Tag: नेकपा एमाले

काठमाडौं । नेकपा एमालेको सचिवालय बैठक अचानक स्थगित भएको छ । अध्यक्ष केपी शर्मा ओलीको स्वास्थ्यमा समस्या देखिएपछि आजको बैठक स्थगित भएको उपमहासचिव विष्णु रिमालले नेपाल जानकारी दिएका छन् ।

अचानक अध्यक्ष ओली अस्वस्थ भएको खबर आएपछि बैठकमा सहभागी हुन भक्तपुरको गुण्डु जाँदै गरेका नेताहरू बाटैबाट फर्किएका छन् ।शुक्रबारको बैठकमा रातिसम्म ८ घण्टाभन्दा बढी बसेकाले थकित भएकाले आज आराम गरेर भोलि बैठक निरन्तर रहने रिमालले बताए । भोलि ११ बजेदेखि बस्ने गरी खबर आएको एक सचिवले जानकारी दिए ।

काठमाडौं । नेकपा एमालेका अध्यक्ष तथा निवर्तमान प्रधानमन्त्री केपी शर्मा ओलीले प्रतिनिधि सभा विघटनलाई असंवैधानिक, अलोकतान्त्रिक र देशविरुद्धको कदम ठहर गर्दै संसद् पुनस्र्थापनाको पक्षमा तत्काल संघर्ष सुरु गर्ने संकेत दिएका छन् । भक्तपुरको गुण्डुमा आयोजित पार्टी कार्यक्रमलाई सम्बोधन गर्दै उनले फागुन २१ को चुनावको पर्खाइमा नबस्ने स्पष्ट गरे । ‘फागुन २१ पर्खनु पर्ने केही छैन’, उनले भने, ‘संसद् विघटन गलत छ, असंवैधानिक छ, त्यसको प्रतिकार अब ढिलो गर्नु हुँदैन ।’

ओलीले संसद् पुनस्र्थापनाको मागमा जनआन्दोलन सुरु हुने विश्वास व्यक्त गरे । ‘जनता आँधीबेहरी बनेर आन्दोलनमा उत्रने छन्’, उनले भने । उनले दाबी गरे कि विघटन गर्नुको मुख्य कारण संविधान अनुसार समाधान खोज्न नचाहने प्रवृत्ति हो । ‘सबै पक्ष संसद कायम राखेर समाधान खोज्नेमा सहमत थिए, तर त्यहाँबाट विमुख भएर असंवैधानिक बाटो लिइयो’, ओलीले भने । पूर्व प्रधानन्यायाधीश सुशीला कार्की प्रधानमन्त्री बन्ने अडानमा रहेको भन्दै त्यो बहानामा संसद् विघटन गरिएको उनको आरोप छ ।

‘कार्की आयोग एमालेलाई मञ्जुर छैन, स्वीकार्य छैन’
नेकपा एमाले अध्यक्ष केपी शर्मा ओलीले गौरीबहादुर कार्कीको नेतृत्वमा बनेको जेनजी विद्रोहसम्बन्धी छानबिन आयोगलाई पूर्ण अस्वीकार गरेका छन् । उनको भनाइमा, आयोग गठनको उद्देश्य निष्पक्ष छानबिन होइन, राजनीतिक प्रतिशोधका लागि आधार बनाउने मात्र हो । ‘पहिल्यैदेखि ‘केपी ओलीलाई समात्नु पर्छ’ भन्ने मान्छेले छानबिन गर्छ भने निष्पक्षताको के ग्यारेन्टी ?’ उनले प्रश्न गरे ।

ओलीले यस्तो आयोगलाई एमालेले नमान्ने स्पष्ट घोषणा गरे । ‘यस्तो नाटक नेकपा एमालेलाई मञ्जुर छैन, स्वीकार्य छैन’, उनले जोड दिए । कार्कीले सामाजिक सञ्जालमा गरेको अभिव्यक्तिलाई लिएर एमालेले पहिले नै आपत्ति जनाउँदै आएको थियो । ओलीको ताजा अभिव्यक्तिले आयोगको विश्वसनीयतामाथि प्रश्न उठाएको छ ।

काठमाडौं । नेकपा एमालेका नेता भानुभक्त ढकालले पछिल्लो समय भएको षड्यन्त्रको प्रतिवाद गर्नको लागि पार्टीपंक्तिलाई आह्वान गरेका छन् । भक्तपुरमा आज (बिहीबार) आयोजित कार्यक्रममा बोल्दै व्यवस्था र राष्ट्रियतामाथि भइरहेको षड्यन्त्रप्रति जनतालाई सचेत गराउन अब ढिला गर्न नहुने बताए ।

उनले भने, ‘नेपालको राष्ट्रिय राजनीतिमा भएको कुप्रति जनतालाई सचेत गराउँदै हामीले खबरदारी गर्न अब विलम्ब गर्नु हुँदैन । षड्यन्त्र जारी रह्यो भने त्यसका निम्ति प्रतिवाद गर्नको निम्ति एमालेसँग आबद्ध जनवर्गीय संगठन, जनप्रतिनिधि र पार्टीका लाखौँ सदस्य पनि सडकमा उत्रिन तयार हुनुपर्छ ।’ उनले जेनजी आन्दोलनको लागि आगजनी र तोडफोडमा संलग्नहरूलाई छानबिन गरेर कारबाही गर्न माग गरेका छन् । प्रधानमन्त्रीबाट केपी ओलीले राजीनामा दिएपछि पनि तोडफोड र आगजनी भएको भन्दै केपी ओलीविरुद्ध भ्रम फैलाइएको जिकिर गरे ।

