Author: nepalone

काठमाडौँ। प्रतिनिधिसभा सदस्यको निर्वाचनअन्तर्गत सर्लाही ४ मा शान्तिपूर्वक मतदान भइरहेको छ ।

निर्वाचनअन्तर्गत आज भएको मतदानमा सर्लाही ४ मा केही ठाउँमा विवाद भए पनि समाधान गरेर शान्तिपूर्वक मतदान गर्ने व्यवस्था मिलाइएको जिल्ला निर्वाचन अधिकृतको कार्यालयले जनाएको छ । 

निर्वाचन अधिकृत विनोदप्रसाद घिमिरेले ५० प्रतिशतभन्दा बढी मत खसिसकेको बताए । साँझसम्म सबै मतदान स्थल-केन्द्रको मतपेटिका संकलन गरी गणनास्थलमा ल्याइसक्ने र सर्वदलीय बैठक राखेर मतगणना सुरु गर्ने तयारी भइरहेको उनले बताए । 

यो क्षेत्रमा काङ्ग्रेस सभापती गगन थापा र रास्वपा नेता अमरेश कुमार सिंह बीच कडा प्रतिष्पर्धा हुने आँकलन गरिएको छ। 

काठमाडौँ। प्रतिनिधि सभा सदस्य निर्वाचनको मतदानसम्बन्धी अद्यावधिक विवरण साँझ सवा ६ बजे दिने भएको छ ।

निर्वाचन आयोगका सहसचिव एवं प्रवक्ता नारायणप्रसाद भट्टराईले साँझ ६ बजे आयोगमा पत्रकार सम्मेलन गरी अद्यावधिक विवरण जानकारी गराइने बताए । 

‘मतदान सम्बन्धी अद्यावधिक जानकारी दिन आज बिहीबार साँझ ६ः१५ बजे पत्रकार सम्मेलन आयोजना गरिएको ब्यहोरा सम्बन्धित सबैको जानकारीको लागि अनुरोध छ’, प्रवक्ता भट्टराईले सूचना जारी गर्दै भनेका छन् । 

बिहान ७ बजेबाट सुरु भएको मतदान साँझ ५ बजेसम्म चल्नेछ । ५ बजेसम्म लाइन बसेका मतादाताले भने त्यसपछि पनि मतदान गर्न पाउनेछन् । 

आयोगले दिउँसो पत्रकार सम्मेलन गरी उत्साहजनक रूपमा मतदाताहरू मतदानमा सहभागी भएको जानकारी गराएको थियो। 

काठमाडौं । प्रतिनिधिसभा सदस्यको निर्वाचनका लागि सुदूरपश्चिममा ४ बजेसम्म ४२ प्रतिशत भन्दा बढी मतदाताले मतदान गरेका छन् । 

कैलालीको धनगढीस्थित प्रदेशस्तरको निर्वाचन कमाण्ड पोष्टकाअनुसार बिहान ७ बजेदेखि यहाँका सबै मतदान केन्द्रहरुमा मतदान भइरहेको छ। 

प्रदेशका नौ वटै जिल्लामा शान्तिपूर्ण वातावरणमा मतदान भइरहेको सुदूरपश्चिम प्रदेश निर्वाचन कार्यालय प्रमुख प्रेमराज भट्टले जानकारी दिए।

काठमाडौं । बिहीबार अपरान्ह ४ बजेसम्म ८० लाख मत खसेको छ ।

देशभरिका १६५ निर्वाचन क्षेत्रमा ८० लाख मत खसेको हो । बिहान ७ बजेदेखि सुरु भएको मतदान अहिले पनि जारी छ ।

 अहिलेसम्म कुल मतदाताको ४२ प्रतिशत भन्दा बढी मत खसेको हो ।

भक्तपुर। भक्तपुर जिल्लाका दुई निर्वाचन क्षेत्रमा दिउँसो १३ः५० बजेसम्म कुल ९१ हजारभन्दा बढी मत खसेको छ । निर्वाचन क्षेत्र नम्बर १ मा ३ बजेसम्म ४५ हजार ३५८ मत खसेको छ । जसमा महिला मतदाता २२ हजार ५७ र पुरुष मतदाता २३ हजार ३०१ रहेका छन् ।

