Author: nepalone

काठमाडाैं। इनिशा विकको सामुहिक बलात्कारपछि भएको विभत्स हत्याको विरोधमा आज पनि काठमाडौंको माईतीघर मण्डलामा प्रदर्शन गरिएको छ ।

अधिकारकर्मी र सर्वसाधारणको सहभागितामा उक्त प्रदर्शन गरिएको हो । उनीहरुले दोषीलाई कडाभन्दा कडा कारबाही गर्न र महिला हिंसा अन्त्य गर्न माग गरेका छन् । प्रदर्शनकारीहरुले ‘इनिशालाई न्याय देउ’, ‘बलात्कारीलाई फाँसी देउ’, ‘महिला सुरक्षाको ग्यारेन्टी गर’ जस्ता नारा लेखिएका प्लेकार्डहरु बोकेका थिए ।

प्रदर्शनमा सहभागी अधिकारकर्मीहरुले राज्यले महिला र बालबालिकाको सुरक्षामा ध्यान दिन नसकेको भन्दै आक्रोश व्यक्त गरेका छन् ।

काठमाडौँ । काठमाडौं महानगरपालिका–१२ अन्तर्गतको भोटेबहाल क्षेत्रमा बसको ठक्करबाट दुई पैदल यात्रीको मृत्यु भएको छ।

मृत्यु हुनेमा टेकु नजिकै बस्दै आएका भारतीय नागरिक ४५ वर्षीय पदम उपाध्याय र ३७ वर्षीय सतिसकुमार कुसवाह रहेको उपत्यका ट्राफिक प्रहरी कार्यालयले जानकारी दिएको छ।

शुक्रबार साँझ कालिमाटीबाट त्रिपुरेश्वरतर्फ जाँदै गरेको प्रदेश–३–०१–००५ ख ९२९८ नम्बरको बसले ठक्कर दिँदा दुवैजना गम्भीर घाइते भएका थिए। उपचारका लागि लगिएको ट्रमा सेन्टरमा गएराति दुवैको मृत्यु भएको उपत्यका ट्राफिक प्रहरी कार्यालयका एसपी नरेश सुवेदीले बताए।

बस चालक दोलखा घर भई कपनमा बस्ने ३५ वर्षीय मानबहादुर बस्नेतलाई प्रहरीले नियन्त्रणमा लिएको छ। घटनाबारे प्रहरी वृत्त कालिमाटीले थप अनुसन्धान गरिरहेको छ।

बुटवल । लगातार परिरहेको वर्षापछि झरेको पहिरोका कारण सिद्धार्थ राजमार्गअन्तर्गत बुटवल-पाल्पा सडकखण्ड पूर्ण रूपमा अवरुद्ध भएको छ। पाल्पाको तिनाउ गाउँपालिका-३ दोभानस्थित सिद्धबाबा क्षेत्रमा पहिरोसँगै ढुङ्गा खस्दा सडक बन्द भएको राजमार्ग सुरक्षा तथा ट्राफिक व्यवस्थापन कार्यालय बुटवलले जानकारी दिएको छ।

कार्यालयका अनुसार वर्षाका कारण दाउन्ने सडकखण्ड पनि अत्यधिक चिप्लो भएपछि पूर्व-पश्चिम राजमार्गको दुवै तर्फको यातायात ठप्प रहेको छ। बुटवल-पाल्पा मार्ग अवरुद्ध भएपछि सवारी साधनलाई वैकल्पिक मार्ग प्रयोग गर्न निर्देशन दिइए पनि पाल्पा रुट समेत बन्द भएपछि यातायात व्यवस्थापन थप जटिल बनेको छ।

निरन्तर वर्षा भइरहेकाले अवरुद्ध सडक खुलाउन केही घण्टा लाग्ने नेपाल प्रहरीले जनाएको छ।

पाेखरा। जिल्ला प्रहरी कार्यालय कास्कीले ठूलो परिमाणको लागुऔषधसहित १ जनालाई पक्राउ गरेको छ ।

पक्राउ पर्नेमा पोखरा महानगरपालिका २९ सैनिक बस्ती बस्ने १९ वर्षीय आयुष तामाङ रहेका छन् । जिल्ला प्रहरी कार्यालय कास्की र इलाका प्रहरी कार्यालय शिशुवा तथा लागुऔषध नियन्त्रण व्यूरो पोखराबाट खटिएको प्रहरी टोलीले गत बुधबार बेलुकी साढे ५ बजे तामाङलाई पक्राउ गरेको हो । उनको साथबाट लागुऔषध डाइजापाम १ हजार ७ सय २१ एम्पुल, फेनेरागन ३ सय ३४ एम्पुल, ब्रुफिनुर्फिन ३ सय ७७ एम्पुल गरी कुल २ हजार ४ सय ३२ एम्पुल, २ थान मोबाइल र नगद ९३ हजार ५ सय रुपैयाँ बरामद गरिएको कास्की प्रहरीका प्रवक्ता एवं प्रहरी नायव उपरीक्षक हरि बहादुर बस्नेतले जानकारी दिए ।

