काठमाडौं । फिफा विश्वकप २०२६ को प्रि–क्वार्टरफाइनलमा अर्जेन्टिनासँग नाटकीय हार बेहोरेपछि इजिप्टले रेफ्रीको निर्णयप्रति गम्भीर असन्तुष्टि जनाएको छ। प्रशिक्षकदेखि समर्थकसम्मले खेलका केही निर्णायक क्षणमा आफूहरूमाथि अन्याय भएको दाबी गरेका छन्।

खेल सकिन ११ मिनेट बाँकी रहँदासम्म इजिप्ट विश्व विजेता अर्जेन्टिनाविरुद्ध २-० को अग्रतामा थियो। त्यसबेला टोली ऐतिहासिक रूपमा पहिलो पटक विश्वकपको क्वार्टरफाइनल पुग्ने संघारमा देखिएको थियो। तर अन्तिम समयमा अर्जेन्टिनाले लगातार तीन गोल गर्दै ३-२ को जित निकाल्यो र इजिप्टको सपना चकनाचुर बनायो।

विवादको सुरुआत इजिप्ट १–० ले अगाडि रहेको अवस्थामा मोस्तफा जिकोले गरेको गोलबाट भयो। उक्त गोल भिडियो सहायक रेफ्रीको सिफारिसमा खारेज गरिएको थियो। गोल हुनुभन्दा १७ सेकेन्डअघि मिडफिल्डर मारवान अतियाले अर्जेन्टिनाका डिफेन्डर लिसेन्द्रो मार्टिनेजलाई सामान्य रूपमा छोएको घटनालाई फाउल ठहर गर्दै रेफ्रीले गोल अस्वीकार गरेका थिए।

यस्तै, खेल २–२ को बराबरीमा रहेका बेला अर्जेन्टिनाको पेनाल्टी क्षेत्रमा मोहम्मद सालाह लडाइए पनि रेफ्रीले पेनाल्टी दिएनन्। त्यसको केही क्षणपछि अर्जेन्टिनाले तीव्र काउन्टर आक्रमणमार्फत विजयी गोल गर्दै खेल आफ्नो पक्षमा पार्यो।

खेलपछि इजिप्टका मुख्य प्रशिक्षक होसाम हसानले रेफ्रीको निर्णयप्रति कडा असन्तुष्टि जनाउँदै आफूहरूको टोलीमाथि अन्याय भएको आरोप लगाए।

उनले भने, ‘हामीमाथि अन्याय भयो। विश्व च्याम्पियन अर्जेन्टिनालाई प्रतियोगितामा टिकाइराख्ने प्रयास भएको जस्तो लाग्यो। सायद उनीहरू मेसीलाई अझै अगाडि बढेको हेर्न चाहन्थे। अर्जेन्टिनाले हरेक तहमा समर्थन पाइरहेको महसुस भयो।’

विरोध जनाउने क्रममा हसानले दुवै हात क्रस गरेर रेफ्रीतर्फ संकेत गरेका थिए। फिफाको नियमअनुसार उक्त संकेत ‘रंगभेदविरुद्धको आधिकारिक संकेत’ मानिने भएकाले रेफ्रीले उनलाई पहेँलो कार्ड दिएका थिए भने टोलीका एक सदस्यलाई रातो कार्ड देखाइएको थियो।

३९ वर्षीय लियोनेल मेसीको विश्वकप यात्रा जारी रहँदा इजिप्टका कप्तान मोहम्मद सालाह भने भावुक हुँदै मैदानबाट बाहिरिएका थिए। ३४ वर्ष पुग्न लागेका सालाहका लागि यो अन्तिम विश्वकप हुन सक्ने अनुमान गरिएको छ।

हारका बाबजुद इजिप्टका समर्थकहरूले टोलीको प्रदर्शनको प्रशंसा गरेका छन्। उनीहरूको भनाइ छ, ‘हामीलाई अन्याय भएको महसुस भयो, तर हाम्रा खेलाडीले विश्व च्याम्पियन अर्जेन्टिनासँग बराबरीको लडाइँ लडे। यो प्रदर्शन लामो समयसम्म सम्झिनेछौं।’

फुटबल विश्लेषक डेल जोन्सनका अनुसार इजिप्टको गोल खारेज गर्ने निर्णय र सालाहलाई पेनाल्टी नदिने निर्णयबीच एकरूपता देखिएको छैन। उनका अनुसार दुवै घटनाको प्रकृति उस्तै देखिए पनि एउटामा सहायक रेफ्रीको हस्तक्षेप भयो भने अर्कोमा भएन। यही कारण खेलपछि रेफ्रीको निष्पक्षतामाथि प्रश्न उठ्नुका साथै अर्जेन्टिना र मेसीलाई संरक्षण गरिएको भन्ने आरोपले थप चर्चा पाएको छ।

