Author: nepalone

काठमाडौं । गगन थापा नेतृत्वको नेपाली कांग्रेसको प्रवक्तामा देवराज चालिसे नियुक्त भएका छन् । ललितपुरको कुपण्डोलमा जारी पहिलो केन्द्रीय समितिको बैठकमा प्रवक्तामा चालिसेको नाम प्रस्ताव गरिएको थियो । बुधबार सम्पन्न विशेष महाधिवेशनबाट थापा सभापति, उपसभापतिमा विश्वप्रकाश शर्मा र पुष्पा भुसाललगायत चयन भएका छन् ।

चालिसे केन्द्रीय सदस्य चयन भएका थिए । बैठकले चालिसेलाई प्रवक्ता मनोनित गरेको केन्द्रीय सदस्य अजयबाबु शिवाकोटीले जानकारी दिए । विशेष महाधिवेशनका लागि अभियान चलाउने कांग्रेस नेतामध्ये चालिसे पनि एक हुन् । ललितपुरको कुपण्डोलस्थित म्याक्सिम्स ब्यांक्वेट एन्ड इभेन्ट्समा केन्द्रीय कार्यसमितिको बैठक जारी रहेको छ।

काठमाडौं । नेपाली कांग्रेसको विशेष महाधिवेशनबाट सभापति चयन भएका गगन थापाले पार्टीका अधिकांश क्रियाशील सदस्य विशेष महाधिवेशनको पक्षमा उभिएको दाबी गरेका छन् । निर्वाचन आयोगले चाहे सदस्यहरूको वास्तविक अवस्था परीक्षण गरेर हेर्न सक्ने भन्दै उनले १० लाखमध्ये ९ लाख ८० हजार क्रियाशील सदस्य आफूहरूको पक्षमा रहेको बताएका हुन् ।

सभापति चयन भएपछि भृकुटीमण्डपमा उपस्थित महाधिवेशन प्रतिनिधिलाई सम्बोधन गर्दै थापाले विशेष महाधिवेशन नै पार्टी विधानले व्यवस्था गरेको सबैभन्दा ठूलो संरचना भएको स्पष्ट पारे । पार्टी सदस्यहरू कता उभिएका छन् भन्ने विषय नै निर्णायक हुने उल्लेख गर्दै उनले भने, ‘पुरानो र नयाँ गरेर करिब १० लाख क्रियाशील सदस्य छन् । धेरै भन्दिनँ, निर्वाचन आयोगले हेर्न चाहेको दिन नेपाली कांग्रेसले आह्वान गर्दा १० लाखमध्ये ९ लाख ८० हजार सदस्य एक ठाउँमा उभिएनन् भने त्यसबेला प्रश्न उठाऔंला ।’

थापाले निर्वाचन आयोगले कानुन, पार्टी विधान र विशेष महाधिवेशनको उपस्थितिलाई आधार मानेर निष्पक्ष निर्णय गर्नेमा आफू विश्वस्त रहेको बताए । ‘हाम्रो संविधानले चिनेको निर्वाचन आयोग कुनै पनि अवैध शक्तिको प्रभावमा पर्दैन भन्ने विश्वास हामीलाई छ’, उनले भने, ‘आयोगले प्रचलित कानुन, विधान र यहाँको उपस्थितिलाई हेरेर निर्णय गर्छ ।’

यसैबीच, सभापति निर्वाचित भएपछि सञ्चारकर्मीसँग प्रतिक्रिया दिँदै थापाले कांग्रेस विभाजित नभएको दाबी गरे । उनले यसअघि शेरबहादुर देउवालाई सभापति निर्वाचित गर्ने महाधिवेशन प्रतिनिधिहरूले नै आफूलाई पनि सभापति चुनेको बताए । विशेष महाधिवेशन सम्पन्न भइसकेको र केही दिनमै नयाँ कार्य समिति आउने विषयमा निर्वाचन आयोगलाई लिखित जानकारी दिइसकिएको उनको भनाइ थियो ।

