Author: nepalone

काठमाडौं । प्रधानमन्त्री केपी शर्मा ओलीले देशलाई प्रतिगमनतर्फ लैजाने हुंकार कहिल्यै पूरा नहुने बताएका छन् ।

आइतबारको प्रतिनिधिसभा बैठकमा प्रधानमन्त्री ओलीले जेठ १५ गते लोकतन्त्र उल्ट्याउने सपना कहिल्यै पूरा नहुने बताएका हुन् ।

उनले भने, ‘केही साथीहरु जेठ १५ गते लोकतन्त्र उल्ट्याएर प्रतिगामी शक्ति ल्याउने भन्दै हुनुहुन्छ । यस पटकको जेठ १५ गते होइन, अब आउने कुनै पनि जेठ १५ गते पर्खिनुस् तपाईंहरुको सपना साकार हुनेवाला छैन । प्रतिगामी सपना काम लाग्दैन, त्यसमा जोडबल नगरौं । बंगलादेशमा बनाइदिन्छु भन्छन् । त्यहाँ पनि त थिए राजा । तर खै त त्यहा राजा फर्काएनन् त ?’

प्रधानमन्त्रीले मुलुक संविधान र कानुन अनुसार चल्ने बताए । उनले प्रतिगमनको वकालत गरेर सिलिङमा टाउको ठोकाउनुको कुनै अर्थ नरहेको बताए ।

काठमाडौं । नेपाली कांग्रेसका सांसद रामहरि खतिवडाले बजेट च्यात्ने अवस्था नआउनेतर्फ सचेत रहन सरकारलाई चेतावनी दिएका छन् ।

आइतबारको प्रतिनिधिसभा बैठकमा नीति तथा कार्यक्रममाथिको छलफलमा भाग लिँदै सांसद खतिवडाले मन्त्रीहरुलाई आफ्नो क्षेत्रमा मात्र बजेट नलैजान सचेत गराएका हुन् ।

उनले भने, ‘छिट्टै बजेट आउँदैछ। म माननीय मन्त्रीजीहरुलाई आग्रह गर्न चाहन्छु–मन्त्रीको क्षेत्रमा अलि धेरै, माननीयको क्षेत्रमा अलि कम भयो भने बजेट च्यात्ने अवस्था नआओस्। त्यो अनुरोध गर्न चाहन्छु।’

सांसद खतिवडाले राष्ट्रपति र उपराष्ट्रपतिको कार्यालय एउटै र निवास फरक बनाउन आग्रह गरे । उनले यसो गरेमा सरकारको खर्च कटौती हुने बताए ।

उनले सार्वजनिक ऋण अहिले २६ अर्ब पुगेको र साधारण खर्च राजश्वले धान्न सक्ने अवस्था नरहेको भन्दै ऋण लिएर ऋण तिर्नुपर्ने अवस्था अन्त्य गर्नुपर्ने बताए ।

उनले भने, ‘खर्च कटौती कसरी गर्न सकिन्छ, त्यतातिर सरकारको ध्यान जानुपर्दछ । राष्ट्रपति र उपराष्ट्रपतिको कार्यालयका कर्मचारी एउटै रहने, निवास फरक रहने व्यवस्था भयो भने अलिकता यसलाई सहजता हुन्छ ।’

काठमाडौं । राष्ट्रिय प्रजातन्त्र पार्टीका प्रमुख सचेतक ज्ञानेन्द्र शाहीले सरकारको परराष्ट्र र श्रम मन्त्रालयले पछिल्लो समय कुनै काम नगरेको आरोप लगाएका छन् ।

आइतबारको प्रतिनिधिसभा बैठकमा शाहीले नेपाली युवाहरु विदेशमा बन्धक हुँदा पनि मन्त्रालय मौन बसेको आरोप लगाए ।

