काठमाडौँ । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले वर्तमान निर्वाचन प्रणालीले मुलुकको समस्याको दीर्घकालीन समाधान दिन नसक्ने बताएका छन् । तर, चुनावी प्रक्रिया सुरु भएमा राप्रपा त्यसबाट भाग्ने पक्षमा नरहेको उनले बताएका छन् । बुधबार पार्टी केन्द्रीय कार्यालयमा सम्पन्न केन्द्रीय कार्यसमिति बैठकपछि सञ्चारकर्मीहरूसँग कुरा गर्दै अध्यक्ष लिङ्देनले भने, ‘हामीले संसद्ले निकास दिन नसकेको भन्दै राजीनामा दियौँ, संसद् विघटनको माग गर्यौँ र नयाँ निर्वाचनमा जानुपर्ने आवश्यकता औंल्यायौं । तर, हामीले निरन्तर भन्ने गरेका छौं–यही प्रणालीबाट हुने निर्वाचनले देशलाई निकास दिन सक्दैन ।’
उनले वर्तमान प्रणालीप्रति गम्भीर असन्तुष्टि जनाउँदै जनताले चाहेको परिवर्तन ल्याउन प्रणाली परिवर्तन अपरिहार्य रहेको जिकिर गरे । ‘प्रणाली नै नबदलीकन नयाँ चुनावले फेरि उही अन्योल र अस्थिरता दोहोर्याउँछ ।’ लिङ्देनले भने, ‘तर चुनाव भइहाल्यो भने हामी भाग्दैनौँ।’ राप्रपा अध्यक्षले वर्तमान प्रणालीप्रति असन्तुष्टि र सुधारको आवश्यकतालाई पुनः उठान गर्दै आगामी राजनीतिक घटनाक्रममा पार्टी सक्रिय भूमिकामै रहने बताएका हुन् ।
यस्ता छन् राप्रपा केन्द्रीय कार्यसम्पादन समितिका १३ निर्णय
राष्ट्रिय प्रजातन्त्र पार्टीको केन्द्रीय कार्यसम्पादन समिति बैठकले विभिन्न १३ वटा निर्णय गरेको छ । बैठक अध्यक्ष राजेन्द्र लिङ्देनको अध्यक्षतामा पार्टी केन्द्रीय कार्यालय धुम्बाराहीमा बसेको थियो । बैठकले समसामयिक राजनीतिक घटनाक्रम र पार्टीका आन्तरिक विषयमाथि विभिन्न निर्णय गरेको छ । आजको बैठकमा महामन्त्रीद्वय धवल शम्शेर राणा र कुन्तिकुमारी शाही अनुपस्थित थिए । उनीहरूले अध्यक्ष लिङ्देनको कार्यशैलीप्रति असन्तुष्टि जनाउँदै बैठक बहिष्कार गरेका थिए ।
हेर्नुस् निर्णयहरु :
१. देश गम्भीर ढङ्गबाट भूराजनीतिक चक्रव्यूहमा फस्दै गएको, अनिर्णयको बन्दी बन्दै गएको, नेपालको निर्णायकत्व नेपाली जनताको हातबाट गुम्दै गएको वर्तमान सन्दर्भमा राजनीतिक र व्यक्तिगत आग्रह पूर्वाग्रह भन्दा देशलाई केन्द्रमा राखेर सबै राजनीतिक शक्तिहरूका बीचमा बृहत राष्ट्रिय सहमति आजको आवश्यकता हो ।
अहिलेको आन्दोलनको मुख्य पक्ष जेनजी समूह, विभिन्न राजनीतिक दलहरू र परम्परागत शक्तिको प्रतिनिधि राजसंस्थाका बीचमा नवीन समझदारी गरेर कसैले नहार्ने सबैले जित्ने, देशले जित्ने राष्ट्रिय सहमति गरेर जानु आजको राष्ट्रिय आवश्यकता हो भन्ने राष्ट्रिय प्रजातन्त्र पार्टीको ठहर रहेको छ । तत्काल सार्थक पहल र संवादका लागि सबै शक्तिलाई राप्रपा हार्दिक आहवान गर्दछ ।
२. राप्रपाले परिवर्तित सन्दर्भमा पार्टीको मुद्दाहरू र राजनीतिक विकल्पहरूमा राजनीतिक दलहरू र विभिन्न पक्षसँग औपचारिक संवाद गर्न अध्यक्ष राजेन्द्र लिङ्देनलाई जिम्मेवारी दिइएको छ ।
३. वर्तमान राजनीतिक अन्यौलको सन्दर्भमा विध्यमान संविधान र निर्वाचन प्रणालीबाट हुने निर्वाचन समस्याको दीर्घकालीन समाधान होइन भन्ने राप्रपाको ठहर छ । यद्यपि प्रजातान्त्रिक प्रक्रियाबाट राप्रपा अलग नरहने निर्णय गर्दछ ।
४. परिवर्तित सन्दर्भमा राप्रपाको विचार नीति, आसन्न निर्वाचन लगायतका विषयमा आम जनतासंग प्रत्यक्ष साक्षात्कार गर्न छठ पर्वपछि देशभर जनसम्वाद कार्यक्रम सञ्चालन गर्ने निर्णय गरिएको छ ।
