेदार केपी शर्मा ओली समूहबाट सचिव पदका लागि तय गरिएको नाममध्ये एक लेखराज भट्टले उम्मेदवारी नदिने घोषणा गरेपछि पार्टीभित्रको पदाधिकारी समीकरण फेरिने संकेत देखिएको छ । पूर्व माओवादी पृष्ठभूमिका नेता भट्टले सचिव पदमा प्रतिष्पर्धा नगर्ने स्पष्ट गरेसँगै ओली समूहले अब उनको स्थानमा नयाँ उम्मेदवार अघि सार्नुपर्ने अवस्था आएको छ ।

महाधिवेशनअन्तर्गत पदाधिकारी चयनका लागि ओलीले आफ्नो समूहबाट नेतृत्व टिमको खाका सार्वजनिक गरिसकेका थिए । सोही खाकाअनुसार उपाध्यक्ष पदका लागि विष्णु पौडेल, रामबहादुर थापा ‘बादल’, गुरू बराल, पृथ्वीसुब्बा गुरुङ र प्रदीप ज्ञवालीको नाम टुंग्याइएको थियो । महासचिव पदमा आकांक्षा देखाएका ज्ञवालीलाई अन्ततः उपाध्यक्षमा सीमित गर्दै शंकर पोखरेललाई महासचिव बनाउने सहमति जुटेको हो । अन्तिम समयसम्म पोखरेलले दाबी नछाडेपछि ओलीको रोजाइअनुसार उनी महासचिवमा अघि सारिएका हुन् ।

उपमहासचिवतर्फ रघुवीर महासेठ, विष्णु रिमाल र भानुभक्त ढकालको नाम फाइनल गरिएको छ । सचिव पदमा नौ जना निर्वाचित हुने व्यवस्था रहेकोमा ओली समूहबाट पद्मा अर्याल, छवि विश्वकर्मा, खगराज अधिकारी, यमलाल कँडेल, शेरधन राई, महेश बस्नेत, हिक्मत कार्की र राजन भट्टराईको नाम यसअघि नै तय भइसकेको थियो । त्यही सूचीमा रहेका लेखराज भट्टले उम्मेदवार नबन्ने निर्णय गरेपछि सचिव पदका लागि एक स्थान रिक्त भएको छ । भट्टको निर्णयले एमालेभित्र विशेष गरी पूर्व माओवादी पृष्ठभूमिका नेताहरूको प्रतिनिधित्व र सन्तुलनबारे नयाँ बहस सुरु गराएको छ । अब ओली समूहले उक्त स्थानमा कसलाई अघि सार्छ भन्ने विषयले महाधिवेशनको अन्तिम चरणमा थप चासो र चर्चा बढाउने देखिन्छ ।

 

काठमाडौं । नेकपा एमालेको ११ औँ राष्ट्रिय महाधिवेशनअन्तर्गत नेतृत्व चयनको चुनावी प्रक्रिया औपचारिक रूपमा सुरु भएको छ । काठमाडौंको भृकुटीमण्डपमा जारी महाधिवेशनमा सोमबार बिहान ११ बजेपछि उम्मेदवारी दर्ताका लागि मनोनयन फाराम वितरण सुरु गरिएको हो । महाधिवेशन प्रचार कमिटी सदस्य चेतन अधिकारीका अनुसार सोमबार मध्याह्नसम्म १४ सय बढी मनोनयन फाराम वितरण भइसकेका छन् ।

निर्वाचन कार्यतालिकाअनुसार मनोनयन फाराम वितरणको समय मध्यान्ह १२ बजेसम्म तोकिएको थियो भने उम्मेदवारहरूले दिउँसो साढे १ बजेसम्म दरखास्त फाराम दर्ता गर्न पाउने व्यवस्था गरिएको छ । निर्वाचन समितिका अनुसार उम्मेदवारहरूको प्रारम्भिक नामावली दिउँसो साढे २ बजे सार्वजनिक गरिनेछ । प्रारम्भिक नामावली प्रकाशनपछि सोही नामावलीमाथि दाबी–विरोध तथा उजुरी दिन दिउँसो साढे २ बजेदेखि ३ बजेसम्मको समय निर्धारण गरिएको छ । प्राप्त उजुरीहरूमाथि छानबिन तथा निर्णय दिउँसो ३ः१० बजेसम्म गरिने कार्यतालिका रहेको छ ।

