Author: nepalone

मोरङ । भदौ २३ र २४ गतेको जेनजी प्रदर्शननका क्रममा सरकारी र निजी सम्पत्तिमा भएको तोडफोड र आगजनीबाट पुगेको क्षतिको विवरण संकलन थालिएको छ । जेनजी आन्दोलनका क्रममा कोशी प्रदेशको मोरङ, सुनसरी झापा, इलाम, उदयपुर लगायतका जिल्लामा बढी तोडफोड र आगजनी भएको थियो ।

प्रदर्शनकारीले गरेको आक्रमणका कारण अधिकांश प्रहरी कार्यालय समेत विस्थापित भएकाले पुनस्र्थापना गरी क्षतिको विवरण संकलन सुरु भएको छ । प्रदर्शन भएको एक साता बित्दा समेत सरकारी निकायहरू विवरण संकलनमै छन् ।आन्दोलनका क्रममा प्रदेशका ५७ वटा प्रहरीका भवनमा आगजनी र तोडफोड भएका प्रदेश प्रहरी कार्यालयले जनाएको छ । तीमध्ये २४ वटा भवन आन्दोलनका क्रममा पूर्ण क्षति भएको प्रदेश प्रहरीका प्रवक्ता वरिष्ठ प्रहरी उपरीक्षक दीपक पोख्रेलले जानकारी दिए ।

उनका अनुसार ३३ वटा प्रहरीका भवनहरूमा आंशिक क्षति पुगेको छ । त्यहाँभित्रका फर्निचर, ल्यापटप तथा कागजपत्रहरुको बारेमा अझै विवरण संकलन भइसकेको छैन । आन्दोलनका क्रममा अराजक समूहले उत्पात मच्चाउँदा ८४ वटा प्रहरीका सवारी साधनमा पूर्णरूपले क्षति पुगेको छ । तीमध्ये ८ वटा हेभी सवारी साधन छन् ।यस्तै प्रहरीले चढ्दै आएको २२ वटा लाइट भ्यान आन्दोलनका पूर्ण रूपमा क्षति पुगेको छ । बाँकी मोटरसाइकल रहेको प्रहरीले जनाएको छ ।प्रदर्शनका क्रममा अराजक समूहको ढुङ्गा मुढा प्रहारबाट कोशी प्रदेशमा ११४ जना प्रहरी घाइते भएका छन् । घाइते भएका मध्ये ६ जनाको अहिले पनि उपचार भइरहेको छ । तीमध्ये ३ जनाको अवस्था गम्भीर रहेको प्रहरीले जनाएको छ ।

वरिष्ठ प्रहरी उपरीक्षक पोख्रेलले भने, ‘घाइतेमध्ये एक जनाको आइसियुमा उपचार भइरहेको छ । उहाँको अवस्था खतरामुक्ते छ ।’ प्रदर्शनका क्रममा जिल्ला प्रहरी कार्यालय भन्दा मुनिका प्रहरीका कार्यालयहरू विस्थापित भएका थिए । प्रदर्शनकारीले आगजनी, तोडफोड र आक्रमण जारी राखेपछि प्रहरीहरू समेत भागेका थिए ।उनले पुनस्र्थापना भई नसके पनि प्रहरीले सबै युनिटबाट सेवा दिन थालेको बताए । उनले भने, ‘विस्थापित भएका सबै प्रहरीहरू सम्पर्कमा आएका छन् । उनीहरूले तत् तत् स्थान र अवस्थाबाट सेवा दिन थालेका छन् । ’

कति सरकारी भवनमा आगाजनी ?
जेनजी आन्दोलनका क्रममा अराजक समूहले तोडफोड र आगजनी गर्दा कोशी प्रदेशमा प्रदर्शनका क्रममा ५ सय भन्दा बढी सरकारी भवनमा क्षति पुगेको छ । प्रदेशका विभिन्न जिल्लाहरूमा सरकारी निजी र पाटी कार्यालय गरेर ५ सय भन्दा बढी सरकारी कार्यालयमा क्षति भएको हो ।