त्यस्तै, निर्वाचन क्षेत्र नम्बर २ मा ४६ हजार ५६५ मत खसेको छ । यस क्षेत्रमा महिला मतदाता २२ हजार ७१९ र पुरुष मतदाता २३ हजार ८४६ रहेका छन् । मतदान शान्तिपूर्ण रुपमा जारी रहेको जिल्ला निर्वाचन कार्यालयले जनाएको छ । 

सुर्खेत। कर्णाली प्रदेशमा  प्रतिनिधिसभा सदस्य निर्वाचनमा हालसम्म ३० प्रतिशत मत खसेको छ । 

प्रदेश निर्वाचन अधिकारी लालबहादुर गुरुङका अनुसार दिउँसो १ बजेसम्म तीन लाख १८ हजार ३०२ मत खसेको छ ।

 कर्णालीका १० जिल्लाका १२ निर्वाचन क्षेत्रमा शान्तिपूर्ण मतदान जारी रहेको उनले बताए । कर्णालीमा १० लाख ३७ हजार २५० मतदाता छन् ।

धनगढी। दार्चुलामा प्रतिनिधसभा सदस्य निर्वाचनमा दिउसो २ बजेसम्म प्रतिशत मत खसेको छ । 

१ बजे सम्ममा ३२ हजार भन्दा बढीले मतदान गरेको निर्वाचन आयोगले जनाएको छ । जसमा १५ हजार १८७ पुरुष तथा १३ हजार महिला छन् । 

काठमाडौं। चितवनमा निर्वाचन विरोधी गतिविधि गरेको आरोपमा प्रहरीले नेकपा बहुमतका दुई जना कार्यकर्तालाई पक्राउ गरेको छ। 

भरतपुर महानगरपालिका-१० मा रहेको नारायणी नमुना मावि मतदानस्थल अगाडि निर्वाचन विरोधी पम्प्लेट प्रदर्शन गरेपछि दुई जनालाई प्रहरीले पक्राउ गरेको हो।

धादिङ गल्छी गाउँपालिका-१ घर भई हाल चितवन भरतपुर महानगर-७ बस्ने नेकपा बहुमतका सेक्रेटरी सुमन श्रेष्ट र भरतपुर-१० बस्ने विद्यार्थी संयोजक २१ वर्षीय किरण गौतमलाई पक्राउ गरेको हो।

दमक ।  प्रतिनिधिसभा सदस्यका लागि भइरहेको निर्वाचन अन्तर्गत झापा क्षेत्र नम्बर ५ मा उत्साहपूर्ण रूपमा मतदान भइरहेको छ । 

चुनावी प्रतिस्पर्धाका कारण देशभरको ध्यान खिचेको यो क्षेत्रलाई यसपटक ‘चुनावी इपिसेन्टर’का रूपमा समेत हेरिएको छ । निर्वाचन कार्यालयका अनुसार दिउँसो १ बजेसम्म यस क्षेत्रमा ७२ हजार ५ सय ५४ मत खसिसकेको छ । 

यहाँ कुल १ लाख ६३ हजार ३ सय ७९ मतदाता रहेका छन् । दिउँसो ३ बजेसम्मको विवरणअनुसार करिब आधाभन्दा बढी मतदाता मतदान प्रक्रियामा सहभागी भइसकेका छन् ।

हेटौंडा । प्रतिनिधिसभा सदस्य निर्वाचनअन्तर्गत मकवानपुरमा दिउँसो २  बजेसम्म ३५ प्रतिशतभन्दा बढी मतदान भएको छ ।

प्रदेश निर्वाचन कार्यालयका प्रमुख हरिप्रसाद ढकालका अनुसार हालसम्म जिल्लाभर शान्तिपूर्ण रूपमा मतदान भइरहेको छ । मकवानपुरमा ३ लाख १५ हजार ३ सय ३४ जना मतदाता छन् ।

