`

Author: nepalone

निगमकै मिलेमतो : २० हजार लिटर पेट्रोल बोकेको ट्यांकर गायब

Posted on by nepalone

विराटनगर। नेपाल आयल निगमको कोशी प्रादेशिक कार्यालय, विराटनगरस्थित डिपोबाट २० हजार लिटर पेट्रोल बोकेको ट्यांकर गायब भएको घटनाले इन्धन वितरण प्रणाली र सुरक्षा व्यवस्थामाथि गम्भीर प्रश्न उठाएको छ।

प्रारम्भिक अनुसन्धानअनुसार कर्मचारी, चालक र ढुवानीकर्ताको मिलेमतोमा ठूलो परिमाणमा पेट्रोल अनधिकृत रूपमा बिक्री गरिएको आशंका गरिएको हो।

कञ्चनवारीस्थित डिपो पार्किङस्थलमा राखिएको नवीन ढुवानी सेवाको को१ख ६१९० नम्बरको ट्यांकर आइतबार राति करिब ८ बजेभित्र प्रवेश गरेको थियो। भारतको सिलगुढीबाट २० हजार लिटर पेट्रोल लिएर आएको उक्त ट्यांकर डिपोभित्र भण्डारणगृहमा इन्धन खन्याउन पालो कुरेर पार्किङमा राखिएको थियो।

तर सोमबार बिहान उक्त ट्यांकर सुनसरीको भोक्राहा नरसिंह गाउँपालिका–८ स्थित हुलाकी सडकखण्डमा फेला परेको प्रहरीले जनाएको छ। प्रहरीका अनुसार ट्यांकरमा प्रारम्भिक जाँच गर्दा करिब १ हजार २ सय लिटर मात्र पेट्रोल बाँकी रहेको पाइएको छ। बाँकी करिब १८ हजार ८ सय लिटर पेट्रोल गायब भएको देखिन्छ।

हालको बजार मूल्यअनुसार प्रति लिटर २१४ रुपैयाँ ५० पैसाका दरले हिसाब गर्दा गायब भएको पेट्रोलको मूल्य करिब ४० लाख रुपैयाँभन्दा बढी हुन आउँछ। प्रारम्भिक अनुमानअनुसार सो परिमाणको इन्धन अनधिकृत रूपमा विभिन्न पेट्रोल पम्प वा अन्य माध्यममार्फत बिक्री गरिएको हुन सक्ने आशंका गरिएको छ।

डिपो प्रमुख पुष्कर कार्कीका अनुसार घटनाबारे प्रहरी अनुसन्धान सुरु भइसकेको छ र ट्यांकरलाई आवश्यक मुचुल्कापछि डिपोमा ल्याउने तयारी भइरहेको छ। उनले घटनालाई गम्भीर रूपमा लिएको उल्लेख गर्दै निगमले आन्तरिक छानबिन पनि अघि बढाउने बताए।

यो घटना पहिलो भने होइन। यसअघि पनि विराटनगर डिपोबाट पटक–पटक इन्धन लोड भएका ट्यांकरहरू गायब हुने तथा भित्रकै मिलेमतोमा पेट्रोल बेचिने घटना सार्वजनिक हुँदै आएका छन्। २०७८ भदौमा पनि ट्यांकर चोरी भएको घटना भएको थियो भने २०७५ र २०७७ मा समेत यस्तै प्रकृतिका घटनाहरू दोहोरिएका थिए।

प्रहरी स्रोतका अनुसार डिपो परिसर अग्लो पर्खाल र सुरक्षा घेराभित्र भए पनि यस्ता घटना दोहोरिनुले संगठित गिरोह सक्रिय रहेको संकेत गर्छ। सुरक्षाको उच्च घेराभित्रै ट्यांकर बाहिर निकालिनु र ठूलो परिमाणको इन्धन गायब हुनुमा सामान्य भरियाको मात्र संलग्नता हुन नसक्ने प्रहरीको प्रारम्भिक मूल्यांकन छ।

अनुसन्धानमा संलग्न अधिकारीहरूका अनुसार यस प्रकारका घटनामा प्रायः आन्तरिक मिलेमतो बिना यति ठूलो परिमाणको इन्धन बाहिर निकाल्न सम्भव हुँदैन। विगतमा पनि यस्ता घटनामा कर्मचारीमाथि कारबाही कमजोर भएकाले पुनः दोहोरिने गरेको विश्लेषण गरिएको छ।

यसैबीच, आयल निगमभित्रै सुरक्षा व्यवस्था र व्यवस्थापन प्रणालीमाथि प्रश्न उठ्न थालेको छ। डिपोभित्रैबाट इन्धन लोड भएका ट्यांकरहरू हराउने घटनाले संस्थागत कमजोरी मात्र नभई सम्भावित संगठित चोरीको जालो रहेको आशंका थप बलियो बनाएको छ।

प्रहरीले घटनाको विस्तृत अनुसन्धान अघि बढाएको छ भने निगमले पनि आन्तरिक छानबिन समिति गठन गर्ने तयारी गरेको जनाइएको छ।

भाग नपुग्दा रडाको, अड्कियो रास्वपा महाधिवेशन

Posted on by nepalone

काठमाडौं। राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन व्यवस्थापकीय कमजोरी, प्राविधिक चुनौती र आन्तरिक राजनीतिक मतभेदका कारण निर्धारित कार्यतालिकाअनुसार अघि बढ्न नसकेको छ।

बन्दसत्र सुरु नै हुन नसक्नेगरि महाधिवेशन एक दिन थप किन लम्बियो ? यसले पार्टीको संगठनात्मक तयारी र आन्तरिक समन्वय क्षमतामाथि प्रश्न उठाएको हो।

आइतबार औपचारिक उद्घाटन सत्र ढिलाइका बीच सम्पन्न भए पनि त्यसपछि सुरु हुने भनिएको बन्दसत्र सोमबार दिनभर अन्योलमै रह्यो।

बिहानदेखि नै चितवन प्रदर्शनी केन्द्रमा भेला भएका महाधिवेशन प्रतिनिधिहरू बैठक सुरु हुने प्रतीक्षामा बसे पनि साँझसम्म कुनै औपचारिक प्रक्रिया अघि नबढेपछि निराश हुँदै फर्किन बाध्य भए।

पार्टी नेतृत्वले प्रारम्भिक रूपमा यो समस्या प्राविधिक तथा व्यवस्थापकीय कमजोरीका कारण भएको बताएको छ। प्रतिनिधिहरूको सूची रुजु, परिचयपत्र छपाइ तथा उपस्थिति अभिलेख व्यवस्थापनमा देखिएको कमजोरीका कारण बन्दसत्र समयमै सुरु गर्न नसकिएको प्रवक्ता मनिष झाले जानकारी दिए।

उनका अनुसार करिब ३० जना सांसदसमेत प्रतिनिधि सूचीमा नपरेपछि व्यवस्थापन झनै जटिल बनेको थियो, जसले समग्र तयारी प्रभावित बनायो।

तर पार्टीभित्रका अन्य स्रोतहरूले भने समस्या केवल प्राविधिक मात्र नभई राजनीतिक प्रकृतिको पनि रहेको दाबी गरेका छन्। उनीहरूका अनुसार बन्दसत्र रोकिनुमा संगठनभित्र जेनजी पुस्ताको प्रतिनिधित्व, केन्द्रीय समिति संरचना र नेतृत्व चयन प्रक्रियासम्बन्धी मतभेदले समेत महत्वपूर्ण भूमिका खेलेको छ।

पार्टीभित्र देखिएको विवाद विशेषगरी नयाँ पुस्ताको सहभागिता सुनिश्चित गर्ने विषयमा केन्द्रित रहेको बताइन्छ। केही प्रभावशाली नेताहरूले सभापतिले मनोनीत गर्ने ५१ सदस्यीय केन्द्रीय संरचनामा जेनजी पुस्तालाई उल्लेख्य स्थान दिनुपर्ने अडान राखे। सोही विषयमा सहमति नजुट्दा बन्दसत्र सुरु गर्न नसकिएको पार्टी स्रोतको दाबी छ।

यही सन्दर्भमा प्रभावशाली नेता सुधन गुरुङले नयाँ पुस्तालाई निर्णायक तहमा पर्याप्त प्रतिनिधित्व सुनिश्चित नगरी निर्वाचन प्रक्रियामा जान नहुने अडान लिएको चर्चा पनि पार्टीभित्र चल्यो।

महाधिवेशनमा सहभागी युवा प्रतिनिधिहरूले भने पार्टीको स्थापना र विस्तारमा युवाको योगदान निर्णायक रहेको उल्लेख गर्दै नेतृत्व संरचनामा उनीहरूको अर्थपूर्ण प्रतिनिधित्व अनिवार्य हुनुपर्ने धारणा राखे।

यसको विपरीत केही पुराना नेताहरूले भने पार्टी संरचना निर्वाचन प्रक्रियामार्फत अघि बढ्नुपर्ने तर्क गरेका छन्। उनीहरूको भनाइमा नेतृत्व माग वा कोटा प्रणालीबाट नभई प्रतिस्पर्धात्मक प्रक्रियाबाट स्थापित हुनुपर्छ।

महाधिवेशन लम्बिँदा प्रतिनिधिहरूमा असन्तुष्टि बढ्यो। विशेषगरी खेतीपाती  को व्यस्त समयमा गाउँघर छाडेर चितवन आएका प्रतिनिधिहरूले बसाइँ लम्बिँदा आर्थिक भार थपिएको गुनासो गरेका छन्। पार्टीले खानाको व्यवस्था गरे पनि आवास र अन्य व्यक्तिगत खर्च स्वयंले बेहोर्नुपरेको उनीहरूको भनाइ छ।

यसैबीच प्रतिनिधिहरूलाई ढाडस प्रदान गर्दै रास्वपा संसदीय दलका उपनेता गणेश पराजुलीले महाधिवेशनको बन्दसत्र दिउँसो १ बजेपछि सुरु हुने जानकारी दिएका छन्।

प्राविधिक कारणले हिजो बन्दसत्र सुरु गर्न नसकिएको उनले स्पष्ट पारे।

हाल महाधिवेशन प्रतिनिधिहरूका लागि प्रवेश कार्ड वितरणको काम जारी रहेको छ। सो प्रक्रिया पूरा भएपछि खाना समयपश्चात बन्दसत्र औपचारिक रूपमा सुरु गरिने तयारी गरिएको पार्टीले जनाएको छ।

पराजुलीका अनुसार प्रारम्भमा अनुमान गरिएको २८ सयदेखि ३ हजारसम्म प्रतिनिधिको संख्या बढेर ४२ सयभन्दा बढी पुगेपछि व्यवस्थापनमा केही प्राविधिक समस्या देखिएको हो। उनले यही कारणले हिजो कार्यक्रम सुरु गर्न नसकिएको बताए।

उनले भने, ‘इस्टिमेट गरिएको २८ सय/तीन हजार महाधिवेशन प्रतिनिधिको संख्या बढेर ४२ सय प्लस हुँदै गर्दाखेरि केही प्राविधिक त्रुटिका कारण हिजो हामीले सुरु गर्न सकेनौं,’ उनले भने, ‘आज यतिखेर हलबाट महाधिवेशन प्रतिनिधिको प्रवेश कार्ड वितरण सुरु भइसकेको छ । त्यो सकिनेबित्तिकै हामी खाना खाएर आजको बन्दसत्र सुरु गर्दैछौं ।’

उनका अनुसार सबै पूर्वतयारीका प्रक्रिया पूरा भइसकेका छन् र अब बाँकी औपचारिकता सम्पन्न भएपछि कार्यक्रम अघि बढाइने जनाइएको छ।

पराजुलीले महाधिवेशन प्रतिनिधि तथा सञ्चारकर्मीहरूलाई परेको असुविधाप्रति क्षमासमेत मागेका छन्।

यस्तै, रास्वपा महाधिवेशनको व्यवस्थापन र सहभागी संख्या बढेसँगै कार्यक्रम सञ्चालनमा थप समन्वय आवश्यक परेको पार्टी स्रोतले जनाएको छ।

यद्यपि,संगठनात्मक रूपमा आफूलाई वैकल्पिक राजनीतिक शक्तिका रूपमा प्रस्तुत गर्दै आएको रास्वपाको पहिलो महाधिवेशनमै देखिएको व्यवस्थापकीय कमजोरी र आन्तरिक विवादले नेतृत्व क्षमतामाथि प्रश्न उठाएको छ।

यो सँगै पार्टीले दाबी गरेको ‘नयाँ शैलीको राजनीति’ व्यवहारमा कति प्रभावकारी हुन्छ भन्ने विषय पनि बहसमा आएको छ।

विष्णुकाे पक्राउपछि एमालेले बाेलायाे संसदीय दल र सचिवालय बैठक

Posted on by nepalone

काठमाडाैं । उपाध्यक्ष विष्णु पाैडेल पक्राउ परेपछि नेकपा एमालेले संसदीय दल र सचिवालय बैठक बाेलाएकाे छ ।

अपराह्न २ बजे पार्टी केन्द्रीय कार्यालय च्यासलमा दलकाे बैठक बस्ने भएकाे हाे । साँझ ६ बजे भने सचिवालय बैठक बस्ने भएकाे हाे । बैठक अध्यक्ष केपी शर्मा ओली निवास गुण्डुमा बस्ने भएकाे हाे ।

एकपछि अर्काे पार्टी नेता पक्राउ परेपछि एमाले आक्राेशित छ । एमालेले आफ्ना उपाध्यक्ष पाैडेलकाे पक्राउलाई प्रतिवाद गर्ने चेतावनी दिएकाे छ ।

अध्यक्ष ओलीले साेमबार नै बिना कारण राजनीतिक प्रतिशाेध साँधेर आफ्ना नेताहरु पक्राउ गर्ने बालेन सरकारकाे कदम गलत भएकाे भन्दै प्रतिवाद गर्ने चेतावनी दिइसकेका छन् ।

नेता प्रदीप ज्ञवालीले पहिले थुन्‍ने र पछि सुन्‍ने सरकारकाे शैलीप्रति आपत्ति जनाए । पाैडेल सम्पत्ति छानबिनका लागि साेमबार पक्राउ परेका हुन् ।

रास्वपा महाधिवेशन : धमाधम प्रतिनिधिको कार्ड वितरण सुरु

Posted on by nepalone

चितवन। राष्ट्रिय स्वतन्त्र पार्टी (रास्वपा) संसदीय दलका उपनेता गणेश पराजुलीले महाधिवेशनको बन्दसत्र दिउँसो १ बजेपछि सुरु हुने जानकारी दिएका छन्।

प्राविधिक कारणले हिजो बन्दसत्र सुरु गर्न नसकिएको उनले स्पष्ट पारे।

हाल महाधिवेशन प्रतिनिधिहरूका लागि प्रवेश कार्ड वितरणको काम जारी रहेको छ। सो प्रक्रिया पूरा भएपछि खाना समयपश्चात बन्दसत्र औपचारिक रूपमा सुरु गरिने तयारी गरिएको पार्टीले जनाएको छ।

पराजुलीका अनुसार प्रारम्भमा अनुमान गरिएको २८ सयदेखि ३ हजारसम्म प्रतिनिधिको संख्या बढेर ४२ सयभन्दा बढी पुगेपछि व्यवस्थापनमा केही प्राविधिक समस्या देखिएको हो। उनले यही कारणले हिजो कार्यक्रम सुरु गर्न नसकिएको बताए।

उनले भने, ‘इस्टिमेट गरिएको २८ सय/तीन हजार महाधिवेशन प्रतिनिधिको संख्या बढेर ४२ सय प्लस हुँदै गर्दाखेरि केही प्राविधिक त्रुटिका कारण हिजो हामीले सुरु गर्न सकेनौं,’ उनले भने, ‘आज यतिखेर हलबाट महाधिवेशन प्रतिनिधिको प्रवेश कार्ड वितरण सुरु भइसकेको छ । त्यो सकिनेबित्तिकै हामी खाना खाएर आजको बन्दसत्र सुरु गर्दैछौं ।’

उनका अनुसार सबै पूर्वतयारीका प्रक्रिया पूरा भइसकेका छन् र अब बाँकी औपचारिकता सम्पन्न भएपछि कार्यक्रम अघि बढाइनेछ।

पराजुलीले महाधिवेशन प्रतिनिधि तथा सञ्चारकर्मीहरूलाई परेको असुविधाप्रति क्षमासमेत मागेका छन्।

यसैबीच, रास्वपा महाधिवेशनको व्यवस्थापन र सहभागी संख्या बढेसँगै कार्यक्रम सञ्चालनमा थप समन्वय आवश्यक परेको पार्टी स्रोतले जनाएको छ।

