काठमाडौँ । नेकपा (एमाले) का अध्यक्ष केपी शर्मा ओलीले जेनजी आन्दोलनका नाममा भएका गतिविधि सरकार परिवर्तनका लागि मात्र नभई मुलुकलाई गम्भीर रूपमा अस्थिर र घाइते बनाउने योजनाबद्ध प्रयास भएको आरोप लगाएका छन् । एमालेको ११औं महाधिवेशन उद्घाटन समारोहलाई सम्बोधन गर्दै उनले ती घटनाले देशको राष्ट्रियता, लोकतन्त्र, संविधान, अर्थतन्त्र र सामाजिक एकतामाथि सीधा प्रहार गरेको बताए ।

अध्यक्ष ओलीले आफूले प्रधानमन्त्री पदबाट राजीनामा दिइसकेपछि पनि देशभर व्यापक तोडफोड र आगजनी भएको उल्लेख गर्दै १६ सयभन्दा बढी संरचना आगो र ढुङ्गाको निशानामा परेको बताए । उनका अनुसार ती सबै घटना सत्ता परिवर्तनका लागि दबाब सिर्जना गर्ने सामान्य आन्दोलन होइनन्, बरु मुलुकलाई अराजकतामा धकेल्ने सुनियोजित कदम थिए । उनले यस्ता गतिविधिले नेपाली समाजका संस्कार र एकतालाई कमजोर बनाउने प्रयास गरिएको दाबी गरे ।

भदौ २३ र २४ गते भएका घटनालाई ‘महाविनाश’ को संज्ञा दिँदै ओलीले ती दिनका दृश्यहरू कहिल्यै बिर्सन नसकिने बताए । असामान्य र जोखिमपूर्ण परिस्थितिमा थप क्षति नहोस् भनेर आफू केही समय सुरक्षित स्थानमा बसेको स्पष्ट पार्दै उनले हेलिकप्टर चढेर भागेको भन्ने प्रचारप्रति आपत्ति जनाए। महाभारतको प्रसंग उल्लेख गर्दै उनले नेतृत्व सुरक्षित रहँदै समग्र परिस्थितिको समीक्षा गर्नु आवश्यक भएको बताए र नेता तथा समाजका अगुवाहरू मारिनुपर्ने चाहना राख्नेहरूले आज व्यङ्ग्य गरिरहेको टिप्पणी गरे ।

ओलीले ती घटनामा संलग्न दोषीहरूलाई कडाभन्दा कडा कारबाही हुनुपर्ने माग पनि दोहोर्‍याए । देश अन्योलको अवस्थामा पुगेको बेला संवैधानिक बाटोबाट निकास दिन आफूहरूले विकल्प प्रस्तुत गरेको उनले बताए । संसद बाहिरको व्यक्तिलाई प्रधानमन्त्री बनाउने हो भने दलहरूबीच स्पष्ट सहमति, संसदमार्फत संविधान संशोधन र संसद् विघटन नगर्ने अडान आवश्यक रहेको उनको भनाइ थियो । उनले असंवैधानिक सिफारिसका आधारमा गरिएको संसद् विघटन अस्वीकार्य भएको उल्लेख गर्दै पुनस्र्थापना बाहेक अर्को विकल्प नरहेको स्पष्ट पारे । देशलाई उल्टो दिशामा धकेल्ने प्रयास भएको भन्दै ओलीले लोकतान्त्रिक मूल्य र संवैधानिक मर्यादा जोगाउन एमाले दृढतापूर्वक उभिएको दाबी गरे ।

काठमाडौं । नेकपा (एमाले) का अध्यक्ष केपी शर्मा ओलीले जनमतबाट नआएको सत्ता स्वीकार्य नहुने स्पष्ट पार्दै हिंसा र युद्धलाई परिवर्तनको माध्यम मान्न नसकिने बताएका छन् । भक्तपुरको सल्लाघारीमा आयोजित एमालेको एघारौँ महाधिवेशन उद्घाटन समारोहलाई सम्बोधन गर्दै अध्यक्ष ओलीले लोकतन्त्रको मूल आत्मा जनप्रतिनिधिमार्फत सत्ता सञ्चालन हुनु हो भन्ने धारणा दोहोर्‍याए ।

