Author: nepalone

जनकपुर । मधेसका मुख्यमन्त्री कृष्ण यादवले पदभार ग्रहण गरेका छन् । आइतबार नै पद तथा गोपनियताको शपथ ग्रहण गरेका मुख्यमन्त्री यादवले मुख्यमन्त्री कार्यालय पुगेर पदभार ग्रहण गरेका हुन् । पदभार ग्रहण गर्दै मुख्यमन्त्री यादवले चाँडै नै मन्त्रिमण्डल विस्तार गर्ने जानकारी दिए ।

उनले पहिलो दिनदेखि नै काम गर्ने उद्देश्यका साथ सरकारमा आएको बताउँदै सत्ता घटकका सबै दलबाट प्रतिनिधित्व हुने गरी चाँडै नै मन्त्रिमण्डल विस्तार गर्ने बताए । मुख्यमन्त्री यादवले प्रतिपक्षी दलहरुबाट समेत रचनात्मक सहयोग प्राप्त गर्ने अपेक्षा गरेका छन् । उनले सुशासन कायम गर्ने र प्रदेशबाट गर्नसक्ने कार्यहरु छिटो, छरितो गर्ने काममा आफू लाग्ने बताए । उनले मधेस प्रदेशमा अब स्थायित्व कायम हुने बताए ।

काठमाडौं । जेन–जी अभियन्ता मिराज ढुङ्गानाले प्रधानमन्त्री सुशीला कार्कीलाई जेन–जी आन्दोलनको अपमान नगर्न आग्रह गरेका छन् । जेन–जी अभियन्ता प्रकाश शर्मालाई रिहाइ गर्न माग गर्दै जिल्ला प्रहरी परिसर काठमाडौं पुगेका उनले यस्तो आग्रह गरेका हुन् । उनले निर्वाचनपछिको सरकारले देशको विकासका लागि ठोस काम गर्ने अपेक्षा आफूहरुले नगरेको पनि बताए । पुराना दलका नेताहरूको सरकारमा पुनः आगमन हुने सम्भावनाप्रति चिन्ता व्यक्त गरे । ढुङ्गानाले अन्तरिम सरकार देश विकासमा असफल भएको अवस्थामा प्रधानमन्त्री कार्कीले राजीनामा दिनुपर्ने माग गरे । अन्तरिम सरकार हाइज्याक भएको भन्दै जेन–जी युवाहरुको माग सम्बोधन नभएको ढुङ्गानाले बताए ।

उनले भने, ‘आगामी कार्यक्रम भनेको चाहीँ हामीले देश विकास होस्, आन्दोलन पछिको सरकारले नगरे अब आउनेवाला निर्वाचित सरकारले गर्छ, ती पुराना शक्तिहरु अथवा पात्रहरुले गर्छन् भन्ने त आश नै गर्न सकिँदैन । किनभने हामीले त बारम्बार विश्वास गरिरहेको हो । आन्दोलनको सरकारले पनि यदि विकास गर्न सक्दैन भने केहीले गर्न सक्दैन त्यही भएर आन्दोलनको बेइज्जत नगरिदिनुहोस् प्रधानमन्त्री ज्यु, तपाईं बरु सक्नु हुन्न भने राजीनामा दिनुहोस् । बाँकी काम हामी सबै मिलेर गोलमेच भनौं न एउटा चाहीँ अन्तरक्रिया गरेर त्यसपछि गरौँला तपाई सक्नुहुदैन भने छाडिदिनुहोस् ।’

जेन–जी युवा प्रकाश शर्माले पनि पछिल्लो समय आन्दोलनको माग सम्बोधन नगरेको भन्दै प्रधानमन्त्री र गृहमन्त्रीको राजीनामाको माग गर्दै पर्चा टाँस्ने कार्यमा सहभागी भएको बताए । उनले शनिवार बेलुका पक्राउ परेको अनुभव साझा गर्दै अन्तरिम सरकार जेन–जी आन्दोलनको आधारमा बनेको भए पनि आफूहरुको माग सम्बोधन नगरेको बताए । भदौ २३ गतेको आन्दोलमा भएको घटनाको छानबिन नगरी २४ गतेको आन्दोलनमा सहभागी भएका युवाहरुलाई मात्र प्रहरीले पक्राउ गरेको उनले बताए ।

