दाङ। नेकपा (एमाले) का महासचिव एवं दाङ क्षेत्र नम्बर २ का उम्मेदवार शंकर पोखरेलले विकास र एमाले एक–अर्काका पर्यायवाची भएको बताएका छन्।
घोराही–१३, भ्यूडरमा आयोजित चुनावी सभालाई सम्बोधन गर्दै उनले राष्ट्रको नेतृत्व गर्न सक्ने सक्षम र अनुभवी पार्टी एमाले मात्र भएको बताए।
उनीले केन्द्रमा एमालेलाई जिताउन नसक्दा दाङ विकासको प्रतिस्पर्धामा पछाडि परेको उल्लेख गर्दै अबको निर्वाचनमा एमालेलाई सशक्त रूपमा जिताउनुपर्ने आवश्यकता औँल्याए। ‘केन्द्रमा एमालेको मजबुत उपस्थिति नभएसम्म दाङले अपेक्षित बजेट, योजना र नीतिगत प्राथमिकता पाउन सक्दैन,’ उनले भने, ‘जिताएमा एमालेले दाङको समृद्धिको नेतृत्व गर्छ।’
पोखरेलले दाङको आर्थिक रूपान्तरणका लागि ३५० विगाह क्षेत्रफलमा औद्योगिक क्षेत्र स्थापना गर्ने योजना अगाडि बढाइने बताए। उद्योग, रोजगारी र उत्पादन वृद्धिमार्फत् दाङलाई आर्थिक रूपमा आत्मनिर्भर बनाउने आफ्नो लक्ष्य रहेको उनको भनाइ थियो।
पर्यटन प्रवद्र्धनतर्फ ध्यान दिँदै उनले बाह्रकुने, ज्यामिरे र मौलाकोटलाई आकर्षक पर्यटकीय गन्तव्यका रूपमा विकास गर्न विशेष पहल गर्ने प्रतिबद्धता जनाए। प्राकृतिक, धार्मिक र ऐतिहासिक सम्भावनालाई उपयोग गर्दै दाङलाई आन्तरिक तथा बाह्य पर्यटकको रोजाइको केन्द्र बनाउने उनले बताए।
आफू मुख्यमन्त्री हुँदा आर्थिक पारदर्शिता, सुशासन र नतिजामुखी विकासलाई प्राथमिकतामा राखेर काम गरेको दाबी गर्दै उनले पूर्वाधार, स्वास्थ्य र शिक्षाका क्षेत्रमा थालिएका योजनाले त्यसको प्रमाण दिने उल्लेख गरे। ‘सुशासन र पारदर्शितासहित काम गर्दा परिणाम देखिन्छ,’ उनले भने, ‘त्यसैले दाङको समृद्धिका लागि सक्षम नेतृत्व आवश्यक छ।’
कार्यक्रममा उनले कार्यकर्ता र समर्थकलाई एकताबद्ध भएर विकासको एजेन्डा घर–घरमा पु¥याउन आह्वान गरेका थिए। स्थानीयस्तरमा उल्लेख्य जनसहभागिता रहेको उक्त कार्यक्रममा विकास र स्थायित्वलाई मुख्य चुनावी मुद्दाका रूपमा प्रस्तुत गरिएको थियो।
तुलसीपुर–१७, मजगाउँमा आयोजित चुनावी सभामा बोल्दै पोखरेलले विकास र समृद्धिको यात्रालाई निष्कर्षमा पु¥याउन सक्षम र प्रभावकारी नेतृत्व आवश्यक रहेको बताएका छन्। उनले अधुरा योजना पूरा गर्न र सुरु भइसकेका आयोजना सम्पन्न गर्न आफूलाई पुनः अवसर दिन मतदातासमक्ष आग्रह गरे।
सभामा बोल्दै उनले भने, ‘दाङको विकास र समृद्धिका लागि शंकर पोखरेल अपरिहार्य छ भन्ने अभियान घर–घरमा पु¥याइदिनुहोस्। अधुरा काम पूरा गर्न र सुरु भएका योजनालाई निष्कर्षमा पु¥याउन सक्षम नेतृत्व आवश्यक छ।’
आफू मुख्यमन्त्री हुँदा दाङमा पूर्वाधार, स्वास्थ्य र शिक्षाका क्षेत्रमा महत्वपूर्ण काम सुरु भएको उल्लेख गर्दै उनले सरकार परिवर्तनसँगै केही आयोजना प्रभावित भएको दाबी गरे। ‘मैले नेतृत्व गर्दा दाङको विकासको आधार तयार भएको थियो। सरकारबाट बाहिरिएपछि केही काम रोकिए, अब ती योजनालाई पुनः गति दिन आवश्यक छ,’ उनले भने।
पोखरेलले घोराही–तुलसीपुर चारलेन सडक आफ्नै पहलमा सुरु भएको उल्लेख गर्दै विजौरी–दहवन हुँदै शहीद मार्ग विस्तार तथा मानपुर–जलकुण्डी सडक स्तरोन्नति जस्ता आयोजना मध्य दाङको विकासका लागि अनिवार्य रहेको बताए।