उनले भने, ‘झण्डै ८० लाख युवाहरु अर्काको देशमा काम गर्न बाध्य छन् । श्रम, परराष्ट्र मन्त्रालय मौन भएर बसेका छन् । नेपालीहरु बन्धक हुँदा पनि श्रम मन्त्रालयले काम गरेको छैन ।’

उनले विदेशी भूमिको युद्धमा नेपालीहरु पटक पटक मर्नुपर्दा पनि श्रम मन्त्रालय र परराष्ट्र मन्त्रालय मौन भएको बताए ।

उनले भने, ‘पछिल्लो पटक भारत र पाकिस्तानको युद्धमा पनि नेपाली नै मरे, रुस र युक्रेनको युद्ध भयो । नेपाली नै मरे । प्यालेस्टाइन र इजराइलको युद्धमा पनि नेपाली नै मरे । यो कस्तो गरिवी हो यो कस्तो वेरोजगारी हो । सरकार मौन छ ।’

उनले विदेशमा बसेकाहरुले पठाएको रेमिट्यान्सले नै सांसदहरु, प्रधानमन्त्री, मन्त्री, कर्मचारीहरुले तलव पाएको भन्दै नुनको सोझो गर्नुपर्ने बताए ।

काठमाडौं । राष्ट्रिय जनमोर्चाका अध्यक्ष चित्रबहादुर केसीले कालीगण्डकी नदी दोहन नरोकिएको भन्दै सरकारको ध्यानाकर्षण गराएका छन् ।

आइतबारको प्रतिनिधिसभा बैठकमा केसीले जनप्रतिनिधि र कर्मचारीको मिलेमतोमा नदी दोहन भइरहेकाले रोक्न सरकारको ध्यानाकर्षण गराएका हुन् ।

उनले सर्वोच्च अदालतको आदेशको अवज्ञा गर्दै जनप्रतिनिधि र कर्मचारीको मिलेमतोमा कालीगण्डकीबाट बालुवा र ढुंगा जथाभावी झिक्ने काम हुँदा सरकार भने रमिते बनेको आरोप लगाए ।

उनले यसबारेमा यसअघि पनि आफूले आवाज उठाएपनि सुनुवाइ नभएको बताए ।उनले बालुवा गिट्टी उत्खनन नरोके कालीगण्डकी कोरिडोरको सडकसमेत भासिने स्थिति रहेको बताए ।

काठमाडौं । गृहमन्त्री रमेश लेखकले संघीय निजामती सम्बन्धी कानुन चाँडै निर्माण हुने बताएका छन् । आइतबार संसदको राज्य व्यवस्था तथा सुशासन समितिको बैठकमा संघीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक,२०८० का सम्बन्धमा समितिको अन्तिम मस्यौदा प्रतिवेदन माथिको छलफलमा गृहमन्त्री लेखकले कानुन निर्माण ढिला गरेर भएपनि राम्रो काम गरिरहेकाले उत्साहित हुनुपर्ने बताए ।

उनले विधेयकहरु सहमतिमा टुङग्याउनु उचित हुने भन्दै संघीय निजामती सम्बन्धी विधेयक पनि सहमतिमा नै टुङ्गो लाग्ने विश्वास व्यक्त गरे ।

गृहमन्त्रीले विधेयक टुंग्याउन थप ५–६ दिनको समय माग गरे । उनले, ‘अर्को बैठकमा टुंग्याउने गरी पाँच–छ दिनको समय पाऊँ । हामी पनि छलफल गर्छौं, साथीहरू पनि छलफल गर्नुस् ।’

खासगरी ’कुलिङ पिरियड’ बारे कांग्रेस र एमालेबीच नै मतभेद छ । नेपाली कांग्रेस कुलिङ पिरियड दुई वर्ष राख्नुपर्ने अडानमा छ भने एमाले एक वर्षमात्रै राख्नुपर्ने पक्षमा छ ।