‘एमालेलाई एकता चाहिएको छ, पुनर्गठनको बहस असान्दर्भिक’
एमालेका स्थायी कमिटी सदस्य एवं जनसंगठन समन्वयका प्रमुख भानुभक्त ढकालले पार्टीलाई चौतर्फी आक्रमण भइरहेका बेला पार्टीभित्र पुनर्गठनको बहस उठाउनु असान्दर्भिक भएको बताएका छन् । ढकालले एमालेमा नेतृत्वको गठन र पुनर्गठन भइरहने भएकोले यसको पनि उचित फोरमबाट निर्क्याैल हुने जिकिर गरे ।

‘एमालेमा नेतृत्वको गठन र पुनर्गठन स्वाभाविक हो । यो हुन्छ नै तर अहिले बैरीले आक्रमण गरेका बेला एकता चाहिन्छ । यस्तो विषय पार्टीको महाधिवेशन वा केन्द्रीय कमिटीले किनारा लगाउन सक्छ । तर, अहिले पार्टीभित्र एकताको खाँचो छ’, ढकालले भने । पार्टी पुनर्गठनका नाममा अनेक प्रकारका प्रचारबाजी गर्नु उपयुक्त नभएको उनको भनाइ थियो । भदौ २०–२२ को दोस्रो विधान महाधिवेशनले तय गरेको बाटोमा जेन–जी आन्दोलनले उठाएका सही एजेण्डालाई पार्टीले समेट्ने ढकालले बताए ।

काठमाडौं । नेकपा एमाले अध्यक्ष तथा निवर्तमान प्रधानमन्त्री केपी शर्मा ओलीले आफ्नो पासपोर्ट रोकेको, उपत्यका छोड्न रोक लगाएको विषयमा आपत्ति जनाउँदै आफू प्रधानमन्त्री सुशीला कार्कीसँग डराएर नभाग्ने चेतावनी दिएका छन् । उनले आफूलाई पक्राउ गर्ने लगायतका विषय उठाएर गृहमन्त्री ओमप्रकाश अर्याललाई धेरै नउत्ताउलिन चेतावनी दिए । उनले देश चलाउने ठट्टा नभएकाले ख्याल गर्न उल्लेख गरे । उनले भक्तपुरमा आयोजित कार्यक्रममा सम्बोधन गर्दैन सडकमा तमासा गरिरहेको टिप्पणी गरे ।

‘पासपोर्ट रोक्का रे । डाँडो काट्न नहुने रे । सुशीला कार्कीको डरले केपी ओली भाग्छ ?,’ उनले भने, ‘हुन त म अहिलेका गृहमन्त्रीलाई चिन्दिनँ । तर म गृहमन्त्री बाबुलाई धेरै नउत्तालिन र नचम्किन सुझाव दिन चाहन्छु । राजनीति चलाउने, देश चलाउने ख्याल ठट्टा होइन ।’

उनले आफू देशको स्वाभिमानका लागि बलिदान दिन तयार रहेकाले एमालेलाई नजिस्क्याउन चेतावनी दिए । ‘हामी जेल नेल भोगेर आएका हौं । हाम्रा लागि यो नयाँ कुरा होइन,’ उनले भने, ‘देशको स्वाभिमानका लागि बलिदान दिन तयार छौं हामीलाई जिस्काइरनु पर्दैन । हामीले जनताको शासन भनेर ल्याएका हौ । लडेका हौं ।’

ओलीले अहिलेको सरकार बलमिच्याइँले बनेको टिप्पणी गरेका छन् । भक्तपुरमा आयोजित कार्यक्रममा उनले सुशीला कार्की नेतृत्वको सरकार संविधान अनुसार नबनेको दाबी गरे । उनले भने, ‘अहिलेका प्रधानमन्त्रीले प्रधानमन्त्री बन्नका लागि शर्त राख्नु भयो–संसद् विघटन भए मात्रै बन्छु, नत्र देशमा जेन–जीले आगो बाल्छन् । लोकतन्त्रको जग भत्काउने शर्तमा प्रधानमन्त्री हुनुभयो ।’ संविधानभन्दा बाहिर गएर प्रधानमन्त्री बन्नको लागि कार्की २३ र २४ गते जेन–जी बनेर सडकमा उत्रिएको ओलीले टिप्पणी गरे । राष्ट्रपतिले फागुन २१ चुनाव गर्न भनेर तोकिदिएको बताए ।

‘संसद पुनर्स्थापनाको विकल्प छैन, कांग्रेस पनि यही बाटोमा उभिन्छ’
एमालेका अध्यक्ष केपी ओलीले देशलाई सही बाटोमा ल्याउन असंवैधानिक ढङ्गले विघटन गरिएको संसद् पुनर्स्थापनाको माग लिएर अघि बढ्नुको विकल्प नभएको बताएका छन् । भक्तपुरमा आयोजित कार्यक्रममा बोल्दै तत्काल संसद् विघटन फिर्ता गर्ने माग लिएर अघि बढ्ने बताए । उनले भने, ‘मलाई विश्वास छ, कांग्रेसले पनि यही बाटोमा आफूलाई उभ्याउनेछ । अरू पार्टीहरू पनि यही बाटोमा अघि बढ्छन् । देशलाई लोकतान्त्रिक बाटोमा फर्काउन अरू बाटो छैन ।’ उनले असंवैधानिक बाटोलाई समर्थन गरेर अघि बढे देश र संविधान अफ्ठेरोमा पर्ने बताए ।

काठमाडौं । नेकपा एमालेका स्थायी कमिटी सदस्य राजन भट्टराईले मुलुकलाई अफगानिस्तानको बाटोमा लैजाने प्रयास भइरहेको बताएका छन् । भक्तपुरको गुन्डुमा आज (बिहीबार) आयोजित कार्यक्रममा उनले २३ भदौको घटना कास्टिङ मात्रै भएको बताए । मुलुकलाई जोगाउन एमाले एकताबद्ध हुनुपर्ने उनले बताए ।

