Author: nepalone

काठमाडौं । निर्वाचन आयोगले आचारसंहिता पालनामा शून्य सहनशीलताको नीति अपनाउने चेतावनी दिएको छ ।

आइतबार काठमाडौंमा आयोजित एक कार्यक्रममा कार्यवाहक प्रमुख निर्वाचन आयुक्त रामप्रसाद भण्डारीले शून्य समयमा नगद चलखेल वा आचारसंहिताको उल्लंघन भए उम्मेदवार विजयी भइसकेको अवस्थामा पनि उम्मेदवारी खारेज गरिने स्पष्ट पारे ।

हालसम्म देशभरबाट आचारसंहिता उल्लंघनका करिब १ हजार १ सय उजुरी परेको उनकाे भनाइ छ ।

तीमध्ये धेरैको स्थानीयस्तरमै फर्छ्याैट भइसकेको उनले बताए । आयोगले २५-३० वटा गम्भीर प्रकृतिका उजुरीमाथि केन्द्रीयस्तरबाटै कारबाहीको निर्णय गरिसकेको र केही विषयहरू अदालतमा समेत पुगेको उनले बताए ।

उनले भने, ‘यदि कसैले रकम लेनदेन गरेको वा निर्वाचन सामग्री र रकमको झोला एकै ठाउँमा बोकेर हिँडेको प्रमाण भेटिएमा र त्यो बरामद भएमा उम्मेदवारी खारेज मात्र होइन, अर्को ६ वर्षसम्म निर्वाचनमा सहभागी हुन नपाउने गरी प्रतिबन्ध लगाइनेछ । एउटा राजनीतिक प्राणीलाई राजनीतिबाट ६ वर्ष वञ्चित गरिनु सबैभन्दा ठूलो सजाय हो ।’

निर्वाचन आयोग कुनै पनि दबाबमा नपरी कानुन बमोजिम कार्य सम्पादन गर्न दृढ रहेको उनकाे दाबी छ ।

काठमाडौं । निर्वाचनको दिन सञ्चारकर्मीहरूको आवागमनलाई सहज बनाउन निर्वाचन आयोगले छुट्टै पास वितरण नगर्ने निर्णय गरेको छ ।

कार्यवाहक प्रमुख निर्वाचन आयुक्त रामप्रसाद भण्डारीले प्रेस काउन्सिल नेपालले जारी गरेको परिचयपत्रकै आधारमा पत्रकारहरूले देशभर आवागमन गर्न पाउने जानकारी दिए ।

उनले ०७९ सालको निर्वाचनमा प्रेस काउन्सिल र आयोगबीच केही तिक्तता भए पनि अहिले ०८२ सालमा राम्राे समन्वय रहेको बताए ।

साथै, मतदानस्थलको ३ सय मिटर वरिपरि कुनै पनि दलको प्रचार सामग्री भएमा त्यसलाई हटाउन र आचारसंहिता पालनामा सघाउन उनले पत्रकारहरूलाई आग्रह गरे ।

उनले भने ‘सञ्चार क्षेत्रमा काम गर्ने व्यक्तिहरूले निर्वाचनमा आवागमन गर्दा आयोगबाट छुट्टै पास लिनुपर्दैन । प्रेस काउन्सिलले जारी गरेको पास नै मान्य हुनेछ । ‘आवागमनमा कतै समस्या पर्‍याे भने आयोगमा तुरुन्त खबर गर्नुहोस्, हामी सहजीकरण गर्छौं ।’

पत्रकारहरु आफैँ आचारसंहिताको नमूना बनेर देखिनुपर्ने र त्यसले अरूलाई पनि अनुशासनको दायरामा ल्याउने उनकाे विश्वास छ ।

काठमाडौं । नेकपा एमालेका अध्यक्ष केपी शर्मा ओलीले झापा निर्वाचन क्षेत्र नम्बर-५ मा चुनावी घरदैलोका क्रममा धिमाल सांस्कृतिक संग्रहालयको अवलोकन गरेका छन् ।

अवलोकनका क्रममा स्थानीय बासिन्दा र संग्रहालय व्यवस्थापन समितिसँग कुरा गर्दै ओलीले संग्रहालयको विकासका लागि आफ्नो प्रतिबद्धता व्यक्त गरे ।

