Author: nepalone

काठमाडौं । रसुवाको भोटेकोशीमा आएको भीषण बाढीपछि नेपालतर्फ करिब एक सय चिनियाँ नागरिक सम्पर्कविहीन भएको चीनको विदेश मन्त्रालयले जनाएको छ।

चिनियाँ विदेश मन्त्रालयका प्रवक्ता लिन जियानले बिहीबार आयोजित नियमित पत्रकार सम्मेलनमा बाढीका कारण नेपालमा रहेका करिब १ सय चिनियाँ नागरिक बेपत्ता भएको जानकारी दिएका हुन्।

उनका अनुसार नेपालस्थित चिनियाँ दूतावासले नेपाली सम्बन्धित निकायसँग समन्वय गरेर बेपत्ता चिनियाँ नागरिकको विवरण यकिन गर्ने तथा खोजी कार्य अघि बढाइरहेको छ।

बाढी प्रभावित क्षेत्रमा खोज तथा उद्धार अभियान जारी रहेकाले बेपत्ता नागरिकको अवस्थाबारे थप विवरण संकलन भइरहेको चीनले जनाएको छ।

काठमाडौं। रसुवाको भोटेकोशी नदीमा आएको भीषण बाढीमा परी ज्यान गुमाउनेको संख्या २७० पुगेको छ । प्रहरी प्रधान कार्यालयका अनुसार विभिन्न जिल्लाबाट हालसम्म २७० जनाको शव फेला परेको हो ।

प्रहरीका अनुसार रसुवामा १७, नुवाकोटमा १२, धादिङमा २७ र चितवनमा १०८ जनाको शव भेटिएको छ ।

त्यस्तै, गोरखामा २०, तनहुँमा ९, नवलपरासी पूर्वमा ६२ र नवलपरासी पश्चिममा १५ जनाको शव फेला परेको केन्द्रीय समाचार कक्षले जनाएको छ ।

बाढी प्रभावित क्षेत्रमा बेपत्ताको खोजी तथा उद्धार कार्य अझै जारी रहेकाले मृतकको संख्या थप बढ्न सक्ने प्रहरीले जनाएको छ।

काठमाडौं। रसुवाको भोटेकोशी नदीमा आएको विनाशकारी बाढीपछि सुदूरपश्चिम प्रदेशका ८५ जना सम्पर्कविहीन भएका छन् ।

प्रदेश प्रहरी कार्यालयका अनुसार बेपत्ता हुनेमा सर्वसाधारणसँगै सुरक्षाकर्मी पनि छन् ।

प्रहरीका अनुसार सम्पर्कविहीनमध्ये चार जना सुरक्षाकर्मी छन् । उनीहरूमध्ये तीन जना नेपाल प्रहरी र एक जना सशस्त्र प्रहरीका रहेको प्रदेश प्रहरी कार्यालयका प्रवक्ता एसएसपी पदमबहादुर विष्टले जानकारी दिए ।

जिल्लागत विवरणअनुसार कञ्चनपुरका २९ जना, कैलालीका २०, डडेल्धुराका १५, बाजुराका १४, बैतडीका ४, डोटीका २ र अछामका एक जना सम्पर्कविहीन छन् ।

सम्पर्कविहीनमध्ये अधिकांश रसुवाका विभिन्न जलविद्युत् आयोजनामा काम गर्ने मजदुर रहेको प्रहरीले जनाएको छ । केही सरकारी कर्मचारी तथा विभिन्न संघसंस्थामा कार्यरत व्यक्तिसमेत बाढीपछि परिवारको सम्पर्कमा आउन सकेका छैनन् ।

प्रहरीले बाढी प्रभावित क्षेत्रमा खोजी तथा उद्धारलाई निरन्तरता दिएको छ । सम्पर्कविहीन व्यक्तिबारे जिल्लाबाट थप विवरण संकलन गर्ने काम भइरहेकाले संख्या अझै बढ्न सक्ने एसएसपी विष्टले बताए ।

प्रदेश प्रहरीले रसुवामा रहेका सुदूरपश्चिमका नागरिकको अवस्थाबारे जानकारी जुटाउँदै उनीहरूका परिवारसँग समेत समन्वय गरिरहेको जनाएको छ ।

भोटेकोशी बाढीले रसुवाका विभिन्न क्षेत्रमा ठूलो जनधन तथा भौतिक संरचनामा क्षति पुर्‍याएको छ।