यदि पार्टीभित्र एकताबद्ध नहुने हो भने मुलुक अफगानिस्तानको बाटोमा जाने भट्टराईले बताए । ‘यो मुलुक अफगानिस्तानको बाटोमा जानेछ, सुडान र युक्रेन बन्न सक्छ,’, उनले भने । भट्टराईले पार्टी नेतृत्वविरुद्ध विपक्षीले निकालेको निष्कर्षलाई प्रश्रय दिने काम गर्न नहुने पनि बताए ।

काठमाडौं । नेकपा एमालेका अध्यक्ष केपी शर्मा ओलीले अहिले देशको परिस्थिति असाधारण र असामान्य रहेको दाबी गरेका छन् । आज (बिहीबार) भक्तपुर जिल्ला कमिटीले आयोजना गरेको कार्यक्रमलाई सम्बोधन गर्दै ओलीले अहिलेको सरकार संविधानअनुसार नभई बलमिच्याइँले बनेको बताए ।

‘अहिले देशको परिस्थिति असाधारण र असामान्य रहेको छ, किनभने अहिले देशमा सरकार छ, अहिलेको सरकार संविधानअनुसार बनेको छैन । बलमिच्याइँले बनेको सरकार छ । उनले थपे, ‘अहिलेका प्रधानमन्त्रीले प्रधानमन्त्री बन्नका लागि शर्त राख्नु भयो । तुरुन्तै संसद् भंग गर्ने सिफारिस गर्छु । त्यो सिफारिस लागु गर्नुपर्छ र संसद भंग गर्ने हो भने प्रधानमन्त्री हुन्छ । नत्र जेन्जीले देशमा आगो बाल्छ ।’ उनले थपे, ‘संसद भंग गर्ने पूर्व शर्त राखेर सर्वोच्च, सार्वभौम सत्ता जनताको सर्वोच्च संस्था संसद र लोकतन्त्रको जग भत्काउने शर्तमा सुशीला कार्की प्रधानमन्त्री बन्नुभयो ।’

ओलीले भने, ‘कार्कीलाई राम्ररी थाहा छ । नेपालको संविधानको व्याख्या गरेर आएको मान्छे हो । के–के व्याख्या गर्नुभयो त्यो छोडौं तर नेपालको संविधानले स्पष्ट रुपमा भन्छ । प्रधानन्यायाधीश भइसकेको व्यक्ति कुनै पनि सरकारी लाभका पदमा बस्न सक्दैन । प्रधानमन्त्री मन्त्रीको कुरा छौडौं । तर उहाँ सुरिनु भयो । त्यो सुरिन २३ र २४ गते जेनजी भनेर सडकमा उत्रनु भयो । उहाँ के कामका लागि उत्रनु भयो ? चुनाव गराउन भन्ने त राष्ट्रपतिले तोकिदिएको म्याण्डेट हो । उहाँहरुको होइन ।’ उनले प्रधानमन्त्री हुनकै लागि कार्की २४ गते दिउँसो नै सडकमा उत्रिएको बताए ।

काठमाडौं । नेकपा एमाले महासचिव शंकर पोखरेलले सरकारले राजनीतिक दलहरुलाई साइड लगाएर असोज १८ पछि तत्कालीन राजा ज्ञानेन्द्र शाहले गरेको जस्तै चुनाव गर्न खोजेको आरोप लगाएका छन् । ‘जबरजस्ती गरिने चुनाव असोज १८ पछि पूर्व राजाले गरेको नाटक जस्तै हुन्छ’ उनले भक्तपुरमा आज (बिहीबार) आयोजित एमालेको कार्यक्रममा उनले भने,’ जबसम्म राजनीतिक वातावरण बन्दैन तबसम्म चुनाव भयो भयो त्यसले मान्यता पाउँदैन ।’

उनले चुनावका लागि सबैभन्दा पहिलो जिम्मेवारी शान्ति सुरक्षाको वातवरण बनाउनु पर्ने बताएका छन् । ‘प्रहरीले शान्ति सुरक्षाको सम्पूर्ण जिम्मा नलिँदासम्म चुनाव हुन सक्दैन’ उनले भने,’ चुनावका लागि सुरक्षा निकायको मनोबल उठाउनु पर्छ अनि दलहरु दलहरुको विश्वास जित्नुपर्छ ।’ उनले भूमिगत गिरोहलाई ल्याउन राजनीतिक दललाई साइड लगाएर ज्ञानेन्द्र शाहको जस्तो चुनाव गराउन खोज्दैछ । ‘यो सरकार चुनाव गराउन चाहन्छ भन्ने भ्रम मात्र हो’ उनले भने ।

‘केपी ओलीले नै बानेश्वरमा गएर हतियार चलाएको जस्तो कुप्रचार गरियो’
नेकपा एमालेका महासचिव शंकर पोखरेलले एमालेलाई जनताको मनबाट कसैले हटाउन नसक्ने दाबी गरेका छन् । उनले षड्यन्त्रकारीहरूको षड्यन्त्रले सरकारबाट बाहिरिन परे पनि जनताको हृदयबाट कसैले हटाउन नसक्ने जिकिर गरे । उनले भने, ‘सरकारबाट हामी हट्नु पर्‍यो, तर हामीले गरेको कामको कारणले जनताको मन मस्तिष्कबाट हामी हट्न सक्दैनौं । हामी सत्य कुरा लिएर फेरि जनतामा जानेछौं । जनताको बीचमा गएर हामी राष्ट्रका बीचमा भएका षड्यन्त्रको जानकारी गराउनेछौँ ।’
उनले जनताको बीचमा गएर संविधानवादको युगतर्फ देशलाई फर्काउने बताए । उनले २३ गतेको घटनामा पार्टी अध्यक्ष केपी ओलीले नै बानेश्वरमा गएर हतियार चलाएको जस्तो कुप्रचार गरिरहेको टिप्पणी गरेका छन् ।

