Author: nepalone

काठमाडौं । बुद्ध एयरका मालिक समेत रहेका व्यवसायी वीरेन्द्रबहादुर बस्नेत, समाजशास्त्री दिनेश प्रसाईंसहितका व्यक्तिहरु संलग्न रहेको ‘गतिशील लोकतान्त्रिक पार्टी’ दर्ताका लागि निर्वाचन आयोगमा निवेदन दर्ता भएको छ । आयोगमा बिहीबार निवेदन दर्ता भएको पार्टीको अध्यक्षमा प्रसाईं छन् । पार्टीको महासचिव पियुषप्रसाद कायस्थ छन् । व्यवसायबाट राजनीतिमा होमिएका बस्नेत भने सदस्य छन् ।

पार्टीको विधानमा पदाधिकारीहरु चुनाव नलड्ने व्यवस्था छ । बस्नेत चाहिँ सदस्य रहेकाले चुनाव लड्नका लागि बाधा हुने छैन । ‘अबको चुनावमा पनि विरोधको राजनीति, पेशागत राजनीतिले प्रश्रय पायो भने नेपाल गहिरो अध्याँरो खोंचमा फस्नेछ जसबाट निस्कन धेरै मेहनत र बलिदान गर्नुपर्ने हुन्छ’ पार्टीको आह्वान पत्रमा छ,’ त्यसैकारण अब सोचयुक्त र सिर्जनशील राजनीति गरौं । इमान्दारीको राजनीति गरौं । त्यागको राजनीति गरौं ।’

पार्टीले अबको नेपालमा एउटा नियमसंगत राजनीतिक संस्कारलाई विकास गरी स्थापित गर्न जरुरी रहेको उल्लेख गरेको छ । ‘आजको पुस्ता र भावी पुस्ताले समावेशी र समतामूलक उज्ज्वल भविष्य प्राप्त गर्न सकून्’ पार्टीले भनेको छ । आयोगले आगामी निर्वाचनलाई लक्षित गर्दै नयाँ दल दर्ताको लागि कात्तिक ३० गतेसम्मको समय सीमा तोकिएपछि यतिबेला विभिन्न समूहहरु राजनीतिक दलमा रुपान्तरण भइरहेका छन् ।

धनुषा । मधेस प्रदेश सरकारका नव नियुक्त मुख्यमन्त्री जितेन्द्रप्रसाद सोनलले पद तथा गोपनीयताको शपथ लिएका छन् । आज जनकपुरधामस्थित प्रदेश प्रमुखको कार्यालयमा आयोजित एक समारोहबीच मुख्यमन्त्रीमा नियुक्त भएका लोकतान्त्रिक समाजवादी पार्टी (लोसपा) नेपालका प्रदेशसभा सदस्य सोनलले प्रदेश प्रमुख सुमित्रा सुवेदी भण्डारी समक्ष भोजपुरी भाषामा पद तथा गोपनीयताको शपथ लिएका हुन् ।

प्रदेश प्रमुख भण्डारीले उनलाई नेपालको संविधानको धारा १६८ को उपधारा (२) बमोजिम सोनललाई बुधबार साँझ पाँच दलको ५६ जना प्रदेशसभा सदस्यको समर्थनमा मुख्यमन्त्री पदमा नियुक्त गरेकी थिइन् ।

चितवन । नेकपा (माओवादी केन्द्र)का संयोजक पुष्पकमल दाहाल ‘प्रचण्ड’ ले सामाजवादी मोर्चाको बीचमा यथाशीघ्र एकता हुने बताएका छन् । आज यहाँ आयोजित कार्यकर्ता भेटघाट कार्यक्रमलाई सम्बोधन गर्दै उनले समाजवादी मोर्चामा रहेका दलहरूका बीचमा एकताको प्रक्रिया अन्तिम चरणमा पुगेको जानकारी दिए ।

संयोजक दाहालले भने, ‘यस पटक धेरै वामपन्थी पार्टीहरूका बीचमा एकता समाजवादी मोर्चाबाट सुरु गर्छौैँ’, सबै वामपन्थी दललाई एक ठाउँमा ल्याएर अघि बढ्ने योजनाका साथ आफूहरू अघि बढेका छौँ ।’ सामाजवादी मोर्चामा रहेका दलहरूबीच एकता केही दिनमा हुने भन्दै उनले यो एकताले राजनीतिक दलहरूको ध्रुवीकरणको सुरुआत गर्दै राजनीतिक शक्ति सञ्चय गरी समाजवादी क्रान्तिको सुरुआत गर्ने विश्वास व्यक्त गरे । पार्टी एकता एमालेसम्म पुगेर रोकिने उनको भनाइ छ ।

