Tag: नेकपा एमाले

काठमाडौं । प्रतिनिधि सभा निर्वाचन नजिकिँदै गर्दा राजनीतिक मोर्चामा सक्रिय रहेको नेकपा (एमाले) ले आज (मंगलबार) एकै दिन दुई महत्वपूर्ण कदम चालेको छ । एमालेले आजै सर्वोच्च अदालतमा संसद पुनःस्थापनाको माग गर्दै रिट दायर गरेको छ भने निर्वाचन आयोगमा आगामी प्रतिनिधि सभा निर्वाचनका लागि दल दर्ता गराएको छ ।

मंगलबार निर्वाचन आयोगमा पुगेका एमालेका निर्वाचन विभाग प्रमुख निरज आचार्य र कार्यालय सचिव डा. भीष्म अधिकारीले पार्टीको तर्फबाट दल दर्ताको निवेदन बुझाए । आयोगले प्रतिनिधि सभा निर्वाचनका लागि एमालेलाई दर्ता नम्बर ९७१, राष्ट्रिय सभा निर्वाचनका लागि ९३९, र समग्र दल दर्ता क्रममा पार्टीलाई ६६औं स्थान दिएको आचार्यले जानकारी दिएका छन् । यसअघि सोमबार पार्टीले राष्ट्रिय निर्वाचन प्रयोजनका लागि प्रारम्भिक दल दर्ताको निवेदन पेस गरिसकेको थियो ।

यसैबीच, संसद विघटन असंवैधानिक भएको ठहर गर्दै पार्टी सर्वोच्च अदालत समेत पुगेको छ । प्रमुख सचेतक महेश बर्तौला र सचेतक सुनिता बरालले आजै अदालतमा निवेदन दर्ता गराए । मंसिर १ गते च्यासलस्थित मुख्यालयमा बसेको विघटित प्रतिनिधिसभाका एमाले सांसदहरूको बैठकले संसद पुनःस्थापनाका लागि कानुनी तथा राजनीतिक संघर्ष थाल्ने निर्णय गरेअनुसार आवश्यक कागजात र परामर्श पूरा भएपछि एमालेले रिट दायर गरेको बताइएको छ ।

पार्टीको तर्क अनुसार प्रधानमन्त्री सुशीला कार्कीलाई वर्तमान कानुनले औपचारिक हैसियत नदिने परिस्थितिमा संसद विघटन गर्नु संविधानविपरीत छ । यही आधारमा पुनःस्थापनाको माग गर्दै सर्वोच्चको ढोका ठटाइएको एमालेले बताएको छ । एकातिर संसद पुनःस्थापनाको कानुनी लडाइँ, अर्कातिर आगामी निर्वाचन सहभागिताका तयारी—दुई मोर्चामा सक्रिय एमालेले आजको दिनलाई राजनीतिक दृष्टिले विशेष रूपमा उपयोग गरेको देखिन्छ ।

काठमाडौं । नेकपा एमालेको ११ औं महाधिवेशन नजिकिँदै गर्दा देशभरि प्रतिनिधि छनोट प्रक्रिया तीव्र बन्दै गएको छ । यही तयारीबीच पार्टीको संगठन विभागले पाँच बुँदे निर्देशन जारी गरेको छ भने कैलालीमा चाहिँ केही नेता–कार्यकर्ताको संगठित सदस्यता सूचीबाटै ‘हराए’ पछि विवाद बढेको छ र छानबिन समेत सुरु भएको छ ।

एमाले स्थायी कमिटी सदस्य तथा संगठन विभाग प्रमुख काशीनाथ अधिकारीका अनुसार भर्चुअल बैठकमार्फत महाधिवेशन प्रतिनिधि चयनका लागि आवश्यक मार्गदर्शन तय गरिएको हो । निर्देशनअनुसार कुनै पनि जिल्लाले निर्वाचन प्रक्रियामा प्रवेश गर्नु अघि आफ्नो क्षेत्रको अन्तिम मतदाता नामावली सार्वजनिक गर्नै पर्नेछ । केन्द्रले पठाएको पछिल्लो परिपत्रलाई नै आधार मान्न भनिएको छ ।

साथै प्रत्येक जिल्लाले अन्तिम मतदाता संख्याबारे तत्क्षण केन्द्रलाई जानकारी दिनुपर्नेछ । सर्वसम्मतिबाट प्रतिनिधि छनोट गर्नका लागि १२ गते साँझसम्म प्रयास गर्ने, त्यसमा सफलता नपाए १३ गते अनिवार्य रूपमा निर्वाचनको बाटो समातिने निर्देश गरिएको छ । विभागका अनुसार कुनै पनि कारण देखाएर १३ गतेको कार्यक्रम सार्न नपाइनेछ । केही ठाउँमा प्रतिनिधि उम्मेदवारी शुल्क अस्वाभाविक रूपमा बढाइएको सूचनापछि अधिकतम शुल्क १ हजार रुपैयाँ तोकिने व्यवस्था समेत गरिएको छ ।

यता, कैलालीमा भने प्रतिनिधि आकांक्षी रहेका दर्जनौँ नेता–कार्यकर्ताको नाम नै केन्द्रीय संगठन विभागले प्रमाणित गरेको सूचीमा नदेखिएपछि अन्योल र असन्तुष्टि बढेको छ । प्रदेशसभा निर्वाचनदेखि जिल्ला सचिवालयसम्म जिम्मेवारी सम्हालिसकेका १३ जनाको संगठित सदस्यता सूचीमै नाम नआएपछि एमाले कैलालीले छानबिन समिति गठन गरेको छ । टेक बुढाको संयोजकत्वमा बनाइएको समितिले छुटेको कारणबारे छानबिन गरी रिपोर्ट बुझाएपछि थप निर्णय हुने जिल्ला इन्चार्ज नारदमुनि रानाले बताएका छन् ।

४० वर्षमुनिका कोटाबाट प्रतिनिधि बन्ने तयारीमा रहेका कुमार बडैला, दीपक रावल, प्रकाश खड्का लगायतका नेताहरूले आफूहरूले नियमित रूपमा सदस्यता नवीकरण गरिरहे पनि नियतवश नाम हटाइएको आरोप लगाएका छन् । रावलका अनुसार गत १७ वर्षदेखि निरन्तर सदस्य भएर काम गरिरहेकाहरूलाई गुटगत कारणले पछाडि धकेलिएको हो । खड्काले पनि परिवारका सबैको नवीकरण प्रक्रिया पूरा हुँदा पनि आफू मात्र सूचीबाट हटाइएको दाबी गरेका छन् ।

जिल्ला कमिटीलाई दिएर भनेको निवेदनपछि जिल्लाले छुटेका सबै नाम प्रदेश कमिटी हुँदै केन्द्रमा पठाइसकेको छ । प्रदेश कमिटीले पनि संशोधनका लागि केन्द्रलाई औपचारिक सिफारिस गरिसकेको जनाएको छ । मंसिर २७ देखि २९ गते काठमाडौंमा हुने एमालेको ११ औँ महाधिवेशनका लागि मंसिर १३ गते देशभरका निर्वाचन क्षेत्र तथा विदेशस्थित संगठनहरूमा एकैदिन प्रतिनिधि छनोट हुनेछ। महाधिवेशनमा करिब २२ सय प्रतिनिधि सहभागी हुने  जनाएको छ। प्रतिनिधि छनोटका कडाइका निर्देशसँगै कैलालीमा देखिएको सदस्यता विवाद मिल्ने हो कि झन् गहिरो बन्दै जाने हो—अब केन्द्रको निर्णयबाटै स्पष्ट हुनेछ।

