Author: nepalone

काठमाडौं। रसुवाको भोटेकोशीमा आएको विनाशकारी बाढीमा मधेश प्रदेशका ३० जना सम्पर्कविहीन भएका छन् ।

मधेश प्रदेश प्रहरी कार्यालय, जनकपुरधामले बिहीबार जारी गरेको विज्ञप्तिअनुसार परिवार तथा आफन्तबाट प्राप्त सूचनाका आधारमा उनीहरू रसुवाका विभिन्न स्थानमा काम गर्दै वा बसोबास गर्दै आएका थिए । बाढीपछि उनीहरूसँग सम्पर्क हुन नसकेको प्रहरीले जनाएको छ ।

प्रहरीका अनुसार पर्साका १६, बाराका ३, रौतहटका २, सर्लाहीका ६ र सप्तरीका २ जना सम्पर्कविहीन छन् ।

पर्साबाट सम्पर्कविहीन हुनेमा नारायण पटेल, सुबोध पटेल, अरुण हजरा, श्यामबाबु ठाकुर, उकेश दंगोल, सञ्जय तामाङ, आकाश तामाङ, कमरुल होदा अंसारी, सुभाष पटेल, समिम देवान, अनुतमबहादुर श्रेष्ठ, अभिषेक बस्तोला, घनश्याम बस्तोला, दिनेश परियार र पृथ्वी चौधरीलगायत छन् ।

बाराका नारायण सिंह, सत्यप्रकाश राम र अन्कित पटेलको अवस्था पनि हालसम्म पत्ता लाग्न सकेको छैन । त्यस्तै रौतहटका गौरव राउत र शेख मजिद सम्पर्कविहीन छन् ।

सर्लाहीका माधव काफ्ले, अनुज काफ्ले, कृष्णप्रसाद धमला, द्वारिका दंगाल, चिरञ्जीवी खतिवडा र सुनिल कुशवाहा पनि सम्पर्कविहीन रहेको प्रहरीले जनाएको छ । सप्तरीका अजयकुमार यादव र साजन चौधरीको अवस्थासमेत यकिन हुन सकेको छैन ।

प्रहरीका अनुसार सम्पर्कविहीनको सूचीमा रहेका सर्लाहीका ज्ञानबहादुर थिङ र श्यामलाल मोक्तान भने उद्धारपछि परिवारको सम्पर्कमा आएका छन् ।

बाँकी व्यक्तिको अवस्था पत्ता लगाउन खोज तथा उद्धार कार्य भइरहेको प्रहरीले जनाएको छ ।

मधेश प्रदेश प्रहरीले सम्पर्कविहीन व्यक्तिका परिवार तथा आफन्तलाई अनावश्यक त्रासमा नपर्न र अपुष्ट सूचनाको पछि नलाग्न आग्रह गरेको छ ।

काठमाडौं। पूर्वराजा ज्ञानेन्द्र शाहले रसुवाको भोटेकोशी नदीमा आएको भीषण बाढीबाट भएको जनधनको क्षतिप्रति गहिरो दुःख व्यक्त गर्दै विपद्मा परेकाहरूको उद्धार तथा राहतका लागि सबै पक्षलाई एकजुट हुन अपिल गरेका छन्।

देशवासीका नाममा बुधबार जारी सन्देशमा पूर्वराजा शाहले चीनको स्वशासित प्रदेश तिब्बतमा हिमताल फुटेर आएको भीषण बाढी भोटेकोशी र त्रिशूली नदीमा प्रवेश गरेपछि रसुवा, नुवाकोट, धादिङ, गोरखा, चितवन र नवलपरासीका जलतटीय क्षेत्रमा ठूलो क्षति पुगेको उल्लेख गरेका छन्।

बाढीबाट बजार, बस्ती, बाटोघाटो, पुलपुलेसा, विद्युत् आयोजना लगायतका भौतिक संरचना तथा खेतीपातीमा अपार क्षति पुगेको भन्दै उनले घटनाप्रति दुःख व्यक्त गरेका हुन्।

भोटेकोशीमा आएको बाढीले नुवाकोटको त्रिशूली बजार आसपासका करिब ६० घर तथा दुईवटा पक्की पुलसमेत बगाएको प्रारम्भिक विवरण सार्वजनिक भएको छ। बाढीका कारण रसुवा, नुवाकोट र धादिङका विभिन्न क्षेत्रमा ठूलो भौतिक क्षति भएको छ भने मानवीय क्षतिको विवरणसमेत बढ्दै गएको छ।