ओलीले आफू सरकारमा हुँदा संग्रहालयका लागि विनियोजन गरेको बजेट वर्तमान सरकारले कटौती गरेकोमा असन्तुष्टि व्यक्त गरे ।

उनले भने, ‘म फेरि सरकार बनाएर आएपछि म यसलाई जुटाउनेछु । यस क्षेत्रको विकास गरिनेछ र यो संग्रहालयको विकास गरिनेछ । यो पार्टी भनेको विनाश गर्ने पार्टी होइन देश बनाउने पार्टी हो । त्यसकारण सबैको सल्लाह र सुझाव आवश्यक छ ।’

अध्यक्ष ओलीले एमाले विकासप्रेमी पार्टी भएको दाबी गर्दै देश निर्माणका लागि सबै पक्षको रचनात्मक सल्लाह र सुझावको खाँचो रहेको औंल्याए ।

उनले धिमाल जातिको मौलिक संस्कृति संरक्षणमा संग्रहालयले खेल्ने भूमिका महत्वपूर्ण हुने बताउँदै यसको स्तरोन्नतिका लागि आफू सधैं तत्पर रहने बताए ।

काठमाडौं । नेपाल कम्युनिष्ट पार्टी (नेकपा)का संयोजक एवं पूर्वप्रधानमन्त्री पुष्पकमल दाहालले देशको राष्ट्रिय स्वाधीनता र आत्मसम्मानमाथि गम्भीर चुनौती थपिएको बताएका छन् ।

रोल्पामा शनिबार आयोजित चुनावी सभालाई सम्बोधन गर्दै उनले विदेशी प्रतिक्रियावादी र तिनका दलालहरूका विरुद्ध नयाँ एकता र शक्तिका साथ प्रतिवाद गर्नुपर्ने आवश्यकता औंल्याए । प्रचण्डले रोल्पालाई नेपाली जनवादी क्रान्तिको किल्ला र ‘क्रान्तिको राजधानी’ को रूपमा चित्रण गरे।

उनले भने, ‘रोल्पामा उभिएर सम्बोधन गर्दा मैले देशभरिका ७७ वटै जिल्लाका जनतालाई सम्बोधन गरेको महशुस गरेको छु । यहाँका सहिद, बेपत्ता योद्धा र क्रान्तिकारी जनताको त्यागले नै १० वर्षे जनयुद्ध सफल भएको हो ।’

आफू पहिलो पटक रोल्पाबाटै निर्वाचित भएर प्रधानमन्त्री बनेको स्मरण गर्दै उनले रोल्पाका जनताप्रति आफू सधैं ऋणी रहेको बताए ।

‘रोल्पाका जनताले इतिहास बनाउनुभयो र तपाईहरुकै काखमा बसेर नै हामीले नेपालको जनवादी क्रान्तिलाई आधारभुत रूपले सफल पार्न सम्भव भयो ’, उनले भने ।

वर्तमान राजनीतिक परिस्थितिलाई ‘असहज’ र ‘जटिल’ भन्दै प्रचण्डले राष्ट्र निकै ठूलो अप्ठ्यारोमा परेको उल्लेख  गरे । जेन-जी युवाहरूको आन्दोलन र त्यसपछि भएका घटनाक्रमले निर्वाचनको वातावरण असहज बनाएको उनकाे तर्क छ ।
‘नेपाली जनताले आफ्नो बारेमा निर्णय गर्ने अधिकारमाथि विदेशी शक्ति र तिनका दलालहरूले चुनौती दिने दुःशाहस गरेका छन्’, उनले भने, ‘आज संघीय लोकतान्त्रिक गणतन्त्रको संविधान र प्राप्त उपलब्धिहरूमाथि प्रहार भइरहेको छ । महान सहिदहरुले अकल्पनीय त्याग र बलिदानबाट स्थापित गरेका मूल्य मान्यतामाथि प्रहार हुने दुःशाहस भएको छ ।’

यसपटक रुकुम पूर्वबाट प्रत्यक्ष निर्वाचन लड्नुको पछाडि राष्ट्र बचाउने नयाँ अभियानको उद्देश्य रहेको उनले प्रष्ट पारे ।

