Tag: नेकपा एमाले

काठमाडौं । नेकपा एमाले इलाम जिल्ला कमिटीले दुवै निर्वाचन क्षेत्रबाट महाधिवेशन प्रतिनिधि सर्वसम्मत चयन गरेको छ । इलाम १ र २ बाट २० जना महाधिवेशन प्रतिनिधि निर्विरोध भएका हुन् ।

दुई वटा प्रतिनिधि सभा रहेको इलामबाट खुला, आरक्षित कोटा गरी २० जना प्रतिनिधि चयन भएका छन् । इलाम–१ बाट युवातर्फ निरोज पौडेल चयन भएका छन् । पौडेल युवा संघका प्रबक्ता समेत हुन् ।

महिलातर्फ उमादेवी सुनुवार, सकुन्तला लेप्चा र सावित्रा शिवा निर्विरोध भएका छन् । खुलातर्फ उदयबहादुर राई, उमेश गुरुङ, काजीमान कागते, खम्बसिंह लिम्बु र दीपककुमार थेबे चयन भएका छन् । इलाम–२ बाट युवातर्फ रामप्रसाद सुवेदी (रविन्द्र) चयन भएका छन् । महिलातर्फ टीकादेवी घिमिरे, दिलकुमारी लिम्बु र पबिमाया राई चयन भएका छन् ।

विघटित प्रतिनिधि सभाका सांसद सुहाङ नेम्वाङ खुला तर्फबाट प्रतिनिधि चयन भएका छन् । नेम्वाङ सहित केशवकुमार धौराली, गणेशप्रसाद बराल, दिपेन्द्र खनाल, महेश बस्नेत र हेमन्त राई सर्वसम्मत प्रतिनिधि चयन भएका छन् । दलित कोटाबाट देवेन्द्र विश्वकर्मा पनि निर्विरोध प्रतिनिधि चयन भए ।

यी हुन् इलामबाट चुनिएका एमाले महाधिवेशन प्रतिनिधि

निर्वाचन क्षेत्र नं. १
– खुल्ला तर्फ
१ काजिमान कागते
२ खम्बा सिंह
३ दिपक थेबे
४ उदयबहादुर राई
५उमेश गुरुङ
– युवातर्फ
१ निरोज पौडेल
– महिलातर्फ
१ साबित्रा शिवा
२ सकुन्तला लेप्चा
३ उमादेवी सुनुवार
निर्वाचन क्षेत्र नं. २
– खुल्लातर्फ
१ गणेश बराल
२ सुहाङ नेम्बाङ
३ केशब धैराली
४ महेश बस्नेत
५ दिपेन्द्र खनाल
६ हेमन्त राई
– युवातर्फ
१ रबिन्द्र सुबेदी
– महिलातर्फ
१ दिलु लावती
२ पबीमाया राई
३ टीकादेबी घिमिरे

काठमाडौं । नेकपा एमाले अध्यक्ष एवं निवर्तमान प्रधानमन्त्री केपी शर्मा ओलीले अन्तरिम सरकारलाई बुख्याँचाको संज्ञा दिँदै लोकतन्त्र फर्काउने बाटोमा लाग्न आह्वान गरेका छन् । आइतबार दिउँसो पार्टी केन्द्रिय कार्यालय च्यासलमा एघारौँ राष्ट्रिय महाधिवेशनको प्रतिक चिन्ह (लोगो) सार्वजनिक गर्दै अध्यक्ष ओलीले यस्तो आह्वान गरेका हुन् । उनले देश अफ्ठ्यारो परिस्थितिमा रहेको उल्लेख गर्दै संवैधानिक बाटोमा देशलाई फर्काउन सबै लाग्नुपर्ने बताए ।

असंवैधानिक ढंगले विघटित संसद पुनःस्थापना हुनु आवश्यक रहेको बताए । संसद पुनःस्थापना भयो भने बर्बाद हुन्छ भन्ने गरिएको भन्दै अध्यक्ष ओलीले बर्बाद हुन्छ भनेर संसद विघटन गरेको ? भन्दै प्रश्न गरे । अन्तरिम सरकारप्रति लक्षित गर्दै अनिर्वाचित बुख्याँचाहरु तरकारी बारीमा नै ठिक रहेको टिप्पणी गरे । सिंहदरबार कसैले लगेर किलोमा राखिदिने बुख्याँचाको लागि नभएको उनको भनाइ छ । आधिकारिक लोकतान्त्रिक मूल्य मान्यताको हैसियत भएकाहरुको स्थल सिंहदरबार भएको बताए । उनले केपी ओली र एमालेसँग रिस उठ्यो भन्दै संविधान, देश, विकास, सुशासन, सार्वभौमसत्तामाथि रिस नपोख्न आग्रह गरे ।

उनले भने, ‘देश अफ्ठ्यारो परिस्थितिमा छ । लोकतन्त्र फर्काउँ । संवैधानिक बाटोमा देशलाई फर्काउँ । गलत सिफारिसमा, असंवैधानिक ढंगले विघटित संसद पुनःस्थापना हुनुपर्छ । संसद पुनःस्थापना भयो भने बर्बाद हुन्छ रे, त्यही बर्बाद हुन्छ भनेर संसद विघटन गरेको ? संसदीय प्रणाली आउन नदिने यस देशमा । लोकतन्त्र आउन नदिने ? निर्वाचितहरु लखेटिनुपर्ने ? अनि अनिर्वाचित बुख्याँचाहरु सब्जीबारीमा त ठिकै थियो, सिंहदरबारमा बुख्याँचा ? मिल्छ यो ? बुख्याँचा निर्वाचित हुँदैन कहिल्यै पनि । बुख्याँचा कसैले राखिदिने हो । सिंहदरबार बुख्याँचा कसैले लगेर किलोमा गाडिदिने ठाउँ होइन, जनताबाट, लोकतान्त्रिक विधिबाट निर्वाचित सरकार बस्ने ठाउँ हो । आधिकारिक, जोसँग लोकतान्त्रिक मूल्य मान्यताको हैसियत छ, त्यो बस्ने ठाउँ हो । लोकतन्त्र भनेको नराम्रो कुरा हो । एमालेसँग रिस उठेको होला, एमालेसँगको रिस लोकतन्त्र, देशमाथि नपोखौँ । केपी ओलीसँग रिस उठेको होला, केपी ओलीसँग उठेको रिस संविधानमाथि लगेर, लोकतन्त्रमाथि लगेर, देशको विकास र सुशासनमाथि लगेर, देशको सार्वभौमसत्तामाथि लगेर नपोखौँ ।’
अध्यक्ष ओलीले अन्यायको पक्षमा उभिने व्यक्ति नै जनताको प्रतिनिधि भएको बताए । निर्वाचन जितेर मात्रै प्रतिनिधित्व नभइने भन्दै जनताको पक्षमा उभिनसक्नु पर्ने बताए ।

‘हिंसाबाट सरकार सिर्जना भएको हो, हिंसाको माध्यमबाट शासन चलाउँदै छन्’
अध्यक्ष ओलीले अन्तरिम सरकारले गरेको संसद विघटन प्रतिगमन भएको बताएका छन् । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ प्रति लक्षित गर्दै प्रतिगमनलाई प्रतिगमन भन्न नसक्नेहरु विभिन्न समयमा संसद विघटन भएको थियो, यो कसरी असंवैधानिक हुन्छ भनेर कुतर्क गरिरहेको बताए ।

उनले एमालेको आधारभुत निष्ठा देश, जनताप्रति, देश विकासप्रति रहेको बताए । उनले लोकतन्त्र मासेर अलोकतान्त्रिक सरकार जडान गरिएको भन्दै अहिले पनि त्यही देखिरहनुपरेको बताए । वर्तमान सरकारको कुनै जग नरहेको उनको जिकिर छ । संविधान नमानेर, संविधान बाहिरबाट, संविधान कुल्चिएर, लोकतान्त्रिक प्रणालीलाई अस्वीकार गरेर, लोकतान्त्रिक मूल्यहरु अस्वीकार गरेर सरकार बनाइएको बताए । अपराधबाट सरकार सिर्जना भएको र अपराधकै माध्यमबाट शासन चलाइरहेको उनको भनाइ छ ।

