Author: nepalone

चिनियाँ राष्ट्रपति सी जिनपिङ र रुसका राष्ट्रपति भ्लादिमिर पुटिनले यस हप्ता बेइजिङको विशाल सैन्य परेड अघि कुराकानी गर्दा जीवन बढाउने अङ्ग प्रत्यारोपण र अमरत्वसम्बन्धी सम्भावनाबारे छलफल गरेका छन् ।

ऐतिहासिक तस्बिरहरूमा सीले हात मिलाउँदै र पुटिन तथा उत्तर कोरियाली नेता किम जोङ उनसँग कुरा गर्दै तियानानमेन स्क्वायरको रेड कार्पेटमा हिँडिरहेका देखिएका छन् । ति दृश्यहरूले अमेरिकी राष्ट्रपति डोनाल्ड ट्रम्पका लागी एउटा चुनौतीको रूपमा लिन सकिन्छ।

“यी दिनहरू।।। ७० वर्ष पुरानो”, सीले म्यान्डारिनमा पुटिन र किमको छेउमा हिँड्दै भनेका छन् राज्य प्रसारणकर्ता सिसिटिभीको फुटेजले देखायो ।

सीका अनुवादकले पुटिनलाई आफ्नो टिप्पणी सुनाए । त्यसपछि रूसी भाषामा ताङ राजवंशको कविताको एउटा पङ्क्ति उद्धृत भयोः “विगतमा, कोही ७० वर्षभन्दा माथि हुनु दुर्लभ हुन्थ्यो र आजका दिनहरूमा तिनीहरू भन्छन् कि ७० वर्षको उमेरमा पनि कोही बच्चा हुँदैछ ।”

त्यसपछि पुटिनले हातले इशारा गर्दै सीतिर फर्किए, यद्यपि सिसिटिभी फिडमा सुन्न सकिँदैन ।

चिनियाँ अनुवादकले त्यसपछि पुटिनको टिप्पणी सीलाई रिले गरे ।

“।।। बायोटेक्नोलोजीको विकाससँग, मानव अङ्गहरू निरन्तर प्रत्यारोपण गर्न सकिन्छ, मानिसहरू उमेर बढ्दै जाँदा जवान हुन सक्छन्, र अमर पनि हुन सक्छन्”, अनुवादकका अनुसार पुटिनले भने ।

क्यामेरा कट भएपछि सीले फेरि म्यान्डारिनमा बोले, “भविष्यवाणीहरू छन्, यो शताब्दीमा, यो।।। एक सय ५० वर्षको उमेरसम्म बाँच्न सम्भव हुनसक्छ ।”
पुटिनले बुधबार पत्रकार सम्मेलनमा आदानप्रदानको पुष्टि गरे ।

“ओहो, मलाई लाग्छ हामी परेडमा जाँदै गर्दा राष्ट्रपतिले यस विषयमा कुरा गरेका थिए”, उनले सीलाई उद्धृत गर्दै पत्रकारहरूलाई भने, “आधुनिक माध्यमहरू–स्वास्थ्य सुधार र चिकित्सा प्रविधिहरू र त्यसपछि अङ्ग प्रतिस्थापनसँग सम्बन्धित सबै प्रकारका शल्यक्रियाले–मानवतालाई सक्रिय जीवन जारी राख्ने आशा दिन्छ जुन आज जस्तो छैन ।”

बहत्तर वर्षका दुवै चिनियाँ र रुसी नेताहरूले पदबाट हट्ने कुनै इच्छा व्यक्त गरेका छैन ।

सीका पूर्ववर्तीहरू जियाङ जेमिन र हु जिन्ताओले १० वर्षको कार्यकालपछि सत्ता त्यागेका थिए। तर सीले सन् २०१८ मा कार्यकालको सीमा समाप्त भए पनि सन् २०२३ मा तेस्रो कार्यकाल ग्रहण गर्दै चिनियाँ राष्ट्रपतिको रूपमा कार्यरत छन् ।