उनले पछिल्लो समय विकसित राजनीतिक घटनाक्रमप्रति संकेत गर्दै अनिर्वाचित शक्तिको हस्तक्षेपप्रति आपत्ति जनाए । जनताको मतबाट निर्वाचित सरकार नै वैध र स्वीकार्य हुने उल्लेख गर्दै ओलीले भने, ‘जनताको मन जितेर शान्तिपूर्ण तरिकाबाट पनि समाज परिवर्तन सम्भव छ, हिंसा र युद्ध समय परिवर्तनको साधन हुन सक्दैन र हुन हुँदैन ।’ वर्तमान सरकार हिंसाबाट आएको आरोप लगाउँदै उनले एमालेले यस्तो सत्ता नस्वीकार्ने र भविष्यमा पनि स्वीकार नगर्ने प्रष्ट पारे ।

अध्यक्ष ओलीले लोकतन्त्र, संविधान र राजनीतिक दलहरूमाथि पछिल्लो समय संगठित आक्रमणको प्रयास भएको दाबी गरे। तीन महिनाअघि भएको तथाकथित ‘जेनजी आन्दोलन’ को स्मरण गर्दै उनले त्यसबेला देश युद्धभूमि जस्तै बनेको, आगजनी र अराजकता फैलिएको बताए । त्यही समयमा पुराना राजनीतिक दल र नेताहरूको सान्दर्भिकता समाप्त भयो भन्ने भाष्य निर्माण गर्ने प्रयास भएको उल्लेख गर्दै ओलीले भने, एमाले सकियो, लोकतन्त्र सकियो भन्ने प्रचार गलत सावित भएको छ ।

उनका अनुसार विविधता र बहुलता नेपाली समाजको शक्ति हो, कमजोरी होइन । विविधतामा एकता नै राष्ट्रिय मूल मन्त्र भएको भन्दै उनले यसै भनाइका कारण आफूहरू माथि प्रहार भएको आरोप लगाए । संविधान संशोधन गर्ने अधिकार जनताबाट निर्वाचित शक्तिकै हुने उल्लेख गर्दै ओलीले स्वतन्त्रताको प्रयोग र सदुपयोग गर्ने अधिकार पनि जनताकै प्रतिनिधिमा निहित हुने बताए । ओलीले कम्युनिष्ट आन्दोलन र लोकतन्त्रबीचको सम्बन्धबारे पनि धारणा राखे । कम्युनिष्ट पार्टी जति बलियो हुन्छ, लोकतन्त्र त्यति नै सबल र पूर्ण बन्दै जाने उनको दाबी थियो ।

२०४६ साल र २०६२–६३ सालका ऐतिहासिक परिवर्तनमा कम्युनिष्ट पार्टीको निर्णायक भूमिकाका कारण लोकतन्त्र स्थापना र पुनःस्थापना सम्भव भएको उनले स्मरण गराए । कम्युनिष्ट आन्दोलन कमजोर हुँदा लोकतन्त्र पनि कमजोर हुने भन्दै उनले राष्ट्रिय स्वाभिमान सुदृढ गर्ने र समृद्धिको यात्रालाई तीव्र बनाउने जिम्मेवारी कम्युनिस्ट पार्टीकै काँधमा रहेको बताए । महाधिवेशनको उद्घाटन समारोहमा अध्यक्ष ओलीले एमाले केवल वर्तमानको शक्ति नभई भविष्यको पनि आधार भएको दाबी गरे । लोकतन्त्र अझै जीवित रहेको र एमाले अजम्बरी पार्टीका रूपमा अघि बढिरहेको उनको भनाइ थियो । चुनौती, आलोचना र आक्रमणका बाबजुद पार्टी अझ संगठित र सशक्त बनेर अघि बढ्ने उनले विश्वास व्यक्त गरे ।

काठमाडौं । नेकपा एमालेका अध्यक्ष केपी शर्मा ओलीले लोकतन्त्र अझै रहेको र एमाले अजम्बरी रहेको दाबी गरेका छन् । आज (शनिबार) भक्तपुरको सल्लाघारीमा आयोजित उद्घाटन सत्रलाई सम्बोधन गर्दै ओलीले यस्तो दावी गरेका हुन्। उनले तीन महिनाअघि भएको जेनजी आन्दोलनको स्मरण गर्दै देश युद्धभूमि जस्तै जलेको बताएका छन्।