संयोजक दाहालले पछिल्लो समय सामाजिक सञ्जालमार्फत संगठित भएको युवाको आन्दोलनलाई ‘नयाँ राजनीतिक चेतना’ को संकेतका रूपमा लिँदै यसले विगतदेखि उठाउँदै आएका माओवादीका मागहरूसँग मेल खाने धारणा राखे । उनले भने, ‘युवाहरूले भ्रष्टाचार विरोधी माग उठाएका छन् । अहिलेको पुस्ताले भ्रष्टाचार अन्त्य र सुशासनको मार्ग खोज्नु गौरवको विषय हो ।’

काठमाडौं । ठेक्का सम्झौता गर्ने तर काम नगरेर वर्षौंदेखि अलपत्र पारी रुग्ण बनाइएका सिँचाइतर्फका ठेक्का तोड्न थालिएको छ ।

बबई सिँचाइ आयोजनाले करिब ६ वर्षअघि अमन कन्स्ट्रक्सन कम्पनी गुलरिया–५ सँग गरिएको ठेक्का सम्झौता तोड्न आज सार्वजनिक सूचना जारी गरेको छ।

आयोजनाले कम्पनीसँग नहर मर्मत, कमाण्ड क्षेत्र संरक्षण, भवन मर्मतलगायतका काम गर्न आर्थिक वर्ष २०७७/७८ मा ठेक्का सम्झौता गरेको थियो । छ वटा ठेक्कामध्ये चारको निर्माण प्रगति शून्य छ । एउटाको ३० र अर्कोको ५५ प्रतिशत प्रगति रहेको छ।

ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले ठेक्का लिने तर काम नगर्ने तथा आयोजना अलपत्र पार्ने प्रवृत्ति अन्त्यका लागि रुग्ण ठेक्का तोड्न मातहतका निकायलाई निर्देशन दिएका थिए । आयोजनाले पटकपटक सूचना प्रकाशन गर्दासमेत सम्झौताबमोजिम काम सुरु नगरी बीचैमा छोडी ठेक्काको म्याद समाप्त हुँदासम्म पनि काम सम्पन्न गर्नेतर्फ कुनै चासो नदिएको जनाएको छ ।

ठेक्का सम्झौता अन्त्य गरी कारबाहीको प्रक्रिया अगाडि बढाउनुनपर्ने कुनै ठोस कारण भएमा १५ दिनभित्र प्रमाणसहित सम्बन्धित आधिकारिक व्यक्ति आयोजना कार्यालयमा उपस्थित हुन सूचना जारी गरिएको छ ।

पेस गरिएका प्रमाण नियमसङ्गत भरपर्दो वा चित्त बुझ्दो नभएमा सम्झौता र सार्वजनिक खरिद कानूनमा भएको व्यवस्थाबमोजिम कार्यसम्पादन जमानत तथा धरौटी बापत राखिएको रकम जफत तथा कालोसूचीमा राख्ने प्रक्रिया अगाडि बढ्नेछ ।

सिँचाइ विभागअन्तर्गत राष्ट्रिय गौरबका भेरी बबई तथा सुनकोशी मरिण बहुउद्देश्यीयसहित २५ आयोजनाका ठेक्का रुग्ण छन् । त्यसमध्ये छ वटाको ठेक्का तोड्ने प्रक्रिया अगाडि बढाइएको हो ।

काठमाडौं । जनता समाजवादी पार्टी (जसपा) नेपालको मधेश प्रदेश सांसद सरोजकुमार सिंह कुशवाहा फेरि पक्राउ परेका छन् । सांसद विकास कोषको रकम दुरुपयोग गरेको आरोप खेप्दै आएका उनलाई अख्तियार दुरुपयोग अनुसन्धान आयोगको टोलीले पक्राउ गरेको हो । उनले सांसद विकास कोषको रकमबाट ३७ प्रतिशतसम्म कमिसन आफ्नो खातामा हालेको आरोप छ । उनी यसअघि २० जेठमा काठमाडौंको अनामनगरबाट पक्राउ परेका थिए ।