काठमाडौं । नलिनचोक हेलिपोर्ट निर्माणमा घोटाला गरेको अभियोगमा भ्रष्टाचार मुद्दा चलाइएका नागरिक उड्डयन प्राधिकरणका महानिर्देशक प्रदीप अधिकारी र पूर्व निर्देशक मुरारी भण्डारीविरुद्ध थुनछेक बहस शुरु भएको छ । विशेष अदालतका न्यायाधीशहरू विदुर कोइराला, हेमन्त रावल र डिल्लीराज श्रेष्ठको संयुक्त इजलासमा अहिले सुनुवाइ चलिरहेको छ । शुक्रबार न्यायाधीश नारायणप्रसाद पौडेलले हेर्न नमिल्नेमा राख्दै प्रतिवादीहरूलाई आज अदालतमा उपस्थित गराउन आदेश दिएका थिए ।

त्यसपछि आज फेरि अधिकारी र भण्डारीलाई अदालत उपस्थित गराई थुनछेक बहस सुरु गरिएको हो । अधिकारीसहितले सम्झौताबमोजिम विस्तृत अध्ययन प्रतिवेदन पेसै नगरी र अन्य प्रक्रिया पनि पूरा नगरी हेलिपोर्ट निर्माणमा भ्रष्टाचार गरेको निष्कर्ष अख्तियारको छ । अधिकारी र भण्डारीलाई गत बुधबार अख्तियार दुरुपयोग अनुसन्धान आयोगले नियन्त्रणमा लिएको थियो ।

अख्तियारले बुधबार अधिकारी र भण्डारीसहित ७ जनाविरुद्ध विशेष अदालतमा भ्रष्टाचार मुद्दा दायर गरेको हो । आरोप पत्रमा नेपाल नागरिक उड्डयन प्राधिकरणका महानिर्देशक अधिकारी, तत्कालीन निर्देशक मुरारी भण्डारी, तत्कालीन उपप्रबन्धक हालका प्रबन्धक विक्रम थापा, तत्कालीन वरिष्ठ अधिकृत तथा हालका उपप्रबन्धक सम्वृद्धि श्रेष्ठ, परामर्शदाता गुरुदत्त अधिकारी, अभियन्त्र कन्सल्टिङ प्रालि तथा उक्त कम्पनीका तत्कालीन सञ्चालक विजय थापालाई प्रतिबादी बनाइएको छ । ४ जना फरार छन् । उनीहरू सबैलाई १३ करोड ५७ लाख ४६ हजार २१३ रुपैयाँ ७७ पैसा बराबर रकम सामुहिक बिगो कायम गरिएको छ ।

काठमाडौं । बर्दियाको बढैयाताल–४ कि एक युवतीले नागरिकता नपाएपछि आत्महत्याको बाटो रोजेको भनिएको विषय छानबिन गर्न समिति गठन भएको छ । गृह मन्त्रायलले घटनाको सत्यतथ्य छानबिन गर्न मन्त्रालयका सहसचिव तथा नीति, योजना अनुगमन तथा मूल्यांकन महाशाखा प्रमुख सुरेश पन्थीको संयोजकत्वमा छानविन समिति गठन गरेको हो ।

गृहमन्त्री ओमप्रकाश अर्याललाई हिजो प्रधानमन्त्रीले घटनाको यथार्थ छानबिन गर्न निर्देशन दिएकी थिइन् । आइतबार सचिवस्तरीय निर्णय गर्दै, सहसचिव पन्थीको संयोजकत्वमा मन्त्रालयकै उपसचिव कुलशेखर अर्याल र एक जना सदस्य रहने गरी घटनाको छानबिन समिति बनाइएको हो । समितिलाई घटनाको निष्पक्ष र सत्यतथ्य रूपमा जाँचबुझ गरी पाँच दिनभित्र प्रतिवेदन पेश गर्ने गरी समितिलाई आदेश दिइएको छ ।

काठमाडौं । पूर्व राष्ट्रपति विद्यादेवी भण्डारी आज (आइतबार) सिंहदरबार अवलोकनका लागि जाने भएकी छिन् । गत भदौ २३ र २४ गतेको जेनजी आन्दोलनका बेला सिंहदरबारमा आगजनी गरिएको थियो । भण्डारी आज दिउँसो २ बजेपछि आगजनीमा परेको सिंहदरबार परिसरको अवलोकनमा जान लागेको उनी निकटस्थहरूले जानकारी गराएका छन् ।