अमेरिका । राष्ट्रपति डोनाल्ड ट्रम्पको प्रशासनले बुधबार अमेरिकी सर्वोच्च अदालतसमक्ष विश्वव्यापी बजारमा प्रभाव पर्ने भन्सार शुल्कको संरक्षण सुनिश्चित गर्न द्रुत निर्णय लिन आग्रह गरेको छ ।

प्रशासनले तल्लो अदालतको फैसलाले पहिले नै व्यापार वार्तामा नकारात्मक प्रभाव पारेको दाबी गरेको छ ।

महान्यायाधिवक्ता जोन सोअरले अदालतमा भने, “राष्ट्रपतिको भन्सार शुल्कको पूर्ण कानूनी स्थिति छिटो पुष्टि गर्नु अत्यन्त महत्त्वपूर्ण छ । यस मुद्दाको समाधान सकेसम्म द्रुत गर्न आवश्यक छ ।”

यो याचिका अमेरिकी अपील अदालत(फेडरल सर्किट) को ७–४ फैसलापछि दायर गरिएको हो । अपील अदालतले ट्रम्पले आपत्कालीन आर्थिक शक्तिको दुरुपयोग गर्दै व्यापक भन्सार शुल्कहरू लगाउने क्रममा आफ्नो अधिकार पार गरेको पत्ता लगाएको थियो ।

यद्यपि, न्यायाधीशहरूले अक्टोबर मध्यसम्म लेभीहरू लागू गर्न अनुमति दिएका छन्, जसले ट्रम्पलाई सर्वोच्च अदालतमा मुद्दा लड्न समय दिएको छ ।

राष्ट्रपतिमा फर्किएपछि ट्रम्पले युरोपेली सङ्घ (इयु), जापान र अन्य दर्जनौँ अर्थतन्त्रका लागि १० प्रतिशत आधारभूत दर र उच्च दरसहित लगभग सबै अमेरिकी व्यापारिक साझेदारहरूमाथि ‘पारस्परिक’ भन्सार शुल्क लगाएको थियो ।

साथै, अमेरिकी राष्ट्रपतिले संयुक्त राज्य अमेरिकामा घातक लागुऔषधको प्रवाहलाई ध्यानमा राख्दै मेक्सिको, क्यानाडा र चीनमाथि छुट्टै कर लगाउने समान अधिकार प्रयोग गरेको थियो ।

अपील अदालतले आपत्कालीन ऐन प्रयोग गरेर आफ्नो अधिकार नाघिएको फैसला गरेको थियो ।

यस फैसलाले इयु जस्ता प्रमुख व्यापारिक साझेदारहरूसँग ट्रम्पले गरेका सम्झौतामा शङ्का सिर्जना गरेको छ । यदि कन्जर्भेटिभ बहुमतको सर्वोच्च अदालतले ट्रम्पको पक्षमा निर्णय दिएन भने, संयुक्त राज्य अमेरिकाले सङ्कलन गरेको अर्बौं डलरको भविष्य अनिश्चित देखिएको छ ।

याचिकामा वित्तमन्त्री स्कट बेसेन्टले अपील अदालतको निर्णयले प्रशासनलाई ‘पर्याप्त वार्ताको लाभ’ लिन रोक लगाएको चेतावनी दिएको छ ।

महान्यायाधिवक्ताले नोभेम्बरको सुरुमा मौखिक तर्कहरू सुन्न अनुरोध गरेका छन् ।

सुडान । सुडानको डारफर क्षेत्रमा परेको भीषण वर्षापछि गएको पहिरोमा पुरिएर कम्तीमा १०० जनाको शव फेला परेको विद्रोही समूहले जानकारी दिएको छ ।