पूर्वराजा शाहले प्राकृतिक विपद्मा परी ज्यान गुमाएकाहरूप्रति श्रद्धाञ्जली व्यक्त गर्दै शोकसन्तप्त परिवारजनमा समवेदना प्रकट गरेका छन्। उनले घाइतेहरूको शीघ्र स्वास्थ्यलाभको कामना गर्दै सुरक्षाकर्मीसहित बेपत्ता भएका नागरिकको तत्काल खोजी कार्य तीव्र पार्न आवश्यक रहेको बताएका छन्।

उनले विपद्को यस दुःखद् घडीमा खोजी, उद्धार, राहत तथा उपचारका कार्यमा कुनै कमी हुन नदिन सम्बन्धित सबै निकायलाई आग्रह गरेका छन्।

सरकार, सुरक्षा निकाय, राष्ट्रसेवक, स्थानीय तह, सामाजिक संघसंस्था तथा आमनागरिक सबैले आ–आफ्नो क्षेत्रबाट सक्दो सहयोग गर्दै विपद्मा परेकाहरूको उद्धार र राहत कार्यलाई प्रभावकारी बनाउन एकजुट हुनुपर्ने उनको भनाइ छ।

‘विपद्मा परेकाहरूको उद्धार तथा राहत कार्यलाई प्रभावकारी बनाउन एकजुट हुन’ आग्रह गर्दै उनले यस्तो संकटको सामना सामूहिक प्रयासबाट मात्र प्रभावकारी रूपमा गर्न सकिने सन्देश दिएका छन्।

भोटेकोशीको बाढीपछि सरकारले प्रभावित क्षेत्रमा उद्धार तथा राहतलाई तीव्र बनाएको छ। नेपाली सेना, नेपाल प्रहरी तथा सशस्त्र प्रहरी परिचालन हुनुका साथै हेलिकोप्टरमार्फत उद्धारको प्रयास भइरहेको छ। प्रभावित रसुवा, नुवाकोट र धादिङलाई सरकारले तीन महिनाका लागि विपद् संकटग्रस्त क्षेत्र घोषणा गर्ने निर्णयसमेत गरेको छ।

पूर्वराजा शाहले नेपालसँग सीमा जोडिएको छिमेकी देशमा आएको प्राकृतिक विपद्ले अर्को देशलाई समेत प्रत्यक्ष प्रभाव पार्न सक्ने भएकाले यस्ता विपद् न्यूनीकरणका लागि अलग–अलग प्रयासभन्दा द्विपक्षीय तथा संयुक्त प्रयास प्रभावकारी हुन सक्ने बताएका छन्।

उनले विपद्बाट हुने क्षति न्यूनीकरणका लागि अन्तर्राष्ट्रिय तथा छिमेकी मुलुकसँगको सहकार्यलाई समेत ध्यान दिनुपर्ने आवश्यकता औँल्याएका छन्।

काठमाडौं। रसुवाको भोटेकोशीमा आएको भीषण बाढीबाट प्रभावित नागरिकको तत्काल उद्धार, राहत तथा पुनःस्थापनामा जुट्न राष्ट्रिय मानव अधिकार आयोगले सरकारसहित सबै पक्षलाई अपिल गरेको छ ।

आयोगले बुधबार विज्ञप्ति जारी गर्दै बाढीमा परी नागरिक, सुरक्षाकर्मी, कर्मचारी तथा आन्तरिक र बाह्य पर्यटकको मृत्यु भएको, कैयौँ बेपत्ता तथा घाइते भएको र ठूलो भौतिक क्षति पुगेको घटनाप्रति गहिरो दुःख व्यक्त गरेको छ ।

आयोगले विपद्मा परेका नागरिकको जीवन रक्षा, बेपत्ताको खोजी तथा घाइतेको तत्काल उद्धार र उपचारलाई पहिलो प्राथमिकतामा राख्न आग्रह गरेको छ । साथै, बाढीका कारण विस्थापित तथा प्रभावित परिवारलाई सुरक्षित स्थानमा राख्ने र आवश्यक राहत उपलब्ध गराउने व्यवस्था तत्काल मिलाउन सरकारको ध्यानाकर्षण गराएको छ ।