काठमाडौं । नेकपा एमालेका अध्यक्ष केपी शर्मा ओलीले पार्टीमा हस्तान्तरण र पुस्तान्तरणको विषय स्वभाविक भएको बताउँदै समय अनुसार हुने स्पष्ट पारेका छन् । आज (आइतबार) पार्टी केन्द्रीय कार्यालय च्यासलमा आयोजित एघारौं महाधिवेशनको लोगो सार्वजनिक कार्यक्रमलाई सम्बोधन गर्ने क्रममा ओलीले यस्तो बताएका हुन् ।

‘अधिवेशन हुँदा कमिटीमा केही साथी हट्ने केही नयाँ हुने यो सिलसिला हुन्छ नै । पुनर्गठन हुनुपर्छ, हस्तान्तरण पुस्तान्तरण हुनुपर्छ भनेर यस्तो जोडदार ढंगले भनिरहनु पर्ने विषय होइन,’ उनले भने, ‘यो स्वभाविक विषय हो । हस्तान्तरण पनि हुन्छ । पुस्तान्तरण पनि हुन्छ । हुनैपर्छ । यो नगरौं भने पनि हुन्छ । त्यसकारण पुस्तान्तरण, हस्तान्तरण आवश्यकता अनुसार हुन्छ ।’ अधिवेशन पनि सोही कारण गर्नपर्ने उनले बताए । ‘अधिवेशन त्यही कारण चाहिने हो । हामीले विधि विधान अधिवेशन, संगठनात्मक नीतिगत प्रश्न, राजनीतिक कार्यका प्रश्न र आगामी दिनका मार्ग सम्बन्धी प्रश्न हुन्छ,’ ओलीले भने ।

अध्यक्ष ओलीले आगामी महाधिवेशनमा मतदान हुने बताएका छन् । उनले महाधिवेशनमा प्रतिस्पर्धा हुने बताए । ‘सर्वसम्मतिका नाममा सेन्टिमेन्टल काम हुँदैन । रोक्ने सोक्ने काम हुँदैन । प्रतिस्पर्धा हुन्छ,’ ओलीले भने, ‘एमालेमा डेमोक्रेसी छैन । चुनावै लडेन कसैलाई चुनाव लड्न दिएन भन्दै गर्लान् । नदिइएको होइन, मेरो आग्रह छ एकताबद्ध भएर जाऔं, एकअर्कामा टिकाटिप्पणी गर्ने खुइल्याउने, होच्याउने, अपमान गर्ने जस्ता काम किन गर्ने ? त्यस्तो नगरौं।‘

अध्यक्ष ओलीले सहमतिका साथ लड्न र सहमतिका साथ अघि बढ्न आग्रह गरे । उनले केन्द्रीय सदस्य पनि सार्वभौम हुने भएकाले उनीहरुको आकांक्षालाई समेत रोक्न नसकिने ओलीको भनाइ थियो । उनले पार्टी पुनर्गठन, हस्तान्तरण पुस्तान्तरणको आवाज उठिरहेको बताउँदै आवश्यकता अनुसार हुने बताए । ओलीले भने, ‘त्यसैका लागि हो अधिवेशन चाहिने ।’

 

काठमाडौं । नेकपा एमालेले एघारौँ राष्ट्रिय महाधिवेशनको प्रतिक चिन्ह (लोगो) सार्वजनिक गरेको छ । आइतबार दिउँसो पार्टी केन्द्रिय कार्यालय च्यासलमा एघारौँ राष्ट्रिय महाधिवेशनको प्रतिक चिन्ह सार्वजनिक गरिएको हो । पार्टीका अध्यक्ष केपी शर्मा ओली, वरिष्ठ उपाध्यक्ष ईश्वर पोखरेल, उपाध्यक्ष अष्टलक्ष्मी शाक्य, सचिव पद्या अर्याल लगायतका नेताहरुको उपस्थितिमा अध्यक्ष ओलीले प्रतिक चिन्ह सार्वजनिक गरे । एमालेले ‘निर्णायक राष्ट्रिय शक्ति हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ भन्ने मूल नारा बनाएको छ । एमालेले आउँदो मंसिर २७ देखि २९ गतेसम्म काठमाडौंमा महाधिवेशन गर्दैछ ।

पार्टीका सचिव एवं प्रचार समितिका संयोजक पद्यमा अर्यालले उक्त लोगो पार्टीको इतिहास, आन्दोलन र संकल्पको कलात्मक रुप भएको बताइन् । लोगोमा राष्ट्रिय झण्डा, धरहरा, पाँच तल्ले दरबार, पार्टीको निर्वाचन चिन्ह आदिलाई बहुभाषिक रूपमा संयोजन गरिएको छ ।
सोही अवसरमा महाधिवेशन केन्द्रित जिङ्गल पनि सार्वजनिक गरिएको छ । यही मंसिर २७ देखि २९ गतेसम्म काठमाडौँमा हुने महाधिवेशनका लागि यही मंसिर १३ गते मातहतका कमिटीमा प्रतिनिधि छनोट सकिएको छ । महाधिवेशनमा करिव २२ सय प्रतिनिधि सहभागी हुँदैछन् ।

काठमाडौँ । नेकपा एमालेका सचिव योगेश भट्टराईले देशसँगै नेकपा एमाले पनि संकटमा रहेको बताएका छन् । आइतबार सामाजिक सञ्जालमा एक भिडियो सन्देश जारी गर्दै नेता भट्टराईले संविधान कार्यान्वयन र लोकतान्त्रिक अभ्यासलाई पुनस्र्थापित गर्दै राज्यका सवै निकायलाई पुनर्जीवित गर्नुपर्ने चुनौती रहेको बताए । साथै उनले भदौ २३ र २४ को घटनापछि पार्टीलाई कस्तो नेतृत्व र दिशा दिने भन्ने महत्वपूर्ण सवाल रहेको पनि बताएका छन् ।

भदौ २३ र २४ को घटनाबाट सकारात्मक र नकारात्मक पाटा रहेको भन्दै सकारात्मक शिक्षालाई ग्रहण गर्नुपर्नेमा भट्टराईले जोड दिएका छन् । उनले कुनै पनि हिंसा र विध्वंस स्वीकार्य नहुने भन्दै पार्टीलाई नयाँ सन्दर्भमा पुनर्गठित गर्नु राष्ट्रिय महाधिवेशनको प्रमुख कार्यभार रहेको बताएका छन् । ‘हामीले पुनर्गठनको विषयलाई सशक्त ढङ्गले अघि बढाउनुपर्ने छ भने अर्कोतिर नेकपा एमालेलाई एकताबद्ध गर्ने चुनौती पनि छ’, भट्टराईले पार्टी प्रतिनिधि र नेतृत्वलाई दुवै कामलाई सन्तुलित ढङ्गले अघि बढाउन आग्रह गरेका छन् ।

‘हामीले आवेग र उत्तेजनाबाट कुनैपनि निर्णय गर्न पुग्यौ भने त्यसले दुर्घटना निम्त्याउँछ । त्यसकारण आज एमालेका निम्ति आवेग र उत्तेजनाको कुनैपनि अर्थ हुने छैन’, भट्टराईले भनेका छन् । उनले संयमता, धैर्यता र सहकार्य एमालेको संस्कृति रहेको भन्दै शक्तिको भाषा बोल्ने समय नभएकोमा जोड दिँदै पार्टीभित्र पनि विविधताबिच एकता कायम गर्नुपर्ने जवजको मूल मान्यता रहेको बताएका छन् । नेकपा एमालेको ११ औं महाधिवेशनमा अध्यक्ष पदमा केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिस्पर्धा हुँदैछ । त्यसका लागि शनिबार देशभर प्रतिनिधि छनोटको काम सकिएको छ ।