थापाले कांग्रेसको आधिकारिकताबारे कुनै अन्योल नरहने दाबी गर्दै आयोगले विधि र विधानअनुसार निर्णय गर्ने विश्वास व्यक्त गरे । ‘निर्वाचन आयोग जानकार छ, कानुनसम्मत निर्णय गर्छ’, उनले भने, ‘त्यसैले कांग्रेसको वैधानिकतामाथि कुनै विवाद रहँदैन ।’ विशेष महाधिवेशनपछि पार्टीभित्रको नेतृत्व र वैधानिकताबारे उठेका प्रश्नहरूलाई सम्बोधन गर्दै थापाले संगठनात्मक बल र सदस्यहरूको समर्थन नै आफ्नो मुख्य आधार भएको सन्देश दिएका छन् ।

काठमाडौं । नेपाली कांग्रेसको विशेष महाधिवेशनबाट निर्वाचित गगन थापा नेतृत्वको नयाँ केन्द्रीय कार्यसमितिले औपचारिक रूपमा काम सुरु गरेको छ । ललितपुरको कुपण्डोलस्थित एक पार्टी प्यालेसमा आज बसेको केन्द्रीय समिति बैठक नयाँ नेतृत्वको पहिलो बैठक हो ।

भृकुटीमण्डपमा सम्पन्न विशेष महाधिवेशनले गगन थापालाई सभापति चयन गर्दै १६६ सदस्यीय केन्द्रीय कार्यसमिति गठन गरेको थियो । त्यसलगत्तै थापा नेतृत्वको समूहले पार्टीको भावी रणनीति, संगठनात्मक व्यवस्थापन र कानुनी प्रक्रियाबारे छलफल गर्न पहिलो बैठक आह्वान गरेको हो । बैठक कुपण्डोलस्थित म्याक्सिम्स बैंक्वेटमा केहीबेर अघिदेखि जारी रहेको महामन्त्री प्रदीप पौडेलको सचिवालयले जनाएको छ ।

विशेष महाधिवेशनअघि संस्थापन पक्षले गगन थापा, विश्वप्रकाश शर्मा र फरमुल्लाह मन्सुरलाई अनुशासन उल्लङ्घनको आरोपमा पाँच वर्षका लागि पार्टीबाट निष्कासन गरेपछि नेपाली कांग्रेस औपचारिक रूपमा दुई धारमा विभाजित भएको छ । यही पृष्ठभूमिमा थापा पक्षले विशेष महाधिवेशन आयोजना गर्दै नयाँ नेतृत्व चयन गरेको हो ।

बैठकमा हालको राजनीतिक परिस्थिति, पार्टीको आधिकारिकता दाबी, संगठन सुदृढीकरण र आगामी कदमबारे गहन छलफल भइरहेको जनाइएको छ । बैठकपछि विशेष महाधिवेशनका नतिजा तथा कागजात अद्यावधिक गर्न थापा नेतृत्वको टोली आजै निर्वाचन आयोग जाने तयारीमा छ । अधिवक्ता राजु कटवालका अनुसार विशेष महाधिवेशन सम्पन्न भई नयाँ नेतृत्व चयन भएकाले पार्टीको अभिलेख अद्यावधिक गर्न आयोग जाने तयारी गरिएको हो ।

उनका अनुसार बिहीबार मध्याह्न १२ देखि १ बजेसम्म निर्वाचन आयोग पुग्ने कार्यक्रम तय गरिएको छ । आयोगमा आवश्यक कागजात, निर्णय र अभिलेख दस्तावेजीकरणका लागि कानुनी टोलीले सहजीकरण गरिरहेको छ । गगन थापा नेतृत्वको यो कदमलाई कांग्रेसको आन्तरिक राजनीतिमा निर्णायक मोडका रूपमा हेरिएको छ । निर्वाचन आयोगको निर्णय र आगामी राजनीतिक घटनाक्रमले कांग्रेसको भविष्यको दिशा तय गर्ने अपेक्षा गरिएको छ ।