ऋण नतिर्दा लिलामीको मुखमा ‘भोटेकोशी हेली रिसोर्ट’

Posted on by nepalone

काठमाडौं। पर्यटन प्रवर्द्धन र उच्चस्तरीय विदेशी पाहुनालाई लक्षित गर्दै सिन्धुपाल्चोकमा सञ्चालनमा ल्याइएको चारतारे भोटेकोशी हेली रिसोर्ट एण्ड स्पा लिलामी प्रक्रियामा पुगेको छ।

सञ्चालकहरूबीचको आन्तरिक विवाद र आर्थिक दायित्व पूरा गर्न नसकिएपछि नेपाल बैंकले कर्जा असुली प्रक्रिया अघि बढाएको हो। करिब एक दशकअघि निर्माण भई सञ्चालनमा आएको उक्त रिसोर्ट ४८ कोठाको संरचनामा फैलिएको छ र करिब ९५ रोपनी क्षेत्रफलमा अवस्थित छ।

हाल सो रिसोर्टमध्ये २४ वटा कोठा मात्र सञ्चालनमा रहेको जनाइएको छ। परियोजनाका लागि बैंकबाट ३२ करोड रुपैयाँ ऋण लिइएको थियो। तर ब्याज तथा जरिबानासहित हालसम्म करिब ३९ करोड ५४ लाख रुपैयाँ कर्जा असुली प्रक्रियामा रहेको बैंकले जनाएको छ। उक्त रकममा ५ करोड ६६ लाख रुपैयाँ ब्याज र १ करोड १८ लाख रुपैयाँ जरिबाना समेत समावेश छ।

बैंक स्रोतका अनुसार तोकिएको किस्ताबापत ५ करोड ६६ लाख रुपैयाँ भुक्तानी भएमा लिलामी प्रक्रिया रोक्न सकिने विकल्प भए पनि सञ्चालकहरू ऋण चुक्ता गर्न तयार नभएपछि प्रक्रिया अघि बढाइएको हो।

नेपाल बैंकले गत जेठ १ गते ३५ दिने सार्वजनिक सूचना जारी गर्दै ऋण चुक्ता गर्न आह्वान गरेको थियो। तोकिएको म्यादभित्र कुनै सम्पर्क वा भुक्तानी नभएपछि असार ५ गतेका लागि लिलामी प्रक्रिया तय गरिएको थियो। तर लगानी मूल्यभन्दा कम मूल्यमा बोलकबोल पर्ने सम्भावना देखिएपछि तत्कालका लागि लिलामी स्थगित गरिएको बैंकले जनाएको छ।

बैंकका अनुसार आवश्यक कानुनी प्रक्रिया पूरा गर्दै आगामी चरणमा सम्पत्ति लिलामी प्रक्रिया पुनः अघि बढाइनेछ।

यसैबीच, परियोजनामा सञ्चालकहरूबीचको व्यक्तिगत टकराव र आन्तरिक विवादले व्यवस्थापनमा गम्भीर असर पारेको बताइएको छ। साथै मुख्य लगानीकर्तामध्ये एक सुवास प्रधानसँग सम्बन्धित आर्थिक अनियमितताका आरोपका कारण अन्य सञ्चालकहरूको लगानी समेत जोखिममा परेको दाबी गरिएको छ।

पर्यटन क्षेत्रलाई लक्षित गरी निर्माण गरिएको उक्त रिसोर्ट हाल वित्तीय संकट र व्यवस्थापकीय विवादको चपेटामा परेको छ।

रस लाफान विष्फोट: १२ को मृत्यु, नेपालीसहित ६६ बढी घाइते

Posted on by nepalone

एजेन्सी। कतारको रस लाफान औद्योगिक क्षेत्रस्थित ग्यास उत्पादन केन्द्रमा आइतबार भएको विष्फोटमा नेपालीसहित विभिन्न देशका कामदार घाइते भएका छन्।

घटनामा ठूलो संख्यामा विदेशी श्रमिक प्रभावित भएको प्रारम्भिक विवरण सार्वजनिक भएको हो।

प्राप्त जानकारीअनुसार विष्फोटमा १२ भारतीय नागरिक र एक पाकिस्तानी नागरिकको मृत्यु भएको छ भने ६६ भन्दा बढी व्यक्ति घाइते भएका छन्। घाइतेहरूको सूचीमा नेपाली, भारतीय, पाकिस्तानी, बंगलादेशी, केन्याली, घानाली, तान्जानियाली र नाइजेरियाली नागरिकहरू रहेको कतारी अधिकारीहरूले जनाएका छन्।

कतारका ऊर्जा मन्त्री साद अल-काबीका अनुसार घाइतेहरूको विभिन्न अस्पतालमा उपचार भइरहेको छ। तर हालसम्म उनीहरूको विस्तृत नामावली सार्वजनिक गरिएको छैन।

घटना भएको क्षेत्र रस लाफान औद्योगिक क्षेत्र मा रहेको ग्यास उत्पादन केन्द्र हो, जुन कतार को प्रमुख ऊर्जा पूर्वाधारमध्ये एक मानिन्छ।

कतार सरकारका अनुसार प्रारम्भिक अनुसन्धानमा यो घटना आक्रमण नभई औद्योगिक दुर्घटनाको रूपमा देखिएको छ। घटनापछि लागेको आगो नियन्त्रणमा आइसकेको पनि अधिकारीहरूले बताएका छन्।

साद अल–काबी ले घटनापछि ग्यास निर्यात तथा स्थानीय आपूर्तिमा कुनै असर नपर्ने र आपूर्ति प्रणाली सामान्य अवस्थामा नै सञ्चालन भइरहने बताएका छन्।

घटनाको विस्तृत कारणबारे थप अनुसन्धान भइरहेको कतारी सम्बन्धित निकायहरूले जनाएका छन्।

काठमाडौं उपत्यकामा रोबोटले सिकाउँदै ट्राफिक नियम

Posted on by nepalone

काठमाडौं। काठमाडौं उपत्यकामा ट्राफिक व्यवस्थापन तथा सडक सुरक्षासम्बन्धी जनचेतना अभिवृद्धि गर्न रोबोटिक प्रविधि प्रयोग गर्ने सम्भावनाबारे अध्ययन सुरु गरिएको छ।

काठमाडौं उपत्यका ट्राफिक प्रहरी कार्यालयले निजी क्षेत्रसँगको सहकार्यमा रोबोटको प्रभावकारिता परीक्षण गरिरहेको जनाएको हो।

पछिल्ला दिनमा ट्राफिक प्रहरीसँगै रोबोट देखिएका भिडिओ सामाजिक सञ्जालमा व्यापक रूपमा फैलिन थालेपछि यसबारे सर्वसाधारणको चासो बढेको छ। यद्यपि ट्राफिक प्रहरीले हालसम्म यो परियोजना परीक्षण र अध्ययनकै चरणमा रहेको स्पष्ट पारेको छ।

काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार प्रविधिमैत्री ट्राफिक व्यवस्थापनको अवधारणाअन्तर्गत नागरिकलाई सचेत गराउने नयाँ उपायको खोजी भइरहेको छ। उनले रोबोटमार्फत ट्राफिक सचेतना कार्यक्रम सञ्चालन गर्न सकिने सम्भावनाबारे अध्ययन भइरहेको बताए।

उनका अनुसार हालैदेखि सुरु गरिएको परीक्षणले रोबोटलाई ट्राफिक सचेतना कार्यक्रममा सहायक उपकरणका रूपमा प्रयोग गर्न सकिने वा नसकिने विषयमा जानकारी दिनेछ। यसको उपयोगिता, प्रभाव र सञ्चालनका विभिन्न पक्षबारे अध्ययन भइरहेकाले तत्काल कुनै नीतिगत निर्णय भइनसकेको उनले स्पष्ट पारे।

ट्राफिक प्रहरीको प्रारम्भिक योजनाअनुसार लामो दूरीका यात्रु र सार्वजनिक सवारी चालकलाई लक्षित गरी बसपार्क क्षेत्रमा रोबोटमार्फत सुरक्षा सन्देश प्रवाह गर्न सकिने सम्भावना हेरिएको छ। यसका लागि आवश्यक सचेतनामूलक सामग्री तयार पारेर रोबोटलाई त्यसअनुसार प्रशिक्षण दिने काम भइरहेको जनाइएको छ।

सहकार्य गरिरहेको प्रविधि कम्पनीका प्रतिनिधि सुमन खड्काले ट्राफिक प्रहरीबाट प्राप्त सामग्रीका आधारमा रोबोटलाई विभिन्न विषयमा डिजिटल रूपमा प्रशिक्षण दिइरहेको जानकारी दिए। उनका अनुसार मादक पदार्थ सेवन गरी सवारी चलाउँदा हुने जोखिम, सडक सुरक्षाका आधारभूत नियम तथा जेब्रा क्रसिङको प्रयोगजस्ता विषयमा जनचेतना फैलाउन रोबोट उपयोगी हुन सक्छ।

उनले नेपालको वर्तमान सडक तथा भौतिक पूर्वाधारलाई हेर्दा रोबोटलाई नियमित रूपमा सडकमा परिचालन गर्ने अवस्था तत्काल नरहे पनि विशेष अभियान, प्रदर्शनी तथा जनचेतनामूलक कार्यक्रममार्फत यसको प्रयोग सम्भव रहेको बताए।

परीक्षणको नतिजा सकारात्मक आएमा सम्बन्धित निकायसँग आवश्यक समन्वय गरी आगामी चरणका योजना तय गरिने ट्राफिक प्रहरी कार्यालयले जनाएको छ।

जङकुकको घरमा पटक-पटक पुगेर दुःख दिने महिलालाई जेल सजाय

Posted on by nepalone

एजेन्सी। दक्षिण कोरियाली लोकप्रिय के-पप समूह बीटीएसका सदस्य जङकुकको निजी निवासमा बारम्बार पुगेर दुःख दिएको आरोपमा एक ब्राजिलियन महिलालाई अदालतले निलम्बित जेल सजाय सुनाएको छ।

सियोलस्थित जिल्ला अदालतले ती महिलालाई एक वर्षको जेल सजाय तोकेको भए पनि उक्त सजाय दुई वर्षका लागि निलम्बन गरिएको जनाएको छ। अदालतको निर्णयविरुद्ध पुनरावेदन नगरेको अवस्थामा उनलाई दक्षिण कोरियाबाट देश निकाला गरिने सम्भावना रहेको बताइएको छ।

अदालती विवरणअनुसार महिलाले गत वर्षको डिसेम्बरदेखि जङकुकलाई पछ्याउन थालेकी थिइन्। उनले गायकप्रति आकर्षण रहेको भन्दै उनको घरमा चिठी र तस्बिर पुर्‍याउने प्रयास गरेकी थिइन्। यही क्रममा उनी पटक–पटक जङकुकको निवास क्षेत्र पुग्ने गरेकी थिइन्।

अदालतले सार्वजनिक गरेको विवरणअनुसार उनी पहिलो पटक डिसेम्बर ७ मा जङकुकको घर पुगेकी थिइन्। त्यसबेला उनले घर वरपर घुमफिर गर्ने, पर्खाल नाघेर भित्र सामान फाल्ने तथा ढोकाको साँघुरो भागबाट चिठी छिराउने प्रयास गरेकी थिइन्। केही दिनपछि पुनः त्यही स्थानमा पुगेकी उनले घरको घण्टी १३३ पटकसम्म बजाएकी थिइन्।

न्यायाधीशले यस्तो व्यवहारलाई अत्यधिक आशक्ति देखाउने गतिविधिका रूपमा व्याख्या गरेका छन्।

त्यसपछि डिसेम्बर १३ मा उनी खाना वितरण गर्ने व्यक्तिको पछि लाग्दै घरको साइड गेटबाट भित्र प्रवेश गर्न खोज्दा पक्राउ परेकी थिइन्। पक्राउपछि उनलाई सो क्षेत्रमा नफर्किन चेतावनीसहित रिहा गरिएको भए पनि उनले आदेशको पालना नगरेको अदालतले जनाएको छ।

महिलाको गतिविधि नरोकिएपछि प्रहरीले जङकुकको घर वरपर १०० मिटर क्षेत्रभित्र प्रवेश गर्न नपाउने आपत्कालीन आदेश जारी गरेको थियो। तर त्यसलाई समेत बेवास्ता गरेपछि फेब्रुअरी महिनामा अनुसन्धान फाइल सरकारी वकिल कार्यालयमा पठाइएको थियो।

अदालतका अनुसार ती महिला कुल २२ पटक जङकुकको निवासमा पुगेकी थिइन्। यद्यपि भविष्यमा यस्ता गतिविधि दोहोरिने सम्भावना धेरै नरहेको लगायतका पक्षलाई ध्यानमा राख्दै अदालतले निलम्बित सजायको फैसला सुनाएको जनाएको छ।

यसअघि पनि जङकुकसँग सम्बन्धित यस्तै घटना सार्वजनिक भएको थियो।

गत वर्ष सैन्य सेवा पूरा गरी घर फर्किएपछि उनको निवासमा प्रवेश गर्ने प्रयास गरेको आरोपमा एक चिनियाँ महिला पक्राउ परेकी थिइन्।

पक्राउ पर्ने समाचारपछि पूर्वअर्थमन्त्री जनार्दन शर्मा मिडियासँग किन बिच्किए ?

Posted on by nepalone

काठमाडाै‌ं । एमाले उपाध्यक्ष विष्णु पाैडेल पक्राउ परेपछि पूर्वअर्थमन्त्री जनार्दन शर्मा पनि सम्पत्ति छानबिनकाे दायरामा आउने चर्चाबीच शर्माले ‘मिडिया ट्रायल’ गरिएको भन्दै असन्तुष्टि जनाएका छन् ।

उनले आफू सधैँ सम्पत्ति छानबिनको पक्षमा रहेको स्पष्ट पार्दै सरोकार नै नभएको विषयमा आफ्नो नाम मुछेर भ्रम फैलाउन खोजिएको बताएका हुन् ।

उनले सामाजिक सञ्जालमा भने, ‘साथीहरू, सम्पत्ति छानबिन गर्नुपर्छ भनेर मैले सदन र पार्टीमा पनि विषय उठाएको हुँ। त्यसमा म अहिले पनि अडिग छु तर सरोकार नै नभएको विषय बनाई भ्रम सिर्जना गर्ने उद्देश्य राखेर गरिने मिडिया ट्रायलप्रति दुःख व्यक्त गर्दछु।’

एमाले उपाध्यक्ष पाैडेल पक्राउ परेपछि विभिन्न अनलाइनमा शर्मा पनि पक्राउ पर्न सक्ने भन्दै समाचार प्रकाशन भएका थिए ।

यस्ताेमा शर्माले आफूले विगतदेखि नै राजनीतिक नेतृत्व र उच्च पदस्थहरूको सम्पत्ति छानबिन हुनुपर्ने माग संसद् र पार्टीभित्रै उठाउँदै आएकाले अनुसन्धानबाट आफू पछि नहट्ने तर नियोजित रूपमा गरिने चरित्रहत्या स्वीकार्य नहुने संकेत गरेका छन् ।

चक्कु प्रहार गरी भक्तपुरमा युवककाे हत्या

Posted on by nepalone

काठमाडाैं । सामान्य विवाद हुँदा भक्तपुरमा एक युवककाे चक्कु प्रहारबाट मृत्यु भएकाे छ । मृतक २८ वर्षीय आकाश रसाइली हुन् । उनी महोत्तरीकाे मिथिला नगरपालिका–९ घर भई हाल नगरकोट मोड बस्दै आएका थिए ।

चक्कु प्रहारबाट गम्भीर घाइते भएका रसाइलीलाई उपचारका लागि केएमसी अस्पताल सिनामंगल पठाइएकोमा आज बिहान ६ः१५ बजे उपचारकै क्रममा मृत्यु भएको हो।

चक्कु प्रहार गर्ने उदयपुर त्रियुगा नगरपालिका–१३ घर भई हाल भक्तपुर सल्लाघारी बस्ने ३१ वर्षीय आयुष कार्की, झापा दमक नगरपालिका–३ घर भई हाल सल्लाघारी बस्ने २७ वर्षीय दोर्जे शेर्पा र गुल्मी तम्घास घर भई हाल सल्लाघारी बस्ने ३५ वर्षीय रमेश कुँवरलाई नियन्त्रणमा लिई घटनाबारे थप अनुसन्धान भइरहेको छ ।

चीनले १० अमेरिकी कम्पनीमाथि किन लगायो निर्यात नियन्त्रण?