हेर्नुस् भिडियो

 

 

काठमाडौं । नेकपा (एमाले) का वरिष्ठ उपाध्यक्ष ईश्वर पोखरेलले ११ औं राष्ट्रिय महाधिवेशनमा स्वस्थ र मित्रवत् प्रतिस्पर्धा गर्ने बताएका छन् । भूगोल तथा विशेष कमिटीबाट चुनिएर आएका महाधिवेशन प्रतिनिधिहरूलाई शुभकामना दिँदै पोखरेलले जनताको बहुदलीय जनवादको रक्षा र पार्टी जीवनको लोकतान्त्रीकरणको कुरालाई प्रभावकारी ढंगले अगाडि बढाउने बताएका हुन् ।

‘एमाले जनताको बहुदलीय जनवादको रक्षा र पार्टी जीवनको लोकतान्त्रीकरण कुरालाई प्रभावकारी ढंगले अगाडि बढाउन चाहन्छ । यी काम गर्दै मुलुकमा समृद्धिको एउट अभियानलाई अगाडि बढाउन चाहन्छ,’ उनले सामाजिक सञ्जालमार्फत् भिडिओ सन्देश जारी गर्दै भनेका छन्, ‘यो ११ औं राष्ट्रिय महाधिवेशन यो काममा महत्वपूर्ण निष्कर्षमा पुग्न सकोस् यो सँगसँगै नेतृत्व निर्माणमा स्वस्थ, मित्रवत् प्रतिस्पर्धालाई हामीहरू अगाडि बढाउन चाहन्छौं । यो महाधिवेशनमा यी कामहरू गर्न सकौं ।’ पोखरेलले यो महाधिवेशनमा अध्यक्षमा प्रतिस्पर्धा गर्ने यसअघि नै बताइसकेका छन् ।

विराटनगर । नेकपा एमालेको ११ औं महाधिवेशन प्रतिनिधि छनोटका क्रममा विराटनगरमा विवाद हुँदा केही समय मतदान रोक्नुपर्ने अवस्था सिर्जना भएको छ ।

शनिबार पार्टी कार्यालय पाञ्चालीमा भएको मतदानमा संस्थापन पक्षका नेता पर्शुराम बस्नेतमाथि इतर समूहका कार्यकर्ताले हातपात गरेको घटना प्रहरीद्वारा पुष्टि भएको छ । विवाद मुख्यतः वडा नम्बर १२ का वडाध्यक्ष भानुभक्त पाठकले एक व्यक्तिलाई मतदानका लागि लैजाने क्रममा सुरु भएको थियो । संस्थापन पक्षले पटक–पटक एउटै व्यक्तिलाई मतदानमा लैजानु ठीक नभएको भन्दै आपत्ति जनाएका थिए ।

यसैबीच मोरङ क्षेत्र नम्बर ६ मा पनि प्रतिनिधि चयन प्रक्रियामा धक्कामुक्की र विवाद भएको छ । संस्थापन पक्ष र अन्य समूहबीच प्यानल भिडन्त हुँदा सर्वसम्मत प्रतिनिधि छनोट हुन सकेन । डबल मत हालिएको आरोपपछि मतदान केही समयका लागि स्थगित पनि भएको थियो ।

एमाले मोरङका जिल्ला स्रोतले विवादका क्रममा विनोद ढकाल समूहका कार्यकर्ताले बस्नेतमाथि हातपात गरेको जनाएको छ । मतदान पुनः सुरु भए पनि प्रतिनिधि छनोट प्रक्रिया तनावपूर्ण अवस्थामा रहेको बताइएको छ ।

काठमाडौं । नेकपा एमालेका महासचिव शंकर पोखरेलले राष्ट्रवादी शक्तिमाथि प्रहार जारी रहेको दाबी गरेका छन् । आज बिहान सामाजिक सञ्जालमार्फत उनले मुलुक संकटमा भएको अवस्थामा नीतिमा दृढता र नेतृत्वमा एकता अत्यावश्यक भएको बताएका हुन् ।

उनले एकताबद्ध भएर अगाडि बढ्दा संकट पार लाग्ने बताए। ‘मुलुक संकटमा छ, राष्ट्रवादी शक्तिमाथि प्रहार जारी छ ।’ महासचिव पोखरेलले भने, ‘यस्तो अवस्थामा नीतिमा दृढता र नेतृत्वमा एकता अत्यावश्यक छ । अघि बढौं–सम्भव छ ।’

नेकपा एमालेको ११ औं राष्ट्रिय महाधिवेशन मंसिर २७–२९ गते काठमाडौं उपत्यकामा हुँदैछ । महाधिवेशनका लागि आज एकै दिन देशभर प्रतिनिधि चयन हुँदैछ । एमालेले सकेसम्म सर्वसम्मत र सहमति हुन नसकेका स्थानमा मतदानमार्फत प्रतिनिधि चयन गर्दैछ ।

काठमाडौं । नेकपा एमालेको आसन्न महाधिवेशन नजिकिँदै गर्दा देशभरका संगठनहरू आज प्रतिनिधि चयन प्रक्रियामा जुटेका छन् । केही जिल्लामा सर्वसम्मतिको आधारमा प्रतिनिधि टुंगो लागिसकेको छ भने धेरै स्थानमा उम्मेदवार संख्या तोकिएको कोटाभन्दा बढी भएपछि निर्वाचनमार्फत छनौटको तयारी भएको छ ।

शुक्रबार साँझसम्म सर्वसम्मत चयनका लागि केन्द्रीय नेतृत्वबाट अन्तिम प्रयासका निर्देशन दिइएका थिए । सहमति नजुटेपछि आज निर्वाचनबाटै प्रतिनिधि छान्न स्थानीय कमिटीहरू अग्रसर भएका छन् । संगठन विभागले केही दिनअघि नै ५ बुँदे निर्देशन जारी गर्दै प्रतिनिधि चयनको समय सार्न नपाइने र शनिबारभित्रै प्रक्रिया सम्पन्न गर्नुपर्ने स्पष्ट गरिसकेको थियो ।

महाधिवेशनका लागि छानिनुपर्ने प्रतिनिधिको नामावली पठाउने अन्तिम म्याद सोमबार निर्धारित छ । अहिले एमालेका ६ लाख ६७ हजार ६३० संगठित सदस्यबाट करिब २२ सय महाधिवेशन प्रतिनिधि चयन हुनेछन् । यस पटक प्रत्येक संघीय निर्वाचन क्षेत्रबाट कम्तीमा एक युवा प्रतिनिधि अनिवार्य समावेश गर्नुपर्ने व्यवस्था गरिएको छ, जसले महाधिवेशनमा नयाँ पुस्ताको सहभागिता बढाउने अपेक्षा गरिएको छ ।

देशभरका जिल्ला, पालिका र तल्ला संगठनमा आजको दिन प्रतिनिधि छनौट प्रक्रिया अत्यन्तै व्यस्त र निर्णायक बन्न पुगेको छ । महाधिवेशन नजिकिँदै जाँदा पार्टीभित्रको आन्तरिक प्रतिस्पर्धा, सहमतिको प्रयास र निर्वाचन प्रक्रियाले एमाले संरचनामा चहलपहल थपिएको छ ।

काठमाडौं । नेकपा एमालेका उपमहासचिव प्रदीप ज्ञवालीले कार्यबाहक प्रमुख निर्वाचन आयुक्त रामप्रसाद भण्डारीले दिएको अभिव्यक्ति गैरजिम्मेवार भएको टिप्पणी गरेका छन् ।