यदि कुनै उम्मेदवारले आफ्नो उम्मेदवारी फिर्ता लिन चाहेमा दिउँसो ३ः१० बजेदेखि साँझ ५ बजेसम्मको समय दिइएको छ । यी सबै प्रक्रिया पूरा भएपछि साँझ ६ बजेसम्म उम्मेदवारहरूको अन्तिम नामावली सार्वजनिक गरिनेछ । अन्तिम नामावली प्रकाशनपछि पुस १ गते मंगलबार बिहान ११ बजेदेखि साँझ ५ बजेसम्म नयाँ केन्द्रीय कार्यसमिति चयनका लागि मतदान हुने निर्वाचन समितिले जनाएको छ । एमालेको ११औँ महाधिवेशन मंसिर २९ सम्म सञ्चालन हुने तय गरिएको छ । महाधिवेशनमा नेतृत्वका विभिन्न पदमा उम्मेदवारी दिन ठूलो संख्यामा नेताहरू अग्रसर देखिएका छन्, जसले पार्टीभित्रको राजनीतिक चासो र प्रतिष्पर्धा दुवैलाई थप तीव्र बनाएको छ ।

काठमाडौं । नेकपा एमालेको जारी एघारौँ महाधिवेशनमा पदाधिकारी र केन्द्रीय समितिका लागि अध्यक्ष केपी शर्मा ओली र ईश्वर पोखरेल दुबै पक्षले उम्मेदवारको सूची लगभग टुंगो लगाएका छन् । महाधिवेशनका लागि अध्यक्ष पदमा ओली आफैं उम्मेदवार छन् । शंकर पोखरेल महासचिव पदमै दोहोरिने निश्चित भएको छ ।

उपाध्यक्षहरुमा विष्णु पौडेल, रामबहादुर थापा ‘बादल’, गुरु बराल, पृथ्वीसुब्बा गुरुङको नाम टुंगो लागिसकेको छ । ओली समूहले प्रदीप ज्ञवालीलाई पनि उपाध्यक्षको सूचीमा राखे पनि उनको नाम टुंगो लागिसकेको छैन । अहिले ओली र ज्ञवालीबीच छलफल जारी छ । यसैगरी उपमहासचिव पदमा विष्णु रिमाल, भानुभक्त ढकाल र रघुबिर महासेठको नाम फाइनल भएको स्रोतले बतायो । ९ सचिवमा शेरधन राई, हिक्मत कार्की, राजन भट्टराई, महेश बस्नेत, खगराज अधिकारी, पद्मा अर्याल, छविलाल विश्वकर्मा, यामलाल कँडेल र लेखराज भट्टको नाम टुंगो लागेको स्रोतले बतायो । पदाधिकारीमा आकांक्षी रहेका तर दुवै समूहमा नपरेका नेताहरुले भने स्वतन्त्र उम्मेदवारी दिने तयारी गरेका छन् ।

यस्तै महाधिवेशनमा पदाधिकारी र केन्द्रीय समितिका लागि ईश्वर पोखरेल पक्षले पनि उम्मेदवारको सूची लगभग टुंगो लगाएको छ । आइतबार रातिदेखि सोमबार बिहानसम्म चलेको समूहको आन्तरिक छलफलपछि पदाधिकारीसहित केन्द्रीय समितिका ३०१ सदस्यका लागि उम्मेदवार तय गरिएको नेताहरूले बताएका छन् । यस समूहबाट अध्यक्ष पदमा ईश्वर पोखरेल आफैं प्रतिष्पर्धामा उत्रिने निश्चित भएको छ । महासचिव पदका लागि सुरेन्द्र पाण्डेको नाम टुंगो लागेको छ । उपाध्यक्ष पदमा बिन्दा पाण्डे, गोकर्ण विष्ट र परशु मेघी गुरुङ उम्मेदवार बन्ने भएका छन् भने उपमहासचिव पदका लागि योगेश भट्टराईको नाम पक्का भएको छ । उपमहासचिवकै सूचीमा बैजनाथ चौधरीको नाम पनि समावेश गरिएको बताइएको छ ।

