Author: nepalone

काठमाडौं । जेनजी प्रदर्शनका क्रममा मृत्यु तथा घाइते भएका आफ्ना सन्तान खोज्न ट्रमा सेन्टरमा अभिभावकको भीड लागेको छ । सोमबार भएको प्रदर्शनमा २० जनाको ज्यान गएको छ भने २६० भन्दा बढी घाइते भएका छन् ।
मृतकमध्ये दुई जना इटहरीमा मारिएका हुन् भने बाँकी सबै काठमाडौंको भएको प्रदर्शनमा ज्यान गुमाएका हुन् । ट्रमा सेन्टरमा मात्रै उपचारका क्रममा ८ जनाको निधन भएको अस्पताल प्रशासनले जनाएको छ । यीमध्ये पाँच जनाको पहिचान भएको छ ।

ग्लोबल कलेजमा अध्ययनरत १९ वर्षीय श्रीयाम चौलागाईं, बाँकेका २१ वर्षीय सुलभराज श्रेष्ठ, कीर्तिपुरका ४२ वर्षीय बुद्धि तामाङ, वर्ष नखुलेका गौरव जोशी र स्टप अधिकारीको मृत्यु भएको अस्पताल प्रशासनले जानकारी दिएको हो ।
गम्भीर घाइते अवस्थामा ल्याइएका उनीहरूको उपचारकै क्रममा ज्यान गएको हो ।

मृतकमध्ये बाँकी तीनजनाको अझै सनाखत हुन सकेको छैन । यस्तै, ट्रमा सेन्टरमा ४९ जनाको उपचार भइरहेको छ । मन्त्रालयले ट्रमा सेन्टरलाई विपद् योजना बनाएर आकस्मिक विरामीलाई हेर्न निर्देशन दिएको छ । बाँकी घाइते विभिन्न अस्पतालमा उपचाररत छन् । आफ्ना सन्तानको खोजीमा ट्रमा सेन्टर पुगेका अभिभावकले बाहिर नाराबाजी गरेका छन् । नाराबाजीपछि प्रहरीले उनीहरूमाथि लाठीचार्ज गरेको छ ।

काठमाडौं । जिल्ला प्रशासन कार्यालय काठमाडौंले आफ्नो वेबसाइटबाट प्रमुख जिल्ला अधिकारी (सीडीओ) छवि रिजालको तस्बिर हटाएको छ ।

जेनजी युवाहरूको प्रदर्शनका क्रममा १७ जनाको मृत्यु र २५० भन्दा बढी युवा घाइते भएपछि सीडीओ रिजालले वेबसाइटबाट आफ्नो तस्वीर हटाउन लगाएका हुन् ।

काठमाडौंमा भएको जेनजी युवाहरूको प्रदर्शनमा दमन गरेको भन्दै सीडीओ रिजालको सामाजिक सञ्जालमा तीव्र आलोचना भइरहेको छ ।

सीडीओ रिजालले आफ्ना सन्तानलाई विदेशमा राखेर पढाइरहेको तर, काठमाडौंमा युवाहरूको प्रदर्शनलाई दमन गर्न आदेश दिएको टिप्पणीसहित आलोचना भइरहेको छ ।

काठमाडौँ । जेनजीले देशका विभिन्न स्थानमा गरेको प्रदर्शनमा सरकारले निर्मम दमन गर्दा २० जना युवाको ज्यान गएको छ ।

देशमा व्याप्त भ्रष्टाचार अन्त्यलगायतका माग राख्दै जेनजीले सोमबार बिहान ९ बजेदेखि काठमाडौँ, झापा, सुनसरी, कास्की, काभ्रे, रूपन्देही, चितवन र दाङका विभिन्न स्थानमा प्रदर्शन गरेका थिए।

तर, काठमाडौँको माइतीघर हुँदै नयाँ बानेश्वर पुगेको प्रर्दशन आक्रामक बन्दै प्रहरी घेरा तोड्न पुग्यो। यति मात्र होइन, संसद् भवनभित्र बस्यो, गेट फोर्ने, पर्खाल भत्काउने र आगोसमेत लगाउन खोजे ।

त्यसपछि प्रहरीले दुईपटक अश्रुग्यास प्रहार गरेको थियो। केहीबेर प्रदर्शनकारी तितरवितर भए पनि फेरि संगठित भएर अघि बढेका थिए ।

प्रदर्शन नसम्हालिएपछि प्रहरीले गोली चलाउन थाल्यो।

प्रहरीले आफूमाथि ढुंगामुढा भएपछि प्रतिरक्षाका लागि गोली चलाएको बताएको छ। तर, प्रहरीतर्फ केकस्तो क्षति भयो भनेर सरकारले बताएको छैन। प्रदर्शनकारीतर्फ हेर्दा प्रहरीको गोली लागेर घाइते भएकामध्ये काठमाडौँ र इटहरी गरेर २० जनाको मृत्यु भइसकेको छ।

