Author: nepalone

काठमाडौं । राष्ट्रिय परिचयपत्र तथा पञ्जिकरण विभागको वेबसाइट ‘ह्याक’ भएको छ । वेबसाइट ह्याक भएको गृह मन्त्रालयका प्रवक्ता तथा सहसचिव आनन्द काफ्लेले पुष्टि गरेका छन् । ‘साइट ह्याक भएको छ । अहिले रिकभर गर्ने काम भइरहेको छ । डाटाहरु सुरक्षित रहेको भन्ने बुझिएको छ’ काफ्लेले सुनाए ।

अहिले उक्त साइट खुल्दैन । कसले कहाँबाट ह्याक गर्‍यो भन्ने अनुसन्धानकै क्रममा रहेको प्रवक्ता काफ्लेले बताए । सुरुमा विभागको वेबसाइट खोल्दा दुर्गा प्रसाईंलाई २४ घण्टाभित्र रिहा गर्न माग गरिएको सूचना देखिन्यो । अहिले भने त्यो देखिँदैन । हालै निर्वाचन आयोगले मतदाता नामावली संकलनको क्रममा राष्ट्रिय परिचयपत्रको विवरणसँग जोडिएको थियो । तर ह्याक भएको यो साइटमा भने राष्ट्रिय परिचयपत्रका कुनै पनि विवरणहरु नभएको कर्मचारीहरुले बताएका छन् । ‘यो नर्मल वेबसाइट हो यहाँ यहाँ रहेका सामान्य डकुमेन्टहरु भने सुरक्षित छन्’ विभागका एक कर्मचारीले भने ।

काठमाडौं । ‘राष्ट्र, राष्ट्रियता, धर्म, संस्कृति र नागरिक बचाऔं महाअभियान’ का संयोजक दुर्गा प्रसाईं सोमबार मध्यराति भक्तपुरस्थित आफ्नो निवासबाट पक्राउ परेपछि काठमाडौं उपत्यकाको सुरक्षा व्यवस्था कडा बनाइएको छ । प्रसाईंलाई सार्वजनिक शान्तिविरुद्धको कसुरमा मुद्दा दर्ता गरी म्याद लिने तयारी प्रहरीले अघि बढाएको छ ।

जिल्ला प्रहरी परिसर काठमाडौंका एसपी तथा प्रवक्ता पवनकुमार भट्टराईका अनुसार प्रसाईंले हालै दिएका अभिव्यक्तिहरूले सार्वजनिक शान्ति भंग हुने संकेत देखिएकाले त्यसै आधारमा अनुसन्धान प्रक्रिया अघि बढाइएको हो । ‘अभिव्यक्ति स्वतन्त्रताको नाममा दिनु भएका अभिव्यक्तिले सार्वजनिक शान्तिमा खलल पुर्‍याउने अवस्था देखियो’, उनले भने ।

प्रसाईंलाई काठमाडौं उपत्यका अपराध अनुसन्धान कार्यालय टेकु र जिल्ला प्रहरी परिसर काठमाडौंको संयुक्त टोलीले मध्यराति समन्वय गरेर पक्राउ गरेको हो । उनलाई हाल परिसरकै भद्रकालीस्थित हिरासतमा राखिएको छ । प्रसाईं पक्राउ परेसँगै उनका समर्थक तथा ‘नागरिक बचाउ दल’ सक्रिय हुन सक्ने आंकलन प्रहरीले गरेको छ । दलका महामन्त्री प्रेमकुमार थाम्सुहाङले पक्राउ लगत्तै आजै उपत्यकामा प्रदर्शन गर्न सक्ने चेतावनी दिएपछि सुरक्षा व्यवस्थालाई एकदमै कडा पारिएको हो ।

रानिपोखरीस्थित काठमाडौं उपत्यका प्रहरी कार्यालयले काठमाडौं, ललितपुर र भक्तपुर—तीनवटै जिल्ला प्रहरी परिसरलाई सडकदेखि संवेदनशील स्थानसम्म विशेष सतर्कता अपनाउन निर्देशन दिएको छ । त्यसअनुसार उपत्यकाका मुख्य चोक, सडक र प्रवेशद्वारमा सुरक्षाकर्मीको बाक्लो उपस्थिति देखिएको छ ।