विराटनगर । मोरङ र सुनसरी क्षेत्रमा आइतबार राजनीतिक तनाव चुलिएको छ । नेकपा एमालेका पोलिटब्युरो सदस्य महेश बस्नेत इटहरीतर्फ जाँदै गर्दा विराटनगर विमानस्थल बाहिर उनको सवारीमा रातो मसी प्रहार भएको र त्यसलगत्तै सुनसरीको दुहबीमा समेत स्थानीय युवाहरूले विरोध प्रदर्शन गरेका छन् ।

विराटनगर–२ का १९ वर्षीय अर्पित कुँवर र विराटनगर–१ का २५ वर्षीय सन्जोग गौतम नाम गरेका दुई युवाले सडक किनारबाट दगुर्दै बस्नेत सवार गाडीमाथि रातो मसी फ्याँकेका थिए । प्रहरीले घटनापछि दुवैलाई नियन्त्रणमा लिएर जिल्ला प्रहरी कार्यालय मोरङमा राखेको छ । पक्राउ परेका गौतम नेपाली कांग्रेस निकट नेपाल विद्यार्थी संघ (नेविसंघ) मोरङका जिल्ला सदस्य हुन् भने कुँवर पनि नेविसंघसम्बद्ध रहेको प्रहरी स्रोतले जनाएको छ ।

घटनापछि अर्पित कुँवरले आफूले प्रहार गरेको मसी ‘विरोधको प्रतीक’ भएको दाबी गरेका छन् । उनले कुनै व्यक्तिलाई लक्षित आक्रमण नभई एमाले नेतृत्वको शैली, प्रवृत्ति र भदौ २३ को जेनजी आन्दोलनताका भएको घटनाप्रति असन्तोष प्रकट गर्न यस्तो कदम चालेको बताएका छन् । महेश बस्नेत भने यस घटनालाई आफू सहभागी हुन लागेको कार्यक्रम अवरुद्ध गर्ने प्रयास र ‘लोकतन्त्रमाथिको उपहास’ भनेर टिप्पणी गरेका छन् । उनी सुरक्षा व्यवस्थासहित विराटनगर हुँदै सुनसरीतर्फ अघि बढेका छन् ।

बस्नेत र नेता भानुभक्त ढकालको गाडी दुहबी क्रस भइसकेपछि त्यहाँ स्थानीय युवाहरूले टायर बालेर प्रदर्शन गरेका थिए । जिल्ला प्रहरी कार्यालय सुनसरीका डिएसपी चन्द्र खड्काका अनुसार आगो नियन्त्रणमा लिएर सडक सुचारु गरिएको छ । विराटनगर विमानस्थलमा भएको मसी प्रहारदेखि दुहबीसम्म फैलिएको विरोधले जेनजी आन्दोलनमार्फत निरन्तर बढ्दै गएको असन्तोष पुनः सतहमा आएको देखिएको छ ।

काठमाडौं । नेकपा एमालेका पोलिट्ब्युरो सदस्य महेश बस्नेतले अलोकतान्त्रिक सरकारले पक्षपोषण गरेका मान्छेहरू अलोकतान्त्रिक र अराजनीतिक गतिविधिमा सक्रिय रहेको टिप्पणी गरेका छन् । बस्नेतले फरक विचार भए शान्तिपूर्ण कार्यक्रम गरेर व्यक्त गर्नुपर्ने र ढुंगा हान्ने, बाटो छेक्ने काम राम्रो नभएको बताएका छन् । उनले २३, २४ भदौको आन्दोलन यता जेन–जी युवाप्रति आक्रामक प्रतिक्रिया दिएका छन् र पञ्चायत, शाहीकाल र माओवादीकालसँग तुलना गरेका छन् ।

सुनसरीमा आयोजति युवा संघको कोशी जागरणसभामा सहभागी हुन त्यसतर्फ गइरहेका बेला सुनसरीमा दुई युवाले उनको गाडी रोकेर बेलुनमा भरिएको रातो छ्यापेको विषयमा प्रतिक्रिया दिँदै बस्नेतले यस्तो बताएका हुन् । ‘सरकार अलोकतान्त्रिक भएकाले यिनीले पक्षपोषण गरेका मान्छे पनि अलोकतात्रिक र अराजनीतिक गतिविधिमा नै लागेकै छन्,’ उनले भने, ‘यस्तो गतिविधि लोकतन्त्रको उपहास हो ।’ बस्नेतले शान्तिपूर्ण रूपमा राजनीतिक गतिविधि गर्न सबैले पाउने भन्दै फरक विचार भए शान्तिपूर्ण कार्यक्रम गरेर व्यक्त गर्नुपर्ने बताए ।

‘हाम्रो विरोधमा भाषण गर, नारा लगाऊ । ढुंगा हान्ने, बाटो छेक्ने काम राम्रो होइन । केही कुरा छन् भने शान्तिपूर्ण कार्यक्रम गरेर राखे भयो नि,’ बस्नेतले थपे, ‘ आज हामीले कार्यक्रम गर्दैछौं । विरोध नै गर्न मन भए भोलि त्यही ठाउँका शान्तिपूर्ण रूपमा अर्को सभा गरेर विरोध गरे भयो । ढुंगा हान्नु पर्दैन ।’ २३, २४ भदौको आन्दोलन यता जेन–जी युवाप्रति आक्रामक सुनिँदै आएका बस्नेतले पञ्चायतका, शाहीकाल र माओवादीकाल समेत समाना गरेर आएको प्रतिक्रिया दिए ।

काठमाडौं । निवर्तमान प्रधानमन्त्री समेत रहेका नेकपा एमालेका अध्यक्ष केपी शर्मा ओलीले वर्तमान सरकारसँग चुनाव गराउने पनि अधिकार नभएको दाबी गरेका छन् ।

आज (शनिबार) काठमाडौंमा आयोजित जनप्रदर्शनपछिको सभालाई सम्बोधन गर्ने क्रममा उनले प्रधानमन्त्री सुशीला कार्कीसँग चुनाव गराउने पनि अधिकार नभएको बताएका हुन् । ‘तपाईंसँग चुनाव गराउने पनि अधिकार छैन,’ ओलीले भनेका छन् ।

उनले कार्की आगजनी गरेर, लुटपाट गरेर, विश्वंस मच्चाएर मात्रै सरकारमा पुगेको आरोप लगाउँदै उनले प्रश्न गरे, ‘चुनाव गराउँछु भन्ने तपाई को हो ?’ ‘अहिले शासन विधिको त कुरै छाडिदिउँ, व्यक्ति त अनधिकृत व्यक्ति, उत्पातबाट सिर्जना भएको सरकार बनेको छ । तपाईंहरू लोकतन्त्रमा विश्वास गर्नु हुन्छ कि हुन्न बताउनुस् ? यही हो लोकतन्त्र ?,’ ओलीले भनेका छन् ।

अध्यक्ष ओलीले प्रधानमन्त्री सुशीला कार्कीले नेताहरुविरुद्ध बोलेको सुनिने क्यासेटबारे जवाफ माग गरेका छन् । ओलीले ‘कस्तो कस्तो मान्छेलाई विगतमा प्रधानन्यायाधीश र अहिले प्रधानमन्त्री बनेछन्’ भन्दै आक्रोश पोखे ।

‘दुर्गा प्रसाईंको अरू के हो म जान्दिनँ । उनले निकालेको क्यासेटको सम्बन्धमा नेपाली जनतालाई सरकारले बताउनु पर्छ’, उनले भने, ‘प्रधानमन्त्रीले त्यो क्यासेट के हो बताउनु पर्छ ?’ जेनजी आन्दोलनकै बेला हेलिकप्टर उडेको देखिएकै बेला उक्त क्यासेटमा प्रधानमन्त्री कार्कीको गैरजिम्मेवार अभिव्यक्ति सुनिएको उनको भनाइ छ ।