काठमाडौं । नेपाली कांग्रेसको विशेष महाधिवेशनबाट निर्वाचित नयाँ कार्यसमितिको पहिलो औपचारिक बैठक आज बस्दैछ । युवा नेता गगन थापा पार्टीको सभापतिमा निर्वाचित भएपछि बस्न लागेको यो पहिलो बैठकलाई राजनीतिक वृत्तमा विशेष चासोका साथ हेरिएको छ ।

पार्टी सहमहामन्त्री उदयशम्शेर जबराका अनुसार नयाँ कार्यसमितिको बैठक ललितपुरको कुपण्डोलमा बिहान ११ बजेपछि बस्ने गरी तय गरिएको छ । बुधबार राति मात्रै थापाको नेतृत्वमा पदाधिकारी र केन्द्रीय सदस्यहरू सर्वसम्मत चयन भएका थिए । आजको बैठकको मुख्य कार्यसूची आगामी फागुन २१ गतेका लागि तय गरिएको निर्वाचनको तयारी रहेको छ ।

देशको बदलिँदो राजनीतिक परिवेशमा पार्टीलाई कसरी अगाडि बढाउने र निर्वाचनमा कस्तो रणनीति अपनाउने भन्ने विषयमा आजैबाट प्रारम्भिक छलफल सुरु हुनेछ । विशेष महाधिवेशनमार्फत नेतृत्व परिवर्तन भएकाले कानुनी प्रक्रिया पूरा गर्नका लागि बैठकले ठोस निर्णय लिनेछ ।

काठमाडौं । नेपाली कांग्रेसभित्र देखिएको विवाद थप चर्किदै जाँदा शेरबहादुर देउवा पक्षको केन्द्रीय समितिले गरेको कारबाहीपछि महामन्त्री गगनकुमार थापाले आफूहरू नै पार्टीको आधिकारिक धार भएको दाबी गरेका छन् । देउवा समूहले थापा र अर्का महामन्त्री विश्वप्रकाश शर्मालाई पाँच वर्षका लागि निष्काशन गर्ने निर्णय गरे लगत्तै थापाले विशेष महाधिवेशनमार्फत वैधानिक रूपमा नेतृत्व चयनको प्रक्रिया अघि बढिसकेको बताएका हुन् ।

थापाका अनुसार पार्टीभित्र लामो समयदेखि देखिएको नेतृत्व संकट समाधानका लागि विशेष महाधिवेशन अपरिहार्य भइसकेको छ । ‘अब हामी अन्योलमा बसिरहनुपर्ने अवस्था रहेन’, उनले भने, ‘विशेष महाधिवेशनको मनोनयन प्रक्रिया सकिएको छ, नामावली सार्वजनिक हुँदैछ ।’

उनले पार्टी सभापति शेरबहादुर देउवालाई पद छोडेर प्रक्रिया सहज बनाउन आग्रह गरिएको पनि स्पष्ट पारे । ‘असोज २८ गतेको केन्द्रीय समिति बैठकमा सभापतिले सम्बोधन गरेर कार्यवाहक जिम्मेवारी दिएर जानु भएको थियो, त्यो सम्मानजनक नै थियो’, थापाले भने, ‘हामीले विधि र विधान अनुसारको बाटो रोजेका हौँ ।’