प्रसाईंले यही मंसिर ७ गते देशव्यापी आन्दोलनको घोषणा गर्दै तयारी तीव्र पारेका थिए । तर आन्दोलन सुरू हुनु भन्दा अघि नै पक्राउ परेपछि अब आन्दोलन गर्ने भनी तय गरिएको योजनाको अवस्था अनिश्चित बनेको छ । प्रहरीले आजै अदालतमा पेश गरेर आवश्यक म्याद लिएर अनुसन्धान अघि बढाउने जनाएको छ । यस घटनाले उपत्यकाको सुरक्षा वातावरण तरङ्गित बनाएको छ भने प्रसाईंको टोलीले गर्ने भनिएको प्रदर्शनले अझै राजनीतिक वातावरण तनावपूर्ण बन्दै गएको देखिन्छ ।

जनकपुर । मधेश प्रदेशको राजनीति अहिले पटक तातिएको छ । नेकपा एमाले पनि ‘मुख्यमन्त्री सरोजकुमार यादवलाई काम गर्न देऊ’ भन्दै जनकपुरमा धर्नामा उत्रिएको छ । सात दलहरूले ‘अवैधानिक सरकार’ भन्दै प्रदेश सरकारको मुख्य ढोकामा नौं दिनदेखि घेराउ जारी राखेका छन् । प्रदेशको राजनीतिक टकराव अब सर्वोच्च अदालतको इजलासमा गाँसिएको छ, जहाँ आज पुनः सुनुवाइ हुँदैछ ।

आज (मंगलबार) जनकपुरको जनक मन्दिर परिसरमा एमालेका नेता–कार्यकर्ता धर्नामा बसेका छन् । उनीहरूको माग छ—मुख्यमन्त्रीलाई काम गर्न दिइयोस् र संविधानको रक्षा गरियोस् । सर्वोच्चले यसअघि दिएको अन्तरिम आदेशका कारण ‘सरकारलाई काम गर्न अवरोध पुगेको’ भन्दै एमाले कार्यकर्ता आक्रोश छन् । उता कांग्रेस, जसपा नेपाल, माओवादी केन्द्र, लोसपा, नेकपा (एस) लगायत सात दलहरूले जनकपुरस्थित मधेश भवनको मुख्य ढोकामै धर्ना कडाइका साथ निरन्तरता दिइरहेका छन् ।

उनीहरूको मुख्य आरोप–प्रदेश प्रमुखले एमाले सांसद सरोजकुमार यादवलाई होटलमै गएर मुख्यमन्त्री नियुक्ति गरे, बहुमत नपुगेको व्यक्तिलाई सरकार बनाइयो, सभामुखले दलीय अनुकूल निर्णय गर्दै संविधानको भावना तोडे । यसै आधारमा सात दलका ७४ सांसद सर्वोच्च अदालत पुगेका छन् र सरकार बदर गर्नुपर्ने माग दाबी गरेका छन् ।

मधेश प्रदेश सरकार गठनसम्बन्धी रिटको सुनुवाइ आज न्यायाधीश नहकुल सुवेदी र सुनिलकुमार पोखरेलको इजलासमा पहिलो नम्बरमै तोकिएको छ । गत सोमबार समयाभावका कारण पेसी रोकिए पनि आज दुवै पक्षको विस्तृत बहस हुने अपेक्षा छ । सर्वोच्चले यसअघि मुख्यमन्त्री नियुक्ति गर्दा प्रयोग गरिएको सम्पूर्ण फाइल पेश गर्न आदेश गरिसकेको छ, तर सुनुवाइ पटक–पटक सरेको थियो । मंगलबार सर्वोच्चले अन्तरिम आदेश जारी गर्दै मुख्यमन्त्री यादवलाई दीर्घकालीन निर्णय नगर्न भनेपछि विवाद झनै गहिरिएको छ ।
मधेश प्रदेशसभामा हाल कायम सदस्य संख्या १०४ छ । सरकार बनाउन आवश्यक बहुमत ५४ हो । तेस्रो विकल्प निस्कन कठिन देखिने अवस्थामै–एमाले २५ (सभामुखसहित), कांग्रेस २२, जसपा १९, जनमत १३, माओवादी ९, लोसपा ९, नेकपा (एस) ७, अन्य १–१ सांसद छन्।