उद्धार तथा पुनःस्थापनाका कार्यमा नेपाल सरकार, राजनीतिक दल, कर्मचारी, सुरक्षाकर्मी तथा आम नागरिक सबैले आ–आफ्नो क्षेत्रबाट सहयोग गर्नुपर्ने आयोगको भनाइ छ ।

विपद्को कठिन अवस्थामा मानवीय सहयोग र समन्वयलाई प्रभावकारी बनाउँदै प्रभावित नागरिकको अधिकार तथा सुरक्षालाई केन्द्रमा राखेर उद्धार, राहत र पुनःस्थापनाका काम अघि बढाउन आयोगले आग्रह गरेको छ ।

काठमाडौं। रसुवाको भोटेकोशी नदीमा आएको भीषण बाढीमा परी मृत्यु हुनेको संख्या २२ पुगेको छ ।

बागमती प्रदेश प्रहरी कार्यालयको पछिल्लो विवरणअनुसार रसुवा, नुवाकोट, धादिङ र चितवनमा गरी २२ जनाको मृत्यु भएको हो ।

प्रहरीका अनुसार रसुवामा एक पुरुषको मृत्यु भएको छ । नुवाकोटमा पाँच महिला र छ पुरुष गरी ११ जनाको मृत्यु भएको छ । त्यस्तै धादिङमा पाँच महिला, दुई पुरुष र दुई जनाको पहिचान खुल्न नसकेको अवस्थामा मृत्यु भएको छ । चितवनमा एक महिलाको मृत्यु भएको प्रहरीले जनाएको छ ।

बाढी प्रभावित विभिन्न क्षेत्रमा घाइते अवस्थामा ६५ जनाको उद्धार गरिएको छ । तीमध्ये रसुवाबाट ४३, नुवाकोटबाट १९ र धादिङबाट तीन जनाको उद्धार गरिएको विवरणमा उल्लेख छ ।

उद्धार गरिएका घाइतेमध्ये ६ जनालाई काठमाडौं ल्याइएको छ भने ३६ जना धुन्चेमा उपचाररत रहेको प्रहरीले जनाएको छ । एक प्रहरीसहित अन्य घाइतेलाई नुवाकोटमा उद्धार गरिएको विवरणमा उल्लेख छ ।

भोटेकोशी हुँदै त्रिशूली नदीमा आएको बाढीले रसुवा, नुवाकोट र धादिङमा ठूलो जनधनको क्षति पुर्‍याएको छ।

बाढीको प्रभाव तल्लो तटीय क्षेत्रसम्म पुगेपछि चितवनमा समेत मानवीय क्षति भएको हो ।

प्रभावित क्षेत्रमा बेपत्ता नागरिकको खोजी तथा उद्धार कार्य अझै जारी रहेको प्रहरीले जनाएको छ ।

काठमाडौं । प्रधानमन्त्री बालेन शाहलाई सामाजिक सञ्जालमार्फत ज्यान मार्ने धम्की दिएको आरोपमा प्रहरीले एक युवकलाई पक्राउ गरेको छ ।

पक्राउ पर्नेमा झापाको भद्रपुर–९ घर भई काठमाडौंको कीर्तिपुरमा बस्दै आएका २३ वर्षीय पुस्कर दहाल रहेका छन् । उनलाई काठमाडौं उपत्यका अपराध अनुसन्धान कार्यालयको टोलीले कीर्तिपुर नयाँ बजारबाट पक्राउ गरेको हो ।

प्रहरीका अनुसार दहालले इन्स्टाग्राममा प्रधानमन्त्री शाहलाई लक्षित गर्दै २३ भदौमा ‘सिध्याइदिने’ भन्दै धम्कीपूर्ण स्टाटस लेखेका थिए । उक्त स्टाटसमा प्रहरीलाई समेत ट्याग गर्नुका साथै आपत्तिजनक शब्द प्रयोग गरेको प्रहरीको भनाइ छ ।

पक्राउ परेका दहाललाई थप अनुसन्धान तथा आवश्यक कारबाहीका लागि साइबर ब्यूरो, भोटाहिटी पठाइएको छ ।

प्रहरी स्रोतका अनुसार दहाल कुलमान घिसिङ नेतृत्वको उज्यालो नेपाल पार्टीमा आबद्ध रहेका छन् ।