यस्तै, निजामती कर्मचारी, एभरेस्ट, केएमसी, वीर, ट्रमा, टिचिङ र ललितपुरको पाटन अस्पतालमा घाइतेको उपचार जारी छ। अस्पतालले दिएको जानकारी अनुसार घाइतेमध्ये केहीको अवस्था गम्भीर छ।

यस्तै, काठमाडौँमा ठूलो मानवीय क्षति भएपछि देशका अन्य क्षेत्रमा पनि प्रदर्शन थप भड्किन पुगेको छ। सुनसरीको इटहरीमा प्रदर्शनकारी उग्र बनेर आगजनीमै उत्रिए। उनीहरूले इटहरी उपमहानगरपालिकाको एउटा भवन जलाइदिएका छन्। राष्ट्रिय मानव अधिकार आयोगले अत्यधिक बल प्रयोग भएको भन्दै चिन्ता व्यक्त गरेको छ।

इटहरीमा प्रहरीले गोली चलाउँदा २ जना प्रदर्शनकारीको ज्यान गएको छ। अहिले त्यहाँ प्रशासनले कर्फ्यु लगाएको छ।

काठमाडौं । राष्ट्रिय स्वतन्त्र पार्टीले प्रधानमन्त्री केपी शर्मा ओलीको राजीनामा माग गरेसँगै ताजा जनादेशको माग गरेको छ । आज बसेको सचिवालय बैठकले जेनजीद्वारा आयोजित आजको प्रदर्शनमा सरकारले बर्बर दमन गरेको भन्दै प्रधानमन्त्रीको राजीनामा माग गरेको हो ।

बैठकपछि महामन्त्री कविन्द्र बुर्लाकोटीले जारी गरेको विज्ञप्तिमा भनिएको छ, वर्तमान सरकारको औचित्य पुर्णतस् समाप्त भइसकेको परिप्रेक्षमा प्रधानमन्त्रीको तत्काल राजीनामा माग्दछौँ । साथै घटनाको निश्पक्ष छानविन गर्न उच्चस्तरीय न्यायिक छानविन आयोग गठन गरि गृहमन्त्री लगायत सबै दोषीमाथि कडा कारबाही गर्न माग गर्दछौँ ।

नेपाली कांग्रेस र नेकपा एमालेको वर्चस्व रहेको वर्तमान संघीय संसदले कुनै पनि राष्ट्रिय मुद्दाको हल निकाल्न असमर्थ भई वैधता गुमाएको निष्कर्षमा पुग्दै ताजा जनादेशको माग गरेको छ ।

विराटनगर । जेनजीको आन्दोलन हिंसात्मक बनेपछि इटहरी र रुपन्देहीमा पनि स्थानीय प्रशासनले कर्फ्यू आदेश जारी गरेको छ । सुनसरीका सीडीओ धर्मेन्द्रकुमार मिश्रले अर्को सूचना जारी नभएसम्मका लागि इटहरी चोक आसपास क्षेत्रमा लागू हुने गरी कर्फ्यू लगाएका हुन् ।

जेनजीका युवाहरूले उपमहानगर कार्यालयमा आगो लगाएर प्रदर्शन गरिरहेका छन् । यस्तै जेनजीको आन्दोलनलाई मध्यनजर गर्दै रुपन्देही जिल्ला प्रशासन कार्यालयले बुटवल–भैरहवा क्षेत्रमा शान्ति सुरक्षा कायम राख्न आज दिउँसो ४ बजेदेखि राति १० बजेसम्म कर्फ्यू आदेश जारी गरेको छ ।

जिल्ला प्रशासन कार्यालयका अनुसार, प्रमुख जिल्ला अधिकारी (सीडीओ) टोकराज पाण्डेले स्थानीय प्रशासन ऐन, २०२८ को दफा ६ क ले दिएको अधिकार प्रयोग गरी यो कदम चालेका हुन् । प्रशासनले जारी गरेको सूचनाअनुसार, कर्फ्यूको समयमा तोकिएको क्षेत्रभित्र कुनै पनि व्यक्तिलाई आवतजावत गर्न, भेला, जुलुस, प्रदर्शन वा घेराउ गर्न पूर्ण रूपमा निषेध गरिएको छ । यो आदेश तत्काल लागू हुनेगरी जारी गरिएको हो ।