सो क्रममा उनले प्रधानमन्त्री सुशीला कार्कीसँग पनि भेटवार्ता गर्ने कार्यतालिका तय भएको छ । ‘सिंहदरबारमा आगजनीपछि क्षति भएका भवनहरूको अवलोनका लागि जान लाग्नु भएको हो,’ उनी निकट स्रोतले भन्यो, ‘सो क्रममा प्रधानमन्त्री कार्कीसँग पनि भेट्ने कार्यतालिका तय भएको छ ।’

काठमाडौं । केहि समयअघिसम्म काठमाडौंका मेयर बालेन (बालेन्द्र) शाहमाथि लगातार खनिंदै आएका धरान उपमहानगरपालिकाका मेयर तथा श्रम संस्कृति पार्टीका अध्यक्ष हर्क साम्पाङ राई पछिल्लो समय ऊर्जामन्त्री कुलमान घिसिङमाथि निरन्तर प्रहारमा उत्रिएका छन् । आउँदो चुनावमा आफ्नो पार्टीलाई बहुमत ल्याउन नदिन देशी–विदेशी तत्वले कुलमानलाई प्रयोग गरेको उनको दाबी छ । केहि दिनअघि फेसबुक लाइभमा बोल्दै साम्पाङले नेपालमा काम गर्ने मान्छे सत्तामा नपुगुन् र देश दरिद्र भइराखोस् भनेर षडयन्त्र भइराखेको आरोप लगाएका छन् ।

त्यसका बाबजुद आफ्नो श्रम संस्कृति पार्टीले बहुमत ल्याएर छोड्ने उनको दावी छ । साम्पाङले घिसिङलाई चुनौती दिँदै भनेका छन्, ‘तपाई मविरुद्ध यसरी प्रयोग भइराख्नु भयो भने हाम्रो श्रम संस्कृति पार्टीले साइड लगाउँछ वा नाघेर जान्छ । त्यो हुनुभन्दा पहिले बचेखुचेको छविलाई बचाउनुस् र मन्त्रीको काममा केन्द्रित हुनुस् ।’ पछिल्ला दिनमा विभिन्न अन्तर्वार्ता र सामाजिक सञ्जालमार्फत साम्पाङले कुलमानको भूमिकाप्रति शंका व्यक्त गर्दै आफूले देखेका ‘रहस्यमय गतिविधि’ बारे खुलेर टिप्पणी र संगीन आरोप लगाएका छन् ।

एक अन्तर्वार्तामा साम्पाङले कुलमान घिसिङलाई कुनै शक्ति वा समूहबाट ‘परिचालित गरेको’ आभास मिलिरहेको बताएका छन् । उनले घिसिङको चरित्रलाई ‘मिस्टेरियस’ अर्थात् रहस्यमयको रूपमा चित्रण गर्दै यस्ता व्यक्तिहरू ‘खतरनाक हुन सक्छन्’ भनेका छन् । हालै घोषणा भएको उज्यालो नेपाल पार्टीमा कुलमानले आफूलाई मूल आधारको जस्तो देखाएको तर नामावलीमा उनको औपचारिक हैसियत नै नरहेको उल्लेख गर्दै साम्पाङले कटाक्ष गरेका थिए ।

उनले भनेका छन्, ‘पार्टीका कागजात हेर्दा उहाँ आधिकारिक रूपमा कतै पनि छैनन्, तर घोषणा कार्यक्रममै गएर आफू नै सबैथोक हो भन्ने शैलीमा प्रस्तुत हुनुभयो । यस्तो दोहोरो व्यवहारले उल्झन देखाउँछ ।’ उनले यस्तो अवस्थालाई भविष्यले पुष्टि गर्ने दाबी समेत गरेका छन् । घिसिङ ‘कसैबाट प्रयोगमा पर्न सक्ने’ सम्भावना समेत साम्पाङले औंल्याएका छन् । एमसीसी कार्यान्वयनमा कुलमानको भूमिका रहेको आरोप लगाउँदै, ‘यस्तो व्यक्तिबाट राष्ट्रिय हितको रक्षा हुने अपेक्षा गर्न कठिन’ भएको टिप्पणी पनि उनले गरेका छन् । उनले भनेका छन्, ‘कुलमान बोर्डिङ पास जस्तो हुन्-कुनै चरणमा आवश्यक तर अन्ततः औचित्यहीन ।’