‘जतिबेला देश युद्धभूमि जस्तै जलिरहेको थियो । आतताहीबाट जलाइएको थियो । जतिबेला संविधान, लोकतन्त्र र यसका आधारस्तम्भ राजनीतिक दलमाथि भीषण हमला गरिएको थियो,’ ओलीले भने, ‘एउटा भाष्य निर्माण गर्ने कोशिस भइरहेको थियो । पूराना पार्टी सकिए, पूराना नेताका दिन गए र नेकपा एमालेको सान्दर्भिकता समाप्त भयो ।’ धुँवा, खरानी र निषेधका प्रत्येक प्रहारलाई चिर्दै आज भक्तपुरमा ठूलो जनसागर ओर्लिएको उनले बताए । ‘जुन यो जनसागर यहाँ ओर्लिएको छ, म ढुक्कले भन्न सक्छु, लोकतन्त्र अझै छ । नेकपा एमाले अजम्बरी छ,’ ओलीले भने ।

काठमाडौं । नेकपा एमालेका महासचिव शंकर पोखरेलले नेकपा एमाले झनै शक्तिशाली भएर उठेको दावी गरेका छन् । ११ औं महाधिवेशनको उद्घाटन सत्रलाई सम्बोधन गर्दै महासचिव पोखरेलले खरानीबाट उठेर एमाले अझै शक्तिशाली बनिरहेको बताएका हुन् । उनले गत भदौ २३ र २४ गतेको घटनापछि एमालेमाथि संगठित र सुनियोजित रुपमा प्रहार भइरहेको बताए ।

उनले नेकपा एमाले सकियो भन्ने कतिपयलाई लागिरहेको भए पनि महाधिवेशनमा उपस्थित संख्याले एमाले झनै शक्तिशाली र बलियो बनेर आएको स्पष्ट हुने बताए । एमाले सरकारबाट मात्रै बाहिरिएको भन्दै नेपाली जनताको हृदयमा गहिरोसँग बसेको बताए । भदौ २३ र २४ पछि अध्यक्ष ओलीमाथि आक्रमण भइरहेको बताए । नेपालको इतिहासमा भदौ २३ र २४ गतेको घटना नवयुवाहरुको भावनामाथि खेल्ने देशविरोधी तत्वहरुको काम भएको बताए । नेपालको राजनीतिक आन्दोलनको इतिहासमा ठूला आन्दोलनको नेतृत्व आफूहरुले गरेको बताए ।

उनले भने, ‘भदौ २३ र २४ गतेको घटनापछि यो मुलुकमा नेकपा एमाले र त्यसको नेतृत्वका विरुद्धमा संगठित र सुनियोजित रुपमा जुन प्रकारको प्रहार भइरहेको थियो, कतिपयलाई लागिरहेको थियो, अब नेकपा एमालेको भविष्य समाप्त भयो भनेर । तर हामी जे भनेका थियौँ, सरकारबाट हो हामी बाहिरिएका छौँ । तर नेपाली जनताको हृदयमा गहिरो गरी बसेका छौँ । खरानीको खोक्रोबाट फेरि हामी उठ्नेछौँ भनेर संकल्प गरेका थियौँ । आजको यो ऐतिहासिक जनसभाले पुष्टि गरेको छ । नेकपा एमाले कमजोर छैन, झनै शक्तिशाली बनेको छ ।’
महासचिव पोखरेलले महाधिवेशनमा नवयुवाहरुलाई नेपालको आधारस्तम्भका रुपमा खडा गर्ने बताए । बन्द सत्रका माध्यमबाट पार्टीको नीतिलाई कार्यान्वयन गर्नसक्ने सक्षम नेतृत्व निर्वाचित गर्ने बताए ।

काठमाडौँ । नेकपा एमालेका महासचिव शंकर पोखरेलले जेनजी आन्दोलनपछि एमाले कमजोर भएको भन्ने भाष्यलाई ११औं महाधिवेशनको उद्घाटन सभाले खारेज गरिदिएको दाबी गरेका छन् । उद्घाटन समारोहमा स्वागत मन्तव्य दिँदै उनले षड्यन्त्रका कारण सत्ता गुमाउनुपरे पनि एमाले नेपाली जनताको हृदयमा अझै गहिरोसँग बसेको कुरा विशाल सभाले प्रमाणित गरेको बताए ।

