Author: nepalone

काठमाडौं । ओपनएआईले च्याटजिपिटीलाई माइक्रोसफ्ट पावरपोइन्टसँग जोड्ने नयाँ सुविधा सार्वजनिक गरेको छ । यससँगै प्रयोगकर्ताले अब सामान्य भाषामा निर्देशन दिएर एआईमार्फत नयाँ प्रस्तुति स्लाइड बनाउन, सम्पादन गर्न तथा अद्यावधिक गर्न सक्ने भएका छन् ।

नयाँ सुविधामार्फत च्याटजिपिटीले जिमेल, आउटलुक र सेयरपोइन्टजस्ता सेवाबाट आवश्यक सामग्री संकलन गरी प्रस्तुति तयार गर्न सहयोग गर्नेछ ।

कम्पनीका अनुसार यो सुविधा हाल बिटा चरणमा भए पनि अधिकांश ओपनएआई प्रयोगकर्ता, नि:शुल्क प्रयोगकर्ता तथा च्याटजिपिटी बिजनेस सदस्यहरूका लागि उपलब्ध गराइएको छ ।

यसअघि एन्थ्रोपिकको क्लाउड च्याटबोटले सेप्टेम्बरदेखि यस्तै प्रकारको सुविधा प्रदान गर्दै आएको थियो भने गुगलको जेमिनी पनि गुगल स्लाइडसँग जोडिएको छ ।

ओपनएआईले पछिल्ला महिनामा आफ्ना प्रतिस्पर्धी कम्पनीका सुविधासँग मेल खाने गरी सेवा विस्तार गरिरहेको छ । यसअघि च्याटजिपिटीलाई माइक्रोसफ्ट एक्सेल र गुगल सिटजस्ता अफिस उपकरणसँग पनि प्रयोग गर्न मिल्ने बनाइएको थियो ।

काठमाडौं। नागरिक एपले सेवा विस्तार गर्दै जन्म दर्ता, विवाह दर्ता तथा सम्बन्ध विच्छेदसम्बन्धी प्रमाणपत्र एपमै लिंक गर्न सकिने सुविधा सार्वजनिक गरेको छ । एपको नयाँ संस्करण २.०.१०० अपडेटपछि प्रयोगकर्ताले यी सेवा उपयोग गर्न सक्ने भएका छन् ।

नयाँ व्यवस्थाअनुसार व्यक्तिगत घटना दर्तासँग सम्बन्धित प्रमाणपत्रहरूलाई एपभित्र छुट्टै रूपमा समावेश गरिएको छ । यसका लागि होमपेजमा ‘भाइटल इभेन्ट सर्टिफिकेट्स’ नामक नयाँ सेक्सन थपिएको छ ।

यो सुविधामार्फत जन्म दर्ता प्रमाणपत्र लिंक गर्न दर्ता नम्बर र जन्ममिति राख्नुपर्नेछ । विवाह दर्ता प्रमाणपत्रका लागि दर्ता नम्बर र प्रमाणपत्र नम्बर आवश्यक पर्ने व्यवस्था गरिएको छ । त्यस्तै, सम्बन्ध विच्छेद प्रमाणपत्र लिंक गर्न दर्ता नम्बर तथा डिभोर्स सम्पन्न भएको मिति उल्लेख गर्नुपर्नेछ ।

यससँगै नागरिक एपमा अध्यागमनसम्बन्धी सेवा पनि थपिएको छ । अब भिजिट भिसामा विदेश जाने यात्रुले विमानस्थलमा अनिवार्य भरिनुपर्ने स्वघोषणा फाराम नागरिक एपमार्फत नै भर्न सक्नेछन् ।

सरकारले भिजिट भिसासम्बन्धी प्रक्रिया सहज र व्यवस्थित बनाउन यो सेवा सुरु गरिएको जनाएको छ । यसबाट विमानस्थलमा छुट्टै काउन्टरमा गएर फाराम भर्नुपर्ने झन्झट कम हुने अपेक्षा गरिएको छ ।