डारफरको दुर्गम पहाडी क्षेत्र जेबेल मर्रा अन्तर्गत पर्ने तारासिन गाउँ पुरिँदा गाउँको झन्डै सम्पूर्ण जनसङ्ख्या समाप्त भएको प्रारम्भिक अनुमान गरिएको छ । उक्त क्षेत्रको नियन्त्रणमा रहेको सुडान मुक्ति सेना (एसएलएम)अन्तर्गतका अब्दुलवाहिद अल–नुर पक्षले बुधबार यो जानकारी दिएको हो ।

समूहका प्रवक्ता मोहम्मद अब्देलरहमान अल–नायरका अनुसार, “हिजो (मङ्गलबार) सम्म १०० वटा शव निकालिएका छन्, उद्धार कार्य अझै जारी छ, यद्यपि स्रोतसाधन सीमित छन् ।”

एक मात्रै बाँचेकाको आशङ्का

समूहद्वारा सार्वजनिक गरिएको भिडियोमा स्थानीय स्वयंसेवकहरू हिलो र ढुङ्गामाटो हटाउँदै नाङ्गा हातले शव फेला पारिरहेको देखिएको छ ।

प्रारम्भिक अनुमान अनुसार, गाउँमा रहेका एक हजार भन्दा बढी मानिसहरू मध्ये एकजना मात्र जीवित रहेका छन् । बाँकी सबै पहिरोमा पुरिएर ज्यान गुमाएको आशङ्का गरिएको छ ।

संयुक्त राष्ट्रसङ्घको चिन्ता

संयुक्त राष्ट्रसङ्घका प्रवक्ता स्टेफेन दुजारिकले घटनाबारे प्रतिक्रिया दिँदै भन्नुभयो,“पूरा क्षतिको विवरण आउन बाँकी छ, किनभने घटनास्थल अत्यन्तै दुर्गम भएकाले उद्धार र सहायता पुगोस् भन्ने चुनौतीपूर्ण छ ।”

युद्धबाट थलिएको डारफर, पहिरोको जोखिममा

सन् २०२३ मेबाट सुरु भएको सुडानी सेना र अर्धसैनिक द्रुत सहयोग बल ९आरएसएफ० बीचको द्वन्द्वका कारण हालसम्म दशौँ हजार नागरिकको ज्यान गएको छ र करिब एक करोड ४० लाख नागरिक विस्थापित भएका छन् ।

युद्धको चपेटाबाट जोगिन हजारौँ मानिसहरू एसएलएम नियन्त्रणमा रहेका क्षेत्रमा शरण लिन बाध्य भएका छन् ।
डारफर क्षेत्र विशेषगरी वर्षायाममा पर्वतीय भूभाग भएका कारण पहिरोको उच्च जोखिममा रहने गर्दछ ।

युक्रेन । रूसी सेनाले युक्रेनमा ५० हजारभन्दा बढी ड्रोन र मिसाइल प्रहार गरेपछि मुख्यतया देशको पश्चिमी भागमा विद्युत् आपूर्ति ठप्प भएको युक्रेनी अधिकारीहरूले बुधबार जानकारी दिएका छन् ।

किएभमा एएफपीका पत्रकारहरूले आक्रमणका क्रममा राजधानी र हवाई रक्षा प्रणालीमाथि विस्फोट सुनेका थिए ।

यो आक्रमण भ्लादिमिर पुटिनको चीन भ्रमणको समयमा भएको थियो । युक्रेनी अधिकारीका अनुसार बेलायतका रक्षामन्त्री जोन हेली सुरक्षा सहयोगबारे वार्ताका लागि युक्रेन आइपुगेको समयमा पनि आक्रमण जारी रह्यो ।

उत्तरी चेर्निगिभ क्षेत्रका प्रमुख भाचेस्लाभ चौसले भने, “नागरिक पूर्वाधारमा ड्रोन आक्रमणपछि ३० हजार मानिस बिजुलीविहीन भएका छन् ।”