काठमाडौं। प्रतिनिधिसभा सदस्यका लागि आज जारी मतदानमा मुगु जिल्लामा दिउँसो १ बजेसम्म ४२.९० प्रतिशत मतदान भएको निर्वाचन आयोगले जनाएको छ।

जसमा महिला आठ हजार ९७ र पुरुष सात हजार ६०८ गरी कूल १५ हजार ७०५ जनाले मतदान गरेको आयोगका प्रवक्ता नारायणप्रसाद भट्टराईले जानकारी दिए।

मुगुमा बिहान ७ बजेदेखि सुरु भएको मतदान अहिले पनि जारी छ। मुगुमा कूल ३६ हजार ३१ मतदाता छन्।

काठमाडौँ । रामेछापमा दिउँसो १ बजेसम्म ४७ हजार ४४७ मत खसेको छ। बिहीबार प्रतिनिधि सभा निर्वाचनमा उक्त संख्यामा मत खसेको हो । 

जसमध्ये २६ हजार ८३३ महिला र २० हजार ५६४ पुरुषले मतदान गरेका जिल्ला निर्वाचन कार्यालयले जनाएको छ । जिल्लामा १ लाख ८७ हजार ९५२ मतदाता रहेका छन्। 

काठमाडौं । बिहीबार दिउँसो १ बजेसम्म देशभरि ४४ लाख मत खसेको छ । बिहान ७ बजेदेखि सुरु भएको मतदान अहिले जारी छ ।

१ बजेसम्मको अवधिमा ४४ लाख ५५ हजार ७९० मत खसेको हो ।

काठमाडौं । दिउसो १२ बजेसम्म देशभर ३५ लाख भन्दा बढी मतदाताले मतदान गरेका छन्। 

बिहान ७ बजेदेखि सुरु भएको मतदानमा अहिलेसम्म २० प्रतिशत मत खसेको निवार्चन आयोगले जनाएको छ ।

सबै जिल्लामा उत्साहजनक मतदान भइरहे पनि केहि जिल्लामा तनावग्रस्त भएर केहि बेरका लागि मतदान स्थगित गरिएको छ ।

काठमाडौं । हरेक निर्वाचनमा लफडा भइरहने जिल्ला हाे- दाेलखा । बुथ कब्जा त कहिले मतपत्र कब्जा हुन्छ । कुटपिट त सामान्य नै भएकाे छ ।

यी सबै स्वच्छ, निष्पक्ष र धाँधलीरहित निर्वाचनकाे मान्यताविपरीतका कार्य हुन् । आपराधिक गतिविधि हुन् । यसपटक पनि दाेहाेरिएकाे छ ।

दोलखाको तामाकोशी गाउँपालिका-४ मा त्यस्ताे भएकाे हाे । त्यहाँ आज बिहानै मतदानको क्रममा विवाद बढेपछि दलगत कार्यकर्ताहरबिच झडप भयाे ।

उनीहरूले कर्मचारीमाथि हातपातको समेत प्रयास गरे । यसपछि प्रहरीले हवाई फायर गरेर स्थिति नियन्त्रणमा लिएको थियो । तर, त्यहीबेला केही मतपत्र गायब भयाे ।

याे समाचार तयार पार्दासम्म मतपत्र फेला परेकाे छैन । मतपत्र खाेजीकाे क्रम भने जारी छ ।

दाेलखाका सहायक प्रमुख जिल्ला अधिकारी औलाखबहादुर आलेका अनुसार १० वटा मतपत्र फेला परेकाे छैन । हराएकाे मतपत्र सङ्ख्या भने ५५ वटा हाे । ४४ वटा मात्रै फेला परेकाे आलेले बताए ।

काठमाडौं । नेपाली कांग्रेसका सभापति गगन थापा काठमाडौंमा मतदान गरेर सर्लाही पुगेका छन् । सभापति थापा सर्लाही-४ बाट प्रतिनिधिसभा उम्मेदवार छन् ।

जहाँ थापा र रास्वपा उम्मेदवार अमरेशकुमार सिंहबीचमा तीव्र प्रतिस्पर्धा हुने अनुमान गरिएको छ ।

