काठमाडौं । सरकारले मुलुकमा शान्ति सुव्यवस्था र अमनचयन कायम राख्दै निर्वाचनलाई सफल बनाउन आमनागरिकसँग अपिल गरेको छ । गृह मन्त्रालयले आज प्रेस विज्ञप्ति जारी गर्दै आफ्ना आवाज शान्तिपूर्वक राख्न र विरोधका कार्यक्रमलाई शान्तिपूर्ण बनाउन अनुरोध गरेको हो ।

नागरिकका चासो, सरोकार र मागलाई गम्भीरतापूर्वक वार्ता एवं छलफलमार्फत समाधान गर्न सरकार सधैँ सकारात्मक रहेको उल्लेख गर्दै मन्त्रालयले धर्ना जुलुसलगायतका कार्यक्रम गर्नुअगावै वार्ता र संवादका माध्यमबाट समस्याको समाधान गर्ने खोज्न अनुरोध गरेको छ। नयाँ सरकारको गठनसँगै स्थिति नियन्त्रणमा लिई शान्तिसुरक्षाको अवस्था सामान्य बनाउन र आगामी फागुन २१ गतेका लागि तय भएको निर्वाचनको वातावरण तयार गर्नेतर्फ सरकार क्रियाशील रहेको मन्त्रालयका सहसचिव एवं प्रवक्ता आनन्द काफ्लेद्वारा जारी विज्ञप्तिमा उल्लेख छ । देशमा शान्तिसुरक्षा बहाली गर्दै घोषित मितिमा निर्वाचन सम्पन्न गर्न सरोकारवाला तथा आमनागरिकको समेत दायित्व भएको मन्त्रालयले स्पष्ट पारेको छ ।

काठमाडौं । अविरल भारी वर्षाका कारण आएको बाढी र पहिरोले देशका विभिन्न राजमार्ग र सडकहरू अझै अवरुद्ध छन् । आज (बिहीबार) बिहान ८ बजेसम्मको जानकारी अनुसार देशभरका नौं ठाउँका सडक खण्ड पूर्णरुपमा अवरुद्ध भएका छन् भने तीन सडक खण्ड एकतर्फी रुपमा मात्रै सञ्चालन भएका छन् ।

प्रहरीका अनुसार कोशी राजमार्गअन्तर्गत संखुवासभाको भोटखोला गाउँपालिका–४ बरुण र मकालु गाउँपालिका–एकुवामा सडक अवरुद्ध भएको छ । बाढीले इलामको मेची राजमार्ग अन्तर्गत रहेका इलाम नगरपालिका–९ राजदुवालीलगायतका स्थानहरू पूर्ण रुपमा अवरूद्ध भएको छ भने पाँचथरको तमोर करिडोर अन्तर्गत रहेका पाँचथर तुम्वेवा गाउँपालिकाको नावाखोला सडक पूर्णरुपमा बन्द रहेको प्रहरीले जनाएको छ ।

यस्तै बागमती प्रदेशअन्तर्गत रसुवाको गोसाइकुन्ड गाउँपालिका–२ स्थित पासाङ ल्हामु सडकखण्ड पूर्ण रुपमा अवरूद्ध रहेको छ । यस्तै, पहिरोले बीपी रागममार्ग अन्तर्गत रहेको काभ्रेको रोशी खोला गाउँपालिका–११ माम्तीखोला, डालाबेसी, बुल्ढुंगा, बाँझोखेतलगायतका स्थानहरूको सडक पूर्ण रुपमा बन्द रहेको छ भने बीपी राजमार्ग अन्तर्गत नै रहेको सिन्धुलीको सुनकोशी गाउँपालिका–१ नेपालथोक सडक अवरूद्ध भएको छ ।

यस्तै कर्णाली प्रदेश अन्तर्गत रहेका हुम्लाको कर्णाली करिडोरको खर्पुनाथ गाउँपालिका–५ कुरिल्ला सडक र कालिकोटको पचाल झरना गाउँपालिका–८ जुगेनी खोलामा रहेको सडक पूर्ण रूपमा अवरूद्ध रहेको छ । कोशी लोकमार्ग अन्तर्गत रहेको साँगुरीगढी गाउँपालिका–१स्थित चनौटे, ६ घण्टे र सिमसुवागरी तीन ठाउँमा एकतर्फी रूपमा सडक सञ्चालनमा आएको छ । यस्तै बागमती प्रदेश अन्तर्गत मकवानपुरको कान्तिलोकपथ सडकका भिमफेदी गाउँपालिका–८ वगुवा खोला र बकैया गाउँपालिका–११ घटेपाखा सडक एकतर्फी रुपमा सञ्चालनमा आएको प्रहरीले जानकारी दिएको छ ।