यसमध्ये तीन सांसद (एमाले, जसपा र लोसपा) निलम्बनमा छन् । यही संख्यात्मक उल्झनकै बीच प्रदेश प्रमुखले एमालेका सरोजकुमार यादवलाई सरकार गठनको जिम्मा दिएपछि अहिलेको राजनीतिक विवाद सुरु भएको हो । एकातिर सत्तापक्ष ‘सरकारलाई काम गर्न नदिने शक्ति केन्द्र–विरुद्ध’ सडकमा छ भने, विपक्षी सात दलहरू ‘संवैधानिक उल्लंघनविरुद्ध’ मोर्चाबन्दीमा छन् । प्रदेशको मुख्य प्रशासनिक ढोका नै अवरुद्ध गरिएको अवस्थामा सामान्य प्रशासनिक काम समेत प्रभावित हुँदै गएको छ । सबैको नजर अब सर्वोच्च अदालतमा केन्द्रित छ—जहाँको निर्णयले मधेश प्रदेशको आगामी राजनीतिक अध्याय तय गर्नेछ ।

काठमाडौं । मुग्लिन–पोखरा सडक आजदेखि १० दिनसम्म दैनिक चारघण्टा बन्द हुने भएको छ । मुग्लिन–पोखरा राजमार्ग सुधार योजना अन्तर्गत पश्चिम खण्ड दैनिक चार घण्टा बन्द गरेर सडक स्तरोन्नती गर्न लागिएको सडक आयोजनाले जनाएको छ । यो सडक आजदेखि १० दिनसम्म दैनिक चार घण्टा पूर्ण तथा आंशिक रूपमा बन्द गर्न लागिएको हो ।

आजदेखि दैनिक बिहान छ बजेदेखि आठ बजेसम्म र मध्याह्न १२ बजेदेखि दुई बजेसम्म सडकमा सवारी साधन रोकेर निर्माणको काम गर्न लागिएको योजना प्रमुख कृष्ण बहादुर कुँवरले जानकारी दिए । हाल मुग्लिन–पोखरा सडक खण्ड अन्तर्गत तनहुँको जामुने बजारदेखि पोखराको सेती नदी पुलसम्मको सडकमा स्तरोन्नतिको काम भइरहेको छ ।

पोखराको विजयपुर पुलको ‘अपस्ट्रिम साइड’ मा दुई लेनको ‘प्रिकास्ट’ र ‘प्रिस्ट्रेस’ प्रविधिको पुल निर्माणको लागि काम भइरहेको कुँवरले बताए । मूल सडक बन्द हुँदा दुई पाङ्ग्रे तथा साना सवारीसाधनले अर्घौचोक वा बुढी बजार चोकबाट बेल चौतारा हुँदै चाउथे भएर आवतजावत गर्न सक्नेछन् । ठूला सवारीसाधनको लागि भन् पावर हाउस चोकदेखि बौमारा हुँदै बिरौटा निस्किएर पोखरा आवतजावत गर्न पनि आयोजनाले अनुरोध गरेको छ ।
व्र गतिमा जारी छ । सोमबार साँझसम्म १२३ दल दर्ता भइसकेका छन् भने ३२ दलले प्रक्रिया पूरा गर्न बाँकी छ । आयोगले मंसिर १० गतेसम्म दर्ताका लागि समय तोकेको छ ।

काठमाडौं । नेपाली वाम राजनीति फेरि एकपछि अर्को नाम–विवादमा फसिरहेको छ । नेपाल कम्युनिष्ट पार्टी (नेकपा) का अध्यक्ष लोकनारायण सुवेदीले आफ्नो पार्टीको नाम नक्कल गरिएको भन्दै पुष्पकमल दाहाल ‘प्रचण्ड’ तथा माधवकुमार नेपाल नेतृत्वको नयाँ पार्टीविरुद्ध सर्वोच्च अदालत जाने चेतावनी दिएका छन् ।

सुवेदी नेतृत्वको नेपाल कम्युनिष्ट पार्टी पहिले नै निर्वाचन आयोगमा दर्ता भइसकेको छ । तर हालै १२ वाम दलको संयोजनमा बनेको नेपाली कम्युनिष्ट पार्टी नामक नयाँ दललाई पनि आयोगले दर्ता प्रमाणपत्र दिएपछि विवाद तीव्र बनेको हो । सुवेदीले आयोगलाई कात्तिक २६ गते नै नाम मिल्दोजुल्दो भएको उजुरी दिए पनि त्यसमा कुनै सुनुवाइ नगरी दर्ता मिलाइ दिएको दाबी गरेका छन् ।