पार्टीको आधिकारिकता कसको भन्ने प्रश्नमा थापाले विशेष महाधिवेशनमार्फत वैधानिक नेतृत्व चयन हुने पक्ष नै वास्तविक कांग्रेस भएको दाबी गरे । ‘यहाँ विधिवत् र विधानसम्मत नेतृत्व चयन हुँदैछ’, उनले भने, ‘यही नै नेपाली कांग्रेस हो ।’ थापाका अनुसार विशेष महाधिवेशनबाट निर्वाचित नेतृत्वबारे आजै निर्वाचन आयोगलाई जानकारी गराइनेछ । ‘निर्वाचन प्रक्रिया सकिएपछि आयोगलाई औपचारिक जानकारी दिन्छौँ’, उनले भने, ‘पार्टीको चुनाव चिह्न रुख र चारतारे झण्डा हामीसँगै छ। कांग्रेस भनेकै हामी हौँ ।’

देउवासँगको अन्तिम संवादबारे बोल्दै थापाले सभापतिले ‘वैशाखमा स्वतः अलग हुन्छु’ भनेको स्मरण गरे। तर अहिले नै निष्क्रिय बस्न नसकिने अवस्था आएको उनको भनाइ छ । ‘प्रश्न पर्खिन नसकेको होइन’, उनले स्पष्ट पारे, ‘देश, समाज र कार्यकर्ताले अब कुर्न नसक्ने अवस्था भयो ।’ थापाले भदौ २३ मा भएको घटनालाई पनि यही असन्तोषको परिणामको रूपमा व्याख्या गरे । ‘यदि कार्यकर्ताको आवाज समयमै स्वीकार गरिएको भए भदौ २३ को घटना हुने थिएन’, उनले भने । कांग्रेसभित्रको यो विवादले अब पार्टीको आधिकारिकता, चुनाव चिह्न र वैधानिक नेतृत्वबारे कानुनी तथा राजनीतिक बहसलाई थप तीव्र बनाउने संकेत देखिएको छ ।

काठमाडौं । नेपाली कांग्रेसभित्रको आन्तरिक विवाद खुला टकरावमा रूपान्तरित हुँदै गएको छ । केन्द्रीय कार्यसमिति बैठकमा कार्यवाहक सभापति पूर्णबहादुर खड्काले महामन्त्रीद्वय गगन थापा र विश्वप्रकाश शर्मामाथि गम्भीर आरोप लगाउँदै पार्टी असहज अवस्थातर्फ धकेलिएको बताएका छन् ।

सानेपास्थित पार्टी केन्द्रीय कार्यालयमा बसेको केन्द्रीय समिति बैठकमा खड्काले महाधिवेशन कार्यतालिका महामन्त्रीद्वयकै सहमतिमा अघि बढाइएको दाबी गरे । तर, प्रक्रिया पूरा गर्न नसकिएको अवस्थामा कार्यतालिका सार्ने समझदारी हुँदाहुँदै पनि उनीहरूले विशेष महाधिवेशनको आह्वान गरेर धोका दिएको उनको आरोप थियो । खड्काले बैठकमा भने, ‘महामन्त्रीहरूसँग सल्लाह गरेर नै पुसमा नियमित महाधिवेशन गर्ने निर्णय गरिएको हो । तर क्रियाशील सदस्यता नवीकरणलगायतका प्रक्रिया समयमा पूरा हुन सकेन । त्यसमा उहाँहरू स्वयंको पनि जिम्मेवारी छ ।’ उनले महामन्त्रीद्वयले आफूहरूबाट कुनै कमजोरी नभए जस्तो गरी विशेष महाधिवेशनतर्फ अगाडि बढेको भन्दै असन्तुष्टि जनाए ।

विशेष महाधिवेशनको माग गर्दै गगन–विश्व पक्षले सार्वजनिक रूपमा गतिविधि बढाएपछि संस्थापन पक्ष र इतर समूहबीच पटक–पटक वार्ता भएको थियो । तर, ती सबै प्रयास असफल भएपछि अन्ततः केन्द्रीय कार्यसमिति बैठकले महामन्त्रीद्वय गगन थापा र विश्वप्रकाश शर्मासहित केही नेतामाथि कारबाही गर्ने निर्णय गरेको छ । कारबाहीको निर्णय सुनाउने क्रममा खड्का भावविह्वल बनेको बैठकमा सहभागी केन्द्रीय सदस्यहरूले बताएका छन् ।

