Author: nepalone

ललितपुर । ललितपुरको खुमलटारस्थित युलेन्स स्कुलमा आगजनी भएको छ । प्रदर्शनकारीहरूले मंगलबार बिहान स्कुलमा आगजनी गरेका हुन् । ललितपुर प्रहरीका अनुसार दमकल त्यसतर्फ गए पनि प्रदर्शनकारीले फर्काएका छन् । ‘ठाउँठाउँमा प्रदर्शन र आगजनी भइरहेको छ । तर प्रहरी पुग्न सकेको छैन । दमकल पनि गएर फर्किएको छ,’ ललितपुरका एक प्रहरीले भने । ललितपुरको जुद्ध बारूण यन्त्र कार्यालयले पनि विभिन्न ठाउँबाट आगजनीको खबर आएप नि जान नसकिएको बताएको छ ।

फायर फाइटर कमाण्डर राजकुमार ठकुरीले सातदोबाटोबाट दमकल फर्किएको हो । ‘सातदोबाटोमा आधा घण्टा सम्म कुर्‍यौं । प्रदर्शनकारीले फर्किन अनुरोध गरेपछि हामी फर्कियौं,’ उनले भने । काठमाडौं सहित देशका विभिन्न स्थानमा कफ्र्यू आदेश जारी गरेको छ । तर प्रदर्शनकारीहरू सडकमा उत्रिएका छन् ।
उनीहरूले विभिन्न स्थानमा आगजनी र तोडफोड गरेका थिए ।

त्यस्तै, प्रदर्शनकारीहरू नेताहरूको घरमा समेत आगजनी तथा तोडफोड गरेका हुन् । आज बिहानै भेला भएका प्रदर्शनकारीले पुनः कार्यालयमा तोडफोड गर्दै आगो लगाएका हुन् । यस्तै विराटनगरको देवकोटा चोक र पुष्पलाल चोकमा प्रदर्शनकारीको ठूलो भिड भेला भई प्रदर्शन भइरहेको छ । प्रदर्शनकारीले पुष्पलाल चोकमा रहेको पुष्पलालको शालिक समेत तोडफोड गरेका छन् । इटहरीमा पनि कफ्र्यु तोड्दै प्रदर्शनकारी सडकमा उत्रिन थालेका छन् । हिजो त्यहाँ भएको प्रदर्शनमा दुई जनाको मृत्यु भएपछि इटहरी अहिले पनि तनावग्रस्त बनेको छ । विराटनगरमा जिल्ला प्रशासन कार्यालयले कफ्र्यु लगाइएको छ ।

काठमाडौं । पूर्व प्रधानमन्त्री तथा नेसपा (नयाँ शक्ति)का अध्यक्ष बाबुराम भट्टराईले ‘जेनजी’ पुस्ताले सुरु गरेको आन्दोलनप्रति एक्यवद्धता व्यक्त गरेका छन् । आज सामाजिक सञ्जालमा उनले देशको नयाँ पुस्ताले नयाँ इतिहास निर्माणको शुरूवात गरेको भन्दै यसबाट आफू असाध्यै गौरवान्वित भएको पनि बताएका हुन् ।

‘भनिन्छ– नेतृत्व इतिहासको आवश्यकता र आकस्मिकताले जन्मिन्छ । अनि नयाँ नेतृत्व संघर्ष मार्फत पुरानो विचार र पुरानो नेतृत्वलाई विस्थापित गरेर मात्र स्वयं स्थापित हुन्छ,’ उनले सामाजिक सञ्जाल फेसबुकमा लेखेका छन्, ‘नेपालमा त्यसको शुरूवात हुनु ऐतिहासिक महत्वको परिघटना हो । त्यसनिम्ति तपाईंहरूलाई हार्दिक वधाइ !’