साम्पाङले वर्तमान सरकार विदेशी शक्तिको समर्थनमा बनेको आफ्नो पुरानो टिप्पणी अहिले सही सावित हुँदै गएको दाबी समेत गरेका छन् । जेन–जेड पुस्तामै पनि निराशा बढेको दावी गर्दै उनले आफ्नो विश्लेषण ‘क्रमशः स्पष्ट हुँदै गएको’ बताएका छन् । श्रम संस्कृति पार्टी दर्तापछि संगठन विस्तार अभियानमा रमाइरहेका साम्पाङ देशका विभिन्न जिल्लामा सभाहरू गर्दैछन् । आफूलाई भावी प्रधानमन्त्रीको रूपमा प्रस्तुत गर्दै उनले जनमत निर्माणमा तीव्रता बढाएका छन् । यद्यपि, यी कार्यक्रमबीच उनले फेरि एक पटक ऊर्जामन्त्री कुलमानमाथि नयाँ आरोप जोडिदिए ।

फेसबुकमा लेख्दै साम्पाङले भनेका छन्, ‘आफू जहाँ–जहाँ सभाका लागि पुग्यो, त्यही–त्यही स्थानमा विद्युत् लाइन काटिएको छ । भोजपुर, ताप्लेजुङदेखि संखुवासभासम्म आफ्ना गतिविधि गर्दा पटक–पटक बत्ती नबलेको उल्लेख गर्दै उनले यसका लागि प्रत्यक्ष रूपमा घिसिङलाई दोष लगाए । ‘अब हेटौंडा जाँदैछु, त्यहाँ पनि काटिदिनु है’, भन्दै उनले व्यङ्ग्यात्मक शैलीमै कोपिला मारे । उनका यी अभिव्यक्तिले राष्ट्रिय राजनीति र ऊर्जा क्षेत्रमा फेरि एक पटक तरङ्ग पैदा गरेको छ । घिसिङले साम्पाङका आरोपबारे कुनै प्रतिक्रिया नदिए पनि, साम्पाङको निरन्तर टिप्पणीले दुईबीचको तिक्तता झनै सतहमा आएको देखिन्छ ।

हर्क साम्पाङका मन्त्री घिसिङमाथि मुख्य १० आरोप

–कुलमान घिसिङ कुनै शक्तिबाट ‘परिचालित’ छन् ।
–रहस्यमय (मिस्टेरियस) र दोहोरो चरित्रका व्यक्ति भएको आरोप ।
–उज्यालो नेपाल पार्टीमा औपचारिक जिम्मेवारी नभए पनि आफू नै सबैथोक हो भन्ने शैलीमा प्रस्तुत हुँदा भ्रम फैलाएको टिप्पणी ।
–कुलमानलाई कसैले प्रयोग गरिरहेको हुन सक्ने दाबी ।
–एमसीसी ल्याउन कुलमानको हात रहेको आरोप, जुन राष्ट्रियताको पक्षमा हुन नसक्ने दाबी ।
–राष्ट्रिय हितको रक्षा गर्न सक्षम छैनन् भन्ने ठोकुवा ।
–घोषणा सभामा आफ्नो हैसियतभन्दा बढी दाबी गर्दै जनता भ्रमित गरेको आरोप ।
–राजनीतिक रूपमा अनिश्चित, कन्फ्युज्ड व्यवहार देखाएको टिप्पणी ।
–ऊर्जामन्त्री पदको दुरुपयोग गरी आफू जहाँ जाँदा पनि त्यहींको ‘लाइन काटिदिएको’ आरोप ।
–आफ्नो राजनीतिक कार्यक्रममा विद्युत् अवरुद्ध गरेर ‘बाधा सिर्जना’ गरेको आरोप ।

जनकपुरधाम । मधेश प्रदेशका नव नियुक्त मुख्यमन्त्री कृष्णप्रसाद यादवले पद तथा गोपनीयताको शपथ लिएका छन् । उनलाई प्रदेश प्रमुख सुरेन्द्र लाभ कर्णले शपथ खुवाएका हुन् । उनी यही मंसिर २४ गते विश्वासको मत लिने तयारीमा छन् । कांग्रेस संसदीय दलका नेता यादव यही मंसिर १९ गते ७ दलका ७७ प्रदेश सभा सदस्यहरुको समर्थनमा मुख्यमन्त्री नियुक्त भएका थिए । यादवलाई कांग्रेस, जसपा नेपाल, जनमत, तत्कालीन नेकपा माओवादी केन्द्र, लोसपा र तत्कालीन एकीकृत समाजवादीका सांसदहरुले समर्थन गरेका छन् ।