झापा मोरङ, सुनसरी, उदयपुर र इलाममा मात्रै ४ सय ३८ वटा सरकारी भवनमा क्षति पुगेको छ । ती मध्ये आधा जसो पूर्ण र आधा आंशिक क्षति भएका हुन् । पहाडी जिल्लामा भएको क्षतिको भने विवरण आई नसकेको प्रहरीले जनाएको छ। प्रदर्शनका क्रममा झापामा मात्रै १०६ वटा भवनहरूमा आगजनी गरिएको छ । जिल्ला प्रशासन कार्यालय झापाका अनुसार आगजनीबाट १२ वटा स्थानीय तहको भवनमा क्षति पुगेको छ । ती भवनहरूमा आगो लगाइको छ ।

ती भवन भित्र रहेका सामाग्रीमा पुगेको क्षतिको विवरण अहिले सम्म सङ्कलन भइसकेको छैन । प्रदर्शनका क्रममा झापामा मात्रै ५५ वटा वडा कार्यालयमा आगजनी भएको प्रमुख जिल्ला अधिकारी गोपाल अधिकारीले जानकारी दिए ।
जेनजी आन्दोलनका क्रममा अराजक समूहले सङ्घीय सरकार मातहतमा रहेका १० वटा, प्रदेश सरकार मातहत रहेका ३ वटा भवनमा क्षति पुगेको छ । ती भवनहरूमा आगो लगाइएको छ ।

यस्तै तीन वटा दलको कार्यालयमा समेत आगो लगाइएको प्रमुख जिल्ला अधिकारीले जानकारी दिए । आन्दोलनका क्रममा सवारी साधनमा पुगेको क्षतिको बारेमा अझै विवरण संकलन भइसकेको छैन । यसै गरी इलाममा भने २८ वटा भवनमा तोडफोड र आगजनी भएको छ । तोडफोडमा बाट २ वटा स्थानीय तहको भवनमा क्षति पुगेको छ । आगजनी र तोडफोडबाट ९ वटा वडा कार्यालयमा क्षति पुगेको इलामका प्रमुख जिल्ला अधिकारी सुनिता नेपालले बताइन् । उनका अनुसार इलाममा तीन वटा पाटी कार्यालय २ वटा सङ्घ संस्थाका भवनमा क्षति पुगेको छ ।

मोरङमा १५५ वटामा क्षति

मोरङमा भने १५५ वटा सरकारी भवनमा क्षति पुगेको छ । कुन अवस्थाको क्षति भएको भने खुलिसकेको छैन । सरकारी कार्यालयमा भएको क्षतिको विवरण सङ्कलनका लागि सहायक प्रमुख जिल्ला अधिकारी सरोज कोइरालाको संयोजकत्वमा समिति गठन भएको थियो सो समितिले मोरङमा क्षति भएका सरकारी भवनहरूको विवरण सार्वजनिक भएको हो ।

कोइरालाले मोरङमा सबै भन्दा बढी वडा कार्यालय भवनमा क्षति पुगेको बताए । उनका अनुसार मोरङमा रहेको विभिन्न ५८ वटा वडा कार्यालय,२१ वटा संघीय सरकार अन्तरगतका भवनमा तोडफोड भएको छ ।

प्रदेश सरकार अन्तरगतका १४ वटा १० वटा पालिका भवन, १५ वटा निजी घरमा तोडफोड र आगजनी भएको सहायक प्रमुख जिल्ला अधिकारी कोइरालाले बताए । उनका अनुसार ८ वटा पाटी कार्यालय, ४ वटा सङ्घ संस्थाका भवन, ३ वटा व्यापारिक कम्प्लेक्स, १७ वटा सशस्त्र जनपद प्रहरीको भवन र ४ वटा सशस्त्र प्रहरीको भवनमा क्षति पुगेको छ ।

प्रदर्शनका क्रममा सुनसरीमा २४ वटा सरकारी भवनमा पूर्ण रूपमा क्षति भएको छ । १२ वटा व्यक्तिको निजी भवनमा क्षति भएको छ । विभिन्न राजनीतिक दलका ८ वटा भवनमा आगो लगाइएको जिल्ला प्रहरी कार्यालय सुनसरीले जनाएको छ । ११ वटा सरकारी भवनमा आंशिक क्षति पुगेको प्रहरीले जनाएको छ ।