बुधबार बिहान सामाजिक सञ्जालमार्फत् प्रतिक्रिया दिँदै उनले संवेदनशील स्थानमा रहेका व्यक्तित्वबाट शान्ति–सुरक्षा जस्तो गम्भीर मुद्दामा हल्का टिप्पणी अपेक्षित नहुने बताएका हुन्। भण्डारीले ‘हजारौँ लडाकु र हतियार बाहिरै राखेर पनि देशले निर्वाचन गराएको छ, केही थान हतियार बाहिर हुँदा निर्वाचन हुन नसक्ने होइन’ भन्ने आशयको अभिव्यक्ति दिएका थिए । यही टिप्पणीलाई ज्ञवालीले आलोचना गरेका हुन्।

ज्ञवालीका अनुसार राजनीतिक उद्देश्यका लागि भएको सशस्त्र द्वन्द्व अन्त्यका क्रममा गरिएको विशेष व्यवस्थालाई आपराधिक उद्देश्यले हतियार लुटिने घटनासँग तुलना गर्नु पूर्णतः अनुचित र हास्यास्पद छ । उनले लेखेका छन्, ‘द्वन्द्व अन्त्यका लागि माओवादीका हतियारहरू कन्टेनरमा दुई वटा चाबीसहित सुरक्षित राखिएको थियो। २८ वटै शिविरमा लडाकुहरूलाई सीमित गरेर ग्ल्ःक्ष्ल् को कडाइपूर्वक निगरानीमा राखिएको तथ्य प्रमुख आयुक्तलाई थाहा हुनुपर्ने हो।’

ज्ञवालीका अनुसार संविधानसभा निर्वाचनअघि लडाकु र हतियार दुवैको दुरुपयोगका घटना घटे पनि त्यो अवस्थाको पृष्ठभूमि र वर्तमान सुरक्षा संरचना पूर्ण रूपमा भिन्न छ। ज्ञवालीले शान्ति–सुरक्षासँग प्रत्यक्ष सम्बन्धित संवैधानिक पदमा रहेका व्यक्तिबाट यस्तो प्रकारको टिप्पणीले जनविश्वास कमजोर पार्ने दाबी गरे। उनले थपे, ‘जिम्मेवारीको स्थानमा बसेका व्यक्तित्वबाट यस्तो स्तरको अभिव्यक्ति अपेक्षित थिएन । सुरक्षा परिस्थिति सामान्यीकरण र चुनावी वातावरण मजबुत बनाउन जिम्मेवार निकायले स्पष्ट, तथ्यपूर्ण र विश्वसनीय बोल्न आवश्यक छ।’

काठमाडौं । प्रतिनिधि सभा निर्वाचन नजिकिँदै गर्दा राजनीतिक मोर्चामा सक्रिय रहेको नेकपा (एमाले) ले आज (मंगलबार) एकै दिन दुई महत्वपूर्ण कदम चालेको छ । एमालेले आजै सर्वोच्च अदालतमा संसद पुनःस्थापनाको माग गर्दै रिट दायर गरेको छ भने निर्वाचन आयोगमा आगामी प्रतिनिधि सभा निर्वाचनका लागि दल दर्ता गराएको छ ।

मंगलबार निर्वाचन आयोगमा पुगेका एमालेका निर्वाचन विभाग प्रमुख निरज आचार्य र कार्यालय सचिव डा. भीष्म अधिकारीले पार्टीको तर्फबाट दल दर्ताको निवेदन बुझाए । आयोगले प्रतिनिधि सभा निर्वाचनका लागि एमालेलाई दर्ता नम्बर ९७१, राष्ट्रिय सभा निर्वाचनका लागि ९३९, र समग्र दल दर्ता क्रममा पार्टीलाई ६६औं स्थान दिएको आचार्यले जानकारी दिएका छन् । यसअघि सोमबार पार्टीले राष्ट्रिय निर्वाचन प्रयोजनका लागि प्रारम्भिक दल दर्ताको निवेदन पेस गरिसकेको थियो ।

यसैबीच, संसद विघटन असंवैधानिक भएको ठहर गर्दै पार्टी सर्वोच्च अदालत समेत पुगेको छ । प्रमुख सचेतक महेश बर्तौला र सचेतक सुनिता बरालले आजै अदालतमा निवेदन दर्ता गराए । मंसिर १ गते च्यासलस्थित मुख्यालयमा बसेको विघटित प्रतिनिधिसभाका एमाले सांसदहरूको बैठकले संसद पुनःस्थापनाका लागि कानुनी तथा राजनीतिक संघर्ष थाल्ने निर्णय गरेअनुसार आवश्यक कागजात र परामर्श पूरा भएपछि एमालेले रिट दायर गरेको बताइएको छ ।

पार्टीको तर्क अनुसार प्रधानमन्त्री सुशीला कार्कीलाई वर्तमान कानुनले औपचारिक हैसियत नदिने परिस्थितिमा संसद विघटन गर्नु संविधानविपरीत छ । यही आधारमा पुनःस्थापनाको माग गर्दै सर्वोच्चको ढोका ठटाइएको एमालेले बताएको छ । एकातिर संसद पुनःस्थापनाको कानुनी लडाइँ, अर्कातिर आगामी निर्वाचन सहभागिताका तयारी—दुई मोर्चामा सक्रिय एमालेले आजको दिनलाई राजनीतिक दृष्टिले विशेष रूपमा उपयोग गरेको देखिन्छ ।

काठमाडौं । नेकपा एमालेको ११ औं महाधिवेशन नजिकिँदै गर्दा देशभरि प्रतिनिधि छनोट प्रक्रिया तीव्र बन्दै गएको छ । यही तयारीबीच पार्टीको संगठन विभागले पाँच बुँदे निर्देशन जारी गरेको छ भने कैलालीमा चाहिँ केही नेता–कार्यकर्ताको संगठित सदस्यता सूचीबाटै ‘हराए’ पछि विवाद बढेको छ र छानबिन समेत सुरु भएको छ ।

एमाले स्थायी कमिटी सदस्य तथा संगठन विभाग प्रमुख काशीनाथ अधिकारीका अनुसार भर्चुअल बैठकमार्फत महाधिवेशन प्रतिनिधि चयनका लागि आवश्यक मार्गदर्शन तय गरिएको हो । निर्देशनअनुसार कुनै पनि जिल्लाले निर्वाचन प्रक्रियामा प्रवेश गर्नु अघि आफ्नो क्षेत्रको अन्तिम मतदाता नामावली सार्वजनिक गर्नै पर्नेछ । केन्द्रले पठाएको पछिल्लो परिपत्रलाई नै आधार मान्न भनिएको छ ।

साथै प्रत्येक जिल्लाले अन्तिम मतदाता संख्याबारे तत्क्षण केन्द्रलाई जानकारी दिनुपर्नेछ । सर्वसम्मतिबाट प्रतिनिधि छनोट गर्नका लागि १२ गते साँझसम्म प्रयास गर्ने, त्यसमा सफलता नपाए १३ गते अनिवार्य रूपमा निर्वाचनको बाटो समातिने निर्देश गरिएको छ । विभागका अनुसार कुनै पनि कारण देखाएर १३ गतेको कार्यक्रम सार्न नपाइनेछ । केही ठाउँमा प्रतिनिधि उम्मेदवारी शुल्क अस्वाभाविक रूपमा बढाइएको सूचनापछि अधिकतम शुल्क १ हजार रुपैयाँ तोकिने व्यवस्था समेत गरिएको छ ।

यता, कैलालीमा भने प्रतिनिधि आकांक्षी रहेका दर्जनौँ नेता–कार्यकर्ताको नाम नै केन्द्रीय संगठन विभागले प्रमाणित गरेको सूचीमा नदेखिएपछि अन्योल र असन्तुष्टि बढेको छ । प्रदेशसभा निर्वाचनदेखि जिल्ला सचिवालयसम्म जिम्मेवारी सम्हालिसकेका १३ जनाको संगठित सदस्यता सूचीमै नाम नआएपछि एमाले कैलालीले छानबिन समिति गठन गरेको छ । टेक बुढाको संयोजकत्वमा बनाइएको समितिले छुटेको कारणबारे छानबिन गरी रिपोर्ट बुझाएपछि थप निर्णय हुने जिल्ला इन्चार्ज नारदमुनि रानाले बताएका छन् ।

