काठमाडौं । दीपकराज गिरी र दीपाश्री निरौलाको टिमले निर्माण गरिरहेको बहुप्रतीक्षित चलचित्र ‘छ माया छपक्कै २’ को छायांकन अन्तिम चरणमा पुगेको छ ।

निर्माण स्रोतका अनुसार करिब ५० दिनको सेड्युलसहित सुरु गरिएको छायांकनको ९० प्रतिशतभन्दा बढी काम सम्पन्न भइसकेको छ ।

आमा सरस्वती मुभिज र रोहित अधिकारी फिल्मको प्रस्तुति रहेको यो चलचित्रको निर्देशन दीपेन्द्र लामाले गरिरहेका छन् । सात वर्षअघि प्रदर्शन भएको सुपरहिट चलचित्र ‘छ माया छपक्कै’ को सिक्वेलका रूपमा निर्माण भइरहेको यस फिल्मप्रति दर्शकमाझ सुरुदेखि नै उत्सुकता देखिएको छ ।

निर्माण पक्षले हालसम्म कलाकारहरूको पूर्ण सूची सार्वजनिक नगरे पनि दीपकराज गिरी, केकी अधिकारी र सनिशा भट्टराईको नाम आधिकारिक रूपमा सार्वजनिक गरिसकेको छ । तर छायांकनस्थलबाट प्राप्त जानकारीअनुसार चलचित्रमा अन्य चर्चित कलाकारहरूको पनि महत्वपूर्ण भूमिका रहनेछ ।

स्रोतका अनुसार चलचित्रमा अभिनेता कार्म, रिहान गिरी तथा रविन्द्र झाको पनि अभिनय रहनेछ । कार्म र रविन्द्र झा नेपाली चलचित्र क्षेत्रमा स्थापित नाम हुन् भने रिहान गिरीले हालै चलचित्र ‘होस्टेल ३’ मार्फत चलचित्र क्षेत्रमा प्रवेश गरेका थिए । रिहानले ‘छ माया छपक्कै २’ को छायांकनस्थलमा खिचिएको भिडियो सामाजिक सञ्जाल इन्स्टाग्राममार्फत सार्वजनिक गरिसकेका छन्, जसले उनको सहभागितालाई थप बलियो संकेत दिएको छ ।

यद्यपि निर्माण पक्षले यी कलाकारहरूको सहभागिताबारे औपचारिक घोषणा भने अझै गरेको छैन । यसअघि पनि दीपकराज–दीपाश्रीको टिमले ‘छक्का पञ्जा ५’ मा केही कलाकारको नाम प्रदर्शन मिति नजिकिँदै जाँदा मात्र सार्वजनिक गरेको थियो । त्यसैले यसपटक पनि केही कलाकारलाई अन्तिम समयसम्म गोप्य राख्ने रणनीति अपनाइएको अनुमान गरिएको छ ।

सार्वजनिक गरिएका कलाकारबाहेक थप चर्चित अनुहारहरूको उपस्थितिले ‘छ माया छपक्कै २’ को कलाकार टोली झन् बलियो र आकर्षक बनेको देखिन्छ । पहिलो भागमा मुख्य भूमिकामा रहेका दीपकराज गिरी र केकी अधिकारी दोस्रो भागमा पनि दोहोरिएका छन् भने सनिशा भट्टराई नयाँ कलाकारका रूपमा भित्रिएकी छन् ।

यता पहिलो भागका प्रमुख कलाकार केदार घिमिरे र जितु नेपाल भने यस सिक्वेलमा नदेखिने बताइएको छ । उनीहरूको अनुपस्थितिमा नयाँ कलाकारहरूले कथालाई कसरी अगाडि बढाउँछन् भन्ने विषय पनि दर्शकका लागि चासोको विषय बनेको छ ।

निर्माण टिमका अनुसार चलचित्रले सामाजिक तथा राजनीतिक विषयवस्तुलाई मनोरञ्जनात्मक शैलीमा प्रस्तुत गर्नेछ । दीपकराज गिरी र दीपाश्री निरौलाको टिम सामाजिक यथार्थ र समसामयिक विषयलाई व्यंग्यात्मक शैलीमा पर्दामा उतार्न सफल मानिने भएकाले यस चलचित्रबाट पनि त्यस्तै अपेक्षा गरिएको छ ।