संविधानको धारा १६८ को उपधारा ३ बमोजिम ठूलो दलको हैसियतमा मुख्यमन्त्री बनेका नेकपा एमाले संसदीय दलका नेता सरोज कुमार यादवले मंसिर १७ गते राजीनामा दिएपछि मधेश सरकारको नेतृत्व कांग्रेस दलका नेता यादवको जिम्मेवारीमा आएको हो । गत कार्तिक २३ गते राति संविधानको धारा १६८ को ३ बमोजिम एमालेका यादव मुख्यमन्त्री नियुक्त हुँदा सातदलीय गठबन्धनले सर्वोच्च अदालतमा रिट दायर गरेका थिए । सर्वोच्चले २४ घण्टाभित्र विश्वासको मत लिन र विश्वासको मत पाउन नसके संविधानको धारा १६८ को उपधारा २ बमोजिम नै अर्को सरकार गठन गर्न आदेश दिएको थियो ।

यस्तै मुख्यमन्त्री यादवले आजै तीन जना मन्त्री नियुक्त गरेका छन् । मुख्यमन्त्री यादवले नेपाली कांग्रेसका जंगीलाल राय, जनमतका महेश प्रसाद यादव र नेकपा एकीकृत समाजवादीका कनिस पटेललाई मन्त्री नियुक्त गरेका हुन् । जनमतका महेश प्रसाद यादवले अर्थ मन्त्रालयको जिम्मेवारी पाएका छन् । कांग्रेसका जंगीलाल राय र नेकपा एकीकृत समाजवादीका कनिस पटेलको मन्त्रालय भने तोकिएको छैन । नवनियुक्त मन्त्रीहरुलाई प्रदेश प्रमुख डा. सुरेन्द्र लाभ कर्णले पद तथा गोपनीयताको सपथ गराएका छन् ।

जनकपुरधाम । मधेस प्रदेशका नव नियुक्त मुख्यमन्त्री कृष्णप्रसाद यादवले आज (केहीबेरमा) पद तथा गोपनीयताको शपथ ग्रहण गर्दैछन् । मुख्यमन्त्रीको कार्यालयले आज शपथ ग्रहण समरोहका लागि मधेस भवनमा तयारी गरेको छ । कांग्रेस संसदीय दलका नेता यादव ७ दलका ७७ प्रदेश सभा सदस्यहरूको समर्थनमा यही मंसिर १९ गते मुख्यमन्त्री नियुक्त भएका थिए । उनले आजै सानो आकारको मन्त्रिमण्डल गठन गर्ने बताइए पनि दलहरूमा आन्तरिक तयारी नपुगेकाले मन्त्रिमण्डल गठन निश्चित छैन ।

संविधानको धारा १६८ को ३ बमोजिम ठूलो दलको हैसियतमा मुख्यमन्त्री बनेका नेकपा एमाले संसदीय दलका नेता सरोजकुमार यादवले मंसिर १७ गते राजीनामा दिएपछि धारा १६८ को उपधारा २ बमोजिम कांग्रेस दलका नेता यादव मुख्यमन्त्री नियुक्त भएका हुन् । यस्तै नव नियुक्त मुख्यमन्त्री यादवले मंसिर २४ गते विश्वासको मत लिने भएका छन् । आज बसेको सत्तापक्षीय सातदलीय गठबन्धनको बैठकले आगामी मंसिर २४ गते विश्वासको मत लिने निर्णय गरेको जसपाका प्रमुख सचेतक राम असिस यादवले जानकारी दिएका छन् ।

काठमाडौं । सञ्चार तथा सूचना प्रविधि मन्त्रालयका सचिव राधिका अर्यालले एआईले गर्दा समाचारको मूल्य र मान्यता मारिरहेको बताएकी छन् । नेपाल आर्थिक पत्रकार संघ (नाफिज) को १६ औं वार्षिक साधारण सभामा बोल्दै उनले यस्तो बताएकी हुन् । समग्र पत्रकारिता नै गम्भीर मोडमा रहेको उनको भनाइ छ । एआईले पत्रकारिता कहाँ पुर्‍याउने हो भन्ने अनिश्चितता बढाएको उनले बताइन् । एआईले गर्दा समाचारको कन्टेनको मूल्य र मान्यता मरेको उनको भनाइ छ ।