काठमाडौं । रसुवाको भोटेकोशी नदीमा आएको भीषण बाढीपछि विभिन्न जिल्लामा फेला परेका शवको संख्या बढ्दै जाँदा मृत्यु हुनेको संख्या १७७ पुगेको छ।

नेपाल प्रहरीले दिएको पछिल्लो विवरणअनुसार बाढी प्रभावित नदी तटीय क्षेत्रबाट शव भेटिने क्रम अझै रोकिएको छैन। मृतकमध्ये ४१ महिला, ६९ पुरुष, १० बालिका र ७ बालक छन्। थप ५० शवको पहिचान खुल्न बाँकी रहेको प्रहरीले जनाएको छ।

बाढीको असर रसुवाबाट सुरु भएर नुवाकोट, धादिङ, गोरखा, चितवन, तनहुँ र नवलपरासी पूर्वसम्म पुगेको छ।

प्रहरीका अनुसार रसुवामा दुई पुरुषको शव भेटिएको छ। नुवाकोटमा चार महिला, ६ पुरुष र पहिचान नखुलेका दुई जनाको शव फेला परेको छ।

धादिङमा नौ महिला, ११ पुरुष, एक बालिका तथा पहिचान खुल्न नसकेका ६ जनाको शव भेटिएको छ। गोरखामा दुई महिला, १० पुरुष, एक बालक र पहिचान नखुलेका सात जनाको मृत्यु भएको पुष्टि भएको छ।

चितवनमा सबैभन्दा धेरै ६९ जनाको शव फेला परेको छ। त्यहाँ १५ महिला, १९ पुरुष, दुई बालिका, चार बालक र पहिचान खुल्न नसकेका २९ जनाको शव भेटिएको प्रहरीले जनाएको छ।

त्यस्तै, तनहुँमा एक महिला, ६ पुरुष, एक बालिका र एक बालक तथा नवलपरासी पूर्वमा ६ महिला, १५ पुरुष, चार बालिका, एक बालक र पहिचान नखुलेका ६ जनाको शव फेला परेको छ।

बाढीपछि अझै पनि विभिन्न स्थानमा बेपत्ता रहेकाहरूको खोजी जारी छ। क्षतिको थप विवरण संकलनसँगै शवको पहिचान गर्ने कामसमेत भइरहेको प्रहरीले जनाएको छ।

काठमाडौं । रसुवागढी क्षेत्रमा आएको भोटेकोशी बाढीमा परी मृत्यु हुनेको संख्या १६५ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणको पछिल्लो विवरणअनुसार देशका विभिन्न जिल्लामा १६५ जनाको शव फेला परेको हो।

सबैभन्दा धेरै चितवनमा ६४ जनाको शव भेटिएको छ। धादिङमा २७, नवलपरासी पूर्वमा २६, गोरखामा २०, नुवाकोटमा १२, तनहुँमा ९, नवलपरासी पश्चिममा ५ र रसुवामा २ जनाको मृत्यु भएको छ।

बाढीपछि ८२६ जना अझै सम्पर्कविहीन छन्। बेपत्तामध्ये ५७९ जना पर्यटक छन्। नेपाली सेनाका ४४, नेपाल प्रहरीका २८ र सशस्त्र प्रहरीका १३ जना सुरक्षाकर्मी पनि बेपत्ता रहेको प्राधिकरणले जनाएको छ।

जिल्ला आपत्कालीन कार्य सञ्चालन केन्द्रका अनुसार रसुवाबाट १६१ र नुवाकोटबाट एक जना सम्पर्कविहीन छन्। बाढीमा ७३ जना घाइते भएका छन्। घाइतेमध्ये रसुवाका ४३, नुवाकोटका २७ र धादिङका तीन जना छन्।

साढे ७ हजार सुरक्षाकर्मी परिचालन

बाढी प्रभावित क्षेत्रमा खोज तथा उद्धारका लागि ७ हजार ४५१ सुरक्षाकर्मी परिचालन गरिएको छ। नेपाल प्रहरीका ३ हजार ३१८, नेपाली सेनाका २ हजार ३९१ र सशस्त्र प्रहरीका १ हजार ७४२ जना उद्धारमा खटिएका छन्।

