Author: nepalone

काठमाडौं । रसुवाको टिमुरेमा भदौ १० गते आएको बाढीमा ३३८ वटा ट्रक तथा कन्टेनर बेपत्ता भएको प्रारम्भिक विवरण सार्वजनिक भएको छ।

ती सवारीसाधनसँगै ४४१ जना चालक, सहचालक तथा व्यवसायीसमेत सम्पर्कविहीन रहेको नेपाल ट्रक यातायात व्यवसायी महासङ्घले जनाएको छ।

महासङ्घले विभिन्न सदस्य सङ्घ, समिति तथा कम्पनीबाट सङ्कलन गरेको प्रारम्भिक विवरण यातायात व्यवस्था विभागलाई बुझाएको हो।

भोटेकोशी बाढीबाट सार्वजनिक यातायात क्षेत्रमा भएको मानवीय तथा भौतिक क्षतिको विवरण सङ्कलन गर्न विभागले सरोकारवाला निकायसँग तथ्याङ्क मागेको थियो। विभागले असोज २ गते सूचना जारी गर्दै सात दिनभित्र क्षतिको विवरण उपलब्ध गराउन आग्रह गरेको थियो।

त्यसपछि महासङ्घले असोज ५ गते प्रारम्भिक विवरण विभागमा पठाएको हो।

महासङ्घका अनुसार नेपाल ट्रक कन्टेनर ढुवानी सेवा प्रालि, लोकन्थलीका मात्रै २१७ वटा ट्रक तथा कन्टेनर बेपत्ता छन्। ती सवारीसाधनसँग सम्बन्धित २५१ जना चालक, सहचालक तथा व्यवसायी पनि सम्पर्कविहीन छन्।

नारायणी यातायात व्यवसायी सङ्घ, हेटौँडाका ५८ वटा ट्रक तथा कन्टेनरसहित ७८ जना सम्पर्कविहीन छन्। तराई यातायात व्यवसायी सङ्घ, सिमराका २१ वटा सवारीसाधन र ३५ जना तथा ट्रक यातायात व्यवसायी सङ्घ नेपाल, बल्खुका १० वटा कन्टेनर र २० जना सम्पर्कविहीन रहेको विवरणमा उल्लेख छ।

त्यस्तै गण्डकी ट्रक व्यवसायी सङ्घ, पोखराका २१ वटा ट्रक तथा कन्टेनर र ३४ जना तथा पश्चिमाञ्चल यातायात व्यवसायी समिति, बुटवलका ११ वटा कन्टेनर र २२ जना सम्पर्कविहीन छन्।

नेपाल ट्रक कन्टेनर व्यवसायी सङ्घका अध्यक्ष अर्जुनबहादुर सापकोटाका अनुसार क्षतिको विवरण अझै सङ्कलन भइरहेको छ। त्यसैले बेपत्ता सवारीसाधन र व्यक्तिको संख्या थप बढ्न सक्ने उनले बताए।

महासङ्घका अध्यक्ष राजेन्द्र विक्रम बाँनियाले पनि प्राप्त विवरण प्रारम्भिक रहेको बताएका छन्। थप विवरण आएपछि त्यसलाई समेत समेटिने उनको भनाइ छ।

महासङ्घले बाढीबाट प्रभावित व्यवसायी तथा उनीहरूका परिवारलाई राहत, क्षतिपूर्ति र पुनःस्थापनाका लागि सरकारले आवश्यक पहल गर्नुपर्ने जनाएको छ।

भोटेकोशी बाढीबाट सार्वजनिक यातायात क्षेत्रमा भएको मानवीय तथा भौतिक क्षतिको मूल्याङ्कन गर्न यातायात व्यवस्था विभागले समिति गठन गरेको छ।