उनका अनुसार ‘नेपाल’ र ‘नेपाली’ बीच ठूलो अर्थगत भिन्नता भए पनि दलको नाम–पहिचानमा यस्तो समानता कानुनी रूपमा स्वीकार्य नहुने तर्क गर्दै प्रचण्ड र नेपालको ‘बलमिच्याइँ’ विरुद्ध न्यायिक समाधान खोज्न बाध्य भएको बताएका छन् । ‘उजुरी टारेर आयोगले मेरो पार्टीकै नाम जस्तै अर्को दल दर्ता गरेको सुनेपछि अब अदालत नै जाने अर्को विकल्प छैन’, सुवेदीले बताए ।

उता, नयाँ दर्ता भएको नेपाली कम्युनिष्ट पार्टीका प्रतिनिधिहरू भने नाम समान नरहेको दाबीमा अडिग छन् । उनीहरूका अनुसार सुवेदीको दल नेपाल कम्युनिष्ट पार्टी हो भने आफ्नो दल नेपाली कम्युनिष्ट पार्टी भएको कारण दुवैको परिचय छुट्टै छ । छोटकरी नाममा सुवेदी पक्षले ‘सीपीएन’ प्रयोग गरेको र आफूहरूले ‘एनसीपी’ प्रयोग गर्ने भएकाले झन भ्रम हुन नसक्ने उनीहरूको तर्क छ ।

नाम विवादबारे आयोगका कार्यवाहक प्रमुख आयुक्त रामप्रसाद भण्डारीले कानुनविद् तथा भाषाविदहरूसँगको छलफलपछि दर्ता प्रक्रिया अघि बढाइएको बताए । ‘नेपाल र नेपाली बीच स्पष्ट अर्थगत भिन्नता हुने भएकाले दलहरूको नाम उस्तै ठहरिँदैन’, भण्डारीले स्पष्ट पारे । साथै, आयोगमा पहिले दर्ता भएको कम्युनिष्ट पार्टी अफ नेपाल र अहिले दर्ता भएको नेपाली कम्युनिष्ट पार्टीबीच पनि पहिचान फरक भएको बताइएको छ ।

यसअघि २०७५ साल जेठ ३ गते माओवादी केन्द्र र एमाले एकीकृत भएर बनेको नेपाल कम्युनिष्ट पार्टीको नामविरुद्ध ऋषि कट्टेलले सर्वोच्चमा मुद्दा हालेका थिए । सोही मुद्दामा सर्वोच्च अदालतले २०७७ फागुन २३ गते माओवादी–एमाले मिलेर बनाएको नयाँ नेकपा को नाम रद्द गरिदिएको थियो । अहिले फेरि उस्तै पात्र र उस्तै स्वरूपको नाम–विवाद सतहमा आएको छ ।

आगामी माघ ११ गते राष्ट्रिय सभा सदस्य र फागुन ११ गते प्रतिनिधि सभा सदस्यका लागि हुने निर्वाचनलाई लक्षित गर्दै दल दर्ता प्रक्रिया तीव्र गतिमा जारी छ । सोमबार साँझसम्म १२३ दल दर्ता भइसकेका छन् भने ३२ दलले प्रक्रिया पूरा गर्न बाँकी छ । आयोगले मंसिर १० गतेसम्म दर्ताका लागि समय तोकेको छ ।

काठमाडौँ । राष्ट्रियता र नागरिकका मुद्दा उठाउँदै आएका दुर्गा प्रसाईंलाई सोमबार राति भक्तपुरस्थित निवासबाट प्रहरीले नियन्त्रणमा लिएपछि उनको समर्थनमा रहेर सक्रिय ‘नागरिक बचाउ दल’ आजैदेखि देशव्यापी आन्दोलनमा उत्रिने भएको छ ।