Posted on by nepalone

एजेन्सी। अमेरिका र चीनबीच प्रविधि, रक्षा तथा सुरक्षा क्षेत्रमा प्रतिस्पर्धा तीव्र बन्दै गइरहेका बेला बेइजिङले १० अमेरिकी कम्पनीमाथि नयाँ निर्यात नियन्त्रण घोषणा गरेको छ।

वासिङ्टनले चिनियाँ कम्पनीहरूलाई कालोसूचीमा राखेपछि त्यसको प्रतिकारस्वरूप चीनले रक्षा उद्योग तथा दुर्लभ पृथ्वी खनिज क्षेत्रमा संलग्न अमेरिकी कम्पनीहरूलाई लक्षित गर्दै प्रतिबन्धात्मक कदम चालेको हो।

चीनको वाणिज्य मन्त्रालयले सोमबार जारी गरेको विज्ञप्तिमा अमेरिकी सरकारले केही चिनियाँ कम्पनीहरूलाई तथाकथित ‘चिनियाँ सैन्य उद्यम सूची’मा समावेश गरेको निर्णयको प्रतिक्रियास्वरूप नयाँ निर्यात नियन्त्रण लागू गरिएको जनाएको छ। मन्त्रालयका अनुसार राष्ट्रिय सुरक्षा र रणनीतिक हितको संरक्षणका लागि उक्त कदम आवश्यक ठानिएको हो।

यो निर्णय अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच भएको भेटवार्तापछि सम्बन्ध सुधारको प्रयास भइरहेको एक महिनापछि आएको हो। दुवै देशले व्यापारिक शुल्क घटाउने सहमति गरे पनि प्रविधि, रक्षा र सुरक्षा क्षेत्रसँग सम्बन्धित विवाद भने निरन्तर बढिरहेका छन्।

यस महिनाको सुरुआतमा अमेरिकाले चिनियाँ सेनासँग सम्बन्ध रहेको आरोप लगाउँदै ८० वटा चिनियाँ कम्पनी तथा तिनका सहायक संस्थाहरूलाई कालोसूचीमा राखेको थियो। उक्त सूचीमा प्रविधि क्षेत्रका अलिबाबा, बाइडु तथा विद्युतीय सवारी निर्माता बीवाईडीसमेत समावेश भएपछि चीनले प्रतिकारात्मक कदम चाल्ने सङ्केत दिएको थियो।

चीनले नयाँ प्रतिबन्ध लगाएका कम्पनीहरूमध्ये अमेरिकी रक्षा तथा एयरोस्पेस उद्योगसँग सम्बन्धित एभिओक्स र ओस्कोश डिफेन्स प्रमुख छन्। ओस्कोश डिफेन्स अमेरिकी सैन्य सवारीसाधन उत्पादनमा संलग्न कम्पनी हो भने एभिओक्सले अमेरिकी सेनासँग विभिन्न रक्षा सम्झौताहरू गर्दै आएको छ।

त्यसैगरी दुर्लभ पृथ्वी खनिज उत्पादनमा सक्रिय एमपी मटेरियल्स र युएसए रेयर अर्थ पनि प्रतिबन्धित सूचीमा परेका छन्। चीनले सूचीबद्ध कम्पनीहरूलाई दोहोरो प्रयोगमा आउने सामग्री, प्रविधि तथा उपकरण निर्यात गर्न रोक लगाएको जनाएको छ।

वाणिज्य मन्त्रालयले सूचीमा रहेका कम्पनीहरूसँग सम्बन्धित सम्पूर्ण निर्यात गतिविधि तत्काल रोक्न निर्देशन दिएको छ। साथै चीनमा उत्पादित दोहोरो प्रयोगका सामग्री कुनै पनि देश वा क्षेत्रका संस्था तथा व्यक्तिमार्फत ती कम्पनीहरूलाई उपलब्ध गराउन नपाइने स्पष्ट पारेको छ।

यसैबीच चीनको वित्त मन्त्रालयले सार्वजनिक खरिद प्रक्रियामा संलग्न सरकारी निकायहरूलाई ४६ अमेरिकी कम्पनीका उत्पादन खरिद गर्न प्रतिबन्ध लगाउने घोषणा गरेको छ। प्रतिबन्धित सूचीमा लकहिड मार्टिन, रेथियोन तथा बोइङको रक्षा विभागसँग सम्बन्धित उत्पादनहरू पनि समावेश छन्।

जनरल डायनामिक्स, एन्डुरिल इन्डस्ट्रिजका केही विभाग तथा अन्य एयरोस्पेस कम्पनीहरू पनि नयाँ प्रतिबन्धको दायरामा परेका छन्। यद्यपि चीनमा सञ्चालन गरिरहेका अमेरिकी लगानी भएका कम्पनीहरूलाई भने यी उपायबाट बाहिर राखिएको वित्त मन्त्रालयले जनाएको छ। नयाँ नियम सोमबारदेखि लागू भएको छ।

चीनले यसअघि पनि ताइवानलाई अमेरिकी हतियार बिक्री गरिएको आरोप लगाउँदै सन् २०२४ र २०२५ मा केही अमेरिकी कम्पनी तथा तिनका सहायक संस्थामाथि प्रतिबन्ध लगाइसकेको थियो।

ताइवानले बेइजिङबाट बढ्दो सैन्य तथा राजनीतिक दबाब सामना गर्न अमेरिकाको सहयोगमा ठूलो निर्भरता राख्दै आएको छ। चीनले ताइवानलाई आफ्नो भूभागको हिस्सा दाबी गर्दै आएको छ र आवश्यक परे बल प्रयोग गर्न सक्ने चेतावनीसमेत दिँदै आएको छ।

अमेरिकी विदेशमन्त्री मार्को रुबियोले यस महिनामात्र ताइवानका लागि प्रस्ताव गरिएको १४ अर्ब अमेरिकी डलर बराबरको हतियार प्याकेज समीक्षा प्रक्रियामा रहेको बताएका थिए।

मे महिनामा सी जिनपिङसँगको भेटपछि राष्ट्रपति ट्रम्पले सार्वजनिक रूपमा अमेरिका–चीन सम्बन्ध सुधारतर्फ अग्रसर रहेको सन्देश दिन खोजेका थिए। गत साता फ्रान्समा सम्पन्न जी–७ सम्मेलनका क्रममा उनले इरानसँगको अमेरिकी विवादमा तटस्थ भूमिका अपनाएको भन्दै चिनियाँ नेतृत्वको प्रशंसासमेत गरेका थिए।

तर पछिल्ला प्रतिबन्धात्मक कदमहरूले विश्वका दुई ठूला अर्थतन्त्रबीच व्यापार, प्रविधि, रक्षा तथा सुरक्षा क्षेत्रमा प्रतिस्पर्धा अझ तीव्र बन्दै गएको संकेत गरेका छन्। विश्लेषकहरूका अनुसार दुवै देशबीचको रणनीतिक अविश्वास कायम रहेकाले निकट भविष्यमा यस्ता प्रतिकारात्मक कदमहरू थप बढ्न सक्ने सम्भावना देखिएको छ।

मन्थली नगरपालिकाको बजेट १ अर्ब ३ करोड

Posted on by nepalone

मन्थली। रामेछापको मन्थली नगरपालिकाले आगामी आर्थिक वर्ष २०८३/८४ का लागि १ अर्ब ३ करोड २० लाख रुपैयाँको बजेट सार्वजनिक गरेको छ।

सोमबार आयोजित नगरसभामा उपप्रमुख ईश्वरी बस्नेतले बजेट तथा वार्षिक कार्यक्रम प्रस्तुत गर्दै शिक्षा, स्वास्थ्य, कृषि, पर्यटन, उद्यम विकास र पूर्वाधार निर्माणलाई मुख्य प्राथमिकतामा राखिएको जानकारी दिइन्।

नगरपालिकाका अनुसार आगामी आर्थिक वर्षमा आन्तरिक आम्दानी र सञ्चित कोषसमेत गरी करिब ९ करोड ७० लाख रुपैयाँ आन्तरिक स्रोत परिचालन हुने अनुमान गरिएको छ। स्थानीय स्रोतको परिचालनमार्फत विकास निर्माणका कार्यक्रमलाई थप प्रभावकारी बनाउने लक्ष्य नगरपालिकाले लिएको छ।

नगरसभामा प्रस्तुत प्रगति विवरणअनुसार चालु आर्थिक वर्ष २०८२/८३ का लागि १ अर्ब ४ करोड ६५ लाख रुपैयाँ बजेट विनियोजन गरिएको थियो। उपप्रमुख बस्नेतले जेठ मसान्तसम्म चालुतर्फ ४७ करोड ९३ लाख रुपैयाँ र पुँजीगततर्फ ११ करोड १३ लाख रुपैयाँ गरी कुल ५९ करोड ७ लाख रुपैयाँ खर्च भएको जानकारी दिइन्। उक्त खर्च कुल बजेटको करिब ६० प्रतिशत रहेको उल्लेख गर्दै आर्थिक वर्षको अन्त्यसम्म कम्तीमा ८८ प्रतिशत बजेट खर्च हुने अनुमान गरिएको उनले बताइन्।

यसअघि नगरप्रमुख लब श्रेष्ठले आगामी आर्थिक वर्षको नीति तथा कार्यक्रम प्रस्तुत गर्दै गुणस्तरीय शिक्षा, सहज स्वास्थ्य सेवा, कृषि आधुनिकीकरण, युवा उद्यमशीलता तथा पर्यटन प्रवर्द्धनलाई विकासको प्रमुख आधारका रूपमा अघि सारिएको बताए।

शिक्षा क्षेत्रअन्तर्गत कक्षा ८ तथा माध्यमिक शिक्षा परीक्षा (एसईई) मा ४ जीपीए प्राप्त गर्ने विद्यार्थीलाई पुरस्कृत गरिने व्यवस्था गरिएको छ। यसका साथै विद्यालय शिक्षाको गुणस्तर अभिवृद्धि र विद्यार्थीलाई उत्कृष्ट नतिजातर्फ प्रोत्साहित गर्ने कार्यक्रम सञ्चालन गरिने जनाइएको छ।

स्वास्थ्य क्षेत्रलाई थप प्रभावकारी बनाउन ‘नागरिकको घरदैलोमा स्वास्थ्यकर्मी’ अभियान सञ्चालन गरिने भएको छ। योग शिक्षासहितको ‘नागरिक आरोग्य कार्यक्रम’लाई विस्तार गर्दै नगरपालिकाका सबै १४ वटै वडामा एक–एक योग केन्द्र स्थापना गर्ने योजना पनि अघि सारिएको छ। यसबाट समुदायस्तरमा स्वास्थ्य सचेतना र स्वस्थ जीवनशैली प्रवर्द्धन हुने अपेक्षा गरिएको छ।

कृषि क्षेत्रतर्फ रैथाने बाली संरक्षण तथा प्रवर्द्धनका विशेष कार्यक्रम सञ्चालन गरिने भएको छ। किसान परिचयपत्र वितरण सुरु गरिने, स्थानीय कृषि उत्पादनको बजारीकरण काठमाडौंसम्म विस्तार गरिने तथा दूध उत्पादक कृषकलाई दिँदै आएको अनुदान कार्यक्रमलाई निरन्तरता दिइने नीति तथा कार्यक्रममा उल्लेख गरिएको छ।

युवा तथा उद्यमशीलता विकासलाई प्राथमिकतामा राख्दै लघु तथा घरेलु उद्योग प्रवर्द्धनका कार्यक्रम सञ्चालन गरिने भएका छन्। नगरपालिकाले उद्योग स्थापना तथा विस्तारका लागि ५० प्रतिशत लागत साझेदारी गर्ने, युवा उद्यमीलाई प्रोत्साहन गर्ने तथा स्वरोजगारका अवसर सिर्जना गर्ने नीति लिएको जनाएको छ।

पर्यटन क्षेत्रको विकासका लागि प्रमुख पर्यटकीय गन्तव्यहरूको संरक्षण, स्थानीय संस्कृति र सम्पदाको प्रवर्द्धन तथा पर्यटन पूर्वाधार विकासमा जोड दिइने भएको छ। पर्यटकीय परामर्श कक्ष स्थापना गरिने र निर्माणाधीन फोहोर विसर्जन केन्द्रको काम सम्पन्न गर्ने प्रयासलाई पनि आगामी वर्ष निरन्तरता दिइने नगरप्रमुख श्रेष्ठले बताए।

नगरपालिकाले सार्वजनिक गरेको बजेट तथा कार्यक्रमले शिक्षा, स्वास्थ्य, कृषि, पर्यटन, उद्यम विकास र आधारभूत सेवा विस्तारलाई केन्द्रमा राख्दै समावेशी, दिगो र नागरिकमुखी विकासलाई प्राथमिकतामा राखेको जनाएको छ।

स्थानीय स्रोत, उत्पादन र मानव पूँजीको उपयोगमार्फत नगरको समग्र आर्थिक तथा सामाजिक विकासलाई गति दिने लक्ष्यसहित बजेट ल्याइएको नगरपालिकाको भनाइ छ।

मध्यरातको गोप्य भेटघाट : बालेन एक्कासी किन पुगे सौराहा ?

Posted on by nepalone

चितवन।  प्रधानमन्त्री वालेन्द्र शाह(बालेन)ले सौराहास्थित चितवन राष्ट्रिय निकुञ्जअन्तर्गत रहेको हात्ती प्रजनन केन्द्रको अवलोकन गरेका छन्।

अवलोकनका क्रममा उनले हात्ती संरक्षण, प्रजनन प्रक्रिया, व्यवस्थापन प्रणाली तथा पर्यापर्यटनसँग यसको सम्बन्धबारे जानकारी लिएका थिए।

परिवारसहित चितवन पुगेका शाह सौराहाको प्राकृतिक सौन्दर्य, वन्यजन्तु तथा जैविक विविधताप्रति चासो राख्दै अवलोकनमा सहभागी भएका थिए।

स्थानीय पर्यटन व्यवसायीहरूका अनुसार उनले सौराहाको पर्यटन सम्भावना तथा संरक्षणसँग जोडिएका विकासका विषयमा समेत रुचि देखाएका थिए। वन्यजन्तु तथा प्राकृतिक वातावरणको अवलोकनपछि उनले यहाँको प्रकृति संरक्षणयोग्य रहेको धारणा व्यक्त गरेको स्थानीय स्रोतले जनाएको छ।

यसैबीच, प्रधानमन्त्री शाह कालिका नगरपालिका-शक्तिखोरस्थित होटल लटौली सेन्चुरीमा बसिरहेका छन्।

चितवन भ्रमणलाई राजनीतिक कार्यक्रमभन्दा पारिवारिक तथा पर्यटकीय भ्रमणका रूपमा हेरिएको छ।

स्थानीय व्यवसायीहरूका अनुसार सौराहामा उनको उपस्थितिले पर्यटन क्षेत्रको चहलपहल बढाउन सहयोग पुगेको छ।

रोल्पामा बस दुर्घटना, १२ यात्रु घाइते

Posted on by nepalone

रोल्पा। रोल्पाको माडी गाउँपालिका-२ खोलवाङस्थित घोराही-थवाङ शहीद मार्गमा बस दुर्घटना हुँदा १२ जना घाइते भएका छन्।

थवाङबाट घोराहीतर्फ जाँदै गरेको रा.१ ख. ३१०१ नम्बरको बस उकालोमा अचानक ब्रेक फेल भएपछि सडकमा पल्टिएको प्रहरीले जनाएको छ। दुर्घटनाका बेला बसमा चालकसहित २९ जना सवार थिए।

दुर्घटनामा सामान्य घाइते भएका १२ जनाको उद्धार गरी उपचारका लागि माडी गाउँपालिका–२ घर्तिगाउँस्थित स्मृति अस्पताल पठाइएको छ।

प्रहरीका अनुसार दुर्घटनापछि उक्त सडकखण्ड अवरुद्ध बनेको छ भने बस घटनास्थलमै रहेको छ।

घटनाबारे थप विवरण आउन बाँकी रहेको जनाइएको छ।

रेबिज संक्रमणबाट चन्द्रागिरिका ४८ वर्षीय पुरुषको मृत्यु

Posted on by nepalone

काठमाडौं। रेबिज संक्रमणका कारण काठमाडौंको चन्द्रागिरि नगरपालिकाका एक ४८ वर्षीय पुरुषको मृत्यु भएको छ।

रेबिजको लक्षण देखिएपछि उपचारका लागि शुक्रराज ट्रपिकल तथा सरुवा रोग अस्पताल, टेकुमा भर्ना भएका ती पुरुषको उपचारका क्रममा शनिबार मृत्यु भएको हो।