पत्रकारिता क्षेत्रलाई भरपर्दो र विश्वासिलो बनाउन आवश्यक रहेकाले पत्रकारहरूलाई यसमा ध्यान दिन आग्रह गरिन् । उनले भनिन्, ‘समग्र पत्रकारिता क्षेत्र गम्भीर मोडमा रहेको छ । एआईले पत्रकारिता कहाँ पुर्‍याउने भन्ने अनिश्चितता बढाएको छ । एआईले गर्दा समाचारको कन्टेनको मूल्य र मान्यता मरेको छ ।’ पत्रकारिताको सकारात्मक कदममा सरकार सधैँ साथमा रहेको उल्लेख गर्दै सचिव अर्यालले सकारात्मक कदमका लागि सरकारले सधैँ सहयोग गर्ने प्रतिवद्धता जनाइन् ।

काठमाडौं । नेकपा माओवादी केन्द्रबाट अलग भएर प्रगतिशील लोकतान्त्रिक पार्टी (प्रलोपा) गठन गरेका जनादर्श शर्मालाई गृह जिल्ला रुकुम पश्चिममै कालो झण्डा देखाइएको छ । प्रलोपा गठनपछि पहिलो पटक गृह जिल्ला पुगेका शर्मा प्रभाकर शर्मालाई रुकमका कार्यकर्ताहरुले कालोझण्डा देखाएका हुन् ।

स्थिति अप्रिय हुन नदिन सुरक्षाकर्मीको तैनाथी बढाइएको छ । शर्मा आज बिहान काठमाडौंबाट नेपाल एयरलाइन्सको हवाईजहाज चढेर सदरमुकाम खलंगा पुगेका थिए। उनी विमानस्थलबाट बाहिरिने क्रममा केही युवाहरुले कालो झण्डा देखाएका हुन् ।

काठमाडौं । पूर्व शिक्षामन्त्री सुमना श्रेष्ठले हाल देखिएको राजनीतिक अस्थिरता, राज्यका दमनकारी कदम र न्यायिक प्रक्रियाको दुरुपयोगले नागरिकलाई चरम निराशातिर धकेलिरहेको दाबी गरेकी छन् । उनले राज्यका निर्णय र व्यवहारले नागरिकको असन्तोषलाई ‘अतिवादतर्फ मोडिने वातावरण’ सिर्जना गरिरहेको आरोप लगाएकी छन् ।

श्रेष्ठका अनुसार राज्यका निकायहरूले अधिकार दुरुपयोगमाथि ध्यान नदिई उल्टै सामाजिक सञ्जालमा लेखिएको एक स्टाटस वा अभिव्यक्ति मात्रकै आधारमा सर्वसाधारणलाई पक्राउ र मुद्दा चलाउने प्रवृत्ति बढ्दै गएको छ । सामाजिक सञ्जाल ट्वीटर (एक्स) मा लेख्दै उनी भन्छिन्, ‘धमिलो पानीमा माछा मार्न आएका स्वार्थ समूह र सामान्य नागरिकलाई एउटै घेरामा राखेर मुद्दा थोपर्ने क्रम तीव्र हुँदैछ । शक्तिशालीहरू जोगिन्छन्, हाम्रो जस्ता सर्वसाधारण मात्र मुद्दाको भार बोकेर हैरान हुन्छन् ।’

उनले हालका घटनाक्रममा सुरक्षाकर्मीमाथि पनि आक्रमण भएको स्वीकार गरे पनि त्यसको पृष्ठभूमि बुझिनु आवश्यक भएको बताएकी छन् । दशकौंको कुशासन, युवामाथि गोली हानिएको दृश्य र नेताहरूका भड्काउने अभिव्यक्तिले परिस्थितिलाई विष्फोटक बनाएको उनको तर्क छ । ‘दोषीलाई कारबाही गर्नुको साटो शक्तिहीन नागरिकमाथि बदला लिन खोज्नुबाट राज्यको उद्देश्य नै शंकास्पद देखिन्छ’, उनले आरोप लगाएकी छन् ।