मंसिर ७ गतेदेखि विरोध कार्यक्रम सुरु गर्ने पहिलेको योजना परिमार्जन गर्दै सरकारले प्रसाईलाई ‘अपहरण शैलीमा’ पक्राउ गरेको आरोप लगाउँदै दलले तत्काल संघर्ष थाल्ने घोषणा गरेको हो । महामन्त्री प्रेमकुमार थाम्सुहाङका अनुसार सरकारकै कदमले शान्ति भंग भएकाले अब आन्दोलन नटारिने बताए । आज पहिलो चरणमा जिल्लास्तरीय प्रशासन कार्यालयहरूमा ध्यानाकर्षणपत्र बुझाइने छ । उनीहरूले प्रसाईंको तत्काल तथा सम्मानपूर्वक रिहाइको माग गर्दै सरकारलाई सडकबाट चुनौती दिने चेतावनी दिएका छन् ।

यसैबीच, गृह मन्त्रालयले आइतबार राखेको सुरक्षा समिति बैठकमै प्रसाईंको अभिव्यक्तिले हिंसा र त्रास बढाउन सक्ने भन्दै आवश्यक कारबाहीबारे छलफल गरेको स्रोत बताउँछ । सुरक्षा निकाय प्रमुखहरूले हालैका उनका ‘बम विष्फोट सम्भावना र देश ठप्प पार्ने’ जस्ता वक्तव्यलाई संवेदनशील ठानी कडाइका साथ निगरानी र नियन्त्रण आवश्यक रहेको निष्कर्ष निकालेका थिए ।

प्रसाईंलाई पक्राउ परेसँगै काठमाडौँ उपत्यकामा सम्भावित विरोध गतिविधि रोक्न प्रहरी प्रशासन सतर्क बनेको छ । मातहतका युनिटहरूलाई रातिदेखि नै सर्कुलर जारी गरिएको बताइएको छ । पक्राउपछि उनलाई भद्रकालीस्थित जिल्ला प्रहरी परिसरमा राखिएको छ र आज सरकारी वकिलसँगको सल्लाहपछि म्याद थप प्रक्रिया अघि बढाइने तयारी छ ।

प्रसाईंले ७ मंसिरदेखि सुरु हुने भनिएको आन्दोलनका लागि २६ बुँदे मागसहित गृह मन्त्रालयमा ज्ञापन बुझाइका थिए । आन्दोलन शान्तिपूर्ण हुने दाबी गरे पनि निरन्तर ‘भड्काउ शैली’ को अभिव्यक्ति आएको भन्दै प्रहरीले मध्यराति उनलाई नियन्त्रणमा लिएको हो ।

काठमाडौं । प्रधानमन्त्री सुशीला कार्कीले सोमबार काठमाडौँ उपत्यकाका मेयरहरूलाई बालुवाटार बोलाएर समस्यामाथि खुला संवाद गरिरहँदा, सबैको ध्यान एकै कुरामा अडियो—उपत्यकाका सबै स्थानीय तहका प्रमुख उपस्थित थिए, तर काठमाडौँका मेयर बालेन्द्र शाह (बालेन) भने देखिएनन् ।

उपस्थित एक मेयरका अनुसार प्रधानमन्त्री कार्कीले छलफलको सुरुमै बालेनलाई लिएर गुनासो उठाइन्, ‘उनी किन आएनन् ?’ यति मात्र होइन, उनले बालेनको ‘भिन्न स्वभाव’ बारे टिप्पणी गर्दै भनिन्, ‘उसले हाम्रा कुरा सुन्दैन, आफ्नै कुरा मात्र भन्छ ।’

जेनजी आन्दोलनमा निर्णायक भूमिका खेलेका मेयर बालेनले ओली र लेखकलाई पक्राउ गर्न दबाब दिँदै आक्रामक रूपमा सरकारमाथि दबाव बढाइरहेका छन् । तर सरकारले भने चुनावको वातावरण बनाउन दलहरूसँग संवादमै ध्यान दिन थालेपछि बालेन असन्तुष्ट बनेको उनीहरूकै टीम भित्रबाट बताइन्छ ।

केही दिनअघि बालेन पक्षबाट गृहमन्त्री ओमप्रकाश अर्यालको राजीनामा मागिएको थियो । प्रधानमन्त्री कार्यालयले तत्कालै काउण्टर जवाफ दिंदै मन्त्री छनोट प्रधानमन्त्रीको अधिकार भएको स्पष्ट पार्‍यो । त्यसयता बालेन सरकारसँग ‘संवादविहीन’ अवस्थामा छन् ।