पूर्व गृहराज्यमन्त्री समेत रहेका उनी यसअघि पनि पक्राउ परेर तारेखमा छुटेका थिए । अहिले भने विशेष अदालतमा मुद्दा दर्ता गर्ने प्रयोजनका लागि पक्राउ गरिएको अख्तियार स्रोतले जनाएको छ । महोत्तरी क्षेत्र नम्बर–४ (ख) बाट प्रदेश सभामा निर्वाचित उनको घरमा अख्तियारले १२ जेठमा छापा पनि मारेको थियो । त्यसबेला उनका स्वकीय सचिव विनोदकुमार लाल कायस्थ समेत पक्राउ परेका थिए । घरबाट अनुसन्धान अधिकारीहरुले विभिन्न योजनाका कागजातहरु बरामद गरेका थिए भने मोबाइल समेत नियन्त्रणमा लिएर डिजिटल फरेन्सिक जाँचका लागि पठाइएको थियो ।

अर्घाखाँची । अर्घाखाँचीमा दुई वटा मोटरसाइकल एक आपसमा जुध्दा दुई जनाको मृत्यु भएको छ । छत्रदेव गाउँपालिका–१ चिदिकास्थित सौरेखोलाबाट दुर्गा फाँटतर्फ जाँदै गरेको लु ५८ प ७७८ नम्बरको तारा बेल्वासेले चलाएको मोटरसाइकल र विपरीत दिशाबाट आएको लु ३३ प ६५४४ नम्बरको सुमन सुनारले चलाएको मोटरसाइकल सौरेखोला खर्ज्याङमा एक आपसमा ठोक्किँदा बुधबार साँझ दुर्घटना भएको प्रहरी निरीक्षक झलकप्रसाद शर्माले बताए ।

अर्घाखाँची र गुल्मीको सीमाना खज्र्याङमा रहेको पब्लिक लुम्बिनी हस्पिटल प्रा.लि.उपचार गर्दा–गर्दै २१ वर्षीय बेल्वासे र ३५ वर्षीय सुनारको मृत्यु भएको हो । बेल्वासे अर्घाखाँची पाणिनि गाउँपालिका–५ मैदानका हुन भने सुनार गुल्मी छत्रकोट गाउँपालिका–६ दौघा मोहोर गाउँका स्थानीय हुन । मोटरसाइकलको पछाडि बसेका मैदानका १८ वर्षीय दिपा कोइराला र दौघाका ४४ वर्षीय सुरज सुनार गम्भीर घाइते भएका छन् । टाउकोमा चोट लागेका उनीहरूलाई थप उपचारको लागि लुम्बिनी मेडिकल कलेज प्रभास पाल्पामा रेफर गरिएको अर्घाखाँची प्रहरीले जनाएको छ ।

जनकपुर । मधेस प्रदेशका नव नियुक्त मुख्यमन्त्री जितेन्द्र सोनलले आजै सानो आकारको मन्त्रिपरिषद गठनको तयारी गरेका छन् । बुधबार लोसपासहित पाँच दलको समर्थनमा मुख्यमन्त्री नियुक्त भएका सोनलको पद तथा गोपनियताको शपथ ग्रहण बिहीबार बिहान ११ बजे हुँदैछ ।

शपथ ग्रहण लगत्तै उनले सानो आकारको मन्त्रीपरिषद् गठन गर्ने तयारी गरेका गठनबन्धनमा सहभागी माओवादी केन्द्रका सांसद जवाहरलाल कुशवाहाले जानकारी दिए । गठबन्धनमा सहभागी दलबीच मन्त्रालयको संख्या बाँडफाँडमा लगभग सहमती भइसकेको छ ।
सहमतिअनुसार गठबन्धनको सबैभन्दा ठूलो दल जसपाले चार मन्त्रालय पाउने छ । त्यसैगरी जनमतले पनि चारवटै मन्त्रालयमा दाबी गरेको छ । माओवादी केन्द्र र नेकपा एकीकृत समाजवादीले भने २–२ वटा मन्त्रालय पाउने सहमति पाँच दलबीच भएको छ । लोसपाबाट सोनल मुख्यमन्त्री भएकाले सो दललाई अन्य मन्त्रालय नदिने तयारी छ ।