हालसम्म ३०५ जनाको हवाई उद्धार गरिएको छ। बिहान १०ः३० बजेसम्म ३७ वटा हवाई उडान भइसकेका छन् भने थप ११ हेलिकप्टर उद्धारमा परिचालित छन्। जमिनमार्गबाट पनि ६३ जनाको उद्धार गरिएको छ।

सरकारले रसुवा र नुवाकोटलाई एक–एक करोड तथा धादिङलाई ५० लाख रुपैयाँ नगद राहत उपलब्ध गराएको छ। राहत सामग्री बोकेका १० वटा ट्रक प्रभावित क्षेत्रतर्फ पठाइएको छ।

उद्धार र राहतलाई सहज बनाउन प्रभावित क्षेत्रमा सञ्चार उपकरणसमेत पठाइएको छ। इन्धनको अभाव हुन नदिन नुवाकोटमा डिजेल, पेट्रोल र हवाई इन्धनको थप व्यवस्था गरिएको प्राधिकरणले जनाएको छ।

प्राधिकरणका अनुसार विवरण जिल्ला प्रशासन कार्यालय तथा जिल्ला आपत्कालीन कार्य सञ्चालन केन्द्रबाट प्राप्त सूचनाका आधारमा तयार गरिएको हो।

काठमाडौं । रसुवाको भोटेकोशीमा आएको विनाशकारी बाढीबाट प्रभावितका लागि भारतले थप राहत सामग्री पठाएको छ। भारत सरकारले मानवीय सहायता, विपद् राहत सामग्री, औषधि र खाद्यान्नसहित ३७.५ टन सामग्री बोकेको दोस्रो विमान नेपालका लागि पठाएको हो।

भारतीय विदेशमन्त्री डा. एस जयशङ्करले सामाजिक सञ्जाल एक्समार्फत राहत सामग्री बोकेको विमान काठमाडौंका लागि उडिसकेको जानकारी दिएका छन्।

उनका अनुसार भारत नेपालका सम्बन्धित अधिकारीहरूसँग निरन्तर सम्पर्कमा रहेर राहत तथा उद्धार प्रयासमा सहकार्य गरिरहेको छ। बाढीबाट प्रभावित नेपाली नागरिकलाई आवश्यक सहयोग उपलब्ध गराउन भारतले आफ्नो तर्फबाट निरन्तर सहयोग गर्ने प्रतिबद्धता पनि उनले जनाएका छन्।

जयशङ्करले विपद्मा ज्यान गुमाउनेका परिवार तथा प्रभावित सबैप्रति समवेदना व्यक्त गर्दै कठिन परिस्थितिमा भारत नेपाल र नेपाली जनताको साथमा रहेको बताएका छन्।

यसअघि भारतले १० टन राहत सामग्री नेपाल पठाइसकेको थियो। उक्त सामग्री त्रिभुवन अन्तर्राष्ट्रिय विमानस्थलमा नेपालका लागि भारतीय राजदूत नवीन श्रीवास्तवले संस्कृति, पर्यटन तथा नागरिक उड्डयनमन्त्री खड्कराज पौडेल ‘गनेस’लाई हस्तान्तरण गरेका थिए।

रसुवाको भोटेकोशीबाट सुरु भएको बाढीले रसुवासहित नुवाकोट, धादिङ, चितवनलगायतका क्षेत्रमा ठूलो जनधनको क्षति पुर्‍याएको छ। विपद्पछि प्रभावित क्षेत्रमा खोज तथा उद्धारसँगै तत्कालीन राहत वितरणको काम जारी छ।

काठमाडौं । रसुवाको भोटेकोशीमा आएको भीषण बाढी र पहिरोबारे चीनले प्रारम्भिक कारण सार्वजनिक गरेको छ।

नेपालका लागि चिनियाँ राजदूत चाङ माओमिङका अनुसार विपद्को दिन बिहान नेपालतर्फ गएको भूकम्पपछि हिमपहिरो र त्यसलगत्तै लेदोसहितको बाढी आएको प्रारम्भिक जानकारी चीनले पाएको छ।

एक अन्तर्वार्तामा राजदूत चाङले भूकम्पपछि सिर्जना भएको प्राकृतिक घटनाले नेपाल–चीन सीमाको केरुङ–रसुवागढी क्षेत्रसहित दुवैतर्फ ठूलो क्षति पुर्‍याएको बताए।