‘सबै प्रयास गर्दा पनि साथीहरूलाई मनाउन सकिनँ, पार्टी जोगाउन सकिनँ’, भन्दै खड्काले बैठकमा भावुक अभिव्यक्ति दिएको ती सदस्यको भनाइ छ । उनका अनुसार खड्का निर्णय सुनाउँदा निकै गहिरो तनावमा देखिन्थे । बैठकमा खड्काले सभापति शेरबहादुर देउवा र महामन्त्रीद्वयबीच भएको वार्ताको विवरण पनि प्रस्तुत गरेका थिए । उनले महामन्त्रीद्वयले सहमतिको ‘अन्तिम विकल्प’ भन्दै पठाएका प्रस्तावहरूमध्ये निर्वाचन आयोगमा पठाइएका उम्मेदवारहरूको नाममा सभापतिको हस्ताक्षर परिवर्तन गर्नेबाहेक अन्य कुनै प्रस्ताव स्वीकार्य नहुने स्पष्ट पारे ।

विशेष गरी गगन थापालाई भावी प्रधानमन्त्री घोषणा गरेर चुनावमा जाने र सभापति देउवा पार्टी गतिविधिबाट निस्क्रिय रहने प्रस्ताव अस्वीकार्य रहेको खड्काको भनाइ थियो । ‘हामीले एउटा प्रस्तावबाहेक अरू मान्न सकिँदैन भनेर जवाफ दिइसकेका छौं’, खड्काको भनाइ उद्धृत गर्दै एक केन्द्रीय सदस्यले बताए । विशेष महाधिवेशन पक्षसँग चरणबद्ध छलफल चलिरहेकै कारण बुधबार बिहानका लागि तय गरिएको केन्द्रीय समिति बैठक दिउँसो ढिलो गरी सुरु भएको थियो । यसअघि मंगलबार पनि पटक–पटक बैठक सर्दै राति संक्षिप्त छलफलमा सीमित भएको थियो । कांग्रेसभित्र देखिएको यो तकरारले पार्टीको संगठनात्मक एकता र आगामी राजनीतिक यात्रामाथि गम्भीर प्रश्न खडा गरेको छ । नेतृत्व तहकै आपसी अविश्वास र सार्वजनिक आरोप–प्रत्यारोपले पार्टीलाई कुन दिशामा लैजान्छ भन्ने चासो तीव्र बन्दै गएको छ ।

काठमाडौं । नेपाली कांग्रेसले सहमहामन्त्री फर्मुल्लाह मन्सुरलाई पनि पाँच वर्षका लागि पार्टीबाट निष्काशन गरेको छ । संस्थापन पक्षको केन्द्रीय कार्य समिति बैठकले महामन्त्रीद्धय गगन थापा र विश्वप्रकाश शर्मासँगै मन्सुरलाई पनि निष्काशन गरेको हो ।

पार्टी केन्द्रीय कार्यसमितिको बुधबारको बैठकले महामन्त्री गगन थापा, विश्वप्रकाश शर्मा र सह–महामन्त्री फरमुल्ला मन्सुरलाई पाँच वर्षका लागि पार्टीबाट निष्काशन गर्ने निर्णय गरेको हो ।
पार्टीका वरिष्ठ नेताहरूको भनाइअनुसार, तीनै महामन्त्रीले कांग्रेसको नियमित कार्यविधि उल्लंघन गर्दै विशेष महाधिवेशन आह्वान गरेका थिए । यही कदमले पार्टी भित्रको ऐक्यबद्धतालाई चुनौती दिएको ठहर गर्दै केन्द्रीय कार्यसमितिले उनीहरूमाथि कारबाही अघि बढाएको हो ।