त्यस्तै समिति सभापति रामहरी खतिवडाले समितिको अर्को बैठकबाट जसरी पनि निजामती विधेयक संसदमा पेश गर्नेगरी तयारी गर्नुपर्ने बताए ।

उनले राज्य समितिलाई कुनै राजनीति गन्ध नआउने समितिको रुपमा विकास गर्नुपर्ने बताए । उनले भने,‘समितिको अर्को बैठकबाट जसरीपनि निजामती विधेयक संसदमा पेश गर्नेगरी तयारी गर्नुपर्छ । यो समिति राजनीति गन्ध नआउने समितिको रुपमा विकास गरौं भन्ने हामी सबैको चाहना छ । यहाँ जुन पार्टीको प्रतिनिधि गर्ने भएपनि समिति हामी सबैको हो भन्ने किसिमबाट जाऔं ।’

काठमाडौं । नेकपा एमालेका महासचिव शंकर पोखरेलले नेकपा माओवादी केन्द्रका अध्यक्ष पुष्पकमल दाहाल प्रचण्डलाई अभिव्यक्ति दिँदा कुन्ठा मात्र नपोख्न आग्रह गरेका छन् । आइतबार सामाजिक संजालमार्फत पोखरेलले तथ्य एकातिर र बोली अर्कैतिर भएको भन्दै आपत्ति जनाएका हुन् ।

उनले भनेका छन्, ‘प्रचण्डजी तपाई के बोल्दै हुनुहुन्छ ? यी तथ्यहरुले तपाईंको बोलीमा तथ्य होइन कुन्ठा मात्र देखिन्छ । तपाईं प्रधानमन्त्री हुँदाको भन्दा राजश्वमा उल्लेख्य वृद्धि भएको छ । विदेशी मुद्राको संचिति बढेको छ । शोधनान्तर स्थितिमा उल्लेख्य बचत छ । निर्माण व्यावसायीलाई काम बापतको तपाईंको नेतृत्वको सरकारले दिन नसकेको भुक्तानी प्रदान गरिएको छ ।’

महासचिव पोखरेलले सहकारीमा भएको घोटालाको छानबिन र कारबाहीको प्रकृया अघि बढेको तथा साना वचत कर्ताको वचत फिर्ता गर्ने प्रकृया सुरुभएको बताएका छन् ।

उनले भनेका छन्, ‘निर्माण ठप्प रहेका ठूला आयोजनाहरुको काममा तिव्रता आएको छ । जस्तो पोखरा –मुग्लिन सडक, गैडाकोट– वुटवल सडक आदि । भुकम्प र बाढीपीडितका क्षतिग्रस्त आवास निर्माणका लागि श्रोतको व्यवस्था भएको छ । वैंकको तरलता वृद्धि भएको छ । व्याजदर घटेको छ । लगानी वृद्धि हुन थालेको छ । कानून निर्माणको कामले तीव्रता पाएको छ । सहकारीमा भएको घोटालाको छानविन र कारबाहीको प्रकृया अघि वढेको छ । साना वचत कर्ताको वचत फिर्ता गर्ने प्रकृया सुरुभएको छ । कानूनी सुधारको प्रकृयावाट लगानी योग्य वातावरण तयार भएको छ । कानून कार्यान्वयन गर्ने निकायले विना हस्तक्षेप काम गर्ने वातावरण तयार भएको छ । भूमि समस्याको समाधानको प्रकृया अघि बढेको छ । सरकारको स्थायित्वको आधार तयार भएको छ । उपरोक्त कारणले नै तपाईंको पीडा र छटपटी बढेको देखिन्छ । होइन र ?’