काठमाडौं । नेकपा एमालेका महासचिव शंकर पोखरेलले जेनजी नेपाली समाजको परिचय नभएको बताएका छन् । आज (बिहीबार) भक्तपुरमा आयोजित एमालेको कार्यक्रमलाई सम्बोधन गर्दै उनले पश्चिमाले थोपरिदिएको परिचय भएको जिकिर गरे । ‘जेनजी हाम्रो परिचय होइन, पश्चिमाले हामीलाई थोपरिदिएको परिचय हो भन्ने बुझ्नु पर्दछ,’ पोखरेलले भने, ‘हाम्रो परम्परा, हाम्रो संस्कृति, हाम्रो समाजलाई खलबल्याएर कसरी विभाजित गर्न खोजिदै छ भन्ने कुरा पुस्ता विभाजन गर्ने पश्चिमा रणनीतिले पनि बुझाइरहेको छ ।’

समाज चलाउन सबै पुस्ताको संयोजन आवश्यक रहेको भन्दै पूर्वीय दर्शनले पनि त्यही भन्ने उनले उल्लेख गरे । ‘समाज चलाउने भनेको कुनै एउटा पुस्ताको लहडको विषय होइन, समाज चलाउने भनेको अनेक पुस्ताबीचको संयोजन हो,’ पोखरेलले भने, ‘हाम्रो पूर्वीय दर्शनले कुनै पनि समाजलाई सुव्यवस्थित गराउने हो भने चार पुस्ताको संयोजन आवश्यक हुन्छ भन्छ ।’

पोखरेलले भने, ‘२३ गतेको आन्दोलन एउटा सामाजिक सञ्जाल खुला गर्नुपर्ने र दोस्रो माग भ्रष्टाचार अन्त्य हुनुपर्ने । हाम्रो पुस्ता साइबर र सोसल मिडियामा उनीहरुको लगाब छ । तर सरकारले सामाजिक सञ्जाल बन्द गरेको थिएन । सोसल मिडिया दूरुपयोग भइरहेकाले उनीहरुलाई नेपालमा दर्ता गर्न खोजेको थियो । तर भ्रम सिर्जना गरेर युवालाई उत्तेजित बनाइयो । त्यो आन्दोलनमा पनि ३४ प्रतिशत फेक एकाउन्ट बनाएर आन्दोलनलाई उत्तेजक बनाउन भूमिका खेलेको अन्तर्राष्ट्रिय रिपोर्ट आइरहेको छ ।’

पोखरेलले नेपाल प्रहरी भीड व्यवस्थापनमा सक्षम रहे पनि २३ गते प्रहरी अधिकारी नै कसरी त्यस्तो हुन पुग्यो चकित बनेको र त्यो अवस्था सिर्जना भएको देखिएको उनले बताए । पोखरेलले १० वर्ष माओवादी आन्दोलनमा नभएको क्षति एक दिनमा भएको दाबी गरे । उनले अपराधीलाई दण्डित गर्न एमाले तयार रहेको छ ।

काठमाडौं । नेकपा (एमाले) का पोलिटब्युरो सदस्य महेश बस्नेतले अध्यक्ष केपी शर्मा ओलीलाई छोएमा देशभर आगो बल्ने चेतावनी दिएका छन् । आज (बिहीबार) भक्तपुरको गुण्डुमा आयोजित कार्यक्रममा बस्नेतले ओलीलाई छोए देशभर आगो बल्ने चेतावनी दिएका हुन् ।

‘केपी ओली पञ्चायतसँग र राजासँग लडेको आएको हो । अहिलेका नौटंकीले च्यालेन्ज गरेका छन्,’ बस्नेतले भने, ‘मैले हिजो पनि भनेको थिएँ, केपी ओलीलाई छोए देशभर आगो बल्ने छ ।’ एमाले अध्यक्ष एवं तत्कालीन प्रधानमन्त्री ओली, गृहमन्त्री रमेश लेखक र आफूलाई पक्राउ गर्न सरकारले योजना बनाएको भन्दै बस्नेतले एमालेसँग नजिस्किन चेतावनी दिए ।

बस्नेतले असोज २५ गते काठमाडौंमा युवा संघले प्रदर्शन गरेर एमालेको शक्ति देखाउने बताए । अहिलेको सरकारले भ्रष्टाचारीलाई कारबाही गर्ने भए कुलमान घिसिङबाट छानबिन शुरू गर्न उनले चुनौती दिए । ‘नेपालको नम्बर वान भ्रष्टाचारी कुलमानबाट छानबिन गर्नुस्, हामी छानबिनको दायरामा आउन तयार छौं,’ बस्नेतले भने । उनले पञ्चायत र राजतन्त्रविरुद्ध लडेका एमालेहरू छाती फर्काएर नहिँड्ने उल्लेख गरे । ‘तिमीहरुको एक–एक हिसाब हुन्छ’ उनले भने । अपराधीलाई कारबाही गर्न उनले गृहमन्त्रीको ध्यानकर्षण गराए ।

उनले अब एमालेले डिजीटल जेनरेसन फोर्स बनाएर देशव्यापी रुपमा उजुरी दिने त्यसको आधारमा कारबाही गर्न अनुरोध गरे । उनले भ्रष्टाचारको छानबिन गर्ने भए वर्तमान मन्त्रीहरू रामेश्वर खनाल र कुलमान घिसिङबाट सुरु गर्ने आग्रह गरेका छन् । उनले जेनजी आन्दोलनका क्रममा घरजलेका अध्यक्ष केपी शर्मा ओलीलाई गुण्डुवासीले जग्गा उपलब्ध गराउने जानकारी दिए । ‘तपाईं आउनुहोस् हामी स्थायी बसोबासका लागि जग्गा उपलब्ध गराउँछौं ।’