काठमाडौं । गृहमन्त्री सुधन गुरुङले रसुवा र नुवाकोटमा बाढीबाट प्रभावित नागरिकको उद्धारलाई सरकारको पहिलो प्राथमिकतामा राखिएको बताएका छन् ।

विमानस्थलबाटै खोज तथा उद्धार अभियानको नेतृत्व गरिरहेका मन्त्री गुरुङले रात परेपछि हेलिकप्टरमार्फत उद्धार गर्न कठिन हुने भएकाले उपलब्ध सुरक्षा संयन्त्रलाई तत्काल उद्धारमा केन्द्रित गरिएको जानकारी दिए ।

उनका अनुसार रसुवाको टिमुरे, स्याफ्रुबेँसी र रसुवागढी तथा नुवाकोटका जोखिमयुक्त क्षेत्रमा रहेका नागरिकलाई उच्च सतर्कतामा राखिएको छ । सम्भावित थप क्षतिलाई ध्यानमा राख्दै सुरक्षाकर्मीहरूलाई परिचालन गरी उद्धारको काम तीव्र पारिएको उनले बताए ।

‘हाम्रो पहिलो प्राथमिकता रेस्क्यु हुन्छ,’ मन्त्री गुरुङले भने ।

उद्धार अभियान पूरा भएपछि विस्थापित नागरिकका लागि राहत तथा अस्थायी आवासको व्यवस्था गरिने उनको भनाइ छ । उनले हिमताल वा ग्लेसियर फुटेपछि आएको बाढीका कारण ठूलो क्षति भएको प्रारम्भिक जानकारी प्राप्त भएको बताए ।

मन्त्री गुरुङका अनुसार अहिले उपलब्ध हेलिकप्टरहरू उद्धार कार्यमै प्रयोग भइरहेका छन् । उद्धार अभियान प्रभावित नहोस् भनेर निजी प्रयोजनका लागि हेलिकप्टर उडानमा रोक लगाइएको उनले जानकारी दिए ।

उद्धार आवश्यक रहेका स्थानमा फसेका नागरिकलाई हेलिकप्टरबाट देखिने गरी आगो बालेर वा अन्य माध्यमबाट संकेत दिनसमेत उनले आग्रह गरेका छन् । सुरक्षा निकायलाई आपसी समन्वयसहित उद्धारमा तीव्र रूपमा परिचालित हुन निर्देशन दिइएको मन्त्री गुरुङले बताए ।

काठमाडौं। तिब्बततर्फबाट रसुवा हुँदै त्रिशूली नदीमा आएको भीषण बाढीमा परी १६ जनाको मृत्यु भएको छ ।

बाढीमा ३६ जना घाइते भएको बागमती प्रदेश प्रहरी कार्यालयले बुधबार पौने ४ बजे सार्वजनिक गरेको विवरणमा उल्लेख छ ।

प्रदेश प्रहरीका अनुसार मृतकमध्ये रसुवामा १, नुवाकोटमा ९ र धादिङमा ६ जना छन् । मृतक १६ जनामध्ये ७ महिला र ८ पुरुषको पहिचान खुलेको छ भने एक जनाको सनाखत हुन बाँकी छ ।

बाढी प्रभावित क्षेत्रमा उद्धार कार्य जारी रहेकाले मृतक तथा घाइतेको संख्या थप बढ्न सक्ने प्रहरीले जनाएको छ ।

प्रहरीका अनुसार उद्धार गरिएका घाइतेमध्ये रसुवाबाट १३, नुवाकोटबाट १९ र धादिङबाट ३ जना छन् । उनीहरूलाई उद्धार गरी उपचारका लागि सम्बन्धित स्वास्थ्य संस्थातर्फ पठाइएको प्रहरीले जनाएको छ ।

भोटेकोशी र त्रिशूली नदीमा आएको बाढीले रसुवा, नुवाकोट र धादिङका विभिन्न क्षेत्रमा ठूलो भौतिक क्षति पुर्‍याएको छ ।

बाढीका कारण सडक, पुल, घर तथा अन्य पूर्वाधारमा क्षति पुगेपछि प्रभावित क्षेत्रमा उद्धार र राहतको काम चुनौतीपूर्ण बनेको छ।

काठमाडौं । नेकपा (एमाले) का प्रमुख सचेतक ऐन महरले रसुवाको भोटेकोशीसहितका क्षेत्रमा आएको भीषण बाढीबाट उत्पन्न संकटलाई तत्काल राष्ट्रिय विपद् घोषणा गरेर उद्धार र राहतलाई युद्धस्तरमा अघि बढाउन सरकारसँग माग गरेका छन् ।