विभागका अनुसार पूर्वाधार विकासमन्त्रीको अध्यक्षतामा भदौ २६ गते भएको बैठकको निर्णयअनुसार समिति गठन गरिएको हो। समितिले क्षतिको मूल्याङ्कन, क्षतिपूर्तिको आधार र अन्य आवश्यक विषयमा राय–सुझावसहित प्रतिवेदन तयार गर्नेछ।

विभागले क्षतिको विवरण पठाउँदा संस्थाको पहिचान खुलाउन र सम्भव भएसम्म तथ्याङ्कको स्रोतसमेत उल्लेख गर्न आग्रह गरेको थियो।

महासङ्घले सोही आधारमा आफ्ना सदस्य संस्था तथा समितिबाट विवरण सङ्कलन गरी विभागमा बुझाएको जनाएको छ।

काठमाडौं । निरन्तर वर्षा र पहिरोको जोखिम बढेपछि पृथ्वी राजमार्गको चितवन र धादिङ खण्डमा आज राति सवारी आवागमन रोकिएको छ।

नारायणगढ–मुग्लिन सडकखण्डमा समेत रातिको समयमा सवारी सञ्चालनमा रोक लगाइएको छ।

चितवनका प्रमुख जिल्ला अधिकारी गणेश अर्यालका अनुसार साँझ ८ बजेदेखि भोलिपल्ट बिहान ५ बजेसम्म चितवनतर्फको पृथ्वी राजमार्ग र नारायणगढ–मुग्लिन सडकखण्डमा सवारीसाधन सञ्चालन गर्न रोक लगाइएको हो।

निरन्तर वर्षा भइरहेकाले पहिरोको जोखिम उच्च रहेको भन्दै यात्रुको सुरक्षाका लागि रातिको आवागमन रोकिएको प्रशासनले जनाएको छ।

बिहान सडकको अवस्था हेरेर सवारी सञ्चालनबारे थप निर्णय गरिनेछ। अवस्था प्रतिकूल रहेमा बिहान ५ बजेपछि पनि आवागमन रोक्न सकिने प्रमुख जिल्ला अधिकारी अर्यालले बताएका छन्।

उनका अनुसार रातभर पहिरो खसेको वा वर्षा नरोकिएको अवस्थामा थप सूचना जारी गरेर सवारी सञ्चालनबारे जानकारी दिइनेछ।

धादिङ प्रशासनले पनि वर्षाका कारण सडक तथा राजमार्गमा जोखिम बढ्न सक्ने भन्दै यात्रु र सवारी चालकलाई सतर्क रहन आग्रह गरेको छ।

धादिङका प्रमुख जिल्ला अधिकारी लक्ष्मी पाण्डेय (गौतम)ले जारी गरेको सूचनामा मौसम र सडकको अवस्था बुझेर मात्रै यात्रा गर्न भनिएको छ।

जोखिमयुक्त स्थानमा नजान र सम्बन्धित निकायबाट जारी हुने सुरक्षा निर्देशन पालना गर्न प्रशासनले आग्रह गरेको छ।

काठमाडौं । असोज ९ देखि ११ गतेसम्म लुम्बिनी प्रदेशमा भारीदेखि अति भारी वर्षा हुने पूर्वानुमानपछि प्रदेश सरकारले विपद् प्रतिकार्यको तयारी तीव्र बनाएको छ। सम्भावित बाढी, पहिरो, डुबान र गेग्रान बहावको जोखिमलाई ध्यानमा राख्दै प्रदेशदेखि स्थानीय तहसम्मका संयन्त्रलाई उच्च सतर्क अवस्थामा राखिएको छ।

लुम्बिनी प्रदेश सरकारको आन्तरिक मामिला, कानुन तथा यातायात मन्त्रालयले प्रदेशका केही स्थानमा मेघगर्जन, चट्याङ र हावाहुरीसहित भारीदेखि धेरै भारी वर्षा हुनसक्ने जनाएको छ। एक–दुई स्थानमा अति भारी वर्षाको सम्भावना रहेको मन्त्रालयको पूर्वानुमान छ।