काठमाडौँ। इजिप्टलाई रोमाञ्चक रूपमा पराजित गर्दै अर्जेन्टिना फिफा विश्वकपको अन्तिम १६ अन्तर्गतको नकआउट चरणबाट क्वार्टरफाइनलमा प्रवेश गरेको छ।

मंगलबार राति सम्पन्न अत्यन्त प्रतिस्पर्धात्मक खेलमा अर्जेन्टिनाले उत्कृष्ट पुनरागमन गर्दै ३–२ को जित दर्ता गरेको हो। हारसँगै इजिप्टको विश्वकप यात्रा भने अन्तिम १६ मै टुंगिएको छ।

खेलको १४औँ मिनेटमा यासिर इब्राहिमले गोल गर्दै इजिप्टलाई सुरुआती अग्रता दिलाएका थिए। त्यसपछि मोस्ताफा जिकोले अर्को गोल थपेपछि इजिप्टले २–० को बलियो अग्रता बनाएको थियो। पहिलो हाफ र दोस्रो हाफको अधिकांश समय इजिप्टले खेलमा नियन्त्रण कायम राखे पनि अन्तिम समयमा रक्षापंक्ति कमजोर हुँदा टोलीले अग्रता जोगाउन सकेन।

अर्जेन्टिनाले खेलको ८०औँ मिनेटमा पुनरागमनको संकेत दियो। क्रिस्चियन रोमेरोले गरेको गोलसँगै टोली खेलमा फर्किएको थियो। त्यसको तीन मिनेटपछि कप्तान तथा स्टार खेलाडी लियोनेल मेसीले उत्कृष्ट गोल गर्दै खेल २–२ को बराबरीमा पुर्‍याए। दबाबमा परेको इजिप्ट त्यसपछि लगातार रक्षात्मक अवस्थामा देखियो।

इन्जुरी समयको तेस्रो मिनेट अर्थात् ९३औँ मिनेटमा एञ्जो फर्नान्डेजले निर्णायक गोल गर्दै अर्जेन्टिनालाई ३–२ को रोमाञ्चक जित दिलाए। अन्तिम क्षणमा भएको उक्त गोलसँगै अर्जेन्टिनाका समर्थक उत्साहित बने भने इजिप्टका खेलाडी निराश देखिए।

सुरुआती अग्रता लिएर पनि त्यसलाई कायम राख्न नसक्नु इजिप्टका लागि महँगो साबित भयो। रक्षापंक्तिमा समन्वयको अभाव, अन्तिम मिनेटमा बढेको दबाब र कमजोर डिफेन्डिङका कारण टोली प्रतियोगिताबाट बाहिरिन बाध्य भयो।

यता, कठिन अवस्थाबाट शानदार पुनरागमन गरेको अर्जेन्टिनाले उपाधि यात्रालाई निरन्तरता दिएको छ। कप्तान मेसीले महत्वपूर्ण समयमा गोल गर्दै आफ्नो अनुभव र नेतृत्व क्षमता फेरि एकपटक प्रमाणित गरे भने एञ्जो फर्नान्डेज निर्णायक नायक बने। यस जितसँगै अर्जेन्टिनाले क्वार्टरफाइनलमा स्थान सुरक्षित गरेको छ, जहाँ टोलीले उपाधितर्फ अर्को महत्वपूर्ण चुनौती सामना गर्नेछ।

काठमाडौँ । जारी फिफा विश्वकपअन्तर्गत अन्तिम १६ को नकआउट चरणमा मंगलबार राति भइरहेको इजिप्टविरुद्धको खेलमा अर्जेन्टिनाले अविश्वसनीय पुनरागमन गर्दै ३–२ को अग्रता बनाएको छ। दुई गोलले पछि परेको अवस्थाबाट अर्जेन्टिनाले लगातार तीन गोल गर्दै खेल आफ्नो पक्षमा पार्ने अवस्थामा पुगेको हो।

खेलको ८०औँ मिनेटमा क्रिस्टियन रोमेरोले गोल गर्दै अर्जेन्टिनाको पुनरागमनको सुरुआत गरेका थिए। त्यसको तीन मिनेटपछि कप्तान तथा स्टार खेलाडी लियोनेल मेसीले उत्कृष्ट गोल गर्दै खेल २–२ को बराबरीमा ल्याए। मेसीको गोलले अर्जेन्टिनालाई नयाँ ऊर्जा दिएको थियो।

निर्धारित समय सकिएपछि थप गरिएको इन्जुरी समयको तेस्रो मिनेट अर्थात् ९३औँ मिनेटमा एञ्जो फर्नान्डेजले शानदार गोल गर्दै अर्जेन्टिनालाई पहिलो पटक अग्रता दिलाए। उक्त गोलसँगै अर्जेन्टिनाले खेलमा ३–२ को रोमाञ्चक अग्रता बनाएको छ।