रोहित अधिकारी निर्माता रहेको ‘छ माया छपक्कै २’ आगामी दसैंको अवसर पारेर फूलपातीदेखि प्रदर्शनमा आउने तयारीमा छ । छायांकन अन्तिम चरणमा पुगेसँगै अब निर्माण पक्ष पोस्ट–प्रोडक्सनको काममा केन्द्रित हुने भएको छ ।

चलचित्रको प्रदर्शन मिति नजिकिँदै जाँदा कलाकार, कथा र अन्य पक्षबारे थप जानकारी सार्वजनिक गरिने अपेक्षा गरिएको छ ।

काठमाडाैं। अमेरिकी युट्युबर जिमी डोनाल्डसन, जसलाई मिस्टर बिस्ट भनेर चिनिन्छ, युट्युब इतिहासमै पहिलो पटक ५० करोड (५०० मिलियन) सब्सक्राइबर पुग्ने क्रिएटर बनेका छन्। शुक्रबार उनले यो ऐतिहासिक आँकडा पार गर्दै विश्वकै सबैभन्दा धेरै सब्सक्राइबर भएको युट्युबरको कीर्तिमान कायम गरेका हुन्।

मिस्टर बिस्ट सन् २०२२ नोभेम्बरमै सबैभन्दा धेरै सब्सक्राइबर भएका व्यक्तिगत क्रिएटर बनेका थिए भने २०२४ जुनमा उनी युट्युबको सबैभन्दा ठूलो च्यानलको रूपमा स्थापित भएका थिए। उनका लोकप्रिय भिडियोहरूमा ‘स्क्विड गेम इन रियल लाइफ’ जस्ता ठूला प्रोजेक्टहरू छन्, जसले अर्बौँ भ्युज नजिक पुगेर ठूलो चर्चा बटुलेका छन्। साथै, ‘५० युट्युबरबिच १० लाख डलरको प्रतिस्पर्धा’ जस्ता भव्य भिडियोहरूले उनको कन्टेन्टलाई नयाँ स्तरमा पुर्‍याएका छन्।

५० करोड सब्सक्राइबर नजिकिँदै गर्दा उनले लाइभ स्ट्रिम समेत गरेका थिए, जसमा ६ लाखभन्दा बढी दर्शकले प्रत्यक्ष हेरेका थिए। उक्त ऐतिहासिक क्षणमा उनका फ्यानहरूले रमाइलो गर्दै अनसब्सक्राइब र फेरि सब्सक्राइब गरेर उत्सव मनाएका थिए।

लक्ष्य पूरा भएपछि भावुक बनेका मिस्टर बिस्टले आफ्नो संघर्षपूर्ण विगत स्मरण गरेका छन्। सन् २००८ को आर्थिक संकटमा आफ्नो परिवारले कठिनाइ भोगेको र सुरुवाती दिनमा युट्युबबाट आएको सानो आम्दानी (एडसेन्स) बचाएर उपकरण किन्ने गरेको उनले बताए। उनले कुनै क्षेत्रमा निपुण हुन हजार होइन, लाखौँ घण्टाको अभ्यास आवश्यक हुने भन्दै आफूले ६०–७० हजार घण्टाभन्दा बढी समय भिडियो निर्माणमा खर्च गरेको दाबी पनि गरे। उनले युवाहरूलाई आफ्नो सपना पछ्याउन र निरन्तर मेहनत गर्न प्रेरित गरेका छन्।

उनले ५०० मिलियन सब्सक्राइबर विशेष भिडियो छिट्टै सार्वजनिक गर्ने घोषणा पनि गरेका छन्। भविष्यमा भिडियो निर्माणलाई अझ सिनेम्याटिक बनाउने, परोपकारी काम विस्तार गर्ने तथा आफ्नो ब्रान्ड ‘फिस्टेबल’ मार्फत व्यवसाय विस्तार गर्ने योजना रहेको उनले बताएका छन्।

मिस्टर बिस्टले परोपकारलाई आफ्नो प्रमुख मिसनका रूपमा अघि बढाएका छन्। यसअघिका अभियानहरू ह्याजट्याग टिम ट्रीज, ह्याजट्याग टिमसिज  र ह्याजट्याग वाटर’ मार्फत उनले करोडौँ डलर संकलन गरी विश्वभर वृक्षरोपण, समुद्री सफाइ र स्वच्छ खानेपानी परियोजनामा योगदान गरेका छन्।

