काठमाडौं । नेपाली कम्युनिष्ट पार्टी (नेकपा)का सांसद प्रेमबहादुर वयकले सरकारको कार्यशैलीलाई लिएर गम्भीर प्रश्न गरेका छन् ।

उनले बिहीबार प्रतिनिधि सभा बैठकमा ग्यासको आपूर्ति गर्न सरकारले नसकेको भन्दै आलोचना गरे ।

‘काठमाडौंमा ग्यासको हाहाकार हुँदा सरकारले ग्यासको आपूर्ति गर्न नसकेको कमजोरी के ले छोप्ने ?’, उनले प्रश्न गरे ।

ग्यास नपाएकै कारण एक युवकले आत्मदाहको प्रयास गरेको उनको भनाइ छ ।

त्यस्तै, संविधानको धारा ३६ मा खाद्यसम्बन्धी हक र धारा ४४ मा उपभोक्ताको हक पूरा हुन नसकेकोमा सरकार जिम्मेवार हो कि होइन ? भन्दै उनले प्रश्न गरे ।

जेन–जी आन्दोलनका शहीदहरूप्रति उनले सम्मान तथा घाइतेहरूको शीघ्र स्वास्थ्य लाभको कामना गरेका छन् । तर, जेन–जीहरू सरकारसँग निराश बनेको टिप्पणी गरे ।

‘जेन–जी आन्दोलनका शहीदहरूको स्मृति सभा हँदै गर्दा भदौ २३ गते माइतीघर मण्डलामा जेन–जी अभियन्ता लक्ष्मीदेवी बस्नेतले आत्मदाहको प्रयास गरिन् आत्मदाह प्रयासको त्यो आगोको रापले यो सरकारलाई पोल्यो कि पोलेन ?’

साथै, भोटेकोशी बाढीमा बेपत्ता भएकाहरूको खोजी र उद्धार कार्य तीव्र हुनुपर्ने बताए ।