भक्तपुर । नेकपा एमालेका अध्यक्ष तथा निवर्तमान प्रधानमन्त्री केपी शर्मा ओलीले विशेष सम्बोधन गर्ने भएका छन् । पार्टीको जिल्ला कमिटी भक्तपुरले सूर्यविनायक नगरपालिका– ७ गुण्डुमा आयोजना गरेको ओलीले विशेष कार्यक्रमलाई सम्बोधन गर्नेछन् । अध्यक्ष ओलीले पछिल्लो समय देशमा उत्पन्न असामान्य परिस्थिति र नेता कार्यकर्ताहरुले निर्वाह गर्नुपर्ने भूमिकाका बारेमा स्पष्ट पारेका हुन् ।

कार्यक्रममा पार्टी महासचिव शंकर पोखरेललगायत पार्टीका विभिन्न तहका नेताहरु पनि सहभागी हुने भक्तपुर जिल्ला कमिटीका अध्यक्ष बचन देउजाले जानकारी दिए। भक्तपुर जिल्ला कमिटीले बिहान ११ बजे भेटघाट कार्यक्रमको आयोजना गरेको छ । प्रधानमन्त्रीबाट राजीनामा दिएपश्चात अध्यक्ष ओलीले दसैं अगाडि युवा संघले आयोजना गरेको शुभकामना आदानप्रदान कार्यक्रममा सहभागी भएका थिए ।

काठमाडौं । नेकपा एमालेका नेता महेश बर्तौलाले राज्यविरुद्धको अपराधमा वर्तमान गृहमन्त्री ओमप्रकाश अर्याललाई तत्काल गिरफ्तार गरेर कारबाही गरिनु पर्ने बताएका छन् । आज (बिहीबार) बिहान सामाजिक सञ्जालमार्फत उनले गृहमन्त्री अर्याल व्यक्तिका घर, व्यावसायिक भवन तोडफोड, आगजनी र लुटपाट गर्न लगाउने कामका उत्प्रेरक रहेको दाबी गर्दै उनले गृहमन्त्रीलाई गिरफ्तार गर्नुपर्ने बताएका हुन् ।

‘प्रहरीबाट लुटिएका हतियारहरु (बन्दुक र गोली) कहाँ र को सँग छ भन्ने सूचना र जानकारी अहिलेका गृहमन्त्रीलाई शतप्रतिसत रहेको हुनु पर्दछ । किनभने भ्रष्टाचारको अन्त्य र सुशासनको जायज मागसहित जेनेरेसन जेडले गरेको शान्तिपूर्ण आन्दोलनभित्र सुनुयोजित घुसपैठ गरि शान्ति भङ्ग गर्ने, हिंसा भड्काउने र विध्वंस मच्चाउने कामको यिनी चौबिसै क्यारेटका स्टेकहोल्डर हुन,’ बर्तौलाले फेसबुकमा लेखेका छन्, ‘हाम्रो इतिहास, सम्पदा र दस्तावेज छानीछानी नष्ट गर्ने, ब्यक्तिका घर, ब्यवसायिक भवनहरु तोडफोड, आगजनी र लुटपाट गर्न लगाउने कामका उनी प्रायोजित उत्प्रेरक समेत हुन् ।’

बर्तौलाले अर्याल सिंहदरबार, संसद् भवन, सर्वोच्च अदालत, अख्तियार भवन र प्रहरी चौकी लगायतमा आगो लगाएर ध्वस्त बनाउन नेपाल राष्ट्रका बिरुद्ध परिचालित र निर्देशित मतियार समेत भएको आरोप लगाएका छन् । ‘शुद्ध नेपाली जेनजीहरुले पनि यो कुरा बुझुन् कि शान्तिपूर्ण आन्दोलनभित्र उनको घुसपैठको यही नाता सम्बन्ध रहेकै कारण उनले थोरै पनि मिहिनेत नगरिकनै गृहमन्त्री पद सजिलै हत्याउन सफल भए र शपथ ग्रहण लगत्तै माथि उल्लेखित फौजदारी अपराध प्रकरणमा संलग्न दोषी र अपराधीहरूलाई प्रयाप्त प्रमाण रहँदारहँदै पनि कानुनी कारवाही नगर्न लिखित निर्देशन नै दिए,’ बर्तौलाले भनेका छन्, जसका कारण अहिले मुलुकमा अराजकता, दण्डहिनता र जघन्य प्रकृतिका आपराधिक घटनाहरु ह्वात्तै बढेर गएको छ । त्यसैले सतहमा उद्घाटित यी सबै गम्भीर तथ्यहरुका आधारमा देशलाई भयानक क्षति र शोकमा डुबाउने योजनाकारका रुपमा रहेका अहिलेका गृहमन्त्रीलाई पदबाट बरखास्त गरी राज्य बिरुद्धको अपराधमा तत्काल गिरफ्तार गरी अनुसन्धान प्रकृया अगाडी बढाइनु पर्छ ।’

काठमाडौं । नेकपा एमालेका प्रमुख सचेतक महेश बर्तौलाले वर्तमान गृहमन्त्री ओमप्रकाश अर्याल ‘प्रतिशोध’ को गृहमन्त्री बनेको आरोप लगाएका छन् । उनले वर्तमान सरकारका गृहमन्त्री प्रतिशोध, झूट, भ्रम र बेइमानका सेवक भएको आरोप लगाएका हुन् । गृहमन्त्रीमाथि व्यक्तिगत र संस्थागतस्तरमा दबाब, डर र आतंक सिर्जना गर्ने योजनामा केहि व्यक्तिहरु सीधै संलग्न रहेको दाबी गर्दै बर्तौलाले सोहीका आधारमा गृहमन्त्रीको अभिव्यक्तिहरु आइरहेको बताएका हुन् ।