अस्पतालका मेडिकल रेकर्डर समीर अधिकारीका अनुसार ती व्यक्ति असार ५ गते अस्पतालमा भर्ना भएका थिए। भर्ना भएको भोलिपल्ट नै उनको मृत्यु भएको उनले जानकारी दिए। उनका अनुसार ती पुरुषले रेबिजविरुद्धको खोप (एआरभी) लगाएका थिएनन्।

अधिकारीका अनुसार रेबिजका लक्षण देखिइसकेपछि रोगको मृत्युदर शतप्रतिशत हुने गर्छ। चिकित्सकहरूका अनुसार रेबिज भाइरसले घाँटी तथा श्वासप्रश्वाससम्बन्धी मांसपेशीहरूलाई प्रभावित बनाउँछ। यसका कारण पानी निल्न कठिन हुने, पानी देख्दा वा केही निल्ने प्रयास गर्दा घाँटीमा असह्य पीडा महसुस हुने जस्ता लक्षण देखापर्छन्।

संक्रमण बढ्दै जाँदा शरीरका विभिन्न अंगहरूले क्रमशः काम गर्न छाड्ने र अन्ततः बिरामीको मृत्यु हुन सक्ने चिकित्सकहरू बताउँछन्।

स्वास्थ्यकर्मीहरूले जनावरले टोके वा चिथोरेपछि तत्काल घाउ सफा गरी चिकित्सकको परामर्श लिन र समयमै रेबिजविरुद्धको खोप लगाउन आग्रह गरेका छन्। रेबिज एक घातक रोग भए पनि समयमै खोप लगाएमा यसबाट बच्न सकिने चिकित्सकहरूको भनाइ छ।

मेसीलाई ‘गोल्डेन अपरच्युनिटी’

Posted on by nepalone

काठमाडौं। विश्वकप २०२६ अन्तर्गत समूह ‘जे’ को खेलमा सोमबार टेक्ससस्थित एटी एन्ड टी स्टेडियममा अर्जेन्टिना र अस्ट्रियाबीच प्रतिस्पर्धा हुँदैछ।

खेलको मुख्य आकर्षण अर्जेन्टिनाका कप्तान लियोनेल मेसी रहने अपेक्षा गरिएको छ।

अल्जेरियाविरुद्धको पहिलो खेलमा ह्याट्रिक गर्दै मेसीले विश्वकपमा आफ्नो कुल गोल संख्या १६ पुर्‍याएका छन्। यससँगै उनले जर्मनीका पूर्व स्ट्राइकर मिरोस्लाभ क्लोजको विश्वकप इतिहासमा सर्वाधिक गोलको कीर्तिमानको बराबरी गरेको उल्लेख गरिएको छ।

अब अस्ट्रियाविरुद्ध एक गोल थप्न सके मेसी विश्वकपमा १७ गोल गर्ने पहिलो खेलाडी बन्दै नयाँ इतिहास रच्ने स्थितिमा पुग्नेछन्। त्यसैले यो खेललाई मेसीको व्यक्तिगत उपलब्धिसँग जोडेर विशेष चासोका साथ हेरिएको छ।

अर्जेन्टिनाका मुख्य प्रशिक्षक लियोनेल स्कालोनीले टोलीको खेल रणनीतिमा मेसीलाई केन्द्रमा राखेका छन्। रोड्रिगो डे पल र अलेक्सिस म्याक एलिस्टारले मिडफिल्ड सम्हाल्ने अपेक्षा गरिएको छ भने आक्रमणमा जुलियन अल्भारेज र लाउटारो मार्टिनेजले साथ दिने सम्भावना छ।

यता, राल्फ राङ्निकको नेतृत्वमा रहेको अस्ट्रिया पनि जोर्डनमाथिको जितपछि आत्मविश्वासका साथ मैदान उत्रिने तयारीमा छ। यद्यपि खेलअघि सबैभन्दा बढी चर्चा भने मेसीले नयाँ कीर्तिमान बनाउने सम्भावनालाई लिएर भइरहेको छ।

यदि उनले गोल गर्न सफल भए विश्वकप इतिहासमा अर्को महत्वपूर्ण अध्याय थपिनेछ, जसको प्रतीक्षामा विश्वभरका फुटबल समर्थक रहेका छन्।

आउटलुकमा अफलाइन इमेल लेख्न र फाइल जोड्न सकिने सुविधा

Posted on by nepalone

काठमाडौं।  माइक्रोसफ्टले विन्डोज ११ मा उपलब्ध नयाँ आउटलुक एपमा अफलाइन प्रयोगसम्बन्धी सुविधा थप विस्तार गरेको छ।

अब प्रयोगकर्ताले इन्टरनेट जडान नभएको अवस्थामा पनि इमेल तयार पार्न र त्यसमा फाइल एटेच गर्न सक्ने भएका हुन्।

नयाँ सुविधाअनुसार अफलाइन अवस्थामा तयार गरिएका इमेलहरू इन्टरनेट पुनः जडान भएपछि स्वतः पठाइनेछन्। यसले यात्रा गरिरहेका वा कमजोर इन्टरनेट पहुँच भएका प्रयोगकर्तालाई दैनिक कामकाज सहज बनाउन मद्दत गर्ने अपेक्षा गरिएको छ।

माइक्रोसफ्टले पछिल्ला केही वर्षदेखि प्रयोगकर्तालाई क्लासिक आउटलुकबाट नयाँ वेब–आधारित आउटलुक एपतर्फ स्थानान्तरण गराउने प्रयास गर्दै आएको छ। सोही रणनीतिअन्तर्गत कम्पनीले नयाँ आउटलुकलाई थप आधुनिक, छिटो र सुविधासम्पन्न बनाउने उद्देश्यले निरन्तर सुधार गरिरहेको छ।

प्रविधि सम्बन्धी समाचार वेबसाइट ‘विन्डोज लेटेस्ट’ का अनुसार कम्पनीले सन् २०२५ को अक्टोबरदेखि नयाँ आउटलुकमा अफलाइन एटेचमेन्ट सुविधाको परीक्षण थालेको थियो। परीक्षण चरण पूरा भएपछि यो सुविधा अहिले क्रमशः धेरै प्रयोगकर्तामाझ उपलब्ध गराउन थालिएको हो।

नयाँ आउटलुकमा पछिल्लो समय क्यालेन्डर व्यवस्थापन, इमेल सिङ्क तथा अफलाइन पहुँचलगायत क्षेत्रमा विभिन्न सुधार गरिए पनि धेरै प्रयोगकर्ताले अझै क्लासिक आउटलुक वा वेब संस्करणलाई प्राथमिकता दिइरहेका छन्।

माइक्रोसफ्टले भने प्रयोगकर्ताको आवश्यकता र प्रतिस्पर्धात्मक बजारलाई ध्यानमा राख्दै नयाँ आउटलुक एपमा नियमित अपडेट तथा नयाँ सुविधा थप्ने कार्यलाई निरन्तरता दिने जनाएको छ।

हिजो अरुले नियुक्त गर्दा ‘झोले भर्ती’ भन्ने बालेन आज ५७ सल्लाहकार नियुक्त गर्दै

Posted on by nepalone

काठमाडाैं । बालेन सरकारले ५७ जना सल्लाहकार नियुक्त गर्ने भएकाे छ । उनीहरु सचिवस्तरीय हुने छन् ।

मन्त्रालयहरुकाे काम छिटाेछरिताे ढङ्‍गले सम्पन्‍न गर्न भन्दै उनीहरुलाई बालेन सरकारले सल्लाहकारमा नियुक्त गर्ने भएका हुन् । प्रधानमन्त्री बालेनले मन्त्रीहरुकाे सचिवालय पनि जम्बाे बनाउने तयारी गरेका छन् ।

विगतमा नेपाली कांग्रेस, नेकपा एमाले, माओवादी, राप्रपा, जसपालगायत दलहरु सरकारमा हुँदा प्रधानमन्त्री र मन्त्रीहरुले यसरी सल्लाहकार नियुक्त गर्दा र मन्त्रीहरुकाे सचिवालय गठन गर्दा खासगरी रास्वपा नेता कार्यकर्ताहरु झाेलेहरुलाई नियुक्त गरिएकाे भन्दै विराेध गर्थे ।

आसेपासेलाई नियुक्ति गरेर राज्यकाेशमाथि लूट मच्चाएकाे आराेप लगाउँथे । यतिबेला भने प्रधानमन्त्री बालेन र उनकाे सरकारले मन्त्रालयहरुकाे कामलाई छिटाे र छरिताे ढङ्‍गले सम्पन्‍न गर्न भन्दै सचिवस्तरकाे ५७ जनालाई सल्लाहकारमा नियुक्त गर्ने भएकाे हाे ।

यससँगै एक जनालाई सेवा, सुविधा र तलब गरी बालेन सरकारले महिनामै एक लाख रुपैयाँ राज्यकाेषबाट खर्च गर्ने भएकाे हाे । अर्थात् ५७ जना सल्लाहकार नियुक्त गरेर बालेन सरकारले जनताबाट सङ्‍कलन गरेकाे कर हरेक महिना ५७ लाख बढी र वर्षमा झण्डै ७ कराेड राज्यकाेषबाट खर्च गर्ने भएकाे हाे ।

सबैभन्दा बढी उर्जा, पूर्वाधार र कृषि मन्त्रीकाे सचिवालयमा ५ जनाकाे दरले सचिवस्तरीय सल्लाहकार रहने भएका छन् । बाँकी १४ जना मन्त्रीकाे सचिवालयमा तीन जनाकाे दरले सल्लाहकार रहने भएका छन् ।

सबै मन्त्रालयमा स्वकीय उपसचिव १ जना, स्वकीय अधिकृत २ जना, स्वकीय नायब सुब्बा २ जना, सहयाेगी २ जना र चालक २ जनाका दरले सचिवालयमा राख्ने भएकाे छ ।

विगतमा यसरी अरु दल सरकारमा हुँदा आसेपासेलाई राखेर देश लुटेकाे आराेप सबैभन्दा चर्काेगरी अहिले रास्वपामा रहेका नेता र कार्यकर्ताहरु लगाउँथे ।

अहिले आफू सरकारमा हुँदा त्यसै गर्दा चुपचाप छन् । यस्ताेमा कतिपयले रास्वपा र बालेन सरकारलाई साेध्न थालेका छन् – हिजाे अरुले प्रधानमन्त्री र मन्त्रीकाे सचिवालयमा गरेकाे नियुक्ति गलत थियाे भने आज बालेन नेतृत्वकाे रास्वपा सरकारले गरेकाे नियुक्ति कसरी सही हुन्छ ?

‘रास्वपामा गुट छैन’ : जगदीश खरेल [भिडियो]

Posted on by nepalone

चितवन। राष्ट्रिय स्वतन्त्र पार्टी (रास्वपा) का नेता जगदीश खरेल ले महाधिवेशनपछि पार्टीमा कुनै पनि गुट वा समूह नरहने बताएका छन्।

सोमबार चितवनमा महाधिवेशनस्थलमा पत्रकारहरूसँग कुरा गर्दै उनले विभिन्न पृष्ठभूमिबाट आएका व्यक्ति तथा समूहहरू अब एउटै संरचनामा एकताबद्ध भएर अघि बढ्ने बताएका हुन्।

खरेलका अनुसार पार्टीमा विभिन्न समूह, पृष्ठभूमि र अन्य दलबाट आएका सदस्यहरू भए पनि ती सबैले अब साझा रूपमा रास्वपाको संगठनात्मक संरचनामा काम गर्नेछन्।

‘यहाँ विभिन्न समूहबाट, विभिन्न पार्टीबाट आएकाहरू छन्। विभिन्न पृष्ठभूमिबाट आएका छन्,’ उनले भने, ‘पहिला रास्वपा असंगठित थियो होला। ती सबै साना–साना गुट, उपगुट, समूह अन्त्य भएर यो महाधिवेशनबाट एउटा ठाउँमा आउँदै छन्। अब गुट छैन पार्टीमा।’

भिडियो:

बन्दसत्र सुरु नभएपछि, महाधिवेशनमा देखिन थाले यस्ता दृश्य

Posted on by nepalone

चितवन। राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत दोस्रो दिन बिहान ८ः३० बजे सुरु हुने भनिएको बन्दसत्र निर्धारित समयमा सुरु हुन सकेको छैन।

महाधिवेशन प्रतिनिधिहरूको नामावलीमा देखिएका त्रुटि सच्याउने कार्य पूरा नभएकाले बन्दसत्र ढिलाइ भएको हो। करिब दिउँसोसम्म पनि कार्यक्रम सुरु हुन नसकेको जनाइएको छ।

निर्वाचन समितिले सार्वजनिक गरेको करिब ४ हजार प्रतिनिधिको प्रारम्भिक नामावलीमा त्रुटि भेटिएपछि त्यसलाई सच्याउने र पुनः रुजु गर्ने काम जारी रहेको नेताहरूले बताएका छन्। यही कारण महाधिवेशनको औपचारिक प्रक्रिया प्रभावित भएको हो।

बन्दसत्र सुरु हुन नसकेपछि प्रदर्शनी हलभित्र उपस्थित पदाधिकारी तथा प्रतिनिधिहरू प्रतीक्षामा बसेका छन्।

चर्को गर्मीका कारण हलभित्र धेरै प्रतिनिधिहरू सुस्ताएर बसिरहेको देखिएको छ।

तस्वीरहरू:

विरोधका निम्ति होइन, परिणामका निम्ति प्रतिपक्षमा छौं : भीष्मराज आङ्देम्बे

Posted on by nepalone

काठमाडाैं । प्रमुख प्रतिपक्षी दल नेपाली कांग्रेस संसदीय दलका नेता भीष्मराज आङ्देम्बेले सरकारलाई जनअपेक्षाअनुसार काम गर्न निरन्तर खबरदारी गरिरहेको बताएका छन्।

उनले प्रतिपक्षको भूमिका विरोधका लागि विरोध गर्ने नभई सरकारलाई उत्तरदायी बनाउने र जनताप्रति गरिएका प्रतिबद्धता पूरा गर्न सचेत गराउने भएको स्पष्ट पारे।

साेमबार इलाम नगरपालिकाकाे नगरसभामा बाेल्दै नेता आङ्देम्बेले संसदभित्र प्रतिपक्षीले उठाएका विषयहरू जनताकै आवाज भएको पनि दाबी गरे।

किसानहरू विभिन्न समस्याबाट पीडित भइरहेका बेला राज्यले अपेक्षाअनुसार संवेदनशीलता नदेखाएको उनको भनाइ थियो।

‘देशमा जसरी किसानहरू प्रताडित भइरहेका छन्, यसले हाम्रो अर्थतन्त्रलाई गम्भीर मोडमा पुर्‍याइरहेको छ । त्यसप्रति अहिले पनि राष्ट्र संवेदनशील भइरहेको छैन भन्ने अनुभूति हामीले गरिरहेका छौं’ आङ्देम्बेले भने।

उनले सरकार ठूलो जनमतबाट निर्वाचित भएर गठन भए पनि त्यसलाई जनताप्रति उत्तरदायी बनाउने जिम्मेवारी प्रतिपक्षको भएको बताए।

‘संसदभित्र प्रतिपक्षीको आवाज भनेको तपाईंहरूको आवाज हो । सरकारलाई जनताप्रति गरिएको प्रतिबद्धतामा अझ खरो रूपमा उत्रिन सचेत गर्ने काम प्रतिपक्षीको हो र त्यो काम हामीले निरन्तर गरिरहेका छौं,’ उनले भने।

आङ्देम्बेले देशभरका नागरिकमा सरकारप्रति बढ्दो असन्तुष्टि देखिएको पनि बताए। मत परिवर्तन र नयाँ राजनीतिक शक्तिप्रतिको आकर्षणले अपेक्षित परिणाम दिन नसकेको निष्कर्षमा समेत धेरै नागरिक पुग्न थालेको उनको भनाइ थियो।

‘पार्टी परिवर्तन नै मत परिवर्तनको अभ्यास रहेछ तर त्यसले मात्रै समस्या समाधान नहुने रहेछ भन्ने निष्कर्षमा नेपाली जनता पुग्न थालेको अनुभूति भइरहेको छ’, उनले भने।

उनले विगतमा राजनीतिक दलहरूले जनताको विश्वासको सम्मान गर्न नसक्दा नागरिकहरू नयाँ दलतर्फ आकर्षित भएको स्वीकार गरे। ‘जनताले दिएको अभिमतको सम्मान गर्न नसक्दा नै जनताको आक्रोश र निराशा नयाँ पार्टीहरूतर्फ गएको हो’, उनले भने।