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले अहिलेको दुई तिहाईको सरकारको हालत रुझेको विरालो जस्तो भएको बताएका छन् ।

शनिबार पाँचथरको फिदिममा पार्टीले आयोजना गरेको कार्यक्रमलाई सम्बोधन गर्दै अध्यक्ष प्रचण्डले दुई तिहाईको सरकारले नगर्नुपर्ने जति सबै काम गरेको बताएका हुन् ।

उनले यो सरकार आफ्नै कुकर्मले ढल्ने बताए । उनले भने, ‘अहिलेको दुई तिहाईको सरकारको हालत तपाईंहरुले देखिहाल्नु भएको छ, रुझेको विरालो जस्तो । यसले गर्नुपर्ने कुनै काम गरेको छैन, नराम्रो जति गर्न केही बाँकी राखेको छैन । यो सरकार ढाल्ने प्रयास कसैले गर्नुपर्दैन । यो सरकार आफ्नै कुकर्मको बोझले ढल्छ । हामी सरकार ढाल्ने कसरतमा छैनौं ।’

प्रचण्डले विगतमा एमाले र कांग्रेसलाई ठूलो दल बनाउन आफूहरुले सहयोग गरेको तर उनीहरुले आफूहरुलाई सानो बनाउने काम गरेको बताए ।

उनले अब माओवादी आफ्नै खुट्टामा उभिएर जाने र कसैसँग गठबन्धन गरेर चुनाव नलड्ने बताए । उनले भने, ‘अब हामी बुर्जुवाको वैशाखी टेकेर होइन, आमजनताको साथ लिएर अघि बढ्छौं ।’

प्रचण्डले देशका विभिन्न भौगोलिक क्षेत्रलाई आपसमा जोड्ने मध्यपहाडी लोकमार्ग, हुलाकी राजमार्ग, र देशभरका उत्तर–दक्षिण करिडोर जस्ता पूर्वाधार विकासका अभियानहरू माओवादी नेतृत्वको सरकारका पालामा सुरु गरिएको बताए ।

भर्खरै सम्पन्न ‘जनतासँग माओवादी तराई–मधेस जागरण अभियान’ पार्टीको मात्रै नभई जनताको अभियान बनेको निष्कर्ष पार्टीले निकाले उल्लेख गर्दै, केही दिनमै सुरु हुने औपचारिक चरण बैतडीबाट भए पनि पाँचथरको यो कार्यक्रम सोही अभियानको पूर्वसञ्चार भएको उनले स्पष्ट पारे ।

‘मध्यपहाडी लोकमार्गको प्रस्तावक हामी हौं, यसको पूर्वी सुरुआत पाँचथरमा रहेको छ’, अध्यक्ष प्रचण्डले भने, ‘यस क्षेत्रका जनताको हितमा बनेका मध्यपहाडी लोकमार्ग जस्ता पूर्वाधार अभियानहरू पनि हामीले नै सुरु गरेका हौं।’

उनले पछिल्लो पटक सरकारको नेतृत्व गर्दा सामाजिक न्याय, सुशासन, र आर्थिक सुधारका अभियानहरू सञ्चालन गर्दै गर्दा बिचौलिया र दलालहरुले सरकार ढालेको उल्लेख गर्दै भने, ‘बैंक ब्याजदर घटाउने, बैंकिङ प्रणाली सुधार गर्ने, जनताको पक्षका विचौलिया दलालहरुको विपक्षीमा काम गर्दा बिचौलिया र दलालहरूलाई मन परेन, त्यसैले अपारदर्शी ढंगले रातारात सरकार ढालियो।’

स्थानीय तह, स्ववियू निर्वाचन, पत्रकार महासंघलगायतका पछिल्ला निर्वाचनमा माओवादी केन्द्रले उल्लेखनीय परिणाम ल्याएको जनाउँदै, उनले आगामी निर्वाचनमा पार्टी एक्लै अगाडि बढ्ने र जनताको पक्षमा सुरु गरिएका कामलाई निरन्तरता दिइने बताए ।

काठमाडौँ । सभामुख देवराज घिमिरेले देशको वर्तमान अवस्थाबारे राजनीतिकर्मीले सही ढङ्गबाट विश्लेषण गर्ने उपयुक्त बेला भएको बताएका छन् ।