हेर्नुस् अवरुद्ध राजमार्ग र सडकको विवरण

काठमाडौं । इजरायल–हमास युद्धविराम भए पनि गत वर्ष हमासको आक्रमणमा बेपत्ता भएका नेपाली विद्यार्थी विपिन जोशीको अवस्थाबारे अझै स्पष्ट जानकारी आइसकेको छैन । इजरायलमा रहेका नेपालका राजदूत धनप्रसाद पण्डितले विपिनको अवस्थाबारे इजरायली अधिकारीहरूसँग निरन्तर सम्पर्कमा रहेको बताएका छन् तर ठोस सूचनाको अभाव रहेको बताएका छन् ।

राजदूत पण्डितका अनुसार विगत केही दिनयता विपिनबारे अनेक चर्चा भए पनि उनको जीवित वा मृत अवस्थाको पुष्टि गर्ने कुनै जानकारी आएको छैन । ‘विपिनको बारेमा धेरैले सोधिरहनु भएको छ, तर उनको जीवनबारे अहिलेसम्म केही जानकारी छैन’, उनले भने ।
परराष्ट्र मन्त्रालयका एक कर्मचारीका अनुसार इजरायली पक्षबाट ‘जुनसुकै अवस्थाको सूचना आउन सक्छ’ भन्ने संकेत आएको छ । ‘त्यसैले परिवारलाई तयार रहन भनिएको छ’, मन्त्रालय स्रोतले जानकारी दियो ।

बेपत्ता विपिनको पुरानो भिडियो फेरि सार्वजनिक
कञ्चनपुरका विपिन जोशी गत वर्ष अक्टोबर ७ मा हमासले इजरायलको किबुत्ज क्षेत्रमा गरेको आक्रमणका क्रममा बन्धक बनाइएको अनुमान छ । उक्त आक्रमणमा १० नेपाली विद्यार्थीको ज्यान गएको थियो । विपिन भने त्यसपछि सम्पर्कविहीन छन् । बुधबार साँझ सार्वजनिक गरिएको ३३ सेकेण्डको एक पुरानो भिडियोमा विपिनले आफ्नो नाम र नेपाली नागरिक भएको पुष्टि गर्दै ‘अर्न एण्ड लर्न’ कार्यक्रम अन्तर्गत इजरायल आएको बताएका छन् ।

उनले गाढा निलो कपडा लगाएको देखिएको उक्त भिडियो कहिले र कहाँ खिचिएको हो भन्ने पुष्टि हुन सकेको छैन । राजदूत पण्डितका अनुसार सो भिडियो नोभेम्बर १७, २०२३ तिर गाजास्थित अल शिफा अस्पतालमा खिचिएको हुनसक्छ । त्यसपछि भने विपिनको अवस्था पूर्णतः अज्ञात रहँदै आएको छ ।

काठमाडौं । नेपाली कांग्रेसको पदाधिकारी बैठक आज कुपण्डोलस्थित एक होटलमा बस्दै छ । बैठकमा सभापति शेरबहादुर देउवा भने सहभागी नहुने भएका छन् । पदाधिकारीबीच अनौपचारिक छलफल भएका कारण उनी सहभागी नहुने भएका हुन् । मुख्य सचिव कृष्ण प्रसाद पौडेलले स्वास्थ्यका कारण देउवा बैठकमा सहभागी नहुने जानकारी दिएका छन् ।

उनले भने, ‘पदाधिकारीबीच अनौपचारिक छलफल हो । उहाँ उपस्थित हुनुहुन्न । अरू कुनै कारण छैन ।’ देउवा सहभागी नहुने भएपछि उपसभापति पूर्णबहादुर खड्काले बैठकको अध्यक्षता गर्नेछन् । सभापति देउवा स्वकीय सचिव भानु देउवाले पनि अनौपचारिक बैठक भएकाले सभापति देउवा नजाने बताए । उनले भने, ‘केन्द्रीय समितिको एजेण्डा बारेको छलफल गर्न अनौपचारिक बैठक हो । उपसभापतिले हेर्नुहुन्छ । स्वास्थ्यको कारण हैन । दिउँसो १ बजे बैठकमा २६ असोजमा बस्ने केन्द्रीय समितिका एजेण्डा, महाधिवेशन, निर्वाचन लगायतबारे छलफल हुने बताइएको छ ।

इलाम । अविरल भारी वर्षासँगै गएको पहिरोमा परी इलाममा ठूलो जनधनको क्षति भएपछि यतिबेला नेकपा एमालेको भातृ संगठन युवा संघ नेपालले राहत वितरण सुरु गरेको छ ।