सचिव पदमा भने बहुसंख्यक उम्मेदवार अघि सारिएको छ । यस पदका लागि कृष्णगोपाल श्रेष्ठ, कर्ण थापा, गोकुल बाँस्कोटा, विनोद ढकाल, रचना खड्का र इन्द्रलाल सापकोटासहित ठाकुर गैरे र पुरुषोत्तम पौडेलको नाम समेत छलफलमा रहेको स्रोतले जनाएको छ । समूहले प्रारम्भिक रूपमा सचिव उम्मेदवारको सूची तयार गरे पनि अन्तिम क्षणसम्म केही नाममा सामान्य हेरफेर हुन सक्ने बताइएको छ । पोखरेल पक्षका नेताहरूका अनुसार पदाधिकारी मात्र होइन, केन्द्रीय समितिका सबै सदस्यका लागि समेत उम्मेदवारको सूची तयार भइसकेको छ । यद्यपि, महाधिवेशनको माहोल र थप राजनीतिक परामर्शका आधारमा केही पदमा उम्मेदवारको नाम तलमाथि हुन सक्ने संकेत पनि नेताहरूले गरेका छन् ।

काठमाडौं । नेकपा एमालेको ११ औं महाधिवेशन निर्णायक मोडमा पुगेसँगै अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल समूह खुलेर आमने–सामने भएका छन् । पुस १ गते हुने निर्वाचनका लागि तालिका सार्वजनिक भएसँगै दुवै समूहले पदाधिकारी र केन्द्रीय सदस्यका उम्मेदवारको सूची लगभग टुंग्याएका छन् ।

अध्यक्ष ओलीले आफ्नो प्यानलका उम्मेदवारको सूची तयार पारिसकेको एमाले नेताहरूको दाबी छ । आकांक्षी नेताहरूको विवरण संकलन गर्न विश्वासपात्र नेतालाई जिम्मा दिएका ओलीले आइतबार बेलुका अन्तिम सूचीमा सहमति जुटाएको बताइन्छ । समन्वय संयन्त्रले उम्मेदवारी दिन चाहने र नचाहने नेताहरूको नामावली बनाएर शनिबार राति नै ओलीलाई बुझाइसकेको थियो ।

आफ्नो समूहका नेताहरू व्यवस्थापन गर्न सहज बनाउन ओलीले विधान नै संशोधन गराएका छन् । विधान महाधिवेशनले घटाएर १५ बनाएको पदाधिकारी संख्या फेरि बढाएर १९ पु¥याइएको छ भने केन्द्रीय समिति २५१ बाट ३०१ सदस्यीय बनाइएको छ । सचिवालयमा विरोध भए पनि ओलीले केन्द्रीय कमिटी बैठकमार्फत बहुमत प्रयोग गरी यो प्रस्ताव पास गराएका थिए । यही निर्णयपछि उपाध्यक्षद्वय युवराज ज्ञवाली र अष्टलक्ष्मी शाक्यले सक्रिय राजनीतिबाट अलग हुने घोषणा गरेका थिए भने वरिष्ठ उपाध्यक्ष पोखरेलले विधान संशोधन अस्वीकार गर्दै अध्यक्षमा उम्मेदवारी दिने संकेत दिएका थिए ।