काठमाडाैं। काठमाडौं महानगरपालिकाले अन्तर्राष्ट्रिय स्तरको काठमाडौं फिल्म फेस्टिभल आयोजना गर्ने घोषणा गरेको छ। आइतबार आर्थिक वर्ष २०८३/०८४ को नीति तथा कार्यक्रम प्रस्तुत गर्दै कार्यवाहक नगरप्रमुख सुनिता डंगोलले यो जानकारी दिएकी हुन्।

उनका अनुसार विदेशी पाहुनासमेतलाई आमन्त्रण गरी फिल्म फेस्टिभललाई अन्तर्राष्ट्रियस्तरमा विकास गरिनेछ। महानगरपालिका युनेस्कोको चलचित्र सहरको रूपमा समेत मान्यता प्राप्त रहेको र हालै डंगोल फ्रान्सको कान्स फिल्म फेस्टिभलमा सहभागी भएको पनि उल्लेख गरिएको छ। साथै महानगरले टोल–टोलमा फिल्म कार्यक्रम सञ्चालन गर्ने योजना अघि सारेको छ।

नीति तथा कार्यक्रममा मौलिक तथा परम्परागत कला–संस्कृति, पाककला, भेषभूषा, शिल्प, जात्रा–पर्व, साहित्य–संगीत तथा प्राकृतिक सम्पदालाई चलचित्रमार्फत उजागर गर्दै रचनात्मक उद्योगका रूपमा विकास गर्ने लक्ष्य राखिएको छ। यसअन्तर्गत फिल्म महोत्सव, खाना महोत्सव, एक्स्पो र विभिन्न प्रदर्शनीहरू सञ्चालन गरिने जनाइएको छ।

महानगरले निर्माण गरेको ‘येँ देय् सांस्कृतिक छेँ’ सञ्चालनमा ल्याइने र काठमाडौंलाई सांस्कृतिक सहरका रूपमा विकसित गर्दै “खुला तथा जीवन्त सङ्ग्रहालय” बनाउने परिकल्पना अघि सारिएको छ।

ऐतिहासिक, धार्मिक र सांस्कृतिक महत्व बोकेका मठ–मन्दिर, पोखरी, गुम्बा, स्तूपा, चोक तथा अन्य सम्पदा स्थलहरूको संरक्षण, डिजिटल अभिलेखीकरण, नक्सांकन र पुनर्निर्माण गरिने नीति पनि समावेश गरिएको छ।

त्यस्तै, परम्परागत सीप र ज्ञानको जगेर्ना गर्दै सम्पदा बस्ती संरक्षण, होमस्टे प्रवर्द्धन तथा जात्रा–संस्कृतिलाई युनेस्कोको अभौतिक सांस्कृतिक सम्पदामा सूचीकृत गर्न पहल गरिने उल्लेख छ।

इन्द्रजात्रा लगायतका ऐतिहासिक जात्रामा सम्पदामैत्री भवन डिजाइनलाई प्रोत्साहन गर्ने र प्रमुख देवगणका लागि आवश्यक आवास व्यवस्था मिलाउने योजना पनि नीति तथा कार्यक्रममा समेटिएको छ।

काठमाडौं।  बेइजिङ अन्तर्राष्ट्रिय चलचित्र महोत्सवअन्तर्गतको ‘तियानतान अवार्ड प्यानोरामा’ कार्यक्रम काठमाडौंमा सफलतापूर्वक सम्पन्न भएको छ। तीन दिनसम्म चलेको यस कार्यक्रममा बेइजिङ अन्तर्राष्ट्रिय चलचित्र महोत्सवमा उत्कृष्ट ठहरिएका तथा प्रतिस्पर्धामा सहभागी भएका ६ चिनियाँ चलचित्र प्रदर्शन गरिएको थियो।

ठमेलस्थित छाया सेन्टरमा आयोजित महोत्सव चीन चलचित्र प्रशासन र बेइजिङ अन्तर्राष्ट्रिय चलचित्र महोत्सव आयोजक समितिको सचिवालयले नेपाल चलचित्र तथा सांस्कृतिक प्रतिष्ठानसँगको सहकार्यमा आयोजना गरेको थियो। कार्यक्रममा नेपालस्थित चिनियाँ सांस्कृतिक केन्द्र, काठमाडौँ विश्वविद्यालयको कन्फ्युशियस इन्स्टिच्युट तथा त्रिभुवन विश्वविद्यालयको कन्फ्युशियस इन्स्टिच्युटले पनि सहयोग गरेका थिए।

