Author: nepalone

काठमाडौं। राष्ट्रिय स्वतन्त्र पार्टी (रास्वपा)का सभापति रवि लामिछानेले राष्ट्रपति रामचन्द्र पौडेलसँग शीतलनिवासमा भेटवार्ता गरेका छन्।

बुधबार राष्ट्रपति भवन शीतलनिवासमा भएको भेटमा सभापति लामिछानेले पछिल्लो समसामयिक राजनीतिक अवस्था, सुनसरी घटनापछि विकसित परिस्थितिलगायतका विषयमा राष्ट्रपति पौडेललाई जानकारी गराएका हुन्।

राष्ट्रपति पौडेलको सचिवालयका अनुसार लामिछानेले सुनसरी घटनाका सम्बन्धमा आफूले आह्वान गरेको सर्वदलीय बैठक, त्यसमा भएका छलफल तथा बैठकबाट जारी गरिएको संयुक्त वक्तव्यबारे पनि राष्ट्रपतिलाई जानकारी गराएका थिए।

भेटका क्रममा मुलुकको शान्ति, सामाजिक सद्भाव र पछिल्लो राजनीतिक घटनाक्रमका विषयमा समेत छलफल भएको राष्ट्रपति सचिवालयले जनाएको छ।

काठमाडौं। सुनसरीलगायत विभिन्न जिल्लामा पछिल्लो समय विकसित तनावपूर्ण अवस्थाप्रति गम्भीर चासो व्यक्त गर्दै राष्ट्रिय स्वतन्त्र पार्टी (रास्वपा) का सभापति रवि लामिछानेको आह्वानमा बसेको सर्वदलीय बैठकले सातबुँदे संयुक्त वक्तव्य तथा अपिल जारी गरेको छ।

बैठकले घटनामा ज्यान गुमाएका व्यक्तिप्रति श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गरेको छ। साथै, घाइते नागरिक र सुरक्षाकर्मीहरूको शीघ्र स्वास्थ्यलाभको कामना गरिएको छ।

संयुक्त वक्तव्यमा नेपालको विविधताबीचको एकता, सहिष्णुता र सामाजिक सद्भावलाई जोगाउन सबै नागरिकलाई संयमता अपनाउन आग्रह गरिएको छ। कुनै पनि प्रकारका उत्तेजना, हिंसा वा मुठभेडबाट समस्या समाधान नहुने भएकाले शान्ति र सहअस्तित्व कायम राख्न सबै पक्षलाई अपिल गरिएको छ।

राजनीतिक दलहरूले लोकतान्त्रिक प्रणालीमा सबै असन्तुष्टि र विवादको समाधान संवाद र सहमतिबाट मात्रै सम्भव हुने उल्लेख गर्दै सम्बन्धित पक्षलाई आफ्ना माग शान्तिपूर्ण ढंगले अघि सार्न आग्रह गरेका छन्।

बैठकले केन्द्रमा मात्र सीमित नभई प्रदेश, जिल्ला र स्थानीय तहसम्म सर्वदलीय तथा सर्वपक्षीय बैठक आयोजना गर्न सबै दलका मातहतका समितिलाई निर्देशन दिएको छ। स्थानीय तहमा धार्मिक अगुवा, नागरिक समाज र प्रशासनसँग समन्वय गरेर विश्वासको वातावरण निर्माण गर्नुपर्नेमा पनि जोड दिइएको छ।

संयुक्त वक्तव्यमा भविष्यमा यस्ता घटना दोहोरिन नदिन राजनीतिक दलहरूले निरन्तर समन्वय, अनुगमन र नेतृत्वदायी भूमिका निर्वाह गर्ने प्रतिबद्धता व्यक्त गरेका छन्।

सामाजिक सञ्जालमा फैलिने अफवाह, भ्रामक सूचना र घृणास्पद अभिव्यक्तिले परिस्थिति थप जटिल बनाउन सक्ने भन्दै नागरिकलाई जिम्मेवार ढंगले सामाजिक सञ्जाल प्रयोग गर्न आग्रह गरिएको छ। सञ्चारमाध्यमलाई पनि तथ्यपरक र संयमित समाचार सम्प्रेषण गर्न अपिल गरिएको छ।

वक्तव्यमा नेपाल सरकारको ध्यानाकर्षण गराउँदै नागरिकको जिउधनको सुरक्षा सुनिश्चित गर्न, अधिकतम संयमता अपनाएर अवस्था सामान्य बनाउन, घटनाको निष्पक्ष छानबिन गरी दोषीमाथि कानुनबमोजिम कारबाही गर्न तथा पीडित परिवारलाई उचित राहत र क्षतिपूर्ति उपलब्ध गराउन माग गरिएको छ।

अन्त्यमा सर्वदलीय बैठकमा सहभागी राजनीतिक दलहरूले राष्ट्रिय एकता, सामाजिक सद्भाव र शान्तिको पक्षमा एकताबद्ध रहेको सन्देश दिँदै वर्तमान समस्याको दिगो, प्रभावकारी र शान्तिपूर्ण समाधानका लागि सरकारसँग सहकार्य गर्न प्रतिबद्ध रहेको जनाएका छन्।

काठमाडौं। कोशी प्रदेशका मुख्यमन्त्री हिक्मतकुमार कार्कीले सुनसरीमा भएको घटनापछि उत्पन्न अवस्था र शान्ति-सुरक्षाबारे छलफल गर्न सर्वदलीय बैठक आह्वान गरेका छन्।