वर्षाका कारण नदी तथा खोलामा बाढी आउन सक्ने, पहाडी क्षेत्रमा पहिरो तथा गेग्रान बहाव हुन सक्ने र तराई तथा सहरी क्षेत्रमा डुबानको जोखिम बढ्न सक्ने मन्त्रालयले जनाएको छ।

सम्भावित जोखिमलाई ध्यानमा राख्दै प्रदेश सरकारले लुम्बिनीका १२ वटै जिल्ला र १०९ स्थानीय तहलाई पूर्वतयारीका लागि पत्राचार गरेको छ।

मन्त्रालयका निमित्त सचिव सुरेशचन्द्र आचार्यले विपद्पूर्व, विपद्का समयमा र विपद्पछि गर्नुपर्ने कामलाई ध्यानमा राखेर तयारी अघि बढाइएको बताए।

‘प्रदेशका १२ जिल्ला र १०९ स्थानीय तहलाई नै पत्राचार गरेर सतर्कताका सबैखाले उपाय अपनाउन अनुरोध गरेका छौँ,’ उनले भने, ‘विपद्पूर्व, विपद्का समयमा र विपद्पश्चात् गरिने सबैखाले कामलाई ध्यानमा राख्दै उच्च सतर्कता अपनाएका छौँ।’

जिल्ला प्रशासन कार्यालयहरूले पनि स्थानीय जोखिमअनुसार छुट्टाछुट्टै तयारी थालेका छन्। सुरक्षा निकायलाई तयारी अवस्थामा राख्नुका साथै जोखिमयुक्त क्षेत्र पहिचान र सम्भावित उद्धार तथा राहतका लागि आवश्यक व्यवस्थापन भइरहेको छ।

नवलपरासी जिल्ला प्रशासन कार्यालयले नदी तथा तटीय क्षेत्रमा बसोबास गर्ने नागरिकलाई विशेष सतर्कता अपनाउन आग्रह गरेको छ।

स्थानीय तहलाई पानी थुनिन सक्ने नाली तथा स्थान सफा राख्न र सम्भावित डुबानबाट बच्न आवश्यक पूर्वतयारी गर्न भनिएको छ।

धानलगायत बाली भित्र्याउने समय भएकाले सम्भव भएसम्म बाली काटेर सुरक्षित स्थानमा राख्नसमेत प्रशासनले अनुरोध गरेको छ।

भारीदेखि अति भारी वर्षाको सम्भावनालाई ध्यानमा राख्दै दाङमा रातिको समयमा पाँच सडकखण्डमा सवारी आवागमन बन्द गरिने भएको छ।

जिल्ला प्रशासन कार्यालय दाङका अनुसार असोज ८ गतेदेखि लागू हुने गरी हरेक दिन बेलुका ५ बजेदेखि बिहान ६ बजेसम्म ती सडकखण्डमा आवागमन रोक लगाइनेछ।

बाढी, पहिरो, भूक्षय र सडक अवरुद्ध हुनसक्ने जोखिमका कारण यात्रुको सुरक्षा तथा सम्भावित दुर्घटना न्यूनीकरणका लागि यस्तो निर्णय गरिएको प्रशासनले जनाएको छ।

रातिको समयमा बन्द हुने सडकखण्डमा:

• राप्ती राजमार्गअन्तर्गत तुलसीपुर–कपुरकोट
• भालुवाङ–चकचके सडकखण्डको भालुवाङ–गनाहा खोला
• सहिद मार्गअन्तर्गत घोराही–होलेरी
• घोराही–मुर्कुटी
• तुलसीपुर–सुर्खेत सडकखण्डअन्तर्गत तुलसीपुर–कालीमाटी

प्रशासनले यात्रुलाई तोकिएको समयअघि नै यात्रा व्यवस्थापन गर्न आग्रह गरेको छ। मौसम तथा सडकको अवस्थाअनुसार थप निर्णय लिन सकिने पनि जनाएको छ।