यसअघि इजिप्टले खेलको १४औँ मिनेटमा यासिर अब्राहिम र ५८औँ मिनेटमा मोस्ताफा जिकोको गोलमार्फत २–० को अग्रता बनाएको थियो। तर, अन्तिम १३ मिनेटमा अर्जेन्टिनाले लगातार तीन गोल गर्दै खेलको नतिजा नै उल्ट्याएको छ।

खेलको अन्तिम क्षणमा इजिप्ट बराबरी गोलको खोजीमा आक्रामक रूपमा अघि बढिरहेको छ भने अर्जेन्टिना अग्रता जोगाउँदै क्वार्टरफाइनल प्रवेश सुनिश्चित गर्ने लक्ष्यमा रहेको छ।

काठमाडौँ । जारी फिफा विश्वकपअन्तर्गत अन्तिम १६ को नकआउट चरणमा मंगलबार राति भइरहेको इजिप्ट र अर्जेन्टिनाबीचको खेल अत्यन्त रोमाञ्चक बनेको छ। दुई गोलले पछि परेको अवस्थाबाट अर्जेन्टिनाले शानदार पुनरागमन गर्दै खेल २–२ को बराबरीमा ल्याएको छ।

खेलको ८०औँ मिनेटमा क्रिस्टियन रोमेरोले अर्जेन्टिनाका लागि पहिलो गोल गर्दै टोलीलाई खेलमा फर्काएका थिए। त्यसको तीन मिनेटपछि कप्तान तथा स्टार खेलाडी लियोनेल मेसीले उत्कृष्ट फिनिसिङ गर्दै गोल गरेपछि अर्जेन्टिनाले खेल बराबरीमा पुर्‍याएको हो। मेसीको गोलसँगै अर्जेन्टिनाका समर्थक उत्साहले भरिएका छन् भने खेलको रोमाञ्च थप बढेको छ।

यसअघि इजिप्टले खेलको १४औँ मिनेटमा यासिर अब्राहिम र ५८औँ मिनेटमा मोस्ताफा जिकोको गोलमा २–० को अग्रता बनाएको थियो। तर, अन्तिम चरणमा अर्जेन्टिनाले लगातार दुई गोल गर्दै खेलको दिशा नै परिवर्तन गरेको छ।

खेलको अन्तिम समय नजिकिँदै गर्दा दुवै टोली जित निकाल्ने लक्ष्यका साथ आक्रामक खेलिरहेका छन्। निर्धारित समयको बाँकी मिनेटमा दुवै टोलीले निर्णायक गोलको खोजी जारी राखेका छन्, जसका कारण खेल थप प्रतिस्पर्धात्मक र रोमाञ्चक बनेको छ।

काठमाडौँ । जारी फिफा विश्वकपअन्तर्गत अन्तिम १६ को नकआउट चरणमा मंगलबार राति भइरहेको इजिप्टविरुद्धको खेलमा अर्जेन्टिनाले एक गोल फर्काएको छ। खेलको ८०औँ मिनेटमा क्रिस्टियन रोमेरोले गोल गर्दै अर्जेन्टिनालाई खेलमा फर्काउने प्रयास गरेका हुन्।

इजिप्टले यसअघि खेलको १४औँ मिनेटमा यासिर अब्राहिम र ५८औँ मिनेटमा मोस्ताफा जिकोको गोलमा २–० को अग्रता बनाएको थियो। तर, ८०औँ मिनेटमा आएको कर्नर अवसरलाई सदुपयोग गर्दै रोमेरोले हेडमार्फत बललाई जाली चुमाएपछि अर्जेन्टिनाले अन्तर २–१ मा झारेको हो।

रोमेरोको गोलसँगै खेल थप रोमाञ्चक बनेको छ। लियोनेल मेस्सीको नेतृत्वमा रहेको अर्जेन्टिनाले बराबरी गोलका लागि लगातार आक्रमण गरिरहेको छ भने इजिप्ट आफ्नो अग्रता जोगाउँदै क्वार्टरफाइनल यात्रा सुनिश्चित गर्ने लक्ष्यमा रहेको छ।

खेलको अन्तिम १० मिनेट बाँकी रहँदा दुवै टोली आक्रामक रूपमा प्रस्तुत भएका छन्। अर्जेन्टिना पुनरागमनको प्रयासमा छ भने इजिप्ट ऐतिहासिक जित हात पार्ने लक्ष्यसहित रक्षात्मक र प्रतिआक्रमणको रणनीतिमा खेलिरहेको छ।

काठमाडौँ । जारी फिफा विश्वकपअन्तर्गत अन्तिम १६ को नकआउट चरणमा इजिप्टले अर्जेन्टिनाविरुद्ध आफ्नो अग्रता दोब्बर बनाएको छ। मंगलबार राति भइरहेको रोमाञ्चक प्रतिस्पर्धामा इजिप्टले खेलको  ६७  औँ मिनेटमा दोस्रो गोल गर्दै २–० को बलियो अग्रता बनाएको हो।