४० वर्षमुनिका कोटाबाट प्रतिनिधि बन्ने तयारीमा रहेका कुमार बडैला, दीपक रावल, प्रकाश खड्का लगायतका नेताहरूले आफूहरूले नियमित रूपमा सदस्यता नवीकरण गरिरहे पनि नियतवश नाम हटाइएको आरोप लगाएका छन् । रावलका अनुसार गत १७ वर्षदेखि निरन्तर सदस्य भएर काम गरिरहेकाहरूलाई गुटगत कारणले पछाडि धकेलिएको हो । खड्काले पनि परिवारका सबैको नवीकरण प्रक्रिया पूरा हुँदा पनि आफू मात्र सूचीबाट हटाइएको दाबी गरेका छन् ।

जिल्ला कमिटीलाई दिएर भनेको निवेदनपछि जिल्लाले छुटेका सबै नाम प्रदेश कमिटी हुँदै केन्द्रमा पठाइसकेको छ । प्रदेश कमिटीले पनि संशोधनका लागि केन्द्रलाई औपचारिक सिफारिस गरिसकेको जनाएको छ । मंसिर २७ देखि २९ गते काठमाडौंमा हुने एमालेको ११ औँ महाधिवेशनका लागि मंसिर १३ गते देशभरका निर्वाचन क्षेत्र तथा विदेशस्थित संगठनहरूमा एकैदिन प्रतिनिधि छनोट हुनेछ। महाधिवेशनमा करिब २२ सय प्रतिनिधि सहभागी हुने  जनाएको छ। प्रतिनिधि छनोटका कडाइका निर्देशसँगै कैलालीमा देखिएको सदस्यता विवाद मिल्ने हो कि झन् गहिरो बन्दै जाने हो—अब केन्द्रको निर्णयबाटै स्पष्ट हुनेछ।

विराटनगर । मोरङ र सुनसरी क्षेत्रमा आइतबार राजनीतिक तनाव चुलिएको छ । नेकपा एमालेका पोलिटब्युरो सदस्य महेश बस्नेत इटहरीतर्फ जाँदै गर्दा विराटनगर विमानस्थल बाहिर उनको सवारीमा रातो मसी प्रहार भएको र त्यसलगत्तै सुनसरीको दुहबीमा समेत स्थानीय युवाहरूले विरोध प्रदर्शन गरेका छन् ।

विराटनगर–२ का १९ वर्षीय अर्पित कुँवर र विराटनगर–१ का २५ वर्षीय सन्जोग गौतम नाम गरेका दुई युवाले सडक किनारबाट दगुर्दै बस्नेत सवार गाडीमाथि रातो मसी फ्याँकेका थिए । प्रहरीले घटनापछि दुवैलाई नियन्त्रणमा लिएर जिल्ला प्रहरी कार्यालय मोरङमा राखेको छ । पक्राउ परेका गौतम नेपाली कांग्रेस निकट नेपाल विद्यार्थी संघ (नेविसंघ) मोरङका जिल्ला सदस्य हुन् भने कुँवर पनि नेविसंघसम्बद्ध रहेको प्रहरी स्रोतले जनाएको छ ।

घटनापछि अर्पित कुँवरले आफूले प्रहार गरेको मसी ‘विरोधको प्रतीक’ भएको दाबी गरेका छन् । उनले कुनै व्यक्तिलाई लक्षित आक्रमण नभई एमाले नेतृत्वको शैली, प्रवृत्ति र भदौ २३ को जेनजी आन्दोलनताका भएको घटनाप्रति असन्तोष प्रकट गर्न यस्तो कदम चालेको बताएका छन् । महेश बस्नेत भने यस घटनालाई आफू सहभागी हुन लागेको कार्यक्रम अवरुद्ध गर्ने प्रयास र ‘लोकतन्त्रमाथिको उपहास’ भनेर टिप्पणी गरेका छन् । उनी सुरक्षा व्यवस्थासहित विराटनगर हुँदै सुनसरीतर्फ अघि बढेका छन् ।

बस्नेत र नेता भानुभक्त ढकालको गाडी दुहबी क्रस भइसकेपछि त्यहाँ स्थानीय युवाहरूले टायर बालेर प्रदर्शन गरेका थिए । जिल्ला प्रहरी कार्यालय सुनसरीका डिएसपी चन्द्र खड्काका अनुसार आगो नियन्त्रणमा लिएर सडक सुचारु गरिएको छ । विराटनगर विमानस्थलमा भएको मसी प्रहारदेखि दुहबीसम्म फैलिएको विरोधले जेनजी आन्दोलनमार्फत निरन्तर बढ्दै गएको असन्तोष पुनः सतहमा आएको देखिएको छ ।

 

 

 

 

काठमाडौं । नेकपा एमालेका पोलिट्ब्युरो सदस्य महेश बस्नेतले अलोकतान्त्रिक सरकारले पक्षपोषण गरेका मान्छेहरू अलोकतान्त्रिक र अराजनीतिक गतिविधिमा सक्रिय रहेको टिप्पणी गरेका छन् । बस्नेतले फरक विचार भए शान्तिपूर्ण कार्यक्रम गरेर व्यक्त गर्नुपर्ने र ढुंगा हान्ने, बाटो छेक्ने काम राम्रो नभएको बताएका छन् । उनले २३, २४ भदौको आन्दोलन यता जेन–जी युवाप्रति आक्रामक प्रतिक्रिया दिएका छन् र पञ्चायत, शाहीकाल र माओवादीकालसँग तुलना गरेका छन् ।

सुनसरीमा आयोजति युवा संघको कोशी जागरणसभामा सहभागी हुन त्यसतर्फ गइरहेका बेला सुनसरीमा दुई युवाले उनको गाडी रोकेर बेलुनमा भरिएको रातो छ्यापेको विषयमा प्रतिक्रिया दिँदै बस्नेतले यस्तो बताएका हुन् । ‘सरकार अलोकतान्त्रिक भएकाले यिनीले पक्षपोषण गरेका मान्छे पनि अलोकतात्रिक र अराजनीतिक गतिविधिमा नै लागेकै छन्,’ उनले भने, ‘यस्तो गतिविधि लोकतन्त्रको उपहास हो ।’ बस्नेतले शान्तिपूर्ण रूपमा राजनीतिक गतिविधि गर्न सबैले पाउने भन्दै फरक विचार भए शान्तिपूर्ण कार्यक्रम गरेर व्यक्त गर्नुपर्ने बताए ।

‘हाम्रो विरोधमा भाषण गर, नारा लगाऊ । ढुंगा हान्ने, बाटो छेक्ने काम राम्रो होइन । केही कुरा छन् भने शान्तिपूर्ण कार्यक्रम गरेर राखे भयो नि,’ बस्नेतले थपे, ‘ आज हामीले कार्यक्रम गर्दैछौं । विरोध नै गर्न मन भए भोलि त्यही ठाउँका शान्तिपूर्ण रूपमा अर्को सभा गरेर विरोध गरे भयो । ढुंगा हान्नु पर्दैन ।’ २३, २४ भदौको आन्दोलन यता जेन–जी युवाप्रति आक्रामक सुनिँदै आएका बस्नेतले पञ्चायतका, शाहीकाल र माओवादीकाल समेत समाना गरेर आएको प्रतिक्रिया दिए ।

 

काठमाडौं । निवर्तमान प्रधानमन्त्री समेत रहेका नेकपा एमालेका अध्यक्ष केपी शर्मा ओलीले वर्तमान सरकारसँग चुनाव गराउने पनि अधिकार नभएको दाबी गरेका छन् ।