प्रमुख जिल्ला अधिकारी पाण्डेले स्थानीय शान्ति सुरक्षा तथा सार्वजनिक हितका लागि यो आदेश जारी गर्नुपरेको बताएका छन् । पछिल्लो समयमा बढ्दो असहज परिस्थितिलाई मध्यनजर गर्दै यो निर्णय गरिएको हो । नागरिकहरूलाई तोकिएको समयभित्र घर बाहिर ननिस्कन र प्रशासनको आदेशको पालना गर्न आग्रह गरिएको छ । कर्फ्यूको पालना नगर्ने व्यक्तिलाई कानुन अनुसार कारबाही हुने पनि प्रशासनले जनाएको छ ।

काठमाडौं । सत्ता साझेदार नेपाली कांग्रेसको पदाधिकारी र पूर्व पदाधिकारीको आकस्मिक बैठक बोलाइएको छ । पार्टी सभापति शेरबहादुर देउवा निवास बूढानीलकण्ठमा साँझ ५ बजे बस्ने प्रचार विभाग प्रमुख मीन विश्वकर्माले जानकारी दिए । बैठकमा जेनजी आन्दोलन र समाजिक सञ्जाल बन्दका विषयमा पार्टीको आधिकारिक धारणा तय हुनेछ । महामन्त्रीद्वय गगनकुमार थापा र विश्वप्रकाश शर्माले सोमबार बिहानै सभापति देउवालाई भेटेर सामाजिक सञ्जाल बन्द र जेनजीको प्रदर्शनबारे सरकारको ध्यानाकर्षण गराउन भनेका थिए ।

परिस्थितिको आंकलन गर्न नसक्नु गम्भीर गल्ती : विश्वप्रकाश शर्मा
नेपाली कांग्रेसका महामन्त्री विश्वप्रकाश शर्माले सरकारले परिस्थितिको आंकलन गर्न नसकेर गम्भीर गल्ती गरेका बताएका छन् । शर्माले जेनजीको आवेग बुझ्नु सरकारको प्राथमिक दायित्व भए पनि परिस्थितिको आंकलन गर्न नसकेको बताए ।

‘जेनजीहरूमा जे कारणले आवेग छ, त्यो कुराको सम्बोधन गर्नु सरकारको प्राथमिकता दायित्व हो,’ उनी भन्छन्, ‘जुनसुकै आमाले जन्माएको भए पनि सबै जेन–जी हाम्रा छोराछोरी हुन् ।’ मृतकको संख्या बढेको खबरले आफू स्तब्ध बनेको उनले बताए । ‘अब सरकारले एक कदम पछाडि हटेर परिस्थिति सम्हाल्नु पर्छ,’ शर्मा भन्छन्, ‘सरकारले आफ्नो विश्वास थोपरेर मात्र हुँदैन, नागरिकको विश्वास पनि लिनुपर्छ ।’

काठमाडौँ । जेनजीको प्रदर्शनलाई लिएर गृहमन्त्री रमेश लेखकको चौतर्फी आलोचना भइरहेको छ। अहिले नेपाली कांग्रेसभित्रैबाट उनको राजीनामा माग हुन थालेको छ।

कांग्रेस केन्द्रीय सदस्य डा. गोविन्द पोखरेलले गृहमन्त्री लेखकले तत्कालै राजीनामा दिनुपर्ने बताएका हुन्।

उनले सामाजिक सञ्जाल एक्समा मार्फत गृहमन्त्रीले तुरून्तै राजीनामा दिनु पर्यो। यदि नदिए पार्टीले तुरून्तै फिर्ता बोलाउनु पर्‍यो। लेखेका छन् ।

काठमाडौँ । युवा तथा खेलकुद मन्त्रालयले आम युवाको समग्र पक्षलाई सम्बोधन गर्ने गरी राष्ट्रिय युवा नीति २०८२ सार्वजनिक गरेको छ ।

मन्त्रालयद्वारा आज यहाँ आयोजित एक कार्यक्रममा युवा तथा खेलकुदमन्त्री तेजुलाल चौधरी, मन्त्रालयका सचिव डा हरिप्रसाद लम्साललगायले युवा नीति सार्वजनिक गरेका छन् । खेलकुदमन्त्री चाधरीले १८ देखि ३५ वर्ष उमेर समूहलाई युवा मानिएको र सम्रग युवाको शिक्षा, स्वास्थ्य, रोजगारलगायतको विषय यस युवा नीतिमा समावेश गरिएको बताए ।

त्यस्तै मन्त्रालयका सचिव लम्सालले सात प्रदेश र विज्ञहरुसहित करिब एक हजारभन्दा बढी व्यक्तिको छलफलबाट उक्त नीति तयार गरिएको बताए । उनले एआईलगायतका विभिन्न प्रविधि भित्रिएसँगै यसलाई सम्बोधन गर्न पनि नीति ल्याएको बताए।