उनकाअनुसार पक्राउ परेका तामाङले डाइजापाम, फेनेरागन र ब्रुफिनुर्फिनको १÷१ एम्पुलको सेट बनाएर प्रतिसेटलाई २ हजार रुपैयाँमा विक्री गरेका थिए । पक्राउ परेका उनीविरुद्ध कास्की जिल्ला अदालतबाट लागुऔषध सम्बन्धि मुद्दामा ५ दिनको म्याद थप गरी अनुसन्धान प्रक्रिया अगाडी बढाएको डिएसपी बस्नेतले बताए ।

काठमाडौं। काठमाडौं उपत्यकासहित देशभर मुसलधारे वर्षा भएको छ ।

नेपालमा पश्चिमी न्युन चापीय प्रणाली र स्थानीय वायुको प्रभाव रहेको छ । जसअनुसार हाबाहुरी चट्याङसहित देशभर असिना पानी परेको हो । काठमाडौं उपत्यकासहित बुटबल, अर्घाखाँची, ओखलढुंगासहित देशका विभिन्न भू—भाग दिउँसै अन्धकारमय बनेको थियो ।

जसकारण जनजीवन अस्तव्यस्त बनेको थियो ।

त्यसो त, मौसम विभागले पनि आज शुक्रवार कोशी, मधेस, गण्डकी, कर्णाली, सुदूरपश्चिम प्रदेशको धेरै स्थानहरू, वागमती र लुम्बिनी प्रदेशका केही स्थानहरूमा मेघगर्जन-चट्याङ्ग-असिना-हावाहुरी सहित मध्यम  वर्षा-हिमपातको सम्भावना रहेको बताएको थियो । कोशी र मधेस प्रदेको एक–दुई स्थानमा भारी वर्षाको सम्भावना रहेको अनुमान गरेअनुसार नै देशभर बर्षा भएको हो । वर्षाका करण लामोसमयको वायु प्रदुषण कम भएको छ भने खेतीबालीलाई भने राहत मिलेको छ ।

महान्यायाधिवक्ता सविता भण्डारीले महिलाहरु उच्च पदमा पुग्दा महिलाहरुबाटै विरोध हुने गरेको भन्दै त्यसको सट्टा एकअर्काको वकालत गर्ने संस्कार बसाल्न आग्रह गरेकी छन् ।

शुक्रवार भक्तपुरमा नेपाल बारले आयोजना गरेको कानून व्यवसायी महिलाहरुको राष्ट्रिय सम्मेलनलाई सम्बोधन गर्दै उनले यस्तो आग्रह गरेकी थिइन्। भण्डारीले आगामी दिनमा न्यायपालिकामा महिला नेतृत्व पाउने आशा व्यक्त गर्दै सर्वोच्च अदालतकी वरिष्ठतम न्यायाधीश सपना प्रधान मल्ल भोलिको प्रधानन्यायाधीश हुनेमा आफू विश्वस्त रहेको बताइन् । महान्यायाधिवक्ता भण्डारीले कानून व्यवसायी महिलाहरु केवल पेशागत भुमिकामा मात्र सिमित नभई समाज परिवर्तनका वास्तविक संवाहक भएको बताइन्।

महिला, बालबालिका, दलित, आदिवासी जनजाति र सीमान्तकृत समुदायको अधिकार संरक्षणमा महिला कानून व्यवसायीको भुमिका निर्णायक हुने उनले उल्लेख गरिन् ।

‘जब म महान्यायाधिवक्ताको पदमा मेरो मनोनयन भयो त्यही बेला मलाई केही पत्रकार मित्रहरुले मलाई प्रश्न गर्नुभयो,’ उनले भनिन्, ‘मैले भनें सायद हामीले हाम्रा वकालत गर्नै जानेनौँ । हामी महिला त भयौं तर महिलाको वकालत गर्न हामीले जानेनौँ।’

समानता केवल संविधानमा लेखिएको शब्द मात्र नभई व्यवहार र न्यायमा देखिनुपर्नेमा उनको जोड छ ।

काठमाडाैं। सहकारीमा फसेको आफ्नो वचत रकम फिर्ताको माग गर्दै सहकारी पीडितहरूले काठमाडौंको माईतीघर मण्डलामा विरोध प्रदर्शन गरेका छन् ।

उनीहरूले सरकारको ध्यानाकर्षण गराउन पुनः सडक आन्दोलन शुरु गरेका हुन् । विगत ४५ महिनादेखि निरन्तर सडक आन्दोलनमा रहेका पीडितहरूले सरकारसँग पटक–पटक  सम्झौता भएपनि हालसम्म न्याय नपाएको गुनासो गरेका छन् ।  सरकारले गरेका सम्झौताहरू कागजमै सिमित भएको र आफूहरूको बिचल्ली भएको भन्दै उनीहरू आक्रोशित बनेका छन् ।