‘मध्य दाङको समग्र विकासका लागि सडक सञ्जाल मजबुत बनाउनु अपरिहार्य छ,’ उनले जोड दिए।
स्वास्थ्य क्षेत्रतर्फ उल्लेखनीय प्रगति भएको दाबी गर्दै उनले राप्ती स्वास्थ्य विज्ञान प्रतिष्ठानमा एमबीबीएस अध्ययन सुरु हुनु जिल्लाका लागि ऐतिहासिक उपलब्धि भएको बताए।
दाङका अस्पताललाई विशेषज्ञ सेवा दिने स्तरमा विकास गरिएको उल्लेख गर्दै उनले अब प्राविधिक शिक्षा र स्वास्थ्य सेवा जिल्लामै सुदृढ बनाउनुपर्ने धारणा राखे। पोखरेलले काठमाडौँबाट बजेट ल्याउन र नीतिगत निर्णयमा प्रभाव पार्न सक्ने प्रतिनिधि दाङले रोज्नुपर्ने आवश्यकता औँल्याए।
‘काठमाडौँबाट बजेट ल्याउन र नीतिगत निर्णयमा प्रभाव पार्न सक्ने नेतृत्व दाङले रोज्नुपर्छ। समृद्ध दाङ बनाउने लक्ष्यसहित हामी अघि बढेका छौँ,’ उनले भने।
सभामा उनले पार्टी कार्यकर्ता र समर्थकलाई एकताबद्ध भएर विकास, स्थिरता र समृद्धिको सन्देश घर–घरमा पु¥याउन आह्वान गरे। कार्यक्रममा स्थानीय नेता तथा सर्वसाधारणको उल्लेख्य सहभागिता रहेको थियो। एमाले क्षेत्र नं. २ ले मंगलबारदेखि वडास्तरिय जनसभा गर्न सुरु गरेको छ।
गुठी पीडित किसानहरूको समस्या समाधानका लागि आफू तत्पर
यसअघि घोराहीमा स्वर्गद्वारी गुठी पीडित मोही किसान संघर्ष समितिले आयोजना गरेको कार्यक्रममा बोल्दै पोखरेलले गुठी पीडित किसानहरूको समस्या समाधानका लागि आफू सधैं सकारात्मक रहेको बताएका छन्।
मंगलबार सम्पन्न ‘प्रतिनिधिसभा सदस्य उम्मेदवारहरूसँग स्वर्गद्वारी गुठीको जमिनमा मोही अधिकारका लागि संवाद तथा प्रतिबद्धता लेखन’ कार्यक्रममा बोल्दै उनले गुठी समस्या समाधान आफ्नो प्राथमिकतामा रहेको स्पष्ट पारे।
महासचिव पोखरेलले गुठी समस्या समाधानका लागि विधेयकसमेत तयार गरिएको जानकारी दिँदै सम्बन्धित मन्त्रालयको सक्रियता अभावका कारण समस्या समाधानमा ढिलाइ भएको बताए। उनले भने, ‘प्रधानन्यायाधीशको फैसलालाई कार्यान्वयन गर्न नसक्दा काम अघि बढ्न सकेन।’
उनले नेकपा एमाले गुठी पीडित किसानको पक्षमा स्पष्ट रूपमा उभिएको दाबी गर्दै राज्यस्तरबाट समाधान खोज्नुपर्ने विषय भएकाले यसलाई राजनीतिक इच्छाशक्तिसँग जोडेर हेर्नुपर्ने बताए। कुनै पनि दलको स्पष्ट बहुमत नहुँदा सरकार प्रभावकारी ढंगले अघि बढ्न नसकेको उल्लेख गर्दै आगामी निर्वाचनमा एमालेका पक्षमा मतदान गर्न आग्रह गरे।
‘गुठीको समस्या राज्यको समस्या हो। सही प्रतिनिधि चयन भयो भने काम गर्न सकिन्छ,’ उनले भने, ‘समस्या बुझेको प्रतिनिधि जिम्मेवार स्थानमा पुग्यो भने समाधान सम्भव छ।’
कार्यक्रममा बोल्दै उनले आफू लुम्बिनी प्रदेशको मुख्यमन्त्री हुँदा थारु समुदायको सबैभन्दा ठूलो पर्व माघीलाई विशेष महत्व दिएको स्मरण गरे। प्रदेश सरकारले माघी पर्वमा सार्वजनिक बिदा दिने कार्यको सुरुवात आफ्नै पहलमा भएको उनको भनाइ थियो।
पोखरेलले गुठी पीडित किसानको हक अधिकार सुनिश्चित गर्न आफू प्रतिबद्ध रहेको दोहोर्याउँदै व्यवहारिक समाधानका लागि पहल गर्ने प्रतिबद्धता व्यक्त गरे।