काठमाडौं, ललितपुर र भक्तपुरका सबै स्थानीय तहका प्रमुखहरूले बैठकमा चुनाव, सुरक्षा, फोहोर व्यवस्थापन, सडक निर्माणदेखि लिएर विद्युत् महसुलसम्मका समस्या राखे । प्रधानमन्त्री कार्कीले आफू निर्वाचनमा केन्द्रित रहेको बताउँदै ‘चुनाव मात्र गराऊ, अरु काम नगर भनिन्छ, तर तपाईहरूका समस्यामा जति सकिन्छ सहयोग गर्छु’ भनी प्रतिक्रिया दिइन् ।

काठमाडौँ महानगरका प्रमुख अनुपस्थित हुँदा फोहोर संकट, सडकबत्ती बक्यौता, काठमाडौंका विशिष्ट समस्याहरू उठ्नै नपाउने स्थिति बन्यो। उपस्थित मेयरहरूले भने संघीय सरकारले ३ करोडभन्दा कमका योजनाहरू कटौती गरेपछि विकास रोकिएको गुनासो पोख्दै, फोहोर–सडक–सुरक्षा तीनै क्षेत्रमा ‘बोल्ड डिसिजन’ गर्न प्रधानमन्त्रीलाई आग्रह गरे ।

समाजको बिग्रँदो अवस्था र युवामा बढ्दै गएको वितृष्णाबारे बोल्दै प्रधानमन्त्रीले गत ३०–३५ वर्षको एकलौटी शासनले आजको असन्तोष ल्याएको स्वीकार गरिन् । उनले भनिन्, ‘समाज भाँचिएपछि बनाउने हामी नै हौं । कोही आएर सपारिदिन्छ भन्ने भ्रम नपालौं ।’

उपत्यकाका ३ जिल्लाका सबै मेयर उपस्थित रहँदा काठमाडौँका मेयर बालेनको कुर्सी भने खाली रह्यो । मुलुकमा चुनावी सरकारको तयारी तीव्र बन्दै गर्दा बालेनको सरकारी संयन्त्रप्रति असन्तुष्टि र संवादविहीनता अब खुला राजनीतिक सन्देश जस्तै बनिरहेको छ । तर सबैको मनमा अहिले एउटै प्रश्न उठिरहेको छ–देश बनाउने भन्दै उठेका बालेन, आफैले बनाएको प्रधानमन्त्री भेट्न किन गएनन् ?

काठमाडौँ । प्रहरीले दुर्गा प्रसाईलाई मध्यराति पक्राउ गरेको छ । जिल्ला प्रहरी परिसर काठमाडौँ र काठमाडौँ उपत्यका अपराध अनुसन्धान कार्यालयको टोलीले भक्तपुरस्थित निवासबाटै प्रसाईंलाई पक्राउ गरेको हो । उनले हिंसा भड्किने अराजक गतिविधि गर्न अभिव्यक्ति दिएको भन्दै प्रहरीले पक्राउ गरेको हो ।

उनी परिसरकै हिरासतमा छन् ।हाल उनलाई जिल्ला प्रहरी परिसर, भद्रकालीको हिरासतमा राखिएको छ । प्रहरीले उनलाई कुन कसुरमा कारबाही प्रक्रिया अगाडि बढाउने भन्नेबारे भने टुंगो लगाइसकेको छैन । मंगलबार सरकारी वकिलसँग सल्लाह गरी उनलाई म्याद थपका लागि अदालत उपस्थित गराइने छ ।

यसअघि २०८१ चैत १५ को हिंसात्मक आन्दोलनपछि पक्राउ परेका प्रसाईं अदालतको आदेशमा छुटेका थिए । राजावादी गतिविधिमा संलग्न प्रसाईं बैंकबाट लिएको ऋण मिनाहा गरिदिनुपर्ने लगायत माग राख्दै आन्दोलनको तयारीमा थिए ।

उनले मंसिर ७ गतेबाट आन्दोलनको तयारी गरेका थिए । यसका लागि प्रसाईंले राष्ट्र, राष्ट्रियता, धर्म–संस्कृति र नागरिक बचाउ महाअभियानको ब्यानरमा राजनीतिक गतिविधि गर्दै आएका छन् । प्रहरीले काठमाडौँ उपत्यकामा उच्च सतर्कता अपनाउन सर्कुलर गरेको छ।