नेता बर्तौलाले गृहमन्त्री आफैं केही समूह र व्यक्तिलाई प्रयोग गरी सार्वजनिक शान्ति भङ्ग गर्ने, अनधिकृत र अराजक गतिविधि सञ्चालन गराउन उक्साउँदै आएको आरोप लगाए । राज्यका महत्वपूर्ण अंगका पदाधिकारी तथा सुरक्षा निकायका राष्ट्र सेवकहरूलाई धम्क्याउने र तिनको मनोबल तल झार्ने प्रयत्न भइरहेको नेता बर्तौलाको आरोप छ । अख्तियार दुरुपयोग अनुसन्धान आयोग र सर्वोच्च अदालत जस्ता स्वतन्त्र संस्थाका नेतृत्व हटाउन दबाब सिर्जना गराउने, मिडिया ट्रायल र प्रायोजित भ्रम फैलाउने सामाजिक सञ्जालमा अभियान सञ्चालन गराउने क्रम चलिरहेको उनको दाबी छ ।

पूर्व प्रधानमन्त्री तथा केही मन्त्रीविरुद्ध झुठो तथा षड्यन्त्रपरक मुद्दा दर्ता गराउने, जेलभित्रका घटनाहरूको छानबिन प्रक्रिया प्रभावित पार्ने लगायतका कृत्यमा समेत गृहमन्त्रीको भूमिका रहेको नेता बर्तौलाको आरोप छ । उनले भनेका छन्, ‘देश र जनताको जिउधनको सुरक्षा जिम्मेवारी लिएर बसेको गृहमन्त्री आफैले भय, त्रास र प्रतिशोधको साम्राज्य खडा गरी शासन चलाउने सोचमा रहेको देखिन्छ ।’ उनले यस्ता क्रियाकलापले देशका लागि दीर्घकालीन नकारात्मक परिणाम ल्याउने चेतावनी समेत दिएका छन् । उनले लोकतान्त्रिक मूल्य र न्याय प्रक्रिया र स्वतन्त्रताको रक्षा गर्न आवश्यक कदम चाल्न सरकारसँग आग्रह समेत गरेका छन् ।

काठमाडौं । नेकपा एमालेका नेता महेश बस्नेतले काठमाडौंका मेयर बालेन शाहको योजनामा ‘हामी नेपाल’ का संयोजक सुदन गुरुङ आफूलाई पक्राउ गराउन हिंडेको आरोप लगाएका छन् । पार्टी कार्यालय च्यासलमा आज (बुधबार) पत्रकार सम्मेलन गर्दै उनले बालेनकै योजनामा आफूसहित केपी ओली र रमेश लेखकलाई पक्राउ गर्नुपर्छ भनेर दबाब अभियान चलाइएको जिकिर गरे ।

उनले भने, ‘हामीलाई पक्राउ गर्नुपर्छ भनेर सोसल मिडियामा ट्रेन्ड चलाउँछन् । प्रधानमन्त्री र गृहमन्त्रीको सल्लाहमा डेलिगेसन जान्छन् ।’ सुदनलाई विदेशीलाई एजेन्टको रूपमा प्रयोग गरेर सरकारी उच्च तहको बैठकमा समेत पठाएको उनको दाबी छ । उनले जेनजी आन्दोलनको क्रममा भएको घटनाको निष्पक्ष छानबिन र दोषीलाई कारबाही गर्न माग गरेका छन् । उनले रवि लामिछानेलाई जेलबाट छुटाउन नख्खु कारागार पुगेका डिपी अर्याल, मनिष झा, ज्वाला संग्रौलालगायतमाथि पनि छानबिन गर्न माग गरेका ।

उनले भदौ २३ को घटनाको निष्पक्ष छानबिन हुनुपर्ने र त्यसमा सहयोग रहने बताउँदै अन्य घटनको पनि छानबिन माग गरे। ‘२३ गते मृत्यु भएको सन्दर्भमा जुन छानबिन समिति बनेको छ, त्यसले निष्पक्ष छानबिन गरोस्। निष्पक्ष छानबिन गर्नुहोस्, दोषी जो हुन्छ, त्यसलाई कारबाही गर्नुहोस्। हाम्रो पूर्ण समर्थन रहन्छ,’ बस्नेतले भने, ‘तर, आन्दोलनको नाममा सेनाको ज्याकेट लगाएर सार्फसुटर प्रयोग भएको छ कि छैन? त्यसको पनि छानबिन प्रयोग होस्। रवि लामिछानेलाई कारागारबाट मुक्त गराउने गएकाहरुको पनि छानबिन होस्।’

‘देशमा केही भएन भन्ने भाष्य विश्वप्रकाशले सुरू गरे, प्रचण्डले घ्यू थपे’
एमालेका नेता महेश बस्नेतले व्यवस्था परिवर्तन भए पनि अवस्था परिवर्तन भएन भन्ने भाष्य नेपाली कांग्रेस महामन्त्री विश्वप्रकाश शर्माले सुरू गरेको आरोप लगाएका छन् । यो भाष्य विश्वप्रकाशले सुरू गरेर माओवादीका अध्यक्ष प्रचण्डले त्यसमा घ्यू थपेको जिकिर गरे ।