पोखरेलले विगतमा कठिन परिस्थितिमा पनि पार्टीले आत्मविश्वास नहारेको स्मरण गर्दै भने, ‘त्यसबेला खरानीको थुप्रोबाट फेरि उठ्नेछौँ भनेर संकल्प गरेका थियौं । आजको ऐतिहासिक जनसभाले पुष्टि गरेको छ—नेकपा एमाले कमजोर भएको छैन, बरु अझ शक्तिशाली बनेर अघि बढेको छ ।’ उनका अनुसार उद्घाटन सभाको उपस्थितिले पार्टीप्रति जनसमर्थन अझै मजबुत रहेको सन्देश दिएको छ ।

उनले जेनजी आन्दोलनपछि एमाले र पार्टी अध्यक्ष केपी शर्मा ओलीविरुद्ध योजनाबद्ध प्रचार गरिएको आरोप पनि लगाए । भदौ २३ र २४ गते भएका घटनापछि ती घटनाको जिम्मेवारी ओलीमाथि थोपर्ने प्रयास गरिएको भन्दै पोखरेलले त्यसलाई दुष्प्रचारको संज्ञा दिए । उनले यस्तो प्रचारले पार्टीलाई कमजोर देखाउने उद्देश्य राखेको बताए ।

पोखरेलले जेनजी आन्दोलनकै नाममा राजनीतिक दलविरुद्ध षड्यन्त्र भएको दाबीसमेत गरे । उनका अनुसार युवाको भावना प्रयोग गरेर राष्ट्रविरोधी, लोकतन्त्रविरोधी, गणतन्त्रविरोधी तत्वहरूले राजनीतिक दलहरूलाई बदनाम गर्ने प्रयास गरे । ‘सो घटनामा नवयुवाको भावनामा खेल्दै राजनीतिक दलविरुद्ध षड्यन्त्रपूर्ण गतिविधि भएको हामीले बुझेका छौँ’, उनले भने । उनले यस्ता चुनौतीका बाबजुद एमाले अझ एकताबद्ध र सशक्त भएर अघि बढ्ने प्रतिबद्धता व्यक्त गर्दै महाधिवेशनले पार्टीलाई नयाँ उचाइमा पु¥याउने विश्वास व्यक्त गरे ।

काठमाडौं । नेकपा एमालेको ११औं महाधिवेशन आजबाट भक्तपुरको सल्लाघारीस्थित खुल्ला चौरमा सुरु हुँदैछ । मध्यान्ह हुने उद्घाटन समारोहमा विभिन्न राजनीतिक दल तथा सामाजिक संघ–संस्थाका प्रतिनिधिहरूको सहभागिता रहने भए पनि नेपाली कांग्रेसका सभापति शेरबहादुर देउवा भने उपस्थित नहुने भएका छन् ।

एमालेले देउवालाई विशेष आमन्त्रण गरेको थियो । महाधिवेशनका लागि गठित अतिथि सत्कार समितिका संयोजक रघुवीर महासेठ र नेता महेश बर्तौलाले देउवाको निवासमै पुगेर निमन्त्रणा दिएका थिए । तर, देउवाको व्यस्तताका कारण उनी उद्घाटन समारोहमा नजाने भएका हुन् । कांग्रेसको तर्फबाट कार्यवाहक सभापति पूर्णबहादुर खड्का सहभागी हुँदैछन् । खड्काको सचिवालयले उनको सहभागिता निश्चित भइसकेको जनाएको छ ।

एमालेले उद्घाटन समारोहका लागि १६ वटा राजनीतिक दललाई निम्ता दिएको अतिथि सत्कार समितिले जनाएको छ । नेपाली कम्युनिष्ट पार्टी (माओवादी केन्द्र) का संयोजक पुष्पकमल दाहाल ‘प्रचण्ड’ लाई पनि आमन्त्रण गरिएको भए पनि उनी उपस्थित नहुने भएका छन् । प्रचण्डको सट्टामा माओवादी केन्द्रका नेता देव गुरुङ उद्घाटन समारोहमा सहभागी हुनेछन् । प्रचण्डका प्रमुख स्वकीय सचिव गोविन्द आचार्यका अनुसार प्रचण्ड सोही दिन सुर्खेतमा पार्टीको एकता सन्देश सभामा व्यस्त रहने भएकाले गुरुङलाई प्रतिनिधिका रूपमा पठाइएको हो ।