उनीहरुले वाचापत्रमा लेखेको सय दिनेप्रक्रिया हामीले पनि सम्झिएका छौँ, आफ्ना छोप्ने, पराइ मात्रै हेप्ने प्रवृत्ति नदोहोरियोस्, अपराध अनुसार सञ्चालकको प्रवृत्ति अनुसार दण्ड गर्ने विधान बनोस्, ठग सञ्चालकहरुको नागरिकता, पासपोर्ट, बैंक खाता, चल अचल सम्पती रोक्का गरियोस्, नयाँ बन्ने सरकार सहकारी पीडितलाई न्याय दे लगायतका प्लेकार्डहरु बोकेर प्रदर्शन गरेका छन् ।

जनकपुर। अन्तरिम सरकारका प्रधानमन्त्री सुशिला कार्कीले जानकी मन्दिरमा पूजा अर्चना गरेकी छन् ।

अन्तरिम सरकारको नेतृत्व गरेपछि जनकपुरधाम पहिलो पटक जानुएकी प्रधानमन्त्री कार्की जानकी मन्दिर पुगेर पूजा अर्चना गरेकी हुन्।

जनकपुरधाम विमान स्थलबाट जानकी मन्दिर पुग्नुभएकी प्रधानमन्त्री कार्कीले पूजा अर्चना पश्चात मन्दिरका महन्थ तथा पूजारीहरुसँग समेत भेटघाट गरिन् । पूजा पश्चात उनले जनकपुरधाम भ्रमण उपलब्धिमुलक रहेको जानकारी दिइन्। उनले आफू राजनीति गर्ने मान्छे नभएको र धार्मिक प्रयोजनका लागि मात्रै जनकपुरधाम आइपुगेको बताइन् ।

जनकपुरधामबाट उनी महोत्तरी जाने कार्यक्रम रहेको छ । उनले महोत्तरीको गौशालामा रहेको निगौल गाई गौशालाको निरिक्षण गर्नेछिन्।

काठमाडौँ । नेपाल जेनजी फ्रन्टले माइतीघरमा भएको प्रदर्शनका क्रममा आफ्नी संयोजक रक्षा बममाथि दुर्व्यवहार भएको घटनाप्रति कडा आपत्ति जनाएको छ।

शुक्रबार एक विज्ञप्ती जारी गर्दै फ्रन्टले शान्तिपूर्ण आन्दोलनमा सहभागी भएकी संयोजकमाथि गरिएको व्यवहार अस्वीकार्य भएको स्पष्ट पारेको छ।

फ्रन्टले भनेको छ, ‘बिहीबार शान्तिपूर्ण प्रदर्शनका क्रममा संयोजक रक्षा बममाथि भएको दुर्व्यवहारको हामी घोर भर्त्सना गर्दछौँ। संविधानले हरेक नागरिकलाई शान्तिपूर्वक भेला हुने र अभिव्यक्तिको स्वतन्त्रता सुनिश्चित गरेको छ। सत्य र न्यायका लागि उभिएकी एक आन्दोलनकारीमाथि यस्तो आक्रमण लोकतान्त्रिक समाजमा स्वीकार्य हुँदैन।’

भदौ २३ र २४ गतेको जेनजी आन्दोलनको घटनाबारे छानबिन गर्न पूर्वन्यायाधीश **गौरीबहादुर कार्की**को संयोजकत्वमा बनेको जाँचबुझ आयोगको प्रतिवेदन सार्वजनिक गर्न माग गर्दै जेनजी अगुवाहरू ६ दिनदेखि माइतीघर मन्डलामा निरन्तर प्रदर्शन गरिरहेका छन्। सोही क्रममा केही घाइते आन्दोलनकारी र अगुवाहरूले रक्षा बमविरूद्ध नाराबाजी गरेका थिए।

फ्रन्टले आन्दोलनकारीमाथि लक्षित दुर्व्यवहारले आन्दोलनको शक्ति कमजोर बनाउने चेतावनी दिएको छ।

विज्ञप्तिमा भनिएको छ, ‘घाइते, सहिद परिवार, आन्दोलनकारी र अगुवाहरू सबै एउटै यात्राका साझेदार हौँ। असहमति हुन सक्छ, प्रश्न उठ्न सक्छ, पीडाले आक्रोश पनि देखिन सक्छ। तर उत्तर एकअर्कामाथि होइन, राज्यसँग खोजिनुपर्छ। राज्यले अझैसम्म सत्य लुकाइरहेको छ, प्रतिवेदन सार्वजनिक नहुने आशंका बढ्दै छ। यस्तो अवस्थामा एक आन्दोलनकारीमाथि भएको दुर्व्यवहारले आन्दोलनलाई थप कमजोर बनाउनेछ।’