Author: nepalone

दक्षिण कोरियाको इन्चेओन शहरमा रहेको अर्धचालक (चिप) उत्पादन कारखानामा ग्यास चुहावट हुँदा २२ जना घाइते भएका छन्।

घटना ८ गते दिउँसो करिब २.३५ बजे भएको हो। ग्यास चुहावटका कारण चार जना कामदारलाई सास फेर्न गाह्रो हुने जस्ता समस्या देखिएपछि अस्पताल भर्ना गरिएको छ, भने अन्य १८ जना आफैं उपचारका लागि अस्पताल गएका थिए। सबैको अवस्था सामान्य रहेको जनाइएको छ।

घटनापछि कारखानामा कार्यरत तथा वरपरका कार्यालयमा काम गर्ने गरी झन्डै १२० जनालाई सुरक्षित रूपमा बाहिर निकालिएको थियो।

स्थानीय बासिन्दाहरूलाई पनि सतर्कता अपनाउन भन्दै घरबाहिर ननिस्कन सन्देश पठाइएको थियो।

प्रारम्भिक अनुमानअनुसार, हाइड्रोक्लोरिक अम्ल राखिएको ट्याङ्कीमा गलत रूपमा रसायन हालिँदा ग्यास चुहावट भएको हो।

हाल प्रहरी र दमकल विभागले घटनाको विस्तृत अनुसन्धान गरिरहेका छन्।

उत्तरी अफगानिस्तानको बदख्सान प्रान्तमा एउटा सवारी साधन खोलामा खसेर दुर्घटना हुँदा ११ जना यात्रुको मृत्यृ हुनुको साथै एक जना घाइते भएको स्थानीय प्रहरी अधिकारीले मङ्गलबार बताएका छन ।

चालकको लापरवाहीका कारण दराइम जिल्लामा यो दुर्घटना भएको जिल्ला प्रहरी प्रमुख सैयद मिर खङ्गरले पुष्टि गर्नुभयो । उहाँका अनुसार एक परिवारका सात जनासहित ११ जनाको घटनास्थलमै मृत्यु भएको छ ।

यसअघि सोमबार बिहान पूर्वी गजनी प्रान्तमा कार र बसको टक्करमा छ जनाको ज्यान गएको थियो भने अर्का एक जना घाइते भएका थिए ।

 

युक्रेनको पूर्वी डोनेट्स्क क्षेत्रमा मङ्गलबार भएको रुसी हमलामा कम्तीमा २० जनाको मृत्यु भएको राष्ट्रपति भोलोदिमर जेलेन्स्कीले सामाजिक सञ्जालमार्फत बताएका छन् ।

मस्कोले अझै पूर्ण नियन्त्रण नलिए पनि औद्योगिक क्षेत्रलाई रुसको हिस्सा दाबी गरेको छ । किएभका अनुसार, क्रेमलिनले नयाँ आक्रमणका लागि फ्रन्टलाइनमा करिब एक लाख सेना परिचालन गरिसकेको छ ।

“डोनेट्स्कको यारोभा गाउँमा पेन्सन वितरण भइरहेको बेला रूसी युद्धविमानबाट प्रत्यक्ष नागरिकमाथि आक्रमण भयो । प्रारम्भिक विवरणअनुसार २० जनाभन्दा बढीको मृत्यु भएको छ”, जेलेन्स्कीले आफ्नो पोस्टमा भने ।

डोनेट्स्कका गभर्नरले २१ जनाको मृत्यु र सोही सङ्ख्यामा घाइते भएको जानकारी दिए ।

जेलेन्स्कीले घटनास्थलबाट लिइएका भिडियोसमेत सार्वजनिक गरे, जसमा खेलमैदान नजिकै जलेको मिनी–भ्यान, छरिएका लाश, व्यक्तिगत सामान, कागज र जुत्ताहरू देखिन्थे । एएफपीले युक्रेनी अधिकारीहरूले पोस्ट गरेका ती तस्बिरहरू स्वतन्त्र रूपमा प्रमाणित गर्न सकेको छैन ।

युद्धपूर्व करिब एक हजार नौ सय जनसङ्ख्या रहेको यारोभा अग्रपङ्क्तिबाट करिब आठ किलोमिटर (पाँच माइल)टाढा पर्छ ।

जेलेन्स्कीले अन्तर्राष्ट्रिय समर्थनको आह्वान गर्दै भने, “संयुक्त राज्य अमेरिकाबाट प्रतिक्रिया आवश्यक छ । युरोपबाट प्रतिक्रिया आवश्यक छ । जी–२० बाट प्रतिक्रिया आवश्यक छ । रुसले मृत्यु ल्याउने काम रोक्न कठोर कदम चालिनुपर्छ ।”