उनले भने, ‘सेनाले नेताहरूलाई बचायो भन्दा किन बचाउने भन्ने पूर्व प्रधानन्यायाधीश र अहिले असंवैधानिक प्रधानमन्त्रीको आवाज सुनिन्छ, त्यो के हो ?’ त्यो क्यासेट बाहिर ल्याएकै कारण प्रसाईंलाई पक्राउ गरिएको ओलीको आरोप छ । ‘मान्छे गिरफतार गर्ने होइन, त्यो क्यासेटको छिनोफानो हुनुपर्छ’, ओलीको भनाइ थियो ।

अध्यक्ष ओलीले वर्तमान सरकार संविधानविपरीत बनेको आरोप लगाउँदै तत्काल राजीनामा दिन माग गरेका छन् । शनिबार काठमाडौँमा आयोजित जनप्रदर्शनलाई सम्बोधन गर्दै अध्यक्ष ओलीले राष्ट्रपतिलाई यो सरकार हटाउन आग्रह गरेका छन् । ‘राष्ट्रपति ज्यू, अस्ती–अस्ती जेनजीका माग भनेर यो सरकार जडान गर्नुभयो त,’ ओलीले भने, ‘जेनजीको माग अनुसार यो सरकार किन विदा गर्नु हुन्न ? हटाउनु होस् ।’

उनले संविधान अनुसार नबनेको सरकार हटाउन कुनै संविधान नचाहिने समेत जिकिर गरे । ‘संविधानले दिदैन भन्ने हो भने अस्ति पनि त संविधानले नदिएकै त गरेको हो,’ ओलीको प्रश्न छ, ‘यो संविधानअनुसार नबनेको असंवैधानिक चिजलाई तपाईंलाई केले रोक्यो ?’

अध्यक्ष केपी ओलीले अब प्रतिनिधि सभा पुनस्र्थापना हुने दाबी गरेका छन् । उनले अब देश एमालेमय बन्ने दाबी गरे । उनले भने, ‘अब असंवैधानिक ढङ्गले भङ्ग भएको प्रतिनिधि सभाको अविलम्ब पुनस्र्थापना हुनुपर्दछ। हुन्छ पनि अब अर्को बाटो छैन । त्यही बाटोबाट देश अगाडि बढ्छ । प्रतिनिधि सभा पुनर्स्थापना मात्रै देशको सही समाधान हो। को डराउँछ कसको सातो जान्छ त्यो बेग्लै कुरा हो ।’ उनले पार्टीपंक्तिलाई प्रतिनिधि पुनर्स्थापनाको पक्षमा लाग्न निर्देशन दिए । उनले प्रतिनिधि सभा अनधिकृत, असंवैधानिक र अलोकतान्त्रिक सिफारिसमा विघटन भएको दाबी गरे ।

काठमाडौं । नेकपा एमालेका महासचिव शंकर पोखरेलले हालैको राजनीतिक परिवर्तनलाई ‘जनताको परिवर्तन होइन, आतंक र हिंसाबाट थोपारिएको परिवर्तन’ भनेर कडा टिप्पणी गरेका छन् । भृकुटीमण्डपमा आयोजित विशाल जनसभालाई सम्बोधन गर्दै उनले जेनजी आन्दोलनपछिको राजनीतिक अवस्थालाई देशलाई प्रतिगमनतर्फ धकेल्ने षड्यन्त्रका रूपमा वर्णन गरेका छन् ।

पोखरेलले भदौ २३ र २४ गतेका घटनामा सडकमा उतारिएका भीड जनआन्दोलन होइन, नियोजित हिंसा भएको दाबी गरे । उनले भने, ‘ती दिन सडकमा देखिएको विध्वंसभन्दा चार गुणा धेरै जनता आज एमालेको एकल आह्वानमै सडकमा उत्रिएका छन्, त्यसैले जनताको सहभागितामार्फत परिवर्तन भएको तर्क नै असत्य साबित हुन्छ ।’

उनले वर्तमान व्यवस्थालाई ‘राज्यविहीनताको जगमा बनेको सरकार’ भन्दै यसले न चुनाव गराउन सक्छ, न संविधानलाई प्रभावकारी रूपमा कार्यान्वयन गर्न । समाधानका रूपमा उनले प्रतिनिधिसभा पुनःस्थापना नै अनिवार्य भएको बताए । देशलाई लोकतान्त्रिक बाटोतर्फ फर्काउन अब सबै राजनीतिक दलले एक भएर अघि बढ्नुपर्ने उनले आह्वान गरे । यसैबीच पोखरेलले आगामी मंसिर २७ गते हुने एमाले महाधिवेशन उद्घाटनलाई ‘नेपालको इतिहासमै सबैभन्दा ठूलो जनसागरको प्रदर्शन’ बनाउने तयारी भइरहेको जानकारी पनि दिए ।

काठमाडौं । नेकपा एमालेका महासचिव शंकर पोखरेलले वर्तमान सरकार विध्वंशको जगमा बनेको आरोप लगाएका छन् । आज (शनिबार) काठमाडौंमा आयोजित जनसभालाई सम्बोधन गर्दै उनले अहिलेको सरकार निर्वाचन गराउने बाटोमा नभएको पनि जिकिर गरे।

‘विध्वंसको जगमा खडा भएको सरकार चुनावको कुरा गर्छ,’ पोखरेलले भने, ‘म बताउन चाहन्छु, अहिलेको सरकार के चुनाव गराउने बाटोमा अघि बढेको छ ? छैन ।’ उनले प्रहरीको मनोबल बढाउन र सक्षम बनाउने कुरामा सरकार असफल भएको बताए । ‘जबसम्म प्रहरीलाई सक्षम र सबल बनाइँदैन, तबसम्म मुलुकमा शान्ति सुरक्षा हुन सक्दैन भन्ने कुरालाई सरकारले उपेक्षा गरिरहेको छ,’ पोखरेलले भने ।

काठमाडौं । नेकपा एमालेले प्रतिगामी शक्ति र हालैका राजनीतिक घटनाक्रमविरुद्ध आज काठमाडौंमा आयोजना गरेको शान्तिपूर्ण जनप्रदर्शन र जनसभाले राजधानीको मुख्य भाग ठप्प बनेको छ । बिहानैदेखि विभिन्न स्थानबाट कार्यकर्ता र समर्थकको भिड भृकुटीमण्डप क्षेत्रतिर बढेपछि सवारी आवागमन अत्यधिक प्रभावित भएको हो ।

पार्टीले भदौ २३ र २४ गतेका आन्दोलनपछि कात्तिक २२ गतेदेखि सुरु गरेको जनपरिचालन कार्यक्रमअन्तर्गत बागमती प्रदेश कमिटीले आज काठमाडौंमा वृहत जनसभा आयोजना गरेको हो । प्रतिनिधि सभाको पुनर्स्थापनासहित राजनीतिक स्थिरताको मागसहितको सभालाई पार्टी अध्यक्ष केपी शर्मा ओलीले सम्बोधन गर्ने कार्यक्रम छ ।

पार्टीका प्रचार तथा प्रकाशन विभाग प्रमुख राजेन्द्र गौतमका अनुसार प्रदर्शनी मार्ग र आसपासका क्षेत्रबाट सुरु भएको  र्‍याली रत्नपार्क परिक्रमा गर्दै भृकुटीमण्डपमा आमसभामा परिणत हुनेछ । विभिन्न जनसंगठन, सम्पर्क समन्वय समिति र पार्टी संरचनाबाट ठूलो संख्यामा कार्यकर्ता जुटिरहेको उनले बताए ।