श्रेष्ठले भदौ २३ को दमन र त्यसपछि देखिएको राजनीतिक मोडबारे समेत टिप्पणी गर्दै सरकार ढल्नुको मुख्य कारण ‘जनताको आक्रोश मात्र नभई नेतृत्वले आफ्नै सुरक्षाको चिन्ता लिएर भाग्ने अवस्था उत्पन्न हुनु’ रहेको उल्लेख गरेकी छन् । उनका अनुसार अन्य स्वार्थ समूहको घुसपैठ पहिल्यैदेखि सक्रिय भए पनि राज्यले त्यस्तो वातावरण सिर्जना नगरेको भए ती समूह बलिया हुन नसक्ने थिए ।

उनले अतीतका हिंसात्मक आन्दोलनहरूमा कहिल्यै न्यायिक छानबिन नभएको र राजनीतिक शक्तिले मोलतोलमार्फत मुद्दा मिलाउने प्रथाले प्रतिहिंसाको संस्कार झनै मजबुत बनाएको बताइन् । ‘अहिले पनि त्यहीं चक्र दोहोरिँदैछ । आज थामिए जस्तो देखिएको जनआक्रोश भविष्यमा कति ठूलो रुपमा विष्फोट हुन सक्छ भन्न सकिँदैन’, उनले सचेत गराएकी छन् । श्रेष्ठका अनुसार अहिले देशलाई आवश्यक परेकै कुरा भनेको राज्यका गल्ती स्वीकार गर्ने साहस, सबै पक्षलाई निष्पक्षरूपमा सुन्ने क्षमता र न्यायिक प्रक्रियामा समभाव हो । ‘राज्य नागरिकका लागि हो भन्ने कुरा व्यवहारमै देखिनु पर्छ’, उनी भन्छिन् ।

कसरी राज्यले नागरिकलाई अतिवादतिर धकेल्दै छ

* नागरिकको निराशालाई चरमबिन्दुमा पुऱ्याउने
* राज्यशक्तिको दुरुपयोगलाई अनदेखा गर्ने
* केही बोलेको कतै स्टाटस लेखेकै भरमा नागरिकलाई प्रकाउ गर्ने मुद्दा चलाउने
* नागरिकको पीडा नबुझी, समभाव नराखी राज्यका निकायले आफूमाथि भएको हिंसाको बदला…

— Sumana (@SumanaShrestha) December 7, 2025

जनकपुर । मधेश प्रदेशका नव नियुक्त मुख्यमन्त्री कृष्णप्रसाद यादवले आज (आइतबार) पद तथा गोपनियताको शपथ ग्रहण गर्दैछन् । मंसिर १९ गते सात दलका ७७ प्रदेशसभा सदस्यहरूको समर्थनमा कांग्रेस संसदीय दलका नेताका तर्फबाट मुख्यमन्त्री नियुक्त यादवले आजै सानो आकारको मन्त्रिपरिषद् गठन गर्ने तयारी गरेका छन् । मुख्यमन्त्रीको कार्यालयका अनुसार जनकपुरधाममा शपथ ग्रहणका सबै तयारी पूरा भएका छन् ।

यसअघि संविधानको धारा १६८(३) बमोजिम ठूलो दलका हैसियतमा नियुक्त भएका नेकपा एमालेका नेता सरोजकुमार यादवले विश्वासको मत लिनसक्ने सम्भावना नदेखिएपछि मंसिर १७ गते राजीनामा दिए थिए । सर्वोच्च अदालतले उनी नियुक्त भइसकेपछि २४ घण्टाभित्र विश्वासको मत लिन आदेश दिएको थियो । विश्वासको मत प्राप्त गर्ने परिस्थिति नबनेपछि उनले पद त्यागेपछि नयाँ बहुमत निर्माण भएको हो ।

शनिबार राति बसेको बैठकपछि सरकार गठनमा सहभागी दलहरूले मन्त्रालय बाँडफाँडमा मोटामोटी सहमति गरेका छन् । सहमति अनुसार जसपा नेपालले सभामुखसहित तीन मन्त्रालय पाउनेछ । नेपाली कम्युनिष्ट पार्टी (नेकपा) लाई पनि तीन मन्त्रालय दिने सहमति भएको छ ।

मुख्यमन्त्रीसहित नेपाली कांग्रेसले दुई मन्त्रालय व्यवस्थापन गर्नेछ भने जनमत पार्टीले पनि दुई मन्त्रालय पाउनेछ । विश्वासको मत नपाए पनि सरकार विस्तारमा सहभागी हुन लागेको लोसपा नेपालले पनि दुई मन्त्रालय प्राप्त गर्ने सहमति बनेको छ ।