पूर्वसांसद मञ्च नेपालद्वारा शनिबार आयोजित ‘नेपालको वर्तमान अवस्थाः चुनौती र समाधान’ विषयक अन्तरक्रिया कार्यक्रममा सभामुख घिमिरेले वर्तमान शासन प्रणालीविरुद्ध कुप्रचारले प्रश्रय पाएकाले सकारात्मक ढङ्गबाट सोच्ने र विश्लेषण गर्ने प्रवृत्तिको विकासमा जोड दिए ।

सकारात्मक विश्लेषणबाट देशको अवस्था पत्ता लगाउने र कसरी अघि बढ्ने भन्नेबारे निर्णय गरी निर्णय कार्यान्वयन गर्ने विभिन्न व्यक्ति, क्षेत्र र अङ्गलाई सहयोग पुर्याउन राजनीतिकर्मीलाई उनले आह्वानसमेत गरे ।

‘व्यवस्था परिवर्तन भयो अवस्थामा भएन भन्ने भाष्यमा टेकेर आज फेरि इतिहास फर्काउन चाहने शक्ति र विचारहरु टाउको उठाइरहेका छन्’, सभामुख घिमिरेले भने,’अहिलेका सन्दर्भमा देशको वर्तमान अवस्था के हो भन्नेमा राजनीतिकर्मीले सही ढङ्गबाट विश्लेषण गर्ने उपयुक्त बेला भएको छ ।’

वर्तमान राजनीतिक व्यवस्था नै देशका लागि उपयुक्त हुने जिकिर गर्दै उनले विकासको गतिलाई तीव्रता दिन अत्यावश्यक भइसकेको धारणा व्यक्त गरे ।

‘नेता प्रणालीअन्तर्गत नै परिवर्तन हुन्छ तर नीति र प्रणाली परिवर्तन गर्न जरुरी छैन, हुँदैन । यो नै पूर्ण वैज्ञानिक र सही प्रणाली अपनाएका छौँ’, सभामुख घिमिरेले भने, ‘प्रणालीभित्र पनि सरकारको अस्थिरता, नीति तथा कार्यक्रम कार्यान्वयन गर्ने समयको अभाव र नेताहरुको परीक्षणको अभाव देखिएको छ ।’

कार्यक्रममा कानुन, न्याय तथा संसदीय मामिलामन्त्री अजयकुमार चौरसियाले जनताको चाहनाअनुरुप विकास र समृद्धिका लागि राजनीतिक दलहरुबीच राष्ट्रिय सहमतिको आवश्यकता औंल्याए ।

राजनीतिक व्यवस्था परिवर्तनका लागि जनताले गरेको सङ्घर्षलाई स्मरण गर्दै उनले यस व्यवस्थाको संरक्षण गर्नु सबै दलको दायित्व भएको बताए । त्यसका लागि राष्ट्रिय चुनौतीको सामना गर्न सरकार र प्रतिपक्षबीच न्यूनतम बुझाइको जरुरी रहेको उनको भनाइ थियो ।

काठमाडौँ । प्रधानमन्त्री केपी शर्मा ओलीले वैज्ञानिक वन व्यवस्थापनका नाममा सालघारीको फँडानीलाई कडाइका साथ रोकिने बताएका छन् ।

वन तथा वातावरण मन्त्रालयद्वारा शनिबार आयोजित दोस्रो राष्ट्रिय वन सम्वद्र्धन गोष्ठीको उद्घाटन गर्दै प्रधानमन्त्री ओलीले देशको सालघारी प्रकृतिको अनुपम उदाहरण भएको र पानी पार्नका लागि यस्ता अग्ला रुखहरुको महत्व हुने भएकाले उमेर नपुगेसम्म साललाई व्यावसायिक उपयोगमा लान नहुने बताए ।