बुधबार युवा संघका अध्यक्ष क्षितिज थेबे नेतृत्वको टोलीले इलामको माइ नगरपालिकामा राहत वितरण सुरु गरेको युवा संघका प्रवक्ता निरोज पौडेलले जानकारी दिए । प्रवक्ता पौडेलका अनुसार बुधवार बाढीले सबैभन्दा बढी प्रभावित माइ नगरपालिका–७ चेप्टी गाउँमा राहत वितरण गरिएको हो ।

भारी वर्षासँगै गएको बाढीले गाउँ नै ध्वस्त भएको छ । युवा संघले बाढी प्रभावित परिवारलाई प्रतिपरिवार एक बोरा चामल, खाने तेल दुई लिटर, नुन, मरमसला, पिभीसी, म्याट लत्ताकपडा, ब्ल्यांकेट, डस्ना, जुत्ता चप्पल वितरण गरेको छ । युवा संघले बाढी प्रभावित सबै स्थानीय तहमा राहत वितरण गर्ने तयारी गरेको छ । जेनजी आन्दोलनपछि दलका नेता–कार्यकर्ता निष्क्रिय रहेका बेला युवा संघले भने बाढी पहिरो प्रभावित क्षेत्रमा राहतको प्याकेज लिएर जनताकहाँ पुगेको छ ।

जुम्ला । जुम्लामा गुडिरहेको माइक्रो बसभित्रै एक युवक मृत भेटिएका छन् । बुधबार राति साढे ८ बजे हिमा गाउँपालिका–१, आर्चाय गाउँका २२ वर्षीय गणेश रावत गुडिरहेको गाडीभित्रै मृत भेटिएको प्रहरीले जनाएको छ ।

जिल्ला प्रहरी कार्यालय जुम्लाका अनुसार ती युवक मुगुबाट सुर्खेतका लागि छुटेको कर्णाली प्रदेश ०२००१ख ११८०० एसएलएम गाडीमा यात्रा गरिरहेका थिए । जुम्लाका प्रहरी नायब उपरीक्षक (डीएसपी) रविनबाबु रेग्मीले घरमा ओर्लिनु पर्ने बेलामा हेर्दा युवक मृत भेटिएको बताए ।

उनले भने, ‘गाडी मुगुबाट सुर्खेत जाँदै रहेछ । गाडी सानो भएकाले धेरै जनाले यात्रा गरिरनु भएको भन्ने बुझिएको छ । मृतकले मादक पदार्थ सेवन गरेका रहेछन् । घटनाबारे थप अनुसन्धान भइरहेको छ ।’

पोस्टमार्टमका लागि युवकको शव कर्णाली स्वास्थ्य विज्ञान प्रतिष्ठान जुम्लामा राखिएको छ । डीएसपी रेग्मीले मेडिकल रिपोर्ट आएपछि मात्र मृत्युको वास्तविक कारण थाहा पाइने बताएका छन् ।

काठमाडौं । भौतिक पूर्वाधार तथा यातायात, शहरी विकास र ऊर्जा मन्त्री कुलमान घिसिङ बाढी–पहिरोले क्षतिग्रस्त बीपी राजमार्ग अवलोकनका लागि आज (बिहीबार) काभ्रे जाँदैछन् ।

बाढी–पहिरोले क्षतविक्षत बनाएको सडक र त्यसको मर्मतका लागि भइरहेको कामको अनुगमन गर्न घिसिङ काभ्रे जान लागेका हुन् । टोलीमा भौतिक पूर्वाधार तथा यातायात मन्त्रालयका सचिव, सडक विभागका महानिर्देशक लगायत पनि रहने जनाइएको छ ।

यही असोज १७, १८ र १९ गतेको वर्षा र बाढी–पहिरोका कारण बीपी राजमार्गका विभिन्न खण्डमा क्षति पुगेर यातायात अवरुद्ध भएको छ । कुनै कुनै ठाउँमा पैदल हिँड्ने समेत बाटो नहुँदा सर्वसाधारणले सास्ती खेपेका छन् । उनीहरु भिरको पहरो समाउँदै जोखिमपूर्ण तरिकाले हिँडेको फोटो भिडियो हालै सार्वजनिक भएको थियो ।

काठमाडौं । पूर्व सभामुख अग्नि सापकोटाले सरकारी गाडी फर्काएका छन् । सरकारले पूर्व पदाधिकारीहरूलाई दिएको सवारी साधन फिर्ता गर्ने निर्णय गरेसँगै पूर्वसभामुख सापकोटाले गाडी फिर्ता गरेका हुन् । दशैंलगत्तै कार्यालय खुलेको पहिलो दिन मंगलबार संसद् सचिवालयलाई गाडी फिर्ता गरेको सापकोटाको सचिवालयले जनाएको छ ।