कांग्रेसका दुई महामन्त्री गगन थापा र विश्वप्रकाश शर्माले पार्टीको ५४ प्रतिशत महाधिवेशन प्रतिनिधिहरूको माग अनुसार विशेष महाधिवेशन बोलाउने प्रस्ताव अघि सारेका थिए । उनीहरूको तर्क अनुसार, पार्टीको नियमित महाधिवेशन पुसमा सम्भव नभएपछि वैशाखमा गर्ने सहमति बैठकले गरेको निर्णय पार्टीको आन्तरिक लोकतान्त्रिक प्रक्रियालाई बेवास्ता गरेको थियो ।

काठमाडौं । नेपाली कांग्रेस गहिरो आन्तरिक संकटको मोडमा पुगेको छ । पार्टीका कार्यवाहक सभापति पूर्णबहादुर खड्काले पछिल्ला घटनाक्रमले कांग्रेस फुटतर्फ अघि बढेको संकेत गरेको बताएका छन् । केन्द्रीय कार्यसमिति बैठकका लागि सानेपा पुगेका खड्काले आफ्ना कार्यकक्षमा भेला भएका नेता–कार्यकर्तालाई हालसम्म भएका वार्ताबारे जानकारी गराउँदै परिस्थिति गम्भीर बनेको स्पष्ट पारे ।

खड्काका अनुसार सभापति पक्षबाट अधिकतम लचकता देखाइए पनि महामन्त्रीहरू सहमतिमा नआएको र विशेष महाधिवेशनका लागि उम्मेदवारी मनोनयन प्रक्रिया नै सुरु भइसकेकाले पार्टी विभाजनको बाटोमा पुगेको हो । ‘अब हिजो जस्तै बैठक रोकिँदैन’, खड्काको भनाइ उद्धृत गर्दै स्रोतले जनाएको छ, ‘पार्टी जोगाउने वा अगाडि बढाउने आवश्यक निर्णय केन्द्रीय कार्य समितिले गर्छ ।’

यसैबीच, केन्द्रीय कार्यालय प्रवेश गर्ने क्रममा सञ्चारकर्मीहरूसँग छोटो प्रतिक्रिया दिँदै खड्काले पार्टी जोगाउन प्रयास जारी रहेको बताएका छन् । कांग्रेस मिल्ने सम्भावना कति छ भन्ने प्रश्नमा उनले भने, ‘कोशिस चलिरहेको छ ।’ विशेष महाधिवेशनमा उम्मेदवारी दर्ता भइसकेको विषयमा भने उनले कुनै टिप्पणी गरेनन् । हाल विशेष महाधिवेशनअन्तर्गत निर्वाचन प्रक्रिया अघि बढिरहेको छ । सभापति पदका लागि गगन थापाले उम्मेदवारी दर्ता गरिसकेका छन् भने महामन्त्री पदमा विश्वप्रकाश शर्मा र प्रदीप पौडेल उम्मेदवार बनेका छन् । कांग्रेस विधानअनुसार दुई महामन्त्री रहने व्यवस्था छ ।

उता, संस्थापन पक्षले भने आन्तरिक छलफललाई निर्णायक मोडमा लैजान केन्द्रीय कार्यसमितिको बैठक बोलाएको छ । बैठकमा सहभागी हुन कांग्रेसका शीर्ष नेता तथा केन्द्रीय सदस्यहरू सानेपा पुगिसकेका छन् ।
पार्टीभित्र सहमतिको प्रयास जारी रहे पनि उम्मेदवारी दर्ता र समानान्तर गतिविधिले कांग्रेसको भविष्यलाई अनिश्चित बनाएको छ । अब केन्द्रीय कार्यसमितिको निर्णयले कांग्रेस एकतर्फ फर्कने कि औपचारिक विभाजनतर्फ जाने भन्ने स्पष्ट हुने राजनीतिक विश्लेषकहरूको भनाइ छ ।