एजेन्सी। नासाको बाह्यग्रह खोज्ने अन्तरिक्ष यान ‘ट्रान्जिटिङ एक्सोप्लानेट सर्भे स्याटेलाइट (टेस)’ ले पृथ्वी वरिपरिको आकाशको अहिलेसम्मकै ठूलो खोज सार्वजनिक गरेको छ। यस नक्सामा हाम्रो सौर्यमण्डल बाहिरका करिब ६,००० सम्भावित नयाँ ग्रहहरूको पहिचान गरिएको छ।

यो तथ्यांक सन् २०२५ सेप्टेम्बरसम्म टेस मिसनको दोस्रो विस्तारित चरण सम्पन्न भएपछि संकलन गरिएको हो। टेस सन् २०१८ अप्रिलमा केप क्यानाभेरलस्थित अन्तरिक्ष प्रक्षेपण केन्द्र-४० बाट प्रक्षेपण गरिएको थियो।

नासाको गोडार्ड अन्तरिक्ष उडान केन्द्रकी टेस सह-परियोजना वैज्ञानिक रेबेका होउनेलका अनुसार, टेस विगत आठ वर्षमा बाह्यग्रह अनुसन्धानका लागि अत्यन्त महत्वपूर्ण स्रोत बनेको छ। उनका अनुसार, ‘यो मिसन ‘अत्यधिक ठूलो डेटा प्रवाह’ जस्तै भएको छ। जसले बुध ग्रहजस्ता साना ग्रहदेखि बृहस्पति भन्दा पनि ठूला ग्रहसम्मका विविध खगोलीय पिण्डहरू फेला पार्न सहयोग गरेको छ।’

टेस मिसनले ग्रहहरूलाई तिनीहरूका ताराको अगाडि जाँदा हुने अत्यन्त सानो प्रकाश घटावट (ट्रान्जिट) अध्ययन गरेर पहिचान गर्छ। यस प्रक्रियामा हजारौँ ताराहरूको प्रकाशलाई निरन्तर रूपमा विश्लेषण गरिन्छ। जसबाट ग्रहको उपस्थिति अनुमान गर्न सकिन्छ।

नयाँ प्रकाशित सम्पूर्ण आकाशीय नक्सा ९६ वटा आकाशीय क्षेत्रहरूको अवलोकनमा आधारित छ, जुन सन् २०१८ अप्रिलदेखि २०२५ सेप्टेम्बरसम्म संकलन गरिएको हो। यस नक्सामा करिब ७०० पुष्टि भएका बाह्यग्रहहरू देखाइएका छन् भने बाँकी हजारौँ ‘सम्भावित ग्रह’ अझै पुष्टि हुन बाँकी रहेका छन्।

वैज्ञानिकहरूका अनुसार यीमध्ये केही ग्रहहरू अत्यन्तै अनौठा छन्। केही आफ्नै ताराबाट नष्ट भइरहेका छन्। भने केही ग्रहहरू अत्यधिक ज्वालामुखीय गतिविधिले प्रभावित छन्। यस्ता अवस्थाहरूले ग्रहहरूको जीवनचक्र बुझ्न नयाँ संकेत दिन सक्ने विश्वास गरिएको छ।

टेस मिसनले हालै मात्र यस्तो ग्रह प्रणाली पनि पत्ता लगाएको छ। जसमा ‘सुपर-पृथ्वी’ र अर्को ग्रह अत्यधिक झुकेको र अण्डाकार कक्षामा घुमिरहेका छन्। 

साथै, दुई ग्रहहरू आपसमा ठोक्किएर ठूलो धुलो-ग्यासको बादल बनाएको प्रमाण पनि फेला परेको छ। जसले सम्भवतः पृथ्वी र अन्य खगोलीय पिण्डबीचको पुरानो टक्करबारे बुझ्न मद्दत गर्न सक्छ। त्यही घटनाबाट चन्द्रमाको उत्पत्ति भएको हुनसक्ने वैज्ञानिकहरूको अनुमान छ।