आज (शनिबार) काठमाडौंमा आयोजित जनप्रदर्शनपछिको सभालाई सम्बोधन गर्ने क्रममा उनले प्रधानमन्त्री सुशीला कार्कीसँग चुनाव गराउने पनि अधिकार नभएको बताएका हुन् । ‘तपाईंसँग चुनाव गराउने पनि अधिकार छैन,’ ओलीले भनेका छन् ।

उनले कार्की आगजनी गरेर, लुटपाट गरेर, विश्वंस मच्चाएर मात्रै सरकारमा पुगेको आरोप लगाउँदै उनले प्रश्न गरे, ‘चुनाव गराउँछु भन्ने तपाई को हो ?’ ‘अहिले शासन विधिको त कुरै छाडिदिउँ, व्यक्ति त अनधिकृत व्यक्ति, उत्पातबाट सिर्जना भएको सरकार बनेको छ । तपाईंहरू लोकतन्त्रमा विश्वास गर्नु हुन्छ कि हुन्न बताउनुस् ? यही हो लोकतन्त्र ?,’ ओलीले भनेका छन् ।

अध्यक्ष ओलीले प्रधानमन्त्री सुशीला कार्कीले नेताहरुविरुद्ध बोलेको सुनिने क्यासेटबारे जवाफ माग गरेका छन् । ओलीले ‘कस्तो कस्तो मान्छेलाई विगतमा प्रधानन्यायाधीश र अहिले प्रधानमन्त्री बनेछन्’ भन्दै आक्रोश पोखे ।

‘दुर्गा प्रसाईंको अरू के हो म जान्दिनँ । उनले निकालेको क्यासेटको सम्बन्धमा नेपाली जनतालाई सरकारले बताउनु पर्छ’, उनले भने, ‘प्रधानमन्त्रीले त्यो क्यासेट के हो बताउनु पर्छ ?’ जेनजी आन्दोलनकै बेला हेलिकप्टर उडेको देखिएकै बेला उक्त क्यासेटमा प्रधानमन्त्री कार्कीको गैरजिम्मेवार अभिव्यक्ति सुनिएको उनको भनाइ छ ।

उनले भने, ‘सेनाले नेताहरूलाई बचायो भन्दा किन बचाउने भन्ने पूर्व प्रधानन्यायाधीश र अहिले असंवैधानिक प्रधानमन्त्रीको आवाज सुनिन्छ, त्यो के हो ?’ त्यो क्यासेट बाहिर ल्याएकै कारण प्रसाईंलाई पक्राउ गरिएको ओलीको आरोप छ । ‘मान्छे गिरफतार गर्ने होइन, त्यो क्यासेटको छिनोफानो हुनुपर्छ’, ओलीको भनाइ थियो ।

अध्यक्ष ओलीले वर्तमान सरकार संविधानविपरीत बनेको आरोप लगाउँदै तत्काल राजीनामा दिन माग गरेका छन् । शनिबार काठमाडौँमा आयोजित जनप्रदर्शनलाई सम्बोधन गर्दै अध्यक्ष ओलीले राष्ट्रपतिलाई यो सरकार हटाउन आग्रह गरेका छन् । ‘राष्ट्रपति ज्यू, अस्ती–अस्ती जेनजीका माग भनेर यो सरकार जडान गर्नुभयो त,’ ओलीले भने, ‘जेनजीको माग अनुसार यो सरकार किन विदा गर्नु हुन्न ? हटाउनु होस् ।’

उनले संविधान अनुसार नबनेको सरकार हटाउन कुनै संविधान नचाहिने समेत जिकिर गरे । ‘संविधानले दिदैन भन्ने हो भने अस्ति पनि त संविधानले नदिएकै त गरेको हो,’ ओलीको प्रश्न छ, ‘यो संविधानअनुसार नबनेको असंवैधानिक चिजलाई तपाईंलाई केले रोक्यो ?’

अध्यक्ष केपी ओलीले अब प्रतिनिधि सभा पुनस्र्थापना हुने दाबी गरेका छन् । उनले अब देश एमालेमय बन्ने दाबी गरे । उनले भने, ‘अब असंवैधानिक ढङ्गले भङ्ग भएको प्रतिनिधि सभाको अविलम्ब पुनस्र्थापना हुनुपर्दछ। हुन्छ पनि अब अर्को बाटो छैन । त्यही बाटोबाट देश अगाडि बढ्छ । प्रतिनिधि सभा पुनर्स्थापना मात्रै देशको सही समाधान हो। को डराउँछ कसको सातो जान्छ त्यो बेग्लै कुरा हो ।’ उनले पार्टीपंक्तिलाई प्रतिनिधि पुनर्स्थापनाको पक्षमा लाग्न निर्देशन दिए । उनले प्रतिनिधि सभा अनधिकृत, असंवैधानिक र अलोकतान्त्रिक सिफारिसमा विघटन भएको दाबी गरे ।

काठमाडौं । नेकपा एमालेका महासचिव शंकर पोखरेलले हालैको राजनीतिक परिवर्तनलाई ‘जनताको परिवर्तन होइन, आतंक र हिंसाबाट थोपारिएको परिवर्तन’ भनेर कडा टिप्पणी गरेका छन् । भृकुटीमण्डपमा आयोजित विशाल जनसभालाई सम्बोधन गर्दै उनले जेनजी आन्दोलनपछिको राजनीतिक अवस्थालाई देशलाई प्रतिगमनतर्फ धकेल्ने षड्यन्त्रका रूपमा वर्णन गरेका छन् ।

पोखरेलले भदौ २३ र २४ गतेका घटनामा सडकमा उतारिएका भीड जनआन्दोलन होइन, नियोजित हिंसा भएको दाबी गरे । उनले भने, ‘ती दिन सडकमा देखिएको विध्वंसभन्दा चार गुणा धेरै जनता आज एमालेको एकल आह्वानमै सडकमा उत्रिएका छन्, त्यसैले जनताको सहभागितामार्फत परिवर्तन भएको तर्क नै असत्य साबित हुन्छ ।’

उनले वर्तमान व्यवस्थालाई ‘राज्यविहीनताको जगमा बनेको सरकार’ भन्दै यसले न चुनाव गराउन सक्छ, न संविधानलाई प्रभावकारी रूपमा कार्यान्वयन गर्न । समाधानका रूपमा उनले प्रतिनिधिसभा पुनःस्थापना नै अनिवार्य भएको बताए । देशलाई लोकतान्त्रिक बाटोतर्फ फर्काउन अब सबै राजनीतिक दलले एक भएर अघि बढ्नुपर्ने उनले आह्वान गरे । यसैबीच पोखरेलले आगामी मंसिर २७ गते हुने एमाले महाधिवेशन उद्घाटनलाई ‘नेपालको इतिहासमै सबैभन्दा ठूलो जनसागरको प्रदर्शन’ बनाउने तयारी भइरहेको जानकारी पनि दिए ।

काठमाडौं । नेकपा एमालेका महासचिव शंकर पोखरेलले वर्तमान सरकार विध्वंशको जगमा बनेको आरोप लगाएका छन् । आज (शनिबार) काठमाडौंमा आयोजित जनसभालाई सम्बोधन गर्दै उनले अहिलेको सरकार निर्वाचन गराउने बाटोमा नभएको पनि जिकिर गरे।

‘विध्वंसको जगमा खडा भएको सरकार चुनावको कुरा गर्छ,’ पोखरेलले भने, ‘म बताउन चाहन्छु, अहिलेको सरकार के चुनाव गराउने बाटोमा अघि बढेको छ ? छैन ।’ उनले प्रहरीको मनोबल बढाउन र सक्षम बनाउने कुरामा सरकार असफल भएको बताए । ‘जबसम्म प्रहरीलाई सक्षम र सबल बनाइँदैन, तबसम्म मुलुकमा शान्ति सुरक्षा हुन सक्दैन भन्ने कुरालाई सरकारले उपेक्षा गरिरहेको छ,’ पोखरेलले भने ।

 