उनका अनुसार घटनामा मानवीय क्षति हुनुका साथै ठूलो संख्यामा मानिस सम्पर्कविहीन भएका छन्। विपद्मा ज्यान गुमाउनेहरूप्रति श्रद्धाञ्जली व्यक्त गर्दै उनले चीन सरकार र चिनियाँ जनताका तर्फबाट नेपाल सरकार तथा नेपाली जनताप्रति गहिरो समवेदना प्रकट गरे।

विपद्को खबर पाएलगत्तै चिनियाँ राष्ट्रपति सी चिनफिङले उद्धार तथा राहतलाई उच्च प्राथमिकता दिन निर्देशन दिएको राजदूत चाङले बताए।

उनले बेपत्ता नागरिकको खोजी, जोखिममा रहेका मानिसलाई सुरक्षित स्थानमा सार्ने तथा घाइतेको तत्काल उपचारमा जोड दिएका छन्। मानवीय क्षति थप हुन नदिन सबै सम्भावित स्रोत परिचालन गर्न राष्ट्रपतिको निर्देशन रहेको राजदूतले जानकारी दिए।

विपद् लगत्तै काठमाडौंस्थित चिनियाँ दूतावासले समेत आपत्कालीन संयन्त्र सक्रिय पारेको छ। प्रभावित क्षेत्रको अवस्था बुझ्न तथा उद्धार कार्यमा समन्वय गर्न दूतावासले कार्यदलसमेत परिचालन गरेको उनले बताए।

सीमाको चीनतर्फ पनि बाढी र पहिरोले ठूलो क्षति पुर्‍याएको अवस्थामा नेपालका लागि आवश्यक आपत्कालीन राहत सामग्री तथा आर्थिक सहयोग उपलब्ध गराउने प्रक्रिया अघि बढाइएको राजदूत चाङले बताए।

विपद् व्यवस्थापनको अवस्था बुझ्न चीनको राज्य परिषद्का उपप्रधानमन्त्री चाङ गोछिङले तिब्बत पुगेर उद्धार कार्यको स्थलगत मार्गदर्शन गरेको राजदूतले जानकारी दिए।

चीनका परराष्ट्र, जलस्रोत, मौसम विज्ञान तथा आपत्कालीन व्यवस्थापनसम्बन्धी निकाय र तिब्बत स्वायत्त क्षेत्रका अधिकारीहरूले नेपाली अधिकारीसँग समन्वय गरेर उद्धार तथा क्षतिको मूल्याङ्कन अघि बढाइरहेका छन्।

राजदूत चाङले विपद् तत्कालको उद्धारमा मात्र सीमित नराखी भविष्यमा यस्ता घटना हुँदा क्षति कम गर्नेगरी नेपाल र चीनबीच सहकार्य अझ बलियो बनाउनुपर्ने बताए।

उनले नेपाल–चीनबीच मुख्यतः पूर्वसूचना तथा चेतावनी प्रणाली, आपत्कालीन उद्धारमा समन्वय र जनशक्तिको क्षमता अभिवृद्धिमा सहकार्य गर्न सकिने बताए।

मौसम, जलविज्ञान र भौगर्भिक जोखिमको नियमित अनुगमन गर्दै सीमापार विपद्को सूचना समयमै आदानप्रदान गर्ने संयन्त्र बलियो बनाउनुपर्ने उनको भनाइ छ।

त्यस्तै, विपद्का बेला दुई देशका उद्धार निकायबीच तत्काल समन्वय हुने प्रणाली विकास गर्नुपर्ने र प्राविधिक जनशक्तिलाई तालिम तथा आवश्यक उपकरण उपलब्ध गराएर स्थानीय तहको विपद् सामना गर्ने क्षमता बढाउनुपर्ने उनले बताए।

संकटको यो घडीमा नेपाल सरकार र नेपाली जनताले देखाएको धैर्य तथा उद्धार प्रयासको प्रशंसा गर्दै राजदूत चाङले हिमाल र नदीले जोडिएका छिमेकीका रूपमा नेपाललाई आवश्यक सहयोग गर्न चीन तयार रहेको प्रतिबद्धता दोहोर्‍याएका छन्।

काठमाडौं। रसुवाको टिमुरेमा भोटेकोशी नदीमा आएको भीषण बाढीपछि तीन महिनाको शिशुसहित एकै परिवारका तीन जना सम्पर्कविहीन भएका छन्।