ओली पक्षका अनुसार महत्वपूर्ण पदमा हालका पदाधिकारीहरूलाई दोहोर्‍याउने रणनीति लिइएको छ । तीन उपाध्यक्ष र महासचिव दोहोरिने लगभग निश्चित भएको बताइन्छ । महासचिवका आकांक्षी दुई नेतालाई उपाध्यक्षमा व्यवस्थापन गर्ने र सचिवमध्येबाट उपमहासचिव बनाउने योजना छ । भक्तपुरको गुन्डुस्थित ओली निवासमा जारी छलफलमा उपाध्यक्षमध्ये विष्णु पौडेल, रामबहादुर थापा ‘बादल’, गुरू बराल र पृथ्वीसुब्बा गुरुङको नाम लगभग फाइनल भइसकेको स्रोतले जनाएको छ ।

बाँकी एक उपाध्यक्षमा प्रदीप ज्ञवाली वा शंकर पोखरेलमध्ये एकलाई अघि सार्ने तयारी छ । महासचिवमा ओलीको प्राथमिकता शंकर पोखरेल देखिएका छन् । उपमहासचिवमा रघुवीर महासेठ, विष्णु रिमाल र पद्मा अर्यालको नाम अगाडि आएको छ । सचिव संख्या ९ पुर्‍याइएपछि प्रदेशगत सन्तुलन मिलाउने प्रयास भएको छ । कोशीबाट शेरधन राई र भानुभक्त ढकाल, मधेसबाट ज्वालाकुमारी साह, बागमतीबाट महेश बस्नेत, गण्डकीबाट खगराज अधिकारी, लुम्बिनीबाट छविलाल विश्वकर्मा, कर्णालीबाट यमलाल कँडेल र सुदूरपश्चिमबाट लेखराज भट्ट सचिव बन्ने सम्भावना बलियो देखिएको छ ।

उता पोखरेल समूहले पनि अब सबै पदमा उम्मेदवारी दिने निर्णय गरेको छ । सुरुवातमा ओलीको सूची हेरेर रणनीति बनाउने सोचमा रहेको यो समूह अब एकै पटक मनोनयनमा जाने तयारीमा छ । थापागाउँस्थित कार्यालयमा छलफलमा जुटेको पोखरेल पक्षमा महासचिवका लागि सुरेन्द्र पाण्डेको सम्भावना बलियो छ भने गोकर्ण विष्टलाई उपाध्यक्षमा अघि सार्ने लगभग तय भएको छ ।

योगेश भट्टराई उपमहासचिव उठ्ने पक्का भएको छ । सचिवतर्फ गोकुल बाँस्कोटा, ठाकुर गैरे, कर्ण थापा, विनोद ढकाल र विन्दा पाण्डे आकांक्षी छन् । पदाधिकारी संख्या बढेपछि पोखरेल समूहलाई उम्मेदवार व्यवस्थापन सहज भएको बताइन्छ । यही अवसर प्रयोग गर्दै ओली पक्षका असन्तुष्ट नेतालाई आफूतिर तान्ने रणनीति पनि यो समूहले लिएको छ । केही नेताहरू चाँडै खुल्ने सम्भावना रहेको पोखरेल पक्षको दाबी छ ।

एमाले केन्द्रीय निर्वाचन आयोगले सोमबार बिहान ९ बजेदेखि उम्मेदवारी फाराम वितरण र दिउँसो १ः३० बजेसम्म दर्ताको समय तोकेको छ । अन्तिम नामावली बेलुका ६ बजे सार्वजनिक हुनेछ । प्रक्रियागत रूपमा दुवै समूह उम्मेदवारी दर्तातर्फ अघि बढ्दै गर्दा एमाले महाधिवेशन अब स्पष्ट रूपमा ओली र पोखरेलबीचको प्रतिस्पर्धामा रूपान्तरण भएको छ ।