काठमाडौं । नेकपा एमालेले प्रतिगामी शक्ति र हालैका राजनीतिक घटनाक्रमविरुद्ध आज काठमाडौंमा आयोजना गरेको शान्तिपूर्ण जनप्रदर्शन र जनसभाले राजधानीको मुख्य भाग ठप्प बनेको छ । बिहानैदेखि विभिन्न स्थानबाट कार्यकर्ता र समर्थकको भिड भृकुटीमण्डप क्षेत्रतिर बढेपछि सवारी आवागमन अत्यधिक प्रभावित भएको हो ।

पार्टीले भदौ २३ र २४ गतेका आन्दोलनपछि कात्तिक २२ गतेदेखि सुरु गरेको जनपरिचालन कार्यक्रमअन्तर्गत बागमती प्रदेश कमिटीले आज काठमाडौंमा वृहत जनसभा आयोजना गरेको हो । प्रतिनिधि सभाको पुनर्स्थापनासहित राजनीतिक स्थिरताको मागसहितको सभालाई पार्टी अध्यक्ष केपी शर्मा ओलीले सम्बोधन गर्ने कार्यक्रम छ ।

पार्टीका प्रचार तथा प्रकाशन विभाग प्रमुख राजेन्द्र गौतमका अनुसार प्रदर्शनी मार्ग र आसपासका क्षेत्रबाट सुरु भएको  र्‍याली रत्नपार्क परिक्रमा गर्दै भृकुटीमण्डपमा आमसभामा परिणत हुनेछ । विभिन्न जनसंगठन, सम्पर्क समन्वय समिति र पार्टी संरचनाबाट ठूलो संख्यामा कार्यकर्ता जुटिरहेको उनले बताए ।

यसैबीच, भीड अत्यधिक बढेपछि भृकुटीमण्डप क्षेत्रको ट्राफिक व्यवस्था अस्तव्यस्त बनेको छ । प्रदर्शनी मार्ग हुँदै सञ्चालन हुने सवारी साधनलाई पद्मोदय मोड तथा सभागृह मोडमार्फत डाइभर्सन गरिएको काठमाडौं उपत्यका ट्राफिक प्रहरी कार्यालयले जनाएको छ । टुँडिखेल वरपरको आवागमन पनि  र्‍यालीका कारण प्रभावित हुन सक्ने बताइएपछि प्रहरीले यात्रुहरूलाई वैकल्पिक मार्ग प्रयोग गर्न आग्रह गरेको छ ।
‘संविधान र लोकतन्त्रको रक्षा हाम्रो साझा जिम्मेवारी’ भन्ने नारासहित भइरहेको यस जनसभालाई पार्टीले शक्ति प्रदर्शनको रूपमा लिएको छ । एमालेले आजको आन्दोलनलाई बागमती प्रदेश कमिटीमार्फत आयोजना गरेको हो ।

काठमाडौं । नेकपा एमालेका नेता विष्णु रिजालले राष्ट्रपति रामचन्द्र पौडेलको पछिल्ला कामप्रति असन्तुष्टि जनाएका छन् । राष्ट्रपति पौडेलले ‘नेपाल विशेष सेवा (दोस्रो संशोधन) अध्यादेश, २०८२’ जारी गरेपछि रिजालले यस्तो असन्तुष्टि जनाएका हुन् ।

उनले संविधानमा व्यवस्था नै नभए पनि राष्ट्रपतिबाट चुनाव गराउने एक मात्र कार्यादेश पाएको सरकारले दीर्घकालीन असर गर्ने विषयमा अध्यादेश ल्याउनु विल्कुल गलत भएको बताएका छन् । उनले पहिले जननिर्वाचित सरकारले सिफारिस गर्दा रोक्ने राष्ट्रपतिले धमाधम अध्यादेश जारी गर्नु थप आपत्तिजनक भएको टिप्पणी समेत गरेका छन् ।

‘संविधानमा व्यवस्थै नभए पनि राष्ट्रपतिबाट चुनाव गराउने एक मात्र कार्यादेश पाएको सरकारले दीर्घकालीन असर गर्ने विषयमा अध्यादेश ल्याउनु विल्कुल गलत छ,’ उनले सामाजिक सञ्जालमा लेखेका छन्, ‘पहिले जननिर्वाचित सरकारले सिफारिश गर्दा रोक्ने राष्ट्रपतिले धमाधम अध्यादेश जारी गर्नु थप आपत्तिजनक छ ।’ राष्ट्रपति पौडेलले नेपालको संविधानको धारा १४४ को उपधारा (१) बमोजिम मन्त्रिपरिषद्को सिफारिसमा यो अध्यादेश जारी गरेका हुन् ।

 

काठमाडौं । निवर्तमान प्रधानमन्त्री समेत रहेका नेकपा एमालेका अध्यक्ष केपी ओलीले जेनजीको नाममा कसले देशमा उपद्रो मच्चाउन नपाउने बताएका छन् । नेशनल भोलेन्टियर फोर्स घोषणा सभालाई सम्बोधन गर्दै पार्टीको युवा भेलामाथि अवरोध खडा गरेको भन्दै उनले चर्को असन्तुष्टि जनाए ।

उनले भने, ‘नेताहरूलाई युवा भेलामा जान नदिएर आक्रमण गर्ने काम भए, बिथोल्ने र आतंक मच्चाउने काम भयो, त्यो अहिलेसम्म जारी छ, अस्ती एमालेमाथि ढुङ्गा हान्न आए, विमानस्थल र प्रहरीमाथि ढुङ्गा हान्न आए, त्यस्ता क्रियाकलाप सरकारले अविलम्ब छिटो रोक्नुपर्छ ।’सरकारले चुनाव गर्छु भने पनि देशभित्रै नेताहरूलाई निषेध गरेर हुन नसक्ने बताए । उनले प्रधानमन्त्रीले १२५ दलसँग वार्ता राखेर कांग्रेस एमालेको अपमान गरेको टिप्पणी गरेका छन् ।

उनले प्रधानमन्त्री सुशीला कार्कीप्रति आक्रोश व्यक्त गरेका छन् । उनले भने, ‘यो सरकार संविधान अनुसार बनेको छैन भन्ने हो भने त झन् अर्को विद्रोह हुन्छ रे । कसले विद्रोह गर्छ ? जनतालाई धम्काएर, तर्साएर अस्तीको भन्दा ठूलो विद्रोह हुन्छ भनेको, त्यो के ? फेरि आगो लगाउने, तोडफोड गर्ने, लुटपाट हो ? त्यो अनुमान हो कि योजना हो ? योजना हो भने सपना नदेख्नुस् । अध्यक्ष ओलीले प्रधानमन्त्री सुशीला कार्कीको कार्यशैलीमाथि प्रश्न उठाएका छन् । उनले अहिलेको सरकार असंवैधानिक बाटोबाट बनेको भन्न नपाइने रे भन्दै प्रधानमन्त्रीप्रति कटाक्ष गरेका हुन् ।

‘संविधानसम्मत तपाईं प्रधानमन्त्री बन्नु भएको हैन । असंवैधानिक बाटोबाटै बन्नु भएको हो । प्रतिनिधिसभाको पुनस्र्थापना हुनुपर्छ । जेनजीका भनिएका माग पनि पूरा गर्न सकिन्छ,’ उनले भने, ‘लोकतान्त्रिक बाटोमा ल्याउन सकिन्छ । यसो भन्न पाइँदैन रे ? लोकतन्त्र भन्न पाइँदैन रे तपाईं त राणा शासन भन्दा कडा निस्किनु भयो त बा ! मोहन शमशेरले पनि लोकतन्त्रका लागि सम्झौता गरेका थिए । संविधान मास्न दिँदैन । लोकतन्त्र फर्काइन्छ ।’

 

 

 

काठमाडौं । नेकपा एमालेका अध्यक्ष केपी ओलीले राज्यले मात्रै देशमा शान्ति सुरक्षा कायम गर्न नसक्ने भएपछि नेशनल भोलेन्टियर फोर्स गठन गरिएको बताएका छन् । फोर्सको घोषणा सभालाई सम्बोधन गर्दै राष्ट्र हितको लागि काम गर्ने बताए ।