कांग्रेस अहिले सरकारको विरोधका लागि मात्र विरोध गर्ने पक्षमा नरहेको पनि आङ्देम्बेले स्पष्ट पारे। संसदमा आफूले व्यक्त गरेका धारणा र कांग्रेस सभापति गगन थापाले चितवनमा राष्ट्रिय स्वतन्त्र पार्टीको महाधिवेशनमा व्यक्त गरेको सन्देश एउटै रहेको उनको भनाइ थियो।

‘अहिलेको प्रतिपक्ष विरोधका निम्ति विरोध गर्न आएको होइन, परिणामका निम्ति साथ दिन आएको हो’, उनले भने, ‘नेपाली कांग्रेस परिणाम प्राप्त गर्नका निम्ति सरकारलाई विरोधीका रूपमा होइन, सहयोगीका रूपमा साथ दिन तयार छ।’

आङ्देम्बेले सत्ता र प्रतिपक्ष दुवैले जनताको अपेक्षाअनुसार परिणाम दिने गरी काम गर्नुपर्नेमा जोड दिँदै लोकतन्त्रको सफलताको आधार पनि त्यही भएको बताए।

गगनलाई समर्थन गरेकोमा पछुताउँदै मिराज

Posted on by nepalone

काठमाडौं। नेपाली राजनीतिक वृत्तमा चर्चित बनेको एक अभिव्यक्तिबारे मिराज ढुङ्गानाले नेपाली कांग्रेसका सभापति गगन थापा लाई विगतमा दिएको समर्थनबारे आत्मालोचना गरेका छन्।

ढुङ्गानाले सार्वजनिक रूपमा धारणा राख्दै राजनीतिक नेतृत्वको मूल्याङ्कन व्यक्तिगत आकर्षण वा प्रभावका आधारमा नभई कार्यसम्पादन, प्रतिबद्धता र परिणामका आधारमा हुनुपर्ने बताएका हुन्।

उनले विगतका राजनीतिक अपेक्षा र वर्तमान परिस्थितिबीच फरक अनुभव भएको उल्लेख गर्दै आत्मसमीक्षाको आवश्यकता रहेको धारणा व्यक्त गरेका छन्।

उनको अभिव्यक्तिपछि सामाजिक सञ्जालमा मिश्रित प्रतिक्रिया देखिएको छ। केहीले यसलाई राजनीतिक परिपक्वताको संकेतका रूपमा व्याख्या गरेका छन् भने केहीले व्यक्तिगत असन्तुष्टिको अभिव्यक्तिका रूपमा लिएका छन्।

ढुङ्गानाले आफ्नो टिप्पणी कुनै व्यक्तिगत आक्षेप नभई राजनीतिक मूल्याङ्कन र आत्मसमीक्षासँग सम्बन्धित रहेको स्पष्ट पारेका छन्। उनका अनुसार जनताले नेताहरूलाई भाषण होइन, कामका आधारमा मूल्याङ्कन गर्नुपर्ने समय आएको छ।

यस विषयमा  थापाको तर्फबाट भने औपचारिक प्रतिक्रिया सार्वजनिक भएको छैन।

ग्रे लिस्टमा नेपाल : भारतीय मिडिया भन्छ ‘बालेन सरकारलाई झट्का’

Posted on by nepalone

काठमाडौं। नेपाल फाइनान्सियल एक्सन टास्कफोर्स (एफएटिएफ) को ग्रे लिस्टमै यथावत् रहेको विषयलाई भारतीय अनलाइन मिडियाले ‘बालेन सरकारमाथि ठूलो झट्का’ भन्दै प्रस्तुत गरेको छ।

भारतीय दैनिक नवभारत टाइम्सको अनलाइन संस्करणले ‘एफएटिएफ की ग्रे लिस्ट में बना रहेगा नेपाल, बालेन सरकार को लगा बड़ा झटका, ब्लैक लिस्ट का मंडराया खतरा’ शीर्षकमा समाचार प्रकाशित गर्दै नेपालले सम्पत्ति शुद्धीकरण तथा वित्तीय अपराध नियन्त्रणमा अपेक्षित सुधार गर्न नसकेको टिप्पणी गरेको छ।

समाचारमा एफएटिएफको क्षेत्रीय निकाय एसिया प्यासिफिक ग्रुप (एपिजी) ले नेपाललाई आवश्यक सुधार नगरेमा ‘ब्ल्याक लिस्ट’ मा पर्न सक्ने चेतावनी दिएको उल्लेख छ।

एपिजीको पछिल्लो मूल्यांकनअनुसार नेपालले १५ बुँदे कार्ययोजनामध्ये ९ वटामा मात्र उल्लेखनीय प्रगति गरेको र बाँकी ६ क्षेत्रमा आंशिक सुधार देखिएको बताइएको छ।

एफएटिएफले नेपाललाई मनी लन्डरिङ नियन्त्रण, अनुसन्धान क्षमता विस्तार र अवैध वित्तीय कारोबार नियन्त्रणमा थप प्रभावकारी कदम चाल्न सुझाव दिएको छ। सुधारमा ढिलाइ भए भविष्यमा ब्ल्याक लिस्टमा पर्न सक्ने जोखिम कायमै रहने चेतावनी पनि दिएको छ।

नवभारत टाइम्सले यस अवस्थालाई नेपालका राजनीतिक नेतृत्वसँग जोड्दै बालेन्द्र शाह नेतृत्वको सरकारका लागि चुनौतीका रूपमा चित्रण गरेको छ। यद्यपि नेपालमा एफएटिएफसम्बन्धी सुधार कार्य कुनै एक सरकार वा नेतृत्वमा मात्र सीमित नभई निरन्तर चलिरहेको प्रक्रिया हो।

यसअघि गत मे महिनामा एपिजीको दुई सदस्यीय टोलीले काठमाडौंमा आएर अर्थ मन्त्रालय, नेपाल राष्ट्र बैंक, नेपाल प्रहरीलगायत निकायका उच्च अधिकारीसँग छलफल गरेको थियो। उक्त छलफलमा अर्थमन्त्री स्वर्णिम वाग्ले, गभर्नर विश्वनाथ पौडेललगायत अधिकारी सहभागी भएका थिए।

विशेषज्ञहरूका अनुसार एफएटिएफको ग्रे लिस्टमा रहनु नेपालका लागि वित्तीय प्रणाली, वैदेशिक लगानी र अन्तर्राष्ट्रिय विश्वसनीयताका दृष्टिले चुनौतीपूर्ण विषय हो।

सुधारका सूचकहरू पूरा गर्न नसके भविष्यमा थप कडा निगरानी वा ब्ल्याक लिस्टमा पर्ने जोखिम रहने उनीहरूको भनाइ छ।

कहाँ भयो कमजोरी ?

प्रभावकारी बन्न कानुन बनेन

नेपालले सम्पत्ति शुद्धीकरण नियन्त्रणका लागि आवश्यक कानुनी व्यवस्था लागू गरेको छ र नियामक निकायहरू पनि स्थापना गरिएका छन्। बैंक तथा वित्तीय संस्थालाई ग्राहक पहिचान (केवाईसी), शंकास्पद कारोबारको पहिचान तथा जोखिम व्यवस्थापन प्रणाली लागू गर्न निर्देशन दिइएको छ।

तर अन्तर्राष्ट्रिय वित्तीय कारबाही कार्यदल (एफएटीएफ) को मूल्यांकनमा मुख्य ध्यान कानुनको अस्तित्वभन्दा पनि त्यसको व्यवहारिक परिणाममा रहने गर्छ। नेपालमा शंकास्पद कारोबार पहिचान, अनुसन्धान, मुद्दा दर्ता र कारबाहीसम्मका प्रक्रियामा अपेक्षित प्रभावकारिता देखिन नसकेको टिप्पणी हुँदै आएको छ।

सम्पत्ति शुद्धीकरण नियन्त्रणमा संलग्न निकायहरूको क्षमता, अन्तरनिकाय समन्वय र न्यायिक प्रणालीको कार्यक्षमतामा सुधार आवश्यक रहेको अन्तर्राष्ट्रिय मूल्यांकनले देखाएको छ।

बैंकिङ क्षेत्रमा निगरानी र दबाब

नेपालको बैंकिङ प्रणाली एफएटीएफ मूल्यांकनसँग प्रत्यक्ष रूपमा सम्बन्धित क्षेत्र हो। बैंक तथा वित्तीय संस्थाहरूले अन्तर्राष्ट्रिय मापदण्डअनुसार ग्राहक पहिचान, जोखिम मूल्यांकन र शंकास्पद कारोबार नियन्त्रणका लागि उल्लेखनीय प्रयास गर्दै आएका छन्। तर देश ग्रे लिस्टमा रहँदा अन्तर्राष्ट्रिय बैंक तथा वित्तीय संस्थाहरूले नेपालसँगको कारोबारमा थप सतर्कता अपनाउने सम्भावना रहन्छ।

यसले अन्तर्राष्ट्रिय भुक्तानी प्रणाली, विदेशी बैंकसँगको सम्बन्ध तथा व्यापारिक कारोबारमा अतिरिक्त प्रक्रिया र निगरानी बढाउन सक्छ। त्यसको असर बैंकिङ लागतमा समेत पर्न सक्छ। अन्तर्राष्ट्रिय कारोबारका क्रममा थप कागजी प्रक्रिया पूरा गर्नुपर्ने अवस्थाले व्यवसायी र वित्तीय संस्थालाई अतिरिक्त बोझ थप्न सक्छ।

विदेशी लगानीमा पर्ने प्रभाव

विदेशी लगानीकर्ताले कुनै देशमा लगानी गर्ने निर्णय गर्दा राजनीतिक स्थायित्व र आर्थिक अवस्थासँगै वित्तीय पारदर्शितालाई पनि मुख्य आधारका रूपमा लिन्छन्। एफएटीएफको ग्रे लिस्टमा रहनुले नेपाललाई तुलनात्मक रूपमा उच्च जोखिमयुक्त बजारका रूपमा देखाउन सक्छ। यसले लगानीकर्ताको निर्णय प्रक्रियामा नकारात्मक असर पार्ने सम्भावना रहन्छ।

हाल नेपालमा आर्थिक गतिविधि सुस्त रहेको, निजी क्षेत्रको आत्मविश्वास कमजोर रहेको र लगानी विस्तार अपेक्षित रूपमा हुन नसकेको अवस्थामा अन्तर्राष्ट्रिय वित्तीय छविमा देखिने कमजोरीले थप चुनौती सिर्जना गर्न सक्छ।

रेमिट्यान्समा सीधा रोक नलागे पनि अन्तर्राष्ट्रिय वित्तीय संस्थाहरूले जोखिम व्यवस्थापनका कारण थप निगरानी र कडाइ गर्न सक्छन्। यसले रकम पठाउने र प्राप्त गर्ने प्रक्रिया केही जटिल बन्न सक्छ। विशेषगरी अनौपचारिक कारोबार नियन्त्रण गर्न प्रभावकारी नीति आवश्यक देखिन्छ।

नेपालका लागि अहिलेको मुख्य चुनौती ग्रे लिस्टबाट बाहिरिनु मात्र नभई दीर्घकालीन रूपमा पारदर्शी र सुदृढ वित्तीय प्रणाली निर्माण गर्नु हो। सम्पत्ति शुद्धीकरण नियन्त्रणका अन्तर्राष्ट्रिय मापदण्ड पूरा गर्न सरकारी निकाय, केन्द्रीय बैंक, अनुसन्धान निकाय, सुरक्षा निकाय र न्यायिक निकायबीच समन्वय अझ प्रभावकारी हुनुपर्ने देखिन्छ।

स्तरोन्नतिका यस्ता सुझाव

एफएटीएफका अनुसार नेपालले अझै पनि शंकास्पद वित्तीय कारोबारको पहिचान, अनुसन्धान र कारबाही प्रक्रियामा सुधार गर्नुपर्ने आवश्यकता छ। विशेषगरी सम्पत्ति शुद्धीकरणसम्बन्धी जोखिम व्यवस्थापनमा रणनीतिक कमजोरीहरू कायम रहेको भन्दै त्यसलाई सम्बोधन गर्न सुझाव दिइएको छ।

त्यस्तै वाणिज्य बैंक, उच्च जोखिमयुक्त सहकारी संस्था, क्यासिनो, बहुमूल्य धातु तथा पत्थर व्यवसाय र घरजग्गा क्षेत्रको जोखिममा आधारित निगरानी प्रणाली अझ मजबुत बनाउनुपर्ने आवश्यकता औँल्याइएको छ।

नेपालमा हुण्डी कारोबार अझै पनि ठूलो चुनौतीका रूपमा रहेको भन्दै यसलाई नियन्त्रण गर्न कडा र प्रभावकारी कदम चाल्नुपर्ने एफएटीएफको सुझाव छ।

साथै सम्पत्ति शुद्धीकरण अनुसन्धान गर्ने निकायलाई अझ सक्षम बनाउनुपर्ने, अनुसन्धान र अभियोजन प्रक्रियालाई प्रमाणमा आधारित र प्रभावकारी बनाउनुपर्ने पनि उल्लेख गरिएको छ।

‘धुरन्धर’बाटै रणवीरले कमाए ३२५ करोड

Posted on by nepalone

एजेन्सी। बलिउड अभिनेता रणवीर सिंहले एउटै चलचित्र परियोजनाबाट करिब ३२५ करोड भारतीय रुपैयाँ आम्दानी गर्दै भारतीय चलचित्र उद्योगमा नयाँ कीर्तिमान बनाएको दाबी गरिएको छ।

मिडिया रिपोर्टअनुसार उनले फिल्म ‘धुरन्धर’ बाट उक्त आम्दानी गरेका हुन्। दुई भागमा प्रदर्शन गरिएको यो फिल्मले विश्वव्यापी रूपमा ठूलो व्यापार गरेको बताइएको छ।

रिपोर्टमा उल्लेख भएअनुसार फिल्मका दुवै भागले संयुक्त रूपमा करिब ३ हजार २०० करोड भारु विश्वभर कमाएका थिए। यसमध्ये भारतबाट मात्रै १ हजार ९०० करोड रुपैयाँभन्दा बढी आम्दानी भएको जनाइएको छ।

जानकारी अनुसार रणवीर सिंहले यस फिल्मका लागि परम्परागत निश्चित पारिश्रमिक नलिई नाफामा आधारित साझेदारी मोडेल अपनाएका थिए। यही कारण उनले फिल्मको नाफामा प्रत्यक्ष हिस्सा पाएका हुन्।

फिल्मको बजेट बढेपछि उनले व्यक्तिगत रूपमा लगानी समेत गरेको बताइन्छ, जसले उनको कुल हिस्सामा वृद्धि भएको उल्लेख गरिएको छ। हल प्रदर्शनसँगै डिजिटल अधिकार, टेलिभिजन प्रसारण अधिकार र संगीत अधिकारबाट प्राप्त आम्दानी समेत जोडिँदा उनको कुल हिस्सा करिब ३२५ करोड रुपैयाँ पुगेको दाबी गरिएको छ।

यसअघि भारतीय चलचित्र उद्योगमा सबैभन्दा बढी कमाइको रेकर्ड दक्षिण भारतीय अभिनेता रजनीकान्तको नाममा थियो। उनले २०२४ मा प्रदर्शन भएको फिल्म ‘जेलर’ बाट २५० करोड रुपैयाँभन्दा बढी आम्दानी गरेको बताइएको छ।

त्यस्तै अल्लु अर्जुन र प्रभासले क्रमशः ‘पुष्पा २’ र ‘कल्कि २८९८ एडी’ मार्फत २०० करोड रुपैयाँभन्दा बढी आम्दानी गरिसकेका उल्लेख छ।

बलिउडतर्फ यसअघि शाहरुख खानको नाममा उच्च आम्दानीको रेकर्ड रहेको थियो। उनले २०२३ मा आएका ‘पठान’ र ‘जवान’ फिल्मबाट प्रति फिल्म करिब २०० करोड रुपैयाँ कमाएको बताइएको छ।

मनिष झा महामन्त्रीमा उम्मेदवारी दिँदै

Posted on by nepalone

काठमाडौं।राष्ट्रिय स्वतन्त्र पार्टी (रास्वपा) का प्रवक्ता मनिष झाले पार्टीको महामन्त्री पदमा प्रतिस्पर्धा गर्ने बताएका छन्।

उनले महाधिवेशन स्थलमा पत्रकारहरूसँग कुरा गर्दै आफूले सो पदका लागि उम्मेदवारी दिने निर्णय गरेको जानकारी दिएका हुन्।