नासाका टेस परियोजना वैज्ञानिक एलिसन यङब्लडका अनुसार, ठूलो तथ्यांकको विश्लेषण गर्दै जाँदा अझ धेरै आश्चर्यजनक तथ्यहरू फेला पर्ने सम्भावना हुन्छ। उनका अनुसार टेसले केवल ग्रह मात्र होइन, युवा ताराहरूको गतिविधि, आकाशगङ्गीय परिवर्तन, तथा पृथ्वी नजिकका क्षुद्रग्रहहरूको निगरानीमा पनि महत्वपूर्ण योगदान दिइरहेको छ।

एजेन्सी। नासा सेक्युरिटिजले आफ्नो डिजिटल ट्रेडिङ प्लेटफर्मलाई परिष्कृत गर्दै ‘नासा एक्स सेल्फ सर्भिस एप’ सार्वजनिक गरेको छ । कम्पनीले आधुनिक लगानीकर्ताको आवश्यकतालाई ध्यानमा राख्दै एपलाई अझ स्मार्ट, छिटो र सुरक्षित बनाइएको जनाएको छ ।

कम्पनीका अनुसार डिजिटल रूपान्तरण र लगानीकर्ताको सशक्तीकरणलाई प्राथमिकतामा राखेर एप अपग्रेड गरिएको हो । नयाँ संस्करणमा आधुनिक ‘युजर इन्टरफेस’ (यूआई), ‘बायोमेट्रिक लग इन’, ‘एएमओ अर्डर’, ‘टिकट जेनेरेसन’, ‘हिटम्याप्स’ र ‘मोबाइल चार्टिङ टुल्स’जस्ता सुविधा थपिएका छन् ।

एपका मुख्य विशेषताहरू:

नयाँ युजर इन्टरफेस 
एपलाई अझ सहज र आधुनिक बनाइएको छ । यसले प्रयोगकर्तालाई छिटो र सरल तरिकाले सेवा प्रयोग गर्न सहयोग गर्ने कम्पनीको दाबी छ ।

बायोमेट्रिक लग इन
औँठाछाप वा अनुहार पहिचानमार्फत लगइन गर्न सकिने सुविधा थपिएको छ, जसले सुरक्षा र सहजता दुवै बढाउने बताइएको छ ।

आफ्टर मार्केट अर्डर  
शेयर बजार बन्द भएपछि पनि खरिद-बिक्री अर्डर राख्न सकिने सुविधा समावेश गरिएको छ, जसले व्यस्त वा विदेशमा रहेका लगानीकर्तालाई सहज बनाउने अपेक्षा गरिएको छ ।

टिकट जेनेरेसन
ग्राहक सेवा समस्याहरू एपबाटै दर्ता गर्न सकिने प्रणाली जोडिएको छ, जसले समाधान प्रक्रिया पारदर्शी बनाउने कम्पनीको भनाइ छ ।

हिटम्याप्स
रङको आधारमा बजारको उतारचढाव एकै नजरमा बुझ्न सकिने सुविधा थपिएको छ, जसले लगानीकर्तालाई बजार विश्लेषणमा सहयोग गर्नेछ ।

मोबाइल चार्टिङ टुल्स
मोबाइलमै प्राविधिक विश्लेषण गर्न सकिने सुविधा उपलब्ध गराइएको छ, जसले लगानी निर्णयलाई सहज बनाउने बताइएको छ ।

कम्पनीका अनुसार उक्त एप हाल एन्ड्रोइड र आईओएस दुवै प्लेटफर्ममा उपलब्ध छ । नासा सेक्युरिटिजले पुराना प्रयोगकर्तालाई एप अपडेट गर्न र नयाँ प्रयोगकर्तालाई दर्ता गरी सेवा सुरु गर्न आग्रह गरेको छ ।