सापकोटाको सचिवालयले भनेको छ, ‘मन्त्रीपरिषद्को निर्णयअनुसार संघीय संसद सचिवालयले प्रतिनिधिसभाका पूर्व सभामुख अग्निप्रसाद सापकोटालाई उपलब्ध गराएको BAC २७३१ नम्बरको सवारी साधन दशैंलगत्तै कार्यालय खुलेको पहिलो दिन २०८२ असोज २१ गते मंगलबार संसद सचिवालयलाई फिर्ता गरिएको जानकारी गराउँछौं ।’ यसअघि पूर्व सभामुखद्वय कृष्णबहादुर महरा र ओनसरी घर्तीले पनि गाडी फिर्ता गरेका थिए ।

जनकपुरधाम । नेकपा एमालेले मधेश प्रदेश सरकारबाट समर्थन फिर्ता लिने भएको छ । आज ४ बजे समर्थन फिर्ताको पत्र प्रदेश प्रमुख समक्ष बुझाउने एमालेका प्रमुख सचेतक हरिनारायण महत्वले जानकारी दिएका छन् । मुख्यमन्त्री सतीशकुमार सिंहले जेनजीको आन्दोलनको क्रममा गत भदौ २४ गते फेसबुकबाट राजीनामा घोषणा गरे पनि पछि पछाडि हटे । उनले संसद फेस गर्ने अडान लिएका छन् । जनमत संसदीय दलको निर्देशन नटेरेपछि जनमतले समेत प्रदेश प्रमुख र सभामुख रामचन्द्र मण्डललाई समर्थन फिर्ता र सरकारबाट बाहिरिएको पत्र भदौ ३१ गते नै बुझाइसकेको छ ।

एक साता अगाडि नेपाली कांग्रेसले समेत समर्थन फिर्ता लिइसकेको छ । २०८१ जेठ २५ मा नेकपा एमालेसहितका दलको समर्थनमा जनमतका सतिशकुमार सिंह मुख्यमन्त्री बनेका थिए । अब नेपाली कांग्रेसको नेतृत्वमा सरकार बन्ने सम्भावना छ । नेपाली कांग्रेसका संसदीय दलका नेता कृष्णप्रसाद यादवको नेतृत्वमा नेकपा एमाले, जनमत र लोसपाको गठबन्धनको सरकार बन्ने आन्तरिक सहमति भइसकेको छ । जसमा लोसपाले मात्र सहमति गरेको छैन । १०७ सदस्य मधेश प्रदेश सभामा नेकपा एमालेका २५ कांग्रेसका २२, जनमतका १३ र लोसपाको ९ सिट छ ।

तनहुँ । गण्डकी प्रदेशका मुख्यमन्त्री सुरेन्द्रराज पाण्डेले जेनजी आन्दोलनका क्रममा आगजनी र तोडफोड भएका तनहुँका सरकारी कार्यालयको आज निरीक्षण गरेका छन् । गत भदौ २४ गते जेनजी आन्दोलनका क्रममा आगजनी भएका विभिन्न कार्यालयको मुख्यमन्त्री पाण्डेले निरीक्षण गरेका हुन् ।

मुख्यमन्त्री पाण्डेले जिल्ला प्रशासन कार्यालय, जिल्ला अदालत, जिल्ला समन्वय समितिको कार्यालयको निरीक्षण गर्दै क्षतिको विवरणबारे चासो राखेका थिए । त्यसक्रममा मुख्यमन्त्री पाण्डेले कार्यालयबाट हाल भइरहेका सेवा प्रवाहका बारेमा जानकारी लिएका छन् । त्यसक्रममा मुख्यमन्त्री पाण्डेले जिल्ला प्रशासन कार्यालयका विभिन्न कक्ष, प्रमुख जिल्ला अधिकारीको निवास, अदालतका इजलास, विभिन्न कक्षहरुको निरीक्षण गरेका छन् ।

उनले आन्दोलनबाट गण्डकी प्रदेशका धेरै जिल्लामा क्षति पुगेको बताउँदै वैकल्पिक व्यवस्थाका माध्यमबाट जनतालाई सहज रुपमा सेवा प्रवाह गर्न आग्रह गरे । जिल्ला प्रशासन कार्यालयमा प्रमुख जिल्ला अधिकारी रामकृष्ण अधिकारीले हाल कार्यालयबाट नयाँ नागरिकता र प्रतिलिपिको काम सुरु गरिसकेको जानकारी दिए ।