यसैबीच, भीड अत्यधिक बढेपछि भृकुटीमण्डप क्षेत्रको ट्राफिक व्यवस्था अस्तव्यस्त बनेको छ । प्रदर्शनी मार्ग हुँदै सञ्चालन हुने सवारी साधनलाई पद्मोदय मोड तथा सभागृह मोडमार्फत डाइभर्सन गरिएको काठमाडौं उपत्यका ट्राफिक प्रहरी कार्यालयले जनाएको छ । टुँडिखेल वरपरको आवागमन पनि  र्‍यालीका कारण प्रभावित हुन सक्ने बताइएपछि प्रहरीले यात्रुहरूलाई वैकल्पिक मार्ग प्रयोग गर्न आग्रह गरेको छ ।
‘संविधान र लोकतन्त्रको रक्षा हाम्रो साझा जिम्मेवारी’ भन्ने नारासहित भइरहेको यस जनसभालाई पार्टीले शक्ति प्रदर्शनको रूपमा लिएको छ । एमालेले आजको आन्दोलनलाई बागमती प्रदेश कमिटीमार्फत आयोजना गरेको हो ।

काठमाडौं । नेकपा एमालेका नेता विष्णु रिजालले राष्ट्रपति रामचन्द्र पौडेलको पछिल्ला कामप्रति असन्तुष्टि जनाएका छन् । राष्ट्रपति पौडेलले ‘नेपाल विशेष सेवा (दोस्रो संशोधन) अध्यादेश, २०८२’ जारी गरेपछि रिजालले यस्तो असन्तुष्टि जनाएका हुन् ।

उनले संविधानमा व्यवस्था नै नभए पनि राष्ट्रपतिबाट चुनाव गराउने एक मात्र कार्यादेश पाएको सरकारले दीर्घकालीन असर गर्ने विषयमा अध्यादेश ल्याउनु विल्कुल गलत भएको बताएका छन् । उनले पहिले जननिर्वाचित सरकारले सिफारिस गर्दा रोक्ने राष्ट्रपतिले धमाधम अध्यादेश जारी गर्नु थप आपत्तिजनक भएको टिप्पणी समेत गरेका छन् ।

‘संविधानमा व्यवस्थै नभए पनि राष्ट्रपतिबाट चुनाव गराउने एक मात्र कार्यादेश पाएको सरकारले दीर्घकालीन असर गर्ने विषयमा अध्यादेश ल्याउनु विल्कुल गलत छ,’ उनले सामाजिक सञ्जालमा लेखेका छन्, ‘पहिले जननिर्वाचित सरकारले सिफारिश गर्दा रोक्ने राष्ट्रपतिले धमाधम अध्यादेश जारी गर्नु थप आपत्तिजनक छ ।’ राष्ट्रपति पौडेलले नेपालको संविधानको धारा १४४ को उपधारा (१) बमोजिम मन्त्रिपरिषद्को सिफारिसमा यो अध्यादेश जारी गरेका हुन् ।

काठमाडौं । निवर्तमान प्रधानमन्त्री समेत रहेका नेकपा एमालेका अध्यक्ष केपी ओलीले जेनजीको नाममा कसले देशमा उपद्रो मच्चाउन नपाउने बताएका छन् । नेशनल भोलेन्टियर फोर्स घोषणा सभालाई सम्बोधन गर्दै पार्टीको युवा भेलामाथि अवरोध खडा गरेको भन्दै उनले चर्को असन्तुष्टि जनाए ।

उनले भने, ‘नेताहरूलाई युवा भेलामा जान नदिएर आक्रमण गर्ने काम भए, बिथोल्ने र आतंक मच्चाउने काम भयो, त्यो अहिलेसम्म जारी छ, अस्ती एमालेमाथि ढुङ्गा हान्न आए, विमानस्थल र प्रहरीमाथि ढुङ्गा हान्न आए, त्यस्ता क्रियाकलाप सरकारले अविलम्ब छिटो रोक्नुपर्छ ।’सरकारले चुनाव गर्छु भने पनि देशभित्रै नेताहरूलाई निषेध गरेर हुन नसक्ने बताए । उनले प्रधानमन्त्रीले १२५ दलसँग वार्ता राखेर कांग्रेस एमालेको अपमान गरेको टिप्पणी गरेका छन् ।

उनले प्रधानमन्त्री सुशीला कार्कीप्रति आक्रोश व्यक्त गरेका छन् । उनले भने, ‘यो सरकार संविधान अनुसार बनेको छैन भन्ने हो भने त झन् अर्को विद्रोह हुन्छ रे । कसले विद्रोह गर्छ ? जनतालाई धम्काएर, तर्साएर अस्तीको भन्दा ठूलो विद्रोह हुन्छ भनेको, त्यो के ? फेरि आगो लगाउने, तोडफोड गर्ने, लुटपाट हो ? त्यो अनुमान हो कि योजना हो ? योजना हो भने सपना नदेख्नुस् । अध्यक्ष ओलीले प्रधानमन्त्री सुशीला कार्कीको कार्यशैलीमाथि प्रश्न उठाएका छन् । उनले अहिलेको सरकार असंवैधानिक बाटोबाट बनेको भन्न नपाइने रे भन्दै प्रधानमन्त्रीप्रति कटाक्ष गरेका हुन् ।

‘संविधानसम्मत तपाईं प्रधानमन्त्री बन्नु भएको हैन । असंवैधानिक बाटोबाटै बन्नु भएको हो । प्रतिनिधिसभाको पुनस्र्थापना हुनुपर्छ । जेनजीका भनिएका माग पनि पूरा गर्न सकिन्छ,’ उनले भने, ‘लोकतान्त्रिक बाटोमा ल्याउन सकिन्छ । यसो भन्न पाइँदैन रे ? लोकतन्त्र भन्न पाइँदैन रे तपाईं त राणा शासन भन्दा कडा निस्किनु भयो त बा ! मोहन शमशेरले पनि लोकतन्त्रका लागि सम्झौता गरेका थिए । संविधान मास्न दिँदैन । लोकतन्त्र फर्काइन्छ ।’

काठमाडौं । नेकपा एमालेका अध्यक्ष केपी ओलीले राज्यले मात्रै देशमा शान्ति सुरक्षा कायम गर्न नसक्ने भएपछि नेशनल भोलेन्टियर फोर्स गठन गरिएको बताएका छन् । फोर्सको घोषणा सभालाई सम्बोधन गर्दै राष्ट्र हितको लागि काम गर्ने बताए ।

उनले भने, ‘यो राष्ट्रिय हितका लागि गठन भएको हो । एमालेसँग असहमति राख्ने अथवा यो संगठनसँग असहमति गर्नेका लागि पनि जिउधनको रक्षा गर्ने कामको लागि यो गठन भएको हो । यसको गठन र विकाससँग कोही पनि आत्तिनु पर्दैन, तर्सिनु पर्दैन । यो देशमा शान्ति सुरक्षाको लागि गठन गरिएको हो ।’ उनले राज्य संयन्त्रले मात्रै जनताको जिउधनको रक्षा गर्न नसकेको आफूहरूले भोगेको बताएका छन् ।