गत कार्तिक २३ गते एमालेका सरोज कुमार यादव १६८ (३) बमोजिम मुख्यमन्त्री नियुक्त हुँदा सातदलीय गठबन्धनले सर्वोच्चमा रिट दायर गर्दै प्रक्रिया गलत भएको दाबी गरेको थियो । त्यसपछि अदालतको निर्देशनअनुसार विश्वासको मत पुष्टि गर्नुपर्ने अवस्था उत्पन्न भयो, तर मत सुनिश्चित नभएपछि एमाले नेतृत्वको सरकार ढलेको हो ।

यही परिस्थितिमा कांग्रेस नेता यादवले कांग्रेस, जसपा नेपाल, जनमत, माओवादी केन्द्र, लोसपा, एकीकृत समाजवादीसँगै अन्य मिलेर ७७ सदस्यको बहुमत देखाउँदै दाबी पेस गरेका थिए । आज शपथसँगै मधेशमा नयाँ सरकार आधिकारिक रूपमा स्थापना हुँदैछ ।

जनकपुर । नेपाली कम्युनिष्ट पार्टी (नेकपा) का नेता झलनाथ खनालले विदेशिएका युवाहरुलाई स्वदेश फर्काउन शक्तिशाली कम्युनिष्ट पार्टीको आवश्यकता रहेको बताएका छन् ।

जनकपुरधाममा आयोजित एकता सन्देश सभालाई सम्बोधन गर्दै उनले देशमा अझै पनि भ्रष्टाचार व्याप्त रहेको र शिरदेखि तीरसम्म नै भ्रष्टाचार व्याप्त रहेको जिकिर गरे । उनले भ्रष्टाचारीहरुले देशलार्य नराम्रोसँग डसिरहेको भन्दै त्यसको अन्त्य गर्ने समाजवाद नै एक मात्र विकल्प रहेको बताए । उनले देशमा रोजगारी सिर्जना नहुँदा ठूलो संख्यामा युवाहरु विदेश पलायन भइरहेको बताए ।

‘आज देशमा जुन प्रकारको भ्रष्टाचार भइरहेको छ । देशभर नै भ्रष्टाचार छ, शिरदेखि तीरसम्म भ्रष्टाचार छ । भ्रष्टाचारीहरुले देशलाई नराम्रो ढंगले डसिरहेको छ । त्यसलाई अन्त्य गर्ने व्यवस्था भनेको समाजवाद हो । त्यसकारण हामीलाई समाजवाद चाहियो । देशभर नै बेरोजगार नै बेरोजगार छ । १८ देखि ४० वर्ष समूहका युवाहरुको ठूलो संख्या खाडीमा छ । श्रमजीवि जनता बाहिर गइरहेका छन्, पेशा व्यवसाय सिर्जना नहुँदा उनीहरु बाहिर पुगेका छन् । उनीहरुलाई देश फर्काउन एउटा ठूलो शक्तिशाली कम्युनिष्ट पार्टीको आवश्यक छ,’ उनले भने । उनले देशमा रोजगारी सिर्जना गर्नु जरुरी रहेको बताएका छन् । –न्युज एजेन्सी नेपाल

रौतहट । रौतहटको चन्द्रनिगाहपुरस्थित मोथियाही पुल नजिक भएको सवारी दुर्घटनामा एक जनाको मृत्यु भएपछि मृतकका आफन्तले शनिबार पूर्वपश्चिम राजमार्ग अवरुद्ध गरेका छन् ।

शुक्रबार साँझ बसको ठक्करले मोटरसाइकल चालकको मृत्यु भएपछि पीडित परिवारले उचित क्षतिपूर्तिको माग गर्दै सडक बन्द गरेका हुन् । दुर्घटनाको बेला मोटरसाइकलमा मृतकसँगै उनका तीन सन्तान पनि सवार थिए । उनीहरूको अस्पतालमा उपचार हुँदै छ ।

चन्द्रपुर नगरपालिका– ६ मा पर्ने मोथियाही पुलनजिक गौरबाट चन्द्रनिगाहपुरतर्फ आउँदै गरेको ना ४ ख ६५४७ नम्बरको बस र विपरीत दिशाबाट जाँदै गरेको ना ३९ प ४२४० नम्बरको मोटरसाइकल ठोक्किँदा वृन्दावन नगरपालिका– २, विश्रामपुरका ४० वर्षीय नागेन्द्र पटेलको घटनास्थलमै मृत्यु भएको थियो ।