काठमाडौं। मतदान अधिकृतले प्रत्यक्षतर्फकाे मतपत्रमा हस्ताक्षर नगरेकाे फेला परेपछि स्याङ्जाको एक मतदानस्थलमा मतदान स्थगित भएको छ।

प्रतिनिधिसभा निर्वाचन क्षेत्र २ को वालिङ नगरपालिका-१० मा रहेको मतदानस्थल बालज्योति आधारभूत विद्यालय मदीखोलामा मतदान स्थगित भएको हो।

बिहीबार बिहान साढे ११ बजेदेखि नै मतदान स्थगित भएको हाे ।

काठमाडौं । प्रतिनिधिसभा निर्वाचनमा मतदान भइरहेकाे छ । बिहान ७ बजेदेखि भइरहेकाे मतदान बेलुकी ५ बजेसम्म जारी हुनेछ ।

अपरान्ह १२ बजेसम्म देशभर १८ प्रतिशत मत खसेको छ । निर्वाचन आयोगका अनुसार १२ बजेसम्म देशभर ३१ लाख ६३ हजार ७३६ मत खसेको छ ।

आयोगले सबै निर्वाचन क्षेत्रमा शान्तिपूर्ण र उत्साहजनक मतदान भइरहेको जनाएको छ ।

निर्वाचनमा प्रत्यक्षतर्फ तीन हजार १७ पुरुष, ३८८ महिला र एक अन्य गरी तीन हजार ४०६ उम्मेदवार चुनावी प्रतिस्पर्धामा छन् ।

समानुपातिक निर्वाचन प्रणालीतर्फ एक हजार ३६३ पुरुष र एक हजार ७७२ महिला गरी तीन हजार १३५ उम्मेदवार प्रतिस्पर्धामा छन् ।

निर्वाचनमा ९६ लाख ६३ हजार ३५८ पुरुष, ९२ लाख ४० हजार १३१ महिला र २०० अन्य गरी एक करोड ८९ लाख तीन हजार ६८९ मतदाता छन् ।

काठमाडौं । दिउसो १२ बजेसम्म देशभर ३१ लाख ६३ हजार ७ सय ३६ मत खसेको छ ।

बिहान ७ बजेदेखि सुरु भएको मतदानमा अहिलेसम्म १८ प्रतिशत मत खसेको निवार्चन आयोगले जनाएको छ ।

सबै जिल्लामा उत्साहजनक मतदान भइरहे पनि केहि जिल्लामा तनावग्रस्त भएर केहि बेरका लागि मतदान स्थगित गरिएको छ ।

सिरहा ।  सिरहामा मतदान सुरु भएको चार घण्टाभित्रै करिब ३० प्रतिशत मत खसेको छ । निर्वाचन कार्यालय सिरहाका प्रमुख राजन श्रीवास्तवका अनुसार बिहान ११ बजेसम्म जिल्लाभर ३० प्रतिशतसम्म मतदान भएको छ ।

जिल्लाका चारवटै प्रतिनिधिसभा निर्वाचन क्षेत्रमा शान्तिपूर्ण रूपमा भइरहेको निर्वाचन कार्यालयले जनाएको  छ। मतदान केन्द्रहरूमा मतदाताको उत्साहजनक उपस्थिति देखिएको छ, भने सुरक्षाकर्मीको व्यवस्था पनि कडा पारिएको छ ।

काठमाडौं। नेकपा एमालेका अध्यक्ष केपी शर्मा ओलीले भर्खरै मतदान गरेका छन्।

भक्तपुर क्षेत्र नम्बर २ मा पर्ने सूर्यविनायक नगरपालिका बालकोटस्थित महेन्द्र शान्ति विद्यालयको केन्द्रबाट उनले भर्खरै मतदान गरेका हुन्।

ओली प्रतिनिधिसभा निर्वाचनमा झापा ५ बाट उम्मेदवार छन्।

काठमाडौं। नेकपा एमालेका अध्यक्ष केपी शर्मा ओली आज झापा नजाने भएका छन्।

आफूले उम्मेदवारी दिएको झापा ५ मा जाने कार्यक्रम ओलीले स्थगित गरेका हुन्।

भक्तपुर क्षेत्र नम्बर २मा पर्ने सूर्यविनायक नगरपालिका बालकोटस्थित महेन्द्र शान्ति विद्यालयको केन्द्रबाट उनले भर्खरै मतदान गरेका छन्।