काठमाडौं । प्रधानमन्त्री सुशीला कार्कीले अब संसद पुनर्स्थापना हुने सम्भावना नरहेको बताएकी छन् । बीबीसी नेपाली सेवासँग एक अन्तर्वार्ताका क्रममा उनले संसद् ‘डिमोरलाइज्ड’ भइसकेको भन्दै अब पुनः स्थापनाको सम्भावना नरहेको बताएकी हुन् । सर्वोच्चले संसद् पुनः स्थापना गर्न पनि सक्छ भन्ने प्रश्नमा उनले भनेकी छ, ‘सर्वोच्च वा कुनै अदालतले बोलेपछि त्यो त माान्नु पर्‍यो । ठिक छ भन्ने नै हो । जबजसम्म काम गर्न पाउँछौँ त्योसम्म हामी गर्छौ । जहाँसम्म मलाई लाग्छ अब संसद् एक्टिभ हुने अवस्था छैन । डिमोरलाइज्ड अवस्थामा छ । दलहरू डिमोरलाइज्छ अवस्थामा छन् । अब निर्वाचन नै प्रमुख कुरा हो ।’

अन्तर्वाताका क्रममा उनले आफ्नो मन्त्रिपरिषद् ११ सदस्यीयसम्म हुने उनले बताएकी छन् । बरु एक व्यक्तिलाई दुई मन्त्रालयको जिम्मेवारी दिएर कम मन्त्रिमण्डल बनाउने तयारी रहेको उनको भनाइ छ । राष्ट्रपति रामचन्द्र पौडेलले राजनीतिक व्यक्तिलाई पनि मन्त्रीपरिषद्मा राख्न सुझाव दिएकोमा आफूले त्यसलाई इन्कार गरेको र गैरराजनीतिक व्यक्तिलाई मात्र मन्त्री बनाउने कार्कीले बताइन् । उनले बरु महिला, आदिवासी, जनजाति, दलित, पिछडिएकोलगायत कलस्टरबाट समावेश गर्ने गरी तयारी भएको समेत बताइन् । उनले ६ महिनामा सकभर निर्वाचन गराइछाड्ने प्रतिवद्धता व्यक्त गरिन् ।

‘६ महिनामा निर्वाचन भएन भने अर्को एक-दुई महिना जाला । हामी सकेसम्म निर्वाचन मिति थप्ने पक्षमा छैनौँ’, उनले भनिन् । युवाहरूको मागअनुसार सुशासन कायम गर्न सरकारले काम गर्ने उनको भनाइ छ । अहिले मानवीय र भौतिक क्षति भएको र उच्चस्तरीय न्यायीक जाँचबुझ समितिको प्रतिवेदनअनुसार सबैलाई कारबाहीको दायरामा ल्याइने पनि कार्कीले बताइन् । उनले मित्र राष्ट्र चीन र भारतसँग सम्बन्ध नबिग्रिएको भन्दै यस अन्तरिम सरकारले पनि मित्रवत सम्बन्ध होस् भन्ने सोचेको बताइन् ।

उनले काम गर्न सक्दिन जस्तो नलागेको बताएकी छन् । ‘वातावरण पाए भने काम गर्न सक्दिनँ भन्ने लाग्दैन । २७ गते राति मेरो सपथ भएको थियो । २८ गते शनिबार थियो । त्यस दिन पनि मैले दिनभर काम गरें । म दिनदिनै काम गर्न सक्छु । अहिले पनि सक्रिय छु । शरीरले गर्न नसक्ने बनाएको छैन’, उनले भनिन्, ‘अर्को कुरा के छ भने मैले राम्राराम्रा व्यक्तिलाई चुनेको छु । ती सबै सहयोगी छन् । उनीहरू पनि म जत्तिकै आफ्नो इज्जत राख्नेमा छन् । रामेश्वरजी, कुलमान, ओम सबै । म आफूलाई भन्दिनँ यिनीहरू त हिरा नै हुन् । यस्ता व्यक्तिको सहयोग छ । तर म सबै कुराको जिम्मा लिन्न नि । उहाँहरू सबैलाई बाँडिदिएको छ । अहिले पनि म खटिरहेको छु । यति खटेपछि भगवानले मलाई बदनाम गराउलान जस्तो लागेको छैन । काम गर्न सक्छु भन्नेमा छु ।’ कार्कीले अबको आउने निर्वाचनमा आफू उम्मेदवार नहुने पनि बनाइन् । निर्वाचन गराएपछि आफू खुला संसारमा पुगेको महसुस गर्ने उनको भनाइ छ ।