कालिकोटको खाँडाचक्र नगरपालिका–५ घर भएकी सरिता मल्ल टिमुरे स्वास्थ्य चौकीमा कार्यरत थिइन्। उनीसँग तीन महिनाका छोरा काव्यांश शाही पनि थिए। बच्चाको हेरचाहका लागि सरिताकी नन्द दुर्गा शाही पनि टिमुरे पुगेकी थिइन्।

भोटेकोशीमा बाढी आएपछि सरिता, उनका तीन महिनाका छोरा काव्यांश र नन्द दुर्गा तीनै जना सम्पर्कविहीन भएका हुन्। उनीहरूसँग अहिलेसम्म कहीँ कतैबाट सम्पर्क हुन सकेको छैन।

सरिताका श्रीमान् कमल शाही पनि बाढी प्रभावित क्षेत्रमै रहेको परिवारले जनाएको छ। उनले फोन स्वीच अफ हुनुअघि आफ्ना मामा धनसुर शाहीलाई फोन गर्दै श्रीमती, बहिनी र छोराको खोजी गरिरहेको बताएका थिए।

‘मामा, म श्रीमती, बहिनी र छोरालाई खोजिरहेको छु। अहिलेसम्म अत्तोपत्तो छैन। बिहान ९ बजेदेखि सम्पर्कविहीन छन्,’ कमलले भनेका थिए।

त्यसपछि कमलसँग पनि सम्पर्क हुन सकेको छैन। उनको फोनसमेत स्वीच अफ रहेको मामा धनसुर शाहीले बताए।

श्रीमती, बहिनी र तीन महिनाको छोरासमेत एकैपटक सम्पर्कविहीन भएपछि कमल अत्यन्तै चिन्तित छन्। यता कालिकोटमा रहेका परिवारका अन्य सदस्यहरू पनि उनीहरूको अवस्थाबारे जानकारी नपाउँदा गहिरो पीडामा छन्।

परिवारले सरिता, दुर्गा र नाबालक काव्यांशको तत्काल खोजी तथा उद्धार गरिदिन सम्बन्धित सबै निकायसँग आग्रह गरेको छ।

तीन महिनाको नाबालकसहित बेपत्ता भएका आफ्ना प्रियजन सकुशल भेटिऊन् भन्ने आशामा परिवार अहिले भगवान्सँग प्रार्थना गरिरहेको छ।

काठमाडौं। रसुवाको भोटेकोशीमा आएको विनाशकारी बाढीमा मधेश प्रदेशका ३० जना सम्पर्कविहीन भएका छन् ।

मधेश प्रदेश प्रहरी कार्यालय, जनकपुरधामले बिहीबार जारी गरेको विज्ञप्तिअनुसार परिवार तथा आफन्तबाट प्राप्त सूचनाका आधारमा उनीहरू रसुवाका विभिन्न स्थानमा काम गर्दै वा बसोबास गर्दै आएका थिए । बाढीपछि उनीहरूसँग सम्पर्क हुन नसकेको प्रहरीले जनाएको छ ।

प्रहरीका अनुसार पर्साका १६, बाराका ३, रौतहटका २, सर्लाहीका ६ र सप्तरीका २ जना सम्पर्कविहीन छन् ।

पर्साबाट सम्पर्कविहीन हुनेमा नारायण पटेल, सुबोध पटेल, अरुण हजरा, श्यामबाबु ठाकुर, उकेश दंगोल, सञ्जय तामाङ, आकाश तामाङ, कमरुल होदा अंसारी, सुभाष पटेल, समिम देवान, अनुतमबहादुर श्रेष्ठ, अभिषेक बस्तोला, घनश्याम बस्तोला, दिनेश परियार र पृथ्वी चौधरीलगायत छन् ।

बाराका नारायण सिंह, सत्यप्रकाश राम र अन्कित पटेलको अवस्था पनि हालसम्म पत्ता लाग्न सकेको छैन । त्यस्तै रौतहटका गौरव राउत र शेख मजिद सम्पर्कविहीन छन् ।

सर्लाहीका माधव काफ्ले, अनुज काफ्ले, कृष्णप्रसाद धमला, द्वारिका दंगाल, चिरञ्जीवी खतिवडा र सुनिल कुशवाहा पनि सम्पर्कविहीन रहेको प्रहरीले जनाएको छ । सप्तरीका अजयकुमार यादव र साजन चौधरीको अवस्थासमेत यकिन हुन सकेको छैन ।