‘हरियो वन नेपालको धन’को नारा पुरानै भए पनि धनको रुपमा वनको सदुपयोग भएको थिएन तर अहिले हामीले एउटा सङ्कल्प लिएका छौँ, वनको विनाश हुन नदिएर सौर्यमण्डलको सार्थकताका लागि वन संरक्षण गरेर कसरी उपयोग गर्न सकिन्छ भनेर लागेका छौँ’, प्रधानमन्त्री ओलीले भने, ‘वन क्षेत्रको संरक्षण हामीले बढाएका छौँ । अब यसको विस्तारमा भन्दा उत्पादनमा जानुपर्छ । वनको व्यावसायिक उपयोगका लागि हतार पनि नगर्ने र ढिलो पनि नगर्ने नीति लिनुपर्छ ।’ हाल देशमा ४६ प्रतिशत भूभाग वनले ओगटेको छ ।

प्रधानमन्त्री ओलीले विश्वको वातावरणका लागि पनि योगदान गर्नुपर्ने विषय भएकाले अब वन सवलीकरण गर्ने र बुट्यानहरुलाई पनि सघन वनमा रुपान्तरण गर्नुपर्नेमा जोड दिए ।

कृषि र वनको अधिकृत मिलेर फलफूलखेतीमा जोड दिन सकिने भन्दै उनले हिमाली भेगमा प्रशस्त जैतुनको खेती गर्न सकिने भएकाले पारस्परिक सहयोग बढाएर वन संरक्षण गर्दै आर्थिक समृद्धिको मार्ग अग्रसर हुन आग्रह गरे ।

उनले किसानहरुलाई पशुपालनमा प्रेरित गर्दा नवीकरणीय वनलाई सहयोग हुने र चरिचरजनको विस्तार गर्दा वन र कृषिको पर्यावरणलाई जोड्न सकिने बताए ।

‘मैले बाघको सङ्ख्या अब बढाउनु पर्दैनभन्दा वातावरणविरोधी भयो भनेर नबुझीकन टिप्पणी पनि गरियो । खान नपाएपछि उसले मान्छेलाई आक्रमण गर्छ । फोटाका बाघ हेरेर यसले केही गर्दैन भनेर हुँदैन’, प्रधानमन्त्री ओलीले भने, ‘हामीले अन्तरराष्ट्रिय प्रतिबद्धताबमोजिम दोब्बरभन्दा बढी सङ्ख्यामा बाघ संरक्षण गरेका छौँ । वनको छेउमा बस्नेलाई यसको पीरमर्का थाहा छ । वातावरणको संरक्षण मानव जातिका लागि हो । मानव जाति नै असुरक्षित भएर वातावरणको संरक्षण गर्न सकिँदैन ।’

प्रधानमन्त्री ओलीले पेरिस सम्झौता नमान्ने केही देश रहेको उल्लेख गर्दै विश्व समुदायसँगको सहकार्यमा सबै समाहित हुनुपर्नेमा जोड दिए । उनले यो महत्व आज बुझिएन भने भोलि बुझ्न ढिलो हुने लागेर मुलकले पहिलोपटक अन्तर्राष्ट्रियस्तरको कूटनीतिक मञ्च ‘सगरमाथा संवाद’ आयोजना गर्न लागेको बताए ।

ललितपुर । सञ्चार तथा सूचना प्रविधिमन्त्री पृथ्वीसुब्बा गुरुङले आतङ्कवाद, अराजकता र निरङ्कुशता लोकतन्त्र र प्रेस स्वतन्त्रताका शत्रु भएका बताएका छन् ।