आगजनी र तोडफोडबाट प्रशासन कार्यालयको भवन पुनः प्रयोग गर्न असुरक्षित रहेकाले अन्य कार्यालयमा व्यवस्थापन गरेर कार्यालयको सेवा सञ्चालन गर्नुपर्ने अवस्था रहेको उनले बताए । उनले भने, ‘हामीले केही कार्यालय हेरेर प्रशासन कार्यालय स्थानान्तरण गर्ने विषयमा पनि हे¥यौ, हालको कृषि ज्ञान केन्द्र अन्यभन्दा उपयुक्त देखिएको छ ।’ निरीक्षणका क्रममा गण्डकी प्रदेशसभा सदस्य अशोककुमार श्रेष्ठ, जिल्ला समन्वय समितिका प्रमुख शान्तिरमण वाग्ले, व्यास नगरपालिकाका प्रमुख वैकुण्ठ न्यौपाने, सहायक प्रमुख जिल्ला अधिकारी दीपक रेग्मी, प्रहरी उपरीक्षक टेकबहादुर कार्कीलगायत उपस्थित थिए ।

काठमाडौं । नेकपा एमाले निकट विद्यार्थी संगठन अनेरास्ववियुले काठमाडौँ महानगरपालिकाका मेयर बालेन शाह र ‘हामी नेपाल’ का संस्थापक सुदन गुरुङविरुद्ध देशभरबाट जाहेरी दिएको छ । उपाध्यक्ष अञ्जना शिवाकोटीले अनेरास्ववियुका देशभरका समितिले आज एकै दिन किटानी जाहेरी दिएको जानकारी दिइन् ।

‘हाम्रा मतहतका सबै कमिटीले आज नजिकको प्रहरी कार्यालयमा गएर जाहेरी दिएका छन्,’ उनले भनिन्, ‘कुनै कमिटीले आफ्नै तरिकाले दिनु भएको छ । तर, अधिकांशले एउटै व्यहोरामा जाहेरी दिनु भएको छ ।’ अनेरास्ववियुले दिएको जाहेरीमा जेनजी आन्दोलनका बेला बालेनको योजनामा आगजनी भएको सुदन गुरुङ लगायतको समूहले त्यसलाई कार्यान्वयन गरेको आरोप लगाइएको छ ।

मेयर बालेन्द्र शाह र हामी नेपालका संस्थापक सुधन गुरुङविरुद्ध कैलाली प्रहरीमा पनि किटानी जाहेरी परेको छ । एमाले निकट विद्यार्थी संगठन अनेरास्ववियुका कैलाली अध्यक्ष कुवेर खड्काले किटानी जाहेरी दिएका हुन् । प्रहरीले जाहेरी बुझेको छ । तर, दर्ता हुन बाँकी छ । देशभर आन्दोलनमा हिंसा भड्काउन भूमिका खेलेको भन्दै जाहेरी दिएको खड्काले बताए । जाहेरीसहित भिडिओ, फोटो तथा फुटेजसहित पेनड्राइभमा प्रमाण राखेर बुझाइएको छ । कैलालीका एसपी नरेन्द्र चन्दले केन्द्रको निर्देशनअनुसार अघि बढ्ने बताए । उनले भने, ‘केन्द्रमा पनि परेको छ । हामी अहिले बुझ्छौं केन्द्रमा कुरा गरेर अघि बढ्छौं ।’

काठमाडौं । नेकपा एमाले निकट अनेरास्ववियुका महासचिव दीपक धामीले राष्ट्रका सम्पदा जलाउनेलाई कारबाही नभए आफूहरू सडकमा उत्रिने चेतावनी दिएका छन् । उनले दलमा विचार र आस्था राखेकै कारण अपराधी करार गर्नु गलत भएको समेत बताए । बुधबार संवाद डबलीले आयोजना गरेको कार्यक्रमा बोल्दै धामीले जेन–जी आन्दोलनप्रति आफूहरूको पनि ऐक्यबद्धता रहेको बताउँदै त्यसमा घुसपैठ भएर गरिएको हत्या, आगजनी र लुटपाट गर्ने र त्यसका लागि उक्साउनेलाई कारबाहीका लागि आफूहरूले प्रहरीमा जाहेरी दिएको बताए ।