प्रहरीका अनुसार सम्पर्कविहीनको सूचीमा रहेका सर्लाहीका ज्ञानबहादुर थिङ र श्यामलाल मोक्तान भने उद्धारपछि परिवारको सम्पर्कमा आएका छन् ।

बाँकी व्यक्तिको अवस्था पत्ता लगाउन खोज तथा उद्धार कार्य भइरहेको प्रहरीले जनाएको छ ।

मधेश प्रदेश प्रहरीले सम्पर्कविहीन व्यक्तिका परिवार तथा आफन्तलाई अनावश्यक त्रासमा नपर्न र अपुष्ट सूचनाको पछि नलाग्न आग्रह गरेको छ ।

काठमाडौं। पूर्वराजा ज्ञानेन्द्र शाहले रसुवाको भोटेकोशी नदीमा आएको भीषण बाढीबाट भएको जनधनको क्षतिप्रति गहिरो दुःख व्यक्त गर्दै विपद्मा परेकाहरूको उद्धार तथा राहतका लागि सबै पक्षलाई एकजुट हुन अपिल गरेका छन्।

देशवासीका नाममा बुधबार जारी सन्देशमा पूर्वराजा शाहले चीनको स्वशासित प्रदेश तिब्बतमा हिमताल फुटेर आएको भीषण बाढी भोटेकोशी र त्रिशूली नदीमा प्रवेश गरेपछि रसुवा, नुवाकोट, धादिङ, गोरखा, चितवन र नवलपरासीका जलतटीय क्षेत्रमा ठूलो क्षति पुगेको उल्लेख गरेका छन्।

बाढीबाट बजार, बस्ती, बाटोघाटो, पुलपुलेसा, विद्युत् आयोजना लगायतका भौतिक संरचना तथा खेतीपातीमा अपार क्षति पुगेको भन्दै उनले घटनाप्रति दुःख व्यक्त गरेका हुन्।

भोटेकोशीमा आएको बाढीले नुवाकोटको त्रिशूली बजार आसपासका करिब ६० घर तथा दुईवटा पक्की पुलसमेत बगाएको प्रारम्भिक विवरण सार्वजनिक भएको छ। बाढीका कारण रसुवा, नुवाकोट र धादिङका विभिन्न क्षेत्रमा ठूलो भौतिक क्षति भएको छ भने मानवीय क्षतिको विवरणसमेत बढ्दै गएको छ।

पूर्वराजा शाहले प्राकृतिक विपद्मा परी ज्यान गुमाएकाहरूप्रति श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गरेका छन्। उनले घाइतेहरूको शीघ्र स्वास्थ्यलाभको कामना गर्दै सुरक्षाकर्मीसहित बेपत्ता भएका नागरिकको तत्काल खोजी कार्य तीव्र पार्न आवश्यक रहेको बताएका छन्।

उनले विपद्को यस दुःखद् घडीमा खोजी, उद्धार, राहत तथा उपचारका कार्यमा कुनै कमी हुन नदिन सम्बन्धित सबै निकायलाई आग्रह गरेका छन्।

सरकार, सुरक्षा निकाय, राष्ट्रसेवक, स्थानीय तह, सामाजिक संघसंस्था तथा आमनागरिक सबैले आ–आफ्नो क्षेत्रबाट सक्दो सहयोग गर्दै विपद्मा परेकाहरूको उद्धार र राहत कार्यलाई प्रभावकारी बनाउन एकजुट हुनुपर्ने उनको भनाइ छ।

‘विपद्मा परेकाहरूको उद्धार तथा राहत कार्यलाई प्रभावकारी बनाउन एकजुट हुन’ आग्रह गर्दै उनले यस्तो संकटको सामना सामूहिक प्रयासबाट मात्र प्रभावकारी रूपमा गर्न सकिने सन्देश दिएका छन्।

भोटेकोशीको बाढीपछि सरकारले प्रभावित क्षेत्रमा उद्धार तथा राहतलाई तीव्र बनाएको छ। नेपाली सेना, नेपाल प्रहरी तथा सशस्त्र प्रहरी परिचालन हुनुका साथै हेलिकोप्टरमार्फत उद्धारको प्रयास भइरहेको छ। प्रभावित रसुवा, नुवाकोट र धादिङलाई सरकारले तीन महिनाका लागि विपद् संकटग्रस्त क्षेत्र घोषणा गर्ने निर्णयसमेत गरेको छ।