उनले भने, ‘यो राष्ट्रिय हितका लागि गठन भएको हो । एमालेसँग असहमति राख्ने अथवा यो संगठनसँग असहमति गर्नेका लागि पनि जिउधनको रक्षा गर्ने कामको लागि यो गठन भएको हो । यसको गठन र विकाससँग कोही पनि आत्तिनु पर्दैन, तर्सिनु पर्दैन । यो देशमा शान्ति सुरक्षाको लागि गठन गरिएको हो ।’ उनले राज्य संयन्त्रले मात्रै जनताको जिउधनको रक्षा गर्न नसकेको आफूहरूले भोगेको बताएका छन् ।

उनले कसैले राज्यको सम्पती जलाउन आउँदा यो भोलेन्टियरले प्रतिवाद गर्ने पनि बताए । ‘अब कसैले पनि हिजोको जस्तो राज्यका संरचना जलाउँदै गर्दै हिँड्न पाउने छैन । हामी संरचनाको रक्षा गर्नेछौँ । यो देशका जनता आफैँ भोलेन्टियर भएर आफ्नो रक्षा गर्नुपर्ने अवस्थामा पुग्यौँ,’ उनले थपे, ‘यो हिंसा लुटपाट र त्रासदीपूर्ण वातावरणविरुद्ध हो । यो आतंकको विरुद्धमा हो । कसैलाई पनि आतंकित बनाउने छुट छैन। ’

ओलीले पार्टीले घोषणा गरेको एमालेको युवा दस्ता ‘युथ भोलेन्टियर फोर्स’ देशमा शान्ति, सुव्यवस्था कायम गर्न बनेको पनि बताए। आफ्ना स्वंयसेवकहरू अनुशासित भएर काम गर्ने ओलीको भनाइ छ । ‘यो स्वंयसेवक फोर्स कसैको अहितको लागि गठन भएको होइन । राष्ट्रिय हितका लागि गठन भएको हो,’ ओलीको भनाइ छ, ‘नेकपा एमालेसँग असहमति राख्ने वा यो संगठनसँग असहमति गर्नेका लागि पनि जिउधनको रक्षाका लागि यो गठन भएको हो । यसको गठनसँग कोही पनि आत्तिनुपदैन, तर्सिनु पर्दन ।’ उनले राज्य संयन्त्रले मात्रै शान्ति सुव्यवस्था कायम गर्न नसक्ने रहेको भन्दै आफूहरूले फोर्स घोषणा गरेको बताए ।

‘यो देशमा शान्ति सुव्यवस्था कायम गर्न बनेको हो। राज्य संयन्त्रले मात्रै शान्ति सुव्यवस्था गर्न सक्ने अवस्था रहेन । औद्योगिक प्रतिष्ठानको रक्षा हुने अवस्था रहेन,’ ओलीले भने । उनले हामी नेपालका संयोजक सुदन गुरुङलाई लक्षित गर्दै ओलीले व्यंग्य पनि गरे । उनले भने, ‘पानी बाँड्ने मात्रै भोलेन्टियर संस्था हुँदैनन् । यहाँ त अघिल्लो दिन पानी बाँड्ने भोलिपल्ट केके केके ।’ उनले भदौ २३ र २४ गतेको जेनजीको आन्दोलनको क्रममा उक्त संस्थाको उपस्थिति र सक्रियताबारे प्रश्न उठाएका हुन् ।

 

 

 

काठमाडौं । नेकपा एमालेका नेता महेश बस्नेतले अब प्रधानमन्त्री सुशीला कार्कीबाट देश नचल्ने बताएका छन् । शुक्रबार एमालेको युथ भोलिन्टियर फोर्स घोषणा सभालाई सम्बोधन गर्दै बस्नेतले यस्तो बताएका हुन् । नेता महेश बस्नेतले प्रधानमन्त्री सुशीला कार्कीको राजीनामा माग गरेका छन् । उनले फास्ट ट्रयाकबाट राजीनामा दिएर विधि र प्रक्रियाबाट देशलाई चलाउन प्रधानमन्त्री कार्कीले राजीनामा दिनुपर्ने बताएका हुन् ।

‘फास्ट ट्रयाकबाट सुशीला आमाले राजीनामा दिनुस् । विधि प्रक्रियाबाट देश चल्ने हो,’ बस्नेतले भने, ‘दलबाट देश चल्ने हो । दलबाट बाहिरबाट राजनीति हुँदैन ।’ ‘संसद् विघटन गरेर, हाम्रो लोकतान्त्रिक पद्धतिमाथि हमला गरेर प्रधानन्यायाधीश भइसकेकी जेन–जीको भावना विपरीत ७३ वर्षकी आमैलाई विचरा खुट्टा खुच्याउँदै हिँड्नु हुन्छ,’ बस्नेतले भने, ‘अब ती आमाबाट देश चल्दैन । अब संसद् पुनर्स्थापना गर्नुपर्छ ।’ लोकतन्त्र, विधिको शासन र सुशासनलाई ठिक ट्रयाकमा ल्याउन नेसनल भोलिन्टियर फोर्सले काम गर्ने बस्नेतले बताए ।

काठमाडौं । नेकपा एमालेका पोलिटब्युरो सदस्य महेश बस्नेतले भोलि (शनिबार) काठमाडौँमा पार्टीको कार्यक्रममा ६० हजार मान्छे उतार्ने दाबी गरेका छन् । पार्टीको नेशनल भोलेन्टियर फोर्सको घोषणा सभालाई सम्बोधन गर्दै ६० हजार मान्छे भोलिको कार्यक्रममा सहभागी हुने बताएका हुन् । उनले भोलिको प्रदर्शन हुने विश्वास आजैको  र्‍यालीले देखाइसकेको बताए। ’भोलि ११ बजे भृकुटीमण्डपमा हामी भला हुन्छौं । त्यहाँ ६० हजारभन्दा धेरै जम्मा भएर सभा गर्दैछौँ,’ उनले भने, ‘सुशीला आमालाई राजनीतिक जीवनबाट टाटा बाइ बाइ गराएर उहाँलाई छोराछोरीसँग बेलायत जानुपर्ने बनाइदिन्छौँ ।’

उनले राजनीति दल र नेताहरूले गर्ने भन्दै प्रधानमन्त्री सुशीला कार्कीले दुई तिन दिनभित्र राजीनामा दिने दाबी गरे । उनले काठमाडौं महानगरका मेयर बालेन शाहले स्टाटस लेखेर देशलाई संकटमा पुर्‍याउन खोजे पनि अब नेसनल भोलेन्टियर फोर्सले रक्षा गर्ने बताए । एमालेले शनिबार काठमाडौँमा शक्ति प्रदर्शन गर्दैछ ।

‘केपी ओलीले सिठ्ठी फुक्दा २ लाख युवा काठमाडौँ आउने अवस्था बनाउँदै छौं’
नेता महेश बस्नेतले अब दुई महिनापछि केपी ओलीले सिठ्ठी लगाउँदा दुई लाख तुरुन्तै काठमाडौँ आउने अवस्था बनाउने बताएका छन् । नेसनल भोलेन्टियर फोर्स घोषणा सभामा पार्टी अध्यक्ष केपी शर्मा ओलीले सिठ्ठी मात्र फुके पनि दुई लाख मानिस काठमाडौँ अवस्था बनाइरहेको बताएका हुन् । उनले फोर्स देशव्यापी अभियानका रूपमा अघि बढाइने उल्लेख गर्दै युवाहरूको एक हुने ठाउँ एमालेको भएको बताए । बस्नेतले फोर्सले पार्टी संगठन सुदृढ पार्ने, स्वयंसेवी संरचना विस्तार गर्ने र आगामी राजनीतिक अभियानमा ऊर्जा थप्ने बताएका छन् ।