काठमाडौं।  सामाजिक सञ्जालमा धेरै भ्युज र चर्चा बटुल्ने उद्देश्यले घरपालुवा गोरुमाथि निर्दयी व्यवहार गरेको भिडिओ सार्वजनिक गर्ने एक व्यक्ति पक्राउ परेका छन्।

जिल्ला प्रहरी कार्यालय प्युठानका अनुसार पक्राउ पर्नेमा गौमुखी गाउँपालिका–१ का ३६ वर्षीय जालीराम थापामगर रहेका छन्। उनले आफ्नै खेतमा जोत्ने क्रममा गोरुले हिँड्न नसकी खेतमै बसेपछि त्यसलाई उठाउनका लागि कुटपिट र दुर्व्यवहार गरेको दृश्य भिडियोमा कैद गरी फेसबुक र टिकटकमा पोस्ट गरेका थिए।

प्रहरीका अनुसार सार्वजनिक भएको भिडियोमा थापामगरले गोरुको नाक र मुख माटोमा गाडेर कुटपिट तथा हिर्काउने जस्ता अमानवीय व्यवहार गरेको देखिएको छ। उक्त भिडियो सामाजिक सञ्जालमा फैलिन थालेपछि घटनाबारे प्रहरीको ध्यानाकर्षण भएको थियो।

घटनापछि प्रहरीले उनलाई नियन्त्रणमा लिएर मुलुकी अपराध संहिता, २०७४ अन्तर्गत पशुपन्छीप्रति निर्दयी व्यवहार गर्न नहुने सम्बन्धी व्यवस्थाअनुसार मुद्दा दर्ता गरेको छ। संहिताको परिच्छेद २७ को दफा २९० अनुसार पशुपन्छीमाथि क्रूर वा अमानवीय व्यवहार गर्न पाइँदैन।

प्रहरीले तालुक जिल्ला प्रशासन कार्यालय प्युठानबाट पाँच दिनको म्याद थप गरी घटनाबारे थप अनुसन्धान अघि बढाएको जनाएको छ।

जिल्ला प्रहरी कार्यालय प्युठानका सूचना अधिकारी हरि भट्टराईका अनुसार सामाजिक सञ्जालमा लोकप्रियता हासिल गर्ने नाममा पशुपन्छीमाथि हिंसा वा यातना दिने कार्य कानुनविपरीत भएकाले यस्ता गतिविधिमा संलग्न नहुन सबैलाई आग्रह गरिएको छ।