प्रसाईंका समर्थकले मंगलबार बिहानदेखि पक्राउको विरोधमा प्रदर्शन गर्नसक्ने अनुमान सुरक्षा सतर्कता अपनाउने तयारी गरेको हो । पछिल्लो समय उनले काठमाडौँ मेयर बालेन साहको घरमा आगो झोस्न, परिवारका सदस्यमाथि झम्टन निर्देशनात्मक अभिव्यक्ति दिएका थिए ।

हिजो दिउँसो मात्र प्रसाईंले सिहदरबार, सर्वोच्च अदालतमा कसरी आगो लाग्यो ? ७५ जनाको ज्यान कसरी गयो ? मल्ल होटल अगाडि गाडीभित्र बसेर क–कसको कुरा भएर प्रधानमन्त्री चुनियो ? बानेश्वरको कुन घरको छतमा बसेर जेनजी आन्दोलनको अप्रेशन गरिएको थियो ? भनेर विशेष भिडियो सार्वजनिक गरेका थिए । उनले प्रधानमन्त्री सुशीला कार्कीलाई जेनजी आन्दोलनको योजनाकार भएको समेत आरोप लगाएका थिए । उनले मंसिर ७ गतेबाट आन्दोलनको तयारी गरेका थिए ।

काठमाडौं । भ्रष्टाचार र अनियमितताविरुद्धको अभियानमा राष्ट्रिय सतर्कता केन्द्रलाई सक्रिय बनाइने भएको छ । प्रधानमन्त्री सुशीला कार्कीले आज केन्द्रका सचिव सरजुकुमार वैद्यसँग छलफल गरेकी छन् ।

त्यसक्रममा उनले जेनजी आन्दोलनको मूल माग नै भ्रष्टाचारविरुद्धको कारबाही भएकाले त्यसमा सतर्कता केन्द्रले प्रभावकारी रुपमा काम गर्नुपर्ने बताइन् । छलफलपछि उनले केन्द्रलाई चार बुँदे निर्देशन दिएकी छन् ।

प्रधानमन्त्रीको ४ बुँदे निर्देशन
– सार्वजनिक निकायहरुबाट हुने ढिलासुस्ती, अनियमितता, भ्रष्टाचार सम्बन्धमा प्राप्त उजुरीका सम्बन्धमा राष्ट्रिय सतर्कता केन्द्रको भूमिका थप प्रभावकारी बनाउनु पर्छ । भ्रष्टाचारपछिको दण्डात्मक उपायभन्दा भ्रष्टाचार हुनै नदिने वातावरण सिर्जना गर्नुपर्छ ।

– सार्वजनिक निकायहरुबाट प्रदान हुने सेवा प्रवाह प्रभावकारी तुल्याउन नियमन र अनुगमनलाई बढावा दिनुपर्छ। केन्द्रका निर्देशन पालना भए–नभएको पनि अनुगमन गर्नुहोस् ।

–विकास–निर्माणका योजनाहरुमा गुणस्तरीयता कायम गरी तोकिएको समय, लागत र गुणस्तरीय काम सम्पन्न गर्ने तथा प्राविधिक परीक्षणको जिम्मेवारीमा सतर्कता केन्द्रको ध्यान पुगेन। यसको लागि जनशक्ति र वित्तीय स्रोतको समेत प्रबन्ध गर्नुहोस् ।

–आम नागरिकलाई अनुभूति हुने गरी संस्थाको उपस्थिति र प्रभावकारिता देखाउनुहोस् ।

पोखरा । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले देशमा उत्पन्न राजनीतिक जटिलताबाट बाहिर निस्कन राजासहितको ‘सर्वपक्षीय सम्मेलन’ अपरिहार्य भएको बताएका छन् । सोमबार पोखरा नगर अधिवेशनको उद्घाटन सत्रमा राप्रपा अध्यक्ष लिङदेनले यस्तो बताएका हुन् ।

लिङदेनले राप्रपाले राष्ट्रिय पहिचान, आर्थिक स्थिरता र सुशासनलाई प्राथमिकतामा राख्दै स्थानीय तहदेखि केन्द्रसम्म जिम्मेवार विपक्षीको भूमिका निर्वाह गर्ने बताए । देश अहिले गहिरो अनिश्चयमा रहेको हुँदा राजा, जेनजी समूह र राजनीतिक दलहरू एउटै टेबुलमा बसेर राष्ट्रको हितका लागि साझा मार्गचित्र बनाउनुपर्ने आवाज राप्रपा नेताहरूले चर्को रूपमा उठाए ।