युक्रेनको वायु सेनाले मस्कोले पाँच सय दुई ड्रोन र २४ मिसाइल प्रहार गरेको जनाएको छ । देशको पश्चिममा क्षेत्रीय अधिकारीहरूले धेरै मानिस घाइते भएको र आवासीय घर तथा नागरिक पूर्वाधार क्षतिग्रस्त भएको जानकारी दिएका छन् ।

“१४ स्थानमा तीनवटा मिसाइल र ६९ वटा स्ट्राइक ड्रोन प्रहार गरियो र खसालिएका प्रोजेक्टाइलको भग्नावशेष १४ स्थानमा खस्यो”, वायुसेनाले भनेको छ ।

किरोभोग्राड क्षेत्रका अधिकारीहरूले आक्रमणमा चार जना रेलवे कर्मचारी घाइते भएको र दर्जनौँ आवासीय भवन क्षतिग्रस्त भएको बताए ।

रुसले सन् २०२२ फेब्रुअरीमा युक्रेनमाथि आफ्नो पूर्ण आक्रमण सुरु गरेदेखि देशमा लगातार रात्रिकालीन ड्रोन र मिसाइल आक्रमण जारी राखेको छ, जसले दोस्रो विश्वयुद्धपछि युरोपमा सबैभन्दा घातक द्वन्द्व निम्त्याएको छ ।

गाजा । गाजामा बुधबार भएको इजरयली आक्रमणमा मृत्यु हुनेहरुको सङ्ख्या एक सय १२ पुगेको छ । तीमध्ये सहायताको खोजीमा रहेका २४ जनाको मृत्यु भएको प्यालेस्टिनी चिकित्सा स्रोतहरूले जनाएका छन् ।

अल शिफा अस्पतालमा ३६, शेख रादवान क्लिनिकमा पाँच जना, अल अहली अरब अस्पतालमा १३, अल अवदा अस्पतालमा १२, अल अक्सा शहीद अस्पतालमा छ र नासेर अस्पतालमा ४० जना मारिएका छन् ।

सन् २०२३ अक्टोबर ७ देखि इजरायली एकाइले गाजा पट्टीमा अभूतपूर्व आक्रमण जारी राखेको छ, जसमा हत्या, भोकमरी, विनाश र जबरजस्ती विस्थापन समावेश छन् ।

यस आक्रमण रोक्न अन्तर्राष्ट्रिय अदालत र विश्व समुदायका सबै आह्वान र आदेशहरूलाई बेवास्ता गरिएको छ ।

पट्टीमा यस आक्रमणको परिणामस्वरूप अहिलेसम्म ६३ हजार छ सय ३३ शहीद र एक लाख ६० हजार नौ सय १४ घाइते भएका छन् । तीमध्ये अधिकांश बालबालिका र महिला छन् ।

त्यस्तै नौ हजारभन्दा बढी व्यक्ति बेपत्ता छन् र सयौँ हजार विस्थापित भएका छन् ।

भारतको सेमिकन्डक्टर उद्योगको वृद्धिको महत्त्वपूर्ण मोडमा प्रधानमन्त्री नरेन्द्र मोदीले मङ्गलबार नयाँदिल्लीको यशोभूमि(भारत अन्तर्राष्ट्रिय सम्मेलन र एक्सपो सेन्टर) मा सेमिकन इन्डिया २०२५ को उद्घाटन गरेका छन् ।

जापान र चीन भ्रमणबाट फर्किएपछि उनले भने, “त्यो दिन टाढा छैन जब विश्वले भन्नेछ—भारतमा डिजाइन, भारतमा निर्मित, विश्वद्वारा विश्वास गरिएको ।” उनले सेमिकन्डक्टरलाई ‘डिजिटल हीरा’ भन्दै यसको महत्त्व उजागर गरे ।