५. केन्द्रीय कार्यसमितिको बैठक आगामी कार्तिक २७ र २८ गते काठमाडौंमा गर्ने तथा केन्द्रीय कार्यसमितिको बैठकले आगामी केन्द्रीय महाधिवेशनको मिति तय गर्ने निर्णय गरिएको छ ।
६. गत भदौ २३ र २४ गते भएको जेनजी आन्दोलन र चाडवाडका कारण प्रभावित बन्न पुगेको राप्रपाको स्थानीय तह, प्रदेश र जिल्ला कार्यसमितिको अधिवेशन २०८२ मंसिर मसान्तभित्र सम्पन्न गर्ने गरी म्याद थप गर्ने निर्णय गरिएको छ ।
७. जेनजी आन्दोलन पश्चात् जेनजीका नामबाट भैरहेको जवर्जस्ती चन्दा असुली, भोटेकोशी जलविद्युत आयोजना लगायतका जलविद्युत आयोजनामा निःशुल्क शेयर माग, सार्वजनिक पदाधिकारीहरुलाई दिएको अनावश्यक दवाव जस्ता कार्यले निजी क्षेत्र र सार्वजनिक क्षेत्रको खस्किएको मनोवललाई अझै त्रसित बनाउने देखिन्छ। जेनजी पुस्ताले यस्तो क्रियाकलाप गर्दैन भन्ने राप्रपाको विश्वास छ ।
तसर्थ, यस्ता गैरकानुनी क्रियाकलापमा नलाग्न सम्पूर्ण जेनजीहरुलाई आव्हान गर्ने र यस्ता कार्यको नियन्त्रण गरी सुरक्षित लगानीको वातावरण कायम गर्न र सार्वजनिक सेवालाई चुस्त, पारदर्शी र भरोसायोग्य बनाउन सरकारको ध्यानाकर्षण गराईएको छ ।
८. देशले लामो समयदेखि शिथिल अर्थतन्त्रको सामना गरिरहेको बेला हालैको आन्दोलनमा समेत खर्बौंको क्षति हुन पुगेको छ। कैयन् भौतिक संरचनाहरु नष्ट हुन पुगेका छन् भने कैयनले रोजगारी गुमाएका छन्। शिथिल अर्थतन्त्र उकास्ने कार्ययोजना ल्याउन, सुरक्षित लगानीको वातावरण बनाउन एवं व्यवसायी र व्यवसायिक प्रतिष्ठानलाई सुरक्षाको प्रत्याभूति दिलाउँदै “सुरक्षा थ्रेट” को त्रासदीबाट मुक्त गर्न राप्रपा सरकारसंग माग गर्दछ ।
९. राप्रपाको केन्द्रीय अनुशासन समितिको सिफारिस बमोजिम राप्रपा जिल्ला कार्यसमिति जुम्लाका अध्यक्ष बेदबहादुर शाही, उपाध्यक्षद्वय विमल शाही, कालीबहादुर महत र कर्णाली प्रदेश सदस्य मनसुर सुनारलाई पार्टीको विधान बमोजिम एक वर्षको लागि निलम्बन गर्ने निर्णय गरिएको छ ।
१०. हालैको बाढी पहिरोबाट इलाम लगायत देशका विभिन्न क्षेत्रमा भएको मानवीय र भौतिक क्षति प्रति राप्रपा दुःख व्यक्त गर्दछ। बाढी पहिरोबाट ज्यान गुमाउन पुगेका परिवारलाई उचित राहत एवं सहज जीवनयापनको प्रबन्ध गर्न, घाइते र घाइतेको परिवारलाई प्रभावकारी उपचार एवं रोजगारीको व्यवस्था गर्न, घरबारबिहीन भएकालाई आवास लगायतको वैकल्पिक व्यवस्था गर्न राप्रपा सरकारसंग माग गर्दछ ।
११. इजरायल – प्यालेस्टाइन युद्धका क्रममा दुई वर्षदेखि हमासको कब्जामा रहेका नेपाली विद्यार्थी विपीन जोशीको हत्या भएको घटनाप्रति राप्रपा गहिरो दुःख व्यक्त गर्दछ। दिवंगत जोशीप्रति श्रद्धान्जली एवं परिवारमा समवेदना प्रकट गर्दछौं ।
१२. जेनजी आन्दोलनका क्रममा पार्टीका नेता तथा कार्यकर्ताप्रति भएको दुव्र्यवहार र सम्पत्तिको क्षतिप्रति राप्रपा दुःख व्यक्त गर्दछ । साथै सम्पत्ति क्षति भएका पार्टीका नेता कार्यकर्तालाई आवश्यक सहयोग पुर्याउन पार्टीका नेता कार्यकर्तालाई आह्वान गरिएको छ ।
१३. केन्द्रीय कार्यसम्पादन समितिको रिक्त रहेका सदस्यहरुमा पदपूर्ति गर्ने जिम्मेवारी अध्यक्षलाई प्रदान गर्ने निर्णय गरिएको छ ।