उनले आन्दोलनमा सहभागी युवा पुस्तालाई आन्दोलन बिचमै नछाड्न पनि आग्रह गरेका छन् । त्यसै गरी भट्टराईले आन्दोलनको अधिकतम र न्यूनतम लक्ष्य किटान गर्न, कसैको वहकावमा नलाग्न, आन्दोलनमा गलत तत्वहरूको घुसपैठ हुन नदिन पनि सुझाव दिएका छन् ।

‘भूइँको टिप्न खोज्दा पोल्टाको नखसोस्’ भन्ने हाम्रो लोकोक्तिलाई हमेशा स्मरण गर्नुपर्छ । नेपालको वर्तमान सन्दर्भमा भ्रष्टाचार रोक्न, आर्थिक समृद्धि हासिल गर्न, राजनीतिक स्थीरता प्राप्त गर्नकानिम्ति यो संविधानमा महत्वपूर्ण अग्रगामी सुधार गर्नुपर्छ । तर सार्वभौम जनताले संविधानसभाबाट बनाएको संविधाननै भत्काउने वा गणतन्त्र, संघीयता, धर्मनिरपेक्षता, समावेसी लोकतन्त्र जस्ता आधारस्तम्भहरूमाथि छेडछाड गर्ने गल्ती गर्नुहुन्न,’ भट्टराईले भनेका छन्, ‘तपाईंहरू सबैलाई पूर्ण सफलता र उज्ज्वल भविष्यको हार्दिक शुभकामना !’

काठमाडौं । सत्ता साझेदार नेपाली कांग्रेसका नेता डा. शेखर कोइराला आफ्नो एक हप्ते चीन भ्रमण छोट्याएर भोलि (बुधबार) नेपाल फर्कने भएका छन् । देशमा विकसित पछिल्लो राजनीतिक घटनाक्रमलाई गम्भीरतापूर्वक लिँदै उनले पूर्व निर्धारित कार्यक्रम छोट्याउने निर्णय गरेको उनका स्वकीय सचिव दिनेश थपलियाले जानकारी दिएका छन् ।

चीनको सान्सी विश्वविद्यालयको निमन्त्रणामा सियान सहर पुगेका डा. कोइराला ‘बेल्ट एन्ड रोड–क्षेत्रीय सहकार्य, प्रशासन र विकास गोष्ठी’ मा प्रमुख वक्ताका रूपमा सहभागी भइरहेका थिए ।

तर, उनले निर्धारित समयभन्दा अगाडि नै स्वदेश फर्किने निर्णय गरेपछि यसलाई अर्थपूर्ण रूपमा हेरिएको छ । डा. कोइराला भोलि बुधबार रातिसम्म नेपाल आइपुग्ने कार्यक्रम रहेको छ । उनको हतारको स्वदेश फिर्तीले नेपाली राजनीतिमा थप सरगर्मी बढाउने अनुमान गरिएको छ ।

काठमाडौं । जिल्ला प्रशासन कार्यालय काठमाडौंले हिजोदेखि लगाएको कर्फ्यू अवधि आज (मंगलबार) बिहान ५ बजे सकिएको छ । हिजो दिनभरजसो अशान्त बनेको सडकमा अहिले फाट्टफुट्ट गाडीहरु चलिरहेका छन् । अहिले सडक सफाइ गर्ने कर्मचारीहरु खटिएका देखिन्छन् ।

सामाजिक सञ्जालमाथिको प्रतिबन्ध र भ्रष्टाचारविरुद्ध जेनजी पुस्ताका युवाहरुले हिजो काठमाडौं प्रदर्शन गर्दा प्रहरीको गोली लागेर १९ जनाको ज्यान गएको छ । प्रहरीसँग झडप सुरु भएपछि जिल्ला प्रशासन कार्यालय काठमाडौंले हिजो मध्याह्नदेखि लगाएको कर्फ्यूको समय बढाउँदै आज बिहान ५ बजेसम्म लम्ब्याएको थियो ।