देशको सबैभन्दा ठूलो सेमिकन्डक्टर र इलेक्ट्रोनिक्स शोमा २० हजारभन्दा बढी सहभागी, ४८ देशका प्रतिनिधि, ५० भन्दा बढी ग्लोबल सिएक्सओ र एक हजार दुई सय ७५ बुथहरू प्रस्तुत थिए । प्रधानमन्त्री मोदीले उद्योगमा भारतको नवप्रवर्तन र युवा शक्ति स्पष्ट रूपमा उपस्थित रहेकोमा जोड दिए ।

केन्द्रीय मन्त्री अश्विनी वैष्णवले भने, “सेप्टेम्बर २ मा प्रधानमन्त्रीलाई पहिलो मेड–इन–इन्डिया चिप प्रस्तुत गरियो । आगामी केही महिनामा थप पाइलट लाइनहरू पूरा हुने क्रममा छन् । विद्यार्थीहरूले डिजाइन गरेका २० वटा चिप पनि प्रदर्शन गरियो ।”

एसइएमआइका अध्यक्ष अजित मनोचाले भने, “भारतीय सेमिकन्डक्टर उद्योगले प्रधानमन्त्रीको दृष्टिकोणअनुसार तीव्र वृद्धि अनुभव गरिरहेको छ । एआई र टेक्नोलोजीमा प्रगतिसँगै हामी विश्वव्यापी स्तरमा मान्यता प्राप्त गर्दैछौँ ।”

एसइएमआइ इन्डिया र आइइएसएका अध्यक्ष अशोक चन्दकले १२ वटा समझदारी पत्रमा हस्ताक्षर भएको घोषणा गर्दै भारतलाई सेमिकन्डक्टर डिजाइन, निर्माण र प्रविधि विकासको विश्वव्यापी केन्द्र बनाउन सरकारको प्रतिबद्धता स्पष्ट भएको बताए ।

सेमिकन इन्डिया २०२५ ले ४८ देशका प्रतिनिधिहरूसँग एक हजार दुई सय ७५ बुथ र २० हजारभन्दा बढी सहभागीलाई एकै स्थानमा ल्याइदिएको छ ।

कार्यक्रमले उद्योगका नेताहरू, नवप्रवर्तक, नीति निर्माता, स्टार्टअप र शिक्षाविद्हरूलाई अर्धचालक क्षेत्रमा नवीनतम प्रवृत्ति, अवसर र चुनौतीहरूमा छलफल गर्न, विश्वव्यापी सहयोग प्रवद्र्धन गर्न र स्वदेशी नवप्रवर्तन समर्थन गर्न अवसर दिएको छ ।

कार्यक्रममा एप्लाइड मटेरियल्स, एएसएमएल, आइबिएम, इन्फिनियन, केएलए, लाम रिसर्च, मर्क, माइक्रोन, पिएसएमसी, र्‍यापिडस, स्यान्डिस्क, सिमेन्स, एसके हाइनिक्स, टाटा इलेक्ट्रोनिक्स, टोकियो इलेक्ट्रोन लगायत विश्वका प्रमुख कम्पनीहरूले सहभागिता जनाएका थिए ।

प्रधानमन्त्री मोदीको उद्घाटनले भारतको सेमिकन्डक्टर उद्योगमा नवप्रवर्तन, विश्वसनीयता र विश्वसामु प्रतिस्पर्धी क्षमता सुदृढ गर्ने महत्त्वपूर्ण सन्देश पठाएको छ ।

रुस । रुसले अझै पनि युक्रेनका आफ्ना कब्जामा रहेका भूभागलाई अन्तर्राष्ट्रिय मान्यता दिलाउन खोजिरहेको जनाएको छ ।

रुसका विदेशमन्त्री सर्गेई लाभरोभले बुधबार मस्कोमा प्रकाशित टिप्पणीमा कुनै पनि शान्ति सम्झौतामा ती भूमि ‘रुसी भूभाग’ का रूपमा औपचारिक रूपमा मान्यता पाउनुपर्ने बताएको छन् ।

युक्रेनले भने आफ्नो कुनै पनि भूभागमा रुसी नियन्त्रणलाई कहिल्यै स्वीकार नगर्ने र मस्कोले कब्जा गरेका भूमि पुनःफिर्ता गर्ने अडान लिएको छ ।