दाङमा बाढी, पहिरो, डुबान र कटानको सम्भावित जोखिमलाई ध्यानमा राख्दै सुरक्षा निकाय, स्थानीय तह र सम्बन्धित निकायलाई तयारी अवस्थामा राखिएको छ।

प्रमुख जिल्ला अधिकारी निश्चलराज पाण्डेका अनुसार राप्ती, बबईलगायत जोखिमयुक्त क्षेत्र पहिचान गरेर आवश्यक सतर्कता अपनाइएको छ।

प्रशासनले अत्यावश्यक कामबाहेक टाढाको यात्रा नगर्न र रातिको समयमा यात्रा नगर्न आग्रह गरेको छ। जोखिममा रहेका महिला, बालबालिका, ज्येष्ठ नागरिक तथा अपाङ्गता भएका व्यक्तिको सुरक्षामा विशेष ध्यान दिन पनि भनिएको छ।

भारी वर्षासँगै बाढी र डुबानको जोखिम बढेपछि लुम्बिनी प्रदेशका केही स्थानीय तहले शैक्षिक संस्था बन्द गर्ने निर्णय गरेका छन्।

बुटवल उपमहानगरपालिका, अर्घाखाँचीको सन्धिखर्क नगरपालिका तथा कपिलवस्तुका महाराजगन्ज र बुद्धभूमि नगरपालिकाले सम्भावित जोखिमलाई ध्यानमा राख्दै दुई दिनका लागि शैक्षिक संस्था बन्द गर्ने निर्णय गरेका हुन्।

विद्यार्थीको आवतजावतमा जोखिम हुनसक्ने र सम्भावित विपद्बाट बालबालिकालाई जोगाउन पठनपाठन स्थगित गरिएको स्थानीय तहहरूले जनाएका छन्।

प्रदेश सरकारले सम्भावित विपद्बाट जनधनको क्षति कम गर्न सुरक्षा निकाय, जिल्ला प्रशासन, स्थानीय तह र अन्य सरोकारवाला निकायलाई समन्वयमा काम गर्न निर्देशन दिएको छ।

नागरिकलाई नदी तथा खोला किनार, पहिरोको जोखिम भएका भिरालो क्षेत्र र डुबान हुनसक्ने स्थानमा अनावश्यक रूपमा नजान आग्रह गरिएको छ।

तीन दिनसम्म भारीदेखि अति भारी वर्षाको सम्भावना रहेकाले मौसमको सूचना नियमित रूपमा लिन, जोखिम बढेमा सुरक्षित स्थानतर्फ जान र स्थानीय प्रशासनले जारी गरेका सुरक्षा सूचनाको पालना गर्न आग्रह गरिएको छ।

काठमाडाैं । काभ्रेपलाञ्चोकका चार स्थानीय तहले २ दिन सबै विद्यालय बन्द गर्ने निर्णय गरेका छन्।

बनेपा नगरपालिका, बेथानचोक, मण्डनदेउपुर र रोशी गाउँपालिकाले आफ्नो क्षेत्रका सबै विद्यालय बन्द गर्ने निर्णय गरेका हुन्।

धुलिखेल, पनौती, खानिखोला, तेमाल, नमोबुद्ध, पाँचखाल र चौँरीदेउरालीमा भने जोखिमयुक्त विद्यालयलाई आवश्यकताअनुसार बन्द गर्न सक्ने अधिकार सम्बन्धित विद्यालय व्यवस्थापन समितिलाई दिइएको शिक्षा विकास तथा समन्वय इकाई काभ्रेका प्रमुख सविता दंगालले जानकारी दिइन्।

त्यस्तै, सामुदायिक विद्यालयको हकमा स्थानीय तहले जोखिमको अवस्था मुल्यांकन गरी विद्यालय बन्द गर्न सक्ने व्यवस्था गरिएको छ।

