काठमाडौं । नेपाली कम्युनिष्ट पार्टी (नेकपा) ले वाम, समाजवादी, लोकतान्त्रिक तथा देशभक्त शक्तिहरूलाई व्यापक एकता र सहकार्यको ढाँचामा सहभागी हुन औपचारिक आह्वान गरेको छ ।
सात दशकभन्दा लामो कम्युनिष्ट आन्दोलनको उतार–चढाव, विभाजन र पुनःएकीकरणका अनुभवलाई समेट्दै १५ विभिन्न पार्टी र समूहहरूको एकीकरणबाट पुनर्गठित नेकपाले नयाँ राजनीतिक परिस्थितिमा राष्ट्रिय स्वाधीनता, सामाजिक न्याय र सुशासनका मुद्दामा साझा पहल आवश्यक रहेको ठहर गरेको छ ।
पार्टीद्वारा जारी विस्तृत अपिलमा जनयुद्ध, संयुक्त जनआन्दोलन, मधेश आन्दोलनदेखि पछिल्लो ‘जेन जी आन्दोलन’ सम्मका ऐतिहासिक संघर्षका सहिदहरूप्रति श्रद्धाञ्जली अर्पण गर्दै वेपत्ता, घाइते तथा अपाङ्ग अग्रपङ्क्तिका योद्धाप्रति सम्मान व्यक्त गरिएको छ । हालको आन्तरिक अर्थ–राजनीतिक जटिलता र बदलिँदो क्षेत्रीय–अन्तर्राष्ट्रिय भू–राजनीतिलाई संवेदनशील ठहर गर्दै नेकपाले विद्यमान राजनीतिक व्यवस्थासँग पुरानो उत्पादन प्रणालीको अन्तर्विरोधका कारण जनतामा अपेक्षित परिवर्तन नआएको विश्लेषण गरेको छ ।
पार्टीका अनुसार यथास्थितिवादी शक्तिहरुले गणतान्त्रिक उपलब्धिमा धावा बोल्ने प्रयास गर्दै आएको र अर्कोतर्फ जनतामा सुशासन तथा सामाजिक न्यायप्रतिको चाहना तीव्र बन्दै गएको परिस्थितिले राष्ट्रिय सहमतिको पहल अपरिहार्य बनाएको छ । नेकपाले सरकारमा रहेर सुशासन र आर्थिक–सामाजिक रुपान्तरणका कार्यक्रम अघि बढाएको दाबी गर्दै, त्यसलाई रोक्न प्रतिगामी शक्तिहरुले राजनीतिक हस्तक्षेप गरेको आरोप लगाएको छ ।
जेन जी आन्दोलनका पृष्ठभूमिमा देखिएको असन्तुष्टि, त्यसपछि उत्पन्न हिंसा र अराजकताका घटनाको उल्लेख गर्दै पार्टीले त्यस आन्दोलनमा प्रकट भएको नयाँ पुस्ताको चाहनालाई राजनीतिक अडान, सुशासन र उन्नत लोकतन्त्रतर्फ निर्देशित गर्नुपर्ने जनाएको छ । गैरदलीय सरकार बनेपछि तत्कालको अनिश्चय केही हटेपनि संविधान, लोकतन्त्र र राष्ट्रिय स्वाधीनतामाथि चुनौती अझै बाँकी रहेको चेतावनी पार्टीले दिएको छ ।
घोषित तिथिमा निर्वाचन सम्पन्न गर्नु अत्यावश्यक रहेको पुनः दोहोर्याउँदै नेकपाले चुनावलाई बिथोल्ने, लोकतान्त्रिक दलहरूलाई कमजोर पार्ने तथा संविधानविरुद्ध कुचेष्टा गर्ने सम्भावित प्रयासप्रति सतर्कता व्यक्त गरेको छ । पार्टीले वामपन्थी, लोकतान्त्रिक र देशभक्त शक्तिहरूबीच साझा मोर्चा बनेर संविधान, लोकतन्त्र र राष्ट्रिय स्वाधीनताको रक्षा गर्न एकीकृत कदम चाल्न अपिल गरेको छ ।
नेकपाले समाजवादी मोर्चाबाट पार्टी एकतामा रूपान्तरण गर्दै ‘नेपाली विशेषताको समाजवाद’ लाई रणनीतिक कार्यक्रमका रूपमा अघि सारेको छ । माक्र्सवाद–लेनिनवादलाई मार्गदर्शक सिद्धान्त मान्दै सार्वजनिक, सामुदायिक र निजी स्वामित्वको मिश्रित उत्पादन संरचना, शिक्षा–स्वास्थ्यमा राज्यको बढ्दो दायित्व, सामाजिक असमानता अन्त्य, असंलग्न र सन्तुलित परराष्ट्र नीति लगायतका आधारभूत पक्षहरूलाई पार्टी एकताको केन्द्रमा राखिएको बताइएको छ ।
स्वतन्त्रता र अनुशासनको सन्तुलनमा आधारित जनवादी केन्द्रीयतालाई संगठनात्मक आधार बनाउँदै पार्टीले एकता प्रक्रिया राष्ट्रिय महाधिवेशनमार्फत थप सुदृढ बनाइने जनाएको छ । पुनर्गठित नेकपाले वाम, समाजवादी, सच्चा लोकतन्त्रवादी तथा देशभक्त सबै शक्तिलाई समाजवादी परिवर्तनको दिशामा सुरू भएको एकता र ध्रुवीकरणको नयाँ यात्रामा सहभागी हुन खुलेर आह्वान गरेको छ ।