‘जेन–जीहरूका मागमा हाम्रो पनि ऐक्यबद्धता थियो, ती माग पूरा गराउन हाम्रोतर्फबाट के गर्नुपर्छ तयार थियौँ र छौँ, तर घुसपैठ गरेर राष्ट्रका सम्पदा, निजी सम्पत्तिमा आगजनी, लुटपाट र व्यक्तिहत्यामा लाग्ने र त्यसमा उक्साउनेलाई कानुनको दायरामा ल्याउनुपर्छ भन्ने हाम्रो माग हो । त्यही मागसहित हामीले हिजो काठमाडौं प्रहरी परिसरमा जाहेरी दिएका छौँ,’ धामीले भने ।

भ्रष्टाचार र अपराधमा दोषीलाई बचाउनु हुँदैन भन्नेमा आफूहरू पनि लागिरहेको बताउँदै धामीले सामाजिक सञ्जलबाट दोषी करार गरेर बदनाम गर्ने कार्यप्रति आफ्नो संगठनको आपत्ति रहेको बताएका छन् । उनले संविधान र कानुनभन्दा कोही व्यक्ति माथि नभएकाले दोषीलाई कानुनी प्रक्रियामा लग्नुपर्नेमा जोड दिए ।

काठमाडौं महानगरपालिकाका मेयर बालेन शाह र ‘हामी नेपाल’ का संयोजक सुधन गुरुङविरुद्ध किटानी जाहेरी दिएकोबारे पत्रकार सम्मेलनमा बोल्दै अमुक व्यक्तिले सरकारलाई निर्देशन दिन थालेपछि आफूहरू सडकमा आउन बाध्य भएको बताए । उनले भने, ‘अराजकतालाई मुक्त गर्नुपर्छ भनेर हामी सडकमा आएका छौँ । हामी आउँछौँ सडकमा, हामी मर्न कफन बाँधेर हिँडेका मान्छे हौं । समाज र देशको लागि मर्न तयार छौं । यो देशमा आगो लगाएर खरानी बनाउनेहरू छाती फुलाएर हिँड्ने ? निर्दोष रहेकाहरू कुनामा लुकेर बस्नु पर्ने हुँदैन ।’ उनले २३ र २४ गतेको घटनाको दोषीलाई कारबाही गर्नुपर्ने बताए । उनले पार्टी अध्यक्ष केपी ओली विगतमा गृहमन्त्री हुँदा राज्यको गोली खाएर एक जना पनि मर्नु नपरेको स्मरण गरे । उनले आन्दोलनमा गोली हान्न निर्देशन प्रधानमन्त्री नदिने पनि बताए ।

मोरङ । कोशी प्रदेश सरकारले केही दिनअघि गएको बाढी–पहिरोले विस्थापितहरुको सबै घर पुनर्निर्माण गरिदिने भएको छ । कोशी प्रदेश सरकारका मुख्यमन्त्री हिक्मतकुमार कार्कीको अध्यक्षतामा आज बसेको प्रदेश विपद व्यवस्थापन परिषद्को बैठकले सबै घर बनाइ दिने निर्णय गरेको हो । विपतमा सबैभन्दा बढी क्षति भएको इलाम, झापा र मोरङका घरहरू तत्कालै बनाउन सुरु गर्ने कोशी प्रदेश सरकारले जानकारी दिएको छ । घरहरूको सम्पूर्ण विवरण संकलन पनि गर्दै जाने र निर्माण कार्य पनि अगाडि बढाउँदै जाने आजको परिषद बैठकले निर्णय गरेको छ ।

त्यस्तै आजको परिषद् बैठकले इलाम जिल्लाका सात पालिकालाई संकटग्रस्त घोषणा गर्नको लागि संघीय सरकारलाई सिफारिस गर्ने निर्णय पनि गरेको छ । प्रदेश सरकारले राहत र पुनस्र्थापनाका लागि इलाम जिल्लामा समन्वय गर्न आर्थिक मामिला तथा योजना मन्त्री रामबहादुर राना, भौतिक पूर्वाधार मन्त्री भूपेन्द्र राई र आन्तरिक मामिला तथा कानुन मन्त्री रेवती रमण भण्डारीलाई जिम्मा दिएको छ । सो टोलीले सम्पूर्ण क्षेत्रको स्थलगत निरीक्षण गर्दै पुनर्निर्माणलाई फिल्डमै खटेर तीव्रता दिनेछ ।

त्यस्तै सुनसरी जिल्लाको हकमा वन पर्यटन तथा वातावरण मन्त्री सदानन्द मण्डल र आन्तरिक मामिला तथा कानुन मन्त्री रेवती रमण भण्डारीले समन्वय गरी काम गर्नेछन् । झापा जिल्लाका लागि खानेपानी , सिँचाइ तथा ऊर्जा मन्त्री एकराज कार्कीलाई आवश्यक पुनर्निर्माण र सबै खालको समन्वय गर्ने जिम्मेवारी तोकिएको छ। आजको परिषद् बैठकले चालु बजेटका खर्च र योजनाहरु हेरेर कटौती गरी पुनर्निर्माणमा खर्च गर्नका लागि कोशी प्रदेश सरकारलाई सिफारिस गर्ने निर्णय पनि गरेको छ ।