झाले हाल कुनै पनि लाभको पदमा नरहेको स्पष्ट पारेका छन्।

यसैबीच आइतबारबाट सुरु भएको रास्वपाको महाधिवेशनमा बन्दसत्र अघि बढ्ने तयारी भइरहेको छ। पार्टीको कार्यतालिका अनुसार भोलिबाट निर्वाचन प्रक्रिया सुरु हुने छ।

झापा जाँदै गगन-विश्व

Posted on by nepalone

काठमाडौं। नेपाली कांग्रेसका सभापति गगन थापा झापा जाने भएका छन्।

पार्टीको जिल्लास्तरीय संगठनात्मक भेलालाई सम्बोधन गर्न उनी मंगलबार झापा पुग्ने कार्यक्रम रहेको कांग्रेस झापाले जनाएको छ।

कांग्रेस झापा जिल्ला सचिव कृष्ण हुमागाईंका अनुसार भेलामा पार्टी उपसभापति विश्वप्रकाश शर्मा पनि सहभागी हुनेछन्। कार्यक्रम कार्यकर्ता भेटघाट, संगठन सुदृढीकरण तथा आन्तरिक समन्वयलाई केन्द्रमा राखेर आयोजना गरिएको हो।

जिल्ला नेतृत्वका अनुसार झापामा हालसम्म करिब ६० प्रतिशत क्रियाशील सदस्यता अद्यावधिक भइसकेको छ।

बाँकी सदस्यता अद्यावधिकको प्रक्रिया पनि क्रमशः अघि बढिरहेको जनाइएको छ।

रूस-युक्रेन युद्ध : मस्कोमा ५९ ड्रोन नष्ट

Posted on by nepalone

एजेन्सी। रूसको राजधानी मस्को लक्षित ठूलो संख्यामा ड्रोन आक्रमण प्रयास भएपछि रूसी सुरक्षा प्रणाली सक्रिय बनेको छ।

रूसी अधिकारीहरूका अनुसार करिब ६० वटा ड्रोनमध्ये ५९ वटा आकाशमै नष्ट गरिएका छन्। घटनापछि मस्कोका चार प्रमुख विमानस्थल केही समयका लागि बन्द गर्नुपरेको थियो।

मस्कोका मेयर सर्गेई सोब्यानिनले सामाजिक सञ्जालमार्फत ड्रोनहरू शहरतर्फ आउँदै गर्दा रोकिएको जानकारी दिएका छन्। उनका अनुसार वायु रक्षा प्रणालीले ती सबै ड्रोनलाई आकाशमै निष्क्रिय पारेको हो।

सुरक्षा अवस्थालाई ध्यानमा राख्दै मस्कोका प्रमुख विमानस्थलहरू अस्थायी रूपमा बन्द गरिएका थिए भने अवस्था सामान्य भएपछि बिहान ५:३९ बजे पुनः सञ्चालनमा ल्याइएको थियो।

यो घटना २०२२ मा सुरु भएको रूस-युक्रेन युद्धको निरन्तर विकसित हुँदै गएको चरणसँग जोडिएको छ। युद्ध सुरु हुँदा मुख्य रूपमा स्थल र हवाई आक्रमण केन्द्रमा थियो, तर २०२३ पछि दुवै पक्षले लामो दूरीसम्म पुग्न सक्ने ड्रोनलाई प्रमुख रणनीतिक हतियारका रूपमा प्रयोग गर्न थालेका छन्।

युक्रेनले पश्चिमी सहयोग र आफ्नै प्रविधिको सहायताले रूसको भित्री क्षेत्रमा समेत ड्रोन आक्रमण गर्न थालेपछि युद्धको स्वरूप परिवर्तन भएको मानिन्छ।

पछिल्ला वर्षहरूमा मस्को र आसपासका क्षेत्रमा ड्रोन आक्रमण नियमितजस्तै देखिएको छ। २०२४ देखि यस्ता आक्रमणहरू बढ्न थालेका छन् भने २०२५ र २०२६ मा रूसका ऊर्जा पूर्वाधार, तेल प्रशोधन केन्द्र र आपूर्ति संरचनामा समेत क्षति भएको रिपोर्टहरू सार्वजनिक भएका छन्। पछिल्लो घटनाले मस्कोलाई पनि युद्धबाट पूर्ण रूपमा सुरक्षित क्षेत्र मान्न नसकिने अवस्था देखाएको छ।

रूसी मेयर सर्गेई सोब्यानिनका अनुसार पछिल्लो आक्रमण प्रयासमा ५९ ड्रोन नष्ट गरिएको हो। यद्यपि रूसले ती ड्रोनको स्रोतबारे औपचारिक रूपमा स्पष्ट विवरण दिएको छैन। तर युद्धको वर्तमान परिस्थितिका कारण यसलाई युक्रेनसँग जोडेर विश्लेषण गरिएको छ।

विश्लेषकहरूका अनुसार युक्रेनले पछिल्ला वर्षहरूमा रूसको भित्री क्षेत्रमा रहेका ऊर्जा संरचना, सैन्य गोदाम र आपूर्ति प्रणालीलाई लक्षित गर्दै आएको छ। यसको उद्देश्य रूसको युद्ध क्षमतामा दबाब सिर्जना गर्नु रहेको बताइन्छ। त्यसको प्रतिकारमा रूसले मस्को वरिपरि एस–३०० र एस–४०० जस्ता अत्याधुनिक वायु रक्षा प्रणाली परिचालन गर्दै आएको छ। तर ड्रोनको संख्या र प्रविधि दुवै बढ्दै जाँदा पूर्ण नियन्त्रण चुनौतीपूर्ण बन्दै गएको देखिन्छ।

विशेषज्ञहरूका अनुसार यस युद्धमा ड्रोनको प्रयोग बढ्नुका प्रमुख कारण कम लागतमा उच्च प्रभाव पार्न सक्नु, मानव जोखिम कम हुनु, लामो दूरीसम्म आक्रमण गर्न सक्नु र परम्परागत रक्षा प्रणालीलाई चुनौती दिन सक्नु हो।

यसले रूस–युक्रेन युद्धलाई परम्परागत लडाइँबाट प्रविधि-केन्द्रित आधुनिक युद्धतर्फ रूपान्तरण गरेको विश्लेषण गरिएको छ।

लिङ्देनले ‘राजा ल्याउनुस्’ भन्दा माैन बालेन गणतन्त्रवादी नेतासँग किन कड्किए ?

Posted on by nepalone

काठमाडाैं । प्रधानमन्त्री बालेन के राजा चाहन्छन् ? त्यसकै लागि उनले राष्ट्रपति रामचन्द्र पौडेलमाथि पटकपटक अपमान र राजीनामाको दबाब दिएका हुन् ?

यसबारे बालेनले प्रष्ट बोलेका छैनन् । तर, उनको दल रास्वपाको चितवनमा जारी महाधिवेशनमा राप्रपा अध्यक्ष राजेन्द्र लिङ्देनले राजा चाहिन्छ भन्नेहरुको मत पनि बालेनलाई गएकोले राजा ल्याउन सुझाए ।

बारम्बार राष्ट्रपति पौडेललाई जसरी अप्ठ्यारो पार्न प्रधानमन्त्री बालेनले कोशिस गरेका छन्, उनलाई नागार्जुन पुगेको ज्ञानेन्द्र शाहलाई फेरि नारायणहिटी ल्याउन उद्धत भएको आरोप लाग्ने गरेको छ ।

यस्ताेमा, राप्रपा अध्यक्ष लिङ्देनले तपाईंलाई राजावादीको मत पनि छ र तपाईंले राजा ल्याउनुपर्छ भन्दा बालेन चुपचाप बसे ।

जबकि, महाधिवेशनमा गणतन्त्रपक्षधर दल कांग्रेस सभापति गगन थापाले सीमा सम्बन्धी मामिलामा गम्भीर हुन सुझाव दिँदा प्रधानमन्त्री बालेनले आफ्नो राष्ट्रियतामा शंका नगर्न चेतावनीको भाषामा बोले ।

अर्काे गणतन्त्रपक्षधर दल एमालेका नेता प्रदीप ज्ञवालीले बालेन सरकारलाई गेयर र ब्रेक मिलाएर मात्रै सत्ताको गाडी गुडाउन सुझाव दिँदा चेतावनीको भाषामा उनले बालेन सरकार एक्सप्रेस वेमा गुडेको गाडी भएको र गन्तव्य पुगेपछि मात्रै रोकिने बताए ।

जनमतका अध्यक्ष सिके राउतले हावा र जनता उस्तै भएको र दुबैको भर नहुने भन्दा उनले बाढी ल्याएर खोलो फर्काएको जवाफ दिए ।

तर, राप्रपा अध्यक्ष राजेन्द्र लिङ्देनले राजा चाहनेहरुको मत पनि बालेनलाई गएको र राजा ल्याउनु भन्दा मौन बसे । यसलाई नेपाली राजनीतिमा निकै अर्थपूर्ण घटनाको रुपमा हेरिएको छ ।

बालेनले पूर्वराजा महेन्द्रकाे जस्तै पाेषाक लगाउने गरेकाले उनलाई महेन्द्रपथमा हिँड्न चाहेकाे माैन प्रधानमन्त्री पनि कतिपयले भन्ने गरेका छन् । उनलाई नेपाली सेनाले पर्दापछाडिबाट समर्थन गरेकाे घामजत्तिकै छर्लङ्‍ग छ ।

काठमाडाै‌ंकाे प्रमुख भए लगत्तै जङ्‍गी अड्डा पुगेका उनी प्रधानमन्त्री भएलगत्तै सेनाकाे कार्यक्रमलाई सम्बाेधन गर्न गएका थिए ।

जबकि अहिलेसम्म उनले आफूलाई मतदान गर्ने झापा-५ बासीलाई धन्यवाद दिए न प्रधानमन्त्री भएपछि देशवासीलाई सम्बाेधन गरे । नेपाली सेना देशमा राजसंस्थाकाे पक्षपाती जस्ताे देखिएकाे छ ।

२४ भदाै २०८२ मा प्रधानसेनापति अशाेकराज सिग्देलले देशवासीकाे नाममा सम्बाेधन गर्दा पृष्ठभूमिमा पृथ्वीनारायण शाहकाे तस्बिर राखेका थिए ।

त्यसबेलै सेना के चाहन्छ नेपालमा ? र प्रधानमन्त्री बालेन के चाहन्छ ? मानिसहरुले अनुमान गरिसकेका छन् ।

यस्ताेमा प्रधानमन्त्री बालेनले राप्रपा अध्यक्ष लिङ्देनले  राजावादीहरुकाे पनि भाेट घण्टीमा परेकाे भन्दै राजा ल्याउनुहाेस् भन्दा उनी माैन बस्नु सामान्य विषय हाेइन ।

भिडियो:

बन्दसत्र अघि रवि-बालेन के गर्दैछन् छलफल ?

Posted on by nepalone

काठमाडौँ । राष्ट्रिय स्वतन्त्र पार्टी (रास्वपा) को जारी महाधिवेशनअन्तर्गत बन्दसत्र सुरु हुनुअघि शीर्ष नेतृत्वबीच महत्वपूर्ण छलफल भएको छ।

सभापति रवि लामिछाने र वरिष्ठ नेता तथा प्रधानमन्त्री वालेन्द्र शाह (बालेन) बीच सोमबार बिहान रिसोर्टमा छलफल भएको स्रोतले जनाएको छ।

स्रोतका अनुसार दुवै नेता चितवनको लटौली-स्याङ्चुरी रिसोर्टमा बिहानैदेखि पार्टीको नेतृत्व चयन, संगठनात्मक संरचना तथा आगामी रणनीतिसम्बन्धी विषयमा छलफलमा जुटेका थिए।

बिहान साढे ८ बजेदेखि बन्दसत्र सुरु गर्ने कार्यतालिका तय भए पनि शीर्ष नेताबीचको छलफल लम्बिँदा कार्यक्रम समयमै सुरु हुन नसकेको हो। यस कारण महाधिवेशन स्थलमा पुगेका प्रतिनिधिहरू केही समय प्रतीक्षामा बसेका छन्।

पार्टीका आन्तरिक संरचना, नेतृत्व व्यवस्थापन र समसामयिक राजनीतिक एजेन्डाबारे छलफल केन्द्रित रहेको बताइएको छ।

कमला रोलिङ मिल्स : कति भयो कारोबार ?

Posted on by nepalone

काठमाडौं। कमला रोलिङ मिल्सले पछिल्ला वर्षहरूमा कारोबार, नाफा र कर्जाको संरचनामा मिश्रित वित्तीय अवस्था देखाएको छ। कम्पनीको चालु आर्थिक वर्षको ९ महिनामा ८८ करोड ३० लाख रुपैयाँको कारोबार भएको हो।

गत आर्थिक वर्षमा कम्पनीले १ अर्ब ४६ करोड ७० लाख रुपैयाँ कारोबार गरेको थियो। त्यसअघि सन् २०२४ मा १ अर्ब ४४ करोड २० लाख, सन् २०२३ मा २ अर्ब ८४ करोड ३० लाख र सन् २०२२ मा २ अर्ब ७१ करोड रुपैयाँ कारोबार भएको तथ्यांकले देखाउँछ।

कम्पनीले सञ्चालन नाफा मार्जिनतर्फ भने सुधार देखाएको छ। चालु आर्थिक वर्षको ९ महिनामा २ करोड १० लाख रुपैयाँ सञ्चालन नाफा भएको छ। गत आर्थिक वर्षमा ३ करोड ४० लाख रुपैयाँ सञ्चालन नाफा भएको थियो भने सन् २०२४ मा ३ करोड ५० लाख रुपैयाँ सञ्चालन घाटा रहेको थियो।

तर खुद नाफामा भने निरन्तर गिरावट देखिएको छ। सन् २०२४ मा ९ करोड ७० लाख रुपैयाँ खुद नाफा कमाएको कम्पनीले गत आर्थिक वर्षमा ३ करोड १० लाख रुपैयाँमा झरेको थियो। चालु आर्थिक वर्षको ९ महिनामा यो नाफा अझ घटेर ९० लाख रुपैयाँमा सीमित भएको छ।

नगद प्रवाह भने सुधारतर्फ देखिएको छ। सन् २०२४ मा नकारात्मक रहेको कुल नगद सञ्चय गत आर्थिक वर्षमा ६० लाख रुपैयाँ पुगेको थियो भने चालु आर्थिक वर्षको ९ महिनामा यो बढेर २ करोड रुपैयाँ पुगेको छ।

कर्जाको भार भने क्रमशः घट्दै गएको छ। सन् २०२४ मा १ अर्ब २४ करोड ८० लाख रुपैयाँ रहेको ऋण गत आर्थिक वर्षमा घटेर ९७ करोड १० लाख रुपैयाँ पुगेको थियो। चालु आर्थिक वर्षको ९ महिनामा यो थप घटेर ४० करोड ४० लाख रुपैयाँमा सीमित भएको छ।

यससँगै कम्पनीको वित्तीय सूचकहरूमा सुधार देखिएको छ। गियरिङ अनुपात सन् २०२४ को १.३२ गुणाबाट घटेर चालु आर्थिक वर्षमा ०.४५ गुणा पुगेको छ। त्यस्तै बाह्य दायित्व र ट्यान्जिबल नेटवर्थ अनुपात पनि ०.५१ गुणामा झरेको छ।

ब्याज तिर्ने क्षमता (ब्याज कवरेज अनुपात) सन् २०२४ को कमजोर अवस्थाबाट सुधार हुँदै १.४७ गुणामा पुगेको छ भने ऋण सेवा कवरेज अनुपात पनि उल्लेख्य सुधारसहित सन्तुलित अवस्थामा देखिएको छ।

सन् १९९२ मा विशाल ग्रुपद्वारा स्थापना गरिएको यो कम्पनीले टीएमटी बार, जीआई वायर, बार्बेड वायर र ग्याल्भनाइज्ड बक्स उत्पादन गर्दै आएको छ। कम्पनीको उत्पादन क्षमता वार्षिक करिब ८० हजार मेट्रिक टन रहेको छ र यसको उत्पादन ‘कमला गोल्ड थर्मेक्स’ ब्रान्डमा बजारमा उपलब्ध छ।

दीर्घकालीन तथा अल्पकालीन कर्जाका लागि कम्पनीले करिब २ अर्ब ४२ करोड ५० लाख रुपैयाँ बराबरको क्रेडिट रेटिङ गराएको छ।