अहिले गठन भएको अन्तरिम सरकारलाई चेतावनी दिँदै राजा, जेनजी समूह र सबै राजनीतिक दलहरूलाई समेटेर सर्वदलीय सम्मेलन आयोजना गर्न लिङदेनले आग्रह गरे । उनका अनुसार, राज्य शक्तिहरूबीच आपसी अविश्वास बढ्दै गएको र राजनीतिक नेतृत्वबाट समाधान आउने आशा कमजोर बन्दै गएको अवस्थामा राष्ट्रलाई स्थायित्व दिने एक मात्र उपाय सबै पक्ष बीचको खुला संवाद र सहमति रहेको स्पष्ट पारे ।

काठमाडौं । नेकपा एमालेका नेता महेश बस्नेतले त्रिवि अन्तर्राष्ट्रिय क्रिकेट रङ्गशालाको उदघाटनलाई लिएर शहरी विकासमन्त्री कुलमान घिसिङमाथि कटाक्ष गरेका छन् । राष्ट्रिय युवा संघ नेपालले सोमबार आयोजना गरेको कार्यक्रममा बोल्दै बस्नेतले एमाले अध्यक्ष तथा पूर्व प्रधानमन्त्री केपी शर्मा ओलीको पहलमा निर्माण सुरु भएको रङ्गशाला घिसिङले ‘जुँगा मुसार्दै’ उदघाटन गरेको टिप्पणी गरे ।

बस्नेतका अनुसार ओली प्रधानमन्त्री बनेपछि पहिलो निर्णय नै क्रिकेट रंगशाला निर्माण गर्ने रहेको थियो । तीव्र गतिमा निर्माण अघि बढाए पनि निर्धारित समयभन्दा केही ढिलाइ भएको उनले स्वीकारे । तर रङ्गशाला निर्माण ‘ओलीको नेतृत्वमा सम्भव भएको’ भन्दै बस्नेतले उदघाटनको श्रेय घिसिङले लिन खोजेको आरोप लगाए ।

उनका अनुसार आइतबार सम्पन्न उदघाटन कार्यक्रममा क्रिकेट संघका पदाधिकारी—अध्यक्ष चतुरबहादुर चन्द र सचिव पारस खड्का समेत—नैतिक हिसाबले असहज हुनेगरी वक्तव्य दिन बाध्य भएका थिए । बस्नेतले भने, ‘सामाजिक सञ्जालमा आफूलाई ‘हिरो’ देखाउन चाहने कुलमानले ओलीले बनाइदिएको रङ्गशाला उदघाटन गर्दा व्यङ्ग्य नै उत्पन्न भयो ।’

बस्नेतले सोमबारदेखि सुरु भएको नेपाल प्रिमियर लिग (एनपीएल) नेपाल क्रिकेटको जगतमा ‘महत्वपूर्ण मोड’ भएको बताए । विगतमा कीर्तिपुरमा क्रिकेट हेर्न दर्शकले रुखको हाँगामा चढ्नुपर्ने बाध्यता अन्त्य भएर अब व्यवस्थित सुविधासहित खेल हेर्न पाउने अवस्था बनेको उनले उल्लेख गरे । उनले भने, ‘चार–पाँच वर्षअघि क्रिकेट हेर्न जाँदा कतिबेला हाँगो भाँचेला भन्ने चिन्ता हुन्थ्यो । अब त्यस्तो अव्यवस्था छैन, यसको श्रेय ओली ज्यूको निर्णयलाई जान्छ ।’

बस्नेतले केही साहित्यकारले ‘ओलीले सुरु गरेका काम सबै भत्काइदेऊ’ भन्दै व्यङ्ग्य कविता लेखेको उदाहरण समेत प्रस्तुत गरे । धरहरा पुनर्निर्माणदेखि रानीपोखरी, सुरुङमार्गलगायतका परियोजना ओलीकै कार्यकालमा अघि बढेको दाबी उनले दोहोर्‍याए । ओलीको राजनीतिक उचाइ कम गर्न विदेशी शक्तिहरूले लगानी गरेको आरोप पनि उनले राखे । कार्यक्रमभर बस्नेतले ओली नेतृत्वको विकासगत भूमिका दोहोर्‍याउँदै विभिन्न परियोजना ‘ओली सम्झनासँग जोडिने’ दाबी गरे ।