प्रदेश सरकारका प्रमुख सचिव राजेन्द्रकुमार पौडेलका अनुसार बैठक बुधबार दिउँसो १२:३० बजे आन्तरिक मामिला तथा कानुन मन्त्रालयमा बस्नेछ।

बैठकमा सुरक्षा निकायका प्रमुख, सुनसरीका प्रदेशसभा सदस्य तथा विभिन्न राजनीतिक दलका प्रतिनिधिहरू सहभागी हुनेछन्। पछिल्लो घटनाक्रम, शान्ति-सुरक्षा अवस्था, सामाजिक सद्भाव कायम राख्ने उपाय तथा प्रदेश सरकारको भूमिकालाई थप प्रभावकारी बनाउने विषयमा बैठकमा छलफल हुने जनाइएको छ।

सुनसरीमा भएको घटनापछि प्रदेशका विभिन्न क्षेत्रमा तनाव देखिएको अवस्थामा प्रदेश सरकारले सबै पक्षसँग समन्वय गर्दै शान्ति, सुरक्षा र सामाजिक सद्भाव कायम राख्न आवश्यक रणनीति तय गर्ने तयारी गरेको जनाएको छ।

काठमाडौं। जनमत पार्टीका अध्यक्ष सीके राउतले सुनसरीको देवानगञ्जमा भएको हिंसात्मक घटनापछि सरकार, नेपाल प्रहरी र सुरक्षा निकायको भूमिकामाथि गम्भीर प्रश्न उठाएका छन्।

उनले मधेशमा सामाजिक तथा साम्प्रदायिक सद्भाव कमजोर पार्ने वातावरण सिर्जना भइरहेको दाबी गर्दै राज्य संयन्त्रले आफ्नो जिम्मेवारी प्रभावकारी रूपमा निर्वाह गर्न नसकेको आरोप लगाए।

सामाजिक सञ्जालमार्फत धारणा सार्वजनिक गर्दै राउतले मधेशमा विभिन्न समुदायबीच अविश्वास र द्वन्द्व बढ्ने अवस्था सिर्जना भइरहेको उल्लेख गरे। उनका अनुसार मधेशी, आदिवासी-जनजाति, मुस्लिम, थारु र दलित समुदायबीच विभाजन र तनाव उत्पन्न हुने वातावरण बनेको छ।

राउतले सामाजिक सञ्जालमा समुदाय-समुदायबीच घृणा फैलाउने, हिंसामा उक्साउने र द्वेषपूर्ण अभिव्यक्ति दिने गतिविधि खुलेआम भइरहे पनि सम्बन्धित निकाय प्रभावकारी रूपमा सक्रिय नभएको आरोप लगाए। उनले सामान्य राजनीतिक टिप्पणी वा सरकारका पदाधिकारीमाथिको आलोचनामा तत्काल प्रहरी सक्रिय हुने तर सामाजिक सद्भाव बिथोल्ने गतिविधिमा मौन बस्ने प्रवृत्तिमाथि प्रश्न उठाए।

उनले मधेशमा देखिने विवाद र त्यसको व्यवस्थापनका विषयमा सरकारको नीतिमाथि पनि असन्तुष्टि व्यक्त गरे। अहिले समाजमा हिंसात्मक द्वन्द्वको बीउ रोपिँदै गएको र त्यसले भविष्यमा गम्भीर सामाजिक असर पार्न सक्ने चेतावनी दिँदै उनले अहिलेको अवस्था समयमै नियन्त्रण गर्नुपर्ने आवश्यकता औंल्याए।

राउतले समाजमा विश्वास, सद्भाव र सहअस्तित्व पुनःस्थापित गर्न सबै पक्षले संयमता अपनाउनुपर्ने धारणा राखेका छन्। उनले राजनीतिक दल, सरकार, सुरक्षा निकाय र नागरिक समाजबीच संवादमार्फत समस्या समाधान खोज्नुपर्ने तथा कुनै पनि प्रकारको हिंसा, घृणा र साम्प्रदायिक विभाजनलाई प्रश्रय दिन नहुने बताए।

सुनसरीको देवानगञ्जमा भएको घटनापछि कोशी प्रदेशका विभिन्न स्थानमा प्रदर्शन र तनाव देखिएको छ।

यही पृष्ठभूमिमा राउतले सामाजिक सद्भाव जोगाउन राज्य संयन्त्र अझ जिम्मेवार र संवेदनशील बन्नुपर्ने आवश्यकता औंल्याएका हुन्।

काठमाडौं। भारतले प्रधानमन्त्री वालेन्द्र शाह (बालेन) लाई औपचारिक रूपमा भारत भ्रमणको निमन्त्रणा दिएको छ।

भारतीय विदेश मन्त्रालयका प्रवक्ता रणधीर जैसवालले साप्ताहिक मिडिया ब्रिफिङका क्रममा नेपालका प्रधानमन्त्रीलाई भ्रमणको निमन्त्रणा पठाइसकिएको जानकारी दिएका हुन्।

उनले भने, ‘हामीले नेपालका प्रधानमन्त्रीलाई भारत भ्रमणको निमन्त्रणा पठाइसकेका छौं।’

प्रधानमन्त्री नियुक्त भएको करिब पाँच महिना बित्न लाग्दा पनि शाहले हालसम्म कुनै पनि वैदेशिक भ्रमण गरेका छैनन्। 

अब भारतबाट आएको औपचारिक निमन्त्रणासँगै उनको पहिलो विदेश भ्रमण भारतबाटै सुरु हुने सम्भावना बलियो बनेको छ।