राष्ट्रिय स्वतन्त्र पार्टीबाट महामन्त्री कविन्द्र बुर्लाकोटी सहभागी हुने भएका छन् । राष्ट्रिय प्रजातन्त्र पार्टीका अध्यक्ष राजेन्द्र लिङ्देन, राप्रपा नेपालका अध्यक्ष कमल थापा, नेपाल कम्युनिस्ट पार्टी (माओवादी) का महासचिव नेत्रविक्रम चन्द ‘विप्लव’, जनता समाजवादी पार्टी (जसपा) नेपालका अध्यक्ष उपेन्द्र यादव र नागरिक उन्मुक्ति पार्टीकी अध्यक्ष रञ्जिता श्रेष्ठ पनि उद्घाटन समारोहमा उपस्थित हुने सूचीमा छन् । नेपाल मजदुर किसान पार्टीका अध्यक्ष नारायणमान बिजुक्छेलाई पनि एमालेले आमन्त्रण गरेको भए पनि उनले असमर्थता जनाउँदै अनुपस्थित रहने जानकारी गराएका छन् । जनमत पार्टी, क्रान्तिकारी कम्युनिस्ट पार्टी तथा अशोक राई नेतृत्वको जनता समाजवादी पार्टीलाई समेत निमन्त्रणा गरिएको छ । जनमत पार्टीका अध्यक्ष सिके राउत भने काठमाडौं बाहिर रहेकाले शुभकामना सन्देश पठाएर सहभागी नहुने भएका छन् ।

राजनीतिक दलसँगै एमालेले ६ वटा सामाजिक संघ–संस्थालाई पनि उद्घाटन समारोहमा बोलाएको छ । नेपाल पत्रकार महासंघ, नेपाल उद्योग वाणिज्य महासंघ, नेपाल बार एसोसिएसन, नेपाल उद्योग परिसंघलगायतका संस्थाका प्रतिनिधिहरू कार्यक्रममा सहभागी हुने अतिथि सत्कार समितिले जनाएको छ । एमालेको ११औँ महाधिवेशनले आगामी नेतृत्व चयन र पार्टीको भावी राजनीतिक दिशाबारे महत्वपूर्ण निर्णय गर्ने अपेक्षा गरिएको छ । उद्घाटन समारोहमा विभिन्न दलका शीर्ष नेताको उपस्थिति रहने भए पनि केही प्रमुख नेताहरूको अनुपस्थितिले पनि राजनीतिक वृत्तमा चासो थपेको छ ।

काठमाडौं । भक्तपुरको सल्लाघारीमा आयोजना गरिएको नेकपा एमालेको ११ औं महाधिवेशन उद्घाटन समारोह कडा सुरक्षा व्यवस्थाबीच सुरु हुने तयारीमा छ । कार्यक्रमस्थलमा प्रवेश गर्नुअघि व्यापक सुरक्षा जाँच गरिँदा सहभागीहरूलाई भित्र पस्न केही ढिलाइ भएको छ । बिहानैदेखि कार्यक्रमस्थलका सबै प्रवेशद्वारमा नेपाल प्रहरी परिचालन गरिएको छ । मेटल डिटेक्टर, बम डिटेक्टर उपकरण र विष्फोटक पदार्थ पहिचानका लागि विशेष तालिमप्राप्त कुकुरसहितको टोली सक्रिय छ । सुरक्षाकर्मीहरूले झोला जाँच, शरीर खानतलासी र उपकरणमार्फत जाँच गरेपछि मात्रै प्रवेश अनुमति दिइरहेका छन्। यही कडाइका कारण गेटमा लामो लाइन देखिएको छ ।

विभिन्न जिल्लाबाट महाधिवेशनमा सहभागी हुन कार्यकर्ता गाडी रिजर्भ गरेर भक्तपुर आइपुगेका छन् । गाडीमा आएका सहभागीहरूका लागि गठ्ठाघर, सानोठिमी, जगातीलगायतका स्थानमा पार्किङको व्यवस्था मिलाइएको छ । औपचारिक उद्घाटन समारोहअघि विभिन्न ठाउँबाट सांस्कृतिक झाँकीसहितको जुलुस निकाल्ने तयारी समेत गरिएको छ, जसले महाधिवेशनस्थलको माहोल थप उत्सवमय बनाएको छ ।