काठमाडौं । अर्थमन्त्री रामेश्वर खनालले जेनजी आन्दोलनका क्रममा आगजनी गरिएको कोटेश्वरस्थित भाटभटेनीको भवनको अवलोकन गरेका छन् । अर्थ सचिवलाई लिएर उनी खण्डहर बनाइएको भवन अवलोकनका लागि पुगेका थिए । अवलोकनका क्रममा अर्थमन्त्री खनालले भाटभटेनीका सञ्चालक मीनबहादुर गुरुङलाई भेटेर सान्त्वना समेत दिएका छन् ।

अर्थमन्त्री खनालको उपस्थितिले संस्थालाई दृढता र हौसला मिलेको उनले बताएका थिए । ‘उहाँको उपस्थितिले हामीलाई दृढता र हौसला मिलेको छ, जसले हामीलाई अझ सबल भएर अघि बढ्न प्रेरित गरेको छ’, भाटभटेनीले सामाजिक सञ्जालमार्फत् भनेको छ, ‘भौतिक संरचना भत्किन सक्छ, तर भाटभटेनीको आत्मा कहिल्यै टुट्दैन । हामी अझ सबल भएर पुनर्निर्माण गर्नेछौं र नेपाली जनताको सेवामा निरन्तर प्रतिबद्ध रहनेछौं ।’

कम्पनीले विपत्तिका बीच पनि अझ सबल भएर पुनर्निर्माण गर्ने र जनताको सेवामा निरन्तर प्रतिबद्ध रहने प्रतिबद्धता जनाएको छ । जेनजी आन्दोलनकाक्रममा देशभर रहेका विभिन्न भाटभटेनीमा तोडफोड, लुटपाट तथा आगजनी गरिएको थियो । आगजनीबाट जोगिएका शाखाहरू पुनः सञ्चालनमा आइसकेका छन् । भाटभटेनी केवल पसल मात्र नभएर परिवार समेत रहेकोले अब पुनः उही विश्वास, माया र प्रतिबद्धतासहित सेवा दिन तयार रहेको जनाएको छ ।

काठमाडौं । गृहमन्त्री ओमप्रकाश अर्यालले उच्च मनोबलका साथ काममा खटिन ट्राफिक प्रहरीलाई निर्देशन दिएका छन् । उनले आज काठमाडौं उपत्यका ट्राफिक प्रहरी कार्यालयको निरीक्षण गर्दै उक्त निर्देशन दिएका हुन् ।
सोही क्रममा गृहमन्त्री अर्याललाई काठमाडौं उपत्यका प्रहरी कार्यालयका प्रमुख, प्रहरी अतिरिक्त महानिरीक्षक दानबहादुर कार्की, काठमाडौं उपत्यका ट्राफिक प्रहरी कार्यालय प्रमुख, प्रहरी वरिष्ठ उपरीक्षक नवराज अधिकारीलगायतले ट्राफिक प्रहरी कार्यालयको पछिल्लो अवस्थाका बारेमा जानकारी गराएका थिए ।

सो अवसरमा गृहमन्त्री अर्यालले ट्राफिक प्रहरीका भवन निर्माणलगायतमा सरकारले पूर्ण सहयोग गर्ने प्रतिबद्धता व्यक्त गरे । यही भदौ २३ र २४ गते भएको ‘जेनजी पुस्ता’ को आन्दोलनका क्रममा काठमाडौं उपत्यका ट्राफिक प्रहरी कार्यालय, ट्राफिक पोसाक र साधन समेत जलेर नष्ट भएका थिए ।

काठमाडौं । जेनजी आन्दोलनका क्रममा ज्यान गुमाएकाहरूको शवयात्रामा ऊर्जामन्त्री कुलमान घिसिङ र गृह तथा कानूनमन्त्री सहभागी भएका छन् । ऊर्जामन्त्री कुलमान घिसिङ गोपीकृष्ण हलबाट र गृह तथा कानूनमन्त्री ओमप्रकाश अर्याल चाबहिल चोकबाट जेनजीको शवयात्रामा सहभागी भएका हुन् । कुलमानले राष्ट्रिय झण्डा बोकेका छन् भने कानूनमन्त्रीले राष्ट्रिय झण्डा ओढेका छन्।