उनले भने, ‘म रुकुममा मात्र उम्मेदवार भएको होइन, यो रोल्पा, सल्यान र जाजरकोटसहितको केन्द्रिय आधार इलाकाको प्रतिनिधित्व हो । यहाँबाट शुरु हुने अभियानले देशभरि सुशासन, भ्रष्टाचार नियन्त्रण र आर्थिक समृद्धिको नयाँ सन्देश दिनेछ ।’

उनले विगतमा निरंकुश राजतन्त्रका विरुद्ध युद्धको उद्घोष गर्दा पनि रोल्पा–रुकुमबाटै सुरु गरिएको स्मरण गर्दै आजको संकट समाधान गर्न पनि यही आधार इलाकाको साथ आवश्यक रहेको बताए ।

काठमाडौं । प्रतिनिधिसभा सदस्य निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गर्न देशभर मदिरा विक्री वितरणमा प्रतिबन्ध लगाइएको छ ।

निर्वाचन आयोगको सिफारिसमा सरकारले शुक्रबारदेखि मदिरा बिक्री वितरण तथा सेवनमा रोक लगाएको हो ।

आयोगले प्रतिबन्धको कार्यान्वयन भए-नभएको बारेमा सूक्ष्म अनुगमन गर्ने पनि जनाएको छ ।

निर्वाचन आयोगका सूचना अधिकारी सुमन घिमिरेले फागुन १५ गतेदेखि मतदान कार्य सम्पन्न नहुन्जेलसम्मको लागि मदिरा बिक्री वितरण तथा सेवनमा प्रतिबन्ध लगाइएको जानकारी दिए ।

निर्वाचनको अवधिमा सम्भावित अवाञ्छित गतिविधि नियन्त्रण गर्न र शान्ति सुव्यवस्था कायम राख्न उक्त निर्णय गरिएको हो । तोकिएको अवधिमा मदिरा बिक्री वितरण वा सेवन गरेको पाइए प्रचलित कानुनअनुसार कारबाही गरिने उनले बताउ ।

‘फागुन २१ गते हुने प्रतिनिधिसभा सदस्यको निर्वाचनमा शान्ति सुव्यवस्था कायम गर्नको लागि निर्वाचन आयोगले नेपाल सरकारलाई केही व्यवस्थाहरुको सिफारिस गरेको छ ,जसअन्तर्गत निर्वाचनको मितिभन्दा ७ दिन अगाडि अर्थात् २०८२ साल फागुन १५ गतेदेखि मतदानको कार्य सम्पन्न नहुन्जेलसम्मको लागि कुनै पनि प्रकारका मदिराहरु बिक्री वितरण गर्न र सेवन गर्न नपाउनेगरि निषेधको व्यवस्था गरेको छ । यो व्यवस्थाबमोजिम आम रुपमा यस्ता क्रियाकलाप भएका छन् कि छैनन् भनेर निर्वाचन आयोगले पनि सूक्ष्म रुपमा अनुगमन गर्ने गरेको हुँदा सम्पूर्ण सरोकारवालाहरुले यस्ता किसिमका गतिविधिहरु नगर्न र नगराउनको लागि पनि निर्वाचन आयोगले सम्पूर्ण मतदातालगायत सरोकारवालाहरु सबैमा हार्दिक अनुरोध गरेको छ । यस किसिमको शान्ति सुव्यवस्था कायम गर्नको लागी निर्वाचन आयोग सम्पूर्ण निर्वाचनसँग सम्बद्ध राजनीतिक दल, उम्मेदवार र सुरक्षा निकायहरुलाई पनि अनुरोध गर्दछ ।’

आयोगले सम्पूर्ण मतदाता, व्यवसायी, राजनीतिक दल, उम्मेदवार तथा सुरक्षा निकायलाई निर्वाचन अवधिभर आचारसंहिताको पालन गरि सहयोग गर्न आग्रह गरेको छ ।

निर्वाचनसँग सम्बद्ध सबै पक्षले आ-आफ्नो जिम्मेवारी निर्वाह गरी मर्यादित र अनुशासित वातावरणमा मतदान सम्पन्न गर्नुपर्नेमा आयोगले जोड दिएको छ ।

काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाहले देश हेटौँडा सिमेन्ट कारखानाजस्तै बन्द अवस्थामा पुगेको भन्दै अब चलाउनुपर्ने टिप्पणी गरेका छन् ।

शुक्रबार चितवनमा आयोजित पार्टीको चुनावी सभालाई सम्बोधन गर्दै नेता शाहले यस्तो टिप्पणी गरे ।

उनले दक्ष जनशक्ति, खानी र आवश्यक औजार हुँदाहुँदै पनि हेटौँडा सिमेन्ट उद्योग बन्द गरिएको भन्दै उनले नेपाली काँग्रेसको ‘वाईवाई’ फ्याक्ट्री जस्तै चल्नुपर्ने कटाक्ष गरे । उनले बन्द रहेका सबै कारखाना सञ्चालन तथा नयाँ उद्योग स्थापना गर्ने पार्टीको योजना रहेको भन्दै घण्टि चिन्हमा मतदान गर्न आग्रह गरे।

उनले भने, ‘हाम्रो देश हेटौँडा सिमेन्ट कारखाना जस्तै भएको छ । मेसिन पनि छ । मेन पावर पनि छ, खानि पनि छ । तर बन्द । अब चल्नुपर्‍याे । नेपाली काँग्रेसको वाईवाई फ्याक्ट्रीजस्तै चल्न्पर्‍याे अब त्यो पनि । पूरै देशभरी चल्नुपर्‍याे । बन्द भएका सबै उद्योग तथा कारखाना चलाउने पार्टी बन्न चाहन्छौँ हामी ।’

उनले पार्टी सभापति नै यहीबाट उम्मेदवार रहेको भन्दै चिन्ता नलिन समेत चितवनबासीलाई आग्रह गरे ।

काठमाडौं । नेपाली कम्यनिस्ट पार्टी (नेकपा)का संयोजक पुष्पकमल दाहाल प्रचण्डले सबैतिर नेपाली कम्युनिस्ट पार्टी मात्रै
देशैभरी उभार आएकाे बताएका छन् ।

उनले  काङ्‌‍ग्रेस, एमालेलगायत दलप्रति सङ्‍केत गर्दै पुराना दलहरु रक्षात्मक अवस्थामा रहेकाे र नेकपा मात्रै आक्रमक ढङ्‍गले अगाडि बढेकाे जिकिर गरे। नेकपाले अघि सारेका नीति, याेजना, कार्यक्रम र प्रतिबद्धताले जनतामा भराेरा र विश्‍वास बढ्दै गरकाे बताए ।

‘पुराना भनिएका केही पार्टी कहीँ न कहीँ निकै अप्ठेरोमा छ । उनीहरु रक्षात्मक छन् । हामी मात्रै आक्रमक ढंगले अगाडि बढेका छौँ,’ उनले शुक्रबार काठमाडाैमा आयाेजित एक कार्यक्रममा भने, ‘नेपाली कम्युनिस्ट पार्टीले अगाडि सारेका नीति, योजना र कार्यक्रमप्रति र हामीले प्रस्तुत गरेको प्रतिबद्धताप्रति जनताको विश्वास र भरोसा बढ्दै गएको छ ।’

नेकपा याे निर्वाचनबाट एक नम्बर पार्टी बन्ने पनि प्रचण्डले दाबी गरे । तर, त्यसका लागि युद्धस्तरमा जनताकाे घरघरमा गएर मत माग्न पार्टीका उम्मेदवारदेखि पार्टीका कार्यकर्तालाई निर्देशन दिए ।

‘अब आउने पाँच दिन हामीले युद्धस्तरमा खटेर जनतालाई घरघरमा टोलटोलमा गएर सम्झाउन सक्यौँ भने मैले भन्दै आएको छु, यो पार्टी मात्रै त्यस्तो पार्टी हो राष्ट्रको हित, जनताको हित त्यसको पहरेदारी गर्न सक्नेछ,’ उनले भने, ‘यो पार्टी मात्रै त्यस्तो पार्टी हो देशको एक नम्बर पार्टी बनेर नेतृत्व गर्नेछ ।’