उनले भने, ‘पछिल्लो समय रवि लामिछानेहरू ‘नो नट अगेन’ को नारा लिएर आउनु भयो । अरू शक्तिहरू पनि आए, स्वभाविक ढङ्गले मुलुक अघि बढेको भए पनि भ्रमको खेती सिर्जना गरियो ।’ उनले २३ र २४ गतेको जेनजी आन्दोलन हाइज्याक भएको पनि दाबी समेत गरेका छन् ।

काठमाडौं । नेकपा एमालेका महासचिव शंकर पोखरेलले निर्णायक राष्ट्रिय शक्ति निर्माणको औचित्य बढेर गएको बताएका छन् । आज (बुधबार) बिहान सामाजिक सञ्जालमार्फत उनले थपिएका नयाँ चुनौतीको सामना गर्नको लागि निर्णायक राष्ट्रिय शक्ति निर्माणको औचित्य अझ बढेर गएको उल्लेख गरेका हुन् ।

‘निर्णायक राष्ट्रिय शक्ति निर्माणको औचित्य अझ बढेर गएको छ,’ सामाजिक सञ्जाल फेसबुकमा उनले लेखेका छन्, ‘राष्ट्रसामु नयाँ चुनौती अवश्य थपिएका छन्, तर सामना गर्नुको विकल्प छैन ।’

काठमाडौं । नेकपा एमालेमा महासचिव शंकर पोख्रेलले राजनीति र समाज व्यवस्था कुनै एक पुस्ताको मात्र विषय नभएको बताएका छन् । ‘पूर्वीय दर्शनले मानव समाजलाई चार पुस्ताको संयोजन मान्दछ’ सामाजिक सञ्जालमा उनी लेख्छन्, ‘राजनीति र समाज व्यवस्थाको विषय कुनै एक पुस्ताको मात्र विषय होइन, हुन सक्दैन ।’

खास समयमा देखिने असन्तोष र विद्रोह आफ्नो ठाउँमा रहेको उल्लेख गर्दै उनी थप्छन्, ‘समाज र राजनीतिले नयाँ पुस्ताको आकांक्षालाई सम्बोधन गर्ने प्रयास गर्नुपर्छ । तर त्यही नै समाज र राजनीतिको अबको बाटो हो भनेर भ्रमित हुनु हुँदैन ।’

काठमाडौं । नेकपा एमालेका महासचिव शंकर पोखरेलले देश भू–राजनीतिक द्वन्द्वको चपेटामा परेको टिप्पणी गरेका छन् । तर, देशलाई ढिलोचाँडो लोकतन्त्रको जनसार्वभौम बाटोतिर फर्काइने उनले बताएका छन् ।

आज (सोमबार) बिहान सामाजिक सञ्जाल फेसबुकमा एक टिप्पणी सार्वजनिक गर्दै उनले एमाले निर्णायक राष्ट्रिय शक्ति निर्माण गर्दै नेपाली विशेषतामा आधारित समाजवाद निर्माणको दिशामा अघि बढ्न प्रतिवद्ध रहेको जनाएका छन् । सबै समस्याको समाधान लोकतान्त्रिक बाटोबाट खोज्न सकिन्छ भन्ने कुरामा नव युवाहरूको विश्वास जित्न नसकिएको पोखरेलले स्वीकार गरेका छन् ।

‘उनीहरूको भावना र चाहनासँग नेपाली राजनीतिलाई जोड्न सकेनौं । तर, यसको अर्थ नेपाललाई बहुलवाद, समावेशीता, लोकतान्त्रिक गणतन्त्र र स्वाधीनता एवम् स्वाभिमानको बाटोबाट पछि धकेल्ने प्रयास सफल हुन्छ भन्ने होइन’, पोखरेलले लेखेका छन् ।

नेपालको राष्ट्रिय शक्तिलाई कमजोर बनाउने विदेशीको खेलबाट देशलाई जोगाउन नसकिएको पोखरेलको भनाइ छ । ‘हाम्रो देश पनि वैध सत्तालाई कमजोर बनाउने डिप स्टेटको प्रयोगशाला बनाइयो’, पोखरेलले लेखेका छन् ।

काठमाडौं । जेनजी आन्दोलनपछि आज (आइतबार) पहिलो पटक नेकपा एमालेको सचिवालय बैठक बस्दैछ । अध्यक्ष केपी शर्मा ओलीको आह्वानमा आज दिउँसो १ बजे भक्तपुरको गुन्डुस्थित ओलीको डेरामै सचिवालय वैठक बस्ने भएको हो ।

बैठकमा आगामी रणनीतिबारे छलफल हुने बताइएको छ । जेनजी आन्दोलनपछि पूर्व प्रधानमन्त्री ओलीले शनिबार पार्टीको भ्रातृ संगठन राष्ट्रिय युवा संघले आयोजना गरेको दशैं भेटघाट कार्यक्रममा उपस्थित भएर पहिलो पटक सार्वजनिक भाषण दिएका थिए ।

उनले सुशीला कार्की नेतृत्वको वर्तमान नागरिक सरकार जनताको अभिमतबाट नभई तोडफोड र आगजनीका माध्यमबाट बनेको भनी आलोचना गरेका थिए । उनले देशलाई अघि बढाउने पार्टी एमाले नै भएको जिकिर समेत गरेका थिए ।

गत भदौ २३ र २४ गतेको जेनजी आन्दोलनका कारण प्रधानमन्त्री पदबाट राजीनामा दिन बाध्य भएका ओली त्यसबेलादेखि नेपाली सेनाको सुरक्षामा थिए । त्यसको ९ दिनपछि यही असोज २ गते सेनाको ब्यारेकबाट बाहिरिएर उनी भक्तपुरको गुन्डुस्थित डेरामा सरेका हुन् ।

काठमाडौं । नेकपा एमालेका नेता महेश बस्नेतले केपी ओलीलाई प्रधानमन्त्रीबाट हटाउनकै लागि मात्रै देशमा ध्वंस मच्याइएको दाबी गरेका छन् ।