नेपाल प्रेस युनियन केन्द्रीय समितिद्वारा लोमान्थाङ अन्तर्राष्ट्रिय मिडिया समिटको शनिबार ललितपुरमा उद्घाटन गर्दै उनले लोकतन्त्र र प्रेस स्वतन्त्रतालाई बलियो बनाउन कार्यशैलीमा सुधार गर्नुपर्नेमा जोड दिए । 
‘लोकतन्त्र, प्रेस स्वतन्त्रता र जलवायु परिवर्तनका विषयमा भएको समिट महत्त्वपूर्ण छ, लोकतन्त्रमा चुनौती थपिएको देख्छु, लोकतान्त्रिक शासनमा जनताको अभिमत बलियो हुनुपर्छ, लोकतन्त्र कमजोर हुँदा प्रेस स्वतन्त्रता कमजोर हुन्छ’, उनले भने । 

लोकतन्त्र र प्रेस स्वतन्त्रताबीच अन्तर सम्बन्ध रहेको चर्चा गर्दै मन्त्री गुरुङले प्रेस स्वतन्त्रताबाट समाज कसरी लाभान्वित हुन्छ भन्नेतर्फ ध्यान दिनुपर्नेमा जोड दिए ।

उनले भने, ‘अनलाइनबाट गलत सूचना सम्प्रेषण भइरहेको छ, यसलाई नियन्त्रण गर्न चुनौतीपूर्ण छ । धार्मिक सहिष्णुता, सांस्कृतिक विविधतामाथि सामाजिक सञ्जालबाट गलत सूचना प्रवाह गरेर लोकतन्त्रलाई कमजोर पार्नेहरुविरुद्ध सम्पूर्ण सञ्चारजगत् एकजुट हुनुपर्छ ।’

सञ्चार तथा सूचना प्रविधिमन्त्री उनले जलवायु परिवर्तनको असर रोक्न एकीकृत ढङ्गले काम गर्नुपर्ने बताउँदै भने, ‘हामीले काम गर्दा कुनै नेता वा पार्टी विशेषको स्वार्थमा परेर काम गर्नु हुँदैन, हामीले जनताका आवश्यकताका आधारमा विकास– निर्माणका काम गर्नुपर्छ । यसले लोकतन्त्रलाई सुदृढ बनाउँछ ।’

मन्त्री गुरुङले विधिको शासन स्थापना र निष्पक्ष पत्रकारितामा जोड दिँदै मिडिया काउन्सिल विधेयकमा स्वनियमनको दायरामा अनलाइन मिडियालाई ल्याउनेगरी प्रबन्ध भइरहेको जानकारी दिए ।

‘प्रेस भन्नेबित्तिकै छापामाध्यमलाई बढी बुझ्ने गरिन्छ, अनलाइन माध्यम पनि  प्रेस नै हो, अनलाइन माध्यमबाट समस्या भएको छ’, गत महिना  २० करोडभन्दा बढी ठगी भएको दृष्टान्त प्रस्तुत गर्दै उनले  सामाजिक सञ्जाललाई नियमन गर्न जरुरी भएको बताए । 

अन्तर्राष्ट्रिय पत्रकार महासङ्घका उपाध्यक्ष सविना इन्द्रजितले प्रेस स्वतन्त्रताविना लोकतन्त्र सुदृढ नहुने बताइन् । उनले १५० भन्दाबढी राष्ट्रमा महासङ्घको उपस्थिति रहेको जानकारी दिँदै महासङ्घले प्रेस स्वतन्त्रताका पक्षमा काम गर्दै आएको बताइन् ।

नेपाल पत्रकार महासङ्घका कार्यवाहक अध्यक्ष दीपक आचार्यले जलवायु सङ्कट विश्वको समस्या बनेको बताउँदै प्रेस स्वतन्त्रत र जलवायु परिवर्तनसम्बन्धी  विषयलाई अगाडि बढाउनुपर्ने विचार व्यक्त गरे ।

यहाँको सम्मेलन सकेर उपस्थित १२० जना पत्रकार लोमान्थाङ प्रस्थान गरेका छन् । लोकतन्त्र, प्रेस स्वतन्त्रता र जलवायु परिवर्तनमा केन्द्रित रहेर नेपाल प्रेस युनियनले सम्मेलन आयोजना गरेको हो ।