रास्वपा महाधिवेशनको दोस्रो दिन : बन्दसत्र ढिलो,त्रुटि सच्याउने काम सकिएन

Posted on by nepalone

चितवन। राष्ट्रिय स्वतन्त्र पार्टी (रास्वपा) को जारी प्रथम महाधिवेशनअन्तर्गत दोस्रो दिनको बन्दसत्र निर्धारित समयमा सुरु हुन सकेको छैन।

सोमवार बिहान साढे ८ बजे सुरु हुने भनिएको बन्दसत्र प्रतिनिधिहरूको नामावलीमा देखिएका त्रुटि सच्याउने काम नसकिएकाले ढिलिएको हो।

पार्टीका एक नेताका अनुसार निर्वाचन समितिले सार्वजनिक गरेको प्रारम्भिक महाधिवेशन प्रतिनिधि सूचीमा विभिन्न त्रुटि देखिएपछि त्यसलाई सच्याउने तथा पुनः जाँच गर्ने प्रक्रिया जारी छ। सोही कारण बन्दसत्रको कार्यतालिका केही समय पछि धकेलिएको हो।

निर्वाचन समितिले आइतबार करिब चार हजार प्रतिनिधिको प्रारम्भिक नामावली सार्वजनिक गरेको थियो। सो सूचीमा त्रुटि देखिएपछि प्रतिनिधिहरूले निवेदनमार्फत सुधारका लागि माग गर्नुपर्ने व्यवस्था गरिएको छ, जसका कारण प्रक्रिया अपेक्षाभन्दा लामो भएको बताइएको छ।

आजको बन्दसत्रमा पार्टीका विभिन्न महत्वपूर्ण प्रतिवेदन तथा प्रस्तावहरू प्रस्तुत गर्ने कार्यसूची रहेको छ। अनुशासन आयोगको प्रतिवेदन, कोषाध्यक्षको वित्तीय प्रतिवेदन, संगठनात्मक प्रतिवेदन तथा विधान संशोधनसम्बन्धी प्रस्ताव प्रस्तुत हुनेछन्।

त्यसैगरी अर्थ-राजनीतिक प्रस्तावना पनि पेश गरिनेछ। यी प्रतिवेदनहरूमा छलफल र अनुमोदनपछि पार्टी सभापतिले राजनीतिक प्रतिवेदन प्रस्तुत गर्ने कार्यक्रम तय गरिएको छ।

बर्डफ्लुको जोखिममा काठमाडौं

Posted on by nepalone

काठमाडौं। नेपालमा बर्डफ्लु संक्रमण पुनः तीव्र गतिमा फैलिन थालेको छ।

पूर्वी झापाबाट सुरु भएको संक्रमण क्रमशः चितवन हुँदै काठमाडौं उपत्यकासम्म पुगेको सरकारी अधिकारीहरूले बताएका हुन्।

हाल काठमाडौं, भक्तपुर र ललितपुरसहित काभ्रे जिल्लामा समेत संक्रमण देखिन थालेपछि जोखिम अझ बढ्दै गएको छ।

पशु सेवा विभागका एक अधिकारीका अनुसार काठमाडौं उपत्यका अहिले बर्डफ्लुको ‘हटस्पट’ क्षेत्रका रूपमा देखिएको छ। विशेषगरी काठमाडौंका चन्द्रागिरि, तारकेश्वर र कीर्तिपुर, साथै ललितपुरका गोदावरी, महालक्ष्मी र ललितपुर महानगर क्षेत्रमा संक्रमण बढी देखिएको छ।

उनका अनुसार खुला वातावरण, चराचुरुंगीको बाक्लो उपस्थिति तथा अव्यवस्थित कुखुरा फार्महरू संक्रमण फैलिन प्रमुख कारण बनेका छन्। बर्डफ्लुको प्रभावकारी उपचार वा खोप उपलब्ध नभएकाले संक्रमित कुखुरा नष्ट गर्नु नै नियन्त्रणको मुख्य उपाय भएको उनले बताए।

विभागका अनुसार फार्म वरपर जंगली चराको आवागमन, सिमसार क्षेत्र नजिक पोल्ट्री फार्म सञ्चालन, जैविक सुरक्षा मापदण्डको पालना नहुनु तथा बाहिरी व्यक्ति र सवारीसाधनको अनियन्त्रित प्रवेशले संक्रमण फैलिन सहज बनाएको छ।

त्यसैगरी अण्डा राख्ने क्रेट पुनः प्रयोग गर्ने अभ्यास, सरसफाइमा लापरबाही तथा पन्छी र मासु व्यवस्थापन एउटै समूहबाट गरिनु पनि जोखिम बढाउने कारणका रूपमा देखिएको छ। कोसी प्रदेशमा भने संक्रमण क्रमशः नियन्त्रणमा आउँदै गएको जनाइएको छ।

ललितपुरस्थित जावलाखेलको सदर चिडियाखानामा पनि बर्डफ्लु पुष्टि भएको छ। जेठ ३० गते मरेको कागको नमुना परीक्षणपछि असार ४ गते संक्रमण पुष्टि भएको जनाइएको छ। त्यहाँ केही वन्यजन्तु र चरामा संक्रमणका कारण मृत्यु भएको पुष्टि भए पनि अन्य पन्छीमा संक्रमण नदेखिएको उल्लेख छ।

नेपालमा सन् २०१९ मा बर्डफ्लु मानिसमा पनि देखिएको थियो, जसमा एक २१ वर्षीय युवकको मृत्यु भएको थियो।

सरुवारोग विशेषज्ञका अनुसार पशुपन्छीसँग प्रत्यक्ष सम्पर्कमा रहने किसान, ढुवानीकर्ता तथा बिक्री–वितरणमा संलग्न व्यक्ति बढी जोखिममा छन्। संक्रमण भएमा ज्वरो, खोकी, घाँटी दुख्ने, निमोनिया र श्वासप्रश्वासमा गम्भीर समस्या देखिन सक्ने र गम्भीर अवस्थामा ज्यानसमेत जान सक्ने चेतावनी दिइएको छ।

विशेषज्ञहरूका अनुसार एच५एन१ प्रकारको बर्डफ्लु सबैभन्दा खतरनाक मानिन्छ। यो भाइरस चरा प्रजातिमा छिटो फैलिने मात्र नभई दुर्लभ अवस्थामा मानिसमा पनि सर्न सक्ने क्षमता राख्छ। भाइरस म्युटेसन हुने भएकाले यसको व्यवहार परिवर्तनशील हुने बताइन्छ, जसले नियन्त्रणलाई थप जटिल बनाउँछ।

पशु सेवा विभागले बिरामी वा मरेका पन्छी नछुन, फार्ममा मास्क, पन्जा, एप्रोन र बुट अनिवार्य प्रयोग गर्न तथा कामपछि साबुनपानीले राम्रोसँग हात धुन आग्रह गरेको छ। साथै पन्छीजन्य मासु पूर्ण रूपमा पकाएर मात्र खान र चराचुरुंगी धेरै हुने स्थानमा सतर्क रहन चिकित्सकहरूले सुझाव दिएका छन्।

समयमै नियन्त्रण नभए बर्डफ्लु ठूलो जनस्वास्थ्य संकटको रूप लिन सक्ने जोखिम कायमै रहेको विज्ञहरूले चेतावनी दिएका छन्।

नेपालमै पहिलो पटक एनिमेसन फिल्म फेस्टिभल हुने

Posted on by nepalone

काठमाडौं । नेपाली एनिमेसन र भिएफएक्स क्षेत्रलाई संस्थागत रूपमा अघि बढाउने उद्देश्यसहित नेपालमै पहिलो पटक एनिमेसन फिल्म फेस्टिभल आयोजना हुने भएको छ।

नेपाल एनिमेसन तथा भिएफएक्स कलाकार संघले यसलाई सिर्जनात्मक उद्योग विस्तारको महत्वपूर्ण कदमका रूपमा प्रस्तुत गरेको हो।

आगामी अक्टोबरमा आयोजना हुने यो फेस्टिभल ‘मैले देखेको नेपाल’ भन्ने मूल विषय (थिम) मा केन्द्रित रहनेछ। आयोजकका अनुसार नेपालभित्र र बाहिर रहेका कलाकारहरूले आफ्नो दृष्टिकोण, संस्कृति र कल्पनाशीलतालाई एनिमेसनमार्फत प्रस्तुत गर्ने अवसर पाउनेछन्।

फेस्टिभल सार्वजनिक गर्दै आयोजकले यसको आधिकारिक मस्कट ‘आफ्फे’ पनि सार्वजनिक गरेको छ। नेपाली राष्ट्रिय चरा डाँफेबाट प्रेरित यो मस्कटलाई कलाकार अरनिकोको ऐतिहासिक कलाशैलीसँग जोडेर डिजाइन गरिएको बताइएको छ। यसले परम्परा र आधुनिक डिजिटल कलाको मिश्रणलाई संकेत गर्ने आयोजकको दाबी छ।

कार्यक्रममा एनिमेटेड सर्ट फिल्म, कन्सेप्ट आर्ट प्रतियोगिता र भिएफएक्स आधारित विभिन्न प्रतिस्पर्धा समावेश गरिनेछ। विशेषगरी २ देखि १० मिनेटसम्मका छोटा एनिमेसन फिल्महरूलाई प्रतिस्पर्धामा समावेश गरिने र यसमा नेपालसहित विश्वभरका सर्जकहरू सहभागी हुन सक्ने बताइएको छ।

आयोजकले यस फेस्टिभललाई केवल प्रदर्शनको प्लेटफर्म मात्र नभई रोजगारी र उद्योग विकाससँग जोड्ने उद्देश्य पनि राखेको छ। त्यसैअनुसार ‘करिअरबोर्ड’ नामक अनलाइन पोर्टल सञ्चालनमा ल्याइने घोषणा गरिएको छ, जसले एनिमेसन क्षेत्रका कलाकार र रोजगारदातालाई जोड्नेछ।

कार्यक्रममा अन्तर्राष्ट्रिय स्तरका फिल्म र गेम स्टुडियोमा कार्यरत १२ जना नेपाली कलाकारहरूको भिडियो प्रस्तुति पनि देखाइएको थियो। यसले नेपाली एनिमेसन प्रतिभा विश्व बजारमा क्रमशः स्थापित हुँदै गएको संकेत गरेको आयोजकको भनाइ छ।

विशेषज्ञहरूका अनुसार यस्तो पहलले नेपालमा डिजिटल क्रिएटिभ इन्डस्ट्री, विशेषगरी एनिमेसन र भिएफएक्स क्षेत्रको सम्भावनालाई विस्तार गर्ने अपेक्षा गरिएको छ।

विश्वकप २०२६ : प्रारम्भिक चरणमै ८ रातो कार्ड

Posted on by nepalone

काठमाडौं। अमेरिका, क्यानडा र मेक्सिकोमा संयुक्त रूपमा जारी फिफा विश्वकप २०२६ मा खेलाडी निष्कासन (रातो कार्ड) को संख्या प्रारम्भिक चरणमै उल्लेखनीय रूपमा बढेपछि विश्व फुटबल वृत्तमा अनुशासन र रेफ्री निर्णयबारे व्यापक बहस सुरु भएको छ।

प्रतियोगिता सुरु भएको छोटो समयमै ८ खेलाडीले रातो कार्ड पाइसकेका छन्। जुन सन् २०१८ को रसिया विश्वकप र सन् २०२२ को कतार विश्वकपमा देखिएका कुल रातो कार्ड (४–४) को संयुक्त बराबर संख्या हो।

विश्लेषकहरूका अनुसार विश्वकपजस्तो उच्च दबाबको प्रतियोगितामा यस्तो तीव्र वृद्धि सामान्य होइन र यसले आगामी चरणहरूमा खेलको शैली, रणनीति र नतिजामा समेत असर पार्न सक्ने देखिन्छ।

समूह ‘सी’ अन्तर्गत भएको बेल्जियम र इरानबीचको खेलमा बेल्जियमका डिफेन्डर नाथन न्गोय ६६औँ मिनेटमा सिधै रातो कार्ड पाएपछि कुल संख्या ८ पुगेको हो।

इरानका फरवार्ड मेहदी तात्सुमीलाई स्पष्ट गोल गर्ने अवसरबाट रोक्ने क्रममा गरिएको फउललाई रेफ्रीले ‘डिनायल अफ एन अब्भियस गोल स्कोरिङ अपर्चुनिटी’ (स्पष्ट गोल अवसर रोकिएको अवस्था) मानेर सिधै रातो कार्ड दिएका थिए।

१० खेलाडीमा सीमित भए पनि बेल्जियमले उक्त खेल गोलरहित बराबरीमा टुंग्याएको थियो।

अधिकांश रातो कार्ड सिधै रेफ्री निर्णयबाट

हालसम्म देखाइएका ८ रातो कार्डमध्ये ६ वटा सिधै रेफ्रीको निर्णयबाट आएका छन् भने बाँकीमा भिडियो सहायक रेफ्री (भीएआर) को समीक्षा निर्णायक बनेको छ।

यसले रेफ्रीहरूको कडा व्याख्या, खेलाडीहरूको आक्रामक शैली र भीएआर प्रविधिको प्रभाव एकैसाथ देखिएको विश्लेषकहरूको निष्कर्ष छ।

यस संस्करणमा केही चर्चित खेलाडीहरू पनि निष्कासनमा परेका छन्।

पाराग्वेका मिडफिल्डर मिगेल अल्मिरोन टर्कीविरुद्धको खेलमा भीएआर समीक्षा पछि रातो कार्ड पाएर मैदान छाड्न बाध्य भए।

त्यस्तै कतारका असिम मादिबो र मोआज अहमद क्यानडाविरुद्धको खेलमा निष्कासित भएका थिए।

बोस्निया एन्ड हर्जेगोभिनाका तारिक मुहरामोभिचले स्विट्जरल्यान्डका फरवार्ड ब्रेल एम्बोलोलाई स्पष्ट गोल अवसरबाट रोकेको घटनामा रातो कार्ड पाएका थिए।

जमैकाका वार हन्ट पनि दक्षिण अफ्रिकाविरुद्धको खेलको अन्तिम समयमा निष्कासित भएका थिए।

दक्षिण अफ्रिकी टोलीले यस विश्वकपमा अनुशासनको सबैभन्दा ठूलो समस्या भोगिरहेको देखिएको छ।

मेक्सिकोविरुद्धको उद्घाटन खेलमै टोलीका दुई खेलाडी थेम्बा ज्वाने र स्पेफेलो सिथोले रातो कार्ड पाएपछि टोली लामो समय ९ खेलाडीमा सीमित भएको थियो, जसले खेलको नतिजामा समेत गम्भीर असर पारेको बताइन्छ।

विश्वकप इतिहासमा रातो कार्डको संख्या समयअनुसार फरक देखिएको छ।

सन् १९९० मा १६, सन् १९९८ मा २२, र सन् २००६ मा २१ रातो कार्ड देखाइएको थियो, जसलाई आधुनिक विश्वकपको सबैभन्दा कडा संस्करणमध्ये एक मानिन्छ। सोही संस्करणको फाइनलमा जिनेदिन जिदानले इटालीका मार्को मातेरात्सीमाथि हेडबट गरेपछि रातो कार्ड पाएका घटना विश्व फुटबल इतिहासमै चर्चित बनेको थियो।

त्यसपछि सन् २०१० मा १७, सन् २०१४ मा १०, सन् २०१८ मा ४ र सन् २०२२ मा ४ रातो कार्ड मात्र देखिएको थियो।

तर यसपटक प्रारम्भिक चरणमै ८ रातो कार्ड पुगिसकेकाले पुराना केही कीर्तिमान तोडिन सक्ने सम्भावना बढेको छ।

किन बढ्दैछ रातो कार्ड ?