सेनाद्वारा समर्थित उद्धारकर्ताहरूले मध्य पाकिस्तानी सहरबाट रातारात करिब एक लाख मानिसलाई बाहिर निकालेका छन् । बाढीको पानीले घर डुबाएर खेतीयोग्य जमिन बगाएपछि धेरैलाई पाल र खुला क्षेत्रमा भीषण गर्मी सहन बाध्य भएको बताइएको छ ।

पञ्जाब विपद् व्यवस्थापन समितिका महानिर्देशक इरफान अली काठियाका अनुसार विगत २४ घण्टामा जलालपुर पिरवालाबाट मात्रै एक लाख २२ हजारभन्दा बढी विस्थापित भएका छन् । केही आफन्तसँग आश्रय लिएका छन् भने अरू राहत शिविरमा बसिरहेका छन् ।

तर बाढीग्रस्त जिल्लाहरूका अधिकांश पीडितले सहयोग ढिलो वा न्यून मात्रामा आएको गुनासो गरेका छन् । सरकारले भने उद्धार र राहत कार्य सँगसँगै चलिरहेको र दैनिक आवश्यक सामग्री पठाइनेमा जोड दिएको छ ।

हप्तौँदेखि जारी भारी वर्षा, आरी घोप्टे वर्षा र भारतको बाँधबाट छोडिएको पानीका कारण गत महिनादेखि पञ्जाबमा मात्रै २२ लाख मानिस विस्थापित भएको अधिकारीहरूले बताएका छन् । बाढीका कारण कम्तीमा ६१ जनाको मृत्यु भएको छ ।

मुल्तान अझै बाढीको जोखिममा रहेको र नदीको सतह बढिरहेको काठियाले बताए । सहरहरूलाई सुरक्षित राख्न ग्रामीण क्षेत्रमा नियन्त्रित रूपमा तटबन्ध फुटाइने तयारी भइरहेको उहाँले जानकारी दिए ।

“समयमै निकासी गरेर धेरैको ज्यान बचाउन सफल भयौँ, तर कतिपयले पानी गाउँमा नपुगुन्जेल जान अस्वीकार गरे”, उनले भने । बाँकीलाई पत्ता लगाउन थर्मल इमेजिङ ड्रोन प्रयोग गरिएको बताइएको छ ।

४५ वर्षीया जारिनी बीबी आफ्ना बच्चाहरूसहित डुङ्गामा गाउँ छाडेर भाग्न बाध्य भए । “मैले यस बाढीमा प्रलय देखेँ”, उनले भने, “मेरो सपना र मेरो घर अब पानीमुनि छ । हामीसँग केही बाँकी छैन ।” अहिले उनी राहत शिविरमा थोरै खाना र भीषण गर्मीसँग सङ्घर्ष गरिरहेका छन् ।

अर्का विस्थापित तारिक उल्लाहले आफन्तले आश्रय दिन अस्वीकार गरेपछि सडक किनारको पालमा बस्नुपरेको बताए । “भगवान्लाई धन्यवाद, हाम्रो जीवन बच्यो । घर फेरि बनाउन सकिन्छ तर जीवन एकपटक मात्र पाइन्छ”, उनले भने ।

अगस्ट २३ यता पञ्जाबका २६ जिल्लाका तीन हजार नौ सय गाउँ डुबानमा परेको बताइएको छ । यसैबीच, भारतले खतराको निशानामाथि पुगेको नदीको तथ्याङ्क पाकिस्तानसँग साझा गरेको छ, जसले सीमावर्ती क्षेत्रमा थप बाढीको जोखिम बढाएको छ ।

जुनको अन्त्यदेखि पाकिस्तानी मनसुनी बाढीले नौ सयभन्दा बढीको ज्यान लिएको छ । हाल करिब ८० हजार मानिस पञ्जाबभर राहत शिविरमा छन् भने दक्षिणी सिन्ध प्रान्तमा पनि एक लाखभन्दा बढीलाई निकासी गरिएको छ । सन् २०२२ को विनाशकारी बाढीमा सिन्ध सबैभन्दा प्रभावित बनेको थियो । उक्त बाढीमा एक हजार सात सय ३९ जनाको मृत्यु भएको थियो ।

पूर्वी कङ्गोमा इस्लामिक–राज्यसँग सम्बद्ध विद्रोही समूहले रातभर गरेको आक्रमणमा कम्तीमा ६० जनाको मृत्यु भएको एक अधिकारीले बताएका छन् ।