शनिबार बिहान सवा ११ बजेसम्म सल्लाघारीमा चार हजारभन्दा बढी कार्यकर्ता भेला भइसकेका छन् भने आउने क्रम निरन्तर जारी छ । स्रोतका अनुसार बिहान १० बजेसम्म मात्रै काठमाडौं उपत्यकाका विभिन्न नाकाबाट १४ हजारभन्दा बढी मानिस एमालेको कार्यक्रममा सहभागी हुन प्रवेश गरिसकेका थिए । काठमाडौं उपत्यका बाहिरबाट पनि कार्यकर्ताहरूको आवागमन बढ्दो क्रममा छ ।

एमालेले यस महाधिवेशनमा देशभरबाट करिब दुई लाख कार्यकर्ता सहभागी हुने दाबी गर्दै आएको छ । आज मध्याह्न १२ बजेपछि औपचारिक उद्घाटन समारोह सुरु हुने कार्यक्रम रहेको छ, त्यसअघि सांस्कृतिक कार्यक्रम सञ्चालन हुनेछन् । कडा सुरक्षा, व्यापक सहभागिता र उत्साहपूर्ण वातावरणका बीच एमालेको ११ औं महाधिवेशन ऐतिहासिक रूपमा सम्पन्न गराउने तयारीमा पार्टी जुटेको देखिन्छ ।

काठमाडौं । नेकपा एमालेको ११ औं राष्ट्रिय महाधिवेशनका लागि मनोनीत १०८ जना महाधिवेशन प्रतिनिधिको सूचीप्रति पार्टीका वरिष्ठ उपाध्यक्ष तथा अध्यक्षका दाबेदार ईश्वर पोखरेलले आपति जनाएका छन् । हिजो बसेको सचिवालय बैठकमा मनोनीत १०८ जना प्रतिनिधिको नामावली पार्टी अध्यक्ष र वरिष्ठ उपाध्यक्षबीच छलफल गरेर टुंगो लगाउने सहमति भएको थियो । सोही सहमति अनुसार आज बिहान अध्यक्ष र वरिष्ठ उपाध्यक्ष बसेर सूची अन्तिम रूप दिने कुराकानी समेत भएको बताइएको छ ।

तर उक्त सहमति विपरीत आफूलाई जानकारी नदिई एकलौटी ढंगले मनोनीत प्रतिनिधिको सूची सार्वजनिक गरिएको पोखरेलको आरोप छ । सहमतिको प्रक्रियालाई बेवास्ता गर्दै सूची प्रकाशन गरिनु पार्टीभित्रको आन्तरिक लोकतान्त्रिक अभ्यासविपरीत भएको उनको भनाइ छ । मनोनीत प्रतिनिधि सूचीलाई लिएर उत्पन्न विवादले एमालेभित्र नेतृत्व तहमा असन्तुष्टि चुलिएको संकेत देखिएको छ । यस विषयमा पार्टी नेतृत्वबीच थप छलफल आवश्यक रहेको नेताहरूको भनाइ छ ।

काठमाडौँ । काठमाडौं महानगरकी उपमेयर सुनिता डंगोल एमाले महाधिवेशन प्रतिनिधिमा मनोनयन भएकी छन् । एमालेको शुक्रबार बसेको सचिवलयले ११ औं महाधिवेशनमा सहभागी हुने १०८ जन प्रतिनिधि मनोनीत गर्दा डंगोल पनि परेकी हुन् ।

कुल प्रतिनिधिको ५ प्रतिशत अर्थात् १०८ जना मनोनीत प्रतिनिधिमा परेकी डंगोल एमाले केन्द्रीय सदस्यको दाबेदार पनि हुन् । डंगोल स्थानीय विकास विभाग क्लस्टरबाट मनोनीत भएकी हुन् । एमाले महाधिवेशन अहिले केही बेरमा भक्तपुरको सल्लाघारीस्थित चौरमा उद्घाटन गरिँदै छ । त्यसअघि अहिले जुलुस निकालिएका छन् ।