भौतिक पूर्वाधार मन्त्रालयले तत्कालै सबै खालका बाटोहरू खुलाउनका लागि आफ्ना सबै संयन्त्र परिचालन गर्नका लागि पनि आजको बैठकले निर्देशन गरेको छ।कोशी प्रदेश सरकारका मुख्यमन्त्री हिक्मत कुमार कार्कीले पुनर्निर्माण र राहतमा कुनै कसर नराखी काम अगाडि बढाउनका लागि बैठक निर्देशन दिएका छन् ।

काठमाडौं । जेनजी आन्दोलनमा ठूलो भौतिक क्षति व्यहोरेका चौधरी समूह (सीजी) ग्रुपले आन्दोलनका क्रममा ज्यान गुमाएका प्रत्येक शहीद परिवारका एक सदस्यलाई रोजगारी दिने घोषणा गरेको छ । सीजी ग्रुपका प्रबन्ध निर्देशक निर्वाण चौधरीले सामाजिक सञ्जालमार्फत यस्तो जानकारी दिएका हुन् । यो आफूहरूको बाचा मात्र नभएर गहिरो कर्तव्य र श्रद्धा भएको उनले बताएका छन् ।

यसका लागि चौधरी ग्रुपका कर्पोरेट कम्युनिकेसन विभाग प्रमुख मधुसूदन पौड्याललाई ९८५१२२४००० मा सम्पर्क गर्न पनि सीजीले अनुरोध गरेको छ । ‘आन्दोलनका शहीदप्रति चौधरी ग्रुपको तर्फबाट हार्दिक श्रध्दाञ्जली एवं परिवारजनप्रति गहिरो समवेदनाका साथ उच्च सम्मान व्यक्त गर्दछौँ । उक्त आन्दोलनका क्रममा हाम्रो निजी निवास, कार्यालय, शोरूम र कारखानाहरूमा भएको ठूलो क्षति र विध्वंसले हामीलाई गहिरो पीडा दिएको छ । यद्यपि, यो पीडादायी घडीमा पनि हामी दृढ आत्मविश्वासका साथ पुनर्निर्माणको यात्रामा अघि बढेका छौँ’, उनले भनेका छन् ।

निर्वाणले भनेका छन्, ‘हामी सँगै उभिनेछौँ, पुनर्निर्माण गर्नेछौँ, आशा, सहानुभूति र सम्मानसहित यो देशको सून्दर र उज्ज्वल भविष्य निर्माण गर्नेछौँ ।’ निर्वाणले यसअघि आन्दोलनकारीले निवासदेखि उद्योग, शोरुमसम्म गरिएको लुटपाट, तोडफोड र आगजनी गरेपनि आफूहरूको सपना जिउँदै रहेको भन्दै उच्च मनोबल देखाएका थिए ।

हेर्नुस् भिडियो

काठमाडौं । नेकपा एमालेका पोलिटब्यूरो सदस्य महेश बस्नेतले वर्तमान सरकारलाई निवर्तमान प्रधानमन्त्री तथा एमाले अध्यक्ष केपी शर्मा ओलीलाई पक्रेर देखाउन खुला चुनौती दिएका छन् । उनले सरकारलाई भने, ‘तिमीमा हिम्मत छ भने ओलीलाई पक्राउ गरेर देखाऊ ।’

पार्टी कार्यालय च्यासलमा बुधबार आयोजित पत्रकार सम्मेलनमा बोल्दै उनले भने, ‘तिम्रो बाउको हिम्मत छ भने केपी ओलीलाई पक्राउ गर । केपी ओली दोषी हुनुहुन्छ र त त्यसो गरेर देखाऊ ।’ बस्नेतको यस्तो तीखो प्रतिक्रिया जेन–जी युवा आन्दोलनका अगुवाहरूले आफूविरुद्ध प्रहरीमा दिएको उजुरीपछि आएको हो । मंगलबार उनीमाथि उजुरी परेपछि, त्यसलाई सरकारले गठन गरेको गौरीबहादुर कार्की नेतृत्वको जाँचबुझ आयोगमा पठाइएको थियो ।

‘दूधले नुहाएका छैनौं, तर भ्रष्टाचारी पनि होइनौं’
पत्रकार सम्मेलनमा बस्नेतले सत्ता पक्षप्रति आक्रोश मात्र होइन, स्वीकृति र चुनौती दुवै मिसिएको बयान दिएका छन् । उनले भने, ‘हामी दूधले नुहाएका छैनौं, तर त्यसले अरुले यत्तिकै भ्रष्टाचारी हो भन्ने आरोप लगाउन पाउँदैन । यदि म भ्रष्टाचारी हुँ भने कारबाही गर । होइन भने नाम लिएर हिनायो भने हामी किन चुप बस्ने ?’