‘अहिले दलहरू मन्त्रालय र मन्त्रीको टुंगो लगाउन छलफलमा व्यस्त छन्,’ कुशवाहाले भने, ‘हाम्रो पार्टीबाट चाहीँ को मन्त्री बन्ने भन्ने विषय अझै टुंगिसकेको छैन । आज हाम्रो तर्फबाट मन्त्रीको शपथ हुँदैन । अन्य दलबाट केही मन्त्रीले शपथ ग्रहण गर्छन् होला ।’ सहमतिअनुसार गठबन्धनको सबैभन्दा ठूलो दल जसपाले ४ मन्त्रालय पाउने छ । त्यस्तै जनमतले तीनदेखि चार वटासम्म मन्त्रालय पाउने छ भने माओवादी केन्द्र र नेकपा एसले २–२ मन्त्रालय पाउने सहमति पाँच दलबीच भएको छ । लोसपाबाट सोनल मुख्यमन्त्री भएकाले सो दललाई अन्य मन्त्रालय नदिने तयारी छ ।

काठमाडौं । नेपाल वातावरण पत्रकार समूह (नेफेज) का पूर्व अध्यक्ष रोशनी अधिकारी पाठक अन्तर्राष्ट्रिय प्रकृति संरक्षण संघ (आइयुसिएन) को क्षेत्रीय परिषद् सदस्यमा निर्वाचित भएकी छन् । अधिकारी सन् २०२६–२०२९ का लागि आयुसिएनको पूर्व र दक्षिण एसिया क्षेत्रीय परिषद् सदस्यका रूपमा निर्वाचित भएको संयुक्त अरब इमिरेट्सको अबुधाबीस्थित नेपाली दूतावासले जनाएको छ ।

यही अक्टोबर ९ देखि १५ तारिखसम्म अबुधाबीमा सम्पन्न आयुसिएन विश्व संरक्षण महासभाका क्रममा भारत, चीन, पाकिस्तान, मलेसिया, जापान र नेपालका सात उम्मेदवारबीच पाँच क्षेत्रीय परिषद् संख्याका लागि प्रतिस्पर्धा भएको थियो । उक्त महासभाले सन् २०२६–२०२९ अवधिका लागि नयाँ नेतृत्व र देशीय प्रतिनिधिको निर्वाचन सम्पन्न गरेको छ । संयुक्त अरब इमिरेट्सका रजान खलिफा अल मुबारक पुनः दोस्रो कार्यकालका लागि आयुसिएनको अध्यक्ष पदमा सन् २०२६–२०२९ अवधिका लागि निर्वाचित भएका छन् ।

काठमाडौं । मधेस प्रदेशका निवर्तमान मुख्यमन्त्री सतिशकुमार सिंहले जनमत पार्टी परित्याग गरेका छन् । मंगलबार मुख्यमन्त्रीबाट राजीनामा दिएका सिंहले बुधबार जनमत पार्टी फुटेर गठन भएको नयाँ दल जनस्वराज रोजेका हुन् । यस विषयमा जानकारी गराउन उनले जनकपुरमा पत्रकार सम्मेलन गरेका छन् । जनमतबाट मुख्यमन्त्री बनेका सतीशकुमार सिंहले राजीनामा दिएपछि लोसपाका नेता जितेन्द्र सोनल मधेसको मुख्यमन्त्री नियुक्त भइसकेका छन्।

सिंहसहित जनमतका दुई प्रदेशसभा सदस्यले बुधबार नै जनकपुरस्थित प्रदेश निर्वाचन कार्यालयमा गएर जनस्वराज पार्टी रोजेका थिए । निवर्तमान मुख्यमन्त्री सिंह र पूर्वमन्त्रीसमेत रहेका जनमतका सांसद त्रिभुवन साहले नयाँ दल रोजेका हुन् ।
उनीहरूले पनि आफ्नो समर्थन जितेन्द्र सोनललाई नै रहने बताएका छन् । ‘हिजो म र त्रिभुवन साहजीले जनस्वराज पार्टी रोजेका छौँ,’ सिंहले भने, ‘तर, नयाँ दल रोजेका भए पनि हाम्रो समर्थन जितेन्द्र सोनललाई नै रहने छ ।’

काठमाडौँ । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र बुधबार बसेको पार्टी कार्यसम्पादन समिति बैठकमा अनुपस्थित भए । पार्टीभित्र अध्यक्षको कार्यशैलीलाई लिएर विवाद बढिरहेका बेला मिश्र समेत अनुपस्थित भएका हुन् । अध्यक्षको कार्यशैलीप्रति असन्तुष्टि जनाउँदै मिश्र बैठकमा सहभागी नभएको उनी निकट स्रोतले जानकारी दिएको छ ।