काठमाडौंमा मतदानपछि उनी उम्मेदवारी दिएको झापा ५ जाने र विभिन्न मतदान केन्द्र पुग्ने कार्यक्रम थियो।

दमक । झापा क्षेत्र नम्बर-५ मा ४५ प्रतिशत मत खसेको छ ।

झापा-५ का मतदान अधिकृतका अनुसार मध्याह्न १२ बजेसम्म ४५ प्रतिशत मत खसेको हो ।

यो क्षेत्रमा १ लाख ६३ हजर ३ सय ७९ मतदाता रहेका छन् । जसमा पुरुष मतदाता ८१ हजार ८१, महिला मतदाता  ८२ हजार २९६ र अन्य २ जना मतदाता छन् ।

काठमाडौं । बिहान ११ बजेसम्म देशभरि १०.१८ प्रतिशत मत खसेको छ ।

निर्वाचन आयोगका सहसचिव एवं प्रवक्ता नारायणप्रसाद भट्टराईका अनुसार बिहान ११:०० बजेसम्म देशभरि १९ लाख २३ हजार ८२४ मत गरेको छ । यो कुल मतदाताको १०.१८ प्रतिशत हो ।

सुर्खेत । सुर्खेत कारागारमा मतदान सकिएको छ ।  प्रदेश निर्वाचन अधिकृत लालबहादुर गुरुङका अनुसार सुर्खेत कारागारमा ८८ मत खसेको छ ।

बिहान ७ बजेबाट मतदान सुरु भएको थियो । सुर्खेत कारागारमा नेपाली सेनाले सुरक्षा दिइरहेको छ। 

१०३ जना मतदाता रहेको भनिए पनि केही कैदी स्थान्तरण भएकाले ८८ मत मात्रै खसेको गुरुङले बताए ।

काठमाडौं । यसपटकको प्रतिनिधिसभा निर्वाचनमा देशकै ध्यान खिचेको निर्वाचन क्षेत्र झापा– ५ हो ।

विगतमा ६ पटक निर्वाचन जितेका एमाले अध्यक्ष तथा पूर्वप्रधानमन्त्री केपी शर्मा ओलीसमेत उम्मेदवार रहेको यहाँ पनि बिहानैदेखि शान्तिपूूर्ण मतदान भइरहेको छ ।

जेन–जीदेखि पाका उमेरका मतदाताहरू मताधिकार प्रकट गर्न मतदान केन्द्रहरूमा गइरहेका छन् ।

मतदान गोप्य हुन्छ तर मतदानपछि एक जना मतदाताले निर्धक्कपूर्वक नेपालवाट एचडीसँग भने, ‘केपीलाई मतदान गर्नुपर्छ तर त्यसै माहोल बनिहाल्छ नि ।’

हामीले उनलाई निर्वाचनको माहोल सोधेका थियौँ तर उनले भने मतदान कसलाई गरेको भनेर खुलाए ।

उनले ओलीबाहेकको ‘काम नभएको’ भन्दै अविश्वास प्रकट गरे ।

काठमाडौँ । राष्ट्रिय स्वतन्त्र पार्टीका वरिष्ठ नेता बालेन्द्र शाहले निर्वाचन आयोगसँग अनुमति नलिई हेलिकोप्टर चढेपछि फर्काइएको खुलासा भएको छ । 

शाह काठमाडौँमा मतदान गरेर हेली एभरेस्टको हेलिकप्टर चढेर झापा गएका थिए । उनी चढेर गएको हेलिकप्टर ल्यान्ड नगरी काठमाडौँको त्रिभुवन विमानस्थलमा फर्किएको थियो । 

त्रिभुवन विमानस्थल उच्च स्रोतका अनुसार उनले निर्वाचन आयोगसँग अनुमति नलिई हेलिकप्टर लिएर गएपछि ल्याण्ड गर्न नदिइएको हो ।