बुधबार प्रतिनिधिसभाको बैठकमा बोल्दै महरले बाढीका कारण ८ सयभन्दा बढी नागरिक बेपत्ता भएको र २ सयभन्दा बढी अझै उद्धारको पर्खाइमा रहेको जानकारी गराए ।

उनका अनुसार तिब्बतको जिबुङ क्षेत्रमा हिमताल विस्फोटपछि भोटेकोशी हुँदै आएको बाढीले रसुवा, नुवाकोट, धादिङ, चितवनलगायत क्षेत्रमा ठूलो क्षति पुर्‍याएको छ । नुवाकोटमा तीन र धादिङमा चार जनाको शव फेला परिसकेको भन्दै उनले मानवीय क्षतिको संख्या अझै बढ्न सक्ने बताए ।

महरले सरकारलाई तत्काल राहत, उद्धार तथा घाइतेको निःशुल्क उपचार प्रभावकारी बनाउन आग्रह गरे । साथै, बाढीबाट भएको क्षतिको यथार्थ विवरण संकलन गरी सार्वजनिक गर्न र चीनबाट बाढीबारे कुनै पूर्वसूचना प्राप्त भएको थियो वा थिएन भन्ने विषयमा सरकारले स्पष्ट पार्नुपर्ने उनको माग छ ।

उनले उद्धार तथा राहतमा राजनीतिक दल, मानवअधिकारकर्मी, नागरिक समाज र विभिन्न संघसंस्थालाई समेत परिचालन गर्न राष्ट्रिय आह्वान गर्नुपर्ने बताए ।

बाढीपीडितलाई तत्काल क्षतिपूर्ति उपलब्ध गराउनुका साथै अवरुद्ध सडक तथा जनजीवन सामान्य बनाउन पुनर्निर्माण र पुनःस्थापनाको काम तत्काल थाल्नुपर्ने महरको भनाइ छ ।

‘यस्तो संकटमा सत्ता पक्ष र प्रतिपक्ष भनेर बस्ने होइन, सिंगो देश एक ठाउँमा उभिनुपर्छ,’ उनले भने ।

एमालेले बाढी प्रभावित क्षेत्रमा उद्धारका लागि आफ्ना कार्यकर्ता परिचालन गरिसकेको जानकारी दिँदै महरले पार्टीको आकस्मिक बैठकले थप राहत तथा उद्धारसम्बन्धी निर्णय गर्ने बताए ।

काठमाडौं । रसुवामा आएको भीषण बाढीपछि विभिन्न क्षेत्रमा ३ सय ८४ आन्तरिक तथा विदेशी पर्यटक सम्पर्कविहीन भएका छन् ।

नेपाल पर्यटन बोर्डले ट्राभल एजेन्सी, पर्यटक गाइड, स्थानीय तह तथा सुरक्षा निकायबाट प्राप्त विवरणका आधारमा झन्डै चार सय पर्यटक सम्पर्कविहीन रहेको जनाएको हो ।

सम्पर्कविहीन हुनेमा २ सय ९१ विदेशी र ९३ नेपाली पर्यटक छन् । बाढी प्रभावित क्षेत्रमा सञ्चार तथा सडक सम्पर्क विच्छेद भएकाले उनीहरूको अवस्थाबारे तत्काल जानकारी लिन कठिन भएको बोर्डले जनाएको छ ।

प्राप्त विवरणअनुसार सम्राट टुर्स एन्ड ट्राभल्सबाट गएका ७१ जना सम्पर्कविहीन छन् । उनीहरूमध्ये ५९ भारतीय र १२ नेपाली छन् । काठमाडौं होलिडेजबाट गएका १७ जनामध्ये १५ नेपाली र एक विदेशी सम्पर्कविहीन रहेको विवरण छ ।

त्यस्तै, लिफ होलिडेजबाट गएका ५५ जना सम्पर्कविहीन छन् । उनीहरूमध्ये ४६ भारतीय र ९ नेपाली छन् । कैलास जर्नीबाट गएका ३१ जनामध्ये २६ विदेशी र ५ नेपाली छन् ।