भक्तपुरको गुन्डुमा आयोजित युवा संघको कार्यक्रमस्थलमा सञ्चारकर्मीहरूसँग कुरा गर्दै उनले ओलीले प्रधानमन्त्रीबाट राजीनामा दिएपछि देश ध्वस्त बनाइएको टिप्पणी गरे । उनले भने, ‘भ्रष्टाचारविरुद्ध भनेर जेनजी भाइबहिनीहरूलाई उचालियो । तर त्यहाँ ठुलो अन्तर्राष्ट्रिय चलखेल र खुपिया एजेन्सीहरूको समेत लगानी भएको कुरा भएको छ । केपी ओलीले राजीनामा नदिँदासम्म देश जोगिएको थियो । उहाँले राजीनामा दिएपछि देश ध्वस्त पारियो ।’

उनले २३ गते २१ जनाको हत्या भएको विषयमा निष्पक्ष छानबिन हुनुपर्ने र भोलिपल्ट ५४ जनाको हत्या भएको विषयमा पनि बेग्लै छानबिन हुनुपर्ने बताए । उनले आजको शान्तिपूर्ण र सामान्य भेटघाट मात्र आयोजना गरिएको जानकारी दिएका छन् । उनले भने, ‘अहिलेको मन्त्रीहरूले आफूलाई सेलिब्रेटी भनेर घोषणा गर्दै हिँडेका छन् । त्यो खालको देखिँदैन । जनता केही दिनमै पछुताउने छन् ।’

कैलाली । नेकपा एमालेका युवाहरूले पार्टी सुधार र पुनर्गठनका लागि ‘पार्टी रिफर्म रिभोल्युसन’ अभियान थालेका छन् । ‘पार्टी रिफर्म रिभोल्युसन’ नाम दिइएको उक्त अभियानको उद्देश्य पार्टीभित्रको विकृतिप्रति खबरदारी गर्दै नयाँ गति दिने रहेको संलग्न युवाहरूले जानकारी दिएका छन् । आत्मालोचना बिना रुपान्तरण सम्भव नभएको भन्दै उनीहरूले सुधारको बाटो खोजीका लागि आव्हान गरेका छन् ।

निर्वाचनमा टिकट वितरणदेखि अवसरसम्म योग्य व्यक्तिको तुलनामा पैसा र आफन्तको मोह बढी प्रभाव जमाउने गरेको भन्दै आगामी दिनमा त्यस्तो नहोस् भन्नका लागि यो अभियान सुरू गरिएको अनेरास्ववियु प्रदेश संयोजक रोहित बोगटीले जानकारी दिए । ‘हामीले पार्टीको विरोध वा नेतृत्वको विकल्प खोजेका होइनौँ, तर गलत प्रवृत्तिको अन्त्य गर्नुपर्छ भन्ने हाम्रो माग हो,’ उनले भने, ‘अहिले कैलालीबाट सुरु गरेका छौँ । हामी सबै जिल्लामा यो अभियानमा युवाहरूलाई जोडिरहेका छौँ ।’

एमालेमा भ्रष्टाचारको अभियोग लागेकाहरू, सामाजिक रूपमा अयोग्य ठहरिएका र नैतिक आचरणविपरीतका क्रियाकलापमा संलग्नलाई कारबाही हुनुपर्ने उनीहरूको माग छ । ‘लामो समयदेखि एउटै व्यक्तिलाई अवसर दिनु हुँदैन भन्ने हाम्रो माग हो,’ बोगटीले भने, ‘पार्टीको आन्तरिक निर्वाचनदेखि आम निर्वाचनसम्म पनि खर्चिलो भइरहेको छ, त्यसलाई रोक्नु पर्छ ।’

उनले पार्टीविरुद्ध भएको आन्दोलनपछि फेरि उठेका विभिन्न राष्ट्रका घटनाक्रमलाई अध्ययन गर्दै पार्टीलाई क्रियाशील र गतिशील बनाउन तथा पुनः जनताको लोकप्रिय पार्टी बनाउन अध्ययन सामग्री पनि तयार भइरहेको बताए । त्यो सुझावले पनि एमालेलाई अझ बलियो र लोकप्रिय बनाउन मद्दत गर्ने उनको विश्वास छ ।

विमानस्थलदेखि कार्यक्रम स्थलसम्म पार्टी नेताहरूलाई गरिने जयजयकार अन्त्य गरी सादा, सरल र उपयुक्त कार्यक्रम बनाउनुपर्ने अभियानमा लागेको युवाहरू बताउँछन् । ‘पछिल्लो समय पार्टीभित्रका गतिविधिका कारण समाजमा पार्टीप्रति केही वितृष्णा पैदा भएको छ । बहुदलीय व्यवस्थामा पार्टी नै प्रधान हुन्छन् । तर, पार्टीभित्रका केही गलत परम्परा अन्त्य गर्न आवश्यक छ,’ उनले भने, ‘अहिले हामीले एमालेभित्र यो अभियान सुरु गरेका छौँ, पछि सबै पार्टीभित्र यस्तो अभियान ल्याउन आवश्यक छ ।’

एमालेका केही नेताहरू, विद्यार्थी नेता तथा युवाहरू सक्रिय रूपमा यो अभियानमा जोडिएका छन् । अहिले उनीहरूले सामाजिक सञ्जालमार्फत नै ‘पार्टी रिफर्म रिभोल्युशन’ अभियान चलाइरहेका छन् । केही समयपछि विभिन्न अन्तरक्रियामार्फत यसलाई अझ व्यापक रूपमा अघि बढाउने तयारी भइरहेको बोगटीले जानकारी दिए ।