पूर्वराजा शाहले नेपालसँग सीमा जोडिएको छिमेकी देशमा आएको प्राकृतिक विपद्ले अर्को देशलाई समेत प्रत्यक्ष प्रभाव पार्न सक्ने भएकाले यस्ता विपद् न्यूनीकरणका लागि अलग–अलग प्रयासभन्दा द्विपक्षीय तथा संयुक्त प्रयास प्रभावकारी हुन सक्ने बताएका छन्।

उनले विपद्बाट हुने क्षति न्यूनीकरणका लागि अन्तर्राष्ट्रिय तथा छिमेकी मुलुकसँगको सहकार्यलाई समेत ध्यान दिनुपर्ने आवश्यकता औँल्याएका छन्।

काठमाडौं। रसुवाको भोटेकोशीमा आएको भीषण बाढीबाट प्रभावित नागरिकको तत्काल उद्धार, राहत तथा पुनःस्थापनामा जुट्न राष्ट्रिय मानव अधिकार आयोगले सरकारसहित सबै पक्षलाई अपिल गरेको छ ।

आयोगले बुधबार विज्ञप्ति जारी गर्दै बाढीमा परी नागरिक, सुरक्षाकर्मी, कर्मचारी तथा आन्तरिक र बाह्य पर्यटकको मृत्यु भएको, कैयौँ बेपत्ता तथा घाइते भएको र ठूलो भौतिक क्षति पुगेको घटनाप्रति गहिरो दुःख व्यक्त गरेको छ ।

आयोगले विपद्मा परेका नागरिकको जीवन रक्षा, बेपत्ताको खोजी तथा घाइतेको तत्काल उद्धार र उपचारलाई पहिलो प्राथमिकतामा राख्न आग्रह गरेको छ । साथै, बाढीका कारण विस्थापित तथा प्रभावित परिवारलाई सुरक्षित स्थानमा राख्ने र आवश्यक राहत उपलब्ध गराउने व्यवस्था तत्काल मिलाउन सरकारको ध्यानाकर्षण गराएको छ ।

उद्धार तथा पुनःस्थापनाका कार्यमा नेपाल सरकार, राजनीतिक दल, कर्मचारी, सुरक्षाकर्मी तथा आम नागरिक सबैले आ–आफ्नो क्षेत्रबाट सहयोग गर्नुपर्ने आयोगको भनाइ छ ।

विपद्को कठिन अवस्थामा मानवीय सहयोग र समन्वयलाई प्रभावकारी बनाउँदै प्रभावित नागरिकको अधिकार तथा सुरक्षालाई केन्द्रमा राखेर उद्धार, राहत र पुनःस्थापनाका काम अघि बढाउन आयोगले आग्रह गरेको छ ।

काठमाडौं। रसुवाको भोटेकोशी नदीमा आएको भीषण बाढीमा परी मृत्यु हुनेको संख्या २२ पुगेको छ ।

बागमती प्रदेश प्रहरी कार्यालयको पछिल्लो विवरणअनुसार रसुवा, नुवाकोट, धादिङ र चितवनमा गरी २२ जनाको मृत्यु भएको हो ।

प्रहरीका अनुसार रसुवामा एक पुरुषको मृत्यु भएको छ । नुवाकोटमा पाँच महिला र छ पुरुष गरी ११ जनाको मृत्यु भएको छ । त्यस्तै धादिङमा पाँच महिला, दुई पुरुष र दुई जनाको पहिचान खुल्न नसकेको अवस्थामा मृत्यु भएको छ । चितवनमा एक महिलाको मृत्यु भएको प्रहरीले जनाएको छ ।

बाढी प्रभावित विभिन्न क्षेत्रमा घाइते अवस्थामा ६५ जनाको उद्धार गरिएको छ । तीमध्ये रसुवाबाट ४३, नुवाकोटबाट १९ र धादिङबाट तीन जनाको उद्धार गरिएको विवरणमा उल्लेख छ ।

उद्धार गरिएका घाइतेमध्ये ६ जनालाई काठमाडौं ल्याइएको छ भने ३६ जना धुन्चेमा उपचाररत रहेको प्रहरीले जनाएको छ । एक प्रहरीसहित अन्य घाइतेलाई नुवाकोटमा उद्धार गरिएको विवरणमा उल्लेख छ ।