रुसले डोनेट्स्क, लुगान्स्क, खेरसन र जापोरिझिया क्षेत्रका साथै सन् २०१४ मा कब्जा गरेको क्रिमियन प्रायद्वीपलाई आफ्नो भएको दाबी गर्दै आएको छ ।

लाभरोभले भने, “स्थायी शान्तिका लागि नयाँ क्षेत्रीय वास्तविकताहरू अन्तर्राष्ट्रिय कानूनअनुसार मान्यता प्राप्त र औपचारिक हुनुपर्छ ।”

शान्ति वार्ता र अड्चन-

रुसी आक्रमणपछि कब्जा गरिएका भूमि कसको नियन्त्रणमा रहने भन्ने प्रश्न नै युक्रेन–रुसबीचको रोकिएको शान्ति वार्ताको प्रमुख अड्चन बनेको छ ।

युक्रेनले युद्धविरामलाई प्राथमिकता दिएको छ भने रुसले पूर्ण सम्झौता नभएसम्म आक्रमण रोक्न अस्वीकार गरेको छ ।

गत हप्ता वार्ता आयोजना गर्ने प्रयत्न गरिरहेको टर्कीका अनुसार रुसी राष्ट्रपति भ्लादिमिर पुटिनले डोनेट्स्क क्षेत्र पूर्ण रूपमा छाडेमा दक्षिणी खेरसन र जापोरिझियामा मोर्चा स्थिर राख्ने प्रस्ताव गरेका थिए ।

रुसी नियन्त्रण र युक्रेनी प्रतिरोध-

युद्ध अध्ययन संस्थान (आइएसडब्लु) का अनुसार रुसले लुगान्स्कमा लगभग पूर्ण नियन्त्रण जमाएको छ र डोनेट्स्कको करिब ८० प्रतिशत क्षेत्रमा नियन्त्रण कायम गरेको छ । खेरसन र जापोरिझियाका ठूलो भूभाग पनि रुसी कब्जामा छन्, यद्यपि दुबै क्षेत्रका राजधानीहरू अझै युक्रेनकै नियन्त्रणमा छन् ।

सन् २०१४ मा युरोप समर्थक क्रान्तिपछि पूर्वी युक्रेनमा रुसी समर्थित सशस्त्र पृथकतावादीको विद्रोह सुरू भएको थियो । एक दशकभन्दा बढी लामो द्वन्द्वले युक्रेनको औद्योगिक पूर्वी क्षेत्रलाई ध्वस्त पारेको छ ।

संयुक्त राष्ट्रसङ्घको आणविक निगरानी संस्था (आइएइए) ले मङ्गलबार यसका निरीक्षकहरूले सिरियाको एक पुरानो साइटमा युरेनियमको निशान फेला पारेको जानकारी दिएको छ । यो अघिल्लो सरकारले गोप्य आणविक कार्यक्रम सञ्चालन गरेको स्थल हो भन्ने विश्वास गरिएको छ ।

पूर्वराष्ट्रपति बशर अल–असदको नेतृत्वमा सिरियाले अघोषित व्यापक आणविक कार्यक्रम चलाएको आशङ्का गरिँदै आएको थियो । यसमा उत्तर कोरियाले निर्माण गरेको भनिने देइर अल–जौर प्रान्तस्थित अघोषित आणविक रिएक्टर पनि समावेश थियो ।

अन्तर्राष्ट्रिय आणविक ऊर्जा एजेन्सी (आइएइए) का महानिर्देशक राफेल मारियानो ग्रोसीले पहिले एसोसिएटेड प्रेससँग भनेका थिए, “सिरियाको केही गतिविधि एजेन्सीको दृष्टिमा सम्भवतः आणविक हतियारसँग सम्बन्धित देखिन्छ ।”