‘पार्टीमा स्पष्ट दुई धार भए पनि अहिलेसम्म उहाँ कतैतिर खुल्नु भएको त छैन । तर, पार्टीलाई विधिसम्मत सञ्चालन गर्नुपर्छ भन्ने उहाँको धारणा छ,’ एक केन्द्रीय सदस्यले भने । अध्यक्ष लिङदेन र महामन्त्री डा. धवलशम्शेर राणाबीच लामो समयदेखि चलिरहेको टकराबमा मिश्र निरपेक्ष रहँदै आएका थिए । उनले कुनै पनि पक्षलाई खुलेर साथ दिएका छैनन् । तर, आजको बैठकमा अनुपस्थित हुनुलाई लिङ्देनप्रति उनको असन्तुष्टिको संकेतका रूपमा बुझिएको छ ।

बैठकमा सहभागी नभएका मिश्रले सामाजिक सञ्जाल एक्समार्फत पार्टीको विश्वसनीयतामा अत्यधिक ह्रास आएको उल्लेख गरेका छन् । उनले एक्समा लेखेका छन्, ‘प्रजातन्त्र-लोकतन्त्रमा पार्टी नबनी देश बन्दैन । पार्टी बनिदेओस् भन्ने एक मात्र कामना छ !’ उनले सबै पार्टीले विश्वसनीयता गुमाएको दाबी गर्दै अप्रत्यक्ष ढंगले आफ्नै पार्टीलाई पनि यसमै घान हालेका छन् । उनले भनेका छन्, ‘पद्धति, पारदर्शिता, इमानदारी र उत्कृष्टता गुमाउँदै गएर सबै पार्टीको विश्वसनीयतामा अत्यधिक ह्रास आउनु ठुलो चिन्ताको विषय हो ।’

आजै महामन्त्रीद्वय धवलशमशेर राणा र कुन्ती कुमारी शाहीले समेत कार्यसम्पादन समितिको बैठक बहिष्कार गरेका थिए । स्रोतका अनुसार मिश्र पछिल्लो समय अध्यक्ष लिङदेनको कार्यशैलीप्रति सन्तुष्ट छैनन् । लिङदेनले सबैलाई समेटेर पार्टीमा अभिभावकीय भूमिका खेल्नुपर्नेमा गुटको नेता मात्रै बन्न खोजिरहेको उनको बुझाइ छ । पार्टीको आगामी महाधिवेशनमा लिङदेनले मिश्रको साथ पाउने सम्भावना पनि कमजोर बनेको स्रोत बताउँछ ।

राप्रपामा अध्यक्ष लिङदेनको नियमित कार्यकाल मंसिरमा सकिँदैछ । पार्टीको विधानअनुसार एक वर्ष उनले आफ्नो कार्यकाल थप्न सक्नेछन् । तर, इतर पक्षले मंसिरभित्रै महाधिवेशन गर्न दवाव बढाइरहेका छन् । आज बसेको कार्यसम्पादन समितिको बैठकले यसै महिना केन्द्रीय समिति बैठक बसेर महाधिवेशनको मिति तय गर्ने निर्णय लिएको छ । महाधिवेशनमा लिङदेन अध्यक्षमा दोहोरिन चाहन्छन् भने राणा उनलाई चुनौती दिने तयारीमा छन् । वरिष्ठ उपाध्यक्ष मिश्रले कुन रणनीति लिन्छन् भन्ने प्रष्ट भएको छैन । उनले आफूलाई अध्यक्षको प्रत्याशीका रूपमा उभ्याएका पनि छैनन् र कसलाई साथ दिने भनेर पनि खुलेका छैनन् ।

विधानबमोजिम महाधिवेशनको मिति तोकिनुपर्ने, विधान विपरीत भएका निष्कासन र कारबाहीसम्बन्धी निर्णयहरू फिर्ता गरिनुपर्ने, निर्वाचन समिति र पर्यवेक्षकको टोलीमा सन्तुलन कायम गर्नुपर्ने, प्रभावकारी पार्टी सञ्चालनका लागि दुई पूर्वअध्यक्षहरुसहितको समाधान समिति गठन गरिनुपर्ने माग गर्दै उनीहरूले बैठक बहिष्कार गरेका हुन् । उनीहरूको सहभागिता बिना बसेको बैठकले महाधिवेशनको मिति टुङ्गो लगाउन केन्द्रीय कार्यसमितिको बैठक बोलाउने निर्णय गरेको छ । बैठकले कात्तिक २७ र २८ गते काठमाडौँमा केन्द्रीय समितिको बैठक बोलाउने निर्णय गरेको प्रवक्ता मोहनकुमार श्रेष्ठले जानकारी दिए।