एक्स्प्लोर भ्याकेसनबाट गएका ७ नेपाली, ट्रेकर्स सोसाइटीका ९२ जना, रिचा टुर्स एन्ड ट्राभल्सका १२ जना तथा फिस्टेल टुर्स एन्ड ट्राभलका २७ जना पनि सम्पर्कविहीन रहेको बोर्डको विवरणमा उल्लेख छ ।

ट्रेकर्स सोसाइटीका ९२ जनामध्ये ७७ विदेशी र १५ नेपाली छन् । रिचा टुर्सका १२ जनामा ८ विदेशी र ४ नेपाली छन् भने फिस्टेल टुर्सका २७ जनामा २० विदेशी र ७ नेपाली छन् ।

यसैगरी हिमालयन ग्लेसियरबाट गएका ५२ जना सम्पर्कविहीन छन् । उनीहरूमध्ये ३७ विदेशी र १५ नेपाली छन् । अल्पाइन इको ट्रेकका २० जनामध्ये १६ विदेशी र ४ नेपाली पर्यटक सम्पर्कविहीन रहेको बोर्डले जनाएको छ ।

बाढीका कारण रसुवाका विभिन्न क्षेत्रमा सडक तथा सञ्चार सम्पर्क प्रभावित भएकाले पर्यटकको अवस्थाबारे थप विवरण संकलन भइरहेको छ ।

पर्यटन बोर्डले सम्बन्धित ट्राभल एजेन्सी, स्थानीय प्रशासन र सुरक्षा निकायसँग समन्वय गरी पर्यटकको अवस्थाबारे जानकारी लिने काम जारी राखेको जनाएको छ।

काठमाडौं। रसुवाको भोटेकोशी नदीमा आएको भीषण बाढीबाट प्रभावित नागरिकको तत्काल उद्धार गर्न सांसदहरूले सरकारमाथि दबाब बढाएका छन् ।

बाढीका कारण रसुवा र नुवाकोटका विभिन्न क्षेत्रमा ठूलो क्षति हुनुका साथै धेरै नागरिक सम्पर्कविहीन तथा उद्धारको पर्खाइमा रहेकाले राज्यको सम्पूर्ण संयन्त्र परिचालन गर्न सांसदहरूले माग गरेका हुन् ।

बुधबार बसेको प्रतिनिधिसभा बैठकको आकस्मिक समयमा बोल्दै प्रभावित जिल्लाका सांसदहरूले विपद्को अवस्थामा राजनीतिक तथा अन्य विषयलाई थाती राखेर सरकारको पहिलो प्राथमिकता नागरिकको ज्यान जोगाउने हुनुपर्ने बताए ।

नुवाकोटका सांसद अर्जुननरसिंह केसीले बाढीपहिरोका कारण रसुवा, नुवाकोटलगायतका जिल्लामा ठूलो जनधनको क्षति भएको उल्लेख गर्दै युद्धस्तरमा उद्धार र राहत अभियान सञ्चालन गर्न सरकारसँग माग गरे ।

उनले अहिलेको परिस्थितिमा राज्यका सबै संयन्त्रलाई एकीकृत रूपमा परिचालन गर्नुपर्ने बताए । बाढीका कारण जोखिममा रहेका तथा बेपत्ता भएका नागरिकको खोजीलाई तीव्रता दिनुपर्ने उल्लेख गर्दै केसीले उद्धारपछि प्रभावितका लागि राहत र पुनःस्थापनाको स्पष्ट योजना आवश्यक रहेको बताए ।

केसीले बाढीबाट क्षतिग्रस्त ऐतिहासिक बजार तथा बस्तीको पुनर्निर्माणका लागि समेत सरकारले तत्काल एकीकृत प्याकेज घोषणा गर्नुपर्ने माग गरे । उनका अनुसार प्रभावित नागरिकलाई तत्काल राहत उपलब्ध गराउनुका साथै दीर्घकालीन रूपमा उनीहरूको पुनःस्थापना गर्ने जिम्मेवारी पनि राज्यले लिनुपर्छ ।

रसुवाका सांसद मोहन आचार्यले बाढीबाट भएको क्षतिको प्रारम्भिक अवस्था नै अत्यन्त भयावह देखिएको बताए । उनले यो विपत्तिलाई सामान्य प्राकृतिक विपद्का रूपमा मात्र नहेरी गम्भीर राष्ट्रिय संकटका रूपमा लिएर सरकार तत्काल उद्धारमा केन्द्रित हुनुपर्ने बताए ।