राष्ट्रिय युवा परिषद्का उपाध्यक्ष सुरेन्द्र बस्नेतले जेनजी पुस्तालाई पनि समेट्ने किसिमको युवा नीति आएको बताए । यस युवा नीतिमा युवाको सर्वाङ्गीण विकास गर्ने, राज्यको विकासमा युवाको अर्थपूर्ण सहभागिता सुनिश्चित गर्ने, राष्ट्रभाव भएका सदाचारी एवम् सुसंस्कृत युवा तयार गरी समुन्नत राष्ट्र निर्माणमा योगदान गर्ने लक्ष्य लिएको छ ।

त्यसैगरी, गुणस्तरीय शिक्षामा युवाको पहँुच बढाउने, राष्ट्रिय तथा अन्तरराष्ट्रिय श्रमबजारमा प्रतिस्पर्धी दक्ष युवा जनशक्ति तयार गर्न रोजगारमूलक शिक्षामा युवाको सहभागिता वृद्धि गर्नेलगायत शिक्षासँग सम्बन्धित नौवटा कार्यनीति ल्याएको छ । त्यस्तै, घातक रोग, एचआइभी सङ्क्रमण, लागूऔषध दुव्र्यसन तथा कुलतमा परेका युवाका लागि विशेष कार्यक्रम सञ्चालन गर्नेलगायत स्वास्थ्य क्षेत्रमा आठवटा नीति ल्याएको छ ।

‘डिजिटल’ समावेशीकरणको सिद्धान्तअनुरुप सूचना प्रविधिको प्रयोगमा सबै युवाको सहभागिता सुनिश्चित गर्दै सूचना प्रविधिको क्षेत्रलाई रोजगारीको मुख्य केन्द्रका रुपमा विकास गर्ने, खेलकुद क्षेत्रमा युवाको सहभागितालगायत विषय युवा नीतिमा समावेश गरिएको छ ।

काठमाडौँ । राष्ट्रिय फोटो पत्रकार समूह (एनएफपिजे)ले काठमाडौँ उपत्यकाको प्रमुख सांस्कृतिक पर्व इन्द्रजात्रालाई केन्द्रमा राखेर खिचिएका फोटोको प्रदर्शनी गरेको छ । समूहले काठमाडौँ महानगरपालिकासँगको सहकार्यमा आजदेखि काठमाडौँको वसन्तपुरमा फोटो प्रदर्शनी आयोजना गरेको हो ।

तीन दिनसम्म चल्ने उक्त प्रदर्शनीमा इन्द्रजात्राका झन्डै १०० फोटो प्रदर्शनीमा राखिएका समूहका महासचिव घनश्याम श्रेष्ठले जानकारी दिए। उक्त प्रदर्शनीको आज उद्घाटन गर्दै काठमाडौँ महानगरपालिकाकी उपप्रमुख सुनिता डङ्गोलले काठमाडौँभित्रका सांस्कृतिक सम्पदालाई संरक्षण गर्न फोटो प्रदर्शनीले सहयोग पुग्ने विश्वास व्यक्त गरे । उनले यस्ता प्रदर्शनीले नेपाली कला, संस्कृति र चाडपर्वलाई अन्तरराष्ट्रिय क्षेत्रमा प्रवद्र्धन गर्न महत्वपूर्ण योगदान पु¥याउने बताए।

“इन्द्रजात्रा हाम्रो मौलिक पर्व हो, यसको हरेक गतिविधि सांस्कृतिक धरोहर हो, यस्ता प्रदर्शनीले हाम्रो संस्कृतिलाई विश्वसामु चिनाउन सहयोग पु¥याउँछ,” उनले भने।

समूहका कार्यवाहक अध्यक्ष सागर श्रेष्ठले काठमाडौँको जीवित सम्पदा र मौलिक परम्पराको विविध आयामलाई नजिकबाट बुझ्न यस्ता प्रदर्शनीले सहयोग पुग्ने विश्वास व्यक्त गरे । संस्कृति, सम्पदा र परम्पराप्रति चासो राख्ने सम्पूर्णलाई प्रदर्शनी अवलोकनका लागि उनले आमन्त्रण गरेका छन् ।

कार्यक्रमका संयोजक सुनिल शर्माले पत्रकारको दृष्टिकोणबाट काठमाडौँको सांस्कृतिक जीवन्ततालाई फोटोमार्फत प्रदर्शन गरिएको बताए । “इन्द्रजात्रा केवल उत्सव होइन, यो काठमाडौँको पहिचान हो, यसलाई संरक्षण र प्रवद्र्धन गर्नु हाम्रो दायित्व हो, इन्द्रजात्रा हाम्रो संस्कृतिको जिउँदो चित्र हो, आठ दिनसम्म विविध सांस्कृतिक गतिविधिले भरिएको जीवन्त पर्व, यसलाई प्रदर्शनीमार्फत हामीले यही सन्देश दिन खोजेका हौँ,” उनले भनेका छन् ।