उनले कसैले राज्यको सम्पती जलाउन आउँदा यो भोलेन्टियरले प्रतिवाद गर्ने पनि बताए । ‘अब कसैले पनि हिजोको जस्तो राज्यका संरचना जलाउँदै गर्दै हिँड्न पाउने छैन । हामी संरचनाको रक्षा गर्नेछौँ । यो देशका जनता आफैँ भोलेन्टियर भएर आफ्नो रक्षा गर्नुपर्ने अवस्थामा पुग्यौँ,’ उनले थपे, ‘यो हिंसा लुटपाट र त्रासदीपूर्ण वातावरणविरुद्ध हो । यो आतंकको विरुद्धमा हो । कसैलाई पनि आतंकित बनाउने छुट छैन। ’

ओलीले पार्टीले घोषणा गरेको एमालेको युवा दस्ता ‘युथ भोलेन्टियर फोर्स’ देशमा शान्ति, सुव्यवस्था कायम गर्न बनेको पनि बताए। आफ्ना स्वंयसेवकहरू अनुशासित भएर काम गर्ने ओलीको भनाइ छ । ‘यो स्वंयसेवक फोर्स कसैको अहितको लागि गठन भएको होइन । राष्ट्रिय हितका लागि गठन भएको हो,’ ओलीको भनाइ छ, ‘नेकपा एमालेसँग असहमति राख्ने वा यो संगठनसँग असहमति गर्नेका लागि पनि जिउधनको रक्षाका लागि यो गठन भएको हो । यसको गठनसँग कोही पनि आत्तिनुपदैन, तर्सिनु पर्दन ।’ उनले राज्य संयन्त्रले मात्रै शान्ति सुव्यवस्था कायम गर्न नसक्ने रहेको भन्दै आफूहरूले फोर्स घोषणा गरेको बताए ।

‘यो देशमा शान्ति सुव्यवस्था कायम गर्न बनेको हो। राज्य संयन्त्रले मात्रै शान्ति सुव्यवस्था गर्न सक्ने अवस्था रहेन । औद्योगिक प्रतिष्ठानको रक्षा हुने अवस्था रहेन,’ ओलीले भने । उनले हामी नेपालका संयोजक सुदन गुरुङलाई लक्षित गर्दै ओलीले व्यंग्य पनि गरे । उनले भने, ‘पानी बाँड्ने मात्रै भोलेन्टियर संस्था हुँदैनन् । यहाँ त अघिल्लो दिन पानी बाँड्ने भोलिपल्ट केके केके ।’ उनले भदौ २३ र २४ गतेको जेनजीको आन्दोलनको क्रममा उक्त संस्थाको उपस्थिति र सक्रियताबारे प्रश्न उठाएका हुन् ।

काठमाडौं । नेकपा एमालेका नेता महेश बस्नेतले अब प्रधानमन्त्री सुशीला कार्कीबाट देश नचल्ने बताएका छन् । शुक्रबार एमालेको युथ भोलिन्टियर फोर्स घोषणा सभालाई सम्बोधन गर्दै बस्नेतले यस्तो बताएका हुन् । नेता महेश बस्नेतले प्रधानमन्त्री सुशीला कार्कीको राजीनामा माग गरेका छन् । उनले फास्ट ट्रयाकबाट राजीनामा दिएर विधि र प्रक्रियाबाट देशलाई चलाउन प्रधानमन्त्री कार्कीले राजीनामा दिनुपर्ने बताएका हुन् ।

‘फास्ट ट्रयाकबाट सुशीला आमाले राजीनामा दिनुस् । विधि प्रक्रियाबाट देश चल्ने हो,’ बस्नेतले भने, ‘दलबाट देश चल्ने हो । दलबाट बाहिरबाट राजनीति हुँदैन ।’ ‘संसद् विघटन गरेर, हाम्रो लोकतान्त्रिक पद्धतिमाथि हमला गरेर प्रधानन्यायाधीश भइसकेकी जेन–जीको भावना विपरीत ७३ वर्षकी आमैलाई विचरा खुट्टा खुच्याउँदै हिँड्नु हुन्छ,’ बस्नेतले भने, ‘अब ती आमाबाट देश चल्दैन । अब संसद् पुनर्स्थापना गर्नुपर्छ ।’ लोकतन्त्र, विधिको शासन र सुशासनलाई ठिक ट्रयाकमा ल्याउन नेसनल भोलिन्टियर फोर्सले काम गर्ने बस्नेतले बताए ।

काठमाडौं । नेकपा एमालेका पोलिटब्युरो सदस्य महेश बस्नेतले भोलि (शनिबार) काठमाडौँमा पार्टीको कार्यक्रममा ६० हजार मान्छे उतार्ने दाबी गरेका छन् । पार्टीको नेशनल भोलेन्टियर फोर्सको घोषणा सभालाई सम्बोधन गर्दै ६० हजार मान्छे भोलिको कार्यक्रममा सहभागी हुने बताएका हुन् । उनले भोलिको प्रदर्शन हुने विश्वास आजैको  र्‍यालीले देखाइसकेको बताए। ’भोलि ११ बजे भृकुटीमण्डपमा हामी भला हुन्छौं । त्यहाँ ६० हजारभन्दा धेरै जम्मा भएर सभा गर्दैछौँ,’ उनले भने, ‘सुशीला आमालाई राजनीतिक जीवनबाट टाटा बाइ बाइ गराएर उहाँलाई छोराछोरीसँग बेलायत जानुपर्ने बनाइदिन्छौँ ।’

उनले राजनीति दल र नेताहरूले गर्ने भन्दै प्रधानमन्त्री सुशीला कार्कीले दुई तिन दिनभित्र राजीनामा दिने दाबी गरे । उनले काठमाडौं महानगरका मेयर बालेन शाहले स्टाटस लेखेर देशलाई संकटमा पुर्‍याउन खोजे पनि अब नेसनल भोलेन्टियर फोर्सले रक्षा गर्ने बताए । एमालेले शनिबार काठमाडौँमा शक्ति प्रदर्शन गर्दैछ ।

‘केपी ओलीले सिठ्ठी फुक्दा २ लाख युवा काठमाडौँ आउने अवस्था बनाउँदै छौं’
नेता महेश बस्नेतले अब दुई महिनापछि केपी ओलीले सिठ्ठी लगाउँदा दुई लाख तुरुन्तै काठमाडौँ आउने अवस्था बनाउने बताएका छन् । नेसनल भोलेन्टियर फोर्स घोषणा सभामा पार्टी अध्यक्ष केपी शर्मा ओलीले सिठ्ठी मात्र फुके पनि दुई लाख मानिस काठमाडौँ अवस्था बनाइरहेको बताएका हुन् । उनले फोर्स देशव्यापी अभियानका रूपमा अघि बढाइने उल्लेख गर्दै युवाहरूको एक हुने ठाउँ एमालेको भएको बताए । बस्नेतले फोर्सले पार्टी संगठन सुदृढ पार्ने, स्वयंसेवी संरचना विस्तार गर्ने र आगामी राजनीतिक अभियानमा ऊर्जा थप्ने बताएका छन् ।

काठमाडौं । नेकपा एमालेको सचिवालय बैठक जारी छ। भदौ २३–२४ को जेनजी आन्दोलनको क्रममा आगजनी गरिएको पार्टी मुख्यालय आवश्यक मर्मत–सम्भारपछि आज पहिलो पटक च्यासलमै बैठक राखिएको हो । आजको बैठक आसन्न मंसिर २७–२९ को महाधिवेशनमा केन्द्रित हुनेछ । भावी नेतृत्वलाई लिएर पनि आज केही पदाधिकारीले कुरा उठाउने तयारी गरेका छन् । वरिष्ठ उपाध्यक्ष ईश्वर पोखरेलले आफ्नो दाबीसहित सर्वसम्मत अध्यक्ष बनाउन बैठकमा प्रस्ताव गर्ने तयारी छ ।