भोटेकोशी हुँदै त्रिशूली नदीमा आएको बाढीले रसुवा, नुवाकोट र धादिङमा ठूलो जनधनको क्षति पुर्‍याएको छ।

बाढीको प्रभाव तल्लो तटीय क्षेत्रसम्म पुगेपछि चितवनमा समेत मानवीय क्षति भएको हो ।

प्रभावित क्षेत्रमा बेपत्ता नागरिकको खोजी तथा उद्धार कार्य अझै जारी रहेको प्रहरीले जनाएको छ ।

काठमाडौं । प्रधानमन्त्री बालेन शाहलाई सामाजिक सञ्जालमार्फत ज्यान मार्ने धम्की दिएको आरोपमा प्रहरीले एक युवकलाई पक्राउ गरेको छ ।

पक्राउ पर्नेमा झापाको भद्रपुर–९ घर भई काठमाडौंको कीर्तिपुरमा बस्दै आएका २३ वर्षीय पुस्कर दहाल रहेका छन् । उनलाई काठमाडौं उपत्यका अपराध अनुसन्धान कार्यालयको टोलीले कीर्तिपुर नयाँ बजारबाट पक्राउ गरेको हो ।

प्रहरीका अनुसार दहालले इन्स्टाग्राममा प्रधानमन्त्री शाहलाई लक्षित गर्दै २३ भदौमा ‘सिध्याइदिने’ भन्दै धम्कीपूर्ण स्टाटस लेखेका थिए । उक्त स्टाटसमा प्रहरीलाई समेत ट्याग गर्नुका साथै आपत्तिजनक शब्द प्रयोग गरेको प्रहरीको भनाइ छ ।

पक्राउ परेका दहाललाई थप अनुसन्धान तथा आवश्यक कारबाहीका लागि साइबर ब्यूरो, भोटाहिटी पठाइएको छ ।

प्रहरी स्रोतका अनुसार दहाल कुलमान घिसिङ नेतृत्वको उज्यालो नेपाल पार्टीमा आबद्ध रहेका छन् ।

काठमाडौं । गृहमन्त्री सुधन गुरुङले रसुवा र नुवाकोटमा बाढीबाट प्रभावित नागरिकको उद्धारलाई सरकारको पहिलो प्राथमिकतामा राखिएको बताएका छन् ।

विमानस्थलबाटै खोज तथा उद्धार अभियानको नेतृत्व गरिरहेका मन्त्री गुरुङले रात परेपछि हेलिकप्टरमार्फत उद्धार गर्न कठिन हुने भएकाले उपलब्ध सुरक्षा संयन्त्रलाई तत्काल उद्धारमा केन्द्रित गरिएको जानकारी दिए ।

उनका अनुसार रसुवाको टिमुरे, स्याफ्रुबेँसी र रसुवागढी तथा नुवाकोटका जोखिमयुक्त क्षेत्रमा रहेका नागरिकलाई उच्च सतर्कतामा राखिएको छ । सम्भावित थप क्षतिलाई ध्यानमा राख्दै सुरक्षाकर्मीहरूलाई परिचालन गरी उद्धारको काम तीव्र पारिएको उनले बताए ।

‘हाम्रो पहिलो प्राथमिकता रेस्क्यु हुन्छ,’ मन्त्री गुरुङले भने ।

उद्धार अभियान पूरा भएपछि विस्थापित नागरिकका लागि राहत तथा अस्थायी आवासको व्यवस्था गरिने उनको भनाइ छ । उनले हिमताल वा ग्लेसियर फुटेपछि आएको बाढीका कारण ठूलो क्षति भएको प्रारम्भिक जानकारी प्राप्त भएको बताए ।

मन्त्री गुरुङका अनुसार अहिले उपलब्ध हेलिकप्टरहरू उद्धार कार्यमै प्रयोग भइरहेका छन् । उद्धार अभियान प्रभावित नहोस् भनेर निजी प्रयोजनका लागि हेलिकप्टर उडानमा रोक लगाइएको उनले जानकारी दिए ।

उद्धार आवश्यक रहेका स्थानमा फसेका नागरिकलाई हेलिकप्टरबाट देखिने गरी आगो बालेर वा अन्य माध्यमबाट संकेत दिनसमेत उनले आग्रह गरेका छन् । सुरक्षा निकायलाई आपसी समन्वयसहित उद्धारमा तीव्र रूपमा परिचालित हुन निर्देशन दिइएको मन्त्री गुरुङले बताए ।