काठमाडौं । नेकपा एमालेको ११औं महाधिवेशनअन्तर्गत काठमाडौंको भृकुटीमण्डपमा जारी बन्द सत्रमा वरिष्ठ उपाध्यक्ष ईश्वर पोखरेलले पार्टीको भावी दिशा र कार्यशैलीबारे स्पष्ट र फरक धारणा प्रस्तुत गरेका छन् । अपराह्न ३ बजेपछि सुरु भएको बन्द सत्रमा प्रारम्भमा अध्यक्ष केपी शर्मा ओलीले सम्बोधन गरेपछि पोखरेलले अध्यक्षको अनुमति लिएर आफ्नो विचार राखेका हुन् ।

पोखरेलले बन्द सत्रमा छुट्टै अवधारणा पत्र प्रस्तुत गर्दै पार्टीभित्र अहिले विचार र नेतृत्वभन्दा पनि कार्यशैली नै मुख्य समस्या बनेको टिप्पणी गरे । यही अवस्था निरन्तर रहेमा पार्टी कुनै पनि बेला दुर्घटनाग्रस्त हुन सक्ने चिन्ता सबैमा रहेको भन्दै उनले समयमै आत्मसमीक्षा र सुधार आवश्यक रहेको बताए । पार्टीलाई विधि, पद्धति र सामूहिक नेतृत्वको प्रणालीमा सञ्चालन गर्नुपर्ने आफ्नो मान्यता रहेको पोखरेलको जोड थियो । उनले देश र पार्टी दुवै भूराजनीतिक दबाबको बोझमा परेको उल्लेख गर्दै यस्तो संवेदनशील अवस्थामा पार्टीभित्र लोकतान्त्रिक अभ्यास सुदृढ गर्नु अपरिहार्य भएको बताए।

यसै क्रममा उनले अध्यक्ष ओलीले विगतमा अघि सारेको ‘पार्टी जीवनको लोकतान्त्रिकरण’ सम्बन्धी प्रस्ताव र प्रयासलाई स्मरण गराउँदै आफू त्यही मान्यतामा उभिएको र त्यसको प्रशंसक रहेको बताए । ओलीले अघि सारेका ती अवधारणालाई व्यवहारमा उतार्न अझै ठाउँ रहेको संकेत गर्दै नेतृत्वले त्यसका लागि उदाहरण प्रस्तुत गर्नुपर्ने धारणा उनले राखे । पोखरेलले विगतमा माओवादीसँग गरिएको पार्टी एकताको प्रक्रिया विधिसम्मत र सन्तुलित नभएकै कारण असफल भएको अनुभव पनि सुनाए । त्यस्तै, नेकपा एमालेको स्थापनादेखि हालसम्म भएका महाधिवेशनहरूको आयोजना प्रक्रियासँग आफू संयोगवश निरन्तर जोडिँदै आएको उल्लेख गर्दै उनले पार्टीको संगठनात्मक यात्रा र उतारचढावलाई नजिकबाट देख्ने अवसर पाएको बताए ।

गत शुक्रबार बसेको सचिवालय बैठकले पोखरेललाई बन्द सत्रमा आफ्नो पालोमा अवधारणा पत्र प्रस्तुत गर्न दिने सहमति गरेको थियो । सोही अनुसार उनले केही दिनअघि नै पार्टी केन्द्रीय कार्यालय पुगेर महासचिव शंकर पोखरेललाई अवधारणा पत्र बुझाएका थिए । आफूले उठाएका विषयहरू बन्द सत्रमा प्रस्तुत गरिने पार्टीका आधिकारिक दस्तावेजमा समावेश हुनुपर्ने उनको आग्रह रहेको बुझिएको छ ।पोखरेलको सम्बोधनलाई महाधिवेशनमा नेतृत्व, कार्यशैली र आन्तरिक लोकतन्त्रबारे गम्भीर बहसतर्फ लैजाने प्रयासका रूपमा हेरिएको छ । बन्द सत्रमा उनका विचारहरूले कस्तो प्रभाव पार्छन् र पार्टीको आगामी निर्णयमा कति समेटिन्छन् भन्ने चासोका साथ प्रतिनिधिहरूले हेरिरहेका छन् ।