महाधिवेशनको व्यवस्थापकीयलगायत विभिन्न उपसमिति गठन गरिने प्रचार विभाग प्रमुख राजेन्द्र गौतमले बताए । त्यस्तै मंसिर ६ गते काठमाडौंमा तय गरिएको जनप्रदर्शन, राष्ट्रियसभा र प्रतिनिधिसभा चुनावका लागि सहभागितालगायतको विषयमा पनि छलफल हुँदैछ ।

नेकपा एमालेले प्रतिनिधिसभा पुनर्स्थापनाका लागि सडक र अदालत दुवैबाट दबाब दिने तयारी गरेको छ । प्रतिनिधिसभा पुनस्र्थापनाका लागि आन्दोलन गर्ने घोषणा गरेको एमालेले फागुन २१ गते तोकिएको प्रतिनिधि सभा निर्वाचन प्रयोजनका लागि निर्वाचन आयोगमा मंसिर १० गतेसम्म दल दर्ताको विषयबारे पनि अहिलेसम्म केही बोलेको छैन ।

केन्द्रीय प्रचार विभाग प्रमुख राजेन्द्र गौतमका अनुसार यो बैठकले महाधिवेशन सम्बन्धी निर्णयहरू गर्नेछ । ‘महाधिवेशनको तयारी गर्न उपसमितिहरू बनाउनु पर्नेछ, अरू तयारीका निर्णय पनि हुनेछ,’ उनले भने । च्यासल अहिले आंशिक सञ्चालनमा आएको छ । ‘संगठन विभाग र संसदीय दलको बैठक बसिसकेको छ । तर पार्टी सचिवालयको बैठक भने पहिलो पटक बस्न लागेको हो,’ गौतमले भने ।

काठमाडौं । नेकपा एमालेका अध्यक्ष समेत रहेका निवर्तमान प्रधानमन्त्री केपी शर्मा ओलीले प्रतिनिधिसभा विघटनसम्बन्धी सर्वोच्च अदालतमा दायर रिटमा लिखित जबाफ दिएका छन् । यो रिट युवराज सफल, मकबुल मिया र शेरबहादुर रोकायुले दायर गरेका थिए, जसमा ओलीलाई पनि विपक्षी बनाइएको थियो । ओलीका तर्फबाट तत्कालीन महान्यायाधिवक्ता रमेश बडालले अदालतमा जबाफ पेश गरेका थिए । जबाफमा ओलीले भदौ २४ को घटनालाई ‘अराजक र असामान्य अवस्था’ भएको भन्दै त्यसबाट लाभ उठाउने व्यक्तिहरू नै यसको ‘सिर्जनाकर्ता’ भएको बताएका छन् ।

ओलीले भनेका छन्, ‘नेपालको सार्वभौमसत्ता र राजकीय सत्ता नेपाली जनतामा निहित छ । अराजक अवस्थाको सिर्जना गराई सुशीला कार्की र उनका मन्त्रीहरूले राज्यसत्ता कब्जा गर्ने प्रयास गरेका छन् । मैले नयाँ सरकार गठन गर्ने उद्देश्यले राजीनामा दिएको हुँ ।’
उनले थपेका छन्, ‘संविधानको धारा ७६ अनुसार सरकार गठन नगरी सुशीला कार्कीलाई नियुक्त गर्नु संवैधानिक उल्लङ्घन हो ।’ ओलीले अदालतलाई स्पष्ट पारेका छन् कि उनले कुनै पनि सिफारिस वा अनुमति दिएर कार्कीलाई प्रधानमन्त्री नियुक्त गरेको होइन ।

अर्कोतर्फ, ओलीले संविधानको धारा १३२ (२) को हवाला दिँदै प्रधानन्यायाधीश वा सर्वोच्च अदालतका न्यायाधीशलाई अन्य सरकारी पदमा नियुक्त गर्न नहुने व्यवस्था उल्लङ्घन भएको बताएका छन् । यसै कारण, प्रधानमन्त्री कार्कीको नेतृत्वमा प्रतिनिधिसभा विघटन पनि संविधानविपरीत भएको उनले जबाफमा उल्लेख गरेका छन् ।

ओलीले यस घटनालाई अवैधानिक ठहर गर्दै भनेका छन्, ‘सरकार गठन नै गैरसंवैधानिक भएकाले यसले गरेका काम स्वतः खारेज हुनेछन् । प्रधानमन्त्री कार्कीको सिफारिसमा भएको प्रतिनिधिसभा विघटन संविधानविपरीत छ । यस निर्णयलाई बदर गरी प्रतिनिधिसभाको पुनःस्थापना गर्नुपर्छ ।’ नेकपा एमालेले प्रतिनिधिसभा पुनःस्थापनाको पक्षमा आफ्नो धारणा सार्वजनिक गरिसकेको ओलीको जबाफमा उल्लेख गरिएको छ ।

विराटनगर । आन्तरिक विवाद र अनुशासनहीनताका घटनाहरू बढ्दै गएको भन्दै नेकपा एमाले कोशी प्रदेश कमिटीले कडा कदम चालेको छ । कमिटीको पछिल्लो बैठकले दुई जना पूर्व मेयरसहित तीन जनालाई साधारण सदस्यता समेत खारेज गर्दै पार्टीबाट पूर्ण रूपले निष्काशन गरेको छ । साथै दुई जनालाई स्पष्टीकरण मागिएको छ ।

प्रदेश कमिटीका सचिव राजकुमार भण्डारीका अनुसार निष्काशनको सूचीमा परेका तीन जना नेतामा इटहरी उपमहानगरका पूर्व मेयर द्वारिकालाल चौधरी, झापाको बिर्तामोड नगरपालिकाका पूर्व मेयर ध्रुव शिवाकोटी, र मनोरथ तिवारी रहेका छन् । २०७४ को स्थानीय तह निर्वाचनमा इटहरी उपमहानगरपालिकाका मेयर बनेका चौधरी २०७९ मा पुनः उम्मेदवारी चाहन्थे । टिकट नपाएपछि उनी माओवादी केन्द्रमा प्रवेश गरेर प्रदेश सभा सदस्यका लागि उम्मेदवार बने, तर एमालेका रेवतीरमण भण्डारीसँग पराजित भए । पराजयपछि पुनः एमाले फर्किए पनि सक्रिय भूमिकामा देखिन सकेनन् । स्थानीय नेताहरूमाथि निरन्तर सार्वजनिक आलोचना गर्दै आएका भन्दै उनलाई पार्टीले अनुशासनहीनतामा कारबाही गरेको हो ।

बिर्तामोडका पूर्व मेयर ध्रुव शिवाकोटीमाथि आफ्नै घरमा काम गर्ने किशोरीलाई बलात्कार गरेको आरोप रहेकाले उनी केही समय प्रहरी हिरासतमा बसेका थिए । पछि धरौटीमा रिहा भएका उनी हाल पनि अदालती प्रक्रियामा छन् । यस प्रकरणमा उनी अस्पताल बसेर ‘पार्टीले संरक्षण दिएको’ आरोप समेत सार्वजनिक रूपमा उठ्ने गरेका थिए । पार्टीले यिनै विवादका आधारमा शिवाकोटीलाई साधारण सदस्यबाटै हटाएको सचिव भण्डारीले बताए ।