बाढीका कारण सडक तथा यातायात सञ्जालमा क्षति पुगेकाले प्रभावित क्षेत्रमा स्थलमार्गबाट उद्धार गर्न कठिन भएको उनको भनाइ थियो । यस्तो अवस्थामा हेलिकप्टरबाटै उद्धार गर्नुपर्ने अवस्था रहेकाले उपलब्ध सबै हेलिकप्टर तत्काल रसुवा पठाउन आचार्यले माग गरे ।

उनले घाइते, बेपत्ता तथा बाढीका कारण विभिन्न स्थानमा अलपत्र परेका नागरिकको अवस्थाबारे तत्काल जानकारी लिनुपर्ने बताए । उद्धारका क्रममा सुरक्षाकर्मी, स्थानीय प्रशासन तथा अन्य सम्बन्धित निकायबीच प्रभावकारी समन्वय आवश्यक रहेको पनि उनले बताए ।

सांसद वसुमाया तामाङले पनि उद्धारका लागि हेलिकप्टरसहितका सबै उपलब्ध स्रोतसाधन पूर्ण क्षमतामा परिचालन गर्न माग गरिन् ।

उनले बाढीका कारण सम्पर्कविहीन भएका नागरिक तथा सुरक्षाकर्मीको तत्काल खोजी गरी सुरक्षित स्थानमा ल्याउनुपर्ने बताइन् । उद्धारका लागि आवश्यक जनशक्ति, उपकरण र हवाई साधन पर्याप्त रूपमा परिचालन गर्न सरकारको ध्यानाकर्षण गराउँदै उनले उद्धार कार्यमा कुनै ढिलाइ हुन नहुनेमा जोड दिइन् ।

बाढीबाट घरबारविहीन भएका हजारौँ नागरिकको तत्कालीन आवश्यकता पूरा गर्न सरकारले निःशुल्क खाना तथा खानेपानी, अस्थायी बसोबास र स्वास्थ्य उपचारको व्यवस्था गर्नुपर्ने तामाङको माग छ ।

घाइतेका लागि तत्काल निःशुल्क उपचारको व्यवस्था मिलाउनुपर्ने उल्लेख गर्दै उनले प्रभावित क्षेत्रमै आवश्यक स्वास्थ्य टोली र औषधि पुर्‍याउन पनि सरकारसँग आग्रह गरिन् ।

सांसदहरूले तत्कालको उद्धार र राहतसँगै बाढीबाट भएको क्षतिको विस्तृत मूल्याङ्कन गर्न उच्चस्तरीय टोली परिचालन गर्नुपर्ने मागसमेत गरेका छन् ।

बाढीले घर, सडक, पुल, बजार, जलविद्युत् आयोजना तथा अन्य सार्वजनिक पूर्वाधारमा ठूलो क्षति पुर्‍याएको अवस्थामा वास्तविक क्षतिको विवरण संकलन गरी पुनर्निर्माणको योजना बनाउनुपर्ने उनीहरूको भनाइ छ ।

वसुमाया तामाङले प्रभावित क्षेत्रको जनधन तथा पूर्वाधार क्षतिको मूल्याङ्कन गरी दीर्घकालीन पुनःस्थापना कार्यक्रम सञ्चालन गर्नुपर्ने बताइन् । पीडित परिवारलाई उचित क्षतिपूर्ति उपलब्ध गराउने गरी सरकारले विशेष प्याकेज ल्याउनुपर्ने उनको माग छ ।

भोटेकोशीमा आएको बाढी रसुवा हुँदै त्रिशूली नदीमा मिसिने भएकाले नुवाकोट, धादिङ, चितवनलगायत तल्लो तटीय क्षेत्रमा समेत जोखिम बढेको छ ।

नदीको बहाव बढ्ने क्रम जारी रहेकाले नदी आसपासका बस्ती तथा बजार क्षेत्रमा उच्च सतर्कता अपनाउन प्रशासन र सुरक्षा निकायले आग्रह गरिरहेका छन् ।

प्रतिनिधिसभामा सांसदहरूले पनि जोखिमयुक्त क्षेत्रमा रहेका नागरिकलाई सुरक्षित स्थानमा सार्ने कामलाई प्राथमिकता दिन सरकारसँग आग्रह गरेका छन् ।