इजिप्टका लागि दोस्रो गोल मोस्ताफा जिकोले गरे। तीव्र गतिमा अघि बढाइएको आक्रमणलाई उत्कृष्ट फिनिसिङमा परिणत गर्दै उनले बललाई जाली चुमाए। जिकोको गोलसँगै इजिप्टका खेलाडी र समर्थक उत्साहित बनेका छन् भने अर्जेन्टिना थप दबाबमा परेको छ।

यसअघि खेलको १४औँ मिनेटमा यासिर अब्राहिमले गोल गर्दै इजिप्टलाई सुरुआती अग्रता दिलाएका थिए। दोस्रो गोलपछि इजिप्टले आत्मविश्वासका साथ खेल नियन्त्रणमा राख्ने प्रयास गरिरहेको छ भने अर्जेन्टिना खेलमा फर्किने लक्ष्यसहित लगातार आक्रमणमा उत्रिएको छ।

स्टार खेलाडी लियोनेल मेस्सीको नेतृत्वमा रहेको अर्जेन्टिनाले बल नियन्त्रण बढाउने र गोल गर्ने अवसर सिर्जना गर्ने प्रयास गरिरहेको भए पनि इजिप्टको सुदृढ रक्षापंक्तिले उसका अधिकांश आक्रमण निष्प्रभावी बनाइरहेको छ। खेलको बाँकी समयमा अर्जेन्टिनाले पुनरागमन गर्न सक्ने वा इजिप्टले आफ्नो अग्रता कायम राख्दै क्वार्टरफाइनल यात्रा तय गर्ने भन्ने चासो बढेको छ।

काठमाडौँ । जारी फिफा विश्वकपअन्तर्गत मंगलबार राति भइरहेको खेलको पहिलो हाफमा इजिप्टले १-० को अग्रता बनाएको छ। सुरुदेखि नै आक्रामक खेल प्रस्तुत गरेको इजिप्टले पहिलो हाफमा विपक्षी टोलीमाथि दबाब कायम राख्दै अग्रता सुरक्षित गरेको हो।

इजिप्टका लागि खेलको १४औँ मिनेटमा डिफेन्डर यासिर अब्राहिमले महत्वपूर्ण गोल गरे। कर्नरबाट आएको बललाई उनले उत्कृष्ट हेडमार्फत जाली चुमाउँदै टोलीलाई अग्रता दिलाएका हुन्। उक्त गोलपछि इजिप्टले बल नियन्त्रणमा राख्दै थप अवसर सिर्जना गर्ने प्रयास गरेको थियो भने विपक्षी टोलीले बराबरी गोल फर्काउने केही प्रयास गरे पनि सफल हुन सकेन।

पहिलो हाफभर दुवै टोलीबीच प्रतिस्पर्धात्मक खेल देखिए पनि इजिप्टले आफ्नो रक्षापंक्ति मजबुत राख्दै विपक्षीको आक्रमण विफल पार्यो। यासिर अब्राहिमको गोलकै आधारमा इजिप्टले पहिलो ४५ मिनेट १–० को अग्रतासहित समाप्त गरेको छ। अब दोस्रो हाफमा इजिप्ट अग्रता जोगाउने लक्ष्यमा हुनेछ भने विपक्षी टोली खेलमा पुनरागमन गर्ने प्रयासमा रहनेछ।

काठमाडौँ । जारी फिफा विश्वकपअन्तर्गत मंगलबार राति भइरहेको नकआउट चरणको खेलमा इजिप्टले उत्कृष्ट सुरुआत गरेको छ। खेलको १४औं मिनेटमा इब्राहिमले गरेको शानदार गोलसँगै इजिप्टले महत्वपूर्ण अग्रता लिएको हो।

खेलको सुरुदेखि नै आक्रामक शैली अपनाएको इजिप्टले विपक्षी टोलीमाथि निरन्तर दबाब सिर्जना गरेको थियो। त्यसकै परिणामस्वरूप १४औं मिनेटमा आएको अवसरलाई इब्राहिमले सदुपयोग गर्दै बललाई जाली चुमाएका हुन्। उनको गोलपछि मैदानमा उपस्थित इजिप्टका समर्थक उत्साहित बनेका छन्।

प्रारम्भिक अग्रतासँगै इजिप्टले खेलमा आत्मविश्वास बढाएको छ भने विपक्षी टोली बराबरी गोल फर्काउने प्रयासमा देखिएको छ। दुवै टोलीले तीव्र गतिमा आक्रमण र प्रतिआक्रमण गरिरहेका कारण खेल निकै प्रतिस्पर्धात्मक बनेको छ।