‘विद्या भण्डारीलाई आफ्नो घरमा आउन नदिनु गलत’
एमाले वरिष्ठ उपाध्यक्ष ईश्वर पोखरेलले पूर्व राष्ट्रपति एवं पार्टी पूर्व उपाध्यक्ष विद्यादेवी भण्डारीलाई आउन नदिनु गलत भएको बताएका छन् । जारी बन्द सत्रमा आफ्नो धारणा राख्दै पोखरेलले भने, ‘केन्द्रीय उपाध्यक्ष भइसकेको व्यक्ति र आउँछु भनेपछि आउन पाउँदैनौं भन्नु कति विवेक सम्वत् ? विल्कुल त्यो गलत हो त्यसरी भनिनु हुँदैन । नआउनुस् भन्न सकिन्छ, आउन उचित हुँदैन भन्न सकिन्छ । तर, आउँछु मेरो घर हो । म जहाँ जन्मिएँ, हुर्किएँ त्यही ठाउँमा मेरो अन्तिम जीवन बिताउँछु भन्दा इस्यू थिएन नन् इस्यूलाई इस्यू बनाइयो । यो गरिनु उचित थिएन ।’

काठमाडौं । नेकपा एमालेका उपाध्यक्ष सुरेन्द्र पाण्डेले पार्टीमा मनपरीतन्त्रका विरूद्ध लडाइँ जारी रहेको बताएका छन् । आजको केन्द्रीय कमिटी बैठकले पुरानै विधान ब्युँताउने निर्णय गरेको छ । सोही सन्दर्भमा बोल्दै उपाध्यक्ष पाण्डेले भने, ‘के हाम्रा विधानहरू अस्थायी हुन् ? हिजो विधान अधिवेशनअगाडि संख्या घटाऔँ भन्ने, अनि आज फेरि कोटाका नाममा त्यही संख्या बढाऔं भन्ने ? यो सरासर मनपरी होइन भने के हो ?’

उनले अहिले आएर विधान अधिवेशनको निर्णयविपरीत पदाधिकारी र केन्द्रीय सदस्यको आधार बढाइएको बताए । ‘यो मनपरीतन्त्रको विरुद्धको लडाइँ जारी छ। पार्टी विधान, विधि र प्रक्रिया अनुसार चल्नु अनिवार्य छ,’ महाधिवेशनस्थल भृकुटीमण्डपमा पत्रकारहरूसँग कुराकानी गर्दै उनले भने ।

काठमाडौं । नेकपा एमालेका सचिव गोकर्ण विष्टले विधान संशोधन गर्ने हो भने अध्यक्ष र महासचिव मात्रै राख्न आग्रह गरेका छन् । भृकुटीमण्डपमा आज बसेको केन्द्रीय कमिटी बैठकमा धारणा राख्दै उनले पद बाँड्न विधान संशोधन गर्न नहुने बताएका छन् ।

‘विधान संशोधन गर्ने नै हो भने एक अध्यक्ष र एक महासचिव मात्रै रहने गरी संशोधन गरौं, हामी बारीको, कान्लाको पाटोमै बसौंला,’ उनका भनाइ उद्धृत गर्दै एक केन्द्रीय सदस्यले सुनाए, ‘हामी दूरदर्शी पनि रहेनछौं, भदौको विधान महाधिवेशनको निर्णय यति छोटो समयमै उल्टायौं ।’

उनले पद बाँडेर पार्टीभित्र एकता नहुने भन्दै एकता कायम राख्न सबैलाई जोड्ने भावना चाहिने बताए । ‘अहिले एकता टुटेको अवस्था छ, सबैलाई समेट्ने भावना चाहिन्छ,’ उनले भने । केन्द्रीय कमिटीले पुरानै विधान ब्युँताउने निर्णय गरिसकेको छ भने बन्द सत्र पनि चलिरहेको छ ।