काठमाडौं । बिहान हवाई फायर भएपछि दोलखाको तामाकोसी गाउँपालिका-४ मा पर्ने गोल्मेश्वर मावि मतदानस्थलमा रोकिएको मतदान सुचारु गर्ने सहमति भएको छ ।

याे सहमति सर्वदलीय बैठकपछि गरिएकाे हाे । मतदान स्थलमा खटिएका कर्मचारीलाई एउटा समूहले हातपात गर्न खोजेपछि तनाव भएकाे थियाे ।

त्यस क्रममा प्रहरीले १ राउन्ड हवाई फायर गरेको थियो ।

सर्लाही । सर्लाहीको मलङ्गवा नगरपालिका-९ स्थित सर्लाही कारागारमा कैदीबन्दीका लागि गरिएको मतदान सम्पन्न भएको छ।

कारागारमा रहेका कैदीबन्दीमध्ये मतदाता नामावलीमा समावेश ३४ जनाले मतदान गरेका छन्। मतदान शतप्रतिशत खसेको सहायक मतदान अधिकृत रिन्कु महतोले जानकारी दिए।

निर्वाचनलाई व्यवस्थित तथा शान्तिपूर्ण रूपमा सम्पन्न गर्न आवश्यक सुरक्षा व्यवस्था मिलाइएको थियो। निर्धारित समयमै मतदान प्रक्रिया सम्पन्न भएको निर्वाचन अधिकृतको कार्यालयले जनाएको छ।

काठमाडौं । ओखलढुंगाको मानेभञ्ज्याङ गाउँपालिका–७ का स्थानीयले मतदान बहिष्कार गरेका छन् । प्रमुख जिल्ला अधिकारी मेख बहादुर मंग्रान्तीका अनुसार, बिहान १० बजेसम्म कोही पनि मतदाताले मतदान नगरेको जानकारी दिए ।

उनका अनुसार, मानेभन्ज्याङ–७ को शहीद स्मृति आधारभूत विद्यालयमा रहेको केन्द्रमा कोही पनि मतदाता मतदानमा सहभागी नभएका हुन् ।

काठमाडौँ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले देशभर शान्तिपूर्ण वातावरणमा उत्साहपूर्वक मतदान जारी रहेको बताएका छन् । मतदान गरेपछि सञ्चारकर्मीलाई सङ्क्षिप्त प्रतिक्रिया दिदै उनले ७७ वटै जिल्लामा आममतदाताको उत्साहपूर्वक सहभागितामा मतदान भइरहेको उनले बताए ।

उनले सबै सरोकारवाला मतदाता, राजनीतिक दल र उम्मेदवारलाई उत्साहजनक र शान्तिपूर्ण मतदानमा सहयोग गर्न आह्वान गरे । मतदान सम्पन्न भएलगतै मतपेटिका सङ्कलनपछि मतगणना गरिने उनले जानकारी दिए ।

मतगणना सुरु भएको २४ घण्टाभित्र प्रत्यक्षतर्फको नतिजा सार्वजनिक गर्ने प्रयास आयोगको रहेको उनले बताए । साथै उनले मतदानमा युवाहरुको उत्साहका आधारमा ६५ प्रतिशत भन्दा बढी मत खस्ने अनुमान गरिएकोे बताए ।

काठमाडौं। नेपाली कम्युनिस्ट पार्टीका सहसंयोजक तथा पूर्वप्रधानमन्त्री माधवकुमार नेपालले गौर वडा नम्बर २ स्थित जानकी प्रावि केन्द्रबाट मतदान गरेका छन् ।

नेपाल रौटहट–१ का उम्मेदवार पनि हुन् । ४ निर्वाचन क्षेत्र रहेको रौटहटमा २७७ मतदानस्थल र ५४१ वटा मतदान केन्द्र कायम छन् । सबै निर्वाचन केन्द्रमा शान्तिपूर्ण रूपमा मतदान भइरहेको प्रमुख जिल्ला अधिकारी दिनेशसागर भुसालले जानकारी दिए ।