त्यसपछि पनि कर्फ्यू हटाइयो कि थपियो भन्नेबारे प्रशासन कार्यालयले केही जानकारी गराएको छैन । प्रमुख जिल्ला अधिकारी, सहायक प्रमुख जिल्ला अधिकारी, प्रवक्तालगायत कसैले पनि फोन उठाएका छैनन् । जिल्ला प्रशासन कार्यालय काठमाडौंका एक अधिकारीले भने आज जिल्ला सुरक्षा समितिको बैठक बसेर आवश्यक निर्णय लिने जानकारी दिए ।

काठमाडौं । नेपालस्थित नौं देशका राजदूतावासले जेनजी आन्दोलनमा प्रहरीको गोलीबाट १९ जनाको मृत्यु भएको भन्दै गहिरो दुःख व्यक्त गरेका छन् ।

सोमबार राति अस्ट्रेलिया, फिनल्याण्ड, फ्रान्स, जापान, कोरिया गणतन्त्र, बेलायत, नर्वे, जर्मनी, र संयुक्त राज्य अमेरिकाका नेपालस्थित दूतावासहरूबाट संयुक्त विज्ञप्ति जारी गर्दै उनीहरुले शान्तिपूर्ण सभा र अभिव्यक्ति स्वतन्त्रताको सार्वभौमिक अधिकारप्रति दृढ समर्थन रहेको उल्लेख गरेका छन् ।

उनीहरुले सबै पक्षलाई संयम अपनाउन र परिस्थितिलाई थप बिग्रन नदिइ शान्तिपूर्ण समाधान गर्न र मौलिक अधिकारहरुको पूर्ण संरक्षण सुनिश्चित गर्न आग्रह गरेका छन् ।

‘हाम्रा सरकारहरूले शान्तिपूर्ण सभा र अभिव्यक्तिको स्वतन्त्रताको सार्वभौमिक अधिकारप्रति आफ्नो दृढ समर्थन पुनः व्यक्त गर्दछ । हामी सबै पक्षलाई अधिकतम संयम अपनाउन, परिस्थितिलाई थप बिग्रिन नदिई शान्तिपूर्ण तरिकाले समाधान खोज्न तथा यी मौलिक अधिकारहरूको पूर्ण संरक्षण सुनिश्चित गर्न आग्रह गर्दछौं’, विज्ञप्तिमा भनिएको छ ।

हेर्नुस् संयुक्त प्रेस विज्ञप्ति

अस्ट्रेलिया, फिनल्याण्ड, फ्रान्स, जापान, कोरिया गणतन्त्र, बेलायत, नर्वे, जर्मनी, र संयुक्त राज्य अमेरिकाका नेपालस्थित दूतावासहरूबाट ः

हामी काठमाडौं तथा नेपालका अन्य स्थानहरूमा आज देखिएका हिंसात्मक घटनाप्रति गहिरो दुःख व्यक्त गर्दछौं । यी घटनाहरूका कारण ज्यान गुमाउने दुःखद अवस्था उत्पन्न भएको र कैयौं घाइते भएकोमा हामी संवेदनशील भएका छौं । पीडित परिवारजन, प्रभावित व्यक्तिहरूप्रति हामी हार्दिक समवेदना प्रकट गर्दछौं ।

साथै, घाइते सबैलाई शीघ्र स्वास्थ्यलाभको कामना गर्दछौं । हाम्रा सरकारहरूले शान्तिपूर्ण सभा र अभिव्यक्तिको स्वतन्त्रताको सार्वभौमिक अधिकारप्रति आफ्नो दृढ समर्थन पुनः व्यक्त गर्दछ । हामी सबै पक्षलाई अधिकतम संयम अपनाउन, परिस्थितिलाई थप बिग्रिन नदिई शान्तिपूर्ण तरिकाले समाधान खोज्न तथा यी मौलिक अधिकारहरूको पूर्ण संरक्षण सुनिश्चित गर्न आग्रह गर्दछौं ।