मृतक परिवारका सदस्य र आफन्तहरूले शवयात्रा सहित अन्त्येष्टि गर्न लागेका हुन् । अहिले मृतकका शवहरू अन्त्येष्टिका लागि शवयात्रा निकालिएको हो । त्रिवि शिक्षण अस्पतालबाट शवहरू चक्रपथ हुँदै पशुपति आर्यघाट लगिने तयारी छ। शवयात्राका लागि पुगेकाहरूले मृतकका फोटो र राष्ट्रिय झण्डा बोकेका छन् ।

कतिपयले ‘निःसन्तानलाई के थाहा जेनजीको सपना ?’ लेखिएको कपडाले शरीर छोपेका छन् । सरकारले जेनजी आन्दोलनमा मृत्यु भएकाहरुलाई शहीद घोषणा गर्ने, राष्ट्रिय सम्मानका साथ अन्त्येष्टि गर्ने र राष्ट्रिय शोक स्वरुप असोज १ गते सार्वजनिक बिदा दिने लगायत निर्णय गरेको थियो ।

त्यसपछि मृतकका परिवार अन्त्येष्टि गर्न तयार भएका हुन् । भ्रष्टाचार र सामाजिक सञ्जाल प्रतिबन्ध विरुद्ध युवाहरूले गरेको प्रदर्शन हिंसात्मक बन्दा ७२ जनाको मृत्यु भएको छ । मृत्यु हुनेमा धेरैजसो गोली लागेकाहरू छन् । कतिपयका शव आगोमा जलेको अवस्थामा भेटिएका छन् ।

काठमाडौं । नव नियुक्त प्रधानमन्त्री सुशीला कार्की र राष्ट्रियसभाका अध्यक्ष नारायणप्रसाद दाहालबीच भेटवार्ता भएको छ । राष्ट्रियसभा अध्यक्ष दाहाल प्रधानमन्त्री कार्कीलाई भेट्न मंगलबार बिहान प्रधानमन्त्री निवास बालुवाटार पुगेका थिए । भेटमा उनले प्रधानमन्त्री कार्कीलाई बधाई तथा कार्यकाल सफलताको शुभकामना व्यक्त गरे ।

भेटमा देशको विकसित घटनाक्रम र समसामयिक राजनीतिक अवस्थाका विषयमा उनीहरूबीच छलफल भएको राष्ट्रियसभा अध्यक्ष दाहालको सचिवालयले जनाएको छ । सो अवसरमा अध्यक्ष दाहालले राष्ट्रियसभाको कामकारबाही, अवस्था र बानेश्वरस्थित संघीय संसद् भवन तथा सिंहदरबारस्थित संघीय संसद् सचिवालयमा भएको क्षतिका बारेमा जानकारी गराएका थिए । भेटमा प्रधानमन्त्री कार्कीले देशलाई शान्ति र स्थिरतातर्फ लैजान राष्ट्रियसभाको महत्त्वपूर्ण भूमिका हुने उल्लेख गर्दै वर्तमान राष्ट्रिय संकटलाई सही निकास दिन सबैले सहकार्य गरी अघि बढ्न आग्रह गरिन् ।

काठमाडौं । नेकपा एकीकृत समाजवादीका अध्यक्ष तथा पूर्व प्रधानमन्त्री माधव नेपाल पनि पार्टी काममा फर्किएका छन् । जेनजी आन्दोलनले उग्ररूप लिएपछि सेनाको सुरक्षामा रहेका अध्यक्ष नेपाल सेनाको सुरक्षाबाट बाहिर आएका हुन् । सेनाको सुरक्षाबाट फर्किएपछि आज कोटेश्वरमा आन्दोलनकारीले जलाएको घर हेर्न पुगेका छन् । प्रदर्शनकारीले भदौ २४ गते नेपालको घरमा समेत आगजनी गरिदिएका थिए ।