उत्तरी किभुको न्टोयोमा बासिन्दाहरू चिहानमा भेला भएका बेला एलाइड डेमोक्रेटिक फोर्स (एडिएफ) ले हमला गरेको जनाइएको छ ।

“एडिएफको आक्रमणमा करिब ६० जनाको ज्यान गयो, तर अन्तिम सङ्ख्या आज साँझ पछि मात्रै आउँछ, किनभने भर्खरै टाउको काटिएका मानिसहरूको सङ्ख्या गणना गर्न सेवाहरू तैनाथ गरिएको छ”, लुबेरो क्षेत्रका स्थानीय प्रशासक कर्नल एलेन किवेवाले एसोसिएटेड प्रेसलाई भने ।

एकजना बचेकी महिलाले भनिन्, “तिनीहरूमध्ये करिब १० जना थिए । मैले मुख ढाकेका उनीहरू देखेँ । उनीहरूले मानिसहरूलाई एउटै ठाउँमा भेला हुन भने र काट्न थाले । मैले चिच्याउने आवाज सुनेँ र अन्त्यमा बेहोस भएँ ।” उनले प्रतिशोधको डरले नाम नखुलाउन अनुरोध गरेकी छिन् ।

निर्माण कार्यका क्रममा स्लोभाकियाको राजधानीमा दोस्रो विश्वयुद्धको बम फेला परेपछि मङ्गलबार डाउनटाउन क्षेत्र निकासी गरिएको अधिकारीहरूले जनाएका छन् ।

आपत्कालीन व्यवस्थाले डेन्युब नदी पार गर्ने प्रमुख पुलसहित ब्रातिस्लाभाको डाउनटाउनका धेरै ब्लकलाई प्रभावित पारेको थियो । बिहानको भीड समयमा सार्वजनिक यातायात र सम्पूर्ण यातायात पूर्ण रूपमा रोकिएको थियो ।

विज्ञहरूले सोमबार साँझ फेला परेको पाँच सय पाउन्ड( दुई सय २५ किलोग्राम) तौलको बमलाई दिउँसोसम्म निष्क्रिय पार्ने योजना बनाएका छन् ।

यस क्षेत्रमा रहेको एउटा तेल प्रशोधन केन्द्र सन् १९४४ मा युद्धको समयमा मित्र राष्ट्रहरूको बमबारीको निशाना बनेको थियो । त्यतिबेला स्लोभाकिया नाजी कठपुतली राज्यको रूपमा रहेको थियो ।

इरानका विदेशमन्त्री अब्बास अराघचीले मङ्गलबार इजिप्टमा संयुक्त राष्ट्र आणविक वाचडगका प्रमुख राफेल ग्रोसीसँग भेट्ने भएका छन् । तेहरानले दुई महिनाअघि एजेन्सीसँगको सहयोग स्थगित गरेपछि हुने यो पहिलो बैठक हो ।

इरानको आधिकारिक इरना समाचार एजेन्सीका अनुसार कायरो भ्रमणका क्रममा इरान र एजेन्सीबीचको अन्तरक्रियाका लागि नयाँ प्रोटोकलमा वार्ता सम्पन्न गर्न अन्तर्राष्ट्रिय आणविक ऊर्जा एजेन्सी ९आइएइए० का महानिर्देशकसँग बैठक हुनेछ ।”

इजिप्टको विदेश मन्त्रालयले पनि मङ्गलबार हुने उक्त बैठकको पुष्टि गर्दै इजिप्टका विदेशमन्त्री बद्र अब्देलट्टी, अराघची र ग्रोसीलाई एकैसाथ ल्याउने जनाएको छ ।

यो बैठक जुनमा इजरायलसँगको १२ दिने युद्धपछि इरानले सहयोग स्थगित गरेयता पहिलो हो । उक्त द्वन्द्वमा इजरायल र संयुक्त राज्य अमेरिकाले इरानी आणविक सुविधाहरूमा आक्रमण गरेका थिए ।

तेहरानले ती आक्रमणहरूको निन्दा गर्न असफल भएकोमा आइएइएको आलोचना गर्दै एजेन्सीसँगको भविष्यको सहयोग ‘नयाँ रूप’ लिने चेतावनी दिएको छ ।

गत महिना, आइएइए निरीक्षकहरूको टोली बुसेहर आणविक ऊर्जा संयन्त्रमा इन्धन प्रतिस्थापन निरीक्षणका लागि इरान पुगेका थिए तर केही समयपछि फर्किएका थिए । उनीहरूलाई फोर्डो र नातान्जलगायत द्वन्द्वबाट प्रभावित प्रमुख साइटहरूमा पहुँच दिइएको थिएन ।