खनाल र घिसिङमाथि पनि छानबिनको माग
सम्पत्ति शुद्धीकरणसम्बन्धी छानबिन विषयमा बोल्दै बस्नेतले अर्थमन्त्री रामेश्वर खनाल र ऊर्जामन्त्री कुलमान घिसिङमाथि पनि छानबिन गर्नुपर्ने माग राखेका छन् । उनको भनाइ थियो, ‘युवाहरूको बलमा सत्तामा पुगेकाहरूका बारेमा पनि हेर्नुपर्छ, नत्र त यो एकपक्षीय हुन्छ ।’

‘एमालेले चाँडै आधिकारिक धारणा सार्वजनिक गर्छ’
बस्नेतले आगामी दिनमा एमालेका शीर्ष नेताहरूले जेन–जी आन्दोलन र पछिल्लो राजनीतिक अवस्थाबारे धारणा सार्वजनिक गर्ने बताएका छन् । उनले २४ गते सचिवालय बैठक र २७ गते केन्द्रीय कमिटीको बैठकपछि एमालेको आधिकारिक धारणा बाहिर ल्याइने समेत जानकारी गराएका छन् ।

काठमाडौँ । काठमाडौँ महानगरपालिकाका मेयर बालेन शाह र जेनजी अगुवा सुदन गुरुङविरुद्ध अर्को जाहेरी पनि परेको छ । युवराज सफल नाम गरेका व्यक्तिले शाह र गुरुङविरुद्ध जाहेरी लिएर आज बुधबार जिल्ला प्रहरी परिसर काठमाडौँ पुगेका हुन् । मंगलबार मात्रै शाह र ‘हामी नेपाल’ का संयोजक तथा जेनजी अगुवा गुरुङविरुद्ध एमालेकै विद्यार्थी संगठन अनेरास्ववियुका पूर्व अध्यक्ष समीक बडालले जाहेरी लिएर पुगेका थिए । यी दुवै जाहेरी अहिलेसम्म दर्ता गरिएको छैन ।

२३ र २४ भदौमा भएका घटनाहरू छानबिन गर्न विशेष अदालतका पूर्व अध्यक्ष गौरीबहादुर कार्कीको अध्यक्षतामा उच्चस्तरीय आयोग बनाइएको छ । अहिले जाहेरी परेका विषय पनि आयोगकै क्षेत्राधिकारभित्र पर्ने भन्दै प्रहरीले आयोगमा पठाउने तयारी गरेको छ । यसअघि सुदन गुरुङसहितको समूहले तत्कालीन प्रधानमन्त्री तथा एमाले अध्यक्ष केपी शर्मा ओली र तत्कालीन गृहमन्त्री तथा नेपाली कांग्रेस नेता रमेश लेखकविरुद्ध जाहेरी लिएर परिसरमा पुगेका थिए ।

२३ भदौको आन्दोलनमा सुरक्षा निकायको गोली लागेर २१ जनाको ज्यान जानुमा उनीहरू नै दोषी रहेकाले पक्राउ गरेर अनुसन्धान गर्नुपर्ने माग थियो । उक्त जाहेरी पनि प्रहरीले दर्ता नगरी आयोगमा पठाएको थियो । अहिले बालेनले सिंहदबार जल्दा समेत आगो निभाउन दमकल नपठाएको र सुदनले आगजनी गरेको भन्दै जाहेरी पर्न थालेको छ ।

काठमाडौं । जेनजीका नाममा विभिन्न समूह देखापरिरहेका बेला अर्को एउटा समूह देखिएको छ– ‘राजसंस्थावादी जेनजी’ । जसले विज्ञप्ति जारी गरी संवैधानिक राजसंस्थासहित १५ बुँदे माग प्रस्तुत गरेको छ र पूरा नभए ‘अन्तिम संघर्षमा होमिने’ चेतावनी दिएको छ । तर विज्ञप्तिमा व्यक्ति कसैको नाम छैन । थप जानकारीका लागि सम्पर्क भन्दै @rajsansthabadi.com लेखिएको छ ।

हेर्नुस् विज्ञप्ति