गत वर्ष आइएइएका निरीक्षकहरूले देइर अल–जौरसँग ‘कार्यात्मक रूपमा सम्बन्धित’ भनिएका तीन स्थानमा वातावरणीय नमूना सङ्कलन गरेका थिए । तीमध्ये एक स्थानमा लिइएका नमूनामा ‘मानवजनित प्राकृतिक युरेनियम कणहरूको महत्त्वपूर्ण सङ्ख्या’ भेटिएको प्रवक्ता फ्रेडरिक डाहलले विज्ञप्तिमा बताए ।

उनका अनुसार यीमध्ये केही युरेनियम कणहरू युरेनियम अयस्कलाई युरेनियम अक्साइडमा रूपान्तरण गर्ने प्रक्रियासँग मेल खान्छन्, जुन रिएक्टरसँग सम्बन्धित गतिविधिको सङ्केत हुनसक्छ ।

ग्रोसीले सोमबार एजेन्सीको निर्देशक बोर्डलाई प्रस्तुत गरेको प्रतिवेदनमा यी निष्कर्षहरू समावेश गरेको छ ।

देइर अल–जौर साइटबारे सार्वजनिक जानकारी भने सन् २००७ मा इजरायलको हवाई आक्रमणपछि मात्र बाहिर आएको हो ।

मध्यपूर्वमा एक मात्र आणविक हतियार भएको देश मानिने इजरायलले आफ्नो कार्यक्रमबारे आधिकारिक घोषणा भने गरेको छैन । आक्रमणपछि सिरियाले उक्त स्थललाई समतल बनायो र आइएइएका प्रश्नहरूको पूर्ण जवाफ कहिल्यै दिएन ।

आइएइएको टोलीले गत वर्ष असद सत्तामा रहँदा केही चासोका स्थलहरूको भ्रमण गरेको थियो । असदको पतनपछि अन्तरिम राष्ट्रपति अहमद अल–साराको नेतृत्वमा बनेको नयाँ सरकारले एजेन्सीसँग सहकार्य गर्ने सहमति जनाएको छ र निरीक्षकहरूलाई युरेनियम भेटिएको ठाउँमा पुनः प्रवेशको अनुमति दिएको छ ।

निरीक्षकहरूले त्यहाँ थप नमूना सङ्कलन गरेका छन् । डाहलले भने, “यी सबै नमूनाका नतिजा तथा देइर अल–जौर साइटको योजनाबद्ध भ्रमणबाट प्राप्त जानकारीको मूल्याङ्कन गरिनेछ र आवश्यकता परेमा थप फलो–अप गतिविधि सञ्चालन हुनेछ ।”

यसै वर्ष जुनमा दमास्कस भ्रमणका क्रममा ग्रोसीले एपीसँग राष्ट्रपति अल–साराले भविष्यमा सिरियामा आणविक ऊर्जा विकास गर्ने चासो देखाएको बताएको थियो ।

उनका अनुसार यस क्षेत्रमा अन्य धेरै मुलुकहरू पनि कुनै न कुनै रूपमा आणविक उर्जाको खोजीमा छन् । सिरियाले विशेषगरी साना मोड्युलर रिएक्टरमा चासो देखाएको हुनसक्ने उनले उल्लेख गरे । यी परम्परागत ठूला रिएक्टरहरूभन्दा सस्तो र प्रयोगमैत्री हुने बताइन्छ ।

ग्रोसीले भने, “आइएइए सिरियाको स्वास्थ्य प्रणालीलाई सुदृढ बनाउन सहयोग गर्न इच्छुक छ, जसलाई करिब १४ वर्ष लामो गृहयुद्धले गम्भीर रूपमा कमजोर पारेको छ । यस अन्तर्गत रेडियोथेरापी, आणविक औषधि र क्यान्सर उपचार (ओन्कोलोजी) पूर्वाधार पुनर्निर्माणमा सहयोग उपलब्ध गराउन सकिन्छ ।”