अध्यक्ष नेपालसँग उपमहासचिव मेटमणि चौधरी, पोलिटब्युरो सदस्य सुदेश पराजुली, अनेरास्ववियूका अध्यक्ष महेश श्रेष्ठलगायत साथमा थिए । आन्दोलनपछि अवस्था सामान्य बन्न थालेपछि शीर्ष नेताहरु धमाधम बाहिर निस्किन थालेका छन्। आजै नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ पनि पार्टी कार्यालय पेरिसडाँडा पुगेर अवलोकन गरेका छन् । उनीले आगजनीबाट कार्यालयमा धेरै क्षति भएको भन्दै अब नयाँ र भव्य कार्यालय बनाइने बताएका छन्।

काठमाडौं । यो वर्ष दशैंको अग्रिम टिकट बुकिङ नखुल्ने भएको छ । यातायात व्यवस्था विभाग, यातायात व्यवसायी र ट्राफिक प्रहरीहरुबीच आज भएको छलफलमा यस वर्ष दशैंको लागि अग्रिम टिकट बुकिङ नखुलाउने निर्णय गरेको हो।आन्दोलनपछि लगाएको कफ्‌र्यु हटेपछि तीन अघिदेखि टिकट काटेर सेवा सुरु भइसकेकाले यस वर्ष अग्रिम टिकट बुकिङ नखुलाउने निर्णय भएको यातायात व्यवस्था विभागका महानिर्देशक राजीव पोखरेलले बताए ।

‘विद्यालय स्कुल बन्द भइसकेकाले धेरै मानिसहरु घर जान थालेकाले यस वर्ष अग्रिम टिकट बुकिङ नखुलाउने सहमति भएको छ’, उनले भने । यसपालि चाडपर्वमा यातायात सहज हुने उनले बताए । अहिलेसम्म सडकको अवस्था सहज रहेको उनको भनाइ छ ।

काठमाडौं । धरान उपमहानगरपालिकाका मेयर हर्क साम्पाङ जेनजी आन्दोलनपछि सिर्जित परिस्थिति सम्झिँदै धुरुधुरु रोएका छन् । प्रधानमन्त्री बन्ने उद्देश्यले काठमाडौं आएका उनी मन्त्री पनि नबनि रित्तो हात घर फर्किएका थिए ।
काठमाडौंबाट धरान पुगेपछि पत्रकारहरूको भेटमा विदेशीले देशलाई टेकओभर गर्न सक्ने खतरा रहेको भन्दै उनी भक्कानिएका हुन् । धरानमा केही सञ्चारकर्मीसँग कुरा गर्दै साम्पाङले आफूलाई खानेपानी र श्रम मन्त्री दिइएको भए पनि स्वीकार नगरेको दावी गरेका छन् ।

केही पत्रकारले ‘यतिखेर नरुनुस्’ भनेर समेत सम्झाएका थिए । त्यसपछि सम्हालिँदै हर्कले भने, ‘विदेशीले यतिखेर टेकओभर गर्न सक्ने सम्भावना छ । सबै नेताहरू भागाभाग छन् । कोही रक्ताम्य छन् । कोही बागमतीमा कुटाइ खाँदै गरेको देखिन्छ ।’

हर्कले भने, ‘पार्टीहरूका कार्यालय तहसनहस छन् । अब को शक्ति आउने हो देशमा ? कोही छैन । कसले त्यस्तो ग¥यो, कसरी त्यस्तो भयो भन्ने कसैलाई थाहा नभएको स्थिति छ । अनि मलाई सबै मान्छेले काठमाडौै जानु भने । त्यत्रो मान्छेले भनिसकेपछि मलाई लाग्यो, म त देश बनाउन आएको मान्छे हो ।’

उनले भने, ‘मलाई हिम्मत हारेको मान्छे भन्नुहुन्छ तपाईँहरू… म जतिको हिम्मतिलो मान्छे यो देशमा कोही पनि छैन ।’ आफूलाई शुभचिन्तकहरूले काठमाडौंमा गोली लाग्न सक्छ भन्दा पनि ‘लाग्छ भने लागोस्’ भनेर गएको बताए । नेता भनाउँदाहरूले सबै लुकिरहेको वेलामा यो देश बचाउनलाई आफूले आगोमा हामफाल्ने निर्णय गरेको समेत सुनाए । यही कारण धरानबाट पाँच सय किलोमिटर टाढा काठमाडौं पुगेको बताए ।