काठमाडौं । नेकपा (एमाले) को ११ औं महाधिवेशन आज (शनिबार) देखि सुरू हुँदैछ । भक्तपुरको सल्लाघारीमा शनिबार उद्घाटन समारोह हुँदैछ । उद्घाटन समारोहमा प्रतिनिधि, कार्यकर्तासहित तीन लाख मानिसहरू उपस्थित गराउने दाबी एमालेले गरेको छ । उद्घाटन समारोहका लागि अन्य दलका नेताहरूलाई पनि बोलाइएको छ । एमाले ललितपुरका अध्यक्ष पुरूषोत्तम आचार्यका अनुसार टाढा–टाढा जिल्लाका सहभागीहरू गाडी रिजर्भ गरेर काठमाडौं आइसको छन् ।

‘हामीले पाँच लाख जनसमुदाय उतार्ने तयारी गरेका थियौं । अहिलेसम्मको आकडाअनुसार न्यूनतम तीन लाख नागरिकको सहभागिता रहने पक्कापक्की भएको छ । हामी अहिले पूर्व, पश्चिम र उत्तरतिरबाट आउने गाडीहरूको व्यवस्थापनमा काम गरिरहेका छौं,’ आचार्यले सुनाए ।

उनका अनुसार महाधिवेशनमा डेढ सय झाँकी प्रस्तुत हुनेछन् । भक्तपुरले विभिन्न जाति, समुदायको कला, सामाजिक–सांस्कृतिक परम्परा झल्कने ५० बढी झाँकी प्रस्तुत गर्नेछ । काठमाडौंले ५० र ललितपुरले पनि त्यति नै संख्यामा झाँकी प्रस्तुत गर्नेछ । ‘सिंगो उपत्यकाको कला, सामाजिक–सांस्कृतिक सभ्यता, परम्पराको प्रतिविम्बन जुलुसमा हुनेछ । त्यसको परिचायक पनि हाम्रो प्रदर्शन बन्नेछ,’ उनले भने, ‘हामीले जनसमुदायको उपस्थितिका हिसाबले ऐतिहासिक बनाउनेछौं ।’

एमालेले भक्तपुरमा पहिलो पटक महाधिवेशन उद्घाटन गर्दैछ।सल्लाघारी पश्चिमतर्फको खुला चौरलाई एमालेले उद्घाटन स्थल बनाएको छ । एमालेले काठमाडौंतर्फबाट आउने सहभागी सहितको गाडीलाई गट्ठाघरमै रोक्नेछ । त्यहाँबाट महाधिवेशन स्थलसम्म ३.१ किलोमिटर दूरी रहेको छ । त्यति दूरी जुलुससहित पुग्ने गरी व्यवस्थाबपन मिलाइएको उनले बताए । पूर्वी नाका हुँदै आएका गाडीहरू जगातीमै रोकिनेछन्। त्यहाँका इँटा भट्टा, प्लटिङ आदि स्थलमा पार्किङ व्यवस्थापन गरिएको छ ।

‘ललितपुरबाट आएको गाडी, सहभागीहरू शंखघर चोकमा जम्मा हुने र त्यहाँबाट जुलुससहित सभा स्थल जाने तय गरिएको छ,’ उनले भने । पोलिटब्युरो सदस्य महेश बस्नेतले जुलुसहरू सकेसम्म सडकको दायाँ–बायाँ रहेको सर्भिस लेन प्रयोग गरी अघि बढाइने बताएका छन् । सहभागीहरू कार्यक्रमको अन्तिमसम्म सल्लाघारीको चौरमै उपस्थित रहन निर्देशित गरिएको पनि उनले बताएका छन् ।

महाधिवेशनको उद्घाटन समारोहमा नेपाली कांग्रेसका सभापति शेरबहादुर देउवा, नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’लगायतका विभिन्न १६ वटा पार्टीको अध्यक्ष एवं प्रतिनिधिलाई निमन्त्रणा गरिएको छ । महाधिवेशन जनपरिचालनका सञ्चालक एवं एमाले स्थायी कमिटी सदस्य डा राजन भट्टराईकाअनुसार भ्रातृत्व, मैत्रीपूर्ण कूटनीतिक सम्बन्ध रहेका विभिन्न देशका विदेशी कुटनीतिक नियोग एवं विभिन्न पार्टीका प्रतिनिधिको शुभकामना सन्देश प्राप्त भइरहेको छ ।