प्रदेश कमिटीका अनुसार भदौ २४ गते भएको आगजनी, तोडफोड र लुटपाट घटनामा संलग्नता प्रमाणित भएकाले मनोरथ तिवारीमाथि कारबाही गरिएको हो । ‘व्यक्तिगत तथा सरकारी सम्पत्तिमा क्षति पुर्‍याउने गतिविधि पार्टीको मूलभूत सिद्धान्त विपरीत छ’, सचिव भण्डारीले भने, ‘यस्ता व्यक्तिलाई पार्टीमा स्थान छैन भन्ने सन्देश दिन कारबाही अनिवार्य बन्यो ।’ यसैबीच, कमिटीले इटहरीका काशीनाथ दङ्गाल र डा. बद्री विशाल पोख्रेलसँग स्पष्टीकरण पेश गर्न माग गरेको छ । दङ्गाल यसअघि नेकपा एकताकालमा एमाले इटहरी नगर कमिटीका सचिव समेत थिए ।

काठमाडौं । नेकपा एमालेका सचिव योगेश भट्टराईले मधेसमा पार्टीको जनआधार विस्तार र सामाजिक छवि सुधारका लागि नयाँ जिम्मेवारीसहित अघि बढ्नु पर्ने बताएका छन्। आज (बिहीबार) सामाजिक सञ्जालमा स्टाटस पोस्ट गर्दै उनले मधेस केन्द्रित भूमिकामा पुनः सक्रिय हुन पार्टी नेतृत्वसमक्ष प्रस्ताव गरेका हुन् ।

भट्टराईले लेखेका छन्, ‘पार्टीको जनआधार विस्तार गर्न, आन्तरिक एकतालाई सुदृढ़ गर्न, सामाजिक छवि सुधार गर्न मधेसमा नयाँ जिम्मेवारीका साथ जानुपर्छ । यसबारे गम्भीरतापूर्वक विचार गर्न अध्यक्ष कमरेडलाई निवेदन गर्दछु ।’ सचिव भट्टराईले मधेस प्रदेशमा हालसम्म एमालेले हासिल गरेको राजनीतिक पुनस्र्थापनामा अध्यक्ष केपी शर्मा ओलीको सूक्ष्म व्यवस्थापन र पार्टी नेताहरूको कठोर परिश्रम मुख्य आधार रहेको उल्लेख गरे । उनका अनुसार २०७२ सालमा संविधान जारी भएपछि मधेस एमालेका लागि चुनौतीपूर्ण क्षेत्र बने पनि पछिल्लो समय पार्टीले उल्लेखनीय पुनरुत्थान गरेको छ ।

भट्टराईले स्मरण गरे, ‘संविधानयताका वर्षहरूमा मधेसमा एमालेका नेता–कार्यकर्ता र पार्टी कार्यालयहरू पटक–पटक आक्रमणमा परे पनि संगठन नटुटेको र निरन्तर क्रियाशील रहेकाले आजका उपलब्धि सम्भव भएका हुन् ।’ उनका अनुसार प्रतिनिधिसभा निर्वाचनमा प्रत्यक्षतर्फ १० सिट जितेर एमाले पहिलो दल बनेको र प्रदेशसभामा २५ सिटसहित अग्रस्थानमा उभिनु ठूलो उपलब्धि हो ।

झण्डै १५ महिनासम्म मधेस प्रदेश इन्चार्जका रूपमा काम गर्दा संगठन व्यवस्थापन, सदस्यता प्रणाली, प्रदेश–जिल्ला अधिवेशन तथा जनसंगठन सुदृढीकरणमा महत्त्वपूर्ण उपलब्धि हासिल गरेको भट्टराईको दाबी छ । भट्टराईले मधेसका समुदायमा जातीय विभेद, महिला हिंसा, दलितमाथिको भेदभाव र वर्गीय उत्पीडनविरुद्ध एमालेले उठाएको विमर्शले जनभावना जितेको बताए । त्यसको साथै भौतिक पूर्वाधार विकास, आर्थिक अवसर विस्तार र ‘हिमाल–पहाड–तराई–मधेस एकता’ को पक्षमा चलाएको अभियानले मधेसमा पार्टीप्रतिको आकर्षण बढेको उनको भनाइ छ ।

काठमाडौं । नेकपा एमालेका नेता महेश बस्नेतले सरकारले आफूहरूलाई बाराको कार्यक्रममा जान नदिएको आरोप लगाएका छन् । प्रेस चौतारी नेपालले आज (बुधबार) काठमाडौंमा आयोजना गरेको कार्यक्रममा बोल्दै बस्नेतले सरकार आफूहरूसँग आतंकित भएको बताएका छन् ।

उनले भने, ‘सरकारले अलिअलि जेनजी नामका युवाहरूलाई उचालेर एयरपोर्ट बन्द गराउने र हामीलाई त्यहाँ जान नदिने योजना बनाएको छ । हामी कानुनको दायराभित्रै रहेर अघि बढ्न चाहन्छौँ, तर किन यति आतंकित बनेको हामीसँग ?’ बस्नेतले एमालेको काठमाडौंमा आयोजना हुने सभापछि प्रधानमन्त्री सुशीला कार्कीले राजीनामा दिनुपर्ने विषयसँग सम्बन्धित भएर पनि निषेध सुरु गरिएको आरोप लगाए ।

काठमाडौं । नेकपा एमालेका सचिव योगेश भट्टराईले सिमरा घटनाले मुलुकको शान्ति सुरक्षामाथि गम्भीर चिन्ता उत्पन्न गरेको बताएका छन् । एमाले महासचिव शंकर पोखरेलसहितका नेताहरू पुग्ने भएपछि बुधबार सिमरा विमानस्थल बाहिर विरोध प्रदर्शन भएको थियो । बारामै तय भएको एक कार्यक्रममा सहभागी हुने पोखरेललसहितका नेताहरू काठमाडौंबाट जाने भएपछि त्यहाँ प्रदर्शन भएको छ । प्रदर्शनका कारण झडपको स्थिति सिर्जना भएको छ भने स्थानीय प्रशासनले सिमरा क्षेत्रका कफ्र्यु आदेश जारी गरेको छ ।

‘नेकपा एमाले महासचिव कमरेड शंकर पोखरेल सहभागी हुने पूर्व घोषित कार्यक्रम बिथोल्न गरिएको हर्कतले मुलुकको शान्ति सुरक्षामाथि गम्भीर चिन्ता उत्पन्न गरेको छ’, योगेशले सामाजिक सञ्जाल फेसबुकमा लेखेका छन्, ‘देशको एक ठाउँबाट अर्को ठाउँमा निर्विवाद हिँड्डुल गर्न पाउने तथा शान्तिपूर्ण राजनीतिक गतिविधि गर्न पाउने संविधानप्रदत्त अधिकारको सम्मान गर्न सबैमा अपिल गर्दछु ।’ यस्ता गतिविधिले आसन्न निर्वाचनलाई थप अन्योल र अनिश्चयतिर धकेल्ने कुरामा सचेत रहन उनले सरकारको ध्यानाकर्षण गराएका छन् । उनले शान्ति सुव्यवस्था कायम राख्न समेत सरकारको गम्भीर ध्यानाकर्षण गरेका छन् ।

काठमाडौं । नेकपा एमालेका अध्यक्ष केपी शर्मा ओलीले सरकारले सभा सम्मेलन र सार्वजनिक कार्यक्रममै अवरोध पुर्‍याइरहँदा स्वतन्त्र र निष्पक्ष चुनाव गराउँछ भन्नेमा विश्वास गर्न नसकिने बताएका छन् । आज (बुधबार) काठमाडौँमा एमाले स्थानीय विकास विभागले आयोजना गरेको भेलामा बोल्दै उनले बाराको सिमरामा भएको घटनालाई उदाहरण प्रस्तुत गर्दै निर्वाचन हुन नसक्ने बताएका हुन् । उनका अनुसार सिमरामा आयोजित युवासम्बन्धी कार्यक्रमका क्रममा विमानस्थल नै अवरुद्ध बनाइएपछि एमालेका नेताहरू त्यहाँ पुग्न सकेनन् ।

बाराको सिमरामा जेनजीहरूले गरेको अवरोधप्रति लक्षित गर्दै उनले भने, ‘बारामा हाम्रो युवा भेला थियो । सिमरा एयरपोर्ट बन्द भयो । हाम्रा नेताहरू जान पाउनु भएन । जानबाट रोकियो । एयरपोर्टमै तोडफोड गर्न दिइयो । ५०–६० जना मान्छे आएर ढुंगामुढा गरेर एयरपोर्ट नै बन्द गराइ दिने ? के हो यस्तो ? अनि भन्छ चुनाव गर्ने रे ? सभा गर्न नदिनेले चुनाव कसरी गर्छ ?’