स्थानीय प्रशासनसँग समन्वय गरी उद्धार तथा राहतलाई तीव्रता दिनुपर्ने र सम्भावित जोखिम भएका क्षेत्रमा अनावश्यक आवागमन रोक्नुपर्ने उनीहरूको भनाइ छ ।

भोटेकोशी बाढीका कारण ठूलो भौतिक क्षति भएको र अझै पनि केही नागरिक सम्पर्कविहीन रहेको अवस्थामा सांसदहरूले सरकारलाई तत्काल उपलब्ध सबै स्रोतसाधन परिचालन गरेर ‘पहिले नागरिकको ज्यान जोगाउने, त्यसपछि राहत र पुनःस्थापना’ को रणनीतिमा अघि बढ्न आग्रह गरेका छन् ।

काठमाडौं । सरकारले बाढी प्रभावित रसुवा, नुवाकोट र धादिङलाई तीन महिनाका लागि विपत् संकटग्रस्त क्षेत्र घोषणा गरेको छ।

मन्त्रिपरिषद्को आकस्मिक बैठकले तीन जिल्लालाई संकटग्रस्त क्षेत्र घोषणा गर्दै उद्धार, राहत तथा पुनःस्थापनाका लागि आवश्यक सम्पूर्ण काम अघि बढाउने निर्णय गरेको हो।

बैठकले सबै मन्त्रीलाई आ–आफ्नो मन्त्रालयअन्तर्गत आवश्यक कामको समन्वय र व्यवस्थापनका लागि प्रभावित क्षेत्रमा खटिनसमेत निर्देशन दिएको एक मन्त्रीले जानकारी दिए।

बाढीबाट तीनवटै जिल्लामा ठूलो भौतिक क्षति भएको छ भने केही क्षेत्रमा मानवीय क्षतिको विवरणसमेत संकलन भइरहेको छ।

काठमाडौं । भोटेकोशी नदीमा आएको भीषण बाढीपछि जलविद्युत् आयोजनामा कार्यरत डडेल्धुराका नौ जना कामदार सम्पर्कविहीन भएका छन्।

सम्पर्कविहीन हुनेमा आलिताल गाउँपालिका–३ कान्तिपुरका उमेश बुढा, लक्ष्मण रामजाली, गौरव रामजाली, गोविन्द रामजाली, सुन्दर बुढामगर र दिनेश रामजाली तथा आलिताल–७ नाउलीका दीपक घर्तीमगर, राजेश घर्तीमगर र किरण घर्तीमगर छन्।

उनीहरूसँगै काम गर्ने स्थानीय सुनील बुढामगरका अनुसार आलिताल–३ बाट आयोजनामा पुगेका ६ जना र वडा नम्बर ७ का तीन जना गरी नौ जना सम्पर्कविहीन भएका हुन्।

सुनीलका बुबा तथा आलिताल–३ का वडाध्यक्ष बलबहादुर बुढामगरका अनुसार सुनील बुधबार काममा नगएकाले आफू सुरक्षित रहेको जानकारी दिएका थिए। तर, अहिले उनीसँग समेत सम्पर्क हुन नसकेको उनले बताएका छन्।

बाढीपछि सम्पर्कविहीन कामदारको अवस्थाबारे थप विवरण आउन बाँकी छ।

काठमाडौं। चीनतर्फबाट प्राप्त सूचनाअनुसार हिमपहिरोपछि नदी थुनिएर बनेको ताल अझै पूर्ण रूपमा नखुलेपछि भोटेकोशी र त्रिशूली नदी क्षेत्रमा बाढीको जोखिम कायमै रहेको छ ।

नेपाल बाढी सूचना तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणले बुधबार सूचना जारी गर्दै नदी थुनिएको स्थानमा बनेको ताल पूर्ण रूपमा नखुलेको जनाएको हो ।

बुधबार दिउँसो १ः३५ बजे जारी सूचनामा अर्को सूचना जारी नभएसम्म भोटेकोशी र त्रिशूली नदीको किनार तथा आसपासका क्षेत्रबाट टाढा रहन आग्रह गरिएको छ ।

ताल पूर्ण रूपमा नखुलेका कारण नदीको बहावमा थप वृद्धि हुन सक्ने जोखिम रहेकाले तल्लो तटीय क्षेत्रमा रहेका नागरिकलाई उच्च सतर्कता अपनाउन र सुरक्षित स्थानमा रहन आग्रह गरिएको छ।