सन् २०१५ को आणविक सम्झौतामा पुनः फर्किन इरानलाई अहिले बढ्दो दबाब छ । बेलायत, फ्रान्स र जर्मनीले सम्झौताको विवाद समाधान संयन्त्रअन्तर्गत संयुक्त राष्ट्रसङ्घीय प्रतिबन्ध पुनः लागू गर्न कदम चालेका छन् ।

यी तीन युरोपेली मुलुकले इरानले आफ्ना आणविक प्रतिबद्धताहरू पालना नगरेको भन्दै तथाकथित ‘स्न्यापब्याक’ संयन्त्र प्रयोग गर्ने चेतावनी दिएका छन् । इरानले भने यसलाई ‘अवैध’ ठहर गर्दै कडा आपत्ति जनाएको छ र यसले आइएइएसँगको सहयोगलाई अझ कमजोर पार्ने चेतावनी दिएको छ ।

पश्चिमी शक्तिहरू र इजरायलले लामो समयदेखि इरानलाई आणविक हतियार विकास गर्ने आरोप लगाउँदै आएका छन् । तर तेहरानले आफ्नो आणविक कार्यक्रम शान्तिपूर्ण उद्देश्यका लागि मात्र भएको दाबी गर्दै ती आरोपहरू दृढतापूर्वक अस्वीकार गर्दै आएको छ ।

बङ्गलादेशले दुर्गा पूजाअघि भारतमा एक हजार दुई सय टन हिल्सा (स्थानीय रूपमा ‘इलिस’ भनिने)माछा निर्यात गर्न अनुमति दिने निर्णय गरेको छ ।

“सरकारले चालु वर्ष २०२५ मा दुर्गा पूजाको अवसरमा भारतलाई सशर्त एक हजार दुई सय मेट्रिक टन हिल्सा निर्यात गर्ने नीतिगत निर्णय गरेको छ”, बङ्गलादेशको वाणिज्य मन्त्रालयले सोमबार राति जारी गरेको अधिसूचनामा उल्लेख छ ।

अधिसूचनामा भनिएको छ, “इच्छुक निर्यातकहरूले सन् २०२५ सेप्टेम्बर ११ को साँझ ५ बजेभित्र कार्यालय समयमा हार्ड कपीमा आवेदन पेस गर्नुपर्नेछ ।”

यसका लागि निर्यात कम्पनीको अद्यावधिक व्यापार इजाजतपत्र, इआरसी, आयकर प्रमाणपत्र, भ्याट प्रमाणपत्र, बिक्री सम्झौता र मत्स्य विभागको इजाजतपत्रसहित आवश्यक कागजात संलग्न गर्नुपर्ने उल्लेख गरिएको छ ।

सरकारले हिल्सा प्रतिकिलोको न्यूनतम निर्यात मूल्य १२.५० अमेरिकी डलर तोकेको छ । अधिसूचनामा भनिएको छ, “यसअघि आवेदन पेस गरेका निर्यातकहरूले पनि नयाँ आवेदन दिनुपर्नेछ ।”

गत वर्ष सन् २०२४ सेप्टेम्बर २७ मा करिब ४५–५० टन तौल भएको बङ्गलादेशको ‘पद्मा हिल्सा’ को पहिलो खेप पश्चिम बङ्गाल पुगेको थियो । त्यसबेला दुर्गा पूजाअघि आएको उक्त आयातलाई अधिकारीहरूले स्वागत गरेका थिए ।

बङ्गलादेशको अन्तरिम सरकारले गत वर्ष भारतमा कुल दुई हजार चार सय २० टन हिल्सा निर्यात गरेको थियो ।

हाल हावडा होलसेल माछा बजारमा हिल्साको थोक मूल्य प्रतिकिलो एक हजार चार सयदेखि एक हजार छ सय रुपैयाँ ९स्थानीय मुद्रा० सम्म पुगेको छ ।

उत्कृष्ट स्वादका कारण चर्चित यो माछा पेट्रापोल–बेनापोल सीमा हुँदै हावडा बजारमा आइपुग्छ र त्यसपछि कोलकाता तथा आसपासका खुद्रा बजारमा वितरण गरिन्छ ।

सन् २०१२ जुलाईदेखि बङ्गलादेशले हिल्सा निर्यातमा प्रतिबन्ध लगाएको थियो । तर सन् २०१९ देखि दुर्गा पूजाको समयमा भारतका लागि विशेष अनुमति प्रदान गर्दै निर्यात गर्ने परम्परा सुरु भएको हो ।