साथै,  महाभारत र भुम्लु गाउँपालिकामा भने आज विद्यालय बन्द गरिएको छैन। मौसमको अवस्था हेरेर भोलिका लागि आवश्यक निर्णय गरिने जनाइएको छ।

सम्भावित बाढीपहिरोको जोखिमलाई मध्यनजर गर्दै काभ्रे प्याब्सनअन्तर्गतका संस्थागत विद्यालय पनि दुई दिन बन्द हुने भएका छन्।

निजी तथा आवासीय विद्यालय अर्गनाइजेसन नेपाल (प्याब्सन) काभ्रेपलाञ्चोकले असोज ८ र ९ गते विद्यालय बन्द गर्ने निर्णय गरेको हो।

प्याब्सन काभ्रेका अध्यक्ष श्याम भुजेलका अनुसार मौसम पूर्वानुमान र स्थानीय तहसँगको समन्वयमा संस्थागत विद्यालय बन्द गर्ने निर्णय गरिएको हो।

काठमाडौँ । गोरखाकी शिला परियारलाई समृद्धि ग्लोबल फाउन्डेसनले आर्थिक तथा खाद्यान्न सामग्री सहयोग गरेको छ । काठमाडौँको टोखा नगरपालिका-स्थित चण्डेश्वरी मन्दिर नजिकै बसेर ज्याला मजदुरी गर्दै जीविकोपार्जन गरिरहेकी उनलाई बुधवार बिहान मन्दिर परिसरमा खाद्यान्न तथा राहत सामग्रीसहित आर्थिक सहयोग हस्तान्तरण गरिएको हो ।

फाउन्डेसनका अध्यक्ष दिनेश थापा, सदस्य हरि थापा, कार्यकारी निर्देशक विवेक थापालगायतले परियारलाई संयुक्त रूपमा आर्थिक सहयोग तथा खाद्यान्न सामग्री हस्तान्तरण गरेका थिए ।

आर्थिक अवस्था कमजोर रहेकी परियारका श्रीमानसमेत अस्वस्थ रहेकाले उनका सानो बच्चाको कक्षा १० सम्मको शिक्षा-दीक्षाको जिम्मेवारीसमेत फाउन्डेसनले लिएको कार्यकारी निर्देशक विवेक थापाले बताए ।

बुधवार नै फाउन्डेसनको टोली परियारका छोरा अध्ययनरत चण्डेश्वरी माध्यमिक विद्यालय पुगेका थिए । उनीहरूले विद्यालयमा छोराको तीन हजार रुपैयाँ शुल्कसमेत तिरिदिएका छन् । साथै, घर खर्चका लागि थप पाँच हजार रुपैयाँ परियारलाई हस्तान्तरण गरिएको छ ।

फाउन्डेसनले यसअघि पनि परियारलाई खाद्यान्नसहित आर्थिक सहयोग गर्दै आएको थियो । पटक-पटक सहयोग गरेकोमा परियारले समृद्धि ग्लोबल फाउन्डेसनप्रति धन्यवाद ज्ञापन गरेकी छन् ।

फाउन्डेसनको सहयोगले आफूलाई धेरै राहत मिलेको बताउँदै उनले आगामी दिनमा पनि निरन्तर सहयोगको अपेक्षा रहेको बताइन् ।

समृद्धि ग्लोबल फाउन्डेसनले लामो समयदेखि सामाजिक क्षेत्रमा काम गर्दै आएको छ । केही दिनअघि फाउन्डेसनले रसुवाको बेत्रावती पुगेर भोटेकोसीका ३१ जना बाढीपीडित घरपरिवारलाई खाद्यान्न सामग्री वितरण गरेको थियो ।

त्यसअघि कोरोना महामारीको समयमा तथा २०७२ सालको भूकम्पबाट प्रभावितलाई समेत फाउन्डेसनले सहयोग गरेको थियो ।