विश्लेषकहरूका अनुसार यसपटक रातो कार्ड बढ्नुमा तीन मुख्य कारण देखिन्छन्।

पहिलो, प्रतियोगिता विस्तारसँगै प्रतिस्पर्धा अझ तीव्र बनेको छ र प्रत्येक अंकको महत्व बढेको छ। दोस्रो, खेलाडी सुरक्षाका लागि रेफ्रीहरूलाई कडा निर्णय लिन निर्देशन दिइएको छ। तेस्रो, भीएआर प्रविधिको प्रयोगले पहिले नदेखिने फउलहरू पनि स्पष्ट रूपमा पत्ता लाग्न थालेका छन्।

विश्वकपका अझै धेरै खेलहरू बाँकी रहेकाले नकआउट चरणमा प्रवेशसँगै प्रतिस्पर्धा अझ कडा हुने अनुमान गरिएको छ। यसले भावनात्मक प्रतिक्रिया, रणनीतिक फउल र जोखिमपूर्ण ट्याकल बढाउन सक्ने देखिन्छ।

यदि यही प्रवृत्ति कायम रह्यो भने सन् २०१० को १७ रातो कार्ड र सन् २००६ को २१ रातो कार्डको कीर्तिमान चुनौतीमा पर्न सक्ने विश्लेषकहरूको आँकलन छ।

सुत्केरीको हेलिकप्टर उद्धार : गम्भीर अवस्थामा सुर्खेत पठाइयो

Posted on by nepalone

हुम्ला। सुत्केरी व्यथाले गम्भीर बनेकी हुम्ला जिल्लाको नाम्खा गाउँपालिका–१ हेक्का निवासी २८ वर्षीया सरिता लामाको नेपाली सेनाको हेलिकप्टरमार्फत उद्धार गरिएको छ।

उनलाई थप उपचारका लागि सुर्खेतस्थित प्रदेश अस्पताल पठाइएको हो।

जिल्ला अस्पताल हुम्लामा उपचार सम्भव नभएपछि जिल्ला प्रशासन कार्यालय हुम्लाको सिफारिसमा हवाई उद्धार गरिएको स्वास्थ्य अधिकारीहरूले जनाएका छन्।

स्वास्थ्य सेवा कार्यालय हुम्लाका प्रमुख उमाकान्त तिवारीका अनुसार लामाको रक्तचाप अत्यधिक बढेर १७०/१२० पुगेको थियो। उपचारका क्रममा उनी बेहोस भएको र करिब पाँचपटकसम्म झड्का (सिजर) समेत आएको उनले बताए।

डा. तिवारीका अनुसार गर्भमा रहेको शिशु ३१ हप्ताको मात्रै भएको छ। भिडियो एक्सरे परीक्षणमा बच्चाको तौल करिब १,२०० ग्राम मात्र देखिएको र समयअगावै जन्मिने जोखिमका कारण थप विशेषज्ञ उपचार आवश्यक परेको उनले जानकारी दिए।

दुर्गम भौगोलिक अवस्था र जटिल स्वास्थ्य अवस्थाका कारण तत्काल हेलिकप्टर उद्धार गर्नुपरेको जनाइएको छ। अहिले आमाको अवस्था र शिशुको उपचारबारे अस्पतालले थप निगरानी गरिरहेको छ।

वडाध्यक्षमाथि हातपात गरेको आरोपमा पत्रकार ऐश्वर्या कुँवर पक्राउ

Posted on by nepalone

काठमाडौं । कञ्चनपुरमा एक वडाध्यक्षमाथि सार्वजनिक कार्यक्रममै हातपात गरेको आरोपमा एक पत्रकार पक्राउ परेकी छन्।

जिल्ला प्रहरी कार्यालय कञ्चनपुरका अनुसार पत्रकार ऐश्वर्या कुँवरलाई आइतबार नै नियन्त्रणमा लिएर अभद्र व्यवहारसम्बन्धी कसुरमा अनुसन्धान प्रक्रिया अघि बढाइएको छ।

घटना भीमदत्त नगरपालिका–१८ का वडाध्यक्ष रविन्द्र देवकोटा माथि हातपात भएको आरोपसँग सम्बन्धित हो। आइतबार महेन्द्रनगरस्थित एक होटलमा आयोजित कार्यक्रममा दुवै पक्षबीच विवाद भएको बताइएको छ।

प्रत्यक्षदर्शीका अनुसार कार्यक्रमका क्रममा सुरु भएको भनाभन चर्किँदै जाँदा पत्रकार कुँवरले वडाध्यक्षमाथि हातपात गरेकी थिइन्। उक्त घटनाको भिडियो सामाजिक सञ्जालमा सार्वजनिक भएपछि विषयले व्यापक चर्चा पाएको थियो।

प्रहरीले घटनाबारे थप अनुसन्धान जारी रहेको जनाएको छ। घटनामा संलग्न दुवै पक्षका विवरण संकलन गरी कानुनी प्रक्रियाअनुसार आवश्यक कारबाही अघि बढाइने बताइएको छ।

सार्वजनिक कार्यक्रममा भएको उक्त घटनापछि सामाजिक सञ्जालमा विभिन्न प्रतिक्रिया देखिएका छन् भने सम्बन्धित निकायहरूले घटनालाई कानुनी प्रक्रियामार्फत टुंग्याउनुपर्ने धारणा व्यक्त गरेका छन्।

रास्वपा महाधिवेशन दोस्रो दिन : सुरक्षा व्यवस्था कडा [तस्वीरहरू]

Posted on by nepalone

चितवन । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशन दोस्रो दिन प्रवेश गरेको छ। भरतपुरमा आइतबारदेखि सुरु भएको महाधिवेशनमा सुरक्षा व्यवस्था थप कडा बनाइएको छ।

मंगलबारसम्म सञ्चालन हुने महाधिवेशनमा पार्टीको नयाँ नेतृत्व चयन प्रक्रिया अघि बढ्नेछ। महाधिवेशनबाट एक सभापति, एक वरिष्ठ नेता, दुई उपसभापति, एक महामन्त्री, तीन सहमहामन्त्री तथा ९९ जना केन्द्रीय सदस्य निर्वाचित हुने व्यवस्था गरिएको छ। साथै, विधानअनुसार सभापतिलाई ५१ जना केन्द्रीय सदस्य मनोनयन गर्ने अधिकार रहनेछ।

पार्टी नेतृत्वका प्रमुख पदहरूमा हालका नेतृत्व नै दोहोरिने सम्भावना बलियो देखिएको छ। पार्टीका संस्थापक सभापति रवि लामिछाने पुनः सभापति बन्ने तयारीमा रहेका छन् भने प्रधानमन्त्री तथा पार्टीका वरिष्ठ नेता बालेन्द्र शाह पनि वरिष्ठ नेताको भूमिकामा निरन्तर रहने अपेक्षा गरिएको छ।

तस्वीरहरू:

किन भेटिँदैन विज्ञान, प्रविधि तथा नवप्रवर्तन मन्त्रालयको वेबसाइट ?

Posted on by nepalone

काठमाडौं । नवगठित विज्ञान, प्रविधि तथा नवप्रवर्तन मन्त्रालयको आधिकारिक वेबसाइट सञ्चालनमा आएको छ।

प्रधानमन्त्री बालेन्द्र शाह नेतृत्वको सरकारले कार्यविभाजनमार्फत स्थापना गरेको मन्त्रालयले वेबसाइट सार्वजनिक गरे पनि आवश्यक सूचना तथा सेवामूलक सामग्री भने अझै पर्याप्त रूपमा समावेश हुन सकेको छैन।

प्रधानमन्त्री तथा मन्त्रिपरिषद्को कार्यालयको सिफारिसमा राष्ट्रपति रामचन्द्र पौडेल ले मन्त्रिपरिषद् पुनर्गठन तथा कार्यविभाजन गरेपछि मन्त्रालय गठन गरिएको थियो। प्रारम्भिक चरणमा प्रधानमन्त्रीको प्रत्यक्ष मातहतमा रहेको मन्त्रालयमा २६ जेठमा महावीर पुन मन्त्री नियुक्त भएका थिए।

मन्त्री नियुक्त भएको करिब एक सातापछि मन्त्रालयको वेबसाइट सञ्चालनमा ल्याइएको भए पनि त्यसमा मन्त्रालयको संरचना, नीति, कार्यक्रम, सेवा प्रवाह, सम्पर्क विवरण तथा अन्य आवश्यक जानकारी सीमित मात्रामा राखिएको देखिएको छ।

मन्त्रालयका प्रवक्ताले वेबसाइट हाल प्रारम्भिक चरणमा रहेको र आवश्यक सामग्री थप्ने तथा परिमार्जन गर्ने काम जारी रहेको बताएका छन्। उनका अनुसार तत्काल सञ्चालनमा ल्याउने उद्देश्यले सीमित विवरण राखेर वेबसाइट सार्वजनिक गरिएको हो।

यद्यपि वेबसाइट सञ्चालनमा आएको एक साताभन्दा बढी समय बितिसक्दा पनि ‘विज्ञान, प्रविधि तथा नवप्रवर्तन मन्त्रालय’ नाम नेपाली वा अंग्रेजीमा खोज्दा प्रमुख सर्च इन्जिनहरूमा सहज रूपमा फेला नपर्ने अवस्था रहेको छ। वेबसाइट अझै प्रभावकारी रूपमा इन्डेक्स हुन नसक्दा सर्वसाधारणलाई पहुँचमा कठिनाइ भइरहेको छ।

सूचना प्रविधि र नवप्रवर्तनको नेतृत्व गर्ने मन्त्रालयकै वेबसाइट खोज प्रणालीमा सहज रूपमा उपलब्ध नभएको विषयलाई सूचना प्रविधि क्षेत्रका जानकारहरूले चासोका साथ हेरेका छन्। उनीहरूका अनुसार सरकारी वेबसाइटहरू सार्वजनिक गर्दा सर्च इन्जिन अप्टिमाइजेसन (एसईओ), पहुँचयोग्यता र प्रयोगकर्ता अनुभवलाई सुरुदेखि नै प्राथमिकता दिनुपर्ने हुन्छ।

नयाँ मन्त्रालयले विज्ञान, प्रविधि, अनुसन्धान, नवप्रवर्तन तथा डिजिटल रूपान्तरणसम्बन्धी नीति निर्माण र समन्वयको जिम्मेवारी पाएको छ।

तसर्थ मन्त्रालयको डिजिटल उपस्थितिलाई पनि प्रभावकारी बनाउनुपर्ने आवश्यकता औँल्याइएको छ।

शंकर पाेखरेल के ‘माउ खाने नेता’ बन्लान् ?

Posted on by nepalone

काठमाडौं । नेकपा एमालेमा अध्यक्ष केपी शर्मा ओलीले सबैभन्दा धेरै अवसर, संरक्षण र जिम्मेवारी दिएका नेताको नाम लिनुपर्दा शंकर पोखरेल अगाडि आउँछन्।

एमालेभित्र धेरै नेताहरूको बुझाइमा पोखरेलको राजनीतिक उचाइ जनताको मतभन्दा बढी ओलीको विश्वास र संरक्षणको परिणाम हो।

पोखरेलको निर्वाचन इतिहास हेर्दा पनि यही तर्कलाई बल पुग्ने एमालेभित्र चर्चा हुने गरेको छ।

२०५६, २०७०, २०७९ र २०८२ सालका प्रतिनिधिसभा निर्वाचनमा उनी प्रत्यक्षतर्फ विजयी हुन सकेनन्।

तीन दशकभन्दा बढी अवधिमा प्रत्यक्ष निर्वाचनबाट संसद् पुग्न नसक्दा उनको जनाधार र लोकप्रियतामाथि प्रश्न उठ्ने गरेको छ।

यद्यपि निर्वाचनमा लगातार असफल हुँदा पनि पार्टीभित्र उनको उकालो यात्रा भने रोकिएन। बरु अध्यक्ष ओलीले उनलाई पार्टीको महत्वपूर्ण जिम्मेवारी दिँदै अघि बढाए।

एमालेभित्र प्रभावशाली र जनाधार भएका अन्य नेताहरू हुँदाहुँदै पनि ओलीले पोखरेललाई नै आफ्नो विश्वासपात्रका रूपमा स्थापित गरे।

त्यसकै परिणामस्वरूप उनी पार्टीको दोस्रो शक्तिशाली पद महासचिवमा एकपटक मात्र होइन, लगातार दोस्रो कार्यकालका लागि पनि पुग्न सफल भए।

गत महाधिवेशनमा पनि पोखरेलको स्थिति सहज नरहेको एमाले नेताहरू बताउँछन्। महासचिव पदका लागि प्रतिस्पर्धामा उनी ओली समूहका उम्मेदवार भए पनि तुलनात्मक रूपमा कमजोर अवस्थामा रहेको चर्चा थियो।

महाधिवेशनको मत परिणामले पनि उनी पदाधिकारीमध्ये सबैभन्दा कम मतान्तरले विजयी भएको देखाएको थियो। महासचिवका प्रत्याशी सुरेन्द्र पाण्डे ले ९९९ मत प्राप्त गर्दा पोखरेलले १२२८ मत ल्याएका थिए।

ओली प्यानलबाट निर्वाचित पदाधिकारीमध्ये सबैभन्दा कम मतान्तरको जित उनको नाममा रह्यो।

यही पृष्ठभूमिका कारण एमालेभित्र लामो समयदेखि एउटा टिप्पणी सुनिँदै आएको छ-‘शंकर पोखरेललाई जनताले होइन, ओलीले स्थापित गरेका हुन्।’

तर अहिले परिस्थिति फेरिएको देखिन्छ। एमाले सचिवालय बैठकदेखि विभिन्न आन्तरिक छलफलसम्म आइपुग्दा पोखरेल अध्यक्ष ओलीको विकल्प खोज्न सक्रिय देखिन थालेका छन्।

पार्टी पुनर्गठन, नेतृत्व हस्तान्तरण र नयाँ पुस्तालाई अवसर दिनुपर्ने बहसलाई अघि सार्दै उनी भविष्यको नेतृत्वका लागि आफूलाई तयार गरिरहेको चर्चा एमालेभित्र बढ्दो छ।

यस अभियानमा पोखरेललाई उपाध्यक्ष विष्णु पौडेल लगायतका नेताहरूको साथ रहेको बताइन्छ।

हालैको सचिवालय बैठकमा पौडेल, पोखरेल, योगेश भट्टराई लगायतका नेताहरूले पार्टी पुनर्गठनको आवश्यकता औँल्याउँदै नेतृत्वबारे नयाँ ढंगले सोच्नुपर्ने धारणा राखेका थिए।

यससँगै एमालेभित्र अर्को बहस पनि चर्किएको छ। आलोचकहरूको प्रश्न छ-यदि ओलीको संरक्षण, विश्वास र अवसर नपाएको भए शंकर पोखरेल आज एमालेको कुन तहमा हुन्थे ?

उनीहरूका अनुसार जसको राजनीतिक उचाइको आधार नै ओलीको भरोसा थियो, अहिले त्यही नेतृत्वलाई चुनौती दिनु राजनीतिक कृतघ्नताको उदाहरण हो।

नेकपा नेता गाेपाल किरातीकाे शब्दमा भन्दा त शङ्‍करले ‘माउ खाने नेता’काे छाँट देखाएका छन् ।

त्यसैले एमालेभित्र अहिलेको विवाद  नेतृत्व हस्तान्तरणको विषयमा मात्रै सीमित छैन। यो विश्वास, निष्ठा र राजनीतिक सम्बन्धको बहससमेत बनेको छ र त्यस बहसको केन्द्रमा महासचिव शंकर पोखरेल तथा उनलाई समर्थन गरिरहेका नेताहरू रहेका छन्।

 

रविको स्वीकारोक्ति – अघिल्ला आन्दोलनलाई तिरस्कार गर्ने साहस हामीसँग छैन’

Posted on by nepalone

चितवन । राष्ट्रिय स्वतन्त्र पार्टी (रास्वपा) का सभापति रवि लामिछाने ले नेपालको राजनीतिक परिवर्तनका लागि भएका विगतका आन्दोलनलाई तिरस्कार गर्ने स्थिति आफ्नो पार्टीसँग नरहेको बताएका छन्।

चितवनमा जारी रास्वपाको प्रथम राष्ट्रिय महाधिवेशनको उद्घाटन सत्रलाई सम्बोधन गर्दै उनले आन्दोलनबाट प्राप्त उपलब्धिहरूलाई सम्मान गर्दै तिनलाई संस्थागत रूपमा अघि बढाउने प्रतिबद्धता व्यक्त गरे।

उनले भने, ‘हामीले यसभन्दा अगाडिका आन्दोलनलाई तिरस्कार गर्दैनौं। तिरस्कार गर्ने आँट हामीमा छैन,’ उनले भने, ‘आन्दोलनबाट प्राप्त उपलब्धिलाई संस्थागत गर्न हामी लागिरहने छौँ।’

सभापति लामिछानेले नेपालको संविधान, शक्ति पृथकीकरणको सिद्धान्त र लोकतान्त्रिक व्यवस्थाका आधारभूत मान्यताहरूलाई व्यवहारमा कार्यान्वयन गर्नुपर्नेमा पनि जोड दिए।

उनका अनुसार राजनीतिक परिवर्तनपछि बनेका संरचना र उपलब्धिहरूलाई कमजोर बनाउने होइन, संस्थागत गर्दै जनअपेक्षाअनुसार परिणाम दिन सक्ने प्रणाली निर्माण गर्नु अहिलेको मुख्य जिम्मेवारी हो।