महाधिवेशन शान्तिपूर्ण भयरहित वातावरणमा सम्पन्न गर्न एमालेको २४ वटा जनसङ्गठनको प्रतिनिधित्व रहने गरी ५०० बढी स्वयंसेवक ‘ड्रेसकोड’मा खटिने जनाइएको छ । जनसेवालाई व्यवस्थित र शान्तिपूर्ण बनाउन १० हजार तालिम प्राप्त स्वयंसेवक परिचालन गरिने तयारी गरिएको छ । लिच्छविकालमा राजा हरिदत्तले स्थापना गरेको चाँगुनारायणको ऐतिहासिक मन्दिरलाई एमालेले मुख्य स्वरुपमा राखेर उपत्यकाका महत्वपूर्ण विभिन्न मन्दिर एकै ठाउँ देखाउने गरी ठूलो र कलात्मक मञ्च निर्माण गरेको जनाएको छ ।

टाढासम्म रहेका सहभागीले वक्ताले बोलेको प्रस्ट देखिने गरी मञ्चको दायाँबायाँ ३० फिट अग्ला दुईवटा ‘एलइडी स्क्रिन’ राखिएका छन् । तीन किलोमिटर परसम्म सुन्न सकिने ११५ वटा उच्च गुणस्तरका ‘साउन्ड सिस्टम’ जडान गरिएको र मञ्च अगाडि देशभरबाट आएका नेता, मन्त्री, सांसद एवं विभिन्न कुटनीतिक नियोगका प्रतिनिधिका लागि २५ हजार कुर्सी राखिएको छ । महाधिवेशन स्वयंसेवक परिचालन समितिको संयोजक भानुभक्त ढकालका अनुसार कलाकारले मञ्चमा नै राष्ट्रिय एकताको प्रतीक झल्काउने सांगीतिक प्रस्तुति दिने व्यवस्था गरिएको जानकारी दिए ।

महाधिवेशन उद्घाटनमा मञ्चमा बनाइएको चाँगुनारायण मन्दिरको छेउमा विद्युतीय पाला राखिने र त्यही पालालाई रिमोटद्वारा बालेर पार्टी अध्यक्ष केपी शर्मा ओलीले महाधिवेशन उद्घाटन गर्ने तयारी गरिएको छ । पार्टीको ११औँ महाधिवेशन भएकाले पार्टीका ११ वटा झण्डा राखिने, १० वटा झण्डा सुरुमै फहराइने, एउटा झण्डा रिमोटबाट फहराउने तयारी गरिएको छ ।

काठमाडौं । नेकपा एमालेले ११ औं महाधिवेशनका लागि १०८ जना प्रतिनिधि मनोनीत गर्ने निर्णय गरेको छ । आज (शुक्रबार) बसेको सचिवालय बैठकले महाधिवेशनका लागि विधानमा व्यवस्था भएअनुसार ५ प्रतिशत मनोनीत गर्ने निर्णय गरेको एक नेताले जानकारी दिए । उनका अनुसार मनोनीत गर्नेहरूको नाम भने टुंगिइसकेको छ ।

‘केही नाम प्रस्ताव भएको थियो । यी नामहरूबारे शनिबार अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल बसेर टुंगो लगाउने सहमति भएको छ,’ ती नेताले भने, ‘दुवैतर्फबाट सहमतिकै आधारमा नाम टुंगो लगाइने छ ।’ एमाले उपमहासचिव प्रदीप ज्ञवालीका अनुसार, महाधिवेशनको निर्वाचित भएर आउने र पदेन आयोजकको हैसियत हुन आउनेको ५ प्रतिशत सदस्य मनोनयन गर्ने निर्णय सचिवालय बैठकले गरेको हो ।

‘हाम्रो महाधिवेशनको निर्वाचित र पदेन आयोजकका हैसियतले भएका प्रतिनिधिहरूको कूल संख्याको ५ प्रतिशतले हुन आउने १०८ जनाको नामावली पारित गरेको छ, त्यसलाई हामीले भोलि सार्वजनिक गर्नेछौं,’ ज्ञवालीले भने । विधानतः एमालेमा ५ प्रतिशत महाधिवेशन प्रतिनिधि मनोनीत गर्ने प्रावधान छ । महाधिवेशनका लागि २ हजार १५४ जना निर्वाचित भएर आएका छन् । १०८ मनोनीत भएपछि प्रतिनिधिको संख्या २ हजार २ सय ६२ जना पुगेको छ ।