आयोजकका अनुसार तीन दिनमा सञ्चालन भएका ९ वटा शोमा करिब १ हजार ४ सय दर्शकले सहभागिता जनाएका थिए। प्रदर्शन गरिएका चलचित्रप्रति दर्शकको सकारात्मक प्रतिक्रिया प्राप्त भएको र यस्ता चिनियाँ फिल्महरू नेपालमा नियमित व्यावसायिक रूपमा प्रदर्शन हुनुपर्ने अपेक्षा समेत व्यक्त गरिएको छ।

नेपाल चलचित्र तथा सांस्कृतिक प्रतिष्ठानका अध्यक्ष केपी पाठकले कार्यक्रमले नेपाल र चीनबीचको चलचित्र आदानप्रदानलाई नयाँ उचाइमा पुर्‍याएको बताए। उनका अनुसार चिनियाँ चलचित्रहरू नेपाली बजारमा र नेपाली चलचित्रहरू चिनियाँ बजारमा प्रवेश गर्ने वातावरण निर्माण गर्न यस्ता कार्यक्रम महत्वपूर्ण माध्यम बन्न सक्छन्।

महोत्सवको उद्घाटन चलचित्र ‘ट्र्याप्ड’ प्रदर्शनअघि नेपालका लागि चिनियाँ दूतावासका डेपुटी चिफ अफ मिसन तथा मिनिस्टर काउन्सिलर चोउ पानले चलचित्रलाई भाषा र सीमाभन्दा माथि उठेर मानिसहरूलाई जोड्ने सार्वभौमिक माध्यमका रूपमा व्याख्या गरेका थिए। उनले चलचित्रले दुई देशबीचको सांस्कृतिक सम्बन्ध सुदृढ बनाउन महत्वपूर्ण भूमिका खेल्ने विश्वास व्यक्त गरे।

उद्घाटन कार्यक्रममा ‘ट्र्याप्ड’का निर्देशक सागर झाङ स्वयं उपस्थित भएर दर्शकसँग अन्तरक्रिया गरेका थिए। प्रश्नोत्तरका क्रममा उनले चलचित्रको विशिष्ट दृश्य शैली इटालियन वेस्टर्न सिनेमाबाट प्रभावित रहेको बताए। उक्त संवादले नेपाली र चिनियाँ चलचित्रकर्मीबीच अनुभव आदानप्रदानको अवसर प्रदान गरेको थियो।

महोत्सवमा प्रदर्शन भएका चलचित्रहरूले विभिन्न विषयवस्तु समेटेका थिए। ‘बियोन्ड द स्काइज’ले चिनियाँ गृहयुद्धकालीन साहसिक अभियानको कथा प्रस्तुत गरेको थियो भने ‘समर डायरी’ले मरुभूमिमा आमाको खोजीमा निस्किएका बालकको जीवनयात्रालाई चित्रण गरेको थियो।

त्यसैगरी ‘द स्याडोलेस टावर’ले जीवनका असफलतासँग संघर्षरत एक वृत्तचित्र निर्माताको कथा प्रस्तुत गरेको थियो भने ‘जर्नी टु द वेस्ट’ले एलियनको खोजीमा लागेका पत्रिका सम्पादकको रोचक यात्रालाई हास्य शैलीमा देखाएको थियो। सस्पेन्स र अपराध कथामा आधारित ‘लस्ट इन द स्टार्स’ले पनि दर्शकको विशेष ध्यान आकर्षित गरेको थियो।

आयोजकका अनुसार चिनियाँ चलचित्रहरूले पारिवारिक मूल्य, आस्था, प्रेम, संघर्ष र स्वतन्त्रताजस्ता साझा मानवीय भावनालाई विश्वभरका दर्शकमाझ पुर्‍याइरहेका छन्। आगामी दिनमा ‘तियानतान अवार्ड प्यानोरामा’ विश्वका अन्य सहरहरूमा पनि आयोजना गरिने र यसले चीन–नेपालबीचको सांस्कृतिक सम्बन्धलाई अझ मजबुत बनाउने अपेक्षा गरिएको छ।