आफूलाई प्रधानमन्त्री बनाउने विषयमा काठमाडौंमा धेरै छलफल भए पनि निकास ननिस्किएको बताए । ‘यो अटेरी छ, हाम्रो लाइनमा आउँदैन भन्ने कुरा भएछ । मिनिस्टर हुनलाई सहमति गर्नुपर्ने रे । त्यस्तो खालको मान्छे होइन म । अरूलाई ढोगेर पद पाउँ भन्ने खालको मान्छे होइन म । धरानको मेयर टीका लगाएर होइन, १० वर्षसम्म एक्लै चप्पल पड्काएर अभियान चलाएर पाएको हो’, उनले ।

उनले यो सरकार गठनमा एक गेमर भएको अपुष्ट आरोप पनि लगाएका छन् । त्यही गेमर व्यक्तिले सम्पूर्ण क्षति र हत्याको जिम्मा लिनुपर्ने उनको भनाइ छ । गत भदौ २३ र २४ गते भएको आन्दोलनपछि मेयर हर्क प्रधानमन्त्री बन्न काठमाडौं आएका थिए । प्रधानमन्त्री बन्न नसकेपछि मन्त्री बन्नलाई शीतलनिवासमा पुगेको समाचार पनि बाहिरिएको थियो । धरान उपमहानगरकै गाडीमा काठमाडौं आएका उनी अहिले धरान फर्किएर त्यहाँ पत्रकारहरूसँग भेटघाट गरेका हुन् ।

काठमाडौं । प्रधानमन्त्री सुशीला कार्कीले वरिष्ठ नेत्र रोग चिकित्सक सन्दुक रुइतसँग छलफल गरेकी छन् । मंगलबार तिलगंगा आँखा प्रतिष्ठानमा पुगेर प्रधानमन्त्री कार्कीले रुइतलाई आफ्नो नेतृत्वको सरकारमा सहभागी हुन आग्रह गरेकी हुन् । प्रधानमन्त्री कार्कीले विशेष परिस्थितिमा आफूले सरकारको नेतृत्व गर्नु परेकाले सहयोग गर्न डा. रुइतसँग आग्रह गरेकी थिइन् ।

जवाफमा डा. रुइतले आफूले सरकारलाई सहयोग गर्ने तर, सरकारमा सहभागी हुन नसक्ने जवाफ दिएका छन् । छलफलपछि डा. रुइतले आफूले अस्पतालको काम र बिरामीलाई छाड्न नसक्ने बताए । सञ्चारकर्मीले क्याविनेटमा आउने हो भनेर सोधेको प्रश्नमा उनले भने, ‘यहाँ छोडेर आउने ? यत्रो छ काम यहाँ छोडेर आउने ? बिरामीलाई छाडेर आउँदैन ।’ जेनजी आन्दोलनपछि बनेको अन्तरिम सरकारको मन्त्री बन्ने चर्चा चलेपछि रुइतले भने आफू चिकित्सकीय पेसामार्फत नागरिकको सेवामा तल्लिन हुने बताउँदै आएका छन् ।

काठमाडौं । काठमाडौं । नेकपा माओवादी केन्द्रले नयाँ पार्टी केन्द्रीय कार्यालय बनाउने भएको छ । जेनजी आन्दोलनको क्रममा कोटेश्वर पेरिसडाँडामा आगजनी भएपछि माओवादी केन्द्रले नयाँ र भव्य केन्द्रीय कार्यालय बनाउने बताएको हो ।

जेनजी आन्दोलनपछि आज पहिलो पटक पार्टी केन्द्रीय कार्यालय अनुगमन गरेपछि प्रचण्डले भने, ‘देशभरका कार्यकर्ताहरुको सहयोगमा नयाँ र भव्य पार्टी कार्यालय बनाइने छ ।’ पार्टी कार्यालय कहाँ बन्छ भनेर उनले खुलाएनन् ।
अवलोकनपछि उनले बैठकका माइन्युट, पुस्तकालय र केही कम्प्युटरहरु जोगिएको बताएका छन् । ती जोगाउन भूमिका खेलेको भन्दै उनले कर्मचारी र कार्यकर्ताहरुलाई समेत धन्यवाद दिएका छन् ।