काठमाडौं । नेकपा एमालेका महासचिव शंकर पोखरेलले हालै विघटित प्रतिनिधि सभासम्बन्धी राजनीतिक घटनाक्रम र जेन–जी आन्दोलनका समयमा घटेका घटनाबारे कडा प्रतिक्रिया दिएका छन् । लगातार दुई बैठकहरूमा दलका सांसदहरूलाई सम्बोधन गर्दै पोखरेलले तत्कालीन प्रधानमन्त्री केपी शर्मा ओलीमाथि लगाइएको जिम्मेवारीको प्रश्नलाई खारेज गर्दै वर्तमान सरकारको भूमिकामाथि व्यापक असन्तुष्टि व्यक्त गरेका छन् ।

भदौ २३ र २४ गते चलेको जेन–जी आन्दोलनका क्रममा ७६ जनाको मृत्यु भएको घटना अहिले राजनीतिक बहसको केन्द्रमा छ । तत्कालीन प्रधानमन्त्री ओलीको हैसियतमा उनले यी सबै घटनाको जिम्मा लिनुपर्ने आवाज उठिरहेका बेला पोखरेलले भने, ‘प्रधानमन्त्रीले शान्ति–सुरक्षा कायम गर्ने क्रममा सरकारी संयन्त्रले प्रयोग गरेको बलको प्रत्यक्ष जिम्मा लिनु ‘‘सही व्याख्या’ नहुने दाबी गरे ।

उनले भने, ‘शान्ति–सुरक्षा कायम गर्न सरकारले बल प्रयोग गर्दा त्यसको सम्पूर्ण जिम्मा प्रधानमन्त्रीले नै लिनुपर्छ भन्ने धारणा युक्तिसङ्गत छैन । जेन–जीको आवरणमा बनेको सरकारले अहिलेको द्वन्द्व समाधान गर्न सक्दैन, बरु देशलाई पछाडि धकेलिरहेको छ ।’ च्यासलस्थित पार्टी कार्यालयमा बसेको विघटित संसदीय दलको बैठकमा पोखरेलले मुख्य एजेण्डा संसद् पुनःस्थापना रहेको स्पष्ट पारे । उनले संविधानले नचिनेको प्रधानमन्त्रीद्वारा गराइएको संसद् विघटन ‘पहिलो दृष्टिमै गलत’ रहेको बताए । ‘विगतका फैसला र नजिरले पनि संसद् पुनःस्थापना आवश्यक देखिन्छ’, पोखरेलले भने, ‘राजनीतिको बिग्रिएको कोर्स यही बिन्दुबाट सुधारिनु पर्छ ।’

‘नहुने चुनावको पैरवी गरेर एमाले हिँड्दैन’
सरकारतर्फबाट सम्भावित निर्वाचनको चर्चा भइरहे पनि एमाले त्यसको विश्वसनीयतामै प्रश्न उठाउँदै अघि बढ्ने पक्षमा छैन । पोखरेलले भने, ‘चुनावको कुरा गर्नेहरू नै चुनाव हुनेमा विश्वस्त छैनन् । नहुने चुनावको पैरवी गरेर एमाले हिँड्दैन ।’ जेन–जी आन्दोलनका घटनालाई राजनीतिक रूपमा प्रयोग गर्दै बनेको वर्तमान सरकारले कुनै पनि राष्ट्रिय संकट समाधान गर्न नसक्ने आरोप पोखरेलले दोहो¥याए । ‘मुलुकलाई अघि बढाउनु पर्नेमा अहिलेको सरकारले उल्टै पछाडि धकेलिरहेको छ’, उनले भने ।

काठमाडौं । नेकपा एमालेका अध्यक्ष केपी शर्मा ओलीले वर्तमान सरकार कसको र कसले बनाएको भन्ने नै स्पष्ट नभएको टिप्पणी गरेका छन् । पार्टी निकट पत्रकारहरूको संस्था प्रेस चौतारी नेपालको टोलीसँग आइतबार आफ्नै निवास गुण्डुमा छलफल गर्दै अध्यक्ष ओलीले अपनत्व कसैले पनि नलिएको बेवारिसे सरकार भन्दै प्रश्न उठाएका हुन्।

बेवारिसे सरकारले तोडफोड र आगलागीमा संलग्नलाई कारबाही नगरेर दण्डहीनतालाई प्रश्रय दिएको दावी गर्दै ओलीले प्रश्न गरे, ‘यो सरकार कसको प्रतिनिधि हो ? जेनजीले मेरो सरकार होइन भन्छ । दलले हाम्रो सरकार होइन भन्छन् । संसदले यसलाई म चिन्दिनँ भन्छ । संविधानले मसँग यस्तो सरकार बनाउने व्यवस्था नै छैन भन्छ आखिर यो सरकार कसको हो ?’

अवैधानिक र अनधिकृत रुपबाट विघटन गरिएको संसदलाई पुनःस्थापना गरेर मात्र देशलाई सही बाटोमा हिँडाउन सकिने एक मात्र विकल्प भएको ओलीको भनाई छ । ओलीले थप भने। ‘विभिन्न नामका समूह खडा गरेर कहिले २४ गतेका विध्वंशकारीलाई पक्रन हुँदैन भन्ने ज्ञापन पत्र बुझाउन लगाएको छ ।

अध्यक्ष ओलीले वर्तमान सरकारले आफू र रमेश लेखकलाई समात्नु नै सुशासन हो भन्ने सोचिरहेको टिप्पणी गरेका छन् । ओली र लेखकलाई गिरफ्तार गरेर थुन्नुलाई नै अहिलेको सरकारले सुशासन ठानिरहेको उनको भनाइ छ । त्यसका लागि जेनजीलाई संगठित गर्ने, उनीहरूको मागपत्र लेखिदिने, मागपत्र पढाउने, उनीहरूको हातमा मागपत्र दिने जेनजीलाई बोलाएर दबाब दिए भन्ने भ्रम फैल्याउने काममा लागेको उनले बताए ।

वर्तमान सरकारले कलाविहीन नाटक मञ्चन गरिरहेको उनको टिप्पणी छ । उनले भने, ‘जेनजीहरूको मागपत्र हेरेको थिएँ, मागपत्र कसले ड्राफ्ट गरेको मलाई थाहा छ । कहाँ पढाइएको जेनजीलाई थाहा छ, को अर्गनाइजर भएरहेको छ त्यो पनि थाहा छ । जे होस् एउटा तमासा भयो । हामीले बिना पैसा यो असंवैधानिक सरकारको तमासा हेर्न पाएका छौं । नाटकमा अलिकति कला हुनुपर्छ । कलाविहीन नाटक छ, त्यो हेरिरहेका छौं ।’